Related Posts Plugin for WordPress, Blogger...

Tuesday, 22 May 2018

GOOGLE : බෝ පැලේ වගේ හිටිය ගූගල් දැන් නරක් වෙලා


"Don't Be Evil  - දුෂ්ඨ වෙන්න එපා"

ඩෝන්ට් බී ඊවිල් හෙවත් දුෂ්ඨ නොවිය යුතුයි කියන ආදර්ශ පාඨය ගූගල් සමාගමේ අරම්භයේ ඉඳලාම එහි ජානවලට කාවැදිලා තියෙන එකක්. ගූගල් සමාගම  ආචාරධර්ම හා ව්‍යාපාරික හැසිරීම් ප්‍රකාශය (code of conduct) පටන් ගත්තේම මේ වාක්‍යයෙන්. 

ගූගල් සමාගම 1998දී ආරම්භවෙලා අවුරුදු දෙකකින්, ඒ කියන්නේ වසර 2000දී තමයි "ඩෝන්ට් බී ඊවිල්" ආදර්ශ පාඨය මුල්කරගත් ආචාරධර්ම හා ව්‍යාපාරික හැසිරීම් ප්‍රකාශය නිර්මාණය කරගත්තේ. ගූගල් නිර්මාතෲවරුන් වන ලැරී පේජ් සහ සර්ගෙයි බ්‍රින් යන දෙදෙනාම, ගූගල් සමාගම සෑම කටයුත්තකදීම මේ ආදර්ශ පාඨය හිස් මුදුනින් තබාගෙන ක්‍රියාත්මක වන බවට පොරොන්දුවක් දී තිබුණා. මේ පොරොන්දුව ඔවුන් නිකුත්කල පලමු "කොටස් හිමියන් ඇමතුමේ - Letter to Shareholders" පැහැදිලිව දක්වලා තියෙනවා.


එහෙත් ගිස්මෝඩෝ තාක්ෂණික ප්‍රවෘත්ති වෙබ් අඩවිය සඳහන් කරන අන්දමට 2018 අප්‍රේල් මාසයේදී යාවත්කාලීන කරන ලද  ආචාරධර්ම හා ව්‍යාපාරික හැසිරීම් ප්‍රකාශයේ මේ "ඩෝන්ට් බී ඊවිල්" ප්‍රතිපත්තිය ඉවත්කරලා. අලුත් ප්‍රකාශයේ ඩෝන්ට් බී ඊවිල් කියලා සඳහන් කරලා තියෙන්නේ අන්තිම වාක්‍යයේ විතරයි.

ගූගල් දැන් දුෂ්ඨ වෙමින් යනවාද?

බොහෝ විචාරකයින් පවසන අන්දමට උත්තරය "ඔව්". එය තහවුරු කරන්නට ඔවුන් ප්‍රභල සාක්ෂි තුනක් ඉදිරිපත් කරනවා.

Project Maven

ඇමරිකන් ඩ්‍රෝන හා ඔත්තුබලන චන්ද්‍රිකා මගින් නිරන්තරයන් ජනනය වන ටෙරාබයිට් ලක්ෂ ගණනක වීඩියෝ හා චායාරූප නිසිපරිදි අධ්‍යයනය කර ඒවායෙන් ලබාගත හැකි බුද්ධි තොරතුරු උකහාගෙන ආරක්ෂක අංශවලට ලබාදීම ඉතා අපහසු කටයුත්තක්. මේ සඳහා ගූගල් සමාගම  (හා වෙනත් සමාගම්) නිර්මාණය කොට ඇති කෘත්‍රිම බුද්ධි තාක්ෂණය යොදාගැනීමේ ව්‍යාපෘතිය ප්‍රොජක් මෙවන් ලෙස හඳුන්වනවා.  ගූගල් සමාගම ඇමරිකන් ආරක්ෂක අංශ සමග ඉත සමීපව ක්‍රියාත්මක වීම මේ වනවිට සමහර ගූගල් සේවක-සේවිකාවන්ගේ විරෝධයට බඳුන්වී තිබෙනවා.

Deceptive AI

පසුගියදා පැවැත්වුනු ගූගල් I/O තාක්ෂණික සම්මන්ත්‍රණයේදී සුන්දර් පිචාර්යි ගූගල් ඇසිස්ටන්ට් කෘත්‍රිම බුද්ධි සහයකයාට ලබාදුන් ඩූප්ලෙක්ස් නම් අපූරු පහසුකමක් හඳුන්වාදුන්නා. ඩූප්ලෙක්ස් යනු, පුද්ගලයෙකු සමග දෙබසක් ගෙනයා හැකි, එමගින්, ආසන වෙන්කරවා ගැනීම්, පාරිභෝගික සේවා ලබාගැනීම් වැනි කටයුතු සඳහා ගූගල් ඇසිස්ටන්ට් යොදාගත හැකි තාක්ෂණයක්. I/O සම්මන්ත්‍රණයේදී සිදුකල නිරූපණයකදී (demonstration) ඩූප්ලෙක් තාක්ෂණයෙන් බලගැන්වුනු ගූගල් ඇසිස්ටන්ට් සහයකයා අවන්හලක් අමතා එහි සේවකයුකු සමග සාකච්ඡාකොට කෑමවේලක් සඳහා අසුන් වෙන් කරගන්නවා. මෙහිදී එම අවන්හලේ සේවකයා සිතාගෙන සිටියේ තමන් මේ කතා කරන්නේ සැබෑ පුද්ගලයෙකු සමග කියායි.

මේ විශාල් රැවටිල්ලක් බව සඳහන් කරන විවේචකයින්, එම ගූගල් ඇසිස්ටන් කෘත්‍රිම බුද්ධි සහයකයා තමන්, කෘත්‍රිම බුද්ධි සහයකයෙකු බවත්, තම හාම්පුතා වෙනුව අමතන බවත් ප්‍රකාශකල යුතුව තිබුණා යයි ඔවුන් පවසනවා. මෙවැනි රැවටිලි කාර හැසිරීම් විශාල ආචාරධර්ම ගැටලු (ethical issues) ඇතිකරන බවයි ඔවුන් පවසන්නේ. ගූගල් සමාගම මෙවැනිදෑට සංවේදී නොවීම, ඔවුන් "දුෂ්ඨ නොවී සිටීමේ" ප්‍රතිපත්තියෙන් ඉවත්ව යන බවට කදිම සාධකයක් බවයි කි‍යැවෙන්නේ.

Selfish Ledger

ගූගල් සමාගම ලොවපුරා අන්තර්ජාල භාවිතාකරන් බිලියන ගණනකගෙන් අතිවිශාල දත්ත ප්‍රමාණයක් එකතුකර ගන්නවා. සෑම් ගූගල් සෙවුමකින්ම, සෑම ජීමේල් පණිවුඩයකින්ම, සෑම යූටියුබ් වීඩියෝ නැරඹුමකින්ම ඔවුන් එකතුකර ගන්නා දත්ත, දැන්වීම් සමාගම් වලට විකුණා ඔවුන්ගේ ඉලක්ක දැන්වීම් වලින් ආදායම් උපදවනවා.

සෙල්ෆිෂ් ලෙජර් කියන්නේ මින් එහාට ගිහින් පාරිභෝගිකයින්ගේ හැසිරීම් රටා හඳුනාගැනීමට පමණක් නොව එය තමන්ට රුචි ආකාරයට වෙනස් කරන්නට හැකි කල්පිත තාක්ෂණයක්. මෙය ක්‍රියාත්මක වන අයුරු දැක්වෙන විස්තරාතමක වීඩියෝවක් ගූගල් සමාගමේ selfish ledger පර්යේෂණ කණ්ඩායම සමාගම ඇතුලේ පරිහරණය සඳහා නිකුත් කරලා තිබුණා. මේ වීඩියෝ වේ කොපියක් මාධ්ය ආයතනයකට ලීක් වීමත් සමගයි මේ තොරතුරු හෙලිවුනේ.

ගූගල් වැනි බලසම්පන්න සමාගම් මෙලෙස සිය භාවිතා කරන්නන් බිලියන ගණනකගේ පෞද්ගලික රුචි අරුචිකම් හඳුනාගැනීමට මෙන්ම ඒවා තමන්ට වාසි සහගත ලෙස සූක්ෂ්මව වෙනස් කිරීමට තැත් කිරීම ඉතාම භයානක බවයි විවේචකයින් පවසන්නේ.





__________________________________________________________________________
Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Tuesday, 15 May 2018

TECH INDUSTRY : Google I/O 2018 වාර්ෂික තාක්ෂණික සම්මන්ත්‍රණය


Google I/O ලෙසින් හැඳින්වෙන ගූගල් සමාගමේ වාර්ෂික තාක්ෂණික සම්මන්ත්‍රණය පසුගියදා කැලිෆෝනියාවේ Shoreline Amphitheater එලිමහන් රංගපීඨයේදී පැවැත්වුනා. මෙය ශ්‍රී ලංකාවද ඇතුලුව ලෝකයේ රටවල් ගණනාවකට සජීවීව විකාෂණය කරන්නට ගූගල් සමාගම කටයුතුකොට තිබුණා.

පසුගිය වසරේ මෙන්ම මෙවරත් I/O සම්මන්ත්‍රණයේ ප්‍රධාන දේශණය (Keynote Speech) සිදුකලේ ගූගල් සමාගමේ ප්‍රධාන විධායක නිළධාරී සුන්දර් පිචායි විසිනුයි. ඊලඟ වසර සඳහා ගූගල් සමාගමේ ප්‍රධාන ප්‍රයත්න මෙන්ම පසුගිය වසරේ සිට මේ දක්වා ලබා ඇති ප්‍රගතියද විස්තර කල සුන්දර්, මින් ඉදිරි වසර කිහිපය, ගූගල් සමාගම කෘත්‍රිම බුද්ධි තාක්ෂණයෙන් කුළු ගැන්වෙන, එම තාක්ෂණය මගින් භාවිතාකරන්නන්ගේ ජීවිතය වඩාත් පහසුකල හැකි තාක්ෂණයන් කෙරෙහි විශාල අවධානයක් යොමු කරන බව සඳහන් කලා. ගූගල් සමාගමේ කෘත්‍රිම බුද්ධි තාක්ෂණ වෑයමේ අලුත්ම නිර්මාණ හා වැඩිදියුණු කිරීම් කිහිපයක් හඳුන්වා දීමට සුන්දර් හා ඔහුට පසුව දේශන සිදුකල ගූගල් සමාගමේ විවිධ ප්‍රධානීන් ක්‍රියාකලා.


Google Assistant

ගූගල් ඇසිස්ටන්ට් ලෙස හැඳින්වෙන කෘත්‍රිම බුද්ධි සහයක යන්ත්‍ර දැන් වෙළඳ පොලේ තිබෙනවා. Google Assistant කෘත්‍රිම බුද්ධි සහයකයා ඔබගේ ඇන්ඩ්‍රොයිඩ් ෆෝනයේ ඇප් එකක් ලෙසින් මෙන්ම, නිවසේ අන්තර්ජාලයට සම්බන්ධ වන වෙනම උපාංගයක් ලෙසින්ද මිලදීගත හැකියි.

මේවා ඇමසන් ඇලෙක්සා හා ඇපල් හෝම්පොඩ් කෘත්‍රිම බුද්ධි සහයක යන්ත්‍ර සමග දැඩි තරඟයකට මුහුණදී සිටිනවා. ඒ නිසා මේ යන්ත්‍රවල හැකියාවන් වඩාත් තියුණු කරන්නට ගූගල් කටයුතු කර තිබෙනවා.

උදාහරණයක් ලෙස පෙරදී ගූගල් ඇසිස්ටන්ට් යන්ත්‍රය අමතන සෑම අවස්ථාවකම "Hey Google!" යන වදන පවසා පැනය ඉදිරිපත් කල යුතුයව තිබුනා. ඒ, යන්ත්‍රයට අමතන්නේ තමාව යයි වටහා ගැනීමටයි. එහෙත් දැන් එක් වතාවක් එසේ ඇමතීමෙන් පසු, ඉදිරියට අසන පැන සඳහා "Hey Google" ලෙසින් ඇමතීම සිදුකල යුතු නෑ. ඒ සඳහා ගූගල් ඇසිස්ටන්ට් යන්ත්‍රයට ජවය ලබාදෙන "Google Knowledge Graph" කෘත්‍රිම බුද්ධි විශ්වකෝශය තවත් දියුණු කල බව සුන්දර් පිචායි පවසා සිටියා.


Google Duplex


ගූගල් ඩූප්ලෙක්ස් තාක්ෂණය ගූගල් කෘත්‍රිම බුද්ධි සහයක වැඩසටහනේ තවත් විප්ලවීය තාක්ෂණයක් ලෙසින් එලිදැක්වුනා. ගූගල් ඩූප්ලෙක්ස් තාක්ෂණයෙන් ගූගල් ඇසිස්ටන්ට් සහයකයාට ඔබ සමග සාමාන්‍ය පුද්ගලයෙකු මෙන් සංවාදයේ යෙදෙන්නට පුලුවන් මෙන්ම ඔබ වෙනුවෙන් දුරකථන ඇමතුම් ගෙන, ඔබ සඳහා අවන්හල්වල අසුන් වෙන් කිරීම, ඔබගේ කොණ්ඩය කැපීමට, නැතිනම් රූපලාවන්‍ය ශිල්පිණිය සමග  වෙලාවක් වෙන්කිරීමටත් ගූගල් ඩූප්ලෙක්ස් තාක්ෂණය හරහා ගූගල් ඇසිස්ටන්ට් සහයකයාට හැකිබව මේ සම්මන්ත්‍රණයේදී ආදර්ශණය කොට (demonstrate) පෙන්වනු ලැබුවා.

Tensor Processor Unit 3.0


ටෙන්සර් ප්‍රොසෙසර් යුනිට් යනු ගූගල් සමාගම මගින් කෘත්‍රිම බුද්ධි යන්ත්‍රවල ප්‍රධාන ප්‍රොසෙසර් පද්ධති ගොඩනැගීම සඳහාම නිර්මාණය කල බලසම්පන්න ක්ෂුද්‍ර පරිපථයක්. මේ පරිපථ මාලාව 2016දී එලිදක්වන ලද අතර එවක ගූගල් සමාගම ප්‍රකාශ කලේ ටෙන්සර් ප්‍රොසෙසර් පරිපථ වසරක කාලයක් අත්හදා බැලීමෙන් පසු ඒ එලිදැක්වීම සිදුකල බවයි.

ඉතා වේගයෙන් කෘත්‍රිම බුද්ධි පරිගණක නිර්මාණය කෙරෙන ආකාරයේ ප්‍රොසෙසර් පද්ධති ගොඩනැගීම සඳහාම නිර්මාණය කොට ඇති ටෙන්සර් ප්‍රොසෙසර් පිටස්තර සමාගම් වලට අලෙවි කරන්නේ නෑ. ඒවා ගූගල් සමාගමේ අතිවිශාල කෘත්‍රිම බුද්ධි පද්ධති ක්‍රියාත්මක වන පරිගණක නිර්මාණය කිරීම සඳහා පමණක් යොදා ගන්නවා.

මේ සම්මන්ත්‍රණයේදී සුන්දර්, ගූගල් ටෙන්සර් ප්‍රොසසර් වල අලුත්ම  මාදිලිය වන Tensor Processor Unit  3.0 එලි දැක්වූවා. මේ ප්‍රොසෙසර්, මීට පෙර භාවිතාකල ටෙන්සර් ප්‍රොසෙසර් වලට වඩා දෙගුණයක් වේගවත් බවයි ගූගල් පවසන්නේ.





__________________________________________________________________________
Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________
Related Posts Plugin for WordPress, Blogger...