ඇමරිකන් ඩ්‍රෝන යානාවලින් හැංගෙන්නේ මෙහෙමයි! අල්ඛයිඩාව සිය සටන්කාමීන්ට උපදෙස් පත්‍රිකාවක් බෙදා හරියි!

අල්ඛයිඩා වෙබ් අඩවි මගින් බෙදාහරින අයිතම 22කින් සමන්විත ඩ්‍රෝනයානාවලින් සැඟවීමේ උපදෙස් සහිත පත්‍රිකාව.
වසර 2000 සිටම අමෙරිකන් හමුදා ඉස්ලාමීය සටන්කාමීන් විනාශකිරීමට සන්නද්ධ ඩ්‍රෝනයානා යොදාගන්නා ලදී. ඩ්‍රෝන ප්‍රහාරයකින් මිය ගිය පලමු අල් ඛයිඩා නායකයා වනුයේ යේමනයේ අල් ඛයිඩා නායක ක්වඊඩ් සලීම් සිනාන් අල් හාති නැමැත්තාය . ඒ 2002 වසරේදීය. එතැන් පටන් අමෙරිකානු ඩ්‍රෝන යුද්ධය නොකඩවා සිදු කෙරුනු අතර 2009 වසරේ සිට ඇෆ්ඝන් යුද්ධයේ වැඩි බර ඩ්‍රෝන යානාවලින් ගෙනයනු ලැබීය.

අල්ඛයිඩා සටන්කාමීන්ට හා ඔවුන්ගේ අනුබද්ධ සංවිධානවල නායකයින් සියගණනක් අමෙරිකානු ඩ්‍රෝන ප්‍රහාරවලට ගොදුරුවී ඇති අතර මෙම ප්‍රහාරවලින් හෙම්බත්වී සිටින අල්ඛයිඩා-තලේබාන්-මුජහිඩීන් සටන්කාමීන් හට යම් ඉස්පාසුවක් ලබාගත හැකි යමක් මේ දිනවල අල්ඛයිඩා වෙබ් අඩවි හරහා බෙදා හරිමින් තිබේ. යේමනෙයේ අල්ඛයිඩා නායකයකු විසින් රචිත බවට ප්‍රචලිත මෙය, අල්ඛයිඩා-තලේබාන්-මුජහිඩීන් සටන්කාමීන් හට අමෙරිකානු ඩ්‍රෝන ප්‍රහාරවලින් ආරක්ශාවන අන්දම හා ඩ්‍රෝන යානාවල සංවේදක රවටන උපක්‍රම වල විස්තර ඇතුලත් උපදෙස් මාලාවකි.
2012 අගෝස්තු 31 ගන්නා ලද මෙම ඡායාරූපය අල්ඛයිඩා සටන්කාමීන් මාලීහි ටිම්බුක්ටු නගරයේ අණසක පතුරුවන ආකාරය පෙන්වනවා.
අයිතම 22කට ගොනුකොට ඇති මේ උපදෙස් මාලාව 2011 වසරේ රචිත බව පැවසුනත් මුල් වරට එහි පිටපතක් බටහිර මාධ්‍යවලට ලැබී ඇත්තේ මේ නොබොදා මාලී දේශයෙනි. මාලී දේශය මේ වන විට අඛයිඩා අන්තවාදී සටන්කාමී කණ්ඩායම් ආක්‍රමණය කරමින් පවතින අතර ප්‍රංශ ගුවන්හමුදාව හා විශේෂ බළකා සේනාංක මාලී දේශයෙන් අල්ඛයිඩා සටන්කාමීන් පලවා හැරීම සඳහා මාලී නිළ යුධ හමුදාවේ සහයට පැමිණ  තිබෙනවා. මුලින් විශාල ජයග්‍රහණ අත්පත් කරගනිමින් වේගයෙන් ඉදිරියට ගිය අල්ඛයිඩා සටන්කාමීන් මේ වනවිට ප්‍රංශ ගුවන් ප්‍රහාර හා විශේෂ බලකා ප්‍රහාර හමුවේ පසුබසිමින් සිටිනවා. මෙම උපදෙස් මාලාව මාලීහි අල්ඛයිඩා සටන්කාමීන් අතහැර පලාගිය ටිම්බුක්ටු නගරයේ ඔවුන් මූලස්ථානය ලෙස භාවිත කර තිබුණු ගොඩනැගිල්ලක තිබී ඇසෝසියේටඩ් ප්‍රෙස් පුවත් සේවාවේ වාර්තාකරුවෙකුට හමුවූ බව පැවසෙනවා.
ප්‍රංශ මිරාජ් ප්‍රහාරක යානා මාලී අගනුවර බමාකෝ ගුවන් තොටුපලින් මෙහෙයුමක් සඳහා පිටත්වන්නට සූදානම් වෙමින්
අල්ඛයිඩාව හා සම්බන්ධ වෙබ් අඩවියකින් බාගත කරගෙන ඡායාපිටපත් කොට තිබූ මෙම උපදෙස්මාලාව අරාබි භාශාවෙන් ලියැවී ඇති අතර ප්‍රංශ හමුදාවේ ඔත්තු බලන ඩ්‍රෝනයානා වලින් ආරක්ශාවීම සඳහා මෙම උපදෙස් මාලාව මාලී හි සටන්කාමීන් අතර බෙදා හරින්නට ඇතැයි පැවසෙනවා.

මෙම උපදෙස්මාලාව පිලිබඳව අදහස් පලකරන අමෙරිකානු ගුවන්හමුදාවේ කර්නල් සෙඩ්‍රික් ලෙයිටන්, මෙම උපදෙස් මාලාව ඉතා ප්‍රායෝගික, සමහර අවස්ථාවලදී ඉතා සාර්ථක ප්‍රථිපල ලබාදිය හැකි සරල උපදෙස් මාලාවක් බව පවසන අතර ඩ්‍රෝනය යානා මගින් ඇති කර තිබෙන තර්ජනය පිලිබඳව අල්ඛයිඩා බුද්ධිමතුන් 2010-2011 කාළවකවානුවේ දී පවා ඉතා ගැඹුරින් අධ්‍යයනය කොට තිබෙන බව මෙම උපදෙස්මාලාවෙන් තහවුරුවන බව පවසනවා.

ඇමරිකාව ඩ්‍රෝන යුද්ධයකට අවතීර්ණවීම පිලිබඳව ඉතා විචක්ශණ පසුබිම් විස්තරයක්ද සමන්විත මෙම උපදෙස් මාළාවේ ඉංග්‍රීසී පරිවර්තනයේ සම්පූර්ණ සිංහල අනුවාදයක් පහත පලකොට තිබෙනවා.


පසුබිම
--------
ඇමරිකාව යේමනයේ මුජහිඩීන් හමුදාවලට විරුද්ධ ප්‍රහාර මින් ඉදිරියට ඩ්‍රෝන යානා මගින් කරනු ඇත. නිව්යෝර්ක් ටයිම්ස් පුවත්පත විසින් මෑතකදී කරන ලද හෙළිදරව්වකින් මෙය තහවුරු වී ඇති අතර මින් ඉදිරියට සී.අයි.ඒ සංවිධානය විසින් යේමනයේ අමෙරිකන් ඩ්‍රෝන යුද්ධය මෙහෙයවන අතර ඒ සඳහා ආසන්න රටක රහසිගත කඳවුරක් ඔවුන් විසින් පිහිටුවාගෙන ඇත. මෙබැවින් මෙම උපායමාර්ගය පිලිබඳව හොඳ අවබෝධයක් ලබා ගැනීම මුජහිඩීන් සටන්කාමීන් හට ඉතා වැදගත් අතර එම උපායමාර්ගය පැරැදවීමේ උපක්‍රම පිලිබඳවද දැනුවත්ව සිටීම ඉතා වැදගතය.
මුලින්ම අමෙරිකාවේ මේ ඩ්‍රෝන යුද්ධයට අවතිර්ණවීමට හේතුව අවබෝධ කරගත යුතුය. ඔවුන් එසේ කර ඇත්තේ මේ අවස්ථාවේ මුජහිඩීන් වරුන්ට විරුද්ධව සටන මෙහෙයවීමට හොඳම උපායමාර්ගය ඩ්‍රෝන යානා වීමය. එසේත් නොමැතිව අමෙරිකාව සතුව ප්‍රහාරක ජෙට් යානාවල හිඟයක් හෝ පාබල හමුදාවල හිඟයක් ඇතැයි වරදවා වටහාගත යුතු නැත.අමරිකානුවන්  මුජහිඩීන්/අල්ඛයිඩා සටන්කාමීන්ට විරුද්ධ යුද්ධයට අවතීර්ණව දැන් වසර 10ක් ගතවී ඇති අතර මේ අනුව ඔවුනට තවදුරටත් මෙම යුද්ධය සඳහා විශාල ලෙස මුදල් පොම්ප කිරීමේ හැකියාවක් නැත. එපමණක් නොව අමෙරිකානු භටයින් විශාල සංඛ‍යාවක් මියයාමද අමෙරිකානු යුධ සැළසුම්කරුවනට විශාල ගැටළුවක් වී ඇත. අමෙරිකානු ජනතාව සිය සෙබළුන් විශාල වශයෙන් මිය යන විට එයට දැඩි ප්‍රතිරෝධයක් දක්වන අතර ඒ අනුව හා කොන්ග්‍රස් මණ්ඩලය මෙම යුද්ධයෙන් අමෙරිකාව නම්බුකාර අන්දමින් ඉවත්කර ගැනීමේ සැලැස්මක් යෙදවීම සඳහා යුධ සැළසුම්කරුවනට බලකරමින් සිටී. 
එහෙත් එයින් අදහස් කරන්නේ අමෙරිකානුවන් සටන අතහැර ඇති බවක් නොවේ. අමෙරිකානුවන් අති විශාල මුදල් සම්භාරයක් වියදම් නොකොට, අමෙරිකානු ජීවිත අණතුරේ නොදමා සටන ගෙනයාමේ හැකියාවක් සොයාබලමින් සිටියා පමණකි. අප සටන්කාමීන්ට විරුද්ධව ඩ්‍රෝන යුද්ධයක් මෙහෙයවීමේ තීරණයට අමෙරිකානුවන් එලඹෙන්නේ මේ පසුබිම තුලයි.ඩ්‍රෝන යානා නියමුවන් රහිතව ක්‍රියාත්මක වන අතර ඒවායේ මෙහෙයුම් සඳහා යන වියදම ප්‍රහාරක ජෙට්යානාවක් මෙවැනි මෙහෙයුමකට යොදවන්නට යන වියදමින් අල්පයක් පමණකි.එමෙන්ම එම යානා කඩාවැටුන විට නියමුවන් අපගේ ග්‍රහණයට නතුවීමේ අවදානමක් නැති අතර ඒ අනුව අමෙරිකානු සැළසුම් කරුවන්ට අමෙරිකානු යුධ සිරකරුවන් නිසා ඇතිවන මහජන පීඩනයෙන් ගැළවී සිටීමේ මගක් පෑදී ඇත. අතීතයේදී අමෙරිකාව බොහෝ යුද්ධවලින් ඉවත්වන්නට හේතුව අමෙරිකානු සෙබලුන් මිය යනවිට අමෙරිකානු ජනතාව වීදි බැස සිය පුතුන් ආපසු ගෙන්වාගන්නා ලෙස අමෙරිකානු රජයට බලකිරීමයි. 
ඩ්‍රෝන යානා යෙදවීමේදී මේ ගැටලු කිසිවක් ඇති නොවේ.වියදම අතින් බලන කල එක් අමෙරිකානු F15 ඊගල් ප්‍රහාරක යානයකට යන වියදමින් ඩ්‍රෝන යානා 1000ක් නිපදවාගත හැකිය. (*** සැ:යු: මෙය එතරම් නිවැරදි ගණන් බැලීමක් නොවේ). මෙහෙයුම් වියදම් සලකන විට එක් අමෙරිකානු ජෙට් යානාවක් සඳහා යන ඉන්ධන වියදමෙන් ඩ්‍රෝන යානා පියාසැරි 200ක් සිදුකල හැකිය. අමෙරිකානු ගුවන් හමුදා පුහුණුවීම් වියදම් හා කාළය දෙස බලන විට එක් ජෙට් නියමුවෙකු පුහුණු කිරීමට වසර කිහිපයක් ගතවන අතර ඩොලර් මිලියනයකට අධික බරපැනක් දැරිය යුතුය. ඩ්‍රෝන යානයක් පැදවීමට පුහුණු කිරීමට යන්නේ ඉතා සුලු මුදලක් වන අතර මාස තුනක කාලයකින් නියමුවෙකු පුහුණු කල හැකිය. මේ අනුව ඩ්‍රෝනයානා ආධාරකොට ගෙන අමෙරිකානුවන් දීර්ඝකාලීන යුද්ධයකට සූදානම් වී සිටී.පාකිස්ථානයේ වසිරිස්ථානයේදී ඩ්‍රෝන යානා යොදවා අමෙරිකානුවන් සාර්ථක ප්‍රථිපල නෙලාගෙන ඇති අතර දැන් ඔවුන් ඩ්‍රෝන යුද්ධය යේමනය වෙත ගෙනවිත් ඇත. මේ අනුව මෙම ඩ්‍රෝන යානාවලින් සැඟවෙන උපක්‍රමත් ඒවායේ සංවේදක රවටන ආකාරයත් හැදෑරීම වැදගත් වේ. ඒ සඳහා යොදාගත හැකි උපක්‍රම ලයිස්තුවක් පහතින් දක්වා ඇත.
1) ඩ්‍රෝන යානයක මෙහෙයුම් ඉලක්ක පිලිබඳව දැනුවත්වීම සඳහා එම යානයෙන් විකාශණය කරන වීඩියෝ සංඥා පරික්ශා කිරීම සිදුකල යුතුය. මේ සඳහා රුසියානු මෘදුකාංගයක් වන "ස්කයි ග්‍රැබර්" මෘදුකාංගය භාවිතාකල හැක. ඩොලර් 2500ක පමණ සුළු මුදලකට ලබාගත හැකි මෙම මෘදුකාංගය මගින් ප්‍රිඩේටර් වැනි ඩ්‍රෝනය යානාවලින් විකාශණය කරන අසංකූල (unscrambled) වීඩියෝ සංඥා පහසුවෙන් ග්‍රහණය කරගත හැකිය. (*** සටහන: ඉරාකයේ හා ඇෆ්ඝනිස්ථානයේ අල්ඛයිඩා සටන්කාමීන් 2009 තරම් ඈත කාලයේ සිට මෙලෙස ඩ්‍රෝන යානාවල වීඩියෝ සංඥා බාගතකිරීම සිදුකොට ඇත. ඩ්‍රෝන යානාවල වීඩියෝ සංඥා අසංකූලිත ආකාරයට විකාශය කරන්නේ සජීවී වීඩියෝ විකාශයන් සජීවීව විකාශණය කරමින්ම සංකූලිත කිරීම සඳහා අවශ්‍ය බලසම්පන්න පරිගණක යානය තුල ගෙනයා නොහැකි බැවිනි )
2) රේඩියෝ සංඥා නිකුත්කරන සම්ප්‍රේශණ යන්ත්‍ර මගින් ඩ්‍රෝන යානාවල පාලන සංඥා අවුල්කොට දැමිය හැකිය. මේ සඳහා රුසියාවේ නිශ්පාදිත රේඩියෝ ට්‍රාන්ස්මීටර් උපයෝගීකර ගනිමින් සාර්ථක ප්‍රථිපල නෙලාගෙන ඇත. පැරණි රේඩියෝ සම්ප්‍රේශණ උපකරණ අධි බලයෙන් පැය 24 පුරාවටම ක්‍රියාත්මක කිරීමෙන්ද ඩ්‍රෝන රේඩියෝ පණිවුඩ ව්‍යාකූල කල හැකිය.
3) වාහන මත හා ගොඩනැගිලි මත ආලෝකය පරාවර්තනය කරන ෆොයිල් ඇතිරීමෙන් ඩ්‍රෝන කැමරා රැවටිය හැකි බව සොයාගෙන තිබේ.
4) පහතින් පියාසර කරන ඔත්තුබලන ඩ්‍රෝන යානා ස්නයිපර් රයිෆල මගින් වෙඩිතබා බිම්හෙලිය හැකිය. මේ සඳහා දක්ශ වෙඩික්කරුවෙකුගේ සේවය අවශ්‍යය.
5) සාමාන්‍ය ජෙනරේටරයකට අඩි 30ක් පමණ දිග තඹ බටයක් සවිකොට කෙලින් සිටුවා විදුලිය යෙදීමෙන් ඩ්‍රෝනවල රේඩියෝ සංඥා ව්‍යාකූල කල හැකිය.
6) බෝලකන් යුද්ධයේදී සර්බියන් හමුදා නේටෝ රේඩියෝ තරංග හඹායන මිසයිල නොමග යැවීම සඳහා මයික්‍රෝවේව් උදුන් උඩු විශාල ප්‍රමාණයක් උඩු අතට තබා දොරවල් විවර කොට ක්‍රියාත්මක කිරීමෙන් සාර්ථක ප්‍රතිපල ලබාගෙන ඇත. මුජාහිඩීන් වරුන්හටද මෙවැනි සරල උපක්‍රම අත්හදාබැලිය හැකිය. (**** සටහන: රේඩියෝ තරංග මූලාශ්‍ර හඹා යන මිසයිල, රේඩාර් පද්ධති විනාශ කිරීම සඳහා යොදා ගැනේ. රේඩාර් වලින් නිකුත්වන මයික්‍රෝවේව් තරංග මයික්‍රෝවේව් උදුන් වලින් ආහාර පිසීමේදී නිකුත් කරන මයික්‍රෝවේව් තරංග වලට සමාන අතර සර්බියානුවන් මෙම දැනුම නේටෝ මිසයිල රැවටීම සඳහා යොදාගන්නා ලදී..)
7) කිසිවිටකත් මූලස්ථානයක් වැනි සටන්කාමීන් එක් රැස් වන ස්ථාන පවත්වාගත නොයුතුය. හැකි සෑම විටම විසිරී සිටීම වැදගත්ය.
8) ඩ්‍රෝන යානා හඳුනා ගැනීම සඳහා අහස නිරීක්ශණය කරන කණ්ඩායම් යෙදැවිය යුතු අතර, ඩ්‍රෝන යානා දර්ශණය වන ප්‍රදේශවල සියලු ක්‍රියාකාරකම් නැවැත්විය යුතුය.
9) හැකි සෑම විටම සැඟවී ක්‍රියාත්මක විය යුතුය. විශේෂයෙන් රාත්‍රී කාලයේ ප්‍රවේශම් විය යුත්තේ ඩ්‍රෝන යානාවලට රාත්‍රී කාලයේ පෙනීම ලැබෙන කැමරා හා සංවේදක ඇති බැවිනි.
10) ඩ්‍රෝන යානාවලින් සැඟවීමේ පහසුම මග විශාල ගස් සෙවනේ සිටීමයි. (**** සටහන: මාලී දේශයේ අල්ඛයිඩා සටන්කාමීන් පසුබැස ගිය ප්‍රදේශවල ජනයා පවසන අන්දමට අල්ඛයිඩා සටන්කාමීන් සෑම විටම සිය වාහන විශාල ගස් යට නවත්වා ඇති බව වාර්තාවේ. එමෙන්ම සටන්කාමීන්ගේ එක් රැස්වීම් සඳහාද විශාල ගස් වලින් ආවරණය වූ නිවාස යොදාගෙන ඇත. ඒ අනුව මාලී අල්ඛයිඩා සාමාජිකයින් මෙම උපදෙස් මාලාව අකුරටම ක්‍රියාත්මක කොට ඇති බව පෙනේ යයි ප්‍රංශ හමුදා පවසයි )
11) ගොඩනැගිලිවල සෙවන වැටී ඇති අඳුරු ස්ථානවල සිටීමෙන්ද ඩ්‍රෝන කැමරාවලින් සැඟවී සිටිය හැකිය.
12) ඩ්‍රෝන යානාවලට රේඩියෝ පණිවුඩ හුවමාරුවලට සවන්දිය හැකි බැවින් සෑම විටම රේඩියෝ පණිවුඩ භාවිතා නොකොට සිටිය යුතුය.
13) සටන් පවතින අවස්ථාවලදී හා ඩ්‍රෝන යානා හඹා එන අවස්ථාවලදී වාහන වලින් ඉවත්වී සිටිය යුතුය. වාහන ඩ්‍රෝන යානාවල ප්‍රධාන ඉලක්කයකි.
14) ඩ්‍රෝන යානාවලින් ලැබෙන වීඩියෝ රූප නිරීක්ශණය කරන අමෙරිකානුවන් රැවටීම සඳහා දොරටු කිහිපයක් සහිත ගොඩනැගිලි භාවිතා කල යුතුය. කිසිවිටකත් සියලුදෙනා එකම දොරටුවකින් ඇතුලු නොවිය යුතුය.
15) ඩ්‍රෝන සංවේදක වලින් සැඟව සිටීමට භූගත බංකර භාවිතා කලයුතුය.
16) කිසිවිටකත් එලිමහනේ රැස්ව නොසිටිය යුතුය.
17) සෑම විටම අමෙරිකානුවන් හට ඔත්තු දෙන්නන් හා ඩ්‍රෝන යානාවලට ඉලක්ක දක්වන උපක්‍රම ක්‍රියාකරුවන් පිලිබඳව සෙවිල්ලෙන් සිටිය යුතුය. (***** වැඩි විස්තර සඳහා අපගේ "  සී.අයි.ඒ ඩ්‍රෝන යානා වලට ඇෆ්ඝනිස්ථානයේ හා පාකිස්ථානයේ අල් ඛයිඩා ඉලක්ක පෙන්නවන අධෝරක්ත සංවේදක"   ලිපිය කියවන්න )
18) අමරිකන් නිරීක්ශකයින් රැවටීම සඳහා එලිමහනේ පඹයින් සිටුවා තැබිය හැකිය. (**** සටහන: මෙය හාස්‍යජනක උපදෙසක් ලෙස නොසළකන්න. සැතපුමක් පමණ ඉහල අහසේ තිබෙන ඩ්‍රෝන කැමරාවලින් ලැබෙන රූප නිරීක්ශණය කරන ඩ්‍රෝන මෙහෙයුම්කරුවන් හට තමන් දකින්නේ සැබෑ ඇෆ්ඝන් සටන්කාමියෙකුද නැතහොත් තලප්පාවක් හිස තබාගත් පඹයෙකුදැයි තේරුම් ගැනීමට එක්වරම නොහැකිය. ඩ්‍රෝන කැමරාවලට කෙලින්ම පහත පමණක් පෙනන බවත්, පැත්තකින් බැලීමේ හැකියාවක් නොමැති බවත් තේරුම් ගත යුතුය. සටන්කාමීන් යයි වරදවා වටහාගෙන සාමාන්‍ය ජනයාට ඩ්‍රෝන ප්‍රහාර එල්ලවීමට ප්‍රධාන හේතුවද මෙයයි.සෑහෙන වේලාවක් නිරීක්ශණය කොට හැළහොල්මනක් නොමැති බව වටහාගත් විට එය පඹයෙකු යයි වටහා ගත හැකි වුනත්, ඒ වනවිට සැබෑ සටන්කාමීන් හට සැඟවෙන්නට හෝ ප්‍රහාරයක් එල්ලකොට පලායන්නට හොඳ ඉස්පාසුවක් ලැබේ..)
19) ඩ්‍රෝන යානාවක් දර්ශණය වූ විට සෑම අතටම විසිරී යාම ඉතා වැදගත්ය. සියලු දෙන එක් අතකට යාම නොකල යුතුය.
20) විශාල ප්‍රදේශයක් පුරා ටයර පිලිස්සීමෙන් ඇතිවන දුමාරයෙන් ඩ්‍රෝන සංවේදක හා කැමරා අවහිර කල හැකිය.
21) නායකයින් මෙන්ම අමෙරිකානුවන්ගේ ඉලක්ක ලයිස්තු වල සිටින්නන් කිසිවිටකත් ජංගම දුරකථන භාවිතා නොකල යුත්තේ ඩ්‍රෝන යානාවලට එම සංඥාවලට සවන්දිය හැකියාව ඇති නිසා මෙන්ම කටහඬ මගින් ස්වයංක්‍රීය පුද්ගලයින් හඳුනාගැනීමේ පරිගණක අමෙරිකානුවන් සතු නිසාය.
-අබ්දුල්ලා බින් මොහොමද්, 2011 ජූලි 17


2 comments:

ඩිජිටල් කැමරා මෙගා-පික්සල් යුද්ධය අලුත් අතකට - හඳුනාගන්න UltraPixel තාක්ශණය



නිකොන්, කැනන්, සෝනි, සැම්සුන්ග් කැමරා නිශ්පාදකයින් සිය කැමරාවල ගුණාත්මක භාවය පිලිබඳව ලොවට කියාපාන්නට භාවිතාකරන ලද්දේ කැමරාවේ ආලෝක සංවේදකයේ මෙගාපික්සල් ප්‍රමාණයයි. මෙගාපික්සල් ප්‍රමාණය වැඩිවන විට කැමරාවේ ගුණාත්මක භාවය වැඩිවන බවට වැරදිමතයක් හිතාමතාම ජනිතකල කැමරා නිශ්පාදකයින් සෑම සයමසකටම වරක් එකිනෙකාට වඩා ඉහල මෙගාපික්සල් ප්‍රමාණයක් ඇති පොකට් කැමරා එලිදක්වන්නට වූ අතර ඡායාරූපකරණ තාක්ශණ විචාරකයින් මෙය කැමරා නිශ්පාදකයින්ගේ මහා මෙගාපික්සක්සල් යුද්ධය (The Great Megapixel War) ලෙස හඳුන්වන ලදී. වැඩිකල් නොගොස් ජංගම දුරකථන නිශ්පාදකයින්ද මෙම මෙගා පික්සල් යුද්ධයට අවතීර්ණවූ අතර මොවුන් අතරින් ඇපල් හා සැම්සුන්ග් අතර යුද්ධය දැන් දැන් අලෙවිකරණ යුද්ධයකට වඩා ඈතකට ගොස් ඇතිබව පෙනේ.

සැම්සුන්ග්-ඇපල් ස්මාර්ට්ෆෝන් සටන හා නිකොන්-කැනන්-සෝනි කැමරා සටන අතරට කලකට පෙර අතිශය ජනප්‍රිය Wildfire වැනි ජංගම දුරකථන නිපදවා ජනාදරයට පත්ව මෑතකදී සැම්සුන්ග් ගැලැක්සි මාදිලියේ දුරකථන කාණ්ඩය නිසා නොනගතයට තල්ලුවී සිටි HTC සමාගම, අල්ට්‍රා-පික්සල් නම් අලුත් තාක්ශණයකින් සන්නද්ධව සටනට බැස සිටී.

HTC One with UltraPixel digital camera


හෙට-අනිද්දාම එලිදක්වන්නට නියමිත HTC One ස්මාර්ට්ෆෝනයට ඇතුලත්ව අල්ට්‍රා-පික්සල් තාක්ශණයෙන් නිමැවුනු පලමු ඩිජිටල් කැමරාව එලිදැක්වෙනවා. මෙය සැම්සුන්ග් ගැලැක්සි S4 ෆෝනයට ඉතා හොඳ තරඟයක් දෙනු ඇතැයි විචාරකයින් පවසනවා.

අල්ට්‍රා-පික්සල් තාක්ශණය යනු කැමරාවක ආලෝක සෙන්සරය මත අලෝක සංවේදී පික්සල් ඇතිරීමේ අලුත් ක්‍රමවේදයකි. සාමාන්‍ය මෙගාපික්සල් තාක්ශණයේ කැමරාවල ආලෝක සෙන්සරය මත වැඩිපුර මෙගා-පික්සල් ප්‍රමාණයක් අතුරවන්නේ එම පික්සල් වල ප්‍රමාණය කුඩා කීරීමෙනි. එවිට සෙන්සරයේ ප්‍රමාණය විශාල නොකොට වැඩි පික්සල් ප්‍රමාණයක් සෙන්සරයේ පෘශ්ඨය මත ඇතිරීමට හැකිවනවා.

අල්ට්‍රාපික්සල් තාක්ශණයේ සෙන්සර් ප්‍රමාණයෙන් විශාල වන අතර එය මත අතුරා ඇති පික්සල වල විශාලත්වයද වැඩි බැවින් වැඩි ආලෝක ප්‍රමාණයක් ග්‍රහණය කොටගෙන වඩා පැහැදිලි ඡායාරූප ලබාදිය හැකිවනවා.
අල්ට්‍රා-පික්සල් තාක්ශණය ක්‍රියාත්මක වන්නේ මීට සපුරා විරුද්ධ ආකාරයටයි. මෙහිදී සෙන්සරයේ ප්‍රමාණය විශාල වන අතර ඒ මත ප්‍රමාණයෙන් විශාල පික්සල් අඩු ප්‍රමාණයක් ඇතුරනවා. උදාහරණයක් ලෙස HTC One ස්මාර්ට්ෆෝනයේ කැමරාවේ විබේධනය මෙගාපික්සල් වලින් ප්‍රකාශකල හොත් එය මෙගාපික්සල් 4ක පමණ කැමරාවක්. එහෙත් මෙම කැමරාවේ පික්සල් අල්ට්‍රා-පික්සල් තාක්ශණයෙන් නිර්මාණය කල ප්‍රමාණයෙන් විශාල පික්සල් වන බැවින් එම පික්සලයකට වැඩි ආලෝක ප්‍රමාණයක් (එනම් ෆෝටෝන ප්‍රමාණයක්) ග්‍රහණය කරගැනීමේ හැකියාව තිබෙන නිසා, කැමරාවෙන් ලැබෙන සාඵල්‍ය විබේධනය (true resolution) මෙගාපික්සල් අටක කැමරාවකට සමාන වන බව පැවසෙනවා.

සාමාන්‍ය සෙන්සරයක පික්සලයක ප්‍රමාණය මයික්‍රෝමීටර් 1.4ක් වන අතර අල්ට්‍රා-පික්සල් තාක්ශණයෙන් නිමැවුනු පික්සලයක ප්‍රමාණය මයික්‍රෝමීටර් 2ක් වනවා. ඒ අනුව අල්ට්‍රා-පික්ස්ලයක ආලෝකය ග්‍රහණය කරගත හැකි ප්‍රදේශය සාමාන්‍ය පික්සලයක මෙන් දෙගුණයක ප්‍රමාණයක් වනවා.
UltraPixel තාක්ශණය මෙගාපික්සල් තරඟය මෙන්ම පාරිභෝගිකයින් රවටන තවත් අලෙවිකරණ මායාවක්?


න්‍යායාත්මකව, අල්ට්‍රාපික්සල් තාක්ශණයේ වාස ඉහත ආකාරයට විස්තර කල හැකිවුනත්, සමහර තාක්ශණ විචාරකයින්ට අනුව මෙයත් පාරිභෝගිකයින්ව රවටන්නට නිර්මාණය කෙරුනු අලෙවිකරණ විජ්ජාවක්. අලුත් නමක් පටබැන්දත් මෙය නව තාක්ශණයක් නොව, තාක්ශණය ආපස්සට ගෙන ගොස් පරණ තාක්ශණයක් අලුත් ලේබලයක් යටතේ ඉදිරිපත් කිරීමක් බවත් ඔවුන් පවසනව. මෙම චෝදනාවේ යම් සත්‍යතාවයක් තිබෙන බව පමණක් දැනට පැවසිය හැකි අතර, අල්ට්‍රාපික්සල් තාක්ශණයේ සැබෑ හැකියාවන් HTC One ෆෝනයේ අල්ට්‍රාපික්ස්ල් කැමරාවෙන් ගන්නා ඡායාරූප අන්තර්ජාලයට එකතුවූ පසු දැන ගත හැකියි.





2 comments:

මරාගෙන මැරෙන දැලිපිහි ඩ්‍රෝන යානාව - "Switchblade" Kamikaze Drone


ඇෆ්ඝනිස්ථානයේ සටන්වදින අමෙරිකානු හමුදා ඇෆ්ඝන් භූමිය විවිධ වර්ගයේ ඩ්‍රෝන යානා අත්හදා බලමින් ඒවායේ හැකියාවන් හා ක්‍රියාකාරිත්වයන් තහවුරු කිරීමේ භූමියක් (proving ground) ලෙස භාවිතාකරයි. අමෙරිකානු විශේෂ බළඇණිවලට ලබාදී ඇති අලුත්ම ආයුධය වන්නේ ස්විච්-බ්ලේඩ් හෙවත් දැළිපිහිය ලෙස නම් තබා ඇති ස්වයං-නාශක (සියදිවිනසා ගන්නා - kamikaze)  වර්ගයේ කුඩා ඩ්‍රෝන යානයකි. මෙයට ස්විච්-බ්ලේඩ් ලෙස නම් තබා ඇත්තේ දැළිපිහියක පිහිතලය දිගහැරෙන්නාසේ යානය ගුවන්ගත කිරීමේදී එහි පියාපත් දිගහැරෙන බැවිනි.

කැලිෆෝනියාවේ ඒරෝවිරොන්මන්ට් (AeroVironment Corporation ) නම් සමාගමක් මගින් නිර්මාණය කොට ඇති මෙය කිලෝ 2.7ක් පමණ බරකින් යුතු පහසුවෙන් උරහිසෙහි එල්ලාගෙන යා හැකි යානයකි. දිගින් අඩි දෙකක් පමණ වන මෙය ඉතා කඩිනමින් ගුවන්ගත කල හැකි අතර බැටරියකින් බලගැන්වෙන ඉතා නිහඬ මෝටරයකින් ක්‍රියාත්මක වෙයි. ගුවන්ගත වුනු පසු විනාඩි 10-15ක් පමණ කාළයක් ගුවන්ගේ රැඳී සිටිමින් මෙහෙයවන්නාට වර්ණ හා අධෝරක්ත වීඩියෝ දර්ශණ සජීවීව ලබාදිය හැකි මෙය නිර්මාණය කොට ඇත්තේ කුඩා භට කණ්ඩායම් වලට තමන් හට සැඟවී ප්‍රහාර එල්ල කරන සතුරු සෙබළුන් අහසේ සිට නිරීක්ශණය කොට ඉතා ඉක්මණින් විනාශකාරී ප්‍රහාරයක් එල්ල ක්‍රීමේ පහසුකම ලබාදීම සඳහාය.
මෝටාර් විදිනයක් හා සමාන විදිනයක් මගින් ගුවන්ගත කලහැකි ලෙස නිර්මාණය කොට ඇති මෙය තනි සෙබළෙකුට ඉතා පහසුවෙන් ගුවන්ගත කොට ක්‍රියාත්මක කල හැකිය. සතුරු හමුදා සමග කෙරෙන මුහුණට මුහුණ සටන් (close combat) වලදී ඉතාමත් සාර්ථක ප්‍රථිපල ලබාදුන් බව මෙය මුලින්ම භාවිතා කල ඇෆ්ඝනිස්ථානයේ මෙහෙයුම්වල නිරත අමෙරිකානු විශේෂ බළකා ඒකක ප්‍රධානීන් (unit commanders) පවසති.

යම් තැනක සැඟවී ප්‍රහාර එල්ල කරන සතුරු හමුදා භටයින් ඉතා ඉක්මණින් සොයාගෙන විනාශ කිරීම සඳහා මෙම ඩ්‍රෝන යානය විනාඩි කිහිපයක් තුල ගුවන්ගත කොට ප්‍රහාරය එල්ල වන දිශාවට යැවිය හැකි අතර ඉතා නිහඬව පියාසර කරන නිසාත්, පහතින් ගමන් කරන නිසා සතුරාට නිරීක්ශණය කිරීම ඉතා අපහසුය. අහසේ සිට සතුරු සෙබළුන් සිටින ප්‍රදේශයේ වීඩියෝ දර්ශණ ක්‍රියාකරුවාට එවන යානය අවශ්‍ය මොහොතකදී සතුරු සෙබළුන් සිටින ස්ථානය වෙත යවා පුපුරවා හැරීමට එය මෙහෙයවන්නාට පුලුවන.


4 comments:

රුසියාවේ වැටුනු උල්කාපාතය හා පෘථිවියේ කන ලඟින් ගිය 2012DA14 ග්‍රහකය


ඇත්තටම රුසියාවට උල්කාපාතයක් කඩා වැටුනාද?

උත්තරය නැත යන්නයි! සැබැවින්ම සිදුවුනේ රුසියාවේ චෙල්යබ්නිස්ක් නම් ප්‍රදේශය උඩින් කිලෝමීටර් 30ක් ඉහල අහසේදී මෙම උල්කාපාතය පුපුරා යාමයි. උල්කාපාතයක් (හෝ බෝම්බයක්) ඉහල අහසේ පුපුරා යාම air-burst ලෙස හැඳින්වේ.

උල්කාපාතයක් ඉහල අහසේ පුපුරා යාම පොලොවේ ඝට්ටනය වී පුපුරායාමට වඩා විනාශකාරී බව විද්‍යාඥයින් පවසති.

රුසියානු උල්කාපාතයේ තොරතුරු..


මීටර් 15ක පලලකින් යුතුවූ රුසියානු උල්කාපාතය පැයට කිලෝමීටර් 54,000ක වේගයකින් පෘථිවි වායුගෝලයට ඇතුලුවී ඇති අතර එය වායුගෝලයට ඇතුලුවන විට ටොන් 7000ක් පමණ බරකින් යුක්ත වන්නට ඇතැයි ඇස්තමේන්තු කොට තිබෙනවා.

චෙල්යබ්නිස්ක්  ජනයා විශාල සංඛ්‍යාවක් තුවාල ලැබුවේ උල්කාපාතය පුපුරායාම නිසාද?

නැත....උල්කාපාතයේ කැබලි වැදීමෙන් හෝ පුපුරා යාමේ කම්පණයෙන් යම් අණතුරු ප්‍රමාණයක් සිදුවන්නට ඇතත් අතිවිශාල ගණනක් තුවල ලැබුවේත්, දේපොල හානි සිදුවුනේත් උල්කාපාතය පුපුරායාම නිසා නොව පැයට කිලෝමීටර් 54,000ක වේගයෙන්, එනම් ශබ්දයේ වේගය මෙන් 44ගුණයක වේගයෙන් වායුගෝලය තුලින් ගමන් කිරීමේදී ඇතිවුනු අති දැවැන්ත කම්පණ තරංගය (massive sonic boom) නිසාවෙනි. 

ශබ්දයේ වේගය ඉක්මවා යන ගුවන්යානාද මෙම කම්පණ තරංග නිපදවන නමුත් යනා ප්‍රමාණයෙන් කුඩා බැවිනුත් වේගය ශබ්දයේ වේගයට දෙගුණයකට වඩා බොහෝවිට වැඩි නොවන බැවිනුත් කම්පණ තරංගයෙන් හානියක් සිදුවන්නේ නෑ.

2012DA14 ග්‍රහකය

විශ්කම්භය : මීටර් 50ක්

බර : මෙට්‍රික් ටොන් 190,000

සොයාගන්නා ලද දිනය : 2012 පෙබරවාරි 23

පෘථිවි වායුගෝලයට ඇතුලුවූවා නම් සිදුකල හැකි විනාශය : මෙගටොන් 3ක න්‍යශ්ඨික බෝම්බයකින් සිදුවන විනාශයට සමාන විනාශයකි. ජපානයේ හිරෝශිමාවට දැමුණු න්‍යශ්ඨික බෝම්බය මෙගටොන් 0.016ක විනාශකාරී ශක්තියකින් (blast yield) යුක්තය. 





7 comments:

ඇමරිකාවේ සැමට නොමිලේ WiFi අන්තර්ජාල පහසුකම ලඟදීම!


අමෙරිකා එක්සත් ජනපදයේ රජයේ විදුලි සන්දේශන නියාමන කොමිසම වශයෙන් කටයුතු කරන ෆෙඩරල් විදුලිසංදේශ කොමිසම විප්ලවකාරී සැලැස්මක් රජයේ අනුමැතිය සඳහා ඉදිරිපත් කොට තිබෙනවා. සුපර් වයිෆයි ජාලය ලෙස හැඳින්වෙන මෙම සැලැස්මට අනුව මුලු අමෙරිකානු භූමි ප්‍රදේශයම ආවරණය වන ලෙස දැවැන්ත, අධිවේගී වයිෆයි ජාලයක් නිර්මාණය කිරීමට බලාපොරොත්තු වනවා. මෙම වයිෆයි ජාලයෙන් ලැබෙන බ්‍රෝඩ්බෑන්ඩ් අන්තර්ජාල පහසුකම මගින් අමෙරිකාවේ සියලු පුරවැසියන් හට සිය අන්තර්ජාල අවශ්‍යතා මෙන්ම  දුරකථන ඇමතුම් අවශ්‍යතාද නොමිලේ සපුරා ගත හැකි වනවා.

අමෙරිකානු ජනතාවත මහත් අභ්වෘද්ධියක් වන මෙම සුපිරි වයිෆයි ජාලයට සිය විරෝධය පල කිරීමට අමෙරිකාවේ දුරකථන සේවා සමාගම් දැනටමත් කටයුතු කොට ඇත්දේ මෙවැනි ජාලයක් නිර්මාණය වුවහොත් සිය සමාගම් දැඩි මූල්‍යමය ප්‍රපාතය කට ඇදවැටේ යයි යන බියෙන්. වසරකට ඩොලර් බිලියන 178ක් ආදයාමක් උපයන අමෙරිකානු දුරකථන සමාගම් ලොව වඩාත් ලාභ උපයන දුරකථන සමාගම් ලෙස පිලිගැනෙනවා.

දැනටමත් මෙම සමාගම් අමෙරිකාවේ විවිධ දේශපාලඥයින් හා සන්නිවේදන සේවාවලට සම්බන්ධ උසස් රාජ්‍ය නිළධාරීන් පසුපස යමින් මෙම සැලැස්ම ව්‍යර්ථ කිරීමේ වෑයමක නිරතවන බව අමෙරිකාවේ වොශින්ටන් පෝස්ට් පුවත්පත වාර්තා කරනවා.

ගූගල් හා මයික්‍රෝසොෆ්ට් Super WiFi සැලැස්මට සහය දෙයි... 

සිය ව්‍යාපාරික අනාගතය සුරක්ශිත කරගැනීමට දුරකථන සමාගම් සැලැස්ම කඩාකප්පල් කිරීමට අර අඳිද්දී ගූගල්, මයික්‍රෝසොෆ්ට් වැනි දැවැන්ත අධිතාක්ශණික සමාගම නියාමන කොමිසමේ වැඩපිලිවෙලට සිය පූර්ණ සහයෝගය පලකොට ඇති අතර මෙවැනි මිල රහිත වයිෆයි ජාලයකින් අමෙරිකාවේ ආර්ථිකයට හා අනාගත තාක්ශණික දියුණුවට ඇතිවිය හැකි වාසි පෙන්වාදෙමින් අමෙරිකාවේ බලසම්පන්න දේශපාලකයින් හා රාජ්‍ය නිළධාරීන්ගේ කැමැත්ත මෙම සැලැසුමට ලබාගැනීමට සඳහා මෙම සමාගම්ද විශාල ව්‍යාපෘතියක් ආරම්භ කොට තිබෙනවා.

හෙට ලොව බලවතුන් තීරණය කරන මෙම අධිතාක්ශණික සංග්‍රාමයේදී අමෙරිකාව දැනටමත් ආසියාතික හා යුරෝපීය රටවල් වලට පිටුපසින් සිටිනවා. ලොව වේගවත්ම 4G අන්තර්ජාල පහසුකම් දකුණු කොරියාවේ ජනතාවට හිමිවී ඇති අතර වැඩියෙන්ම අන්තර්ජාල පහසුකම් ව්‍යාප්තවී ඇති රට ලෙසද දකුණු කොරියාව හඳුනා ගැනෙනවා. දකුණු කොරියාවේ සැම්සුන්ග්, එල්.ජී වැනි සමාගම අමරිකාවේ ඉහලම අධිතාක්ශණික සමාගම් වලට පවා දැඩි තරඟයක් දෙන්නට තාක්ශණික ජයග්‍රහණ වෙගවත් ලෙස ලබාගැනීම හැකි ලෙස කොරියානු ජනතාව තාක්ශණ දැනුමෙන් සන්නද්ධ වන්නට එක් හේතුවක් වන්නේ කොරියානු රජය විසින් ආරම්භ කරන ලද අන්තර්ජාලය ප්‍රචලිත කිරීම වැනි වැඩපිලිවෙලවල් බව මෙම සුපිරි වයිෆයි ජාලයට සහය දෙන සමාගම් සමූහය පෙන්වා දෙනවා.

නිදහස් තරංගමාලා නවෝත්පාදන රැළ්ලක් මැවූ හැටි...

1985දී අමෙරිකානු රජය එතෙක් ගුවන්විදුලි තරංගමාලා යටත් කොට තිබූ දැඩි පාලනයෙන් නිදහස් කොට තරංගමාලා කාණ්ඩ ගණනාවක් විවිධ කාර්ය්යන් සඳහා නොමිලේ භාවිතා කිරීමට අවසර දුන්නා. මෙම නිදහස් කිරීම අනුව නොසිතූ විරූ තාක්ශණික මෙවලම් ගණනාවක් නිර්මාණය වූ බව විචාරකයින් පෙන්වා දෙනවා. රැහැන් රහිත මයික්‍රොෆෝන, නිවාසවල භාවිතාවන WiFi ජාලා, දුරස්ථ ලෙස මෝටර් රථවල දොරගුලු විවරකරන උපකරණ (remote car-door openers) වැනි නවෝත්පාදන රාශියක් 1985දී මෙම තරංගමාලා ඛන්ඩ නිදහස් කිරීමෙන් පසු  ඇතිවී තිබෙනවා. නොමිලේ අන්තර්ජාල සේවා ලබාදෙන මෙම සුපිරි වයිෆයි ජාලය මගින්ද එවැනිම නවෝත්පාදන විප්ලවයක් ඇතිවනු ඇතැයි අමෙරිකානු විදුලිසංදේශ නියාමන කොමිසම පවසනවා.





2 comments:

නැණෝ තාක්‍ෂණය

උපුටාගැනීම :2013 පෙබරවාරි 10 ඉරිදා දිවයින 



අපි අපේ මිනිරන් (VEIN GRAPHITE) මෙටි්‍රක්‌ ටොන් එකක්‌ ඇමරිකානු ඩොලර් 1200 කට පිටරටට පටවමු. පිටරැටියෝ එම මිනිරන් යොදා නිෂ්පාදනය කරනු ලබන තනි ස්‌ථර කාබන් නැනෝ ටියුබ්ස්‌ (Single Wall Carbon Nano Tubes - SWCNT'S) එක ග්‍රෑම් එකක්‌ ඇ. ඩොලර් 450 ක මිලකට, වෙළඳපොළේ අලෙවි කරති. මේ වෙනස අප වටහා ගන්නේ කවදාද?

මීට වසර හයකට පෙර දිවයිනේ විශිෂ්ටතම කර්මාන්තකරුවාට හිමි රන් සම්මානය පිරිනැමීමේ වර්ණ රාත්‍රිය පැවති, කොළඹ ගලධාරි හෝටලයේ දී එදින ප්‍රධාන අමුත්තාගේ දෙසුම කළ මහාචාර්ය තිස්‌ස විතාරණයෝ, රත්තරං වටිනා කතාවක්‌ කළේ ය. 'අනාගත ශ්‍රී ලංකා සෞභාග්‍යයේ යතුර' නැණෝ තාක්‍ෂණය බැව් එතුමෝ එහි දී සපථ කළහ. රට සංවර්ධනය කිරීම උදෙසා නිසැකවම ඉදිරියේ දී නැණෝ තාක්‍ෂණය යොදා ගන්නා බවට එතුමා පළකළ අදහස ලියුම්කරුගේ සිතට ගෙන ආවේ අලුත් බලාපොරොත්තුවක්‌ ය. එතැන් සිට ඔහු සිතා බැලුවේ මීට පෙර කිසිදාක අසා නැති නැණෝ තාක්‍ෂණය රටක ඉදිරි ගමනට මේ හැටි බලපාන්නේ කෙසේද කියාය.

මෙයින් වසර දෙකකට පසු, කොළඹ විශ්වවිද්‍යාලයේ, මානව සම්පත්, අභිවර්ධන ආයතනයේ අධ්‍යක්‍ෂවරයා වූ ආචාර්ය එච්. කේ. හිරිඹුරේගම මහතා ගේ දෙසුමකට සවන් දීමේ අවස්‌ථාව ලද ලියුම්කරුට, ආචාර්ය හිරිඹුරේගම මහතා විසින් නැණෝ තාක්‍ෂණය පිළිබඳ තම සිතේ ඇති කළ කුතුහලය සංසිඳුවා ගැනීමට නිසැකවම හැකි වූයේ, අග්නිදිග ආසියාවේ සිටින කීර්තිමත් නැණෝ තාක්‍ෂණවේදී ඉංජිනේරුවරයකු, විද්‍යාඥයකු වන ආචාර්ය ලිලන්ත සමරනායකයෝ, වර්ෂ 2011 දී පේරාදෙණිය විශ්වවිද්‍යාලයේ ඉංජිනේරු පිඨයේ දී දැන හඳුනාගැනීමෙන් පසුව ය.

ආචාර්ය ලිලන්ත සමරනායකයෝ, ශ්‍රී ලක්‌ මවගේ තවත් වටිනා මානව සම්පතක්‌ බැව් වටහාගත් ලියුම්කරු ජාතික රූපවාහිනිය ඔස්‌සේ මෙන්ම 'දිවයින' ඇතුළු ජාතික පුවත්පත් ඔස්‌සේ ද නැණෝ තාක්‍ෂණය පිළිබඳ ඔහු සතු දැනුම රටටම හෙළි කළේ, මේ වටිනා මානව සම්පත, ධනවත් පොහොසත් රටකට විකිණීයාදෝයි යන අනියත බිය නිසා ය. කොටින් ම මෙම මානව සම්පත රැක ගැනීම උදෙසාය. 

එසේ ම පොහොසත් රටක්‌ විසින් මොහු ගිල ගැනීමට පෙර, ඔහු සතු දැනුමෙන් නැණෝ තාක්‍ෂණය හරහා අපගේ මාතෘභූමියට උපරිම මෙහෙවර ලබා දීමේ ද පරමාර්ථයෙනි. එහෙත් පසුකලෙක, නැණෝ තාක්‍ෂණයෙන් රට බැබලවීමට සිහින මැවූ මහාචාර්ය තිස්‌ස විතාරණයෝ, ජ්‍යෙෂ්ඨ අමාත්‍යවරයකු බවට පත් වී විවේකී සුවයෙන්, සිහින දැකීමට හා සිහින මැවීමට ඉඩහසල ලද්දේ ය. නැණෝ තාක්‍ෂණය සිහිනයක්‌ නොව සැබෑවක්‌ බවට පත්කරගත් ලෝකයේ බොහෝ රටවල් මේ වන විට අප පසුකර දුර ගමනක්‌ ගොසින් ය. අපි තවමත් රන් ආකරයක්‌ මත හිඳගෙන බුලත් විට සපමින් හතර අත කෙල ගසමින් සිටින්නෙමු.

ඕනෑම පදාර්ථයක්‌ නිර්මාණය වී ඇත්තේ අණුවල එකතුවෙනි. පදාර්ථයේ මූලික ඒකකය වූ අණුවක ආකෘතියේ අප විසින් ඇති කරනු ලබන වෙනසත් සමඟ එකී ආකෘතිය හරහා නිර්මාණය වන්නා වූ නව්‍ය පදාර්ථයන් හී ඇති රසායනික හා භෞතික ගුණාංගයන් මානව වර්ගයාගේ යහපත උදෙසා යොදා ගැනීම, නැණෝ තාක්‍ෂණවේදය හරහා සිදුවෙමින් පවතී. 

කුඩා බව, වේගවත් බව හා ලාභදායිකම නිසා නැණෝ තාක්‍ෂණය ලොව පුරා ජනප්‍රියව පවතී. නැණෝ මීටරය එහි වූ මිණුම් දණ්‌ඩයි. 

අප හඳුනන මීටරයකින් බිලියනයකින් එක්‌ කොටසක්‌ වූ නැණෝ මීටරයක විෂ්කම්භය අපගේ කෙස්‌ ගසක විෂ්කම්භයට වඩා 80,000 වාරයකින් කුඩා ය. නැණෝ අංශුවක්‌ එල්ලේ ක්‍රීඩා කරන පන්දුවක්‌ සමඟ සසඳා බලන්නේ නම් එල්ලේ පන්දුව නැණෝ අංශුව මෙන් 107 වාරයක්‌ (10,000,0000) විශාල ය.

ප්‍රමාණය එසේ වුවද, නැණෝ තාක්‍ෂණික නිමැයුම් හා ද්‍රව්‍ය ගැන සලකා බැලීමේ දී, ඒවායේ වූ සැහැල්ලු බව, ශක්‌තිමත් බව, විනිවිදභාවය සහ ක්‍රියාශීලීභාවය, ඉක්‌මන් ප්‍රතික්‍රියාකාරීභාවය වැනි ගුණාංග සහ වෙනත් ද්‍රව්‍ය හා මිශ්‍ර කිරීමෙන් පසු එකී ද්‍රව්‍යයන්ට ලබාදෙන අතිමහත් ශක්‌තිය හා කර්යක්‍ෂම බව නැණෝ තාක්‍ෂණය කෙරේ ලෝකයේ ම අවධානය යොමු වීමට හේතු විය.

නැණෝ තාක්‍ෂණය උදෙසා, පර්යේෂණ සහ සංවර්ධන කටයුතු කිරීම (Research and Development) වෙනුවෙන් ලෝකයේ යම් යම් රටවල් වාර්ෂික අයවැයෙන් වෙන් කරනු ලබන අතිමහත් මුදල් සම්භාරය ගැන සිතන විට එදා මහාචාර්ය තිස්‌ස විතාරණ මහතා දුටු සිහිනය, ඇලඩින්ගේ පුදුම පහන ලබා ගැනීමේ කතාව වාගේ යෑයි යමෙකුට සිතෙන්නට ද පිළිවෙන.

වර්ෂ 2015 දී සපුරා ගත යුතු ඉලක්‌ක කේන්ද්‍රකොට ගනිමින් වර්ෂ 2010 දී ජර්මනිය දියත් කළ පස්‌ අවුරුදු නැණෝ තාක්‍ෂණ අභිවෘද්ධි ක්‍රියාන්විතය සඳහා වෙන් කරන ලද මුදල යුරෝ මිලියන 400 කි. මෙම මුදල නැණෝ තාක්‍ෂණය වැඩි දියුණු කිරීම උදෙසා බටහිර යුරෝපීය රටක්‌ වෙන්කළ විශාලම මුදල සේ සැලකේ.

බලශක්‌තිය, දේශගුණය, සෞඛ්‍යය සහ ආහාර, ආරක්‍ෂාව සහ සංචලනය (mobility) යන ක්‍ෂ්ත්‍රයන්හි සංවර්ධනය සහ අධි තාක්‍ෂණික උපාය මාර්ග වැඩිදියුණු කිරීම, නැණෝ තාක්‍ෂණික ක්‍රමවේදයන් තුළින් තම දේශය වෙත දිනා ගැනීම එහි අපේක්‍ෂාව යි.

ඉතාලියේ රාජ්‍ය සහ පෞද්ගලික දෙඅංශයෙන්ම නැණෝ තාක්‍ෂණවේදය පිළිබඳව පර්යේෂණ කිරීම සඳහා සංවිධාන සහ ආයතන 190 ක්‌ ක්‍රියාත්මක වෙමින් පවතී. ඒ මගින් නැණෝ ඖෂධ (Nano medicine), නැණෝ ඉලෙක්‌ට්‍රොනික්‌ස්‌ (Nano Electronics), නැණෝ ප්‍රකාශ තන්තු (Nano Optic Fiber), නැණෝ අමුද්‍රව්‍ය (Nano materials) යන ක්‌ෂේත්‍ර වලින් උපරිම ඵල ලබා ගැනීම ඔවුන්ගේ බලාපොරොත්තුවයි.

ජර්මනිය හැරුණ විට නැණෝ තාක්‍ෂණය උදෙසා විශාල මුදලක්‌ වාර්ෂිකව වෙන් කරනු ලබන අනෙක්‌ රට වන්නේ චීනයයි. එම මුදල ඇමරිකානු ඩොලර් මිලියන 250 කි. රුසියාව වාර්ෂිකව ඩොලර් මිලියන 25 ක්‌ ද, අපේ අසල්වැසි ඉන්දියාව වසරකට ඩොලර් මිලියන 23 ක්‌ද, නැණෝ පර්යේෂණ හා සංවර්ධන කටයුතු සඳහා වැය කරයි.

මහාචාර්ය සී. එන්. ආර්. රාවෝ ප්‍රමුඛ ඉන්දියානු විද්වතුන් පිරිසක්‌ ඉන්දියාවේ විශ්වවිද්‍යාල පද්ධති සම්බන්ධ කරගෙන, ජාතික නැණෝ තාක්‍ෂණික විද්‍යා ප්‍රබෝධයක්‌ ඉන්දියාව පුරාම ඇතිකරන ලදී. මේ නිසා රජය පිළිගත් ඉංජිනේරු ආයතන නැණෝ තාක්‍ෂණවේදය දැයේ දූ දරුවන් වෙත ලබා දීමට පෙරමුණ ගැනීමත්, ඉන්දියානු විශ්ව විද්‍යාලවල දොරටු නැණෝ තාක්‍ෂණවේදීන් හට වැඩි දුර අධ්‍යාපනය ලබා ගැනීමට මංපෙත් විවර කරදීමත් ඒ මගින් ඉන්දියානු දරුවන්ට, නැණෝ ඉංජිනේරු විද්‍යාව පිළිබඳව, පශ්චාත් උපාධි සේම ආචාර්ය උපාධිද පිරිනැමීමේ පාඨමාලා සංවිධානය වීම ද පුරා දශක දෙකක්‌ (1990 සිට 2012) වැනි කෙටි කාලයක්‌ තුළ ඉන්දියාව පෑ ආශ්චර්යය සැබැවින්ම කටින් බතල කොල සිටුවීමක්‌ නොවීය. 

ඉන්දියානු විද්‍යාඥයකු වන විනෝද් කුමාර් ගුප්තාට අනුව වර්ෂ 1990 දී නැණෝ තාක්‍ෂණ පර්යේෂණ සම්බන්ධව ලියෑවී එළි දැක්‌වුණ එකදු හෝ ලියෑවිල්ලක්‌ මුළු ඉන්දියාවටම නැති විය. 

එහෙත් මෙම තත්වය වර්ෂ 2007 දී එහෙම පිටින්ම වාගේ වෙනස්‌ විය. වර්ෂ 2007 මුල් මාසය කීපයේ දී එබඳු ලේඛන 2200 ක්‌ ප්‍රකාශයට පත් කෙරුණ අතර 2007 අවසානයේ දී එම ප්‍රමාණය 21,000 දක්‌වා ඉහළ නැඟ තිබීම තුළින් විද්‍යමාන වූයේ මහාචාර්ය රාවෝ ඇතුළු දේශප්‍රේමි විද්‍යාඥයන්ගේ ජාතික නැණෝ තාක්‍ෂණික ප්‍රබෝධයේ මහිමයයි. මේ වන විට ඉන්දියාව නව සොයා ගැනීම් 35 කට අධික ප්‍රමාණයකට පේටන්ට්‌ බලපත්‍රය ද හිමි කරගෙන සිටී.

