ඔත්තුබලන ඩ්‍රෝන යානා 25කින් ගතහැකි තොරතුරු ලබාදෙන රොබෝ ගුවන්නැව

ඔත්තුබලන ඩ්‍රෝන යානා 25කින් ගතහැකි තොරතුරු ලබාදෙන රොබෝ ගුවන්නැවක් මෑතකදී ඇමරිකාවේදී අත්හදා බැලුනු බව පොපියුලර් මිකැනික්ස් සඟරාව වාර්තාකරනවා. Battle Blimp ලෙස හඳුන්වන මෙම ගුවන් නැව අමෙරිකාවේ නෝත්රොප් ගෘම්මාන් ගගනවිද්‍යා සමාගමේ නිර්මාණයක්. B2 ස්ටෙල්ත් බෝම්බ හෙලන යානය, F/A 18 සුපර් හෝනට් ප්‍රහාරක යානය, RQ-4 ග්ලෝබල්-හෝක් ඩ්‍රෝන යානය වැනි සුපිරි අවිආයුධ නිර්මාණයේ ප්‍රමුඛයෙකු වන ගෘම්මාන් සමාගම මෙම ගුවන් නැව නිර්මාණය සඳහා ගතකොට ඇත්තේ වසර දෙකකටත් අඩු කාළයක්.


LEMV හෙවත් Long Endurance Multi-Intelligence Vehicle ලෙස මෙය අඩි 300ක් දිගු වන අතර ශක්තිමත් භාවය තහවුරු කිරීම සඳහා යානයේ බඳ ස්ථර තුනකින් නිමවා ඇත. ඩ්‍රෝන යානා මෙන් නොව, අවශ්‍ය නම් මිනිස් නියමුවන් හා නිරීක්ශකයින්ද ගෙනයා හැකි ලෙස නිමවා ඇති මෙයට ඩ්‍රෝන යානා මෙන්ම පූර්ණ ස්වයංක්‍රීය ක්‍රියාකාරිත්වයෙන් ගමන් කිරීමටද හැකිය.

පූර්ණ ස්වයංක්‍රීය ක්‍රියාකාරිත්වයෙන් තිබෙනාවිට නොකඩා සති තුනක කාළයක් පොලවට මීටර් 6000ක් (කිලෝමීටර් 6ක්) ඉහල අහසේ එකම ස්ථානයක රැඳෙමින් නිරීක්ශණ හා දත්ත එකතු කිරීමේ කටයුතු වල නිරතවිය හැකිය. LEMV යානාව මගින් එක් ස්ථානයක රැඳෙමින් ආවරණය කරණ භූමි ප්‍රමාණය ආවරණය කිරීමට ඩ්‍රෝන යානා යොදවනවානම්, ඩ්‍රෝන 25ක්වත් එක විට ගුවන් ගත කලයුතු බව ගෘම්මාන් සමාගම පවසයි. ඒ අතින් LEMV යානය අතිශයින්ම කාර්යක්ශමය.


වාතයට වඩා සැහැල්ලු යානා (lighter than air) ගණයට වැටෙන මෙම යානාවේ පාවීම (ඉපිලීම - buoyancy) සිදුවන්නේ එහි බඳෙහි පුරවා ඇති හීලියම් වලිනි. මීට අමතරව අවශ්‍යවූ විට යානය ඉහල, පහල ගැනීම සඳහාත්, ඉදිරියට පියාසර කිරීම සඳහාත් ඩීසල් එන්ජින් සතරකින් බලගැන්වෙන අවරපෙති සතරක් ඇත. පැයට නාවික සැතපුම් 30ක (පැයට කිලෝමීටර් 55) සාමාන්‍ය වේගයකින් පියාසර කල හැකි මෙයට, කෙටි කාල පරාසයක් සඳහා පැයට නාවික සැතපුම් 80ක් (පැයට කිලෝමීටර් 148) දක්වා වේගයෙන් යා හැකිය.

නොනවත්වා අත්ලාන්තික සාගරය තරණය කල හැකි තරමේ දුරක් (කිලෝමීටර් 5500ක්) යාමට අවශ්‍ය ඉන්ධන යානාවේ එක්වරකට ගෙනයා හැකිය. ඩ්‍රෝන යානා මෙන් ගුවන්ගතවී තිබීමට ගමනේ යෙදීම අනවශ්‍ය වීම මෙම යානාවල ඇති තවත් ප්‍රධාන වාසියකි. එබැවින් නොකඩවා 24/7 පුරාවටම යම් ප්‍රදේශයක් නිරීක්ශණය කිරීමේ හැකියාව මෙම යානාවට ඇත.

රේඩාර්, කැමරා, වීඩියෝ කැමරා, රේඩියෝ හා ජංගම දුරකථන සංඥාවලට සවන්දිය හැකි උපකරණ මෙයට ගෙනයා හැකිය. මීට අමතරව ගොඩබිම් හමුදාවල පණිවුඩ හුවමාරු පහසු කිරීමට රේඩියෝ ට්‍රාන්ස්මීටර් හා ඇන්ටෙනා රැගෙන අහසේ රැඳීසිටිය හැකි බැවින් මෙම යානාවලට පාවෙන සන්නිවේදම මධ්‍යස්ථාන ලෙසද ක්‍රියාකල හැකිය.


එපමණක් නොව මෙහි සවිකොට ඇති ඔත්තුබැලීමේ උපාංග සියල්ලම පහසුවෙන් ඉවත්කොට කිලෝග්‍රෑම් 7000ක් (මෙට්‍රික් ටොන් 7ක්), සැතපුම් 3200ක දුරක් ප්‍රවාහනය කිරීමටද මෙම යානයට හැකියාව ඇත. ගොඩ බැස්සවීමට ධාවන පථයක් අනවශ්‍ය ඕනෑම දුශ්කර ප්‍රදේශයකට හෝ යුධ බිමකට භාණ්ඩ විශාල ප්‍රමාණයක් පහසුවෙන් හා අඩු වියදමකින් ගෙනයා හැකිය.

මේ සියල්ලටම අමතරව, මෙම යානයට ප්‍රෙඩේටර් ඩ්‍රෝන යානා ගෙනයන හෙල්ෆයර් වර්ගයේ ලේසර් මගින් ඉලක්කය සොයාගන්නා මිසයිල පද්ධතියද සවිකල හැකි අතර ඒ අනුව මෙම ගුවන් නැව, ගුවන් යුධ නැවක් බවට පරිවර්තනය කර ගැනීමද ඉතා පහසුය.

2 comments:

HTC ස්මාර්ට්ෆෝන් තාක්ශණයෙන් නිමැවෙන නාසා ආයතනයේ අලුත්ම නැනෝ චන්ද්‍රිකා

නැනෝ සැටලයිට් හෙවත් ප්‍රමාණයෙන් ඉතා කුඩා චන්ද්‍රිකා නිර්මාණය චන්ද්‍රිකා තාක්ශණයේ නවතම පිම්ම ලෙස අභ්‍යවකාශ විද්‍යාව පිලිබඳව උනන්දුවක් දක්වන විද්වතුන් පවසනවා. නාසා ආයතනය මෙම නැනෝ චන්ද්‍රිකා තාක්ශණයට නව නැම්මක් එකතුකරමින්, වෙලඳපොලේ මිලදීගැනීමට හැකි ස්මාර්ට්ෆෝන් මාදිලියේ ජංගම දුරකථනයක් ඇසුරින් නැනෝ චන්ද්‍රිකාවක් නිර්මාණය කරමින් පවතිනවා. ස්මාර්ට්ෆෝන් තාක්ශණයේ ඉහල අදියරක සිටිනා තායිවානයේ HTC සමාගමේ ස්මාර්ට්ෆෝනයක් ඇසුරින් නිමැවෙන මෙම චන්ද්‍රිකාව ෆෝන්-සැට් ලෙස නම් කොට ඇති බව Popular Science (POPSCI) සඟරාව පවසනවා.

නාසා ආයතනය මෙලෙස වානිජ ජංගම දුරකථන තාක්ශණය ඇසුරින් චන්ද්‍රිකා නිර්මාණය කිරීම ආරම්භ කොට ඇත්තේ ඉතා අඩු වියදමකින්, එමෙන්ම නවතම තාක්ශණයෙන් සපිරි චන්ද්‍රිකා නිර්මාණය කිරීමට මෙම උපායමාර්ගය අනුව හැකිවන බැවිනුයි. නාසා ආයතනය පවසන ආකාරයට බොහෝ ස්මාර්ට්ෆෝන් ජංගම දුරකථනවල ඇති තාක්ශණය අමෙරිකාවේ සිලිකන් නිම්නයේ සමාගම් මගින් නිර්මාණය කරන ලද තාක්ශණයන්. නාසා ආයතනය මෙම තාක්ශණයන් තමන්ගේම විද්‍යාගාරවල ප්‍රතිනිර්මාණය කරනවානම් ඒ සඳහා ඩොලර් මිලියන ගණනින් ආයෝජන කලයුතු අතර ඒ සඳහා විශාල කාලයක්ද වැයවෙනවා. එවැනි කරදරකාරී උපායමාර්ගයකට වඩා සති කිහිපයකට වරක් අලුත්වන නවතම ස්මාර්ට්ෆෝන් තාක්ශණය යොදා ගැනීම වඩාත් වාසිදායකයි.

නාසා විද්‍යාඥයින් පවසන අන්දමට ස්මාර්ට්ෆෝන් තාක්ශණය අඩුමිල, අධිතාක්ශණික චන්ද්‍රිකා සඳහා ඉතාමත්ම සුදුසු වන්නේ පහත සඳහන් තාක්ශණික වාසි දැනටමත් මෙම ස්මාර්ට්ෆෝන් සතුව ඇති බැවිනි. ඒවා නම්;

. කුඩා, එහෙත් ප්‍රභල ප්‍රොසෙසර් මගින් බලගැන්වීම
. ඇන්ඩ්‍රොයිඩ් වැනි නිදහස්, මිළ රහිත මෙහෙයුම් පද්ධති ඇසුරින් ක්‍රියාත්මක වීම
. GPS තාක්ශණය අඩංගුකොට නිපදවා තිබීම
. ෆෝනය හැරවී ඇති දිශාව දැනගත හැකි සෙන්සර් (orientation sensors) අඩංගු කොට තිබීම
. අධි-විබේධන කැමරාවක් අඩංගු වීම
. ඉතා කුඩා, සැහැල්ලු බැටරි මගින් දීර්ඝකාලයක් ක්‍රියාත්මක වීමට හැකිවීම 

යන, චන්ද්‍රිකාවකට වැදගත් ගුණාංග මෙම ජංගම දුරකථන සතුවීම නිසයි. දැනට මෙවැනි ස්මාර්ට්ෆෝන් නැනෝ චන්ද්‍රිකා තුනක් නිමවා ඇති අතර, ඉන් දෙකක් PhoneSat Ver. 1.0 ලෙසද, අනෙක PhoneSat Ver. 2.0ලෙසද හඳුන්වා තිබෙනවා.  PhoneSat Ver. 1.0 චන්ද්‍රිකා දෙක HTC Nexus One ස්මාර්ට්ෆෝනය ඇසුරින් නිමවා තිබෙන ඇති අතර, PhoneSat Ver. 2.0 චන්ද්‍රිකාව Google Nexus S මාදිලිය ඇසුරින් නිමවා තිබෙනවා. PhoneSat Ver. 1.0 මුලින්ම උඩු ගුවනට යැවීමට බලාපොරොත්තු වන අතර, එහි සාර්ථකත්වය මත Ver. 2.0 උඩුගුවනට යැවීමට බලාපොරොත්තු වන අතර මේ වසරතුලදී මේවා උඩුගුවනට යැවෙනු ඇති.









1 comments:

නවීන තාක්ශණයෙන් යුතු හෙලිකොප්ටර් වෙනුවට නවීන තාක්ශණයෙන් පිරිපුන් නියමුවන් බිහිකරන්නට සැරසෙන අමෙරිකන් යුධ හමුදාව


අමෙරිකන් යුධ හමුදාව තරම් හෙලිකොප්ටර් මත යැපෙන වෙනත් යුධ හමුදාවක් ලොව නැති තරම්ය. වියට්නාම් යුද්ධය පැවති සමයේ ඇරඹුනු අමෙරිකන් යුධ හමුදාවේ හෙලිකොප්ටර් ප්‍රේමය දෙවන ගල්ෆ් යුද්ධයේදී හා ඇෆ්ඝනිස්තානයේදීද මොනවට පැහැදිලි විය. එහෙත් අමෙරිකානු හමුදාවට විශාල ගැටළුවක් ඇත. එනම් අමෙරිකන් යුධ හමුදාවේ හෙලිකොප්ටර්, 1970 දශකයේ නිර්මාණය වුනු යල් පැන ගිය ඒවා වීමයි. බ්ලැක්-හෝක් භට ප්‍රවාහන හෙලිකොප්ටරය හා ඇපෑචි ප්‍රහාරක හෙලිකොප්ටරය 1970 දශකයේ නිර්මාණය වූ අතර ටොන් 12ක බරක් හෝ භටයින්  50ක් ප්‍රවාහණය කල හැකි CH-47 චිනූක් හෙලිකොප්ටරය ඊටත් පැරණි 1960 දශකයේ නිර්මාණයකි.

තවමත් නිපැදවෙමින් පවතින මේ හෙලිකොප්ටර වලට නව ආදේශක සොයාගැනීම අමරිකානු යුධ හමුදාවට විශාල ගැටළුවක් වී ඇත්තේ නව හෙලිකොප්ටර් නිර්මාණ හා සංවර්ධන ක්‍රියාවලිය බෙහෙවින් වියදම් අධික, කාළය වැයවෙන ක්‍රියාදාමයක් බැවිනි. අමෙරිකන් ගුවන් හමුදාව භාවිතාකරන පේව්-හෝක් හෙලිකොප්ටරයද නාවික හමුදාව භාවිතා කරන සී-හෝක් හෙලිකොප්ටරයද, යුධ හමුදා බ්ලැක් හෝක් හෙලිකොප්ටරයේ සුළු අනුවර්තනයන්ය. මෑතකදී බ්ලැක් හෝක් හෙලිකොප්ටරයේ තාක්ශණික තොරතුරු පිලිබඳ විද්‍යා ගවේශණ පලකල ලිපිය මෙතනින් කියවන්න.

මෙම ගැටලුවට අමෙරිකන් යුධ හමුදා සැළසුම් කරුවන් අපූරු පිලියමක් සැළසුම් කොට ඇත. එනම් යුධ හමුදා හෙලිකොප්ටර් වැඩිදියුණු කරනවා වෙනුවට ඒවා පියාසර කරවන ගුවන් නියමුවන් "අධිතාක්ශණික ගුවන් සෙබළුන්" බවට පරිවර්තනය කිරීමේ සැළැස්මයි. අමෙරිකාවේ රේතියෝන් සමාගම මගින් නිර්මිත මෙම "අධිතාක්ශණික ගුවන් සෙබළ" වැඩසටහන "Air Soldier" ලෙස නම්කොට ඇත.


2 comments:

Remember Me : 2013 වසරේ එලිදකින අලුත්ම තාලේ පරිගණක ක්‍රීඩාව


වර්ශය කි.ව. 2084ය. අද, අප අපගේ අදහස් ස්මාට්ෆෝන්, පරිගණක වැනි මෙවලම් භාවිතයෙන් ක්ෂණිකව බෙදාහදා ගන්නාක් මෙන් අනාගතයේදී තාක්ශණික මෙවලම් උපයෝගීකරගෙන අපගේ මතකයන් හා අත්දැකීම් එලෙසින්ම බෙදාහදා ගත හැකි යුගයකි. මේ තාක්ශණයට මතකයන් හා අත්දැකීම් හුවමාරු කරගැනීම මෙන්ම ඒවා වෙනස්කිරීමද, මකාදැමීමද කල හැකිය. මතකයන් හා අත්දැකීම් විකිණීමේ කළුකඩ වෙළඳාමක්ද මේ තාක්ශණය හරහා බිහිවී ඇත. එබැවින් මෙම තාක්ශණයේ හිමිකරුවන් ඉතා බලවත්වී ඇති අතර මෙම තාක්ශණය රාජ්‍ය පාළකයින් හට සිය පුරවැසියන් පාළණය කිරීම සඳහා මහඟු අවස්ථාවක් ලබාදී ඇත. මතකයන් වෙනස් කිරීමෙන් පුරවැසියන් පාළණය කිරීමේ හැකියාව තුලින් යුරෝපයේ රටවල් ආඥාදායකයක පාලනයකට ගොදුරුවී ඇත......

කතානායිකාව වන නිලින් (Nilin) අතිදක්ශ චෞරයෙකු වන අතර ඇය අනුන්ගේ සිතිවිලි සොරාගැනීමේ හා වෙනස්කිරීමේ විශිෂ්ඨ හැකියාවක් ඇත්තියකි. ඒ අනුව අනෙකුන් පාලනය කිරීමේ සුවිශේෂී හැකියාවක් ඇයට හිමිවී ඇත. සිතුවිලි හුවමාරු තාක්ශණයේ නිර්මාපකයා වන Memoreyes සමාගමේ ඒජන්තවරියක් වන ඇය යම් හේතුවක් නිසා සිය සේවාදායකයා සමග විසරකවේ.

2084 වසරේදී ඒකාධිපති රාජ්‍යයක් බවට පත්වී ඇති ප්‍රංශයේ අගනුවර වන නව-පැරීසියේ දිගහැරෙන මෙම කථාවස්තුව ආරම්භවන්නේ පැරීසියේ කුප්‍රකට බැස්ටීල සිරගෙදරිනි. සේවාදායකයා සමග විරසක වන නිලින්ගේ මතකය මකාදමා ඇති අතර ඇය බොරු චෝදනා මත සිරකොට ඇත. නිලින්ගේ චරිතයට පණපොවන ක්‍රීඩකයා ඇයට බැස්ටීලයෙන් පැන ගොස් සිය මතකය ආපසු ලබාගෙන ඇයගේ මතකය මකාදැමුනු හේතුව සොයාගැනීමට උපකාරී විය යුතුය.

Name : Remember Me
Genre : Third-person, stealth, action-adventure
Platforms : Playstation 3, XBoX 360, MS Windows
Game Publisher : Capcom
Announced : Gamecon Expo 2012
Release Date : May 2013
Developer : Dontnod Entertainment

"Nili, the memory hunter" : Screen-shots from "Remember Me" (C) Dontnod Entertainment






Paris in 2084 : Screen-shots from "Remember Me" (C) Dontnod Entertainment







0 comments:

සඳ මත පා සටහන් තැබූ පලමුවැනි මිනිසා, නීල් ආම්ස්ට්‍රෝං ලොවින් සමුගනී....


1969 ජූලි 20 වැනිදා, ලොව ජනගහනයෙන් බිලියන භාගයක් රූපවාහිනී තිරවලින් නෙත් අයා බලා සිටිද්දී, නීල් ආම්ස්ට්‍රෝං, සඳමත පා සටහන් තබමින්, මිනිස් වර්ගයා සිය කැදැල්ල වූ පෘථිවියෙන් ඉවතට පියඹා ගිය බව මුලුමහත් ලෝකයටම පමණක් නොව, විශ්වයටම හඬගා කීවේ, "මෙය මිනිසෙකුට කුඩා පියවරක් වුවද, මිනිස් සංහතියටම යෝධ පිම්මකි...." යන වදන් රේඩියෝ තරංග හරහා අවකාශයට මුසු කරමිනි.

82වැනි වියේ පසුවූ මේ වික්‍රමාන්විත මිනිසා ඊයේ (25), මිය ගිය බව ඔහුගේ පවුලේ සාමාජිකයින් සංවේගයෙන් දැනුම් දී තිබේ. මීට තුන් මසකට පෙර බයි පාස් සැත්කමකට බඳුන් කරන ලද ආම්ස්ට්‍රෝං, එමගින් ඇතිවුනු සංකූලතා හේතුවෙන් මියගිය බව පැවසේ.


ගගනගාමියෙකු වීමට පෙර අමෙරිකානු නාවික හමුදාවේ ප්‍රහාරක ජෙට් නියමුවෙකු වුනු ආම්ස්ට්‍රෝං, ඉන්පසු නාවික හමුදාවෙන් ඉවත්ව පර්ඩියු විශ්වවිද්‍යාලයෙන් ගගන- ඉන්ජිනේරු විද්‍යාව පිලිබඳව උපාධියක් දිනාගත්තේය.

උපාධිය අවසන් කිරීමෙන් පසු, නාසා ආයතනයේ පූරෝගාමී ආයතනය වූ NACA ආයතනයේ පරීක්ශණ ගුවන් නියමුවෙකු (test pilot) ලෙස රොකට් බලයෙන් ක්‍රියාත්මකවන අධිවේගී ගුවන්යානා නියමුවෙකු ලෙස ක්‍රියා කරමින් පියාසර පැය දහස්ගණනක් සිය සේවා වාර්තාවට එක්ක්කර ගත්තේය. ආම්ස්ට්‍රෝං සිදුකල වඩාත්ම සුප්‍රසිද්ධ රොකට් ගුවන් පියාසැරිය වන්නේ 1962 සැප්තැම්බරයේ X-15 රොකට් ගුවන් යානයකින් සිදුකට අධිවේගී පියාසැරියයි. පැයට කිලෝමීටර් 3200ක වේගයකින් සිදුවුනු මේ පියාසැරියේදී ආම්ස්ට්‍රෝං සිය X-15 ගුවන් යානය මුහුදු මට්ටමේ සිට කිලෝමීටර් 63ක් ඉහලට ගෙනගියේ නව වාර්තාවක්ද තබමිනි.

ඇපලෝ 11 පියාසැරියෙන් සඳමත ගොඩබැසීමට පෙර ආම්ස්ට්‍රෝං ජෙමිනි 8 හා ජෙමිනි 11 පියාසැරි වලින් පෘථිවිය වටා කක්ශගත වී, සඳගමනට අවශ්‍ය විවිධ පර්යේශණ ගණනාවක් හා තාක්ශණික අත්හදා බැලීම් ගණනාවක් සිදුකලේය.

2 comments:

ඇමරිකාව අනාගත ආක්‍රමණ සැළසුම් කරයි!


පසුගිය අගෝස්තු 15දිනෙන් ආරම්භවූ සතිය තුල අමෙරිකාවේ පෙන්සිල්වේනියා ආරක්ශක විද්‍යාලයේ යුධ සැළසුම්කරණය පිලිබඳව සම්මන්ත්‍රණයක් පැවැත්වූවා. අමෙරිකානු ත්‍රිවිද හමුදා නිළධාරීන්, ආරක්ශක දෙපාර්තමේන්තු නිළධාරීන්, යුධ තාක්ශණය පිලිබඳ පර්යේෂණ පවත්වන විද්‍යාඥයින් හා යුධ සැළසුම් විශේෂඥයින් රැසක් සහභාගී වූ මෙම සම්මන්ත්‍රණයේ අරමුණවූයේ අමෙරිකාව වෙත විදෙස් රටවල් වලින් එල්ලවන අනාගත තර්ජන මැඩ පවත්වාගැනීම උදෙසා එම රටවල් ආක්‍රමණය කරන්නට සිදුවුවහොත්, අමෙරිකානු හමුදාවල ජීවිත හානිය අවම කරගෙන එම අරමුණ ඉටුකර ගන්නේ කෙසේදැයි සළකා බැලීමයි.

තෝරාගත් ඇමරිකානු මාධ්‍ය ආයතන කිහිපයකට මෙම වැඩමුළුවට ආරාධනා කොට තිබුණු අතර එයට සහභාගීවූ WIRED සඟරාව පවසන ආකාරයට නුදුරු අනාගත යුද්ධයකදී අමෙරිකානු හමුදාව සතුවන නවතම තාක්ශණ කිහිපයක් තෝරාගෙන එම තාක්ශණයන් විවිධ යුධමය අවස්ථාවලදී ප්‍රයෝජනයට ගත හැකි ආකාරය ඉතා ගැඹුරින් සාක්ච්ඡාකල බව පවසනවා. මෙහිදී සළකා බැලුනු නවතම තාක්ශණයන් අතර

  • ඩ්‍රෝන යානා
  • ලේසර් වැනි directed energy ආයුධ
  • මිනිස් සෙබළුන්ගේ ජවය වැඩිකරන යාන්ත්‍රික පිටසැකිළි (mechanical exoskeletons)- -
  • ත්‍රිමාණ මුද්‍රණ තාක්ශණය (3D Printing) 

ඇතුලත්. මෙම තාක්ශණයන් කොතරම් නුදුරු අනාගතයේදී කොතරම් දියුණු කරගත හැකිදැයි එකඟතාවයකට පැමිණිපසු, වැඩමුළුව War Games නැමති ආකෘතියට අනුව අමෙරිකාවට තර්ජනයක් විය හැකි විවිධ යුධමය අවස්ථා කිහිපයකදී මෙම තාක්ශණවලින් කුමණ තාක්ශණයන් ප්‍රයෝජනවත්වේදැයි සළකා බැලුනා.

මෙහිදී සළකා බැලුනු යුධමය අවස්ථා අතර;
War Game #1 : සතුරු නගරයක් අත්පත් කරගැනීමේ රොබෝ ඩ්‍රෝන යුද්ධය

තව වසර 12කින් පමණ, එනම් වසර 2025 වනවිට අමරිකානු ප්‍රහාරක ඩ්‍රෝන තාක්ශණය අතිශයින්ම වැඩි දියුණු වී ඇතැයි වැඩමුළුවට සහභාගී වූ බොහෝ විද්වතුන් හා යුධ විශේෂඥයින් එකඟවූ අතර, ඒ අනුව 2025 වනවිට සතුරු රටක්/නගරයක් ආක්‍රමණය කිරීම මුළුමනින්ම රෝබෝ ඩ්‍රෝන යානා මගින් ඉටු කරගැනීමට හැකිවෙතැයි අමෙරිකානු යුධ සැළසුම් විශේෂඥයින් බලාපොරොත්තුවෙනවා. ඒ අනුව ඉරාකයේ ෆලූජා වැනි නගර අල්කයිඩාවෙන් අත්පත්කර ගැනීමට වැයකල අතිමහත් අමෙරිකානු ජීවත ප්‍රමාණය, අනාගතයේ එවැනි ආක්‍රමණවලදී රැක ගැනීමට හැකිවෙනවා.

මෙවැනි ඩ්‍රෝන  ආක්‍රමණයක්, ප්‍රහාර රැළි (waves of attack) කිහිපයකින් සමන්විත විය යුතුබව වැඩමුලුවේදී සාකච්ඡා වී තිබෙනවා. පලමු ප්‍රහාර රැල්ල දැන් වැඩි දියුණු කෙරෙමින් පවතින X-47B වැනි සන්නද්ධ ඩ්‍රෝන භාවිතාවෙන් සිදුවන අතර, එමගින් සතුරු රටේ ගුවන් හමුදාව හා ගුවන් ආරක්ශක පද්ධතිය මුළුමනින්ම විනාශකොට දැමීමට බලාපොරොත්තු වෙනවා.


දෙවැනි ඩ්‍රෝන රැල්ල ග්ලෝබල් හෝක්, ෆැන්ටම් අයි වැනි ඔත්තුසෙවීම ඩ්‍රෝනවලින් සමන්විත වන අතර, එම ඩ්‍රෝන සතුරු අහසේ ඉතා ඉහලින් බොහෝ කාළයක් රැඳී සිටිමින් සතුරු හමුදා ඛන්ඩ හා මිසයිල බැටරි, සන්නද්ධ රථ, කාළතුවක්කු රඳවා ඇති ස්ථාන පිලිබඳ දත්ත යුධ මෙහෙයුම් කරුවන් හට සපයනු ඇති.


ඔත්තු බලන ග්ලෝබල් හෝක් යානා වලින් සතුරු බලමුළුවල තොරතුරු ගලාඑත්ම, තුන්වන ඩ්‍රෝන රැල්ල දියත්වන අතර X-47B හා Sea Ghost වැනි සන්නද්ධ යානා, ග්ලෝබල් හෝක් ඩ්‍රෝනවලින් ලැබෙන දත්ත ඔස්සේ ඉලක්ක සොයාගෙන සතුරු බලඇණි හා ඔවුන්ගේ සන්නද්ධ රථ, යුධ ටැංකි, කාළතුවක්කු, සන්නිවේදන මධ‍යස්ථාන වනසනු ඇත.

අමරිකානු ඩ්‍රෝන ප්‍රහාරය එතකින් නොනවතින අතර, ප්‍රහාරක ඩ්‍රෝන නොකඩවා පහරදෙද්දී සතරවන ඩ්‍රෝන රැල්ලද ප්‍රහාරය අරඹනු ඇත. මෙම ඩ්‍රෝන, දැනට පර්යේෂණ මට්ටමේ පවතින මයික්‍රෝ-ඩ්‍රෝන වර්ගයට අයත වනු ඇති බව යුධ විශේෂඥයින් පවසයි. තණකොල පෙත්තෙක් වැනි කුඩා කෘමිසතෙකුගේ ප්‍රමාණයට සමානවන මෙම මයික්‍රෝ-ඩ්‍රෝන ලක්ශ ගණනින් සතුරු නගරය වෙත මුදා හැරෙන අතර එම ඩ්‍රෝන යානා සතුරු සෙබලුන් හට නිර්වින්දන බෙහෙත් අඩංගු තුඩු (darts) විදීමේ සිට ඔවුන්ගේ රථවාහන වලට ටයර කා දැමීම වැනි ක්‍රියා මෙන්ම සතුරු සෙබලුන් සිටිනා බංකර තුලට රිංගා කුඩා බෝම්බ පුපුරුවා ගන්නා සියදිවි හානි කරගන්නා ඩ්‍රෝනද (suicide drones) විය හැකි බව පවසනවා. අමරිකානු පාබල හමුදාව නගරයට ඇතුලු වනු අත්තේ  සතුරු හමුදා සම්පූර්ණයෙන්ම හෙම්බත්ව යටත්වෙන්නට එකඟවූ විට පමණකි. 


War Game #2 : සතුරු නාවික හමුදාවක් මුහුදේ අතරමං කල හැකි EMP Kill Switch

අනාගතයේදී චීනය, රුසියාව වැනි දැවැන්ත නාවික බලයක් සහිත සතුරෙකු සමග නාවික සටනක් කරන්නට අමෙරිකානු නාවික හමුදාවට සිදුවුවහොත්, මහා ජීවිත හා සම්පත් විනාශයකින් තොරව සතුරු නාවික හමුදාවේ ප්‍රහාරක මෙන්ම යාත්‍රා හැකියාවද ශුන්‍යකල හැකි EMP තාක්ශණක් මෙම යුධ සැළසුමේදී සාකච්ඡා වූවා.

මෙහිදී මයික්‍රෝ-තරංග ආධාරයෙන් සතුරු නෞකාවල ඉලෙක්ට්‍රොනික හා විදුලි උපකරණ අඩපණකල හැකි ඩ්‍රෝන භාවිතා කලහැකි බවට උපකල්පණය කෙරුණා. මෙම ඩ්‍රෝන මගින් නිකුත් කරන EMP තරංග සතුරු නාවිකයින්ගේ ජීවිත හානි නොකොට ඔවුන්ගේ නෞකා මුහුදේ අතරමං කරනු ඇතැයි විශ්වාස කෙරුනා. ඊට අමතරව සතුරු නෞකා ගමන්මාර්ග වල දමා තිබෙන මුහුදු බෝම්බ මගින්ද සාම්ප්‍රදායික මුහුදු බෝම්බ වලින් සිදුකරන පිපුරුම් වෙනුවට ප්‍රභල EMP  තරංග නිකුත් කොට එමගින්ද නෞකා අඩපණ කෙරෙනු ඇතැයි සැළකුනා. ඊටත් අමතරව බලසම්පන්න  EMP   තරංග නිකුතකල හැකි සබ්මැරීන මගින්ද සතුරු නෞකා අඩපණ කිරීම සැළසුම් කරුවන්ගේ අරමුණ වූව.

එහෙත් මෙහිදී මෙම සැළසුමට විරුද්ධ මත ප්‍රකාශ කල විශේශඥයින් පැවසූයේ අමෙරිකානු යුධ යාත්‍රා තරමටම අධි තාක්ශණික ඉලෙක්ට්‍රොනික උපකරණ වල නොයැපෙන චීන හා රුසියානු නාවික හමුදාවලට මෙම  EMP තරංග  ප්‍රහාර එතරම් බලපෑමක් ඇති නොකරනු බවයි.

War Game #3 : ජීව විද්‍යාත්මක අවි නිපදවන සතුරු රාජ්‍යයක/ත්‍රස්ත කණ්ඩායමක ජීව විද්‍යාත්මක අවි වැඩසටහන පරිගණක වෛරස හා ජීවී වෛරස මගින් අවුල්කොට දැමීම.

ඉරානයට එහෙරිව යෙදැවූ ස්ටක්ස්නෙට් වෛරසය වැනි පරිගණක වෛරස මගින් සතුරු රාජ්‍යයේ පර්යේශණ වැඩසටහන් අවුල් කොට දැමීම එක් සැළසුමක්. ඊට සමගාමීව ජීව විද්‍යාත්මක අවි වලට පාදක වන බැක්ටීරියාවට ආසාදනය වී ඒවා විනාශකල හැකි වෛරස නිපදවීමේ තාක්ශණයන් වැඩි දියුණු වෙමින් පවතින බව පැවසූ සැළසුම් කරුවන්, එම වෛරස සතුරු රාජ්‍යයේ ජීවවිද්‍යාත්මක අවි නිපදවීමට ගන්නා බැක්ටීරියා තොග වලට ඇතුළු කිරීමෙන් ඒවා විනාශකල හැකි බවට පැවසුනා. එහෙත් මෙවැනි වෛරස සතුරු බැක්ටීරියා තොගවලට ඇතුලු කරන්නේ කෙසේද යන්නට නිශ්චිත සැළසුමක් වැඩමුළුවට සහභාගී වූ විශේශඥයින් හට නොතුබූ බව පැවසෙනවා.





















2 comments:

අඟහරු ලොවට හිරු තැටියක් ගෙනගිය කිව්රියෝසිටි රෝවරය අඟහරු පොලොව මත මෝර්ස් සංඥා සටහන් කරයි!

මේවන විට අඟහරු වෙත ගොඩබට කිව්රියෝසිටි රෝවරය ගැන ඔබ බොහෝදේ දනී. අපගේ වෙබ් අඩවියෙන් මෙන්ම, විවිධ පුවත්පත්වලද වෛවර්ණ පිටු පුරාවට කිව්රියෝසිටි රෝවරයේ තාක්ශණික තොරතුරු හා එයින් සිදුකිරීමට බලාපොරොත්තුවන ගවේශණ පිලිබඳව ඔබ කියවන්නට ඇත.

එහෙත්, නාසා ආයතනය එතරම් ප්‍රසිද්ධියක් නොදුන්, පුවත්පත්වල වාර්තා නොවුනු තවත් විස්මිත රහස් ගණනාවක් කිව්රියෝසිටි අඟහරු ලොවට රැගෙන ගොස් ඇතැයි පැවසෙන අතර රෝවරයේ සැඟවුනු තොරතුරු කිහිපයක් විද්‍යා ගවේශණ වෙත වාර්තාවී ඇත.....

අඟහරුලොව හිරු තැටිය

රෝවරය නිර්මාණය කල නාසා අධිතාක්ශණික ගීකයින් (high-tech geeks) රෝවරයට සුපිරි තාක්ශණික උපකරණ ලබාදුන්නා මෙන්ම, වසර දහස්ගණනක් පැරණි තාක්ශණයක්ද ලබාදී තිබෙනවා. ඒ යාන්ත්‍රික ඔරලෝසුව නිපදවීමට පෙර පැරැණ්නන් වෙලාව දැනගත් හිරු තැටියක් අඟහරු ලොවට යවමින්.




මෙම හිරුතැටිය යැවීමේ අරමුණු කිහිපයක් තිබෙන බව නාසා ආයතනය පවසනවා. මෙයින් ඉතා වැදගත් අරමුණක් වන්නේ රෝවරයට සාපේක්ශව අඟහරු අහසේ හිරු තිබෙන ස්ථානය හිරු තැටියට වැටෙන සෙවනැල්ලේ පිහිටීමෙන් දැන ගත හැකිවීමයි. මීට අමතරව අඟරුවාගේ විෂුවය (equinox) හා සූර්ය නිවෘත්තිය (solstice) සිදුවීමට කොපමණ කල් ඇතිදැයි  දැනගැනීමද මෙය උපකාරීවේ.

කිව්රියෝසිටි හිරුතැටියේ රූපසටහනක්
මීට අමතරව රෝවරයේ කුඹයේ සවිකොට ඇති ප්‍රධාන කැමරා (MastCam) වල වර්ණ ක්‍රමාංකණය කිරීමටද (Colour Calibration ) මෙම හිරු තැටියේ සිවු කොන සවිකොට ඇති වර්ණ සතරක තීරු උපකාරී වෙනවා. යම් කාලාන්තර තුලදී මෙම වර්ණ තීරු වෙත කැමරා එල්ල කිරීමෙන්, කැමරාවෙන් ලැබෙන ඡායාරූප අඟහරුවාගේ නියම වර්ණ බවට තහවුරු කරගැනීමට උපකාරී වනවා.

අඟහරු පොලොව මත මෝර්ස් සංඥා සටහන් කරන රෝවරයේ රෝද

රෝවරය නිර්මාණය කල නාසා ගීකයින්ගේ තවත් අපූර්ව සිතුවිල්ලක් නම් රෝවරයේ රෝද අඟහරු පෘශ්ඨය මත සටහන් කරන රෝද සටහන් වල රෝවරයේ නිර්මාපකයා වන JPL ආයතනයේ නම, මෝර්ස් සංඥා ක්‍රමයට අඟහරු පොලොව මත සටහන් වන ආකාරයට එහි රෝදවල කැපුම් නිර්මාණය කිරීමයි.

මෝර්ස් සංඥා ක්‍රමය යනු තිතක් ( ඩොට් . ) හා ඉරක් (ඩෑශ් - ) ආකාරයට ඉන්ග්‍රීසි හෝඩියේ අකුරු සියල්ලම සටහන් කල හැකි සංඥා ක්‍රමයකි. මෙය අතීතයේ රේඩියෝ පණිවුඩ හුවමාරු සඳහා බෙහෙවින් යොදාගන්නා ලද අතර අද පවා හමුදා රේඩියෝ පණිවුඩකරුවන් හා නාවිකයින් ප්‍රගුණ කරන්නකි.


JPL අකුරු තුන මෝර්ස් සංඥා ක්‍රමයට සටහන් වන්නේ;

J > .---
P > .--.
L> .-..

ජේ.පී.එල් අකුරු තුන රෝවරයේ රෝද සටහන් අතර අඟහරු පෘශ්ඨයේ සළකුණු වී ඇති ආකාරය
  

රෝවරයේ විවිධ ස්ථානවල සටහන් වී ඇති ස්මාර්ට් ෆෝන් සඳහා දත්ත ලබාදෙන QR Code

රෝවරයේ විවිධ උපාංගවල ඡයාරූප නිරීක්ශණය කරන ඔබට පහත ඡායාරූපයේ ඇති ආකාරයට QR Code රූපසටහන් සළකුණු කර තිබෙනු දකින්නට ලැබී ඇත. නාසා ආයතනය සඳහන් කරන ආකාරයට මෙම QR Code මගින් ඉදිරි දිනවලදී දිනවලදී රෝවරයේ ගවේශණ පිලිබඳව තොරතුරු මහජනයා වෙත ක්ශණිකව ලබාගත හැකිවනු ඇත.


නාසා ආයතනය පවසන අන්දමට තවමත් මෙම කිව්.ආර් කේත ක්‍රියාත්මක නොවන අතර ඉදිරියේදී ඒවා ක්‍රියාත්මක කිරීමට බලාපොරොත්තුවේ. එවිට ඔබගේ ස්මාර්ට් ෆෝනය මගින් මෙම එකක ඡායාරූපයක් ගෙන ඔබටම මෙය අත්හදා බැලිය හැකිය.

Fiduciary Markers


රෝවරයේ විවිධ උපාංගවල ඡායාරූප අතර රූපයේ පෙනෙන ආකාරයේ අමුතු සළකුණු ඔබ නිරීක්ශණය කරන්නට ඇත. ෆිඩුශියරි මාකර්ස් හෙවත් විශ්වාසය තහවුරු කරන සළකුණු යනුවෙන් නම් කොට ඇති මෙම සළකුණු, නාසා ඉන්ජිනේරුවන් පවසන ආකාරයට කැමරා ඇතුළු විවිධ උපාංග චලනය වී ඇති ප්‍රමාණය පිලිබඳව දත්ත ලබාදෙයි.

උදාහරණයක් ලෙස කැමරාවෙන් රෝවරයේ ඡායාරූපයක් ගන්නා විට මෙම සලකුණු පිහිටන ස්ථාන අනුව කැමරාව අංශක කීයක් භ්‍රමණය වී ඇත් දැයි දැන ගත හැකි බව පැවසේ. මෙම මිනුම් කැමරාවේ ඇකියුටේටර් (ඇකියුටෙටර් - යමක් කරකැවීමට අවශ්‍ය මෝටරය හෝ හයිඩ්‍රොලික් උපාංග අඩංගු කොටස) මගින් එවන දත්ත සමග සසඳා අවශ්‍ය නම් කැමරාවේ ඇකියුටේටර් ක්‍රමාංකණය කිරීම මගින් කැමරාවේ බ්‍රමණය මිලිමීටර් ගණනාවකට සීරුමාරුකර ගත හැකි බව පැවසේ.






3 comments:

Plan X : පෙන්ටගනයේ සයිබර් යුධ සැළස්ම


අමෙරිකානු ආරක්ශක දෙපාර්තමේන්තුව හෙවත් පෙන්ටගනය පසුගිය සතියේදී සිය සයිබර් යුධ සැළසුමේ පිඹුරුපත ඉදිරිපත් කලා. ප්ලෑන් X ලෙස නම් තබා ඇති මෙය නිර්මාණය කොට ඇත්තේ පෙන්ටගනයට අනුබද්ධ පර්යේෂණ හා යුධ තාක්ශණය දියුණුකිරීමේ ආයතනය වන ඩාර්පා ආයතනයයි. අන්තර්ජාලයේ පුරෝගාමී පරිගණක ජාලය වන "ආර්පානෙට්" ජාලය නිර්මාණය වූවේත් ඩාර්පා ආයතනයේ පර්යේෂණ ව්‍යාපෘතියක ප්‍රථිපලයක් වශයෙනුයි.

සයිබර්ස්පේස් හෙවත් සයිබර්-අවකාශය දැනටමත් යුධ කළාපයක් වී ඇතැයි සඳහන් කරන පෙන්ටගනය ප්ලෑන් X හි අරමුණ මෙම සයිබර්-අවකාශ යුධ කළාපයේ අමෙරිකානු ආධිපත්‍යය රඳවා ගැනීමයි. පසුගියදා ඉරාණයේ න්‍යශ්ඨික ව්‍යාපෘතියේ පරිගණකවලට ඇතුළුකරවන ලද - අමෙරිකානු/ඊශ්‍රායක් හවුල් ව්‍යාපෘතියක් ලෙස සැලකෙන් ස්ටක්ස්නෙට් වෛරසය වැනි වෛරස් ප්‍රහාර සතුරු රාජ්‍යයක පරිගණක පද්ධති වෙත ඕනෑම මොහොතක මුදාහැරීම මෙම සැළස්මේ එක් අරමුණක් බව විචාරකයින් පවසනවා.

ස්ටක්ස්නෙට් වෛරසය ක්‍රියාත්මක වන ආකාරය, Source : Trend Micro Antivirus

From Cyber Defense to Cyber Strike

පසුගිය වසර ගණනාව මුළුල්ලේම ඩාර්පා ආයතනයේ සයිබර් ප්‍රහාර පර්යේෂණ අමෙරිකානු යුධමය හා සිවිල් පරිගණක පද්ධති සයිබර්-ත්‍රස්ත ප්‍රහාරයකින් ආරක්ශාකරගැනීමේ ආරක්ශක උපක්‍රම නිර්මාණය කිරීමේ ව්‍යාපෘති ලෙස පැවතුනා. කුප්‍රකට ස්ටක්ස්නෙට් වෛරසය ප්‍රහාරාත්මක ව්‍යාපෘතියක් වුව එය නිර්මාණයට ඩාර්පා ආයතනය දායක වූ බව හෙලිවී නෑ. 

එහෙත් ප්ලෑන් X, ඩාර්පා ආයතනයේ ආරක්ශා-මූලික (defensive) සැළසුම්වලින් ඔබ්බට ගොස් ප්‍රහාරාත්මක  (offensive) තාක්ශණ යා යුධ සැළසුම් නිර්මාණය කිරීමේ පිඹුරුපතක් වනවා.

Launch a counter-strike at net speed

මේ අනුව ඕනෑම මොහොතක සතුරු රාජ්‍යයක ජාතික අන්තර්ජාල යටිතල ජාලය (national internet backbone), බැංකු පරිගණක පද්ධති, ආරක්ශක අංශවල පරිගණක ජාල, ජාතික දුරකථන ජාලය වැනි මර්මස්ථානවලට විනාශකාරී සයිබර්ප්‍රහාර එල්ල කිරීම සඳහා ක්‍රියාන්විත සැලසුම් (cyberspace strike plans) නිමාණය කොට සූදානමින් තැබීමට බලාපොරොත්තු වෙනවා. එමෙන්ම ප්ලැන් X නිර්දේශවලට අනුව අමෙරිකානු යුධ සෙනෙවියන් හට සයිබර් අවකාශයේ සිදුවන ප්‍රහාර හා ප්‍රතිප්‍රහාර තථ්‍ය-කාලීනව (real-time) අධ්‍යයනය කල හැකි, නිරන්තරව යාවත් කාලීනවන, සයිබර් අවකාශයේ ඩිජිටර් යුධ සිතියම් (digital battle maps of cyberspace) නිර්මාණය කිරීමටද සැළසුම් කොට තිබෙනවා.

පස් අවුරුදු ව්‍යාපෘතියක් වන මෙය සඳහා ඩොලර් මිලියන 100ක බරපැන වශයෙන් ලබාදී තිබෙනවා.

මෑතක් වන තුරුම අමෙරිකානු යුධ සැළසුම්කරුවන් සයිබර් ප්‍රහාර සඳහා මැළිකමක් දක්වන්නට වූයේ එම ප්‍රහාර ඉලක්ක රාජ්‍යයේ පරිගණක ජාලවලට සීමා කරගත හැකි තාක්ශණයන් එතරම් දියුණු නොවූ බැවිනි. ලොව පුරා ව්‍යාප්ත අන්තර්ජාල සබඳතා නිසා යුධමය වෛරසයක් ඉලක්ක ජාලයෙන් වෙනත් අපක්ශපාතී රටවල් වල පර්ගණක ජාලවලට පැතිරීමේ විශාල අවදානමක් තිබෙනවා.

උදාහරණයක් ලෙස, දෙවන ගල්ෆ් යුද්ධය ආරම්භයේදී ඉරාකයේ බැග්ඩෑඩ් අගනුවර බැංකු හා මූල්‍ය පද්ධතිය හා සන්නිවේදන පද්ධතිය වෙත දැවැන්ත සයිබර් ප්‍රහාරයක් එල්ලකොට එය මුළුමණින්ම අඩපණකොට දැමීමට පෙන්ටගනය සැළසුම් කලත්, එම ප්‍රහාර ඉරාකයට සීමා කරගැනීමට නොහැකිවේ යන බිය නිසා එම සැළැස්ම අතහැර දැමුණු බව පැවසෙනවා.

ප්ලෑන් X නිර්දේශ

1. සයිබර් යුධ සටන් සඳහා මූලික රීති මාලාවක් නිර්මාණය කිරිම (rules of engagement for cyber warfare)

2. ප්‍රහාර එල්ල කිරීමට හෝ සතුරු ප්‍රහාර මැඩපැවැත්වීමට හැකි යුධ සැළසුම් නිර්මාණය කිරීම හා එම සැළසුම් වලින් සිදුකල හැකි හානිය පිලිබඳව ඇස්තමේන්තු සකස්කිරීම (preparing battle plans and assessing potential battle damage)

3. සයිබර් ප්‍රහාරවලට ඔරොත්තු දියහැකි මෙහෙයුම් පද්ධති, මෘදුකාංග හා දෘඩකාංග නිර්මාණය කිරීම හා සයිබර් සටන් ක්‍රියාන්විත මෙහෙයවිය හැකි මෘදුකාංග හා දෘඩකාංග නිපදවීම. (operating systems AND software that can withstand the rigors of a full-blown online conflict)

4. සතුරු සයිබර් ප්‍රහාරයක් එල්ලවන විට එයට ස්වයංක්‍රීයව ප්‍රතිප්‍රහාර එල්ලකල හැකි සයිබර් යුධ යන්ත්‍ර නිර්මාණය කිරීම. (hardened ‘battle units’ that can perform cyberwarfare functions such as battle damage monitoring, communication relay, weapon deployment, and adaptive defense)










3 comments:

නිකොන් සමාගම ඇන්ඩ්‍රොයිඩ් කැමරාවක් නිපදවමින් සිටී?


ඡායාරූපකරණය පිලිබඳව සාකච්ඡා කරන වෙබ් අඩවිවල විවිධ කැමරා සමාගම් මගින් හඳුන්වාදීමට නියමිත අධිතාක්ශණ කැමරා පිලිබඳ පූර්ව විස්තර පලවෙයි. මෙම වෙබ් අඩවිවල මේ දිනවල වැඩිපුරම කතාබහට ලක්වෙමින් ඇත්තේ නිකොන් සමාගම නිපදවමින් සිටිනවා යැයි පැවසෙන ඇන්ඩ්‍රොයිඩ් මෙහෙයුම් පද්ධතිය පාදක කරගත් කැමරාවයි.
Nikon Cookpix S800 Android based point & shoot camera
Nikon Coolpix S800 ලෙස නම්කිරීමට සූදනම් කොට ඇති බවට විශ්වාස කෙරෙන මෙම කැමරාව 3.5mm OLED touch screen මාදිලියේ තිරයකින් සමන්විත වන අතර ඇන්ඩ්‍රොයිඩ දුරකථන භාවිතාකරන්නන් හට මෙම කැමරාව භාවිතා කිරීම ඉතා පහසුවනු ඇතැයි පැවසේ.

එමෙන්ම ඇන්ඩ්‍රොයිඩ් මෙහෙයුම් පද්ධතියට අමතර හැකියාවන් එකතුකරන Android Apps බාගත කරගෙන ධාවනය කිරීමේ හැකියාව මෙම කැමරාවට තිබේ. ඒ අනුව Instagram, Adobe Photoshop Express, Photoid, Vignette වැනි Photography Apps මගින් කැමරාව තුලදීම ඡායාරූප සංස්කරණය කිරීම, Gmail වැනි ඊමේල් සේවා මගින් කැමරාවේම සිට ඡායාරූම යැවීමට හැකිවීම, කැමරාවේ Facebook App මගින් ෆේස්බුක් පිටුවට ඡායාරූප කිරීම වැනි සුවිශේෂ පහසුකම් ලැබී ඇත.

අන්තර්ජාලය හා සම්බන්ධවීම සඳහා කැමරාව WiFi ජාල හා සම්බන්ධවීමේ හැකියාව ලබාදී ඇත.

නිකොන් ඇන්ඩ්‍රොයිඩ් කැමරාවේ තාක්ශණික දත්ත

25-250mm lens
3.5" OLED Touch Screen
Android 2.3 Gingerbread
WiFi / GPS

නිකොන් සමාගම S800 කැමරාව අගෝස්තු මස අවසාන සතිය තුලදී ලොවට ඉදිරිපත් කිරීමට බලාපොරොත්තුවන බව පැවසේ.

0 comments:

අමෙරිකානු සුපිරි F-22 යානය ගුවන් සටන් වලදී යුරෝපීය යානාවලට පරදී? - 2012 රෙඩ් ෆ්ලෑග් ගුවන් සටන් අභ්‍යාසවලදී F-22 යානා Eurofighter Typhoon යානාවලට පරාජය වෙයි!


බරපතල දෝශ තත්වයක් නිසා F-22 යානා බිම්ගත කිරීම

අමෙරිකානු සුපිරි ප්‍රහාරක යානය වන F-22 යානයට ලබා ඇත්තේ ඉතා අසුබ කාළයකි. මාස ගණනාවක් F-22 යානා බිම්ගන්වා තිබුණේ එම යානා පියාසර කරන නියමුවන් යානාව ගුවනේ තිබෙනවිට ඔක්සිජන් අඩුවීම නිසා හයිපොක්සියා නම් ආබාධයට ලක්වීම නිසාය. මේ හේතුවෙන් F-22 යානා කිහිපයක් කඩා වැටුනු අතර නියමුවන් දෙදෙනෙක් මරණයට පත්විය.

යානා නිශ්පාදකයාත්, අමෙරිකානු ගුවන්හමුදාවත් මෙම බරපතල දෝෂ තත්වය යටගසමින් දිගින් දිගටම F-22 යානා පියාසර කරවීම සඳහා නියමුවන්ට බලකිරීම හේතුවෙන් F-22 නියමුවන් කණ්ඩායමක් හමුදා නීති උල්ළංඝනය කරමින් F-22 යානා පියාසර කිරීම ප්‍රතික්ශේප කිරීමෙන් තත්වය තවත් බරපතල විය. එම විරෝධය මාධ්‍යමගින් වාර්තාවූ අතර එක්සත් ජනපද ගුවන්හමුදාව ගුවන් නියමුවන්ගේ මෙම ක්‍රියාවෙන් බලවත් අපහසුතාවයට පත්විය.

අවසානයේ අමෙරිකානු ආරක්ශක ලේකම් ලියෝන් පැනේටාගේ මැදිහත්වීම මත F-22 යානා පූර්ණ පරීක්ශාවකට බඳුන්කොට දෝශ නිවැරදි කරනතෙක්  2011 මැයි මාසයේ සිට බිම් ගන්වා තිබුණු අතර නැවතත් එම යානා පියාසර කරවීම සඳහා ගුවන්හමුදාවට අවසර ලැබුණේ මේ මෑතකදීය.

Red Flag 2012 ගුවන් සටන් අභ්‍යාසවලදී F-22 යානාවල සුපිරි හැකියාවන් එතරම් සුපිරි නොවන බව හෙලිවේ!

නෙලී ගුවන්හමුදා පුහුණු ප්‍රදේශයේ  ක්‍රියාත්මක වුනු රෙඩ් ෆ්ලෑග් 2012 සටන් පුහුණු මෙහෙයුමේ ගුවන්යානා ස්ථානගත කොට තිබුණු ආකාරය
F-22 යානා ගුවන්ගත කිරීම සඳහා අවසර ලැබෙනවාත් සමගම අමෙරිකානු ගුවන් හමුදාවට F-22 යානා පිලිබඳව තවත් නරක ප්‍රවෘත්තියක් ලැබුණා. ඒ රෙඩ් ෆ්ලෑග් නමින් හඳුන්වන රටවල් ගණනාවක ගුවන් හමුදා සහභාගීවන ගුවන් සටන් අභ්‍යාස මාලාවේ පැවැත්වුනු ආසන්නව සිදුකෙරෙන ගුවන් සටන් අභ්‍යාස වලදී (close air combat) අමෙරිකානු F-22 යානා පහසුවෙන් කොටු කරගැනීමට ජර්මන් ගුවන් හමුදාවේ යුරෝෆයිටර් ටයිෆූන් නියමුවන් හට හැකිවීමයි.  සැබෑ ගුවන් සටනකදීනම් F-22 යානා සියල්ලම වෙඩිතබා බිම හෙලීමට යුරෝෆයිටර් පියාසරකල ජර්මන් ගුවන් නියමුවන් හට හැකියාව තිබුණු බව පැවසෙනවා.

මේ බව මුලින්ම වාර්තාකලේ බ්‍රිතාන්‍ය ගගනවිද්‍යා සඟරාවක් වන "Combat Aircraft Monthly" සඟරාවේ 2012 අගෝස්තු කළාපයයි. රෙඩ් ෆ්ලෑග් ගුවන් සටන් අභ්‍යාස පිලිබඳවය විශේෂාංග ලිපියක් පලකරන එම කළාපය මෙම තොරතුර මුලින්ම ලොව හමුවේ තැබුවා.

රෙඩ් ෆ්ලෑග් ගුවන් සටන් අභ්‍යාසමාලාව සෑම වසරකම නෙවාඩා ප්‍රාන්තයේ නෙලී ගුවන් අභ්‍යාස ප්‍රදේශයේ හා ඇලස්කා ප්‍රාන්තයේ පැවැත්වෙනවා. මෙම අභ්‍යාස සඳහා නේටෝ සංවිධානයේ රටවල ගුවන් හමුදාවන්ට හා අමෙරිකාවට බොහෝ හිතවත් රටවල්වල ගුවන් හමුදාවන්හට ආරාධනා ලැබෙනවා. බ්‍රිතාන්‍යය, ජර්මනිය, ප්‍රංශය, නෙදර්ලන්තය, නෝර්වේ වැනි යුරෝපීය රටවල් මෙන්ම ඉන්දියාව, ඔස්ට්‍රේලියාව, නවසීලන්තය, ජපානය, කොරියාව, තුර්කිය, සිංගප්පූරුව වැනි අමෙරිකාවට හිතවත් රවලට මෙම පුහුණුව සඳහා  ආරාධනා ලැබෙනවා.

මෙහිදී එම රටවල් කාණ්ඩ වශයෙන් බෙදී එකිනෙකා අතර ගුවන්සටන් පුහුණු සැසි පවත්වන්නේ නියමුවන්ගේ සටන් හැකියාවන් දියුණු කිරීමට හා යුධමය අවස්ථාවලදී එක් එක් රටවල් වල ගුවන් හමුදාවලට එකට එකතුව එක් බළකායක් මෙන් ක්‍රියාත්මක වීම සඳහා අවශ්‍ය සංවිධානමය හැකියාව ලබාගැනීමටයි.

F-22 යානා සතුව ඇතැයි ඇමරිකානු ගුවන් හමුදාව පවසන ගුවනේ බලපරාක්‍රය රඳවාගැනීමේ හැකියාව අභියෝගයට ලක්වීම.

F-22 යානාවට සටන් දුර්වලතාවයන් පිලිබඳව තොරතුරු පැමිණ තිබෙන්නේ අමෙරිකාව විසින්ම සංවිධානය කල අභ්‍යාසමාලාවකදී, ලොව ඉහලම මට්ටමේ ගුවන් හමුදාවක් ලෙස සැළකෙන ජර්මන් ගුවන්හමුදාවේ අත්දැකීම් අතරින් වීම F-22යානයේ කීර්තිනාමයට විශාල හානියක් විය හැකි බව පැවසෙනවා. අමෙරිකානු ගුවන් හමුදාව F-22 යානයේ සුපිරි හැකියාවන් පිලිබඳව අධි තක්සේරුවක සිටිනා බව, Combat Aircraft Monthly සඟරාවේ වාර්තාව පිලිබඳව ඌණපූරණයක් කරන අමෙරිකාවේ සුප්‍රකට තාක්ශණික සඟරාවක් වන "Popular Mechanics" සඟරාවේ අන්තර්ජාල සංස්කරණයේ පලවූ ලිපියක් හෙලිදරව් කරණවා.

ඕනෑම යුධ ගුවන්යානයක් බිමහෙළිය හැකියි, එය F-22ටත් පොදුයි

ජර්මානු ගුවන්හමුදාවේ යුධගුවන්යානා විශේෂඥයින් හා අමෙරිකානු ගුවන්හමුදාවේ නිළධාරීන් පවසන්නේ F-22 යානයේ මෙම දුර්වලතා තමන් හොඳින් දැන සිටි බවත්, අලුතින් යමක් සොයාගෙන නොමැති බවත්ය.

එක්සත් ජනපද ගුවන් හමුදාවේ ලුතිනන් කර්නල් මාර්ක් ගෘවෙනි Combat Aircraft Monthly පැහැදිලිකල අන්දමට;
"ඕනෑම යුධගුවන් යානයක් බිම හෙලිය හැකියි, එය F-22ටත් පොදුයි. ඒවගේම කිසිම ප්‍රහාරක යානයක් තනිවම සටනට යන්නේ නෑ, විවිධ හැකියාවන් ඇති යානා වර්ග ගණනාවක් එක්සත් ජනපද ගුවන්හමුදාවට ඇත්තේ එක් එක් යානාව අවශ්‍ය පරිදි යොදා ගැන්මටයි....F-22 අමෙරිකන් ගුවන්හමුදාවට කෝකටත් තෛලයක් කියලා හිතන එක වැරදියි...F-22 යානය නිර්මාණය කොට තිබෙන්නේ ආසන්න ගුවන් සටන් සඳහා නෙමෙයි, සතුරු යානා ලංවෙන්නට පෙර, ක්සිතිජයටත් ඔබ්බෙන් පියාසරකරමින් තිබෙනවිට ඒවා බිම හෙලීමට අවශ්‍ය තාක්ශණයෙනුයි F-22 සන්නද්ධ කොට තිබෙන්නේ. ගුවන් සටන් සඳහා අපට F-15 ස්ට්‍රයික් ඊගල් යානා, F/A-18 හෝනට් යානා වගේම F-16 ෆෝල්කන් යානාද තිබෙනවා."  
එලෙසම රෙඩ් ෆ්ලෑග් පුහුණු සැසියට සහභාගීවුනු ජර්මන් ගුවන්හමුදාවේ නිළධාරීන්ද ලුතිනන් කර්නල් ගෘවෙනිගේ පැහැදිලිකිරීමට එකඟවුනු බව සඟරාව පවසනවා.
"F-22 යානාව සතු ක්සිතිජයට ඔබ්බෙන් ඇති යානා වලට පහරදීමේ හැකියාව (beyond visual range combat) විශිෂ්ඨයි. යුරෝෆයිටර් ටයිෆූන් යානයට එම හැකියාව නෑ....ඒවගේම close air combat සටන් යුධ ගුවන්යානාවකට මුහුණ දෙන්නට සිදුවන අභියෝගවලින් එකක් පමණයි...." 
Red Flag - Nellie's Air Force Base


F-15C ස්ට්‍රයික් ඊගල් යානයක් රෙඩ් ෆ්ලෑග් ගුවන් සටනක් සඳහා ගුවන්ගත වෙයි.
බ්‍රිතාන්‍ය රාජකීය ගුවන්හමුදාවේ ටෝර්නේඩෝ ප්‍රහාරක යානයක් නෙලී කඳවුරෙන් ගුවන්ගත වෙයි.
දකුණු කොරියානු ගුවන්හමුදාවේ F-15 ස්ට්‍රයික් ඊගල් යානයක් පුහුණුවට සහභාගී වෙමින්
එක්සත් ජනපද ගුවන් හමුදාවේ සිකෝර්ස්කි  HH -60G පේව්-හෝක් හෙලිකොප්ටරයක් සූදානම් කරමින් සිටින තාක්ශණික නිළධාරීන්
රාජකීය ඔස්ට්‍රේලියානු ගුවන් හමුදාවේ C-130 හර්කියුලීස් භාණ්ඩ ප්‍රවාහන යානයක්   රෙඩ් ෆ්ලෑග් මෙහෙයුමකට එක්වෙමින්
B-1B ලාන්සර් බෝම්බ හෙලන යානයක් නෙලී කඳවුරෙන් ගුවන්ගත වෙමින්
ඉන්දියානු ගුවන්හමුදාවේ සුක්හොයි SU-30 ප්‍රහාරක යානයක් රෙඩ් ෆ්ලෑග් පුහුණු සැසියේ රාත්‍රී මෙහෙයුමකට සූදානම් වෙමින්
B-52 Stratofortress බෝම්බ හෙලන යානයක් නෙලී කඳවුරෙන් ගුවන්ගත වෙමින්
AC-10 තන්ඩර්බෝල්ට් යානා නෙලී කඳවුරෙන් ගුවන්ගත වෙමින්
ඔස්ට්‍රේලියානු ගුවන්හමුදා තාක්ශණ නිළධාරීන් ලේසර් මගින් මගපෙන්වන මිසයිලයික් යානාවකට සවිකරන්නට ගෙනයමින්







2 comments: