පැයට කිලෝමීටර් 21,000ක වේගයෙන් ගමන්ගත් අමෙරිකානු පර්යේශණ ගුවන්යානයක් පුපුරා යයි!


පැයට සැතපුම් 13000ක (පැයට කිලෝමීටර් 21,000) වේගයක් යනු ශබ්දයේ වේගය මෙන් 20ගුණයක වේගයකි! මෙවැනි වේගයකින් ගමන්කල හැකි වෙනත් කිසිදු යනාවක් නැත. අමෙරිකානු ආරක්ශක දෙපාර්තමේන්තුවේ අධිතාක්ශණික පර්යේශණ කටයුතු මෙහෙයවන ඩාර්පා (DARPA) ආයතනය  මගින් මෙහෙයවනු ලැබූ මේ පර්යේශණ ගුවන්යානා ව්‍යාපෘතිය හඳුන්වනු ලැබුවේ ෆෝල්කන් HTV-2 (Falcon HTV-2) යනුවෙනි.

අමෙරිකානු ආරක්ශක දෙපාර්ථමේන්තුවේ Prompt Global Strike උපායමාර්ගික වැඩසටහන

මෙම උපායමාර්ගික වැඩසටහනේ ඉලක්කය අමෙරිකානු ආරක්ශක හමුදාවන්හට (විශේෂයෙන්ම ගුවන් හමුදාවට) ලොව ඕනෑම ස්ථානයකට පැයක් වැනි කෙටි කාලයක් තුලදී ප්‍රහාරයක් එල්ල කිරීමේ හැකියාව ලබා දීමයි. මේ සඳහා ඉතා ඉක්මණින් ගුවන්ගතකල හැකි, සුපිරි වේගයෙන් ගමන්කල හැකි ගුවන්යානා, මිසයිල හෝ රොකට්ටු නිර්මාණය කිරිමේ ව්‍යාපෘති ඩාර්පා ආයතනය මගින් ආරම්භ කර තිබෙනවා. ෆෝල්කන් ව්‍යාපෘතිය ග්ලෝබල් ප්‍රොම්ප්ට් ස්ට්‍රයික් වැඩසටහනට අනුබද්ධ ගුවන්හමුදා ව්‍යාපෘතිය වනවා.

ෆෝල්කන් HTV-2  


HTV යනු Hypersonic Test Vehicle හෙවත් අධිද්වනික පර්යේශණ යානය යන්නයි. රොකට්ටුවක් මාර්ගයෙන් උඩු ගුවනට විදිනු ලැබූ මේ පර්යේශණ යානයේ එන්ජින් ක්‍රියාත්මක කරනු ලබන්නේ පෘථිවි කක්ශයේදීය. පෘථිවි කක්ශයේදී එන්ජින් දල්වාගෙන නැවත වායුගෝලයට ඇතුලුවන යානය වායුගෝලයේදී උපරිම වේගයට ලඟාවී ඉන්ධන අවසන්වුනු පසු ඉලක්ක කරන ලද මුහුදු ප්‍රදේශයකට වැටෙන්නට සැලැස්වීම පර්යේශකයින්ගේ අරමුණ වුනා. 

මෙතරම් වේගයකින් ගමන් කිරීමේදී යානය හසුරුවාගැනීමේ හා පාලනය කරගැනීමේ හැකියාව, යානය වායුගෝලය හා සිදුවන ඝර්ශණය නිසා ඇතිවන අධික තාපයෙන් (2000C පමණ) යානය ආරක්ශාකරගැනීමේ තාපභාදක තාක්ශණයන්, යානයේ ඉලෙක්ට්‍රොනික පාලන පද්ධති හා පරිගණක යනාදී පද්ධති ගණනාවක ක්‍රියාකාරිත්වය පිලිබඳව දත්ත එකතුකිරීම මෙම පර්යේශණ පියාසැරියේ අරමුණ වුනා.

ෆෝල්කන් HTV-2 පර්යේශණ යානය පුපුරා විනාශවී ගියේ ඇයි?

යානයේ පර්යේශණ පියෑසැරිය පාලනය කල විද්‍යාඥයින් පවසන අන්දමට යානය විනාශවීමට හේතූන්  පහත දැක්විය හැකිය

1] යානයේ වේගය පැයට කිලෝමීටර් 20,000 පසුකරද්දී එය අධික ලෙස රත්වීම. මෙම රත්වීම කොතරම්ද යත් යානයේ පිටත පෘශ්ඨය සෙන්ටිග්‍රේඩ් අංශක 2000ක උශ්ණත්වයක් වාර්තාකලේය.

