Related Posts Plugin for WordPress, Blogger...

Wednesday, 30 March 2016

Horizon Campus Management Faculty Business Digest [ISSUE 01] - හොරයිසන් කැම්පස් කළමණාකරණ පීඨය පලකරන ව්‍යාපාරික සඟරාව.



Horizon Campus Management Faculty's first ever Business Digest publication is available now. The Horizon Campus Business Digest carries articles from highly reputed sources like Harvard Business Review, Stanford Business Review, articles published by University of Pennsylvania's Wharton Business school among others. 

Download Horizon Campus Business Digest : https://goo.gl/UFAeUH

හොරයිසන් කැම්පස් කළමණාකරණ පීඨය පලකරන ව්‍යාපාරික සඟරාවේ  මංගල කළාපය දැන් නිකුත්වී තිබෙනවා. කළමණාකරණ ක්ෂේස්ත්‍රයේ නමක් රැන්දූ විශිෂ්ඨ ව්‍යාපාරික සඟරාවන හාවර්ඩ් විශ්වවිද්‍යාලයේ ව්‍යාපාරික පීඨයේ "Harvard Business Review" සඟරාවේ ලිපි, අමෙරිකාවේ ස්ටන්ෆර්ඩ් සරසවියේ ව්‍යාපාරික පීඨය සිය සඟරාවේ පල කරන ලිපි ආදී ඉතා වැදගත් ලිපි ගණනාවක් මෙම කළාපයේ පලවී තිබෙනවා.

එය බාගත කිරීම සඳහා මෙතනින් යන්න - https://goo.gl/UFAeUH











Recent Posts Widget
----------------------------------------------------------------------------------------------------------

Monday, 28 March 2016

ඇන්ඩි ග්‍රෝව් (1936-2016) - සිලිකන් නිම්නයේ පතාක යෝධයෙකුගේ නික්මයාම

කොම්පියුටර් බදාගෙන නිදාගන්න, පාන් ගේන්ඩ යනකොටත් අයි පෑඩ් එක අරගෙන යන ලංකාවේ අධිතාක්ශණික-උන්මාදයෙන් පෙලෙන පාසැල් වයසේ තරුණයින් කී දෙනෙක් ඇන්ඩි ග්‍රෝව් ගැන අහලවත් තියෙනවද දන්නේ නෑ..... 

තොරතුරු තාක්ශණ විප්ලවය, සැබෑ විප්ලවයක් කරන්නට විශාල මෙහෙයක් කල ඇන්ඩි ග්‍රෝව් පසුගිය සතියේ නික්ම ගියා. 

 සෙප්පඩ නිළියකගේ කාර් එක හැප්පුනාම, නැත්තම් කසාදෙ කැඩුනහම මහා ලොකුවට පෙරලි-පෙරලි ලිපිදාන වීඩියෝ පෙන්නන, නූගත්, කපටි දේශපාලකයින්ගේ කට හැකර කතාවලට, දුසිල් භික්ෂූන්ගේ ගොන්පාට් වටල පිටු ගණන් වෙන්කරන අපේ විද්යුත් හා විද්යුත් නොවන බොහෝ මාධ්‍යවලට මේ යුග පුරුෂයාගේ නික්මයාම ප්‍රවෘත්තියක් වුනේ නෑති එක කණගාටුවක්.. 


ඇන්ඩි ග්‍රෝව් මහතාගේ අභාවය සැළවූ වහාම ඉන්ටෙල් සමාගම නිකුත්කල ට්විටර් පණිවුඩය.

András István Gróf  ලෙස 1936 සැප්තැම්බර් 2 දින හන්ගේරියාවේ බුඩාපේස්ට් නුවරදී උපතලැබූ ඇන්ඩිගේ දෙමව්පියන් යුදෙව් ජාතිකයින් විය. ඔහුට වයස 8 වනවිට දෙවන ලෝක යුද්ධය ආරම්භවූ අතර හිට්ලර්ගේ නට්සි හමුදාව හන්ගේරියාවට කඩාවැදී හන්ගේරියානු යුදෙව්වන් 500,000ක් වැඩ කඳවුරු වෙත පිටත්කොට යැවුවේය.

කුඩා ඇන්ඩි හා ඔහුගේ මව හිත මිතුරන්ගේ ආධාරයෙන් සැඟවී නට්සීන්ගෙන් ගැලවුනු නමුත් ඔහුගේ පියා වහල් කඳවුරකට යවනු ලැබීය. වාසනාවකට නට්සීන් අතින් මිලියන ගණනක් යුදෙව්වන්ට අත්වූ ඉරණමෙන් ගැලවීමට ඇන්ඩිගේ පියා සමත්වූ අතර යුද්ධයෙන් පසු ඔවුන් නැවත එකතුවිය.

යුද්ධයෙන් පසු සෝවියට් රතු හමුදාව හන්ගේරියාවේ කොමියුනිස්ට් පාළණයක් ස්ථාපනය කල අතර 1956දී කොමියුනිස්ට් ඒකාධිපති පාළණයට විරුද්ධව හන්ගේරියානු විප්ලවය ආරම්භවිය. සෝවියට් දේශය රතු හමුදාව හන්ගේරියාවට යවා විප්ලවය දරුණුලෙස මර්ධනය කල අතර එවක විසි හැවිරිදි වූ ඇන්ඩි ග්‍රෝව් සිය පවුලෙන් සමුගෙන තවත් සරණාගතයින් දහස් ගණනක් සමග ඔස්ට්‍රියාව වෙත පලාගියේය.

1957දී අමෙරිකාවට පැමිණීමට වාසනාව ලැබූ ඇන්ඩිගේ ජීවිතය වෙනස්වූයේ ඉන් අනතුරුවයි. දැඩි උත්සහයෙන් ඉගෙන ගත් ඇන්ඩි නිව්යෝක් සිටී විශ්වවිද්‍යාලයෙන් රසායණික ඉන්ජිනේරු විද්‍යාව පිලිබඳව උපාධියක් දිනාගත් අතර පසුව කැළිෆෝනියා විශ්වවිද්‍යාල පද්ධතියට අයත් යුනිවර්සිටි ඔෆ් කැලිෆෝනියා - බර්කලි විශ්වවිද්‍යාලයෙන් ආචාර්ය උපාධියක් දිනා ගත්තේය.

1963දී ආචාර්ය උපාධිය අවසන්කල පසු, ඇන්ඩි එවක කැලිෆෝනියාවේ නැගී එන ඉලෙක්ට්‍රොණික සමාගමක් වූ ෆෙයාචයිල්ඩ් සෙමිකන්ඩක්ටර් සමාගමට පර්යේෂකයෙකු ලෙස බැඳුනු අතර උත්සහයෙන් වැඩ කිරීම නිසා 1967 වනවිට පර්යේෂණ කටයුතු පිලිබඳව අධ්‍යක්ශක තනතුරු දක්වා උසස්වීම් ලබාගන්නට දක්ශවිය.

මේ වනවිට ෆෙයාචයිල්ඩ් සමාගම අර්ධසන්නායක සංගෘහිත පරිපථ (silicon integrated circuits) නිර්මාණය කිරීමේ පර්යේෂණ වල නියැලී සිටියේය. මේ කාළයේදී ට්‍රාන්සිස්ටරයේ සම-නිර්මාතෲවරයා වූ රොබර්ට් නොයිස් හා පසුකලක සිලිකන් පරිපථවල හැකියාව පිලිබඳව සුප්‍රකට නීතියක් ලෙස පිලිගැනුනු මුවර්ගේ නීතිය (Moor's Law) ලොවට පිලිගැන්වූ ගෝර්ඩන් මුවර් ෆෙයාචයිල්ඩ් සෙමිකන්ඩක්ටර් සමාගමේ සේවය කල අතර ඔවුන් හා ඒක්ව පර්යේෂණ වල නිරතවීමේ අවස්ථාව ඇන්ඩි ග්‍රෝව් හට හිමිවිය.

