Related Posts Plugin for WordPress, Blogger...

Sunday, 30 June 2013

අඩුමිල චන්ද්‍රිකා රැසකින් චන්ද්‍රිකා තාක්ශණයේ නව විප්ලවයක් කිරීමට සැරසෙන ස්කයිබොක්ස් චන්ද්‍රිකා සමාගම

සැතපුම් 500ක් ඉහල අහසේ සිට පොලොව දෙස බලන්නෙකුට දැනගත හැක්කේ මොනවාද? ගූගල් අර්ත් සේවාව මගින් ලැබෙන චන්ද්‍රිකා ඡායාරූප දෙස බලන අපට නම් එතරම් දෙයක් පෙනෙන්නේ නැත. ගිනිපෙට්ටි වැනි ගොඩනැගිලි, ඉඳහිට පෙනෙන වාහන, ගුවන්තොටුපොලවල නවතා ඇති ගුවන්යානා පෙනෙතත් වැඩි යමක් තේරුම් ගැනීමේ හැකියාවක් අපගේ නුපුහුණු දෑස් වලට නොහැකිය.

එහෙත් චන්ද්‍රිකා හා ගුවන් ඡායාරූප (ඩ්‍රෝන ඡායාරූප හා වීඩියෝද ඇතුලුව ) අධ්‍යයනය සඳහා විශේෂයෙන් පුහුණුකල දෑස් වලට මෙම ඡායාරූප බොහෝදෑ  හෙලි කරයි.

උදාහරණයක් ලෙස පාකිස්තානයේ අබොටාබාද්හි තිබූ, උස තාප්පයකින් වට වුනු තෙමහල් නිවසේ වෙසෙන කාන්තාවන් ගණන සී.අයි.ඒ චන්ද්‍රිකා ඡායාරූප විශ්ලේෂකයින් නිර්ණය කරගත්තේ එම නිවසෙන් පිටවන කීදෙනෙකු නිවස වටා ඇද තිබූ රෙදිවැල් වෙත යනවාද යන්න අධ්‍යයනය කිරීමෙන්. පාකිස්තානු/ඇෆ්ඝන් පිරිමින් කිසිවිටකත් රෙදි වේලීම වැනි කටයුතුවල නිරත නොවන බව පාකිස්තාන හා ඇෆ්ඝන් දිවිපෙවෙත් ගැඹුරින් හදාරාතිබූ සී.අයි.ඒ විශේෂඥයින් දැනසිටියා. 

එපමණක් නොව එම කාන්තාවන් හා පිරිමින්ගෙන් කීදෙනෙකු තරුණද, වයස්ගතද යන්න තෝරා ගැනීමට ඔවුන් භාවිතා කලේ එම පුද්ගලයින්ගේ ඇවිදීමේ වේගය අධ්‍යයනය කිරීමයි. එම නිවස අවට ඇති ගොඩනැගිලි වල විශාලත්වය, සිතියම් වල පරිමාණය ආදී දත්ත භාවිතයෙන් නිවසවටා ඇති මිදුලේ විශාලත්වය ඉතා නිවැරදිව මැනගත් ඔවුන් ඒ අනුව මිදුලේ එක් ස්ථානයක සිට තවත් ස්ථානයකට ඇති දුර මැනගෙන එම දුර ඇවිදීමට එක් එක් පුද්ගලයාට ගතවන කාලය අනුව ඔවුන්ගේ වයස් අනුමාණ වශයෙන් නිර්ණය කරගෙන තිබෙනවා.

චන්ද්‍රිකා ඡායාරූප මගින් මිලිටරිමය නොවන භාවිතාවන් (non-military uses) රැසක්ද තිබෙනවා. අප සැම දන්නා කාළගුණ අනාවැකි සඳහා උපයෝගී කරගැනීම මින් එකක්. මීට අමතරව;

* කෘෂිකර්මාණ්තය
* වන සංරක්ශනය 
* භූගෝල විද්‍යා අධ්‍යයනයන්
* පතල් කර්මාණ්තය
* නගර සැළසුම්කරණය
* මහාමාර්ග සැළසුම් කරණය
* ස්වාභාවික හා හදිසි ආපදා වලට ප්‍රතිචාර දැක්වීමේ කටයුතු සඳහා 

වැනි භාවිතාවන් රාශියක් සඳහා චන්ද්‍රිකා ඡායාරූප උපයෝගී කරගන්නවා. එහෙත් මෙහිදී සිවිල් පර්යේෂකයින් හට ඇතිවන ප්‍රධාන ගැටළුව නම් සිවිල් පර්යේෂකයින් හට අධි විබේධන චන්ද්‍රිකා ඡායාරූප ගන්නා මිලිටරි චන්ද්‍රිකා ඡායාරූප ලබාගැනීමට හැකියාවක් නොලැබීමයි. මේ නිසා විවිධ පර්යේෂණ කටයුතු සඳහා යාවත්කාලීන ඡායාරූප ලබාගැනීමේ විශාල ගැටළුවක් සිවිල් පර්යේෂකයින් හා මිලිටරිමය නොවන රාජ්‍ය ආයතන වලට තිබෙනවා.

ඡායාරූප ලබාදෙන සිවිල් චන්ද්‍රිකා හිඟකම

ඕනෑම මොහොතක පෘථිවිය වටා චන්ද්‍රිකා 1000ක් පමණ ගමන් කරතත් මින් ඡායාරූප ලබාගෙන එවිය හැකි චන්ද්‍රිකා ඇත්තේ 100ක් පමණයි. එම චන්ද්‍රිකා 100 අතරිනුත් අධිවිබේධන ඡායාරූප ලබාගෙන එවිය හැක්කේ චන්ද්‍රිකා 12කින් පමණක් බව පැවසුවහොත් ඔබ පුදුම වනු ඇත. මෙම චන්ද්‍රිකා 12න් 3ක් අමෙරිකානු හා යුරෝපීය රාජ්‍ය ආයතන සඳහා පමණක් සේවා සපයන අතර චන්ද්‍රිකා 9ක ඡායාරූපකරණ සේවා, වානිජමය-චන්ද්‍රිකා ඡායාරූප සේවාවන් (commercial space-based imaging sevices) හරහා පර්යේශකයින් හට මිළදීගත හැක.

එපමණක් නොව මෙම චන්ද්‍රිකා ඡායාරූප සඳහා 80%ක ඒකාධිකාරයක් අමෙරිකානු රජයට ඇත්තේ එම චන්ද්‍රිකා විශාල ප්‍රමාණයක් අමෙරිකානු රජය හෝ සමාගම් සතු බැවිනි. ඕනෑම මොහොතක චන්ද්‍රිකා ඡායාරූප ලබාගැනීමේ ප්‍රමුඛතාවය අමෙරිකානු රජයේ ආයතන වලට ලැබෙන අතර වාණිජ ගැනුම් කරුවන්ගේ අවශ්‍යතා දෙවැනි තැනට වැටේ. ඒ අනුව වානිජමය ගැනුකරුවෙකු, සිවිල් පර්යේෂන ආයතනයක් හෝ වෙනත් රටක ගැණුම් කරුවෙකුට, පෘථිවියේ නිස්චිත ප්‍රදේශයක ඡායාරූප ඇණවුම් කිරීම හා එය ලැබීම අතර කාළය සති කිහිපයක සිට මාස ගණනාවකට ප්‍රමාදවිය හැකිය.

වාණිජ චන්ද්‍රිකා ඡායාරුප වෙළඳපොලේ රාජ්‍ය ඒකාධිකාරිය අවසන් කිරීමට සැරසෙන SkyBox චන්ද්‍රිකා සමාගම

2009 වසරේදී ආරම්භවුනු ස්කයිබොක්ස් සමාගම අමෙරිකාවේ කීර්තිමත් විශ්වවිද්‍යාලයක් වන ස්ටැන්ෆර්ඩ් විශ්වවිද්‍යාලයේ ආදි ශිෂ්‍යයින් තිදෙනෙකු විසින් ආරම්භ කරන ලද සමාගමක්.

සැටන්ෆර්ඩ් හි පස්චාත්-උපාධි ශිෂ්‍යයින් ලෙසින් සිටියදී හඳුනාගත් මොවුන්ගේ මුල්ම අභ්‍යවකාශ ව්‍යාපෘතිය වූයේ ගූගල් සමාගම විසින් ලූනාර් එක්ස්-ප්‍රයිස් ලෙස නම් කොට ඇති, සඳ වෙත යානාවක් යවා, සඳ මතුපිටට කුඩා රොබෝ රෝවරයක් ගොඩබස්වා ඡායාරූප ආපසු ගෙන්වා ගැනීමේ අභියෝගාත්මක තරඟයයි. ගූගල් සමාගමේ කොන්දේසි අනුව මේ සඳහා යොදාගන්නා යානාව දැනට ඇති වාණිජ තාක්ශණයන් පමණක් යොදාගෙන, සම්පූර්ණයෙන්ම පෞද්ගලික ප්‍රාග්ධනය හා ශ්‍රමය යොදාගෙන නිර්මාණය කලයුතු වනවා.

ස්කයිබොක්ස් සමාගමේ විද්‍යාගාරයේ නිමැවෙන SkySat-2 චන්ද්‍රිකාව
ඩෑන් බර්කෙන්ස්ටෝක්, ජෝන් ෆෙන්වික් හා ජූලියන් මෑන් යන මේ තිදෙනා ලූනාර් එක්ස්-ප්‍රයිස් අභියෝගය සඳහා ප්‍රායෝගික සැළසුමක් ඉදිරිපත් කොට ඒ සඳහා ආයෝජකයින්ද සොයාගැනීමට සමත්වූවත් 2008 වසරේදී අමෙරිකාවේ සිදුවුනු විශාල මූල්‍ය අර්බුදය හේතුකොට බැංකු හා කොටස් වෙළඳපොල කඩාවැටීම හමුවේ ඔහුගේ ආයෝජකයින් ව්‍යාපෘතියෙන් ඉවත්වීමෙන් එය අසාර්ථක වූවා.

එහෙත්, අඩු මුදලකට, වෙලඳපොලේ පහසුවෙන් ලබාගත හැකි තාක්ශණික උපකරණ භාවිතයෙන් චන්ද්‍රිකාවක් නිපදවීමේ අදහස ඔවුන් තුල පැළපදියම් වී තිබුණු අතර, 2003 වසරේදී කියුබ්-සැට් නම් සෙන්ටිමීටර් 10ක ඝණකයක් ලෙස නිර්මාණය කොට තිබූ කුඩා ක්ශුද්‍ර චන්ද්‍රිකාව (micro-satellite) වෙනත් අභ්‍යවකාශ ගමණකට සූදානම් කොට තිබූ රුසියානු රොකට්ටුවක තිබූ අමතර ඉඩ තුල අසුරා අභ්‍යවකාශයට සාර්ථවක යැවීමෙන්, ඉතා අඩු මුදලකට කුඩා චන්ද්‍රිකා නිර්මාණය කොට, සාමාන්‍ය අභ්‍යවකාශ ගුවන්ගත කිරීම් කරන රොකට්ටුවල ඇති අමතර ඉඩ අඩු මුදලකට මිළදීගෙන සාමාන්‍ය චන්ද්‍රිකාවක් ගුවන්ගත කරන්නට යන වියදමෙන් 1/100ක් පමණ බරපැණකින් ප්‍රායෝගික ප්‍රයෝජන ගත හැකි චන්ද්‍රිකා ගුවන්ගත කල හැකි බව තහවුරු වූවා.

කියුබ්සැට් චන්ද්‍රිකාව සාර්ථක වීමෙන් පසු ඩෑන් බර්කෙන්ස්ටෝක්, ජෝන් ෆෙන්වික් හා ජූලියන් මෑන් මිතුරන් තිදෙනා නැවත වතාවක් සිය සැලසුම් හමස් පෙට්ටියෙන් එලියට ගත් අතර කියුබ්සැට් චන්ද්‍රිකාවට වඩා තරමක් විශාල, එහෙත් දැනට ඇති පරිගණක හා දෘෂ්‍ය තාක්ශණයන් සම්මිශ්‍රණයෙන් පෘථිවියේ අධිවිබේධන ඡායාරූප හා HD විබේධනයේ සජීවී වීඩියෝ ලබාගත හැකි චන්ද්‍රිකාවක් නිර්මාණය කිරීම ඇරඹුනා. මොවුන් තිදෙනාගෙන් ජෝන් ෆෙන්වික් අමෙරිකාවේ ඔත්තු බලන චන්ද්‍රිකා පාළණය කරන "National Reconnaissance Office - NRO" ආයතනයේ තනතුරක් දැරූ අතර ඔහු සතුව චන්ද්‍රිකා නිර්මාණය පිලිබඳ අතිවිශාල දැනුමක් තිබුණා. එම දැනුමින් ස්කයි-බොක්ස් චන්ද්‍රිකා සැළසුම් වඩාත් දියුණු වූ බව පැවසෙනවා.

මොවුන් නිර්මාණය කල SkySat-1 හා SkySat-2 චන්ද්‍රිකා මේ වසර අවසානයේ රුසියානු ද්නීපර් රොකට්ටුවක් ආධාරයෙන් කක්ශගත කිරීමට නියමිත අතර වසර කිහිපයකදී මෙය චන්ද්‍රිකා 24ක දැවැන්ත ජාලයක් දක්වා වර්ධනය කිරීමට බලාපොරොත්තු වනවා. මෙම චන්ද්‍රිකා ජාලය මගින් ලොව සෑම අඟලක්ම ආවරණය කලහැකි අතර ඕනෑම ස්ථානයක අධිවිබේධන චායාරූප හා HD වීඩියෝ දිනකට දෙවරක් බැගින් ගැනුම් කරුවනට ලබාදීමට බලාපොරොත්තුවනවා.









Thursday, 27 June 2013

Google Glass වලට වඩා මිලෙන් අඩු, කඩවසම් පෙනුමකින් යුතු Recon Jet virtual reality sunglasses


ගූගල් සමාගම මගින් වැඩිදියුණු කරමින් තිබෙන, තවමත් වෙළඳපොලට නිකුත් නොකෙරුණු ගූගල් ග්ලාසස් නම්, කණ්නාඩියක් මෙන් පැළඳගෙන යා හැකි, ඇන්ඩ්‍රොයිඩ් මෙහෙයුම් පද්ධතියක් මගින් ක්‍රියාත්මක වන ස්මාර්ට්-ෆෝනයක ඇති සියලු හැකියාවන් ඇති පැළඳිය හැකි පරිගණකය (wearable computer) තාක්ශණික ලොවේ පුවත් මවන්නට සමත්වී තිබෙනවා. අලුත් ගැජට් වලට ආසා කරන බටහිර වැසියන් මෙන්ම දියුණු ආසියාතික රටවල ගැජට් ලෝලීන්ද ගූගල් ග්ලාසස් වෙළඳපොලට නිකුත් වනතෙක් පුළපුළා බලා සිටිනවා.

ගූගල් ග්ලාස් උපකරණය එනතෙක් බලාසිටින්නන්ට අස්වැසිල්ලක් වෙමින්, ගූගල් ග්ලාසස් හා සමාන හැකියාවන් ඇති, එහෙත් මිලෙන් අඩු අවු-කණ්නාඩියක් මෙන් පැළඳිය හැකි ස්මාර්ට්ෆෝනයක හා පැලඳිය-හැකි පරිගණකවල සම්මිශ්‍රණයක් වන උපාංග සමාගම් කිහිපයක් හඳුන්වාදෙමින් තිබෙනවා. මින් එකක් වන්නේ ඉතා දැකුම්කළු නිමාවකින් යුතු, නවීන විලාසිතාවේ අවුකණ්නාඩියක් මෙන් නිර්මාණය කොට ඇති රීකොන්-ජෙට් පැළඳිය හැකි පරිගණකයයි.

ක්‍රීඩා හා ව්‍යායාම ලෝලීන් සඳහා විශේෂයෙන් නිමවා ඇති මෙහි, ක්‍රීඩකයින්ට වැදගත්වෙන තොරතුරු ලබාදෙන පරිගණක වැඩසටහන් (apps) සමග නිර්මාණය කොට තිබෙනවා. එමෙන්ම ඇපල් අයිෆෝනයක් හෝ ඇන්ඩ්‍රොයිඩ් ස්මාර්ට්ෆෝනයක් හා කෙලින්ම බද්ධවෙමින් දුරකථනයේ තිරය වෙනුවට, අවුකණ්නාඩියේ තිරය ආදේශ කරගනිමින් ක්‍රියාත්මක විමේ පහසුකමද තිබෙනවා.
භාවිතා කරන්නාට තිරයේ දසුන් පෙනෙනා ආකාරය




Wednesday, 26 June 2013

මැන්චෙස්ටර් කෞතුකාගාරයේ ඊජිප්තු තිබු පාරාවෝ පිළිමය ඇවිදියි


ඊජිප්තුවේ පිරමීඩයක් තුලින් සෙයාගනු ලැබූ පාරාවෝ පිළිමයක් කෞතුකාගාරයක් තුළ ප‍්‍රදර්ශනය සදහා තබා තිබියදී ඇවිදිමේ සිදුවීමක් එංගලන්තයේ මැන්චෙස්ටර් නගරයෙන් වාර්තා වේ.

ඔසිරිස් නම් මිසර දෙවියා වෙනුවෙන් නම් කර තිබු මෙම පිළිමය වසර 4000ක් පැරණියැයි සැළකේ. මැන්චෙස්ටර් කෞතුකාගාරයේ පසුගිය වසර 80 පුරාවටම ප‍්‍රදර්ශනය කෙරී ඇති අතර මෑතකදි එහි පිහිටීම වෙනස්වී තිබීම ගැන සැක කල කෞතුකාගාරයේ නිළධාරියෙකු විසින් එම පිළිමය ගැන විමසිල්ලෙන් සිට ඇත. 

පසු දිනයේදිද ඔහු විමතියට පත් කරමින් පිළිමය නැවත වතාවක් තම පිහිටීම වෙනස් කර ඇති බව දුටු කෞතුකාගාර නිළධාරියා එම පිළිමය පිහිටි ප‍්‍රදේශය ආවරණය කරන ආරක්ෂිත කැමරා පද්ධතිය නැවත නිරීක්ෂණය කර ඇත.

ආරක්ෂිත කැමරාවේ සංරක්ෂිත දර්ශන දැකීමෙන් කෞතුකාගාර කාර්ය මන්ඩලය දැඩි ලෙස කලබලයට පත්වී ඇත්තේ පාරාවෝ පිළිමය අංශක 180 කින් කැරකෙවෙනු එහි පටිගතවී තිබූ බැවිණි.

කෞතුකාගාරය තුල ඇති අනෙකුත් පුරාවස්තූන් කිසිදු ලෙසකින් සෙලවෙන්නේවත් නැතිව තිබියදී මෙම පාරාවෝ පිළිමය පමණක් මෙලෙස තමන් වටාම යම් රිද්මයකට අනුව ඇවිදීම තමන්ට අදහාගත නොහැකි බව පවසන කෞතුකාගාර කාර්ය මන්ඩලය මෙම අභිරහස වහාම නිරාකරණය කරගත යුතු තත්වයක් බව පවසති.

මේ පිළිබඳව අදහස් දක්වන ජනප්‍රිය විද්‍යා වැඩසටහන් ඉදිරිපත් කරන්නෙකු වන මහාචාර්ය බ්‍රයන් කොක්ස් පවසන්නේ කෞතුකාගාරයට එන අමුත්තන්ගේ ගමන් කිරීමෙන් ඇතිවන කුඩා කම්පණයන් නිසා මෙය කරකැවෙන බවයි. එහෙත් වසර 80ක් නොසෙල්වී එම කෞතුකාගාරයේම තිබූ මෙය හදිසියේම කරකැවෙන්නට ගැනීම පුදුම සහගත බව ඇතැමුන් පවසයි. එමෙන්ම එය කම්පණයන් නිසා මෙය 180කින් වෘත්තාකාරව කරකැවීමද සිතාගත නොහැකි බව ඵැවසෙනවා.

වීඩියෝව බලන්න...


Sunday, 23 June 2013

දිනකට ලීටර් පනස්‌දහසක්‌ කුණු කාණුවලට හෙළන විශිෂ්ටතම ශක්‌ති ජනක පානය


උපුටා ගැනීම : 23/06/2013 දිවයින ඉරිදා සංග්‍රහය

මෑතකදී ශ්‍රී ලංකාවේ පොල් සංවර්ධන මණ්‌ඩලය විසින් පුවත්පත්වල පළකර තිබූ වාර්තාවකින් කියෑවුණේ මෙරට වැසියන් දිනකට පොල් වතුර ලීටර් 50,000 ක්‌. සින්ක්‌ එකට හළන බවයි. අප කොයිතරම් පොල් ගසට අකාරුණික වීද යන්න තේරුම් ගැනීමට, එකී කාරණාව පමණක්‌ වුව ප්‍රමාණවත් වනු ඇත.

එබැවින් එකී කාරණාව ද මතකයේ තබා ගෙනම, පොල් තැඹිලි, කුරුම්බා වතුර පිළිබඳ පෙර අපරදිග විද්‍යාඥයින් විසින් කර ඇති පර්යේෂණ වල තතු විත්ති වලින් හෙළිදරව් කෙරෙනා මාහැඟි ගුණය මෙන්ම සෞඛ්‍ය ප්‍රතිලාභ ද විමසා බලමු.

පෝෂණයෙන් අති විශිෂ්ට පොල් වතුර ජීවයේ පානයයි.

පොල් වතුර මේ ලොව ඇති සුපිරිසුදුම පානයයි. මාස 9 ක්‌ පුරා ජෛව පිරිසුදුවීමේ ක්‍රියාවලියට ලක්‌වී නිපදවන පොල් වතුර, ජීවානු හරිතය.

එහි සංයුතිය අපගේ සෛල ප්ලස්‌මාවේ, රුධිරයේ අයනික සංයුතියට බෙහෙවින්ම සමාන වන බව විද්‍යාඥයින් විසින් සොයා ගෙන තිබේ.

මෙහි සුලභව පවතින පොටෑසියම්, සෝඩියම්, ක්‌ලොරයිඩ්, මැග්නීසියම් අයන මෙන්ම, සුළු වශයෙන් ඇති ස්‌වභාවික සීනි නිසාවෙන්, අයනිකතාවය අතින් විශිෂ්ට ගුණ දක්‌වයි. මෙකී විශිෂ්ට අයනික ගුණය නිසාවෙන්, යුද්ධ වලදී බරපතල තුවාල ලබන සොල්දාදුවන් සඳහා සේලයින් ද්‍රාවණයක්‌ ලෙස කෙලින්ම භාවිතයට ගෙන තිබෙන බවත්, දෙවන ලෝක යුද්ධයේදී පමණක්‌ ජීවිත 50,000 ක්‌ පමණ බේරා ගෙන තිබෙන බවත් ඉතිහාසය තතු විමසීමේදී දැනගත හැක.

එමෙන්ම පොල් වතුර ආහාරමය තන්තු වලින්ද පොහොසත්ය. මැංගනීස්‌, අයඩීන්, සල්µර්, සින්ක්‌, සෙලෙනියම්, කැල්සියම්, පොස්‌පරස්‌, යකඩ හා විටමින් සී. බී. හා ඊ. ද ඇත. තවද මෙහි අත්‍යාවශ්‍ය ඇමයිනෝ අම්ල, කාබනික අම්ල, එන්සයිම වර්ග, ප්‍රතිඔක්‌ෂිකාරක, පයිටොකෙමිල්ස්‌ වර්ග, ශාක හෝමොන වර්ග මෙන්ම හදවතට හිතකර මේදයද අන්තර්ගත වේ.

හදවත රැක දෙන පොල් වතුර

පොල් වතුරෙහි තිබෙන අධික ඛණිජ ලවන සංයුතිය නිසාවෙන්, හෘදයාබධ හා අධික රුධිර පීඩනය වැළැක්‌වීමේ සුපිරි ආහාරයක්‌ ලෙස විද්‍යාඥයන් විසින් පොල් වතුර හඳුන්වා දී ඇත.

මේ පිළිබඳව කර ඇති අධ්‍යයනයක දී හෙළිවී ඇත්තේ, අධික රුධිර පීඩනයෙන් පෙළුණු රෝගීන් සඳහා පොල් වතුර පානය කරන්නට දීමෙන්, ඔවුන්ගේ රෝග තත්ත්වය සියයට 71 කින් අඩුවූ බවයි.

පොල් වතුර මිලි ලීටර් 100 ක පොටෑසියම් මිලි ග්‍රෑම් 300 ක්‌ පමණ තිබෙන අතර, එම ප්‍රමාණය කෙසෙල් වලටත් වඩා වැඩි අගයකි. එබැවින් මෙය හදවත රකින විශිෂ්ට ආහාරයක්‌ ලෙස හඳුන්වන්නට විද්‍යාඥයන් පසුබට වන්නේ නැත.

පොල් වතුරෙහි අහිතකර කොලෙස්‌ටරෝල් නොමැති අතර, අධ්‍යයන වලදී හෙළිවී ඇත්තේ අපගේ සිරුරේ තිබෙන අහිතකර කොලෙස්‌ටරෝල් අඩු කිරීමට ඉවහල් වන හිතකර කොලෙස්‌ටරෝල් (HDL) මට්‌ටම පොල් වතුර බීම නිසාවෙන් ඉහළ යන බවයි.

අනෙක්‌ අතට රුධිර කැටි ඇති වීම වළක්‌වාලන ගුණයක්‌ පොල් වතුරෙහි අඩංගු වන බැවින් දරුණු හෘදයාබාධ සහ ආඝාතනය වැනි රෝග වලින් ඇති වන අවධානම අඩුකර ගන්නටද පොල් වතුර පානය ඉවහල් වන බව සොයා ගෙන ඇත.


වකුගඩු රැකගන්නට සහ මුත්‍රාශයේ ගල් දිය කිරීමට.

වකුගඩු තුළ රැඳෙන විවිධ විෂ පදාර්ථයන් නිසාවෙන් වකුගඩු වලට සිදුවන හානි වැළැක්‌වීම, පොල් වතුර සතු තවත් විශිෂ්ට ගුණයක්‌ බව, පර්යේෂකයන් පෙන්වා දෙයි. එබැවින් මත්පැන් හා වස විස නිසාවෙන් සිදු වන වකුගඩු නරක්‌වීම පාලනය කිරීමද පොල් වතුර ප්‍රයෝජනවත් වනු ඇත.

පිලිපීනයේ චයිනීස්‌ මහ රෝහල් මුත්‍රවාහිනී පද්ධතිය පිළිබඳ දෙපාර්තමේන්තුවේ අධ්‍යක්‍ෂ, වෛද්‍ය ඉයුජිනෝ මැකලැලෑන් මහතා පෙන්වා දෙන්නේ, සතියකට දෙවතාවක්‌ හෝ තුන් වතාවක්‌ පමණ පොල් වතුර හෝ කුරුම්බා පානය කළ මුත්‍රාශයේ ගල් සෑදී ශල්‍යකර්මයකින් ඉවත් කිරීමට නියමිතව සිටි රෝගීන්ගේ එම ගල්වල විශාලත්වය අඩුවී හෝ කුඩා කොටස්‌ වලට කැඩී තිබුණු බවත්, ඒ නිසාවෙන් ඒවා ශල්‍යකර්මයකින් නොව, සාමාන්‍ය ඖෂධ ප්‍රතිකාර මගින් සුව කිරීමට හැකි වූ බවත්ය.

අනෙක්‌ අතට පොල් වතුර හොඳ මුත්‍ර කාරකයක්‌ද වෙයි. (Dසමරුඑසජ) මුත්‍ර හොඳින් පහවීමටත් මුත්‍ර මාර්ග යේ ඇතිවන අසාධාරන (ඹඔෂ) සුව වීමටත් පොල් වතුර හොඳ ඖෂධයක්‌ ලෙස සැලකේ.

වස විස වලින් හා දරුණු විස බීජ වලින් ආරක්‍ෂා වීමට

අප්‍රිකානු හා ඉන්දියානු මෙන්ම, ශ්‍රී ලංකාවේදීද දේශීය වෛද්‍ය කර්මයේදී විස ඖෂධ වල විස ගතිය ඉවත් කිරීමට පොල් වතුර භාවිත කොට තිබේ.

එමෙන්ම බටහිර ඖෂධ අධි මාත්‍රාවලින් ශරීරගතවීමකදී (ධඩැර dදිe) ඒවායේ විෂ හරණය කිරීමටත්, මෙරට ජනයා ආහාරයට ගනු ලබන, ආහාර වර්ග වල ඇතැයි කියනු ලබන පළිබෝධ නාශක ශේෂ කොටස්‌ මෙන්ම ආසනික්‌ හා කැඩ්මියම් වැනි බැර ලෝහ නිසාවෙන් සිදුවන හානිය අවම කිරීමටත් පොල් වතුර ඉවහල් විය හැකි බවට විශ්වාස කළ හැකි, විද්‍යාත්මක තොරතුරු බොහොමයක්‌ම ඇත.

පොල්, කුරුම්බා සහ තැඹිලි වතුරෙහි අඩංගු වෙන මොනොලෝරීන් (ඵදබදක්‌මරසබැ) සතුව ව්‍යාධිජනක බැක්‌ටීරියා, වෛරස්‌ හා ප්‍රොටාසෝවා මෙන්ම, තද ලිපිඩ ආවරණයක්‌ සහිත හර්පීස්‌ සයිටොමෙගලෝ වෛරස්‌ වර්ග (Cහඑදපැට්‌කදඩසරමි) මෙන්ම Hෂභෂ වැනි දරුණු ප්‍රතිශ්‍යාකාරක වෛරස්‌ වර්ගත් විනාශ කිරීමේ ප්‍ර්‍රභල හැකියාවක්‌ සතු වන බව පැවසෙනවා. එමෙන්ම මොනොලෝරීන් සතු විශිෂ්ට ක්‍රියාකාරිත්වය නිසාවෙන් අපගේ ප්‍රතිශක්‌තිකරණය පද්ධතිය දියුණු කෙරෙන නිසාවෙන්, රෝග වලින් අපව ආරක්‍ෂා කෙරෙන බවත් සොයාගෙන ඇත.

යෞවනත්වයේ, දීර්ඝායුෂ ලැබීමේ උල්පත සයිටොකයිනීන්.

පොල් වතුරෙහි තිබෙන විටමින්, ඛනිජ ලවන හා අනිකුත් පෝෂණ ගුණයන්ටත් වඩා වැදගත් විශිෂ්ට ගුණය වන්නේ මෙහි තිබෙන ශාක සයිටොකයිනින් (Cහඑදනසබසබි) සංයෝගවලින් අපගේ සිරුරට ලැබෙන ගුණය බව නොඅනුමානය.

සයිටොකයිනින් යනු පයිටොහෝර්මෝන නොහොත් ශාක හෝර්මෝනයන් වෙයි. මෙම හෝර්මෝන වර්ග ශාකය වයසට යැම, වර්ධනය, විකසනය හා සංවර්ධනය පාලනය කිරීමට ඉවහල් වේ.

නමුත් මෙම ශාක හෝර්මෝන වලින් මිනිසාට ඇති ඵළ ප්‍රයෝජනය කවරේදැයි විද්‍යායෝ මෑතක්‌ වන තුරුම සොයාගෙන නොසිටියහ.

කෙසේ වෙතත්, විද්‍යාඥයින් දැන් අවධාරණය කරන්නේ, මෙම සයිටොකයිනින් වලින් පොහොසත් ආහාර සුලභව ලබා ගැනීම, දීර්ඝායුෂ විඳීම සහ වයසට යැමේදී මතු වන සංකූලතා අවම වීමටත්, යෞවන පෙනුම වැඩි කාලයක්‌ රැක ගැනීමටත් ඉවහල් වන බවයි.

පොල්වතුර වනාහී මෙම ශාක හෝර්මෝනයන්ගෙන් පරිපූර්ණ ආහාරයකි.

පිළිකා පාලනය කිරීමේ ගුණය

පෙරකී සයිටොකයිනින් මගින් වයසට යැම පාලනය කිරීමට අමතරව, නිරෝගී සෛල විභාජනය යහපත්ව පවත්වා ගෙන යමින් පිළිකාමය සෛල විනාශ කිරීමටත් හේතු වන බව විද්‍යාඥ බ්රූස්‌ µsෙµa (ඊරමජැ Fසෙe) මහතා අවධාරණය කරනවා. මීට අමතරව පොල් වතුර පිළිකා ඇතිවීමට හේතු වන නිදහස්‌ මුක්‌ත කණ්‌ඩක විනාශ කරන ප්‍රතිඔක්‌සිකාරක වලින්ද පොහොසත් බව සොයා ගෙන ඇත.

බර අඩු කර ගැනීමට කදිම පානයකි

1999 වර්ෂයේ ඇමරිකාවේ යාලේ සරසවියේදී කර ඇති අධ්‍යයනයකදී හෙළිවී ඇත්තේ, පොල් වතුර සීනි සහිත ආහාර ගැනීමට කෙනෙකු තුළ ඇති වන කෑදරකම පහ කරන බැවින්, බර අඩුකර ගැනීමට කදිම පානයක්‌ ලෙස යොදා ගැනීමට හැකි බවය.

අනෙක්‌ අතට විටමින් සී සුලභ ආහාර ගන්නා උදවිය බර පාලනය කර ගැනීමේ සමතුන් බව, ඇරිසෝනා ප්‍රාන්ත සරසවියේ කර ඇති තවත් අධ්‍යයනයකදී හෙළි වී ඇත. පොල් වතුර විටමින් සී වලින්ද අනූනය.

පොල් වතුරෙහි තිබෙන වෙනත් ගුණයන්.....

දියවැඩියා රෝගය පාලනයෙහිලා ද පොල් වතුර වැදගත් වන බව සොයා ගෙන තිබෙනවා.

එමෙන්ම ලෝක ආහාර හා කෘෂිකර්ම සංවිධානයේ ප්‍රධානී, මෝටීන් සැටින් (ඵදරඑසබ Saඑසබ) මහතා අවධාරණය කරන්නේ, මේ ලොව තිබෙන විශිෂ්ටතම ශක්‌ති ජනක පානය වන්නේ පොල්වතුර බවයි.

පොල් වතුරෙහි සින්ක්‌ හා සෙලෙනියම් වැනි ඛණිජ ලවන වර්ග තිබෙන බැවින් ලිංගික සරු භාවයටත් මද සරුභාවය දුරු කිරීමටත් පොල් වතුර ගුණදායක බව පැවසෙනවා.

පොල් වතුරෙහි තිබෙන විශිෂ්ට අයනික ගුණය නිසාවෙන් ඔබ ලබා ගන්නා ඖෂධ වර්ග ලෙහෙසියෙන්ම සිරුරට උරා ගැනීමටත් පොල් වතුර සහය දක්‌වන බව සොයා ගෙන ඇත.

මහලු උදවියට හා ඝන ආහාර දිරවීමට අපහසු රෝගීන්ට ලබා දිය හැකි විශිෂ්ට පෝෂණීය පානයකි.

පොල් වතුර එළ කිරි වලට වඩා පෝෂණ තත්ත්වයෙන් විශිෂ්ට වන අතර, විටමින් සංයුතියෙන් දොඩම් යුෂයටත් වඩා විශිෂ්ඨ වෙයි.

මවු කිරි වල තිබෙන ලෝරික්‌ අම්ලය පොල් වතුරෙහි ද තිබෙන නිසා සකස්‌ කළ ළදරු කිරි පිටි වර්ග වලට වඩා පොල් වතුර විටමින් සංයුතියෙන් ගුණදායක බව පැවසෙනවා.

වමනය යැම නතර කිරීමේ ගුණයක්‌ සහ ආමාශයේ දැවිල්ල, ගැස්‌ට්‍රයිටීස්‌ රෝගය, ආහාර ජීර්ණ පද්ධතියේ ආබාධ, බඩ පුරවා දැමීම්, අජීර්ණය මළ බද්ධය සුව කිරීමේ ගුණයක්‌ පොල් වතුරෙහි තිබෙන බව සොයා ගෙන ඇත.

ඇසට හිතකරය. ඇසේ සුද ඒම සහ ග්ලූකෝමා රෝග තත්ත්වයන් ඇතිවීම වළක්‌වයි.

ළමයින්ගේ පණු රෝග සහ උදරාබාධ සුව කිරීමටත් පොල් වතුර හොඳ ඔසුවක්‌ ලෙස භාවිත කළ හැකිය.

ශරීරය අධිකව වෙහෙසෙන අවස්‌ථාවලදී සහ විජලන තත්ත්වයන්හිදී පොල් වතුර හෝ කුරුම්බා වතුර ලබා දීමෙන් විශිෂ්ට ගුණ ලැබෙන බව පැවසෙනවා.

පැපොල, සරම්ප, සහ ශරීයේ පලු දැමීම සහ ඌෂ්ණ බිබිලි වලින් සුවයක්‌ ලැබීම සඳහා පොල් වතුර බාහිරව ගැල් වීමෙන් සහනයක්‌ ලැබෙන බව පර්යේෂකයන් සොයා ගෙන ඇත.

සම රැලි වැටීම පාලනය කරන අතර, තුවාල සුව වීමටද දායක වෙයි.

පොල් වතුරෙහි තිබෙන විශිෂ්ට ගුණයන් නිසාවෙන් ලොව පුරා වෛද්‍යවරු ගර්භණී මවුවරුන්ට පොල් වතුර, තැඹිලි වතුර පානය කරන්නට උපදෙස්‌ දේ.

හෙළ වෙදකමට නැතුවම බැරි පොල් වතුර 

මෙරට හෙළ වෙදකමෙහිලාද පොල්, කුරුම්බා සහ තැඹිලි වතුර භාවිත කෙරෙන අවස්‌ථා රාශියක්‌ තිබෙන බව පැහැදිලිව දැකගත හැකිය.

ශරීරයේ උෂ්ණය, දාහය, සහ දොස්‌ සමනය කිරීම සඳහා භාවිත කරන ''රාජ විරේකය'' මුල් ගල් දිය කිරීමට භාවිතා කරන ''වැලි හැළියේ කෂාය'' ''බලා විෂ්ණු තෛලය'' වැනි ඖෂධ සංයෝග රාශියක්‌ සකස්‌ කිරීමට තැඹිලි සහ පොල් වතුර භාවිත කරයි. සුලභව යෙදෙන ඖෂධයක්‌ පහත දක්‌වන්නේ පෙර කී පර්යේෂණ වලින් තහවුරු කෙරී පවතින අපේ පැරැන්නන්ගේ ශ්‍රේෂ්ඨ දැනුමට උපහාරයක්‌ වනු පිණිසය.

ඉරමුසු පිරිසිදු කොට ගෙන තලා, තැඹිලි ගෙඩියකට දමා ඇස්‌ස වසා රැයක්‌ තබා, උදේට පානය කිරීමෙන් මුත්‍ර විෂ තත්ත්වයන්, මුත්‍ර ආබාධ සමනය කෙරෙන බව පැවසේ.

මෙරටට පැමිණෙන විදේශික සංචාරකයන් සිල්ලර කඩවලට ගොස්‌ පොල් ගෙඩි මිලදී ගෙන, එහි සිදුරක්‌ සාදවා ගෙන, පාරවල් අයිනේ ඇන තියා ගෙන ස්‌ට්‍රොa එකකින් පානය කරනු ඔබත් දැක ඇති. එහෙත් අවාසනාවකට එම වෙළෙඳසැලේ සිටින තරබාරු වෙළෙඳ මහත්මිය දිනපතාම පොල් වතුර ටික කුණු කාණුවට දමා වස විස ද තිබිය හැකි ප්ලාස්‌ටික්‌ බෝතල් වල අසුරා අව්වට වේලී වේලී තිබෙන පැණි බීම බෝතලයක්‌ පානය කරමින් සිටිනු ඇත.

ඉදින් මේ එළැඹ ඇත්තේ, පොල් ගස යට ඉපිද, හෘද රෝග වකුගඩු අබාධ, පිළිකා රෝග වැනි බෝ නොවන රෝග වැළඳී අකාලයේ මියගොස්‌, පොල් ගස්‌ යටම වළදමන්නට කලියෙන්, පොල් වතුරේ ඔසු රහස්‌ මෙන්ම රස රහස්‌ද අපේ ඇත්තන්ට, කියවා පැහැදිලි කර දියයුතු කාලයක්‌ බව මෙහි අන්තිමට ලියා තබමි

(විශේෂ ස්‌තූතිය - කැඩුම් බිඳුම් හා සර්වාංග විශේෂඥ ආයුර්වේද වෛද්‍ය කරඳගොල්ලේ ඒ. බී. එම්. ජයවර්ධන මහතාට)

ගැමුණු සාලිය පෙරේරා

මහජන සෞඛ්‍ය පරීක්‍ෂක ඇල්ල

Sunday, 16 June 2013

මයික්‍රොසොෆ්ට් සමාගම සිය මෘදුකාංගවල දෝෂ වල තොරතුරු අමෙරිකානු ඔත්තු සේවාවලට සපයන්නේ ඇයි?


පරිගණක මෘදුකාංග ලෝකයේ දෝෂ සහිත මෘදුකාංග වෙළඳපොලට එවීම පිලිබඳව වඩාත්ම ප්‍රසිද්ධියට පත්ව තිබෙන්නේ මයික්‍රොසොෆ්ට් සමාගමයි. මයික්‍රෝසොෆ්ට් සමාගමේ දෝෂ සහිත මෘදුකාංග කලක් පුවත් මවන්නට සමත්වී තිබෙනවා. මෑතකදී ප්‍රසිද්ධ වුනු නවතම මයික්‍රොසොෆ්ට් මෘදුකාංග දෝෂය නම් text editor/word pad දෝෂයයි. වින්ඩෝස් 8 හා XP, Vista, 7, 8 මෘදුකාංග තුල ඇති මෙම දෝෂය මගින් වින්ඩෝස් සමග පැමිණෙන කුඩා උප-මෘදුකාංග දෙකක් වන ටෙක්ස්ට් එඩිටර් හා වර්ඩ් පෑඩ් වල ගොනු (files) විවෘත කිරීමේදී ඇතිවන යම් දුර්වලතාවයක් උපයෝගීකරගෙන හැකරුන් හට පරිගණකයේ පාලනය තමන්සතු කරගත හැකි බව මයික්‍රොසොෆ්ට් සමාගම පවා පිලිගෙන එම දෝශය මග හැරීමට "පැච්" හෙවත් දෝශ සමන මෘදුකාංගයක් "critical update" ලෙස නිකුත්කලේ මේ නොබෝදායි.

දෝෂ සමනය සඳහා පැච් එකක් නිකුත් කිරීමට පෙර එම දෝෂය "සීරෝ ඩේ වර්නරබිලිටි - zero day vulnerability" ලෙස හඳුන්වයි.  හැකරුන් පරිගණක/පරිගණක ජාල අත්පත්කර ගැනීම සඳහාත් වෛරස් නිර්මාණය සඳහාත් මෙවැනි දෝෂ උපයෝගීකර ගනී. බොහෝ විට මෘදුකාංගය නිර්මාණය කල සමාගම මෙවැනි දෝෂ ගැන දැනගන්නේ හැකරුන්ගේ ප්‍රහාරයක පසු විශ්ලේෂණයේදී හෝ පරිගණක ජාල ආරක්ශණය පිලිබඳ විශේෂඥයින් සිය පරීක්ශණ මගින් ඒවා අනාවරණය කරගෙන තොරතුරු නිකුත් කිරීමෙන් අනතුරුවය.

අප දන්නා තොරතුරු එසේ වුවත්, මෙම දෝශ හා ඒවා සොයාගත් විට මෘදුකාංග සමාගම ගන්නා ක්‍රියා පටිපාටිය පිලිබඳවත් අප නොදන්නා තොරතුරු රැසක් නොබෝදා අමෙරිකානු NSA ඔත්තු සේවයේ රහස් අතිවිශාල ප්‍රමාණයක් නිකුත් කල එහි පරිගණක ජාල විශේෂඥයෙකු ලෙස සේවය කල එඩ්වර්ඩ් ස්නෝඩන් සැපයූ තොරතුරුවලින් අනාවරණය වී තිබෙනවා.

එනම්, මයික්‍රොසොෆ්ට් සමාගම (හා තවත් මෘදුකාංග සමාගම් විශාල ප්‍රමාණයක් - ගූගල්ද ඇතුලුව) මෙවැනි දෝශයක් අනාවරණය කරගත් වහාම එය සමනය කිරීමට "පැච්" එකක් නිකුත් කිරීමට පෙර එම දෝෂය පිලිබඳ සියලු තාක්ශණික තොරතුරු NSA, CIA, DIA, US Cyber Command වැනි අමෙරිකානු ඔත්තු හා ආරක්ශක සේවාවලට බෙදා හරින බවයි.

ඒ අනුව අමෙරිකානු ඔත්තුසේවා හා ආරක්ශක අංශවලට, එම මෘදුකාංග භාවිතා කරන ලොව වෙනත් කිසිදු සමාගමකට, රජයේ හෝ මිලිටරි ආයතනයකට පෙර එම දෝෂ නිවැරදි කරගෙන සිය පරිගණක පද්ධති ආරක්ශා කරගැනීමේ හැකියාව ලැබෙනවා. එපමණක් නොව, මෙම ඔත්තුසේවා වල විශේෂඥයින් එම දෝෂ උපයෝගී කරගෙන සතුරු රටවල්වල හෝ තම විරුද්ධවාදීන්ගේ පරිගණක ජාල තුලට වැදී ඒවායේ දත්ත සොරකම් කිරීමටත්, ඔත්තු බලන බොට් මෘදුකාංග හෝ වෛරස් ඇතුලු කිරීමත් සිදුකරනවා.

සමාගම් හා ඔත්තුසේවා අතර ඇති මෙවැනි අවබෝධතා පිලිබඳව තොරතුරු දන්නා පුද්ගලයින් ඉතා අල්ප බව පැවසෙනවා. බොහෝවිට මෙම අවබෝධතා ඇතිවන්නේ ඔත්තුසේවාවේ ඉහල පෙලේ ප්‍රධානීන් හා සමාගමේ සභාපති, ප්‍රධාන විධායක නිළධාරී හෝ අධ්‍යක්ශක මණ්ඩලයේ ප්‍රභල පුද්ගලයින් අතරයි. මෙම අවබෝධතා හමුවීම් වලින් පසු තොරතුරු ලබාදීම සිදුවෙන බව ස්නෝඩන් හෙලිකල තොරතුරු වලින් අනාවරණය වනවා.

බලසම්පන්න ඔත්තු සේවාවලට ලබාදෙන මෙම අනුග්‍රහයට ප්‍රති උපකාර ලෙස මයික්‍රොසොෆ්ට්, ඔරැකල්, ගූගල් වැනි සමාගම්වලට වාසි ලබාදීමට මෙම ඔත්තුසේවා ප්‍රධානීන් ක්‍රියාකරනවා.

මෙම අනුග්‍රහ අතර;

1/ ඔත්තුසේවාවල මෘදුකාංග අවශ්‍යතා සැපිරීමේ ඩොලර් මිලියන ගණනින් කොන්ත්‍රාත්තු

2/ අමෙරිකානු ආකරක්ශක දෙපාර්ථමේන්තුවේ හා ත්‍රිවිධ හමුදා, පොලීසිවල මෘදුකාංග අවශ්‍යතා සැපිරීමේ ඩොලර් මිලියන ගණනින් කොන්ත්‍රාත්තු

3/ අමෙරිකානු රජයේ ආයතනවල කොන්ත්‍රාත්තු

යහමින් ලැබෙන බව හෙලිවී තිබෙනවා. එමෙන්ම අමෙරිකානු රජයට අවනත හෝ බලපෑම් කලහැකි විදේශ රටවල විශාල මෘදුකාංග සැපයිමේ ටෙන්ඩර් වැනිදෑ මෙම සමාගම් වලට ලබාගැනීම සඳහා එම රටවල අමෙරිකානු තානාපති සේවා නිළධාරීන් ලවා බලපෑම් කිරීමද තවත් අනුග්‍රහයක්.

එමපණක් නොව, අමෙරිකානු ඔත්තුසේවාවල විදෙස් වෙළඳ රහස් හා විදෙස් තාක්ශණය සොරකම් කිරීමේ අංශ මගින් ලබාගන්නා වෙළඳ හා තාක්ශණික රහස් මෙම සමාගම් වලට නොමිලේම ලැබෙන බවද පැවසෙනවා.




Saturday, 15 June 2013

ඉරානයේ යුරේනියම් නිශ්පාදනය අඩපණකල Stuxnet සයිබර් ප්‍රහාරයේ සුළමුළ හෙලිවේ....

නැටාන්ස් යනු මධ්‍යම ඉරානයේ කර්කාස් කඳුවැටිය අසබඩ පිහිටි කුඩා ගම්මානයකි. කෘෂිකාර්මික ප්‍රදේශයක් වන මෙය වඩාත් ප්‍රසිද්ධවන්නේ ඉස්තරම් පෙයාර්ස් පළතුරු වලට හා 13වැනි සියවසේ විසූ ඉස්ලාම් සූෆී පූජකයෙකු වන ශීක් අබ්ඩ් අල් සමාද්ගේ සොහොන් ගැබ පිහිටි ප්‍රදේශයත් ලෙසිනි. එහෙත් වසර ගණනාවක් පුරා බටහිර ඔත්තු සේවා සිය උකුසු ඇස් නැටාන්ස් ගම්මානය දෙස හෙළාගෙන සිටියේ මේ කිසිවක් නිසා නොව නැටාන්ස් ගම්මානය තුල ඉරානයේ න්‍යශ්ඨික වැඩසටහනේ ඉතා වැදගත් පුරුකක් පිහිටුවා තිබූ බැවිනි.

කර්කාස් කඳුවැටි සෙවන මායිමේ අති දැවැන්ත භූගත බංකර පෙලක ඉරානයේ න්‍යශ්ඨික වැඩසටහන සඳහා යුරේනියම් සුපිරිසුදු කරන සෙන්ට්‍රිෆියුජ් හෙවත් කෙන්ද්‍රාපසාරක යන්ත්‍ර පිහිටුවා තිබුණු අතර මෙය කිසි ලෙසකින් ගුවන් ප්‍රහාරයකින් විනාශකල නොහැකි ආකාරයට තනා තිබෙනවා.අඩි 8ක් ඝණකම් කොන්ක්‍රීට් බිත්තිවලින් සමන්විත මෙම සංකීර්ණයේ උඩකොටස අඩි 70ක් ඝණ පස්තට්ටුවකින් ආවරණය කර තිබෙන්නේ අමෙරිකාව සතු ඉතා බළසම්පණ්න බංකර් නාශක බෝම්බයකින් වුවද විය හැකි හානිය ඉතා අවම කිරීමටයි. ඉරානය මෙතරම් අධික වියදමක් දරා දැවැන්ත භූගත බංකරයක් තුල සිය විකිරණශීලී යුරේනියම් නිශ්පාදනාගාරය පිහිටුවා තිබෙන්නේ එය ඊශ්‍රායල් හා අමෙරිකානු ප්‍රහාරවලින් රැකගැනීම සඳහායි.
ඉරානයේ සෙන්ට්‍රිෆියුජ් සංකීර්ණයක් පරීක්ශා කරන ජනාධිපති අහ්මෙනිජාඩ් - මෙහි රිදී පැහැති සිලින්ඩර් මෙන් පෙනෙන්නේ U-235 වෙන්කරන සෙන්ට්‍රිෆියුජ් යන්ත්‍රයි.
යුරේනියම් ලෝපස් (uranium ore) ශුද්ධකිරීමේ ක්‍රියාවලියේ අවසාන ඵලය යුරේනියම්  ඔක්සයිඩ් වන අතර මෙම යුරේනියම් ඔක්සයිඩ වල U-238 හා U-235 ලෙසින් හැඳින්වෙන සමස්ථානික තිබෙනවා. මෙයින් න්‍යශ්ඨික බලාගාර මෙන්ම න්‍යශ්ඨික බෝම්බ සඳහා වැදගත් වන්නේ විකිරණශීලී U-235 සමස්ථානියකයි. U-235 වෙන්කරගැනීමේ ක්‍රියාවලිය ඉතා සංකීර්ණවන අතර මේ සඳහා අධික වේගයෙන් බ්‍රමණය වන සෙන්ට්‍රිෆියුජ් නම් උපකරණ භාවිතා වනවා. න්‍යශ්ඨික බෝම්බයක් තනාගැනීමට හෝ න්‍යශ්ඨික බළාගාරයක් බලගැන්වීමට ප්‍රමාණවත් U-235 නිපදවා ගැනීමට මෙවැනි සෙන්ට්‍රිෆියුජ් දහස් ගණනක් අඛන්ඩව ක්‍රියාත්මක විය යුතු වනවා.

තත්පරයකට වට (RPM) 100,000ක් පමණ වේගයෙන් බ්‍රමණය වන නූතන යුරේනියම් සෙන්ට්‍රිෆියුජ් ඉතාමත් සූක්ශ්ම ලෙස නිර්මාණය කොට ඇති, පරිගණක මගින් පාළණය වන සංකීර්ණ යන්ත්‍ර වනවා. බටහිර ඔත්තුසේවා ඇසගසාගෙන සිටි මෙම නැටාන්ස් U-235 නිශ්පාදනාගාරයේ සෙන්ට්‍රිෆියුජ් යන්ත්‍ර 1000කට අධික ප්‍රමාණයක් තිබෙන බව ගණන් බලා තිබුණා.

නැටාන්ස් යුරේනියම් නිශ්පාදනාගාරයේ නිශ්පාදන කටයුතු අඩපණ කොට ඉරානයේ න්‍යශ්ඨික වැඩසටහන කඩාකප්පල් කිරීමට හැකි සියලු මංපෙත් සලකා බැලූ පෙන්ටගනය, ඉරානයේ න්‍යශ්ඨික වැඩසටහන අඩපණ කිරීමට සයිබර් ප්‍රහාරයකින් සිදුකල හැකිදැයි සොයාබැලීමට අමෙරිකානු ඉලෙක්ට්‍රොනික ඔත්තුසේවා ඒජන්සිය වන NSA හෙවත් "National Security Agency" ආයතනයට 2006 වසරේදී  පැවරුවා. නැටාන්ස් සංකීර්ණය ඉරානයේ අතිශයෙන්ම රහසිගත, දැඩි ආරක්ශාව සහිත ස්ථානයක් බැවිනුත්, වසර ගණනාවක් තිස්සේම ඉරානය අමෙරිකාව ඇතුලු බටහිර රටවල් සමග සබඳතා නොපවත්වන බැවිනුත්, නැටාන්ස් සංකීර්ණයේ පරිගණක පද්ධති පිලිබඳව කිසිදු තොරතුරක් NSA හෝ CIA සතුව නොතිබුන අතර එබැවින් සයිබර් ප්‍රහාරයක් එල්ල කිරීම සඳහා සිදුකලයුතු මුල්ම කරුණ ලෙස හඳුනාගැනුනේ නැටාන්ස් සංකීර්ණයේ පරිගණක ජාලය පිලිබඳව සිතියමක් (network topology map) සකසා ගැනීමයි.

මෙම වගකීම NSA ඒජන්සියේ පූර්ණකාලීනව සේවය කරන අති දක්ශ හැකර්වරුන් කණ්ඩායමකට පැවරුනා. මෙම හැකර්වරුන් නැටාන්ස් සංකීර්ණයේ එතරම් සුරක්ශිත නොකොට තිබුනු ජාල (පිරිස් පාලන/ගිණුම් වැනි අංශවල පරිගණක) තුලට වැදී ඒ හරහා මෙන්ම නැටාන්ස් සංකීර්ණයේ පර්යේෂණ කටයුතුවලට සහය දෙන සම්බන්ධ විශ්වවිද්‍යාල හා වෙනත් ආයතනවල පරිගණක ජාල රහසින් ආක්‍රමණය කරමින් ඒවා හරහා සෙමින් සෙමින් නැටාන්ස් සංකීර්ණයේ පරිගණක ජාලය පිලිබඳ තොරතුරු සොයාගත්තා.

මෙම හැකර්වරුන් සමග ක්‍රියාත්මකවූ පරිගණක ජාල හා සර්වර් වල දුර්වලතා සොයාගැනීමේ විශේෂඥයින් (vulnerability analysts)  හැකර්වරුන්ගේ ග්‍රහණයට නතුවුනු සියගණනක් පරිගණක හා සර්වර් පිරික්සමින් ඒවා තුලට රහසින් වෛරස් හෝ වෙනත් ස්වයංක්‍රීයව ඔත්තුබලන/ජාල ක්‍රියාකාරකම් වාර්තාකරන මෘදුකාංග (bots හෙවත් robot software applications that run automated tasks on a network) රහසින් ඇතුලුකල හැකි ආකාරයන් සොයා බැලුවා.

නැටාන්ස් මධ්‍යස්ථානයේ හා සම්බන්ධිත ආයතනවල පරිගණක ජාල තුල සැරිසරමින් රැස්කරගත් දත්ත ඇසුරින් ඉරාන යුධමය ආයතනවල පරිගණක ජාල නිර්මාණය කොට ඇති ආකාරය හා ඒවායේ දුර්වලතා හඳුනාගත් පසු NSA  ආයතනයේ සිටින තවත් පරිගණක විශේෂඥයින් කොටසක් වන "network exploitation specialists" හෙවත් පරිගණක ජාල උපයෝජනය පිලිබඳ විශේෂඥයින් එම ජාල තුලට "බීකන්ස්" ලෙසින් හඳුන්වන පරිගණක මෘදුකාංග ඇතුලු කලා. මෙම මෘදුකාංග සතුරු ප්‍රදේශ ඉහලින් පියාසර කරමින් තොරතුරු එවන රොබෝ ඩ්‍රෝන යානා මෙන් ඉරාන පරිගණක ජාල තුල සැරිසරමින් රැස්කරගන්නා තොරතුරු ඉරාන අන්තර් ජාල සබඳහා හරහාම NSA මෙහෙයුම්කරුවන් වෙත එවන්නට සමත් වුනේ ඉරාන පරිගණක විශේෂඥයින්ගේ දෑස් වලට වැලි ගසමින්.

NSA විශේෂඥයින් තොරතුරු රැස්කරන "බීකන්" මෘදුකාංග කොතරම් සූක්ශ්ම හා සංකීර්ණ ලෙස නිර්මාණය කොට තිබුණාද යත්, ඒවා පරිගණක ජාල තුල සැරිසරමින් තොරතුරු එවන්නට පමණක් නොව ජාලයට සම්බන්ද පරිගණක හා ලැප්ටොප් වල මයික්‍රෆෝන රහසින් ක්‍රියාත්මක කොට ඒවා භාවිතා කරන ඉරාන විද්‍යාඥයින් හා තාක්ශණික ශිල්පීන් තම සගයින් හා කරන කතාබහ පවා ඔවුන්ගේම අන්තර්ජාල සබඳතා හරහා NSA මෙහෙයුම්කරුවන් හට ඇසෙන්නට සළස්වන්නට සමත්වී තිබෙනවා! එපමණක් නොව බ්ලූටූත් පහසුකම ඇති ලැප්ටොප් වල එම පහසුකම ක්‍රියාත්මක කොට ඒවා භාවිතා කරන්නන්ගේ සාක්කු තුල තිබූ බ්ලූටූත් පහසුකම සහිත ජංගම දුර්කථන තුල තිබූ දත්ත පවා ලබගන්නට සමත්වූ බව NSA ඉරාන සයිබර් මෙහෙයුමට දායකවූ CIA විශේෂඥයින් පවසනවා.

මෑතකදී රුසියානු සයිබර් ආරක්ශණ විශේෂඥයින් පිරිසක් ඉරාන පරිගණක ජාලයක් තුල තිබී සොයාගෙන විශ්ලේෂණය කරන ලද "ෆ්ලේම් -flame" නම් සංකීර්ණ වෛරසයේ මේ ගුණාංග සියල්ලම පාහේ තිබූ බව එම කණ්ඩායම සිය වාර්තාවේ සඳහන් කොට තිබෙනවා.

ඉරාන පරිගණක ජාල නිර්මාණය කොට ඇති ආකාරය පිලිබඳව පැහැදිලි චිත්‍රයක් සපයාගත් ණ්Sඇ ආයතනය, එම තොරතුරු ඇසුරින් ඉරාන සෙන්ට්‍රිෆියුජ් යන්ත්‍රාගාරය අඩපණ කිරීම සඳහා ප්‍රභල වෛරසයක් නිර්මාණය කිරීමේ වගකීම CIA සංවිධානයට පැවරුවා. එයට හේතුවලෙස විශ්ලේෂකයින් දක්වන්නේ අමෙරිකානු නීතියට අනුව විදේශ රටවල රහසිගත ප්‍රහාර එල්ලකිරීමේ තනි අයිතිය CIA සංවිධානයට ලැබී තිබීමයි. මේ අනුව CIA පරිගණක විශේෂඥයින් ඉරාන නැටාන්ස් U-235 නිශ්පාදනාගාරයේ සෙන්ට්‍රිෆියුජ් යන්ත්‍ර අඩපණ කිරීම සාර්ථකව සිදුකල ස්ටක්ස්නෙට් (stuxnet) වෛරසය නිර්මාණය කරනවා. මේ සඳහා ඊශ්‍රායල් මොසෑඩ් ඔත්තුසේවයද දායක වූ බව පැවසෙනවා.

ඒ කෙසේවෙතත්, NSA හා CIA ආරංචිමාර්ග පවසන අන්දමට ඒවන විට ඔවුන් නැටාන්ස් සංකීර්ණයේ පරිගණක ජාල පිලිබඳව බොහෝ තොරතුරු රැස්කරගෙන සිටියත් ඔවුන්ගේ සැබෑ ඉලක්කය වූ නැටාන්ස් සංකීර්ණයේ U-235 පිරිපහදු කරන සෙන්ට්‍රිෆියුජ් යන්ත්‍රාගාරයේ පරිගණක ජාලයට ඇතුලුවීමට අසමත් වී තිබෙනවා. එයට හේතුව සෙන්ට්‍රිෆියුජ් යන්ත්‍රාගාරයේ පරිගණක ජාලය නැටාන්ස් සංකීර්ණයේ වෙනත් පරිගණක ජාල සමග හෝ අන්තර්ජාලය සමග සම්බන්ධ කොට නොතිබීමයි.

ඒ අනුව ස්ටක්ස්නෙට් වෛරසය සෙන්ට්‍රිෆියුජ් යන්ත්‍රාගාරයේ පරිගණක වෙත ඇතුලු කිරීම සඳහා ඉරානය තුල ඔත්තුකරුවන් ජාලයක් නිර්මාණය කරගෙන සිටි ඊශ්‍රායලයේ මොසෑඩ් ඔත්තුසේවයේ සහය පැතුවා. මේ අනුව නැටාන්ස් සංකීර්ණය මෙන්ම තවත් ඉරාන  මිලිටරි සංකීර්ණ වෙත පරිගණක උපාංග අලෙවිකරන, මෙසෑඩ් ඒජන්තයෙකු ලෙසද ක්‍රියාකරමින් සිටි අලී අශ්ඨාරී නම් පරිගණක වෙළඳායතන හිමිකරුවාගේ සේවය ලබාදුන් බව වාර්තා වෙනවා. අලී අශ්ඨාරීගේ උපකාරයෙන් නැටාන්ස් සෙන්ට්‍රිෆියුජ් යන්ත්‍රාගාරය වෙත සැපයුනු අලුත් පරිගණක කිහිපයකට ස්ටක්ස්නෙට් වෛරසය ඇතුලු කොට යැවීමට සී.අයි.ඒ හා මෙසෑඩ් මෙහෙයුම් කරුවන් සමත්වෙනවා.

ඉරානයට අමෙරිකාව එල්ල කරන ලද ප්‍රථම සයිබර් ප්‍රහාරයේ සිදුවුනේ එලෙසයි. මින් කෙටිකලකට පසු අලි අශ්ඨාරී මොසෑඩ් ඔත්තුකරුවෙකු බව ඉරාන ඔත්තුසේවා අනාවරණය කරගන්නා ලද අතර අත් අඩංගුවට පත් අශ්ඨාරී කෙටි විමර්ශණයකින් පසු එල්ලා මරණු ලැබුවා.




Thursday, 13 June 2013

ඇපල් iOS 7 අලුත්ම මොබයිල් මෙහෙයුම් පද්ධතිය එලිදැක්වේ!


අලුත්ම ආකාරයට හැඩවැඩ ගැන්වුනු User Interface එක

භාවිතා කරන්නාට වඩාත් පහසු, නිරවුල්, ඉතා ඉක්මණින් කලයුතු කාර්යය වෙත යාහැකි ලෙස මෙය නිර්මාණය කලබව ඇපල් සමාගමේ මෙහෙයුම් පද්ධති නිර්මාණ අංශයේ ප්‍රධානී ජොනී අයිව්ස් පවසනවා.

" iOS 7 නිර්මාණය කරලා තියෙන්නේ මීට කලින් කවදාක්වත් ඇපල් ජංගම දුරකථනයක් භාවිතා කරලා නැති, ඇපල් මෙහෙයුම් පද්ධතිය අඳුනන්නේ නැති කෙනෙකුට වුනත් කරදරයක් නැතිව, ඉතා ඉක්මණින් තේරුම් ගන්න පුලුවන් විධියටයි... ඇත්තටම ඇපල් භාවිතා කරන්න ඉගෙන ගන්න ඕනෑ නෑ....දැක්ක ගමන් තේරුම ගන්න පුලුවන් මොනවත කරන්න ඕනෑ කියලා..."  ජොනී අයිව් - iOS 7 නිර්මාතෲ



iOS 7 නිර්මාණය කිරීමේදී වැඩිම අවධානය යොමුකොට ඇත්තේ -one-swipe access to the things you often want to do on a moment’s notice  - හෙවත් ඉතා ඉක්මණින් නිතරම සිදුකල යුතු දේ  සිදුකරගත හැකි පරිදියි.





iOS 7 නිර්මාණයේදී සෑම පික්සලයක් වෙතම අවධානය යොමුකලා

ඉතා සියුම්, අනවශ්‍ය හැඩවැඩි නැති, නියම ආකාරයට වර්ණ ගැන්වූ අයිකන හා ඇප්ස් මෙහි දැකගන්නට පුලුවන්.

Wednesday, 12 June 2013

චීනයේ නවතම අභ්‍යවකාශ ගවේෂණ චාරිකාව ඇරඹේ!


ශෙන්ෂොව් 10 ලෙස නම්තබා ඇති මෙම අභ්‍යවකාශ චාරිකාව කාන්තාවක්ද ඇතුලු ගගනගාමීන් තිදෙනෙකු ඇතුලත්ය. ඇතුලු මොන්ගෝලියාවේ ජිව්ක්වාන් අභ්‍යවකාශ මධ්‍යස්ථානයෙන් ලොන්ග්-මාර්ච් 2F කාණ්ඩයේ රොකට්ටුවකින් ගුවන්ගත වූ මොවුන් දින 13ක චාරිකාවක් සඳහා සූදානම් වී සිටී.

රොකට්ටුව වෙත යන වැන්ග් යැපිංග්, අණ්දෙන නිළධාරී නී හයිශෙන්ග් හා සැන්ග් සියාඕගුවාන්ග්
චීනයේ දෙවන කාන්තා අභ්‍යවකාශගාමිණිය වන වැන්ග් යැපින්ග් මෙම චාරිකාවේදී අභ්‍යවකාශයේසිට පෘථිවියේ දරුවන් හට විද්‍යා පාඩමක් ඉගැන්වීමටද සූදානම් වී සිටින බව චීන අභ්‍යවකාශ ඒජන්සිය ප්‍රකාශකරයි. විද්‍යා පාඩමට අමතරව මෙම චාරිකාවේ වැදගත්ම අරමුණු වන්නේ චිනයේ දීර්ඝකාලීන අභ්‍යවකාශ ඉලක්කයක් වන අභ්‍යවකාශ පර්යේශණ මධ්‍යස්ථානයක් නිර්මාණය කිරීමේ තාක්ශණය දියුණු කිරීම හා ශීල්පීය ක්‍රම ප්‍රගුණ කිරීමයි.

අභ්‍යවකාශය වෙත ගමන්කිරීමේ භාග්‍යය ලද චීනයේ දෙවන කාන්තාව වන වැන්ග් යැපිංග් - ඇය චීනයේ පාසැල දරුවන් හට අභ්‍යවකාශයේ සිට විද්‍යා පාඩමක් ඉගැන්වීම සඳහා සූදානම්ව සිටින්නීය.
මේ සඳහා 2011 වසරේදී චීනය ටියන්ගොන්ග්-1 නම්වූ කුඩා අභ්‍යවකාශ මොඩියුලයක් කක්ශගත කරන ලද අතර මෙහි අභ්‍යවකාශගාමීන් හට නවාතැන් ගැනීමට පහසුකම් නැතත් නියම අභ්‍යවකාශ මධ්‍යස්ථානයක් ගොඩනැගීමේදී අවශ්‍යවන තාක්ශණයන් හා අතිශය සංකීර්ණ ක්‍රියාකාරකම් වන අභ්‍යවකාශ යානා කක්ශයේදී එකිනෙක සම්බන්ධ කරවීමේ ක්‍රියාකරකම් (space docking maneuvers), අභ්‍යවකාශ යානාවලින් ඉවතට පැමිණ ඉදිකිරීමේ කටයුතු සිදුකිරීම ප්‍රගුණ කිරීම සඳහා යොදාගනී.

යානය සාර්ථක ලෙස කක්ශගතවීමේ සතුට බෙදාගන්නා චීන අභ්‍යවකාශ මධ්‍යස්ථානයේ මෙහෙයුම් නිළධාරීන්

මෙම දශකය අවසන්වන විට චීනය තමන්ගේම අභ්‍යවකාශ මධ්‍යස්ථානයක් නිමැවීමේ ඉලක්කය හඹා යන අතර මෙම මධ්‍යස්ථානය ටොන් 60ක් බරින් යුතු, විවිධ කොටස් (මොඩියුල) ගණනාවක් සම්බන්ධකරමින් ක්‍රමයෙන් විශාල කරගත හැකි ලෙස නිර්මාණය කොට ඇත.
චීන අභ්‍යවකාශ මෙහෙයුම් මධ්‍යස්ථානය
දැනට චීනය අමෙරිකාව, යුරෝපය හා ජපානය ඒකාබද්ධව ඉදිකොට භාවිතා කරන අන්තර්ජාතික අභ්‍යවකාශ මධ්‍යස්ථාන ව්‍යාපෘතිය (International Space Station - ISS)  හා සම්බන්ධවී නැතත් චීනයේ ලොන්ග්-මාර්ච් රොකට්ටු ආධාරයෙන් යුරෝපීය අභ්‍යවකාශ ගාමීන් ISS මධ්‍යස්ථානය වෙත යැවීමේ හැකියාව සොයාබැලීම සඳහා යුරෝපීය අභ්‍යවකාශ ඒජන්සිය (European Space Agency - ESA) චීන අභ්‍යවකාශ ඒජන්සිය හා සාකච්ඡා අරඹා ඇතැයි වාර්තාවේ.

අමෙරිකානු මිසයිල ආරක්ශණ පද්ධතියෙන් රිංගා ඉලක්කය වෙත යා හැකි බැලිස්ටික් මිසයිලයක් (ICBM) රුසියාව නිපදවයි!!


රුසියානු උපායමාර්ගික රොකට් බළකාය (Strategic Rocket Forces) නවතම අන්තර්මහද්වීපික බැලිස්ටික් මිසයිලයක් අත්හදා සාර්ථකව අත්හදා බැලූ බව රුසියානු ආරක්ශක අංශ වෙතින් වාර්තාවනවා. මෙම බැලිස්ටික් මිසයිලයට ඕනෑම බැලිස්ටික් මිසයිල නාශක පද්ධතියක් (Anti-Ballistic Missile System - ABMS) අභිබවා ඉලක්කය වෙත යා හැකිබව එය නිර්මාණය කල රුසියානු ඉන්ජිනේරුවන් පවසනවා.

පසුගිය ජූනි 7වැනි දින සිදුවුනු මෙම අත්හදා බැලීම අමෙරිකාව යුරෝපය තුල සිය බැලිස්ටික් මිසයිල නාශක පද්ධති ස්ථාපනය කරන බවට සිදුකල ප්‍රකාශයෙන් දින කිහිපයකට පසු සිදුවීම වැදගත් සිද්ධියක් ලෙස විචාරකයින් පවසනවා. පසුගිය සතියේ අමෙරිකානු රාජ්‍ය ලේකම් ජෝන් කෙරී, පෝලන්ත අග්‍රාමාත්‍යවරයා හමුවී අමෙරිකානු මිසයිල නාශක පද්ධති 2018 වසරේදී පෝලන්තයේ ස්ථාපනය කිරීම සඳහා පෝලන්ත රජයේ නිළ අනුමැතිය ලබාගත්තා.

මෙම මිසයිලය සාර්ථකව අත්හදා බැලීම මගින්  අමෙරිකානු මිසයිලයේ  නාශක පද්ධති පිහිටුවීමේ වෑයම නිශ්ඵල බව පෙන්වීමට රුසියාව සමත්වී ඇති බව පැවසෙනවා

ග්‍රිනිච් වේලාවෙන් පස්වරු 5.45ට මෙම මිසයිලය දියත්කල අතර එය රුසියාවේ අශ්ට්‍රාකන් ප්‍රදේශයෙන් නිකුත්වුනා. විනාඩි කිහිපයකට පසුව මිසයිලයේ පිපුරුම් හිස (war-head) කසකස්ථානයේ බල්කාශ් ප්‍රදේශයේ සළකුණු කොට තිබුණු ඉලක්කය වෙත නිවැරදිව පතිතවුනු බව වාර්තාවුනා. රුසියානු ආරක්ශක අමාත්‍යාංශයට අනුව, මෙම අත්හදාබැලීම සිදුකරණ ලද්දේ මෙම නවතම මිසයිල නිර්මාණයේ තාක්ශණික විශ්වසනීයත්වය (technical reliability) තහවුරු කරගැනීමට හා මිසයිලය දියත්කිරීමේ ක්‍රියාදාමය (launch procedure) ආරක්ශා සහිතබව තහවුරු කරගැනීම සඳහාය.

ඝණ ඉන්ධන (solid propellant) වලින් ක්‍රියාත්මක රොකට් එන්ජිමකින් සමන්විත මෙම මිසයිලයේ 4වැනි සාර්ථක අත්හදා බැලීම මෙය වන අතර මිසයිලයේ සියලුම පද්ධතිවල ක්‍රියාකාරිත්වය තහවුරු කරගැනීම සඳහා තවත් අත්හදාබැලීමේ දියත් කිරීම් දෙකක් සිදුකල යුතු බව උපායමාර්ගික රොකට් බලකාය පවසනවා.

දැනට රුසියාව සතුව පැරණි සෝවියට් නිර්මාණයක් වන SS-18 වර්ගයේ බැලිස්ටික් මිසයිල 58ක් ඇති අතර මෙය ලොව බලසම්පන්නම හා විනාශකාරීම න්‍යශ්ඨික බෝම්බ රැගෙන යාහැකි බැලිස්ටික් මිසයිලය ලෙස සැළකෙනවා. මෙගාටොන් 18-20ක න්‍යස්ඨික බෝම්බයක් රැගෙන කිලෝමීටර් 7000ක් දුර ඉලක්කයක් වෙත යාහැකි අන්තර්-මහද්වීපික මිසයිලයකි. මීට අමතරව ටොපොල් වර්ගයේ (SS-25) මිසයිල 220කට අධික ප්‍රමාණයකුත්, යාර්ස් වර්ගයේ මිසයිල 18කුත් රුසියාව සතුව තිබෙනවා.

2014 වසරේදී මෙම අලුත් මිසයිලය සක්‍රිය සේවයට එක්කර ගැනීමට බලාපොරොත්තුවන අතර නුදුරු අනාගතයේදී, දැනට සක්‍රිය සේවයේ පවතින ටොපොල් වර්ගයේ මිසයිල වෙනුවට ආදේශ කෙරෙනු ඇති. එමෙන්ම ඉදිරි අනාගතයේදී මෙම මිසයිලය මෑතකදී රුසියානු රොකට් බළකායේ සේවයට අනුයුක්ත කෙරුනු නවීන "යාර්ස්" මිසයිලය වෙනුවට ආදේශ කලහැකි බවද පැවසෙනවා.

Sunday, 9 June 2013

වේගවත්ම සුපිරි පරිගණක කිරුළ යලිත් චීනයට?

ටියාන්හේ-2 සුපිරි පරිගණකය | ටියාන්හේ යන්නේහි තේරුම ක්ශීරපථය (milky-way) යන්නයි.
දැනට ක‍්‍රියාත්මකව පවතින ඇමරිකානු සහ ජපාන සුපිරි පරිගණක වලට වඩා දෙගුණයක වේගයෙන් ක‍්‍රියා කළ හැකි නවතම සුපිරි පරිගණකයක් චීනය විසින් නිපදවා තිබේ. ටියාන්හේ-2 ලෙස නම් කර ඇති මෙහි වේගය නිල අත්හදා බැලීම් වලට පෙරදීම තත්පරයට පෙටාෆ්ලොප් 30.7ක් (ගණනය කිරීම් ක්වොඩි‍්‍රලියන) බවට වාර්තාවී ඇත. ටියාන්හේ-2 පරිගණකයේ සැබෑ වේගය, මීටත් වඩා වැඩිවිය හැකි බව ට බටහිර විද්‍යාඥයින් සැක පහල කරන්නේ මෙම වේගය ලබාගැනීම සඳහා පරිගණකයේ ධාරිතාවෙන් 90%ක් පමණක් භාවිතා කොට ඇති බැවිනි.

දැනට ලොව වේගවත්ම සුපිරි පරිගණකය ලෙස කිරුළු පැළඳගෙන සිටින්නේ අමෙරිකාවේ ඕක් රිජ් ජාතික පර්යේෂණායතනයේ "ටයිටන්" නම් සුපිරි පරිගණකයයි. 2010 වසරේදීද චීනයේ කෙටි කාළයකට ලොව වේගවත්ම සුපිරි පරිගණක කිරුළ හිමිකරගත්තේ ඔවුන් නිර්මාණය කල ටියාන්හේ-1 ලොව වේගවත්ම පරිගණකය වීමෙනුයි.

ඉන්ටෙල් සමාගමේ ප්‍රොසෙසර් හා චීන තාක්ශණයෙන් නිර්මිත පරිපථ තාක්ශණ මුසුවකින් නිමැවී ඇති ටියාන්හේ-2 චීනයේ ජාතික ආරක්ශක තාක්ශණ විශ්වවිද්‍යාලයේ (National University of Defense Technology) නිර්මාණයකි. ටියාන්හේ සුපිරි පරිගණකය නිර්මාණය කොට ඇත්තේ ඉන්ටෙල් සමාගමේ අලුත්ම අධිවේගී ප්‍රොසෙසරය වන Xeon Phi ප්‍රොසෙසර් 48,000ක් හා තවමත් වෙළඳපොලට නිකුත් නොවූ අලුත් ආකෘතියක Xeon ප්‍රොසෙසර් 32,000කිනි. මේ ප්‍රොසෙසර් මගින් ටියන්හේ-2 සුපිරි පරිගණකයට ගණන කේන්ද්‍ර (computing cores) 3,120,000ක සංඛයාවක් ලැබී තිබේ




Thursday, 6 June 2013

ලොව දුර්ලභම දිවියා - Sundaland clouded leopard


2011 මර්තු මාසයේදී ලන්ඩන් සත්වවිද්‍යා සමාජය (London Zoological Society) තමන් අලුත්ම දිවියන් වර්ගයක් හඳුනාගත් බව ලොවට ප්‍රකාශ කලා. ඉන්දුනීසියාවේ ජාවා-සුමාත්‍රා-බෝර්නියෝ ප්‍රදේශය වාසභූමිය කරගත් මෙම දිවියා "සුන්ඩාලෑන්ඩ් ක්ලවුඩඩ් ලෙපර්ඩ් (Neofelis diardi)" ලෙස නම් කොට තිබෙනවා. සෑම වසරකම අලුත් කෘමිවර්ග හා වෙනත් කුඩා සතුන් වර්ග් සිය ගණනක් විද්‍යාඥයින් හට හමුවුවත් මෙතරම් විශාල බිළාල වර්ගයට අයත් සතෙකු මෑතකදී සොයාගත් ප්‍රථම වතාව ලෙස ලෙස මෙය සැළකෙනවා. මෙතරම් කාළයක් මෙම දිවි වර්ගය විද්‍යා ලෝකයෙන් සැඟව සිටියේ ඔවුන් ජාවා-සුමාත්‍රා-බෝර්නියෝ ප්‍රදේශවල ඝණ වනාන්තරයේ වෙසෙන ඉතා කුලෑටි, නිශාචරව සැරිසරන්නෙකු නිසා.

ආසියාවේ වෙනත් රටවල් "ක්ලවුඩඩ් ලෙපර්ඩ්" දිවියන් වර්ග වාසය කරතත් මෙම දිවියා වෙනස්ම කුළයක් බව මෙම සත්වයින්ගේ ජාන පරීක්ශාව මගින් තහවුරු කරගෙන තිබෙනවා. මෙම පරීක්ශාව සඳහා ජාන ලබාගෙන තිබෙන්නේ මෙම සතුන්ගේ වසුරු ආශයෙන් සිදුකරන ලද ජාන පරීක්ශාවක් මගින්.

මෙම සත්වයා කොතරම් දුර්ලභද යත් මේ වනතෙක්ම වනතෙක්ම මෙම සත්වයාගේ ජීවමාන ස්වරූපය දැකබලා ගැනීම සඳහා විද්‍යාඥයින් හට ලැබී තිබෙන්නේ වනාන්තරය තුල සඟවා තිබූ කැමරාවකින් ලැබුණු තත්පර කිහිපයක වීඩියෝවක් පමණයි. යූ-ටියුබ් ජාලයට ඇතුලු කරනලද එම වීඩියෝව පහත දක්වා තිබෙනවා.




වසර 400ක් අයිස් තට්ටු යට තිබූ ශාක යලි පණ ලබයි!


කැනඩාවේ ඇල්බර්ටා විශ්වවිද්‍යාලයේ විද්‍යාඥයින් පිරිසක් කැනඩියානු ආක්ටික් ප්‍රදේශයේ ග්ලැසියරයක් යට තිබී පෙඳ-පාසි විශේෂයක් සොයාගත්තා. සුලු අයිස් යුගය (little ice age) නමින් හැඳින්වෙන, වර්ෂ 1550 සිට 1850 අතර කාළය තුලදී ඇතිවුනු අධික ශීතල නිසා ග්ලැසියරයක් වූ මෙයට යටවී තිබුණු මෙම පෙඳ-පාසි වලින් කොටසක් නැවත විද්‍යාගාරය වෙත ගෙන ආ මොවුන් සාර්ථකව එම පෙඳපාසි නැවතත් වැවෙන්නට සලස්වා තිබෙනවා. 

ගෝලීය උණුසුම් වැඩිවෙමින් තිබෙන බැවින් කැනේඩියානු ආක්ටික් ප්‍රදේශයේ ග්ලැසියර දියවෙමින් පවතින අතර මෙම පාසි හමුවී තිබෙන්නේ එලෙස හිම දියවී ගිය ප්‍රදේශයකින්.

මේ ඇසුරින් විද්‍යාත්මක නිබන්ධනයක් ඉදිරිපත් කරන එම විද්‍යාඥයින් පවසන්නේ දියවී යන ග්ලැසියර යටින් ඇති, වසර සිය දහස් ගණනක් වැළලී තිබූ ප්‍රාග් එඓතිහාසික යුගයන්ට අයත් ශාක පවා මෙලෙස අයිස් දියවී යාමත් සමග නැවතත් වැඩෙන්නට අවස්ථා ඉතා විශාල බවයි. එබැවින් නුදුරු අනාගතයේදී හිමි දියවී ගිය ආක්ටික් ප්‍රදේශවල වසර සිය දහස් ගණනකට පෙර වඳවී ගිය ශාකවලින් යුතු වනාන්තර බිහිවෙන්නට ඉඩ ඇති බවට ඔවුන් අනුමාන කරනවා.

Tuesday, 4 June 2013

ශ්‍රී ලංකාවෙන් ප්‍රථම වරට නියමුවන් රහිත ගුවන් යානයක්‌



යු.ඒ.වී. (UAV) හෙවත් නියමුවන් රහිත ඔත්තු බැලීමේ ගුවන් යානයක්‌ මෙරටදී ප්‍රථම වතාවට නිර්මාණය කර තිබේ. මොරටුව විශ්වවිද්‍යාලයේ ඉංජිනේරු පීඨය විසින් මෙය නිර්මාණය කර ඇත.

මොරටුව විශ්වවිද්‍යාලයේ ඉංජිනේරු පීඨයේ කථිකාචාර්ය හා ඉලෙක්‌ට්‍රොනික දෙපාර්තමේන්තුවේ මහාචාර්ය සුදත් රෝහණ මුණසිංහ මහතා සහ ඉංජිනේරු සිසුන් සිව්දෙනකු එක්‌ව මෙම ගුවන් යානය නිර්මාණය කර ඇත.
මීටර් 200 ක පමණ උසකින් ගමන් කරමින් විනාඩි 12 ක පමණ කාලයක්‌ ගුවන්ගතව සිට අවට ප්‍රදේශය නිරීක්‌ෂණය කර දත්ත මූලස්‌ථානයට ලබාදීමට හැකි අයුරින් මෙය නිපදවා ඇත.

මෙම ගුවන් යානය සඳහා ආරක්‌ෂක අමාත්‍යාංශයේ අවසරය ලැබීමෙන් පසු ලැබෙන අනුග්‍රහය මත මීට වඩා වැඩි දියුණු කරන ලද ගුවන් යානා පවා නිර්මාණය කිරීමේ හැකියාව ඇතැයි මහාචාර්ය සුදත් රෝහණ මුණසිංහ මහතා පැවැසීය.


Monday, 3 June 2013

සුන්දර ස්වභාව ධර්මය - නැෂනල් ජියෝග්‍රැෆික් ඡායාරූප එකතුවෙන් බිඳක්....

කොල මුහුදු කැස්බෑවා (Green Sea Turtle) - රතු මුහුදෙහි ඡායාරූප ගතකරන ලදී
ඡායාරූපය - දිමිත්‍රි මාචෙන්කෝ



ජිරාෆ් හා ගැසෙල් මුවන්- ඔකොන්ඩෙකා ක්ශේමභූමිය, නැමීබියාව
ඡායාරූපය - ෆර්නැන්ඩෝ ක්වෙවීඩෝ



හිම බකමූණා (Snowy Owl) - කැනඩාව
ඡායාරූපය - වින්ස් මෙයිඩෙන්ස්



දඩයමක් ලැබෙන තෙක් කල්බලන චීටා - මසායි මාරා ජාතික රක්ශිතය, කෙන්යාව
ඡායාරූපය - ෆ්‍රාන්ස් ලැන්ටින්ග්



දඩයමේ යන අළු බකමූණා - සුපීරියර් විල අසබඩ, මිනසෝටා ප්‍රාන්තය, එක්සත් ජනපදය
ඡායාරූපය - ටොම් සැමුවෙසන්



රාජාලි සටන - පෝලන්තය
ඡායාරූපය - සිල්වියා ඩොමරඔඩ්ස්කා



ඩයමන්ඩ් බැක් පොළඟා - බිග් බෙන්ඩ් ජාතික වනෝද්‍යානය, ටෙක්සාස් ප්‍රාන්තය, එක්සත් ජනපදය 
ඡායාරූපය - ෆ්‍රෙඩ් ලාබවුන්ටි



ජගුවාර් - යසුනි ජාතික වනෝද්‍යානය, ඉක්වදෝරය 
ඡායාරූපය - ස්ටීව් වින්ටර්



හම්ප් බැක් තල්මසා - කැලිෆෝනියාව, එක්සත් ජනපදය
ඡායාරූපය - ෆිල් කෝත්‍රන්



වයිට් ටිප් මෝරා - කැරිබියන් මුහුද, බහාමාස්
ඡායාරූපය - බ්‍රයන් ස්කෙරී



ඉන්දියානු ව්‍යාඝ්‍රයා - බන්ධව්ගාර් ජාතික වනෝද්‍යානය, මධ්‍යප්‍රදේශ් ප්‍රාන්තය, ඉන්දියාව
ඡායාරූපය - ස්ටීව් වින්ටර්



අමෙරිකානු බයිසන් ගවයා - විචිටා කඳුකර වනසත්ව අභයභූමිය, ඔක්ලහෝමා ප්‍රාන්තය, එක්සත් ජනපදය
ඡායාරූපය - ජෝර්ජ් මොබ්ලි



රුසියානු දුඹුරු වළසා - ක්‍රොනෝට්ස්කි අභයභූමිය, රුසියාව
ඡායාරූපය - මයිකල් මෙල්ෆර්ඩ්



ග්‍රිස්ලි වළස් පැටවුන් - කැනඩාව
ඡායාරූපය - ඔලිවර් ක්ලින්ක්



ආක්ටික් හිවලා - ග්‍රීන්ලන්තය
ඡායාරූපය - ස්ටීවන් ඕකස්



කැළෑ බල්ලා - බොට්ස්වානා, දකුණු අප්‍රිකාව
ඡායාරූපය - ඉජාස් භාති



හම්ප් බැක් තල්මසා - චැතැම් සමුද්‍ර සන්ධිය, ඇලස්කාව, එක්සත් ජනපදය
ඡායාරූපය - කෝයි අයූන්



සුදු (ඇළි) මොණරා - සරසෝටා, ෆ්ලොරිඩා ප්‍රාන්තය, එක්සත් ජනපදය
ඡායාරූපය - ෆිල් පමෙල්



සිංහයා - එලිසබෙත් රැජිණ ජාතික වනෝද්‍යානය, උගන්ඩාව
ඡායාරූපය - ජොඑල් සර්ටෝරී






Sunday, 2 June 2013

"බින් ලාඩන් මරන මෙහෙයුමේ මහා මොළකරු ශ්‍රී ලාංකිකයෙක්!!.." මවුබිම ඉරිදා සංග්‍රහයේ මුල් පුවත බොරුවක්...


මවුබිම පුවත්පතේ මේ මුල් පුවත පාඨකයා නොමග යවන්නට සත්‍යය විකෘති කරමින් පුවත්පතේ අලෙවිය වැඩිකර ගැනීමට යොදන ලද බොළඳ උපායක් පමණක්ම බව වගකීමෙන් ප්‍රකාශකර සිටිමු!

මව්බිම පුවතේ උපුටා ගැනීමක් පහත දැක්වේ...මෙහි ඇති අසත්‍ය කරුණු රතු පැහැයෙන් දක්වා ඇති අතර නිවැරදි තොරතුරු පහතින් දක්වා ඇත.

ලෝකයේ මෙතෙක් බිහි වූ භයානකම ත්‍රස්තවාදියා ලෙස සැලකෙන   [1] ඔසාමා බින් ලාඩන් ඝාතනය කිරීමේ ඇමෙරිකා මෙහෙයුමේ මහ මොළකරු ලෙස කටයුතු කර ඇත්තේ ශ්‍රී ලාංකිකයකු වන මහාචාර්ය ශිවලිංගම් සිවනාදන්ය. යාපනයේ හින්දු විද්‍යාලයේ ආදි ශිෂ්‍යයකු වන [2] මහාචාර්යවරයා මේ සාර්ථක මෙහෙයුමෙන් පසු ඇමෙරිකා ධවල මන්දිරය මඟින් 'වෙනස්කමේ විශිෂ්ටයා' ලෙස නම්කර තිබේ.

මේ කරුණු හෙළිදරව් වී ඇත්තේ පසුගිය 30 වැනිදා වොෂින්ටන්හි පිහිටි ධවල මන්දිරයේදී ශ්‍රී ලාංකික මහාචාර්යවරයාට ගෞරව සම්මානයක් පිරිනැමීමත් සමඟය. ඇමෙරිකා ජාතිය ලෝකයේ හොඳම සහ විශිෂ්ටතම ජාතිය බවට පත්කිරීම සඳහා තම බුද්ධිය මෙහෙය වූ විශිෂ්ටයන්ට මේ ගෞරව සම්මාන පිරිනමන බව ඇමෙරිකා ධවල මන්දිරය මේ පිළිබඳව මාධ්‍ය නිවේදනයක් නිකුත් කරමින් සඳහන් කරයි.

මේ වන විට ඇමෙරිකාවේ චිකාගෝ නුවර පිහිටි ඉලිනොයිස් විශ්වවිද්‍යාලයේ භෞතික විද්‍යා මහාචාර්යවරයකු ලෙස සේවය කරන ශිවලිංගම් සිවනාදන් මහතා අල්-කයිඩා ත්‍රස්ත සංවිධානයේ නායකයා [3] වූ ඔසාමා බිල් ලාඩන් සොයා ගැනීමේ මෙහෙයුමට අවශ්‍ය තාක්ෂණය සම්පූර්ණයෙන්ම සොයාගෙන ඇත. ඊට යොදාගත් නයිට් විෂන් තාක්ෂණය ඇතුළු ස්වයංක්‍රීය තාක්ෂණික උපකරණ නිෂ්පාදනය කර ඇත්තේද මහාචාර්යවරයා විසිනි.


[1] සත්‍ය කරුණු : 

ඔසාමා පාකිස්ථානයේ සිටිනා බව සොයාගත්තේ සී.අයි.ඒ සංවිධානයයි. ඔසාමාගේ විශ්වාසවන්තම පණිවුඩ කරුවෙකු ගත් දුරකථන ඇමතුමකට රහසේ සවන්දී ඒ ඔස්සේ දැඩි පරිශ්‍රමයක් දැරීමෙනි. ඔසාමා සිටිනා ස්ථානය සැක හැර දැනගත් සී.අයි.ඒ සංවිධානය අමෙරිකානු විශේෂ බළකා මෙහෙයුම් මූලස්ථානයේ (Joint Special Operations Command-JSOC) අණදෙන නිළධාරී වයිස් අද්මිරාල් විලියම් මැක්රවෙන් හට මේ පිලිබඳව නිළ වශයෙන් දැනුම් දුනි. 

ඔසාමා මරාදැමූ Operation Neptune's Spear නම් කොමාන්ඩෝ මෙහෙයුම සැළසුම් කොට ක්‍රියාත්මක කරවූ "මහ මොළකරු" මව්බිම පත්තරේ කියන පරිදි ඉලිනොයි විශ්වවිද්යාලයේ ආචාර්ය සිවලින්ගම් සිවනාතන් නම් දැන් අමෙරිකානු පුරවැසිකම ගෙන ඇති ශ්‍රී ලාංකිකයා නොව, අමෙරිකානු විශේෂ මෙහෙයුම් මධ්‍යස්ථානයේ අණදෙන නිළධාරී වයිස් අද්මිරාල් විලියම් මැක්රවෙන්ය.

[2] සත්‍ය කරුණු : 

මහාචාර්ය සිවලින්ගම් සිවනාතන් 'වෙනස්කමේ විශිෂ්ටයා' (Champions of Change) ලෙස නම්වූ සම්මානයකින් පුදලද බව සැබෑය. ඒ ඔසාමා මෙහෙයුමේ මහ මොළකරු වීම නිසා හෝ එම මෙහෙයුමට අවශ්‍ය තාක්ශණික උපකරණ නිපදවූ නිසා නොවන බව වගකීමකින් කියන්නෙමු.

චැම්පියන්ස් ඔෆ් චේන්ජ් සම්මානය ලැබූ සියගණනක් පුද්ගලයින්ගේ තොරතුරු අමෙරිකානු ධවල මන්දිර වෙබ් අඩවියේ සඳහන්ය. මෙම සම්මානය ලබාදෙන්නේ අමෙරිඅකාව වෙත සංක්‍රමණයවී අමෙරිකාවේ දියුණුවට උරදුන් සංක්‍රමිණිකයින්ගේ දායකත්වය ඇගයිම සඳහාය. ආචාර්ය සිවනාතන් එවැනි ඇගයිමට ලක්වුනු සංක්‍රමණිකයෙකි. ඔහුට එම සම්මානය ලැබුණේ "Mercury cadmium telluride" නම් තාප සංවේදක සංයෝගයක් පිලිබඳව සිදුකල පර්යේෂණ මාලාවක් නිසාය. මෙම සංයෝගය යුධ හමුදා භාවිතා කරන නයිට් විශන් උපකරණ සෑදීමට මෙන්ම තාප සංවේදක මිසයිලවල සංවේදක උපකරණය නිර්මාණය  සඳහා යොදාගනී. එමෙන්ම ඩ්‍රෝන යානාවල ඇති අතිසංවේදී නයිට් විශන් කැමරාවලද මෙම සංයෝගය භාවිතාවේ.

සිවනාතන් ගේ පර්යේශණ නිසා අමෙරිකානු හමුදාවලට ඉතා හොඳ නයිට්විශන් උපකරන හා ඩ්‍රෝන යානා කැමරාවලට ඉතා හොඳ නයිට් විශන් හැකියාව ලැබීමට උපහාරයක් ලෙස ඔහුට මේ සම්මානය ලැබී ඇත.

[3] සත්‍ය කරුණු : 

මහාචාර්ය සිවනාතන් ඔසාමා මෙහෙයුමේ තාක්ශණ හා උපකරණ නිර්මාණය කලා නොව එම උපකරණ නිර්මාණයෙහිලා උපයෝගීවන තාක්ශණය නිර්මාණය කිරීමට පාදකවන මූලික සිද්ධාන්තමය පර්යේශණ සිදුකල විද්‍යාඥයෙකි. 

මහාචාර්ය සිවනාතන් විශිෂ්ඨයෙකු බව සැබෑය, එහෙත් ඔහු ඔසාමා මෙහෙයුමේ මොළකාරයා යයි කියනවා නම් රේඩියෝ සම්ප්‍රේශණය පිලිබඳව මුල්ම සාර්ථක පර්යේශණ සිදුකල මාර්කෝනි ලොව සියලු යුධ මෙහෙයුම්වල මොළකරුවා විය යුතුය. ඒ රේඩියෝ පණිවුඩ හුවමාරු තාක්ශණය නොමැති නම් ලොව කිසිදු යුධ මෙහෙයුමක් සිදුකල නොහැකි නිසාය. 

මේ තර්කය තවත් ඉදිරියට ගෙනයනවානම්, ශ්‍රී ලංකා හමුදාවන්ද ප්‍රභාකරන් ත්‍රස්තවාදියා විනාශකිරීමේ මෙහෙයුම්වලට නයිට් විශන් උපකරණ භාවිතා කලේය. එනම් ප්‍රභාකරන් මරාදැමීමේ මෙහෙයුමේ මහ මොළකරුවාත් ඇමරිකාවේ පදිංචි මහාචාර්ය සිවලින්ගම් සිවනාතන්ද?


Related Posts Plugin for WordPress, Blogger...