2] මෙම අධික තාපය නිසා යානයේ පිටත පෘශ්ඨය දියවී ගැලවී යාම

3] පිටත පෘශ්ඨය අහිමිවීමත් සමග යානයේ වායුගති ස්වභාවය (aerodynamic properties) අහිමිවීම නිසා එය වේගයෙන්  දෝලයන වෙමින් පාලනයෙන් මිදී යාම

4] පිටත පෘශ්ඨයේ තාප බාධක ගැලවීයාමෙන් යානයේ ඇතුලත අධික ලෙස රත්වීමත්, පාලනයකින් තොරව දෝලනයවීමත් නිසා යානය පුපුරා විනාශවීම.

ෆෝල්කන් සුපිරිවේග ගුවන්යානා ව්‍යාපෘතියේ අනාගතය.

ඩාර්පා ආයතනය හා අමෙරිකානු ගුවන් හමුදාව පවසන ආකාරයට යානය විනාශවුවද ඔවුන් එම පියාසැරියෙන් අතිවිශාල දැනුම් සම්භාරයක් ලබාගත් අතර මීලඟට නිපැදවෙන ෆෝල්කන් පර්යේශණ යානය මේ සියලු දැනුම මගින් වඩාත් ස්ථාවර පියාසැරිය යෙදිය හැකි යානයක් වනු ඇති බවට විශ්වාසය පලකරයි.

1 comments:

TITANOBOA [ටයිටැනොබෝවා] ප්ලියෝසීන යුගයේ විසූ ලොව විශාලතම සර්පයා


බෝවා (Boa) යනු දකුණු ඇමරිකාවේ ඇමේසන් වනාන්තරයේ ජීවත් වන විශාල සර්ප විශේෂයකි. බෝවා කොන්ස්ට්‍රික්ටර් හා ඇනකොණ්ඩා බෝවා කුළයට අයත් වන අතර මොවුන් සියල්ලම විෂ රහිත, තම ගොදුරු මිරිකා පොඩිකොට ගිල දමන විශාල සර්ප වර්ගයකි. අප දන්නා පිඹුරාද (python) ගොදුරු මිරිකා ගිලදමන සර්පයෙකු වන නමුත් ඔවුන් ජීවත් වන ප්‍රදේශ හා වර්ගයා බෝ කිරීම අතින් වෙනස්ය. බෝවා වර්ගයේ සර්පයින් ජීවී පැටවුන් බිහිකරන අතර පිඹුරන් බිත්තර දමයි. 

විශාල සර්ප වර්ග

  • බෝවා කොන්ස්ට්‍රික්ටර් (Boa constrictor): වාර්තාගත උපරිම දිග අඩි 14ක් පමණ
  • කොළපැහැ ඇනකොණ්ඩා (Green anaconda - Eunectes murinus): වාර්තාගත  උපරිම දිග අඩි 20ක් පමණ
  • ආසියාතික පිඹුරා (Asiatic reticulated python-Python reticulatus): වාර්තාගත  උපරිම දිග අඩි 23ක් පමණ

අඩි 25ක් පමණ දිගින් යුතු ඇනකොණ්ඩාවන් ගැන වාර්තාවී ඇතත් සාමාන්‍යයෙන් පිලිගන්නා ආකාරයට ලොව දිගින් වැඩිම සර්ප වර්ගය වන්නේ ආසියාතික පිඹුරාය. එහෙත් මහතින් හා ශක්තියෙන් වැඩිම සර්පයා වන්නේ ඇමේසන් වනයේ ඇනකොණ්ඩා වර්ගයයි. 

ටයිටැනබෝවා

ටයිටැනබෝවා යනු ටයිටැනික් බෝවා යන්නයි (ටයිටැනික්=අතිවිශාල). ඒ අනුව ටයිටැනබෝවා මීට වසර මිලියන 50කට පමණ පෙර ප්ලෙයෝසීන යුගයේ ජීවත්වුනු බෝවා කුළයට අයත් අතිවිශාල සර්පයෙකි.