මෙම පර්යේෂන ඇසුරින් උගත් දෑ එක් රැස් කොට ඇන්ඩි ග්‍රෝව්, 1967දී විශ්වවිද්‍යාල සිසුන්ගේ පරිශීලනය සඳහා "Physics and Technology of Semiconductor Devices" නම් පොතක් සම්පාදනය කල අතර එය අර්ධ-සන්නායක ඉලෙක්ට්‍රොණික තාක්ශණය ඉගෙන ගන්නා විශ්වවිද්‍යාල සිසුන් සඳහා අනිවාර්ය කියවීමක් ලෙස නම් කෙරුනි.

ඇන්ඩි ග්‍රෝව්, ගෝර්ඩන් මුවර් හා රොබර්ට් නොයිස් 1978දී
1968දී රොබර්ට් නොයිස් හා ගොර්ඩන් මුවර් ෆෙයාචයිඩ් සමාගමෙන් ඉවත්ව "ඉන්ටෙල්" නම් නව සමාගමක් ආරම්භ කල අතර එම සමාගම වැඩ ඇරඹූ පලමු දිනයේම ඇන්ඩි ග්‍රෝව් එහි පලමු සේවකයා ලෙස බැඳුනි. ඉන්ජිනේරු කටයුතු පිලිබන්ද අධ්‍යක්ශකවරයා ලෙස පත්වීම ලැබූ ඇන්ඩි, ඉන්ටෙල් සමාගමේ නිශ්පාද කටයුතු අරම්භ කිරීමට දැඩි ලෙස වෙහෙසුනි. ඉන්ටෙල් සමාගමේ ප්‍රධානම නිශ්පාදිතය වුයේ ඉහල තත්වයේ පරිගණක මතක පරිපථයි. DRAM හෙවත් Dynamic Random Access Memory ලෙස හැඳින්වුනු මෙම පරිපථ තාක්ශණයේ හා නිශ්පාදනයේ දැවැන්තයෙකු බවට ඉන්ටෙල් සමාගම 1980 දශකය වනවිට පත්ව සිටියේය. එම සාර්ථකත්වයේ නියමුවා ඉන්ටෙල් සමාගම සලකන්නේ ඇන්ඩි ග්‍රෝව්ය.

කෙසේ වෙතත් 1985 වනවිට ඉන්ටෙල් සමාගමේ මතක පරිපථ ව්‍යාපාරයට අසුබ කලදසාවක් ලබන්නට විය. ටොෂීබා, එන්.ඊ.සී, හිතාචී වැනි ජපන් සමාගම් පරිගණක මතක පරිපථ ව්‍යාපාරය අත්පත් කරගැනීම සඳහා ඉතා ඉහල තත්වයේ මතක පරිපථ නිශ්පාදන වියදමටත් අඩු මිළකට ලෝකයේ විශාලම ඉලෙක්ට්‍රොණික උපකරණ වෙළඳපොල වූ අමෙරිකානු වෙළඳපොලට මුදාහරිමින් තිබුණි. ඒබැවින්, විශාල ලෙස ලාභ ලබමින් තිබූ අමෙරිකානු මතක පරිපථ නිශ්පාදකයින් වන ඉන්ටෙල්, ටෙක්සාස් ඉන්ස්ටෘමන්ට්ස් වැනි සමාගම් වල අලෙවිය විශාල ලෙස පහත වැටෙන්නට විය.

අඩු පිරිවැයකින් මතක පරිපථ නිපදවන ජපනුන් හා සටනට යාම නිශ්ඵල ක්‍රියාවක් බවට විශ්වාසකල ඇන්ඩි ඒ වෙනුවට ඉන්ටෙල් සමාගම ජපනුන් හට එවක නොතිබූ  තාක්ශණයක් වෙත යොමු කරන්නට ක්‍රියා කලේය. ඒ අනුව මෙමරි පරිපථ නිශ්පාදනය අතහැර දමන්නට ඉන්ටෙල් අධ්‍යක්ශක මණ්ඩලය පොළඹවාගත් ඇන්ඩි ග්‍රෝව්, ඒ වෙනුව ඊට වඩා සංකීරිණ, එනිසාම ජපනුන්ට කොපි කිරීමට අපහසු මයික්‍රෝ-ප්‍රොසෙසර් නිර්මාණය හා නිශ්පාදනයට පිවිසුනේය.

මේ කාලය වනවිට ලොව විශාලම මහා පරිමාණ පරිගණක (mainframe computers) මෙන්ම පුද්ගලික පරිගණක (Personal Computers - PC) නිශ්පාදකයා වූ අයි.බි.එම් සමාගම පරිගණක ලෝකයේ පලමු තැන දිනාගෙන සිටියේය. අයි.බී.එම් සමාගම සිය පරිගණක සඳහා ඉන්ටෙල් ප්‍රොසෙසර් භාවිතා කරන්නට ගත් තීරණය පිටුපස ඇන්ඩි ග්‍රෝව් සිටි අතර, අයි.බී.එම් සමාගම සිය ගැනුම් කරුවෙකු කරගන්නට ඔහු විශාල මෙහෙයක් ඉටුකලේය.

ඇන්ඩිගේ මගපෙන්වීම යටතේ මයික්‍රෝප්‍රොසෙසර් නිශ්පාදනයට පෙළඹුනු ඉන්ටෙල් සමාගම එදා සිට අද දක්වාම ලොව විශාලතම, මෙන්ම ලාභදායිම මයික්‍රෝප්‍රොසෙසර් නිශ්පාදකයා වේ. ඉතා වේගයෙන් පරියේෂණ කටයුතු සිදුකිරීම නිසා, ජපනුන්ට හෝ කොරියානුවන්ට ලඟාවිය නොහැකි තරමේ සීග්‍ර තාක්ශණික දියුණුවක් අතපත් කරගනිමින් වසරින් වසර වඩවඩාත් වේගවත් මයික්‍රෝප්‍රොසෙසර් නිර්මාණය කරමින් වෙළඳපොලට එක් කිරීමට ඉන්ටෙල් සමත්විය.

1996දී "Only the paranoid survives - How to Identify and Exploit the Crisis Points that Challenge Every Business"  නම් පොතක් පලකල අතර එය අතිශයන් ජනප්‍රිය විය. ඇන්ඩි සිය කළමණාකරන ශෛලිය විස්තර කරමින් ලියැවුනු ඒ පොතෙහි සඳහන් වන අන්දමට අධි-තරඟකාරිත්වයක් ඇති තොරතුරු තාක්ශණ කර්මාණ්තය ජයගැනීමට නම් එහි නියැලෙන සමාගම් කටයුතුකල යුතු ආකාරය විස්තර කරයි.

1997 වනවිට ඉන්ටෙල් සමාගමේ අධ්‍යක්ශක මණ්ඩලයේ සභාපතිවරයා මෙන්ම ප්‍රධාන විධායක නිළධාරියාද වූ ඇන්ඩි ග්‍රෝව්ගේ නායකත්වය යටතේ 1997 වසර වනවිට ඩොලර් බිලියන් 20ක ආදායමක් උපයාගත්තේය.

1998 වසරේදී පුරහ්ස්ථ ග්‍රන්ථියේ පිළිකා ලක්ෂණ (prostate cancer) පහලවීම නිසා ඇන්ඩි ග්‍රෝව් ඉන්ටෙල් ප්‍රධාන විධායක නිළධාරි තනතුරෙන් ඉවත්වුවද 2004 වනතෙක් එහි අධ්‍යක්ශක මණ්ඩල සභාපතිවරයා විය. ඉන්පසුව ඉන්ටෙල් සමාගමේ උපදේෂකවරයෙකු හා කැළිෆෝනියාවේ ස්ටැන්ෆර්ඩ් සරසවියේ ආරාධිත කථිකාචාර්ය වරයෙකු ලෙස කටයුතුකල ඇන්ඩි, තොරතුරු තාක්ශණය මෙන්ම අමෙරිකාවේ තොරතුරු තාක්ශණ පුරවරය වන සිලිකන් නිම්නය මහත්සේ අගයන යුග පුරුෂයෙකි.







Recent Posts Widget
----------------------------------------------------------------------------------------------------------

Tuesday, 22 March 2016

යුරෝපය සීතලෙන් ගැහෙද්දී පෝරණුවේ තැම්බෙන අපි



නිළවශයෙන් ශීත සෘතුව අවසන් වුවද යුරෝපය තවමත් ශීතලෙනි. ලන්ඩනයේ සෙ.ග්‍රේ 12කි, පැරීසිය සෙ.ග්‍රේ 11කි, රුසියාවේ මොස්කව් නුවර සෙ.ග්‍රේ -1කින් වෙවුලමින් සිටී. උතුරු ඇමරිකාවද එසේමය. නිව්යෝර්ක් නගරය සෙ.ග්‍රේ 01කි. රටේ අනෙක් පැත්තේ ඇති ලොස් ඇන්ජලීස් නුවර සෙ.ග්‍රේ 12කි.


ඒත් ලංකාවේ?

ලංකාව පෝරණුවකි. කුරුණෑගල සෙ.ග්‍රේ 35ක දැඩි උණුසුමකින් දැවෙයි. රටේ බොහෝ තැන් වල උණුසුම සෙ.ග්‍රේ 32ක 33 අතරය. යාන්තමට සහනයක් ඇත්තේ නුවර එළිය පැත්තේ පමණකි. සෙ.ග්‍රේ 24ක සෞම්‍ය උෂ්ණත්වයක් ඒ පැත්තෙන් වාර්තාවේ.



මෙයට හේතු විස්තර කෙරෙන ලිපියක් අද (22/03/2016) මව්බිම පුවත්පතේ පලවී තිබුණා. මේ එම ලිපියෙන් උපුටා ගැනීමකි.

මේ දිනවල පවතින උණුසුම් කාලගුණ තත්ත්වය හේතුවෙන් දිවයිනේ බොහෝ ප්‍රදේශ ගණනාවක් දැඩි උණුසුමක පවතින අතර පසුගිය දින කිහිපයේදී පමණක් උපරිම උෂ්ණත්වය රත්නපුර, කුරුණෑගල, යාපනය, මහඉලුප්පල්ලම, වවුනියාව, අනුරාධපුර හා පොළොන්නරුව, මොනරාගල යන දිස්ත්‍රික්කවලින් වාර්තා වූ බව ශ්‍රී ලංකා කාලගුණ විද්‍යා දෙපාර්තමේන්තුව පවසා සිටී. ඒ අනුව දැනට වාර්තා වී ඇති උපරිම උෂ්ණත්වය ඇති නගර ලෙස පහත නගර හඳුනාගෙන ඇත.

* කුරුණෑගල - 37.9
* අනුරාධපුර - 37.8
* මහඉලුප්පල්ලම - 37.7
* වවුනියාව - 37.00
* යාපනය - 36.3
* රත්නපුර - 36.1
* පොළොන්නරුව - 36.1
* මොනරාගල - 36.0

මීට අමතරව ඉතා ඉහල උෂ්ණත්වයන් මේ නගරවලින්ද වාර්තාවී ඇත.


මත්තල - 34.5
කටුනායක - 33.5
කටුගස්තොට - 35.2
කොළඹ - 31.4
හලාවත - 30.2
ගාල්ල - 32.2
හම්බන්තොට - 32.1
මන්නාරම - 33.2
නුවරඑළිය - 24.1
පොතුවිල් - 32.0
පුත්තලම - 33.5
රත්මලාන - 33.5
ත්‍රිකුණාමලය - 32.8


කාලගුණ විද්‍යා දෙපාර්තමේන්තුවට අනුව සාමාන්‍යයෙන් පවතින සෙල්සියස් අංශකයට වඩා අංශක 2ක හෝ 3ක උෂ්ණත්වයක් මේ දිනවල වැඩි වී ඇති අතර පහළ වායුගෝලයේ පමණක් ජල වාෂ්ප වැඩිවීමත් සමඟ අන්තර් මෝසම් සක්‍රිය නොවීම මේ කාලගුණික තත්ත්වයට හේතුව සහේතුකවී ඇත.

සාමාන්‍යයෙන් මේ දිනවල උණුසුම වැඩි වුවද පසුගිය වර්ෂවලදී අන්තර්මෝසම් සක්‍රිය වීම හේතුවෙන් උණුසුම දැඩි ලෙස බල නොපෑවද මේ වසරේදී අන්තර් මෝසම් සක්‍රිය නොවීම හේතුවෙන් දැඩි උණුසුම් තත්ත්වයක් ඍජුවම දැනෙන බවද දෙපාර්තමේන්තුව අවධාරණය කරයි. මේ උෂ්ණත්වය අප්‍රේල් මස අවසානය වනතුරුම පැවැතිය හැකි බවද පවසන කාලගුණ විද්‍යා දෙපාර්තමේන්තුව මේ තත්ත්වය සම්පූර්ණයෙන් පහව යනු ලබන්නේ මැයි මසදී අන්තර් මෝසම් වැසි සක්‍රිය වීමත් සමඟ බවද අවධාරණය කෙළේය.

කුරුණෑගල ඇතුගල පර්වතයේ පැළුමක් ඇතිවීමට උෂ්ණත්වය ඍජුවම බලපා ඇති බවට තොරතුරු මේවන තුරු වාර්තා නොවී ඇති බවද කාලගුණ විද්‍යා දෙපාර්තමේන්තුව අවධාරණය කරයි.

පවතින දැඩි උෂ්ණත්වය කුඩා දරුවන්ට පමණක් නොව වැඩිහිටියන්ට ද දැඩිව බලපාන බවත් මේ තත්ත්වය ලබන මාසය වනතුරු පවතින බැවින් සමේ රෝග තත්ත්වයක් ඇතිවිය හැකි බවද ළමා රෝග පිළිබඳ විශේෂඥ වෛද්‍ය දීපාල් පෙරේරා මහතා පවසයි.

කුඩා දරුවන්ගේ සමේ දහදිය බිබිළි මේ තත්ත්වය යටතේ ඇති විය හැකි බැවින් කුඩා ළමයින් විනාඩි 20-30ක කාලයක් ජලයේ තැබීමෙන් මේ තත්ත්වය අවම කරගත හැකි බවද ඒ මහතා 'මව්බිම'ට කීවේය. මේ තත්ත්වය යටතේ දැඩිලෙස දහදිය වහනය වීම නිසා විජලන තත්ත්වයක් ඇතිවිය හැකි බැවින් වැඩිපුර ජලය පානය කිරීමට වගබලා ගත යුතු බවද ළමා රෝග පිළිබඳ විශේෂඥ දීපාල් පෙරේරා මහතා තවදුරටත් සඳහන් කෙළේය.


Recent Posts Widget




----------------------------------------------------------------------------------------------------------

Monday, 21 March 2016

නින්දයාගෙන එනවිට ගැස්සෙන්නේ ඇයි? | Why Do People 'Twitch' When Falling Asleep?


අප හැමදෙනෙකුම වාගේ නින්දයාගෙන එනවිට සිදුවන ගැස්සීමට මුහුණදී තිබෙනවා. පර්යේෂකයින් පවසන අන්දමට සෑම පුද්ගලයින් 10 දෙනෙකුගෙන් 6-7 දෙනෙකු මේ අත්දැකීමට මුහුණ දෙනවා. Hypnagogic jerk ලෙස හැඳින්වෙන මෙම සංසිද්ධිය සිදුවනේ සිරුරේ මස්පිඬුවල නිරායාසයෙන් සිදුවන තිගැස්මක් හේතුකොට ගෙනයි.

Hypnogogic state හෙවත් අවදිය හා නින්ද අතර මිනිස් මොළය පසුකරන සංක්‍රාන්ති කාළ පරාසයේදී මෙම තිගැස්සීම සිදුවනවා. විටෙක ශබ්දයක්, තද එලියක් වැනි බාහිර උත්තේජකයක් නිසා මෙම ගැස්සීම් සිදුවන අතර තවත් විටෙක එවැනි බාහිර උත්තේජක නොමැතිව මෙය සිදුවනවා.

සමහර පුද්ගලයින් මෙම කාළපරාසයේදී ව්‍යාමෝහය හෙවත් hallucinations නැමති මායාදර්ශණ (LSD, හෙරොයින් වැනි මත්කුඩු භාවිතාකරන්නන් hallucinations නැමති මේ මායාවන් අත්විඳිනවා)  පෙනෙන අවස්ථාවක් පසුකරන අතර සමහරුන් සිහින දැකීමට පටන්ගන්නවා. තවත් සමහරුන්ට සිහිනෙන් වැටීම් ආදී හැඟීම් ඇතිවන අතර ඒ සමගම තිගැස්සීම සිදුවනවා.

ආතතිය (stress), අවුල් සහිත බව (anxiety), අධික වෙහෙස (fatigue) හා කැෆේන් (caffeine) මෙම තත්වය වැඩි කරන බව සමහර විද්‍යාඥයින්ගේ පර්යේෂණවලින් පෙනීගොස් තිබෙනවා. කෙසේවෙතත් මෙම තිගැස්සීම වලට හේතුව නිශ්චිත ලෙස නිගමනය කරගැනීමට විද්‍යාඥයින්ට හැකිවී නෑ. එහෙත් මේ සඳහා දැනට කල්පිත දෙකක් ඉදිරිපත්වී තිබෙනවා.

එක් කල්පිතයක් නම් නින්ද ආරම්භවන විට සිරුරේ බොහෝ මස්පිඩු ලිහිල්වන අතර (relaxing of muscles) මේ සංක්‍රාන්ති සමයේදී යම් හේතුවක් නිසා නියුරෝන අහේතුක ලෙස ක්‍රියාත්මක වීමෙන් (misfiring of neurons) මෙම තිගැස්ම සිදුවනවා.

අනෙක් කල්පිතයට අනුව මෙම තිගැස්ම මානවයාගේ ඈත මුතුන්මිත්තන් වන වඳුරන්ගෙන් ලැබුණු දායාදයක් බව පවසනවා. නින්දයාගෙන ඒමේදී සිදුවන මස්පිඩු ලිහිල් වීම, වානර මොළය මගින් ගසෙන් වැටීමට යන අවස්ථාවක් ලෙස වැර්දි ලෙස හඳුනාගෙන ක්ශණිකව මස්පිඩු අවදිකිරීමේ වෑයමක් ලෙස මෙම තිගැස්සීම විස්තර කරනවා.

Recent Posts Widget
-----------------------------------------------------------------------------------------

COLOMBO CYCLE FUN RIDE - 2016

Pedal Pushers Cycling Group විසින් සංවිධානය කරන Colombo Cycle Fun Ride 2016 විනෝද සයිකල් සවාරිය මාර්තු 20වැනි ඉරිදා පැවැත්වුනා. සිවුවෙනි වතාවට පැවැත්වුනු මෙම විනෝද සයිකල් සවාරිය පෙරවරු 8.00 පමණ විහාරමහාදේවී උද්‍යානයේ එලිමහන් රංගපීඨය අසලින් ආරම්භවුනා.

බයිසිකල් පැදීම හා එමගින් ශරීර සෞඛ්‍යයට ඇති වාසි පිලිබඳව දැනුවත් කිරීම සඳහා පිහිටුවාගත් රාජ්‍ය නොවන සංවිධානයක් වන පෙඩල් පුෂර්ස් සංවිධානය පිහිටුවනු ලැබුවේ සයිකල් පැදීම විනෝදාංශය කරගත් ලලන්ති රාජපක්ශ හා දර්ශිණී ආරියරත්න මහත්මීන් විසින් 2010 වසරේදීයි.

   
Colombo Cycle Fun Ride - March 20, 2016 from Terence Kahapola Arachchi on Vimeo.

සයිකල් පැදීමට හා පරිසර හිතකාමී ව්‍යායාමය වලට උනන්දුව දක්වන විශාල පිරිසක්ද මෙම සයිකල් සවාරියට සහභාගී වී සිටියා. තරුණ තරුණියන් මෙන්ම කුඩා දරුදැරියන්ද දෙමාපියන් සමග හරි හරියට සවාරියට සහභාගීවුනා.

RELATED POST: Colombo Cycle FUN RIDE 2015

කොළඹ නගරය වටා කිලෝමීටර් 25ක දුරක් මෙම සවාරියට අයත්වුනා. කණ්ඩායමක් ලෙස ගමන් කරන නිසාත්, තරඟයක් ලෙස නොව විනෝද සවාරියක් ලෙස පැවැත්වීම නිසා කිලෝ මීටර් 25ක දුරක් වුවත් වෙහෙස මහන්සියක් දැනුනේ නෑ.

Red Bull, Union Assurance, Spinners Cafe, Giant වැනි අනුග්‍රාහකයින් මෙවරත් කොළඹ සයිකල් සවාරියට අනුග්‍රහය දක්වා තිබුණා.

කිලෝ මීටර් 25ක සවාරිය අතරතුරදී සහභාගී වන්නන් ආරක්ශිතව මහමාර්ගයේ ගෙනයෑමේ භාරදූර වගකීම මාෂල් ලෙස හැඳින්වූ මගපෙන්වන්නන් කණ්ඩායමකට පැවරී තිබුණ අතර ගිය වසරේ මෙන්ම මෙවසරේද් මෙම මාෂල් වරුන් ඒ භාරදූර වගකීම ඉතා හොඳින් ඉටුකරමින් සියලුදෙනාටම ආරක්ශිතව සවාරිය අවසන් කිරීමට උපකාරීවුනා.

THANK YOU CCFR 2016 MARSHALS!!! - YOU GUYS AND GALS DID A WONDERFUL JOB!!!


Recent Posts Widget
----------------------------------------------------------------------------------------------------------

Monday, 14 March 2016

පොල්තෙල් අගුණ යයි ප්‍රචාරය කොට ෆාම් තෙල් විකුණාගත් බහුජාතික උගුල




පොල්තෙල් යනු ශ්‍රී ලාංකිකයන්ගේ ආහාර සංස්කෘතියත් සමග එකට බැඳුනකි. එය දේශීය ආහාර හා ආහාර සැකසීමේදී දෙවැනි වනුයේ සහල් වලට පමණි. ආයුර්වේදයේදී ද බොහෝ තෙල් වර්ග සැකසීමේදී ප්‍රධාන වන්නේ පොල්තෙල්ය. නැතහොත් පොල් කිරිය. අපේ එදිනෙදා ආහාරයේදී, හොද්දට මාළුවට, බැදුමට, නියඹලාවට, මැල්ලුමට, සම්බෝලයට පොල් හෝ පොල් යහමින් භාවිතා කරයි. එමෙන්ම කිරි බතටද යොදන්නේ පොල්කිරිමය. ඒ හැරුණුකොට අපගේ ආහාර සංස්කෘතියේ සියලු අතුරුපස පාහේ පොල්තෙල්වලින් බදින ලද ආහාර වේ. ඒවා අතර කැවුම්, කොකිස්, මුං අලුවා, ආස්මි, දොදොල්, පැණි වළලුද යන අතුරුපස ප්‍රධාන තැනක් ගනී.


කුඩා කල ළදරුවන්ට උණු උණු කැකුළු බතට ලුණු හා පොල්තෙල් අනා කෑමට දීම අප කුඩා කල රස බැලූ මිහිරි අත්දැකීමකි. හදිසියේ සීරීමක්, තැල්මක් හෝ කුඩා සතෙකු (මී මැස්සෙකු, කූඹියෙකු, කඩියෙකු) කෑමෙන් හෝ දළඹුවෙකු වැදුනහොත් හෝ කහඹිලියා වැදීම නිසා එන පලු නැගීම හා කැසීම නැවතීමට ගාන්නේද පොල්තෙල්ය. මේ හැරුණුකොට හිසට පොල්තෙල් ගෑම අපගේ ස්වස්ථතා සංස්කෘතියේ හිස හා කොණ්ඩය ආරක්ෂා කිරීමේ ප්‍රබලම ඖෂධය වේ. පොල්තෙල් මගින් කෙස් වර්ධනය, ශක්තිය වැඩිකරන අතර හිස් කබලේ බොහෝ රෝග දුරලන මහෝෂධයක් වන්නේ පොල්තෙල්ය.

පෙරකල අපේ යුවතියන්ට දිගු වරලසකට හිමිකම් කීමට උදව් කළේද පිරිසිදු පොල්තෙල්ය. පොල්තෙල්වලට අපගේ සංස්කෘතිය තුළ කොපමණ මුල්තැනක් ඇත්ද යත් සිංහලයන්ගේ ප්‍රධාන උත්සවය වන සිංහල අලුත් අවුරුද්දේදී හිසතෙල් ගෑම නම් ප්‍රධාන නැකතටද භාවිතා වන්නේ පොල්තෙල්ය.එමෙන්ම මඟුලක තුලාවකදී මුලින්ම කරන චාරිත්‍රය වන්නේ තෙල් ලිප තැබීමයි.

පෙරකල ආහාරය සඳහා සාදා ගන්නා තෙල් අත්තෙල් නම් විය. එනම් ගා මිරිකාගත් පොල්කිරි කකාරා සාදා ගන්නා තෙල් වේ. නූතන අර්ථයට අනුව නම් අත්තෙල් යනු Vergin Coconut Oil වේ. කොප්පරා වලින් සාදා ගන්නා තෙල් වලට වඩා අත්තෙල් ගුණ බවත් රසයෙන් උසස් බවත් පෙරකල ලක්වැසියන් හොඳින් දන්නා කරුණකි.

චිරාත් කාලයක් සෑම වේලකටම යහමින් පොල් සහ පොල්තෙල් පරිභෝජනය කළ ජාතියක් වශයෙන් අප පැරැන්නන්ට ඉහෙන් බසින රෝගයක් නොසෑදුනද අද වනවිට අපරදිගයන්ගේ ආහාර සංස්කෘතිය පසුපස ගිය ජාතියක් වශයෙන් ආහාර මුල්කොට ගත් ප්‍රධාන රෝගවලින් සමස්ත ජාතියෙන් අඩකට වඩා රෝගී වී ඇත.


මෙම රෝග ප්‍රචලිත වන්නට පටන් ගන්නේ පනහ දශකයේ අග භාගය තුළදීය.එකල රුධිරයේ කොලෙස්ටරෝල්වලට ප්‍රධාන හේතුව වන්නේ පොල්තෙල් යයි බටහිර වෙදුන් කියන්නට යෙදෙනුයේ කිසිම සායනික පර්යේෂණයක ප්‍රතිඵලවල නොසිටාය. එතැන් පටන් හෘද විශේෂඥයන් යයි කියාගන්නා සියලුම බටහිර වෙදදුරන් පොල්තෙල් හා පොල් ආහාරයට නොගන්නා ලෙස දේශන, අත්පොත්, පත්‍රිකා,වැඩමුළු පැවැත්වූහ. තමන් ළඟට එන රෝගීන්ට පොල්තෙල් ආහාර තහනම් කළහ. පොල්කිරි නොදා ඒ වෙනුවට සෝයා කිරි ආහාර සඳහා භාවිතා කිරීමටද පොල්කිරි භාවිතා කරන්නේ නම් මිටිකිරි ඉවත දමා දියකිරෙන් පමණක් ආහාර පිසගන්නැයි ඔවුන් ජනතාවට උපදෙස් දුන්හ. මෙම උපදෙස් දුන්නේ කිසිම විද්‍යාත්මක පදනමක නොසිටාය. එය දශක තුනකටත් වඩා එකදිගටම ප්‍රචාරය කෙරුණි. එයට සමාන්තර ලෙස රට තුළට එළවළු තෙල් නාමයෙන් ශරීරයට විෂවන, තෙල් මුල්කොට සෑදෙන රෝග වැඩි කරන ෆාම් තෙල්, එළවළු තෙල් ආනයනය හා සෝයා ප්‍රචලිත කිරීම සිදු කෙරුණි. මෙය බටහිර වෙළඳ ආධිපත්‍ය හිමි බහුජාතික සමාගම්වල තවත් අධිරාජ්‍යවාදී ආර්ථික සුරාකෑමක් මෙන්ම සංස්කෘතික මොළ සේදීමෙන් කරන ලද ආර්ථික ඝාතනයකි. හැටේ දශකයෙන් පසු ඇතිවූ පරම්පරාව බටහිර විද්‍යාව යනු පරම සත්‍ය ලෙස සැලකු පරපුරකි. එම නිසා විද්‍යාවේ නාමයෙන් කුමන දේ කිවූවද එය එසේම භාර ගැනීමට මෙම පරම්පරාව සැදී පැහැදී සිටින බැවින් මෙම දේශීය ආහාර සංස්කෘතිය වෙනස්කර ආනයනික ෆාම් තෙල්, සෝයා තෙල් වලට පුරුදු කිරීමට හැකි විය.

එහෙත් තෙල් ආහාර ආශ්‍රිත රෝග එන්න එන්නම වැඩි වුණා මිස අඩු වීමක් අදවන තෙක් දක්නට නැත. එම නිසා කොලෙස්ටරෝල්, හෘද රෝග, මධුමේහය සඳහා එම බටහිර වෛද්‍යවරුන්ම රෙකමදාරු කරන බෙහෙත් ආනයනය සඳහාද රුපියල් බිලියන ගණනින් වියදම් කරන්නට සිදු වී ඇත. එයින්ද වාසිය ඇත්තේ බටහිර ඖෂධ බෙහෙත් සමාගම්වලටය.

ඒ මදිවාට පොල් සිටුවීම වෙනුවට වැවිලි සමාගම් තරඟයට මෙන් ආර්ථික ඝාතක(ෆාම්) කටු පොල් සිටුවීමට දකුණු ලකේ අක්කර දහස් ගණනක් භාවිතා කර ඇත. ෆාම් තෙල්වල සෞඛ්‍යමය තත්ත්වය කෙසේ වෙතත් මෙම ශාඛයෙන් ගතහැකි වන්නේ ෆාම් තෙල් ගැනීම පමණි.

එහෙත් පොල් ගස අපට කප්රුපකි. එහි සියලු අංගයම ආර්ථික වටිනාකමක් ඇත. වතුර බොන පොල් කට්ටේ සිට පොල් ලීය, පොල් අත්ත, පොල් කෙන්ද, පොල් ලෙල්ල හා ගසේ අනෙක් සියලු කොටස් සිංහල ජීවන සංස්කෘතියත් සමඟ එකට බැඳුනකි. එහෙත් අපගේ බටහිර චින්තනයෙන් ඔද්දල් වූ ඉහළ වතු කළමණාකරුවන්ට හා කෘෂි විශේෂඥයන්ට (ෆාම්) කටු පොල් සිටුවීම උජාරුවට කරුණකි.

චිරාත් කාලයක් අප සංස්කෘතිය හා ආර්ථිකය සමඟ බැඳුනු පොල් හා පොල්තෙල් අපගෙන් ඈත් කිරීම පිටුපස සිටින්නේ විශාල ලෙස සෝයා තෙල් නිපදවන ඇමෙරිකානු සමාගම් වේ. අද වනවිටත් අප රට තුළ කෘෂිකර්ම දෙපාර්තමේන්තුව හා සෞඛ්‍ය දෙපාර්තමේන්තුව යන ආයතනවල සිටි හා සිටින බටහිර සමාගම්වල වෙළඳ ප්‍රචාරකයන් වූ ආචාර්ය මහාචාර්යවරු හා වෛද්‍යවරු මෙම අපරාධයට වගකිව යුතුය.

අපගේ ආහාරවල ගුණාගුණ අප දන්නේ ප්‍රත්‍යක්ෂයෙන් මිස විද්යානුකුල ඔප්පු කිරීමකින් නොවේ. එහෙත් ප්‍රත්‍යක්ෂයෙන් අවබෝධ කරගෙන සිටි ගුණාගුණ විද්‍යාත්මක පර්යේෂණ මගින් ද අස වනවිට ඔප්පුකර ඇත.පොල් හා පොල්තෙල් හි ගුණාගුණ අප දන්නේද ප්‍රත්‍යක්ෂ අවබෝධයෙනි. එම දැනුම පරම්පරාවෙන් පරම්පරාවට යාම නැවතීමට නම් අප පරම්පරාවෙන් පරම්පරාවට ගෙන එන දැනුම මොට කළ යුතුය. නැතහොත් එය විශ්වාස නොකරන පරම්පරාවක් සෑදිය යුතුය. අධිරාජ්‍යවාදීන් අපගේ ආහාර සංස්කෘතිය විනාශ කර ඔවුන්ගේ ආහාර මත යැපෙන සංස්කෘතියක් සෑදීමට පාදක කරගත්තේ බටහිර අධ්‍යාපනය හරහා දේශීය දැනුම සමච්චලයට ලක්කරන පරම්පරාවක් සාදමින්ය. මෙම කුමන්ත්‍රණයට හසු වී අප අතරින් ඈත් කිරීමට හැකි වූ ප්‍රධාන දේශීය ආහාරය පොල්තෙල් වේ. මෙය අපට මෙන්ම පිලිපීනයට හා ඉන්දුනීසියාවට ද එලෙසම බලපෑවේය.


මෙම බටහිර කපටි වෙළඳ න්‍යායන්වලට හසු වූ හෝ නොදැන බටහිර ඖෂධ සමාගම්වල තැරැව්කාරයන් බවට පත්වී ඇති සමහර හෘද රෝග විශේෂඥයන් අදටත් පොල්තෙල් හා පොල්කිරි අගුණ යයි පවසමින් ජනතාව නොමග යවයි.

එහෙත් අද වනවිට (දශකයක පමණ සිට) පොල්තෙල් යනු ලෝකයේ ඇති සෞඛ්‍යම අතින් ඉහළම තෙල් බවට බටහිර විද්‍යාවෙන්ම ඔප්පුකර ඇත. මෙතෙක් පොල්තෙල්වලට එරෙහිව තිබූ සියලුම චෝදනා සියල්ල බොරු බවත් අප විසින් ප්‍රත්‍යක්ෂයෙන් අවබෝධ කරගෙන සිටි දැනුම විද්‍යාත්මකවද අද වන විට ඔප්පුකර ඇත. අප විසින් භාවිතා කළ අත්තෙල් අද ඇමරිකානුවාම විසින් Vergin Coconut Oil ලෙස ඉතා අධික මිලක් ගෙවමින් ආහාරයක් මෙන්ම ඖෂධයක් ලෙසද භාවිතා කරයි.

බටහිර විද්‍යාව පෝෂණය වන්නේ වෙළඳපොළ ආර්ථිකයට සාපේක්ෂවය. විද්‍යාව මිනිසාගේ දියුණුව සඳහා යයි කියූවද එය ඇත්ත වශයෙන්ම ලාභය හා වෙළඳපොළ ආක්‍රමණය සඳහා ධනේෂ්වර ආර්ථිකය මගින් භාවිතා කරන උපාංගයක් හා මාධ්‍යයක් බවට පත්වී ඇත. බටහිර විද්‍යාඥයන්ගේ පැවැත්ම හා නඩත්තුව රඳා පැවතෙන්නේ බහුජාතික සමාගම්වල අරමුදල් මතය. එම නිසා සැමවිටම ඔවුන්ගේ සොයා ගැනීම් එම මුදල් පොම්ප කරන බහුජාතික සමාගම්වල අවශ්‍යතාවය සම්පූර්ණ කිරීමට සැදී පැහැදී සිටියි. එසේ නොවුනහොත් ඔවුන්ගේ පැවැත්ම අනතුරේය.

Monsanto, Carnegie වැනි බහුජාතික සමාගම් විසින් ඇමෙරිකානු කෘෂිකර්මය අත්පත්කර ගත් පසු ඔවුන්ගේ නිෂ්පාදන හා වෙළඳපොළ ව්‍යාප්ත කිරීම සඳහා නවීන තාක්ෂණය යොදා ගත්තේය. කර්මාන්තකරණය කළ හැකි බොහෝ බෝග ඔවුන්ගේ අණසකට යටත් වූ අතර සමහර බෝග හා ආහාර මානව වර්ගයාට අලුතෙන් හඳුන්වා දුන් ඒවා විය. (උදා:- Canola Oil) මෙම බෝග හා ආහාර ජනතාව තුළ ව්‍යාප්ත කිරීමට නූතන විද්‍යාවේ පිහිට පැතූ අතර පසුගිය දශක හය තුළ එය සමස්ත ඇමෙරිකානු ජනතාව ඊනියා විද්යානුකුල සොයා ගැනීම්වලින් රවටා ඔවුන්ගේ සිරකරුවන් බවට පත්කර ඇත. මෙහිදී ප්‍රධාන වශයෙන් මෙම සමාගම් නිපදවන Soya, Corn Yd rapseed (Canola) තෙල් ලෝකයේ සෞඛ්‍ය ආරක්‍ෂිත තෙල් බවත් ඒ වනවිටත් ඇමෙරිකානු ජනතාවගේ Fast Food සංස්කෘතිය තුළ තරබාරු බව, දියවැඩියාව හා හෘද රෝග සංඛ්‍යාව ඉහළ ගොස් ඇත්තේ සංතෘප්ත මේද අම්ල හා කොලෙස්ටරෝල් අඩංගු සාම්ප්‍රදායික ආහාර වූ බටර් හා කේජු කෑමෙන් බවට ඒත්තු ගැන්වීමට විවිධ පර්යේෂණ දත්ත පෙන්වාදෙන ලදී. එහෙත් බටහිර ජනතාවගෙන් එම ආහාර සංස්කෘතිය වැළඳගත් අප රට වැනි රටවලත් හෘද රෝගීන්ගේ ප්‍රමාණය එන්න එන්නම වැඩි වී ඇත.

එහෙත් බහුජාතික සමාගම් විසින් නිපදවන ආහාර සංස්කෘතියට අලුතෙන් එක්කළ තෙල් වර්ගවල ඇත්තේ අසංතෘප්ත මේද අම්ල වේ. එමෙන්ම Fast Food සංස්කෘතිය හා බහුජාතික සමාගම් විසින් නිපදවන සුදු සීනි හා සුදු තිරිඟු පිටිවල බලපෑමෙන් රෝගීන් බවට ඇමෙරිකානු ජනතාව පත් වී සිටියි. එම රෝගී තත්ත්වයන්ට ප්‍රධාන හේතුව මෙම සංතෘප්ත මේද අම්ල සහිත ආහාර නිසා බවට විවිධ පර්යේෂණ ප්‍රතිඵල මගින් පෙන්වා දුනි. එයට පිළිතුරු වශයෙන් ඔවුන්ගේ නව සොයා ගැනීම් වූ කර්මාන්තවලින් නිපදවන තෙල් වර්ගවල වැඩිපුර ඇත්තේ අසංතෘප්ත මේද අම්ල හෘද රෝගවලට ඉතා හිතකර බවත් ව්‍යාජ ලෙස පෙන්වමින් සමස්ත ලෝක ජනතාවම රවටන ලදී.

මෙම ලෝක පරිමාණ බොරුව පැතිරවීම සඳහා WHO, American British Dietetic Association, American Heart Association, British Heart Foundation, World Heart Federation, British National Health Service, FDA, European Food Safety Authority වැනි ආයතනවල වෛද්‍යවරුන් හා විද්‍යාඥයන් උපයෝගී කර ගත්තේය.

ඝර්ම කලාපීය රටවල මුහුදුකරයේ වැවෙන පොල් හා එයින් නිපදවන පොල්තෙල් එම රටවල සාම්ප්‍රදායික ආහාරයකි. මෙම තෙල්වලද සංතෘප්ත මේද අම්ල බහුලව ඇත. එම නිසා ඉහත සඳහන් විජිතයන්ගේ යටත්විජිත වන අප රටවල හෘද රෝග විශේෂඥයන්ද ගිරවුන් මෙන් ඉහත ආයතන මගින් ප්‍රචාරණය කරන දෙයම අප රටවල්වලද ප්‍රචාරය කර පොල් හා පොල්තෙල් වස විසට සමානකොට එය ජනතාවගෙන් ඈත් කිරීම අදටත් කරගෙන යයි.

එහෙත් මෙම (Cultural Brain Wash) සංස්කෘතියම මොළ හේදීම මගින් සමස්ත ලෝක ජනතාව දශක පහ හයක් තිස්සෙම ඒ තුළ සිර කරමින් බහුජාතික සමාගම් දියුණු වී ඇත. එමෙන්ම ඒ තුළින් අපගේ සාම්ප්‍රදායික පොල්තෙල්ද ජනතාවගෙන් ඈත් කිරීමට අපගේ දොස්තරලා උදව් විය. එහෙත් ඇමෙරිකානු ජනතාවගේ තත්ත්වය අද වන විට ඉතා බරපතල තත්ත්වයකට පත්වී ඇත.

ඇමෙරිකානු ජනතාවගෙන් මිලියන 65ක් හෘද රෝග වලින් පෙළේ.
ආසන්න වශයෙන් ඇමෙරිකානු ජනතාවගෙන් මිලියන 01ක් වසරකට හෘද රෝග වලින් මරණයට පත්වේ.
සෑම තත්පර 39කට එක් අයෙක් හෘද රෝග නිසා මරණයට පත්වේ.
ඇමෙරිකාවේ සෑම මරණ 1/3ක්ම හෘද රෝග හා සම්බන්ධ සිද්ධියක් වේ.
ඇමෙරිකානුවන්ගේ 1/3ක් හෘද රෝග සෑදීමට හැකි ස්ථුලතාවය අධික බර හා ඉන්සියුලින් ප්‍රතිවිරෝධී වේ.
මෙම තත්ත්වය තුළ 2008දී පමණක් ඇමෙරිකානු හෘද රෝගීන්ට ප්‍රතිකාර කිරීම සඳහා ඇමෙරිකානු ඩොලර් බිලියන 300ක් වියදම් කර ඇත.

WHO විසින් ගණන් බලා ඇති ආකාරයට සමස්ත ලෝකයේම බඩගින්න නැති කිරීමට වැයකළ යුත්තේ ඇමෙරිකානු ඩොලර් 195ක් පමණි.

මෙම වියදම් දෙස බලනවිට විද්‍යාවේ බොරුවෙන් වෙළඳපොළ උවමනාවන් සාක්ෂාත් කරගැනීම සඳහා පමණක් බහුජාතික සමාගම් කර ඇති අපරාධය කොතෙක්දැයි සිතාගත හැකිය.

පනහේ දශකයට පෙර ඇමෙරිකානුවන් සාම්ප්‍රදායිකව ආහාරයට ගත් තෙල් වර්ග වුයේ බටර්,කේජු, ඌරු තෙල් හා හරක් තෙල්ය. මේ සෑම දෙයකම ප්‍රධාන සංඝටක වූයේ සංතෘප්ත මේද අම්ලය.

එහෙත් ඇත්ත නම් පොල්තෙල්හි සංතෘප්ත මේද අම්ල ඇති හෙයින් ඉක්මනින් මුදු බවට පත් නොවේ. පොල්තෙල් නටන උෂ්ණත්වයේදී එළවළු තෙල් මෙන් ශරීරයට අහිතකර තෙල් වර්ග (Trans Fat) නිපදවීම සිදු නොවේ. එම නිසා වරක් භාවිතා කළ පොල්තෙල් දෙතුන්වර බැදීම ප්‍රශ්නයක් නොවේ. එළවළු තෙල් වශයෙන් හඳුන්වන Canola, Corn, Soybean, Peanut Oil, Sunflower, Safflower, Cotton Seed, Grape Seed රත් කිරීමේදී සෑදේ. මෙම මේදය ශරීරයට ඉතා අහිතකරය. එමෙන්ම මාගරින් යනු හයිඩ්‍රජනිකෘත එළවළු තෙල් වේ. මෙහි Omega 06 හා Trans Fat ඉතා බහුල වේ. එම නිසා මාගරින් යනු ශරීරයට අහාරයකට වඩා වස විස වන දෙයකි.

අප ශරීරයේ මේදයන්හි 97%ක් ඇත්තේ සංතෘප්ත මේද (Saturated Fat) හා ඒකීය අසංතෘප්ත මේද (Monounsaturated) වේ. ඉතිරි 3%ක් බහු අසංතෘප්ත මේදය (Polyunsaturated Fat) වේ. එයිනුත් භාගයක් Omega 03 වන හිතකර මේද වේ.

එම නිසා අපගේ ආහාරවලද අඩංගු විය යුත්තේ මෙයට සමාන ව්‍යුහයක් ඇති මේද වර්ග වේ. මෙහිදී පොල්තෙල් ඉතාමත් ගුණදායක වන්නේ එහි වැඩිපුර සංතෘප්ත මේද අම්ල ( Saturated Fatty Acid) ඇති බැවිනි. එසේම එය Omega 03 වලින් පෝෂිත වේ. ඒ හැරුණුවිට මව්කිරිවල අඩංගු Lauric අම්ලය ඇත්තේ පොල්තෙල්වල පමණි. එම නිසා පොල්තෙල් ඉතාම සෞඛ්‍යාරක්ෂිත වේ. Lauric අම්ලය යනු විෂබීජ නසන ශරීරයේ ප්‍රතිශක්තිය වඩවන ඉතා හිතකර රසායනිකයකි.

වෙනත් තෙල් වර්ග ආහාරයට ගැනීමේදී අසංතෘප්ත මේද අම්ල වැඩිපුර ශරීරයට ඇතුල් වේ. එහිදී එම මේද වර්ග උරා ගැනීමේදී මෙම අම්ල ශරීරයට අහිතකර ලෙස බලපායි.

ශරීරයේ තැන්පත් වන මේද අම්ලවල අසංතෘප්ත මේද අම්ලවලින් සෑදුනු මේද තැන්පත් වීම වැඩි වේ.
අසංතෘප්ත මේද අම්ල ශරීරය තුලදී හා රුධිර නාල බිත්තිවල සෛල ප්‍රදාහයට ලක් කරයි. එම නිසා එම ප්‍රදාහයට ලක්වූ සෛල මත තෙල් තැන්පත් වී රුධිර නාල අවහිර කිරීම සිදු කරයි.
මේවා හෘද රෝග වලට ප්‍රධාන මූලය වේ.

අනෙකුත් වෙළඳපොළේ ඇති “එළවළු තෙල්” ගණයේ තෙල් යනු රසායනිකව නිස්සාරණය කරන තෙල් වර්ග වේ. ඒවා අඹරා තෙල් ගැනීමට නොහැකි වර්ග වේ. තාක්ෂනය දියුණු වීමත් සමග 1900න් පසු පමණක් මිනිස් ආහාරයට ගත් මේද වර්ග වේ. 1900ට පෙර අඹරා තෙල්ගත හැකි පොල්තෙල්, ඔලිව් තෙල් වැනි තෙල් වර්ග හැරුනුකොට බොහෝ ජාතීන් ආහාරයට ගත්තේ ඌරු තෙල්, හරක් තෙල්, කුකුල් තෙල් වැනි සතුන්ගේ තෙල් හා බටර් හා දුන්තෙල්ය.

රසායන විද්‍යාවේ දියුණුවත් සමග අඹරා තෙල් ගත නොහැකි තෙල් සහිත ද්‍රව්‍යවලින් තෙල් ලබා ගැනීමට ඇමෙරිකානු බහුජාතික සමාගම් වෙනත් රසායනික ක්‍රමවේද සොයා ගත්තේය. ඒ අනුව Solvent Extraction (දියකර වෙන්කර ගැනීම ) නම් ක්‍රමයට අනුව Acetone නැමැති වාෂ්පශීලී හයිඩ්‍රෝකාබන් මගින් අඩංගු තෙල් දියකර වෙන්කර ගත් තෙල් නැවතත් ඇසිටෝන් ඉවත්කර තෙල් වෙන්කර ගැනීම ප්‍රචලිත ක්‍රමය මේ සඳහා බහුලව භාවිතා කරන ක්‍රමය වේ. Acetone යනු විෂ රසායනිකයකි. එමෙන්ම මෙම ක්‍රමයට තෙල් වෙන්කර ගැනීම බහුල වශයෙන් කරනුයේ සෝයා, කපු, මිදී ඇට, බඩඉරිඟු හා කැනෝලා නොහොත් රේප් සීඩ් සඳහාය. අද ඇමෙරිකාව තුළ නිපදවන තෙල් වර්ග වනුයේ සෝයා සහ කැනෝලා තෙල් වේ. කැනෝලා යනු රේප් සීඩ් ජාන ඉංජිනේරුමය වශයෙන් වෙනස් කළ කාර්මික බෝගයකි. මෙම විකෘති ජාන සහිත බෝගවලින් නිපදවන ආහාර සෞඛ්‍යයට ඉතා අහිතකර වේ.

මේ හැරුණුකොට කැනෝලා, සෝයා වැනි තෙල් ඉතා උකු හා දුර්ගන්ධ සහිත තෙල් වර්ග වේ. මේවායෙහි අසංතෘප්ත මේද අම්ල වැඩි හෙයින් ඉක්මනින් මුඩු බවට පත්වේ. මෙම මුඩු බව නැති කිරීමට කෘතීම ප්‍රතිඔක්සිකාරක (antioxidant) වන BHA,BHT – Butylated hydroxyl anisole හා Butylated hydroxyl toluene එක්කරනු ලැබේ. මෙම BHA හා BHT පිළිකාකාරක රසායනික බවට ඔප්පු කර ඇති රසායනික වේ. එමෙන්ම මෙම රසායනිකයන් අක්මාව හා වකුගඩුවලට හානිකරන අතර ශරීරයේ ප්‍රතිශක්තිය හීන කරයි. ඒ හැරුනුකොට වඳ බව, නිසරු බව වැඩි කිරීම මෙන්ම ළමුන්ගේ චර්යාමය වෙනස් කිරීම්ද ඇතිකළ හැකි භයානක රසායනිකයන් වේ.

ඉහත සඳහන් අමු එළවළු තෙල් ගණයේ තෙල් වෙළඳපොළට එන්නට පෙර ඒවා වෙළඳපොළට ඉදිරිපත් කළ හැකි ප්‍රසන්න තත්ත්වයට ගෙන ඒමට නොයෙකුත් රසායනික වෙනස්කිරීම්වලට හාජනය වේ.

Degumming (මැලියම් ඉවත් කිරීම) ® Dewaxing (ඉටි ඉවත් කිරීම) ® Caustic refining® Fractionation ® Winterization ® Blending ® Bleaching (විරංජනය කිරීම) හා Deodorization (ගඳ නැති කිරීම) යන රසායනික ක්‍රියාවලි රාශියකට භාජනය කර සාදන රසායනික ඵලයක් වේ.

බොහෝ එළවළු තෙල් ලෙස RDB Vegetable Oil ලෙස ලේබල් කර ඇත. RDB යනු Refine (පෙරා ගැනීම), Deodorized (ගඳ නැති කිරීම), Bleach (විරංජනය කිරීම) යන සැකසීම් යාන්ත්‍රණයේ කෙටි යෙදුම වේ.

එහෙත් පොල්තෙල් මෙසේ නොකර වේලපු පොල් (කොප්පරා) සෙක්කුවෙන් හෝ මෝලේ සිඳ ගන්නා තෙල් කෙලින්ම භාවිතයට ගත හැක. එයිනුත් ගෙදරදී පොල්කිරිවලින් සාදා ගන්නා තෙල් ලොව අනර්ඝතම ආහාරයට ගත හැකි තෙල් වර්ගය වේ.

එම නිසා සෞඛ්‍යමය ජීවිතයක් ලබා ගැනීමටත් එකසිය විස්සට දෙසිය විස්සක් ආවඩා ආයුබෝ කිව හැකි අප පැරැන්නන්ගේ ආහාර සංස්කෘතිය සොයා ගොස් ඒ සඳහා හද ගැසෙන්නට අදිටන් කළ යුතුයි. අපේම වූ ආර්ථිකයකට වින කටිමින් අප අපෙන් වෙන් කරන බටහිර වෙළඳපොළ කෙටි ආහාර මත හා නොදන්නා අහාර මත විශ්වාසය නොතැබිය යුතුයි. විශේෂයෙන් වෙළඳපොලේ ඇති පිරිසිදු දේශීය පොල්තෙල් හැරුනුකොට කිසිම තෙල් වර්ගයක් ආහාරයට නොගත යුතුයි. බුදුරදුන් කී ලෙස ජීවත්වන පරිසරයේ නිපදවන ආහාරයට ගත හැකි දේ පමණක් ප්‍රත්‍ය වේ යන්න ගුරු කොට අපේ ආහාර කරා නැවත පියනැගීම ඉතාම සුදුසුයි. එහිදී කප්රුක මගින් ලබාදෙන පොල්කිරි හා පොල්තෙල් ආහාරයට ගනිමින් නීරෝගී ලාංකිකයෙකු බවට පත්විය හැකියි. පොල්තෙල්වල ගුණ නොදන්නා අයට ඒ ගැන කියාදිය හැකියි.


උපුටා ගැනීම;
SHEHAN_GIWANTHA
http://www.elakiri.com/forum/showthread.php?t=1646574

READER COMMENTS



Recent Posts Widget
----------------------------------------------------------------------------------------------------------
VISITORS ON විද්‍යා ගවේෂණ NOW!


Tuesday, 1 March 2016

Sony World Photography Awards 2016: අවසාන වටයට තේරුණු ඡායාරූප කිහිපයක්

ලොව විශාලතම ඡායාරූප තරගාවලිය ලෙස සැළකෙන සෝනි ලෝක ඡායාරූප සමිමාන උළෙල සඳහා මේ වසරේදී ඉදිරිපත් කරන ලද ඡායාරූප අතරින් අවසන් වටය සඳහා තෝරාගත් ඡායාරූප කිහිපයක් මාධ්‍ය වෙත මුදාහැර තිබේ.

ඡායාරූප තරගාවලිය සඳහා මේ වසරේදී ලැබී ඇති ඡායාරූප ගණන 230,103ක් වන අතර එය මෙතෙක් වාර්තා වී ඇති ඉහළම ඡායාරූප ගණන බව පැවසේ.

වෘත්තිමය,යොවුන් සහ විවෘත යන කාණ්ඩ 3 යටතේ පැවැත්වෙන මෙම තරගාවලිය සඳහා ලොව පුරා රටවල් 60කින් ඡායාරූප ශිල්පීන් 270ක් සහභාගී වී තිබේ.

තරගාවලියේ ජයග්‍රාහකයින් අප්‍රියෙල් මස 21 වනදා ප්‍රකාශයට පත් කිරීමට නියමිත වන අතර අදාළ ඡායාරූප අප්‍රියෙල් මස 22 වනදා සිට මැයි මස 8 වනදා දක්වා ලන්ඩන් නුවර සමර්සෙට් හවුස්හිදී ප්‍රදර්ශනය කිරීමට නියමිත වේ.

පහත දැක්වෙන්නේ ඡායාරූප තරගාවලියේ අවසන් වටය සඳහා තෝරාගත් ඡායාරූප අතරින් කිහිපයකි.


































Recent Posts Widget

------------------------------------------------------------------------------------------------------
Related Posts Plugin for WordPress, Blogger...