මේ වන විට අපේ අසල්වැසි ඉන්දියාව, ජපානය, ඇමෙරිකාව, එක්‌සත් රාජධානිය හා තරමටම නැණෝ තාක්‍ෂණවේදය අතින් ඉදිරියෙන්ම වේ. ඉතා නුදුරු දිනෙක දී උතුරු ඉන්දියාවේ චන්දිගාර් නගරයේ දී ඇමෙරිකානු ඩොලර් බිලියන සිය දහස්‌ ගණනක නැණෝ පුරයක්‌ (Nano City) ඉදිකිරීමට සබීර් භාටිටා (Sabir Bhatita) (සම නිර්මාතෘ 'Hot mail.) සූදානමින් සිටී. 

ඒ අප දකින්නේ අසල්වැසි ඉන්දියාවේ නැණෝ ආඩම්බරයයි.

වෛද්‍ය විද්‍යාව, කෘෂි කර්මාන්තය, රෙදිපිළි කර්මාන්තය සහ පරිසරය විෂයන්හිලා වර්තමාන ලෝකය නැණෝ තාක්‍ෂණය භාවිත කරන අයුරු ආශ්වාදජනකය, විශ්මය ජනකය. මෙකී කරුණු කාරණා ගැන අධ්‍යයනය කරන කල අපට අප ගැන සිතෙන්නේ - අනේ දෙව්දත් නුදුටු මොක්‌පුර කියා ය.

කෘෂිකර්මාන්ත විෂයෙහිලා හඳුන්වා දී ඇති නැණෝ සෙන්සර් (Nano Sensors) නමැති සංවේදී උපකරණ මගින් කෘෂිකාර්මික බවභෝග වර්ධනයේ දී ඒවායේ නිරෝගී භාවය නිරීක්‍ෂණය කොට දත්ත ලබා දීමත්, සක්‍රීය නැණෝ අංශු මගින් පසෙහි වූ අහිතකරතාවන් ඉවත් කරලීමත් සිදු කෙරේ. මෙබදු නැණෝ සෙන්සර් ජාලා පද්ධති මගින් භව භෝගයන්ට වෛරස්‌ වර්ග මගින් වැළඳිය හැකි රෝග කල්තියා හඳුනා ගැනීම, පසෙහි සරු බව සේම, භෝග වලට ඉතා කාර්යක්‌ෂමව, වර්ධනයට අවශ්‍ය පොහොර සහ කෘමි නාශක නැනෝ කැප්සුල (Nano Capsuls) මගින් නිශ්චිත ඉලක්‌කයටම ලබා දීම සැබැවින්ම විශ්ම ජනකය. තවද මේ වන විට ආහාර සැකසීම සේම සෞඛ්‍යාරක්‍ෂිතව ගුණාත්මක භාවයට හානි නොවන පරිදි ආහාර වර්ග ඇසුරුම් කිරීමට ද නැණෝ තාක්‍ෂණය වර්තමානයේ දී භාවිත කෙරේ.

මීට අමතරව පශු සම්පත සංවර්ධනය සඳහා ද වර්තමාන ලෝකය නැණෝ තාක්‍ෂණය භාවිත කරයි. නැණෝ අංශු මගින් පශු සම්පත සඳහා වර්ධක හෝමෝන, එන්නත් සහ ජාන ඉංජිනේරු තාක්‍ෂණය සඳහා DNA භාවිත කිරීමේ ක්‍රමවේද පහසු කොට තිබේ.

රෙදිපිළි කර්මාන්තයෙහි නව මානයක්‌ ඇති කරමින් රෙදි සේදීමේ දී වදයෙන් ඔබව මුදා ගැනීමට දැන් නැණෝ තාක්‍ෂණයට හැකි වී තිබේ. නැණෝ පර්යේෂකයන් විසින් සාර්ථකව අත්හදා බලා ඇති පරිදි වූල් (Wool) වර්ග සහ සිල්ක්‌ (Silk) වර්ග වල රෙදි, නැණෝ තාක්‍ෂණය ඇසුරෙන් නිපද වූ මේවා (Nano Fabric) එහි රැඳෙන කුණු පැල්ලම් නැණෝ අංශු මගින් කා දැමීම නිසා ගෙදර ගෘහනියට හෝ ඔබට රෙදි සේදීම ගැන ඉදිරියේ දී කරදර විය යුතු නොවේ.

එසේම මේ අයුරින්ම නිපද වූ නැණෝ රසායනික දියර මගින් (ස්‌ප්‍රේ කිරීම මගින්) ඔබගේ මුළුතැන්ගෙයි ඇති දැලි කුණු සහමුලින්ම ඉවත් කර දමනවා පමණක්‌ නොව ඒවා යළි එකතු වීමද වළකා දමයි. 

මේ වන විට චෙක්‌ ජනරජය ද, නැණෝ තාක්‍ෂණවේදයේ පෙරළිකාර රටක්‌ බවට පත්වෙමින් මහපරිමාණයෙන් නැනෝ කෙඳිති (Nano Fiber) නිපදවමින් සිටී. මේ වන විට චෙක්‌ රාජ්‍යයේ විශ්ව විද්‍යාල 37 ක්‌ සහ ජාතික පර්යේෂණ ආයතන 09 ක්‌ නැණෝ තාක්‍ෂණය වැඩි දියුණු කිරීමේ පර්යේෂණයන්හි නිරතව සිටී. 

කාර්මීකරණය හෝ නාගරීකරණය හෝ කුමන නමකින් හැඳින්වුව ද විෂ දුම් නිසා අපට නිදහසේ හුස්‌ම ගැනීමත් ජල මූලාශ්‍ර අපිරිසිදු වීම නිසා බීමට පිරිසිදු වතුර ටිකක්‌ නොමැති වීමෙන් ද, දිනෙන් දිනම මරු තුරුලට යන වටිනා මිනිස්‌ ජීවිත සංඛ්‍යාව වසරින් වසර වැඩි වනු පෙනේ. ලංකාවේ අපට විශේෂයෙන්, එප්පාවල හා උතුරු මැද ඇතැම් ප්‍රදේශවල අති විශාල ජනතාවක්‌ වකුගඩු රෝගීන් බවට පත් වී සිටින්නේ බොන ජලයට බැර ලෝහ මුසු වීම නිසා ය. එහෙත් අද දවසේදී නැණෝ තාක්‍ෂණයට මේ විනාශයෙන් ජනතාව මුදා ගැනීමේ හැකියාව තිබෙන බව, ඇතැම් විට, රටේ බලධාරීන් නොදන්නවා විය හැක.

හරිත නැණෝ තාක්‍ෂණය (Green Nano Technology) ඔස්‌සේ සිදු කෙරී ඇති පර්යේෂණ මගින් හෙට ලොවට යහපත් පරිසරයක්‌ බිහි කිරීමේ මාවත උදා වී තිබේ.

නිෂ්පාදන ක්‍රියාවලියන් උදෙසා අවම බලශක්‌තියක්‌ යෙදවීම සහ සැමවිටම පාවිච්චියට ගැනීමෙන් පසු ඉවතලන දෑ ප්‍රතිචක්‍රීකරණය කිරීම, පරිසර හිතකාමී අමුද්‍රව්‍ය භාවිතය වැඩි වර්ධනය කිරීම සේම, බිලියන සංඛ්‍යාත වූ ලෝක ජනතාවට, නැණෝ තාක්‍ෂණ ක්‍රමවේද භාවිතයෙන් විෂබීජ, අපිරිසුදු දෑ ඉවත්කොට පෙරා, පිරිසිදු කළ පානීය ජලය ලබා දීම, ලෝකයේ මීළඟ කර්මාන්ත විප්ලවය වේ.

ද පැසිµsක්‌ නොර්ත් වෙස්‌ට්‌ නැෂනල් ලැබොරටරි (The Pacific North West Laboratory) මගින් සිදු කළ පර්යේෂණයක දී ආදේශක සිලිකා අංශු මගින් ජලයට මුසු වී ඇති විෂ කොටස්‌ ඇදගැනීම නිසා ජල මූලාශ්‍ර අපවිත්‍රවීමෙන් සිදුවන හානිය හා ජල දූෂණය වළක්‌වා ගැනීමට හැකි වී තිබේ.

මේ අනුව බලන කල වත්මන් සමාජ ප්‍රගමනය උදෙසා නැණෝ තාක්‍ෂණ ක්‍රමවේදයන් භාවිත කිරීම තුළින් පරිසරය, සෞඛ්‍ය සහ ආරක්‍ෂාව සුරක්‍ෂිත කිරීමට, සුවිශාල වූ ඉඩහසරක්‌ ඇති කෙරෙමින් පවතින බව පිළිගැනීමට අප මැලිවිය යුතු නැත.

කාර්මික විප්ලවය ලෝකයටම ලබා දුන් එක්‌ භයානක අතුරුඵලයක්‌ වූයේ පිළිකා රෝගයයි. සාමාන්‍යයෙන් විවිධ රෝග පීඩා, අතුරු අන්තරා යනාදිය හේතුවෙන් ලෝක ජනගහනයෙන් මිලියන 58-65 අතර ප්‍රමාණයක්‌ එක්‌ වසරක දී මිය යති. සාමාන්‍යයෙන් මෙම මරණ අතුරෙන් 13% - 15% අතර ප්‍රමාණයකටම මරණ වරෙන්තුව වූයේ පිළිකා රෝගයයි. වර්ෂ 2015 වන විට ලෝක ජනගහනයෙන් මිලියන 09 ක්‌ පිළිකාවෙන් මිය යන බවත්, වර්ෂ 2030 දී එම සංඛ්‍යාව මිලියන 11.4 දක්‌වා ඉහළ යන බවත් පෙන්වා දී ඇත්තේ 2006 ලෝක සෞඛ්‍ය සංවිධානය නිකුත් කළ වාර්තාවකට අනුවය.

පිළිකා වර්ග හඳුනාගැනීම, නිරීක්‍ෂණය, නිවැරදි ඉලක්‌කයට ප්‍රතිකාර කිරීම නැණෝ තාක්‍ෂණ ක්‍රම හරහා පහසු වී තිබේ. වසරකට 15,000 ක්‌ පමණ පිරිසක්‌ පිළිකා රෝගීන් බවට පත්වන අපේ රටට ද මෙම සොයා ගැනීම් හෙට දවසේ දී ආශිර්වාදයක්‌ වනු ඇත. 

පිළිකා වර්ග විශේෂයෙන්ම පිරිමින්ගේ, ෆොස්‌ටේ්‍රට්‌ ග්‍රන්ථිය ආශ්‍රිත පිළිකා හඳුනා ගැනීමට ප්‍රොaටීන් ආස්‌තරණය කළ (Prolein Coated Nano Wires) නැනෝ වයර් යොදා ගැනේ. සාමාන්‍ය වෛරසයකට වඩා පස්‌ ගුණයකින් කුඩා වූද ඉතා ශක්‌තිමත් සේද නූලක්‌ බඳු දීප්තිමත් සිලිකා විශේෂයකින් මෙම නැනෝ වයර් නිපදවා තිබේ.

පිළිකා සෛලම ඉලක්‌ක කොට, අනෙකුත් සෛල හා පටක වලට හානි නොවන පරිදි පහර දීමටත්, විනාශ කිරීමටත් හැකියාව ඇති, නැනෝ ෂෙල්ස්‌ (Nano Shells) නමැති පිළිකා සෛල ඉලක්‌ක කොට විනාශ කර දැමීම නූතන ක්‍රමවේදය වර්තමානයේ අප අත්දකින තවත් එක්‌ නැණෝ හාස්‌කමකි. 