අමෙරිකාවේ ප්‍රමුඛතම පර්යේශණ ආයතනයක් වන ස්මිත්සෝනියන් ආයතනයේ හා ෆ්ලෝරිඩා විශ්වවිශ්‍යාලයේ ඒකාබද්ධ පර්යේෂණ කණ්ඩායමක් විසින් 2004 වසරේදී දකුණු ඇමරිකාවේ කොලොම්බියා රාජ්‍යයේ ඊසානදිග ප්‍රදේශයේ කරන ලද ගවේශණයකදී ටයිටැනබෝවාගේ ෆොසිල මුල්වරට සොයාගන්නා ලදී.මෙම ෆොසිල සම්බන්ධයෙන් සිදුකල පර්යේශණ වලට අනුව ටයිටැනබෝවාට සිය මුඛය අංශක 180ක් තරම් පලලට විවෘතකල හැකි බව සොයාගැනුනු අතර ඒ අනුව ඔහුට හොඳින් වැඩුනු කිඹුලෙකු එකවර ගිලදැමීමේ හැකියාව ඇතැයි නිගමනය කෙරුණි.

ටයිටැනබෝවා හා ඔවුන්ගේ ගොදුරු බවට පත්වුනු ඩයිරසෝර් කිඹුලා (C) Jason Bourque / University Of Florida
අඩි 40කට වඩා දිගින් වැඩිවූ බවට සැක කෙරෙන ටයිටැනබෝවාගේ කඳෙහි පලල්ම ස්ථානය මීටරයකට වඩා විශ්කම්භයෙන් වැඩිවූ බවට විශ්වාස කෙරේ.


මෙම සත්වයාගේ විශාලත්වය කොතරම්ද යන්න සිතා ගැනීමට පහත ඡායාරූපය ඔබට උපකාරීවනු ඇත. මෙම ඡායාරූපයේ සිටිනා ජේසන් බර්ක් නම් විද්‍යාඥයා ටයිටැනබෝවා සොයාගත් ගවේශණ චාරිකාවේ සාමාජිකයෙකු වන අත ඔහුගේ දකුණතේ (රූපයේ වම්පස ) ඇත්තේ ටයිටැනබෝවාගේ කශේරුකාවේ එක් ෆොසිලකරණය වූ අස්ථියක් වන අතර ඔහුගේ වම් අතෙහි ඇත්තේ දැනට බරින් වැඩිම, ශක්තිමත්ම සර්පයා වන කොළපැහැති ඇනකොණ්ඩාගේ කශේරුකාවේ අනුරූප අස්ථියයි. අස්ති දෙකෙහි විශාලත්ව වෙනස බැලීමෙන් ටයිටැනබෝවා මොනතරම් විශාල සර්පයෙකු වන්නට ඇතැයිද යන්න ඔබටම සිතාගන්නට පුලුවන් නේද?

ටයිටැනබෝවා ෆොසිල කශේරුකා අස්ථියක් හා සංසන්දනය කරනවිට දැන් ලොව විශාලම සර්පයා වන ඇනකොණ්ඩාගේ කශේරුකා අස්ථි මොනතරම් කුඩාද?
ටයිටැනබෝවා ෆොසිල සොයාගත් පර්යේශණ චාරිකාව සංවිධානය කල ස්මිත්සෝනියන් ආයතනය ඔවුන්ගේ සුප්‍රසිද්ධ ස්මිත්සෝනියන් ස්වභාවික විද්‍යා කෞතුකාගාරයේ ටයිටැනබෝවාගේ ජීවප්‍රමාණ ප්‍රදර්ශණාකෘතියක් නිර්මාණය කොට මහජන ප්‍රදර්ශණයට තබා ඇති අතර ස්මිත්සෝනියන් ආයතනයට අයත් ස්මිත්සෝනියන් චැනල් නම් රූපවාහිනී නාලිකාව මෙම සර්ප විශේෂය ගැන අධ්‍යාපනික වාර්තා චිත්‍රපටයක්ද නිමාණය කොට තිබේ. ටයිටැනබෝවා බරින් ටොන් එකක් පමණ වන්නට ඇතැයි ගණන් බලා ඇත. 

ස්මිත්සෝනියන් ස්වභාවික විද්‍යා කෞතුකාගාරයේ මහජන දැක්මට තබා ඇති ටයිටැනබෝවාගේ ජීවප්‍රමාණ ප්‍රදර්ශණාකෘතිය


1 comments:

අපේ මුතුන්මිත්තන් පණපිටින් ගිලදැමූ කිඹුල් රාජයා!

Crocodylus thorbjarnarsoni ‭(‬Thorbjarnarson’s crocodile‭: ස්වරනැගීම-Kroc-oh-dil-us for-byar-nar-son)

ක්‍රොකඩයිලස් ෆෝර්බ්‍යාර්නාසන් නම් විද්‍යාත්මක නාමය ලබාදී ඇති මේ දැවැන්ත කිඹුල් වර්ගය මීට වසර මිලියන 2-4 අතර කාලයේ අප්‍රිකාවේ කෙන්යා රාජ්‍යයේ ටර්කානා විල අසබඩ ප්‍රදේශයේ සැරිසැරූ බවට ෆොසිල සාක්ශි හමුවී තිබේ. දැනට ලොව වෙසෙන විශාලතම කිඹුල් වර්ගය වන ලවණ ජල කිඹුලා (salt water crocodile-Crocodylus porosus) මීටර් 6ක් පමණ දිගට වැඩෙන අතර ෆෝර්බ්‍යාර්නාසන් කිඹුල් වර්ගය මීටර් 8කට වඩා විශාලව (අඩි 27 පමණ) වැඩෙන්නට ඇතැයි දැනට හමුවී ඇති ෆොසිල සාක්ශි දරයි. 


කෙන්යාවේ ටර්කානා විල අසබඩ ප්‍රදේශය ආදී මානවයින්ගේ ෆොසිල විශාල වශයෙන් හමුවන ප්‍රදේශයක් වන අතර [ටර්කානා විල අසබඩින් හමුවුනු ආදි මානවයින් ගැන ලිපිය කියවන්න] එම මානවයින්හා මෙම කිඹුල් වර්ගය සමකාලීනයන් වේ. මේ අනුව මෙම දැවැන්ත කිඹුලන් ජලය ගැනීම සඳහා විලට පැමිණි ආදී මානවයින්ට පහරදී ගිල දමන්නට ඇතැයින් විද්‍යාඥයින් සැක පහල කරයි. හොඳින් වැඩුනු නූතන හෝමෝ සැපියන් මානවයෙක් සාමාන්‍යයෙන් අඩි පහකටව වඩා උස් වූවත් ආදි මානවයින්ගේ සාමාන්‍යයෙන් අඩි 4කට වඩා උස් නොවුනු නිසා ක්‍රොකඩයිලස් ෆෝර්බ්‍යාර්නාසන් මෙම කුඩා මානවයින් අපහසුවකින් තොරව සම්පූර්ණයෙන්ම ගිල දමන්නට ඇතැයි සැළකේ.
මෙම කිඹුල් විශේෂය කොතරම් විශාලද යත් ඔවුන්ගේ ෆොසිලකරනය වූන් හිස් කබලක් එසවීමට මිනිසුන් 4දෙනෙකුගේ ශක්තිය අවශ්‍ය වේ!


ක්‍රොකඩයිලස් ෆෝර්බ්‍යාර්නාසන් කිඹුලාගේ ෆොසිලකරණයවූ හිස්කබලක් - ඡායාරූපය National Geographic






0 comments:

ඩ්‍රැගන්: අභ්‍යවකාශ ගතකරන ලද පලමුවන පෞද්ගලික අංශයේ අභ්‍යවකාශ යානාව

ඩ්‍රැගන් අභ්‍යවකාශ යානය
අභ්‍යවකාශ තරණයේ 60 වසරක ඉතිහාසයේ ප්‍රථම වතාවට පෞද්ගලික සමාගමක් විසින් පෞද්ගලික ප්‍රාග්ධනය යොදවා නිර්මාණය කරන ලද අභ්‍යවකාශ යානයක් ඉකුත් මැයි 26වැනි සෙනසුරාදා (2012) සාර්ථකව අභ්‍යවකාශ ගතවී අන්තර්ජාතික අභ්‍යවකාශ මධ්‍යස්ථානය හා සම්බන්ධ වුනා. මින් පෙර සෑම අභ්‍යවකාශ ගමනක්ම සිදුකරන ලද්දේ එම යානය ගුවන් ගත කරන ලද රටේ රාජ්‍ය ප්‍රාග්ධනය හා සම්පත් යොදාගෙනයි. දැනට අභ්‍යවකාශයට යානා යවා ඇති රටවල් අතලොස්සෙන් (ඇමරිකාව, රුසියාව, චීනය, යුරෝපා සංගමය, ඉන්දියාව, ඉරානය) සියලුම රටවල් සිය අභ්‍යවකාශ වැඩසටහන් ජාතික වැඩසටන් ලෙස රටේ මහජන මුදල් යොදවාගෙන සිදුකලා.

මෙය වෙනස් කරනු ලැබුවේ අමෙරිකානු ජනාධිපති බැරැක් ඔබාමා මහතා විසිනුයි. 2011 වසරේදී සියලුම අභ්‍යැවකාශ ශටල් යානා විශ්‍රාම ගැන්වීමෙන් පසුව අභ්‍යවකාශයට අමෙරිකානුවන් හෝ අමෙරිකානු යානා යැවීම සඳහා පෞද්ගලික අංශයේ දායකත්වය ලබාගත යුතු යැයි ඔබාමා ජනාධිපතිවරයා තීරණය කල අතර ඒ අනුව නාසා ආයතනය අභ්‍යවකාශ යානා නිර්මාණය කරනවා වෙනුවට ඒවා නිර්මාණය කිරීමට ඒ වනවිටත් බිහිකොට තිබූ පෞද්ගලික අංශයේ සමාගම්වලට අවශ්‍ය තාක්ශණය හා පහසුකම් ලබා දෙන්නට තීරණය කලා.

මෙයින් වඩාත් සාර්ථකම සමාගම වුනේ 2002 වසරේ බිහිවූ SpaceX සමාගමයි. මෙම සමාගම විසින් නිර්මිත ෆෝල්කන් 1 නම් රොකට්ටුවක් 2008දී සාර්ථකව පෘථිවිය වටා කක්ශගත කෙරුනු අතර 2010 වසරේදී එම රොකට්ටුවේම වැඩි දියුණු කිරීමක් වුනු ෆෝල්කන් 9 අධිබල රොකට්ටුව සාර්ථකව අත්හදා බැලුනා. (ෆෝල්කන් 9 රොකට්ටුව හා SpaceX සමාගම ගැන පලවුනු ලිපිය කියවන්න)

පසුගියදා සාර්ථකව කක්ශගත කොට අන්තර්ජාතික අභ්‍යවකාශ මධ්‍යස්ථානය හා සම්බන්ධවනු ලැබුවේ සමාගම විසින්ම නිපදවා ඔවුන්ගේ ෆෝල්කන් 9 රොකට්ටුවෙන් අභ්‍යවකාශගත කරන ලද "ඩැගන්" නමින් හඳුන්වා ඇති අභ්‍යවකාශයට භාණ්ඩ ප්‍රවාහණය කරන යානාවයි.
 

කක්ශගතවීමෙන් පසු අභ්‍යවකාශ මධ්‍යස්ථානයට ලඟාවූ ඩ්‍රැගන් යානය  මධ්‍යස්ථානයේ සිටි ගගනගාමීන් විසින් මෙහෙයවනු ලැබු රොබෝ අතක් මගින් ග්‍රහණය කරගන්නා ලද අතර එය ඉතා සීරුවෙන් අභ්‍යවකාශ මධ්‍යස්ථානයේ docking station නමින් හැඳින්වෙන පිටතින් එන යානා සම්බන්ධකරගන්නා දොරටුව වෙත යොමු කරවනු ලැබුවා. ඉන්පසු හෙවත් යානාවේ හා මධ්‍යස්ථානයේ දොරටු එකිනෙක සම්බන්ධ කිරීමේ ක්‍රියාවලිය ආරම්භවුනු අත එය අවසානයේ අභ්‍යවකාශ මධ්‍යස්ථානයේ ගගනගාමීන් දොරටු විවරකොට ඩ්‍රැගන් යානයට ඇතුලු වූවා.


අභ්‍යවකාශ මධ්‍යස්ථානයේ රොබෝ හස්ථය මගින් ග්‍රහණය කරගන්නා ලද ඩ්‍රැගන් යානය.

ඩ්‍රැගන් අභ්‍යවකාශ යානය අභ්‍යවකාශ මධ්‍යස්ථානයේ රොබෝ හස්ථයෙන් ග්‍රහණය කරගැනීමට පෙර (ග්‍රැෆික් රූපය නාසා ආයතනය මගිනි )







අභ්‍යවකාශ මධ්‍යස්ථානයට සම්බන්ධවුනු ඩ්‍රැගන් යානය දිස්වෙන ආකාරය (නාසා ග්‍රැෆික් සටහන )
ඩ්‍රැගන් යානය ආපසු පෘථිවියට ගොඩ බසින ආකාරය (NASA Graphic Image)







0 comments:

ආදි මානවයින්ට පෙර ජීවත් වුනු පූර්ව-මානවයින් හට ආයුධ නිර්මාණය කිරීමේ බුද්ධිමය හැකියාවක් තිබුණාද?




ඉතියෝපියාවේ ඇෆාර් ප්‍රදේශයේ ගවේෂණ කටයුතුවල නිරතව සිටින ප්‍රාග් ඓතිහාසික මානවයින් පිලිබඳ පර්යේශණ පවත්වන  කැලිෆෝනියානු විද්‍යා ඇකඩමියේ කණ්ඩායමකට තියුණු පාශාණ ආයුධයකින් සිදුකලා යයි සිතිය හැකි කැපුම් සලකුණු ඇති ඇන්ටිලෝප් මුවන්ගේ අස්ථි කොටස් හමුවී තිබේ. වසර මිලියන 3.39ක් පැරණි යයි කාබන් කාළනිර්ණ පරීක්සාවේදී සනාථවී ඇති මෙම අස්ථි වල කැපුම් සළකුණු සිදුවුනු කාළයේ ආදි පූර්ව මානවයෙකු (pre-human hominid) ලෙස සැළකෙන ඔස්ට්‍රාලෝපිතිකස් ඇෆරෙන්සිස් ගේ ජනාවාස මෙම ප්‍රදේශයේ තිබූ බවට සාක්ශි හමුවී ඇත. ඒ අනුව මෙම කැපුම් සළකුණු මෙම ආදි මානවයින් විසින් මස් සූරාගැනීම සඳහා භාවිතාකල පාශාණ ආයුධ වලින් සිදුවන්නට ඇතැයි එම පර්යේශකයින් නිගමණය කර ඇත. කැපුම් සළකුණු ඇති මේ අස්ථි පරීක්ශාකල වෙනත් පර්යේශකයින් බොහෝ දෙනෙකුද මෙම සළකුණු ආයුධ වලින් සිදුවන්නට ඇති ඒවා බවට විශ්වාස කරයි. මේ අනුව ආදි මිනිසාගේ ආයුධ භාවිතය කලින් අනුමාන කරනලද කාළයට වඩා වසර 800,000 තරම් කලින් සිදුවන්නට ඇති බව නිගමනය කරන්නට සිදුවේ. ආයුධ භාවිතය ආරම්භ කරනලද මුල්ම මානවයා ලෙස කලින් අනුමාන කොට තිබුනේ හෝමෝ හැබිලිස් නම් ආදි මානවයායි. හෝමෝ හැබිලිස් විසින් භාවිත කරන ලද පාශණ ආයුධ ඔවුන්ගේ ජනාවාස තිබුණු ප්‍රදේශවලින් හමුවී ඇත.

එහෙත් වසර මිලියන 3.39ක් ඈත අතීතයේදී ආදි පූර්ව මානවයින් ආයුධ භාවිතකරන්නට තරම් වන්නට බුද්ධිමත් නැතැයි විශ්වාස කරණ පර්යේශකයින්ද සිටින අතර ඔවුන් පවසන්නේ මෙවැනි කැපුම් සළකුණු ඇන්ටිලෝප් මුවන් බිලිගන්නා අප්‍රිකානු කිඹුලන්ගේ තියුණු දත් වලින් සිදුවූ ඒවා වියයුතු බවයි. තවත් අදහසක් වන්නේ මෙම අස්ථි වල කැපුම් වෙනත් කුර සහිත සතුනට මෙම අස්ථි පෑගීම නිසා සිදුවිය හැකි බවයි. කෙසේ වෙතත් කැලිෆෝනියා විද්‍යා ඇකඩමි පර්යේෂණ කණ්ඩායම පවසන්නේ ඔස්ට්‍රාලෝපිතිකස් ආදි මානවයා නූතන චිම්පන්සීන් තරමට හෝ බුද්ධියෙන් යුතු මානවයින් බවත් චින්පන්සීන් ගැන පර්යේශණ පවත්වන විද්‍යාඥයින් අප්‍රිකානු චිම්පන්සීන් සරල ආයුධ භාවිතා කරනා ආකාරය නිරීක්ශණය කොට වීඩියෝ ගතකොට ඇති නිසා ඔස්ට්‍රාලෝපිතිකස් ආයුධ භාවිතා කරන්නට ඇති බවට ගොඩ නැගිය හැකි තර්කය එතරම් අභව්‍ය නොවන බවයි.

හෝමෝ ඉරෙක්ටස් මානවයාගේ ශිලා ආයුධ නිමැවීමේ හැකියාව පෙර අනුමානයට වඩා ඉතා ඉහලින් තිබූ බව තහවුරුවේ.


0 comments: