MILITARY TECH: Finland receives its first F35 Stealth Fighters

ෆින්ලන්තය විසින් තමන්ගේ ප්‍රථම F-35A ගුවන් යානා නිල වශයෙන් පිළිගෙන තිබෙනවා. 2026 සැප්තැම්බර් 18 වැනිදා පස්වරු 5:45 ට, ටෙක්සාස්හි ෆෝට් වර්ත් හි පිහිටි ලොක්හීඩ් මාටින් සංකීර්ණයෙන් ආරම්භ වූ තෙදින ගුවන් ගමනකින් පසුව, JF-510 සහ JF-512 දරන යානා දෙක ෆින්ලන්තයේ රොවානියෙමි හි ලැප්ලන්ඩ් ගුවන් බලකා මූලස්ථානයට ගොඩබස්වනු ලැබුවා. 

දීර්ඝ ගමනක් වූ මෙය සඳහා මිල්ඩන්හෝල් හි පිහිටි එක්සත් ජනපද ගුවන් හමුදාවේ KC-135 ඉන්ධන පිරවුම් යානාවල සහාය හිමිවුණා. තාක්ෂණික දෝෂයක් හේතුවෙන් JF-511 දරන තුන්වැනි යානාව අතරමගදී යලි පරීක්ෂාවට ලක් කිරීමට සිදුවීම නිසා ෆින්ලන්තය වෙත පැමිණීම කල් ගියා. 

මෙම යානා පදවනු ලැබුවේ ඇමෙරිකානු ගුවන් නියමුවන් විසින් නිසා, ෆින්ලන්ත ලාංඡන තාවකාලිකව ආවරණය කර තිබූ අතර, ගමනේ අවසන් අදියරේදී ෆින්ලන්ත ගුවන් හමුදාවේ F/A-18 හෝනට් යානා පෙර ගමන් යමින් පරිවාර සහාය ලබා දුන්නා.

ඔක්තෝබර් 1 වැනිදා පැවැති F-35 යානා ෆින්ලන්ත ගුවන් හමුදාවට නිල පිළිගැනීමේ උත්සවයට ජනාධිපති ඇලෙක්සැන්ඩර් ස්ටබ් ද එක්වුණා.

2021 දෙසැම්බර් මාසයේදී, දැනට භාවිතා කරන F/A 18 හෝනට් යානා වෙනුවට F-35A වර්ගයේ යානා 64 ක් ඇණවුම් කිරීමට ෆින්ලන්තය පියවර ගත්තා. එහිදී JF යන්නෙන් Joint Fighter යන්න අදහස් කෙරෙන අතර, යානාවලට JF-501 සිට JF-564 දක්වා අංක ලබා දී තිබෙනවා. 2026 ජනවාරි මාසයේදී ෆින්ලන්තයට ලබාදුන් JF-501 යානය ඇතුළු පළමු යානා අට, ඇමරිකාවේ ආකැන්සාස් හි එබින්ග් ගුවන් ආරක්ෂක ජාතික මූලස්ථානයේ දැනට රඳවා තිබෙනවා. ඒ,  ෆින්ලන්ත ගුවන් නියමුවන් සහ නඩත්තු ශිල්පීන් 150 කට ආසන්න පිරිසකට පුහුණුව ලබා දීම සඳහායි. 

2030 දක්වා හෝනට් සහ ලයිට්නින් යානා දෙකම ෆින්ලන්ත ගුවන් හමුදාව විසින් එකට භාවිත කරනු ලබන අතර, 2028 මුලදී මූලික මෙහෙයුම් හැකියාව ලබා ගැනීමටත්, 2030 අගභාගයේදී පූර්ණ මෙහෙයුම් හැකියාව ලබා ගැනීමටත් සැලසුම් කර තිබෙනවා. F 35 යානා සේවයේ යෙදවීම සඳහා රොවානියෙමි හි යටිතල පහසුකම් සංවර්ධනය අවසන් කර ඇති අතර, රිසාලා/කරේලියා ගුවන් කඳවුරුවල වැඩකටයුතු 2027 වන විට අවසන් කිරීමට නියමිතයි. ඊට අමතරව පීර්කලා සහ තික්කකොස්කි ගුවන් කඳවුරුවල  ද වැඩකටයුතු සිදු කෙරෙමින් පවතිනවා. මෙම ගුවන් කඳවුරු සංකීර්ණ ෆින්ලන්තයේ F 35 බළගණයේ මෙහෙයුම්, නඩත්තු හා තාක්ෂණික කටයුතු සඳහා සම්පූර්ණයෙන්ම නවීකරණය කර තිබෙනවා.

F-35 යානය ෆින්ලන්ත ගුවන් හමුදාව විසින් හඳුන්වන්නේ බලය විශාල වශයෙන් වැඩිකරන (force multiplier), යුද බිමේ ප්‍රධාන මෙහෙයුම්කරුවෙකු ලෙසයි. එහි ඇති සංවේදක ඒකාබද්ධතාවය (sensor fusion), දීර්ඝ පියාසැරි කාළයක් සඳහා අවශ්‍ය අභ්‍යන්තර ඉන්ධන ධාරිතාව, නිතරම අලුත් හැකියාවන් ගෙන් සංවර්ධනය කරමින් පවතින ආයුධ සහ ජෑම් කිරීමේ පද්ධති (advanced weapons and jamming suits), මෙන්ම රේඩාර්වලට හසු නොවන (low-observable) සංවේදක මගින් යානයේ සුරක්ෂිතතාව වැඩි කරන අතරම, යුද හමුදාව, නාවික හමුදාව සහ නේටෝ (NATO) ජාල හරහා දත්ත හුවමාරු කර ගැනීමට ද පහසුකම් සලසනවා. 

නේටෝවේ උතුරු මායිම ලෙස ආක්ටික් කලාපය තුළ තම බලය සහ තතු විපරම් කිරීමේ හැකියාව තහවුරු කිරීම ෆින්ලන්තයේ අරමුණයි. නුදුරු අනාගතයේදී නේටෝව හා රුසියාව අතර ඇතිවිය හැකි ගැටුමකදී, ආක්ටික් කලාපයේ ප්‍රධාන ඉදිරිපෙලක් ලෙස ෆින්ලන්තය පත්වී අති අතර අධික ශීතල හා අති විශාල තුන්ද්‍රා වනාන්තර වලින් හෙබි, ආරක්ෂාකිරීම මෙන්ම යුධ මෙහෙයුම් සිදුකිරීම ඉතාමත් අපහසු භූමියක් ෆින්ලන්තය සතුවෙනවා නිසා F 35 වැනි යානයක වටිනාකම ෆින්ලන්තය තේරුම් ගෙන තිබෙනවා.

මේ නිසා දරුණු සහ විසිරුණු යුධ තත්ත්වයන් සඳහා යොදාගත හැකි ප්‍රහාරක බලකායක් නිර්මාණය කරගැනීමට ෆින්ලන්තය විශාල වෑයමක් දරනවා.

දුෂ්කර තුන්ද්‍රා පෙදෙස්වල ගුවන් මෙහෙයුම් සිදුකිරීම සඳහා ෆින්ලන්ත සංග්‍රාම උපාය සැළසුම් කරුවන් රුසියානු මායිම් පෙදෙස්වල තුන්ද්‍රා කැළෑ තුලින් දිවෙන මහා මාර්ග ගුවන් ධාවන පථ ලෙස භාවිතා කිරීමටත්, ගුවන් කඳවුරුවලට සතුරු ප්‍රහාර එල්ලවීමේ අවදානම් කාලවලදී යානා ආරක්ෂා කරගැනීමට කැලෑපෙදෙවලට ගොඩබස්වා සඟවා තැබීමටත් සැළසුම්කර තිබෙනවා.

මෙම වනගත මාර්ග මෙහෙයුම් සඳහා දැනටමත් ෆින්ලන්ත  නෙදර්ලන්ත ගුවන් හම්දා ඒකා බද්ධ අභ්‍යාස පවත්වා තිබෙන අතර තව විශාල ප්‍රමාණයක් සැලසුම් කර තිබෙනවා.