මීට අමතරව පිළිකා මර්දන ප්‍රතිකාර ක්‍රමයේ දී විශිෂ්ටතම නැණෝ තාක්‍ෂණික භාවිතය බවට පත් වී ඇත්තේ කාබන් නැණෝ ටියුබ්ස්‌ (Carbon Nano Tubes) ඇසුරෙන් සිදු කරනු ලබන ප්‍රතිකර්මයයි. කාබන් නැණෝ ටියුබ්ස්‌ වර්ග තුනකි. එකක්‌ තනි බිත්තියේ කාබන් නැණෝ ටියුබ්ස්‌ ය. (Single Walled Carbon Nano Tubes) අනෙක්‌ වර්ග ද්විත්ව සහ බහු ස්‌ථර කාබන් නැණෝ ටියුබ්ස්‌ ය. (Multi Walled Carbon Nano Tubes) සිලින්ඩරාකාර හැඩැති මේවා සුවිශේෂි විද්යුත් හා තාප සන්නායක ගුණාංගයන්ගෙන් හෙබි ඉතා ශක්‌තිමත් නැණෝ කාබන් ටියුබ්ස්‌ වීම නිසා, නිවැරදිව පිළිකා සෛලයටම පහර දී ඒවා විනාශ කිරීම සඳහා පාවිච්චි කරනු ලබයි. පිළිකා නාශක ඖෂධ වර්ග ඒ කරා රැගෙන යැමට වර්තමානයේ දී නැණෝ කාබන් ටියුබ්ස්‌ භාවිත කෙරේ. 

බහු කාර්ය නැණෝ ද්‍රව්‍ය (Multi Functional Nano Meterials) මොළයේ හටගන්නා පිළිකා ගෙඩි (Brain Tumer), පටක හෝ ඉන්ද්‍රියන් හෝ රත්කිරීම තුළින් (Heating of organs, and Tissus by placing multi Functional nano meterials) 'නැණෝ තාප ප්‍රතිකාර' ක්‍රමවේදය (Nano thermal Therapy) අද දවසේ දී පිළිකා සෛලයන්ගේ මාරයා බවට පත් වී ඇත්තේ, කාබන් නැණෝ ටියුබ්ස්‌ වල වූ සුවිශේෂි තාප සන්නායක ගුණාංගයන් නිසා ය. මේ අනුව බලන කල අනාගත ලෝකයේ, කාබන් නැණෝ ටියුබ්ස්‌ සඳහා දැවැන්ත වෙළඳපොළක්‌ නිර්මාණය වන බව ඉතා පැහැදිලිය. මෙම ලිපිය ආරම්භයේදීම ලියුම්කරු ප්‍රකාශ කළ පරිදි ශ්‍රී ලංකාවේ අපි රත්තරං ආකරයක්‌ මත හිඳගෙන බුලත් විට සපමින් හතර අතේ කැත කරමින් සිටින්නේ යෑයි කියූ කතාව, බොරුවක්‌ නොව, සැබෑවක්‌ම බවට පැහැදිලි සාක්‍ෂිය වන්නේ,

මේ වන විට අපේ පොළවෙන් හාරා ගනු ලබන මිනිරන් (VEIN GRAPHITE) වලින් ඉහත අප සඳහන් කළ විශ්මිත කාබන් නැණෝ ටියුබ්ස්‌ ලෝකයේ මුල් වරට නිෂ්පාදනය කර ඇත්තේ, සිරිලක්‌ මවගේ ප්‍රඥා සම්පන්න පුත්‍රයෙකු වූ, දැනට පේරාදෙණිය විශ්ව විද්‍යාලයේ විදුලි හා විදුලි ඉලෙක්‌ට්‍රොනික ඉංජිනේරු දෙපාර්තමේන්තුවේ ජ්‍යෙෂ්ඨ කතිකාචාර්යවරයකු වූ, ආචාර්ය ලිලන්ත සමරනායකයෝ නිසා ය. (වර්ෂ 2010 දී සිදු කළ ඔහුගේ මෙම නව සොයා ගැනීම වෙනුවෙන් පේටන්ට්‌ බලපත්‍රයක්‌ ළඟදීම ලැබීමට නියමිතය) 

අපි අපේ මිනිරන් (VEIN GRAPHITE) මෙටි්‍රක්‌ ටොන් එකක්‌ ඇමරිකානු ඩොලර් 1200 කට පිටරටට පටවමු. පිටරැටියෝ එම මිනිරන් යොදා නිෂ්පාදනය කරනු ලබන තනි ස්‌ථර කාබන් නැනෝ ටියුබ්ස්‌ (Single Wall Carbon Nano Tubes - SWCNT'S) එක ග්‍රෑම් එකක්‌ ඇ. ඩොලර් 450 ක මිලකට, වෙළඳපොළේ අලෙවි කරති. මේ වෙනස අප වටහා ගන්නේ කවදාද? 

සැබවින්ම අප හිඳගෙන නොව බුදියාගෙනම සිටින්නේ රන් ආකරයක්‌ මතම නොවේ ද? අද දවසේ අපේ රට වැටී සිටින ආර්ථික අගාධයෙන් ගොඩ ඒමට අවශ්‍ය ස්‌වාභාවික සම්පත් සේම, ඉන් නිසි ඵල ප්‍රයෝජන ගැනීමට හැකි වටිනාම මානව සම්පත ද අප සතුව තිබිය දී ලෝකයාගෙන් ණයට සල්ලි ගෙන, අජටාකාශයට 'පාට සරුංගල්' යෑවීමේ සෝබන ව්‍යාපෘතිවලට කෝටි ගණන් මුදල් වැය කරනවා වෙනුවට, ලෝකයේ තුන්වැනි කර්මාන්ත විප්ලවයේ පෙරගමන්කරුවා වූ නැණෝ තාක්‍ෂණය (පමා වී හෝ) රටට දැනෙන සේ සංවර්ධනය කිරීමට, වැඩිදියුණු කිරීමට රාජ්‍ය මැදිහත් වීමක්‌ ලබා දීම, යුගයේ අවශ්‍යතාවක්‌ නොවන්නේ ද?

දැනට ශ්‍රී ලංකාවේ නැණෝ තාක්‍ෂණය පිළිබඳව පර්යේෂණ ආයතනයක්‌, රාජ්‍ය හා පෞද්ගලික දෙඅංශයේ ආධාර මත ක්‍රියාත්මක වෙමින් පැවතිය ද අවශ්‍ය ප්‍රතිපාදන සහ යටිතල පහසුකම් වල ඌනතා නිසා ගමන සිදුවන්නේ ඕනෑවට එපාවට ය. ජාතික නැණෝ තාක්‍ෂණික ආයතනයක්‌ සඳහා පසුගිය වසරේ දී මුල් ගලක්‌ ද තැබුවා මතකය. එහෙත් නැණෝ තාක්‍ෂණය ගැන මෙලෝ රහක්‌ නැති දේශපාලන බවලතෙකුට අදාළ අමාත්‍යාංශය එකල බාර වී තිබීම නිසා ඒ දේවල් ඒ අයුරින්ම සිදුවන්නට ද ඇත. 

විදුලි ඉංජිනේරුවරයකු හෙබ වූ විදුලිය හා බලශක්‌ති අමාත්‍යංශය නීතිඥවරියකට හිමිවීමත් නීතිඥවරියක හෙබ වූ විද්‍යා හා තාක්‍ෂණික අමාත්‍යාංශය, යළිත් වරක්‌ විද්‍යාව දන්නා, එමෙන්ම, පරිසරයට සේම තම මාතෘ භූමියටත් මහත් සේ ආදරය කරන දේශපාලන මහත්මයකුට හිමිවීමත් කළු වළාවක ඇඳුන රිදී රේඛාවක්‌ සේ ලියුම්කරු දකී. එදා, මහාචාර්ය තිස්‌ස විතාරණයෝ දුටු සිහිනය මෙදා සැබෑවක්‌ කිරීමේ වගකීම පාඨලී චම්පික රණවක ගරු විද්‍යා හා තාක්‍ෂණ ඇමැතිතුමා වෙතින් සිදුවනු ඇතැයි ලියුම්කරු තුළ විශේෂ බලාපොරොත්තුවක්‌ තිබේ. මෙම ලිපිය ලිවීමට ලියුම්කරු පෙළඹ වූ නිමිත්ත ද එය මැයි.

අද අපේ රටේ ආණ්‌ඩු පක්‍ෂය සේම විරුද්ධ පක්‍ෂයත්, එසේම රටේ මහජනතාවත් දෑස්‌ බැඳගෙන කණාමුට්‌ටිය බිඳීමේ, මහා ජාතික ක්‍රීඩාවක නිරත වී සිටී. පහර දිය යුතු නිශ්චිත ජයග්‍රාහී ඉලක්‌කය, හුදකලා වී ඔහේ එල්ලෙමින් තිබිය දී අපි, අතැති මුගුර කිසිදු ඉලක්‌කයක්‌ නැතිව, හතර අතේ වනමින්, එකිනෙකාගේ ඔළු පලා ගනිමින් කාලය ගත කරමු.

ජාතියක්‌ වශයෙන් නිදහස ලබා වසර 65 ක්‌ ඉකුත් වී හමාරය. නිදහසින් පසුව අප ආ මඟ දෙස ආපසු හැරී බැලීමේ දී සැබැවින්ම අප සිනාසිය යුතු ද? නැතිනම් හැ`ඩිය යුතු දැයි අපටම නොතේරේ. 

නිදහස ලැබූ දා සිට මේ දක්‌වාම රට පාලනය කළ උදවිය වැඩි කාලයක්‌ ගත කළේ එකිනෙකා විසින් ඇතිකරනු ලැබූ අවුල් ලිහීමට ය. ඒවා හරියට දහං ගැට වගේ ය. ජාතිවාදී අවුල ත්‍රස්‌තවාදයක්‌ බවට පත් වී එම අවුල ලිහා ගැනීමට අපේ රටට වසර 30 ක්‌ම ගියේ ය. වත්මන් ජනපති තුමාගේ දේශපාලන නායකත්වයත්, ත්‍රිවිධ හමුදාවේ කැප කිරීමත් නොවන්නට රට තවම අවුලෙන් අවුලේමය. මෙම මාරක ගැටය ලිහා ගෙන වසර හතරකට ආසන්න වුව ද, රටේ ණය බර එන්න එන්නම වැඩි වෙමින් පවතී. එදා වේල පිරිමසා ගැනීමට බහුතර දුගී ජනතාව ගන්නා වූ වෙහෙස අපමණ ය. ඇත්තෝ කති බොති. නැත්තෝ දත්මිටිද කති.

Source : http://www.divaina.com/2013/02/10/feature02.html


3 comments:

ඉරානය දේශීයව නිශ්පාදනය කල ස්ටෙල්ත් ප්‍රහාරක යානාවක් එලිදක්වයි [එය පියාසර කල නොහැකි ප්ලාස්ටික් මොඩලයක් පමණක් බව බටහිර විශ්ලේෂකයින් පවසයි ]


ඉරානය පසුගියදා දේශීය තාක්ශණයෙන් නිමැවුනු ස්ටෙල්ත් වර්ගයේ ප්‍රහාරක ජෙට් යානයක් එලිදැක්වීය. Qaher F-313 ලෙස නම් තබා ඇති මෙම යානය අමෙරිකානු සුපිරි ප්‍රහාරක යානයක් වන F/A 18 හෝර්නට් යානයට සමාන හැකියාවන් ඇති යානයක් බව ඉරානය පවසයි.

ඉරාන විප්ලවයේ 34 වැනි සමරු ජයන්තිය එලබෙන දින සිදුකල මෙම එලිදැක්වීම ඉරාන රූපවාහිනී නාලිකා මගින් සජීවීව විකාශනය කලේය. එහිදී සිදුවූයේ හැඟරයක් තුල තබා තිබුණු යානයේ අනුරුවක් ඉරාන ජනාධිපති අහ්මෙනිජාඩ් මහතාවෙත ඉදිරිපත් කිරීමයි. බැලූ බැල්මට අධිතාක්ශණික යානයක් ලෙස පෙනෙන මෙම යානයේ අත්තටු කෙලවරින් පහතට නැමී ඇති ආකාරයට නිර්මාණය කොට ඇත. මෙලෙස තටු කෙළවර පහතට නැමී ඇති ආකාරයට නිමැවූ ප්‍රහාරක යානා දැනට කිසිදු රටක නිශ්පාදනය නොවන අතර එවැනි අත්තටු සැකැස්මක් ඇතිව නිර්මාණය කල පියාසර කල හැකි එකම යානය වන්නේ 1996 වසරේදී බෝයිං සමාගම නිර්මාණය කල "Boeing Bird of Prey" යානයයි. එයද තාක්ශණයන් තහවුරු කරගැනීම සඳහා නිමැවුනු (technology demonstrator) පර්යේශණ මට්ටමේ යානයක් වන තර 1999 වසරේදී එම ව්‍යාපෘතිය අත් හිටුවන ලදී.

මේතර ප්‍රධාන අත්තටු වලට අමතරව ඉදිරියෙන් "කනාර්ඩ්" ලෙස හැඳින්වෙන කුඩා අත්තටු යුගලක්ද පිහිටුවා ඇත.




යානය එලිදැක්වීමේ උත්සවයේදී ඉරාන ජනාධිපති අහ්මෙනිජාඩ් පැවසූ ආකාරයට F-313 යානය ඉරාන තාක්ශණයේ නිම්වලලු පුලුල්කොට ඇති අතර ඉරානයට ඕනෑම තාක්ශණික අභියෝගයක් ජයගත හැකිබව ලොවටම තහවුරු කල බවයි. ඉරාන ආරක්ශක අමාත්‍ය අහ්මඩ් වාහිඩ් පවසන ආකාරයට F-313 රේඩාර්වලින් සැඟවී යාහැකි යානයක් වන අතර අවි ආයුධ රාශියක් රැගෙන යාහැකි ලෙස සකසා ඇත. එමෙන්ම යානය සැහැල්ලු සංයුක්ත-ද්‍රව්‍ය (composite materials) මගින් නිර්මාණය කොට ඇත. මෙම යානයට ඉතා පහතින් පියාසර කරමින් ගොඩබිම ඇති ඉලක්කවලට ප්‍රහාර එල්ල කල හැකි අතර ගුවන් සටන්වලට හැකියාවක් ඇත. එමන්ම ඉතා කෙටි ධාවන පථයකින් ගුවන්ගත වීමට හා ගොඩ බැසීමටත් හැකියාව ඇති අතර ඉතා අඩු නඩත්තු අවශ්‍යතාවයකින් යුක්තය.

යානය ගොඩබස්වන හෝ ගුවන්ගත කරන දර්ශණ ඉරානය විසින් නිකුත්කොට නැතත් F-313 යානයේ හැඩය ඇති යානයක් ඈත අහසේ පියාසර කරන වීඩියෝ දර්ශණයක් අන්තර්ජාලයට නිකුත්කොට ඇත.

බටහිර විවේචන

බටහිර ආරක්ශක විශ්ලේෂකයින් බොහෝ දෙනෙකු මෙම ඉරාන යානය ඉතා නිර්දය ලෙස විවේචනය කොට ඇති අතර සමහර විශ්ලේෂකයින් F-313 සිනහ උපදවන ප්ලාස්ටික් මොඩලයක් ලෙස හඳුන්වා දී ඇත. සියල්ලම ඇමරිකාවේ හෝ බටහිර යුරෝපයේ වෙසෙන තමන්ට පමණක් කල හැකියයි සිතා සිටින උඩඟු බටහිර ජාතීන් මීට වසර දෙකකට පමණ පෙර රුසියාව සිය ස්ටෙල්ත් යානය වන සුක්හොයි T-50 යානය ලොවට නිරාවරණය කල අවස්ථාවේදීත් එය අමෙරිකානු F-22 යානයේ බාල අනුරුවක් (cheap imitation) බවට අවඥාවෙන් බැහැර කල බව එම වාර්තා කියවූ ලේඛකයාට මතක ඇත. එහෙත් අද වන විට රුසියානු T-50 යානය අමෙරිකානු F-22 හා F-35 සුපිරි ස්ටෙල්ත් යානාවල හැකියාවන් හට බොහෝ ආසන්න හැකියාවන් ඇති අමෙරිකානු යානාවලට විශ්වසනීය ලෙස අභියෝග කල හැකි යානාවක් බව බොහෝ මැදහත් විචාරකයින් පිලිගෙන හමාරය.

එමෙන්ම පසුගිය වසර දෙක අමෙරිකානු F-22 යානයටද ඉතා අවාසනාවන්ත කාල පරිච්ඡේදයක් විය. F-22 යානා දෙක තුනක්ම හදිසියේ කඩාවැටී නියමුවන් මරණයට පත්වුනු බැවින් F-22 යානා සියල්ල බිම්ගැන්වීමට අමෙරිකානු ගුවන් හමුදාව කටයුතු කල අතර F-22 යානා පැදවීම සමහර ගුවන් නියමුවන්  ප්‍රතික්ශේප කිරීම නිසා එම නියමුවන් යුද්ධාධිකරණයට පමුණුවන ලදී.

කරුණු එසේ වුවත්, ඉරාන F-313 මැදහත්ව සළකා බලන විට බටහිර විවේචනවල යම් සාධනීය තර්ක තිබෙන බව පිලිගත යුතුය.

විවේචන #1


යානයේ නියමුවා නියමුකුටිය තුල අසුන්ගෙන සිටිනා ඡායාරූපය දෙස බලන්න. එම නියමු කුටිය කෙතරම් කුඩාද යත් නියමුවාට සුවපහසුලෙස අසුන් ගැනීමට නොහැකිය. නියමුවාගේ හිස හා යානයේ නියමු අසුනේ head-rest එක දෙස බලන්න. නියමුවාගේ හිස ඇත්තේ head-rest එකට සෑහෙන ඉහලිනි. ඉරානය කියනා ආකාරයට මෙම යානය සැබැවින්ම ශබ්ධයේ වේගය අභිබවා යාහැකි සුපර්-සොනික් යානයක් නම් යානය ශබ්ධයේ වේගය අභිබවා ත්වරණය වීමේදී නියමුවාගේ හිසට ආධාරකයක් නොමැති බැවින් එය පසුපසට ගැස්සී නියමුවාගේ උගුරු දන්ඩ කැඩී යා හැකිය!

නියම ප්‍රහාරක ජෙට්යානා ගණනාවක නියමුවන් අසුන්ගෙන සිටිනා ආකාරය දැක්වෙන පහත රූපසටහන බලන්න. ඉරාන නියමුවා මොනතරම් අපහසුවෙන් නියමු කුටිය තුල හැකිලී මෙන් සිටින්නේදැයි ඔබටම පැහැදිලි වේ. බටහිර විචාරකයින් හට අනුව මෙසේ වීමට හේතුව මෙම යානය නියම පියාසර හැකියාව ඇති යානයක් නොව, ප්‍රහාරක යානයක කුඩා ප්‍රමාණයේ අනුරුවකි.
විවේචන #2


ඉහත ඡායාරූපය යානයේ පිටුපස එන්ජිමේ සම්පීඩිත වාතය පිටවන වා-පිටකරයයි. එය රතු ආවරණයකින් වසා ඇති අතර එයටම ඈඳා ඇති රතු පටියේ "remove before flight" - හෙවත් පියාසැරියට පෙර ඉවත්කරන්න යනුවෙන් ඉංග්‍රීසියෙන් ගැසූ ලේබලයක්ද ඇත. එමෙන්ම ආන්ත්‍රාවයි යනුවෙන් එන්ජිම දෙපස ඉංග්‍රීසියෙන් ලියා ඇත. යානය වටාම ඉන්ග්‍රීසි භාශාවෙන් ලියැවුනු උපදෙස් තිබීමෙන් මෙය බටහිර රටවල්වලට අපනයනය සඳහා නිමැවූවක්දෝ යන සැකය නිකමට මතුවුවත්, යානයේ වා-පිටකරය දෙස බැලූවිට එයට වඩා විශාල ගැටලුවක් පැනනගී. එම ගැටලුව නම් යානයේ වා-පිටකුරුව සාමාන්‍ය සිදුරක් ලෙස සකසා තිබීමයි. සුපර්සොනික් ජෙට් යානයක ඉන්ජිමක් උපරිම පීඩනයෙක් ක්‍රියාත්මක වනවිට වා-පිටකුරුවෙන් පිටවන වාතය ෆැරන්හයිට් 3000ක් (සෙල්සියස් 1600ක්) පමණක අධික උශ්ණත්වයකින් පිටවෙයි. මෙම උශ්ණත්වයෙන් යානයේ සැකිල්ල හා පිට පෘශ්ඨය ආරක්ශාකර ගැනීමස සඳහා සෑම ජෙට් එන්ජිමක්ම සම්පීඩිත වාතය පිටතට ගෙන එන්නේ අධික තාපයට ඔරොත්තු දෙන ටංස්ටන් මිශ්‍ර ලෝහවලින් සැකසුනු නැසින්නක් ආධාරයෙනි. එසේ නොමැතිනම් ජෙට් එන්ජිමේ අධික තාපය මගින් යානයේ සැකිල්ල ඇදවී දියවී යාමට හැකියාවක් ඇත.

F-313 මෙවැනි නැසින්නක් ඇති බවට කිසිදු සළකුණක් නැතිවීම මෙම යානය පියාසර හැකියාවක් ඇති නිර්මාණයක් නොවන්නේදෝ යන බලවත් සැකය ඇති කරයි. බටහිර විචාරකයින්ගේ "ප්ලාස්ටික් මොඩලය" විවේචනය සාධනය වීමට මෙම නැසිනි රහිත නිමැවුම විශාල හේතුවකි.


ඉහත ඡායාරූපයෙන් ඔබට ලොව කුඩාම සුපර්-සොනික් ප්‍රහාරක යානය ලෙස පිලිගැනෙන අමෙරිකානු F-16 ප්‍රහාරක යානයේ වා-පිටකුරු නැසින්න දැක ගත හැකිය. මෙම නැසින්න යානයේ සැකිල්ලෙන් අඩි 2-3 පසුපසට නෙරා ඇත්තේ අධික තාපයෙන් යානය ආරක්ශාකිරීමටයි.

විවේචන #3


F-313 එන්ජිමේ වා-පිටකුරු නැසින්න පමණක් නොව ඉදිරිපසින් එන්ජිමට වාතය ඇදගන්නා වා-පිවිස්න කවුලු (air-intakes) වල ප්‍රමාණයද විශාල ගැටලුවක් මතු කරයි. ඡායාරූපයේ පෙන්වන වා-පිවිස්න කවුලු සුපර්සොනික් ජෙට් යානා එන්ජිමකට වාතය ලබාදීමට කොහෙත්ම හැකියාවක් නැත්තේ ප්‍රමාණයෙන් ඒවා ඉතා කුඩා වීමයි. 

පහත රූපයේ අමෙරිකානු, රුසියානු හා යුරෝපීය ප්‍රහාරක යානාවල ඉදිරිපස වා-පිවිස්න කවුලු පෙන්වා ඇති. F-313 හා සාපේක්ශව එම වා-පිවිස්න කවුලු කෙතරම් විශාලදැයි ඔබටම වැටහෙනවා ඇත.
මෙම විවේචන තුන, බටහිර විචාරකයින් එල්ල කරනා විවේචන ගණනාවකින් සාමාන්‍ය පුද්ගලයෙකුට පවා අවබෝධ කරගත හැකි අඩුපාඩුය. මීට අමතරව තාක්ශණික විවේචන ගණනාවක් ද එල්ල වේ. යානයේ හැඩය සලකා බලන විචාරකයින් එය වායුගති-විද්‍යාත්මකව පියාසරකල නොහැකි එකක් යයි ප්‍රකාශකරන අතර මෙම යානාව කිසිසේත්ම රේඩාර් වලින් සැඟවී යා නොහැකි යානාවක් නොවන බව ඔවුන් ප්‍රකාශකරන්නේ යානයේ පෘශ්ඨවල ආනතිය (surface angles) යනාදිය සලකා බලමිනි. 

මේ අනුව මෙම ස්ටෙල්ත් යානයේ අනුරුව බටහිරයන් රැවටීමටත් වඩා ඉරාන ජනාධිපති අහ්මනිජාඩ් හා ඉරානයේ සැබෑ පාලකයින් වන මූලධර්මවාදී මුල්ලාවරුන් රැවටීම සඳහා ඉරාන ආරක්ශක දෙපාර්ථමේන්තුව විනින් අටවන ලද්දක් දැයි සැක සිතේ.

5 comments: