Related Posts Plugin for WordPress, Blogger...

Saturday, 27 August 2016

Palaeolithic and Mesolithic era of Sri Lanka | ශ්‍රී ලංකාවේ පූර්ව ශිලා හා මධ්‍යම ශිලා යුගයන්

ඉබ්බන්කට්ටුව පූර්ව ඓතිහාසික සුසාන සංකීර්ණය
පුරාවිද්‍යාඥ සිරාන් දැරණියගල මහතාට අනුව ශ්‍රී ලංකාවේ මානව ඉතිහාසය ඉන්දියාවේ මානව ඉතිහාසයට සමගාමීව යන අතර  මීට වසර මිලියනයකට පෙර සිටම ඉන්දියාවේ පෞරාණික මානව ක්‍රියාකාරකම් ගැන සාධක ලැබී ඇති නිසා (මිස්රා, 1995), මෙම මානවයින් ඉන්දියාව හා ලංකාව යාකරන පටු සමුද්‍ර සංධිය හරහා එම කාලයේදීම ලංකාව ජනාවාස කරන්නට ඇතැයි සිතිය හැකි බව පවසනවා (S U Deraniyagala, IUPPS - XIII Congress Proceedings, PRE & PROTOHISTROIC SETTLEMENTS IN SRI LANKA, 1996)  

වසර මිලියනයක කාල පරාසය තුල මානව ක්‍රියාකාරකම් පිලිබඳ සාධක ශ්‍රී ලංකාව තුලින් හමුවී නැතත්, ඉන්දියාව එම කාලවකවානුවේ ජනාවාස වී තිබූ බව තහවුරුවන බැවින් ශ්‍රී ලංකාව එකල ජනශූන්‍යව තිබුණා යනුවෙන් උපකල්පණය කිරීම අපහසුයි.


ශ්‍රී ලංකාවේ ප්‍රාග් ඉතිහාස වංශකතාව සැමරීම සඳහා 2005දී නිකුත්කල සමරු මුද්දර.
කෙසේ වෙතත්, පුරාශිලා යුගයේ විසූ හෝමෝ ඉරෙක්ටස් මානවයා වසර 500,000 - 300,000 අතර කාළයේ ඉතිරි කොට ගිය යම් යම් සාධක ලංකාවෙන් හමුවී ඇති අතර වසර 125,000 පමණ (පූර්ව ශිලා යුගයේ මැද කාළයේ) කාළයේ සාධක විශාල ලෙස හමුවෙනවා. 

මීට අවුරුදු 125,000 ඉහත දී මෙරට ආදිතම මානව ජනාවාස පැවැති බවට සාධක බුන්දලම හා යාල සිට ඉරනමඩු හරහා විල්පත්තුව දක්වා වැටී ඇති වෙරළබඩ වැලි කඳු ආශ‍්‍රිතව කළ පර්යේෂණ මගින් තහවුරු වී තිබෙනවා. බූන්දල අසල පුරාවිද්‍යා බිමෙහි කල කැණීම් වලින් තිරුවාණ (quartz) ගල් ආයුධ හමුවී තිබෙනවා. මේවා නිර්මාණය කරන ලද්දේ හෝමෝ ඉරෙක්ටස් වරුන් නොව, ඊටවඩා දියුණු නූතන මානවයා විසින් බව සැළකිය හැකි නමුත් ඔවුන්ගේ හැඩරුව හා ජීවන රටා පිලිබඳව අදහසක් ගැනීමට තරම් සාධක ඉතිරිව නෑ. කෙසේවෙතත් මොවුන් වෙනත් දකුණු ආසියානු දඩයක්කාර ගෝත්‍රවලින් විශාල ලෙස වෙනස්වූවා යැයි සිතන්නට බැහැ.

දකුණු ආසියානු ඓතිහාසික යුග: විකිපීඩියා
මෙසෝලිතික (මධ්‍ය ශිලා යුගයේ) ලංකාව

මෙසෝලිතික යුගයේ දිනවකවානු ප්‍රදේශ අනුව වෙනස්වන අතර දකුණු ආසියානු මෙසෝලිතික යුගය වසර 35,000-12,000 අතර යුගය ලෙස ගෙන ඇති බව විවිධ පුරාවිද්‍යා පර්යේෂණ පත්‍රිකා පරිශීලණය කිරීමේදී පෙනේ.

American Journal of Physical Anthropology පර්යේෂණ සඟරාවට "Upper pleistocene fossil hominids from Sri Lanka" නම් පර්යේෂණ පත්‍රිකාවක් සම්පාදනය කරන ආචාර්ය සිරාන් දැරණියගල හා පර්යේෂකයින් පිරිසක් දකුණු ආසියාවෙන් හමුවූ පැරණිතම හෝමෝ සැපියන් ෆොසිල ෆාහියන් ලෙන, බටඳොඹ ලෙන හා හා බෙලි ලෙනෙන් හමුවූ ඇතිබව ප්‍රකාශ කරනවා. 


මෙයින් ෆාහියන් ලෙනෙහි ෆොසිල සාධක වසර 34,000ක් පැරණි අතර බලංගොඩ සංස්කෘතිය ලෙස හැඳින්වෙන ලංකාවට අනන්‍ය ජීවන රටාවක් ගොඩනගාගත්, බලංගොඩ මානවයා හෙවත් හෝමෝසැපියන් බලන්ගොඩන්සීස් මානවයාගේ ෆොසිල බවට තහවුරුවී තිබෙනවා. බටඳොඹ ලෙනින් වසර 28,000ක් පැරණි ෆොසිල හා බෙලි ලෙනෙන් වසර 13,000ක් පැරණි සාධකද හමුවී තිබෙනවා.

ශ‍්‍රි ලංකාෙවි අවමඟුල් චාරිත‍්‍ර ඉටුකිරිම පිළිබද පුරාවිද්‍යාත්මකව පැරණිම සාධක හමුවන්නේ මධ්‍යශිලා යුගයට අයත් බලංගොඩ මානවයන් (Homo sapians Balangodensis) ජිවත් වු බෙල්ලන්බැඳිපැලැස්ස, කුරුවිට බටදොඔලෙන, කිතුල්ගල බෙලිලෙන, රාවණාඇල්ල ගුහාව යන ස්ථානයන්ගෙන් ය. 

මළසිරුර ගුහාවෙන් ඉවතට ගෙන ගොස්, ඵහි මාංශ කොටස් දියවී යාමෙන් අනතුරුව සම්පූර්ණ සැකිල්ල හෝ තෝරාගත් විශේෂ අස්ථි කීපයක් ආපසු එම තැනැත්තා ජිවත්ව සිටි ස්ථානයට ගෙනවිත් වළක් කපා නැමුණු ඉරියවුවකින් තැන්පත් කරනු ලැබේ. 

බෙල්ලන්බැදිපැලැස්සෙන් හමුවි ඇති අවුරුදු 6,000 පැරණි මිනිවලක් පරික්ෂා කිරිමෙන් මේ බව තහවුරුවී තිබෙනවා. මීට අමතරව ගුරුගල් පාට ආලේප කරන ලද මිනිස් හිස් කබලක් රාවනා ඇල්ල ගුහාවෙන් හමුවිමෙන් පෙනියන්නේ අස්ථිවල  වර්ණ තැවරිම කිසියම් ප‍්‍රාථමික චාරිත‍්‍ර විධි ක‍්‍රමයක් වශයෙන් කරන්නට ඇති බවයි.

එපමණක් නොව බටඳොඹ ලෙන (වසර 16,000) බෙලිලෙන (වසර 13,000) බෙල්ලන් බැඳි පැලැස්ස (වසර 6500) යන ස්ථානවලින් හමුවූ අස්ථි හා ලංකාවේ වැදි ජන ප්‍රජාවේ භෞතික ලක්ෂණ  සමාන බවත් පර්යේෂණාත්මකව මේවා සන්සන්දනය කිරීමේදී හෙලිවී තිබෙන බව ආචාර්ය සිරාන් දැරණියගල සිය පර්යේෂණ පත්‍රිකාවක සඳහන් කොට තිබෙනවා. (S U Deraniyagala, IUPPS - XIII Congress Proceedings, PRE & PROTOHISTROIC SETTLEMENTS IN SRI LANKA, 1996)  

මෙසෝලිතික බලංගොඩ මානවයාගේ උත්තුංග දේහය

2012 වසරේදී Ranasinghe, Priyanga; Jayawardana, M.A. Naveen A.A.D.; Constantine, Godwin R.; Sheriff, M.H. Rezvi; Matthews, David R.; Katulanda, Prasad  යන පර්යේෂකයින් Economics and Human Biology පර්යේෂණ සඟරාවට ඉදිරිපත්කල Patterns and correlates of adult height in Sri Lanka නම් පර්යේෂණ පත්‍රිකාවේ ශ්‍රී ලාංකික පිරිමියෙකුගේ සාමාන්‍ය උස (2005) සෙන්ටිමීටර් 165.6 කුත් කාන්තාවකගේ සාමාන්‍ය උස සෙන්ටිමීටර් 154ක් බව පෙන්වාදී තිබෙනවා.

ආචාර්ය සිරාන් දැරණියගල 1992දී බලංගොඩ මානවයාගේ අස්ථි සම්බන්ධව සිදුකල ගණනය කිරීම් වලදී පුරුෂ  බලංගොඩ මානවයෙකුගේ සාමාන්‍ය උස සෙන්ටිමීටර් 174ක් බවත් ස්ත්‍රියකගේ උස සෙන්ටිමීටර් 166ක් බවත් පෙනීගොස් තිබෙනවා. මේ අනුව බලංගොඩ මානවයින් අද ලාංකිකයෙකු හා සසඳන විට සෙන්ටිමීටර් 9ක් වැනි විශාල පරාසයකින්  උසින් වැඩි උත්තුංග දේහධාරී ශක්තිමත් මිනිසුන් පිරිසක් වූ බව පැහැදිලියි. ඔවුන්ගේ අස්ථිද බරින් වැඩි, ඉතා ශක්තිමත් ඒවා බව පර්යේෂණ පත්‍රිකාවේ සඳහන් වනවා. ඔවුන් ජීවත්වූ පරිසරය (biotic environment) පෝෂ්‍යදායි ආහාර සුළභවූ, උණුසුමෙන් අඩු, සුවදායි පරිසරයක් වීම මෙයට එක් හේතුවක් විය හැකියි. ශක්තිමත් සිරුරක් ඇවසිවූ රළු දිවිපෙවෙත තවත් හේතුවක් වන්නට පුලුවන්.

මූලාශ්‍ර

Deraniyagala, S. U. (1996), Pre and Protohistoric Settlement in Sri Lanka, In XIII International Congress of Prehistoric and Protohistoric Sciences – Forli -Italia, September 1996 – vol.5/by. International Union of Prehistoric and Protohistoric Sciences (277-285)

Unravelling an ancient secret
http://www.sundaytimes.lk/120624/plus/unravelling-an-ancient-secret-4068.html

ඉබ්බන්කට්ටුව සුසාන සංකීර්ණයෙන් හෙලිවන පූර්ව ඓතිහාසික යුගයේ ශ‍්‍රී ලංකාවේ සුසානකරණය
https://www.archaeology.lk/si/article.php?articleID=1171

ශ්‍රී ලංකාවේ ප්‍රාග් ඓතිහාසික පර්යේෂණ හා සිරාන් දැරණියගල
https://www.archaeology.lk/si/article.php?articleID=123

Prehistory of Sri Lanka
https://en.wikipedia.org/wiki/Prehistory_of_Sri_Lanka

මෙගලිතික යුගයට අයත් ඉබ්බන්කටුව ඓතිහාසික සුසාන භූමියෙන් වසර 2600 ක් පැරණි සොහොනක් හමුවෙයි
http://vidya-gaweshana.blogspot.com/2015/10/2600.html

List of average human height worldwide
https://en.wikipedia.org/wiki/List_of_average_human_height_worldwide#cite_note-srilanka-119

__________________________________________________________________________

Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Friday, 26 August 2016

How tall was Balangoda Man? | මධ්‍ය ශිලා යුගයේ විසූ අපගේ බලංගොඩ මීමුත්තාගේ උස දන්නවා? (අපිට වඩා ගොඩක් උසයි )


ලංකාවේ ශිලා යුග ගැන ලිපියක් ලිවීම සඳහා ආචාර්ය සිරාන් දැරණියගල මහතාගේ පර්යේෂණ පත්‍රිකා කියවද්දී අපූරු තොරතුරක් හමුවුනා. ඒ තමයි අපේ බලංගොඩ මීමුත්තන්ගේ ශරීර ස්වභාවය. දැරණියගල පඬිතුමාගේ පර්යේෂණ දත්තවලට අනුව අපේ බලංගොඩ මීමුත්තාගේ පරපුර අපට වඩා ගොඩක් උසමහත, ගමේ භාශාවෙන් කියනවා නම් හයයි හතරේ මිනිස්සු.

2012 වසරේදී Ranasinghe, Priyanga; Jayawardana, M.A. Naveen A.A.D.; Constantine, Godwin R.; Sheriff, M.H. Rezvi; Matthews, David R.; Katulanda, Prasad යන පර්යේෂකයින් Economics and Human Biology පර්යේෂණ සඟරාවට ඉදිරිපත්කල Patterns and correlates of adult height in Sri Lanka නම් පර්යේෂණ පත්‍රිකාවේ ශ්‍රී ලාංකික පිරිමියෙකුගේ සාමාන්‍ය උස (2005 වසරේ ලබාගත් දත්ත අනුව) සෙන්ටිමීටර් 165.6 කුත් කාන්තාවකගේ සාමාන්‍ය උස සෙන්ටිමීටර් 154ක් බව පෙන්වාදී තිබෙනවා.

ආචාර්ය සිරාන් දැරණියගල 1992දී බලංගොඩ මානවයාගේ අස්ථි සම්බන්ධව සිදුකල ගණනය කිරීම් වලදී පුරුෂ බලංගොඩ මානවයෙකුගේ සාමාන්‍ය උස සෙන්ටිමීටර් 174ක් බවත් ස්ත්‍රියකගේ උස සෙන්ටිමීටර් 166ක් බවත් පෙනීගොස් තිබෙනවා. මේ අනුව බලංගොඩ මානවයින් අද ලාංකිකයෙකු හා සසඳන විට සෙන්ටිමීටර් 9ක් වැනි විශාල පරාසයකින් උසින් වැඩි උත්තුංග දේහධාරී ශක්තිමත් මිනිසුන් පිරිසක් වූ බව පැහැදිලියි.

ඝණ ඇහිබැම, පුළුල් නාසය, විශාල දත් හා ශක්තිමත් හකුපාඩා යන ලක්ශණවලින් යුතුවුනු බලංගොඩ මුත්තාගේ පරපුරේ අස්ථිද බරින් වැඩි, ඉතා ශක්තිමත් ඒවා බව පර්යේෂණ පත්‍රිකාවේ සඳහන් වනවා. ඔවුන් ජීවත්වූ පරිසරය (biotic environment) පෝෂ්‍යදායි ආහාර සුළභවූ, උණුසුමෙන් අඩු, සුවදායි පරිසරයක් වීම මෙයට එක් හේතුවක් විය හැකියි. ශක්තිමත් සිරුරක් ඇවසිවූ රළු දඩයක්කාර දිවිපෙවෙත තවත් හේතුවක් වන්නට පුලුවන්.

කොහොම වුනත් අපි මතක තියාගන්න ඕනෑ බලංගොඩ මානවයා කියන්නේ වානරයාට වඩා සමානවුනු, පරිණාමය නොවූ, වඳුරුපෙනුමක් ඇති මිනිසෙකු නොව, නූතන, බුද්ධිමත් හෝමෝ සැපියන් මානවයෙකු බවයි. බලංගොඩ මානවයා පිලිඹිඹු කෙරෙන රූපසටහන් බොහොමයක ඔහුව නියැන්ඩර්තාල් ගණයේ මානවයෙකු ලෙස හෝ ඊටත් පැරණි අර්ධ මානවයෙකු ලෙස පෙන්නවනවා. මෙය ඉතාමත් වැරදි දැක්මක්.

බලංගොඩ මානවයා පූර්ණලෙස පරිණාමය වූ හෝමෝ සැපියන් මානවයෙක් 

පහත රූපය බලන්න. මෙහි බලංගොඩ මානවයා ලෙස පෙන්වා ඇත්තේ හෝමෝ ඉරෙක්ටස් මානවයාටත් වඩා පැරණි හෝමෝ හැබිලිස් වැනි අර්ධ මානවයෙක්. අවාසනාවකට මෙම රූපසටහන තිබෙන වෙබ් අඩවිය "කැළණිය විශ්වවිද්‍යාලය" අනුබද්ධ ආයතනයක් බව එහි පැවසෙනවා.



මූලාශ්‍ර

Deraniyagala, S. U. (1996), Pre and Protohistoric Settlement in Sri Lanka, In XIII International Congress of Prehistoric and Protohistoric Sciences – Forli -Italia, September 1996 – vol.5/by. International Union of Prehistoric and Protohistoric Sciences (277-285)

List of average human height worldwide
https://en.wikipedia.org/wiki/List_of_average_human_height_worldwide#cite_note-srilanka-119
__________________________________________________________________________


Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Thursday, 25 August 2016

Bird life in Peak Wilderness Sanctuary | සමනල අඩවිය රක්ෂිත වනාන්තරයේ දැකිය හැකි කුරුල්ලන්



සමනල අඩවිය රක්ෂිත ප්‍රදේශය එකිනෙකට යාව පිහිටි වනාන්තර කොටස් හතරකින් සමන්විත වේ. ඒවා නම්;
  1. සමනල අඩවි ස්වභාවික රක්ෂිතය,
  2. ශ්‍රී පාද සංරක්ෂණ වනාන්තරය,
  3. මොරහෙල සංරක්ෂණ වනාන්තරය
  4. වලවේ නිම්න සංරක්ෂණ වනාන්තරය
ලෙස නම්කොට ඇති, වන සංරක්ෂණ දෙපාර්තමේන්තුව යටතේ පාලනය වන රක්ෂිත වනාන්තරයි. 1940 වසරේදී අභයභූමියක්‌ බවට පත් කළ ශ්‍රීපාද අඩවිය, සංරක්‍ෂණය කිරීමේ අවශ්‍යතාව මත 2007 වසරේදී එහි හෙක්‌ටයාර් 12979 ක්‌ ස්‌වභාව රක්‍ෂිතයක්‌ බවට පත් කළ අතර, ශ්‍රීපාද පද්මය, එහි ළඟා විය හැකි මාර්ග පද්ධතිය යනාදිය ඇතුළත්ව තවත් හෙක්‌ටයාර් 9400 ක්‌ අභයභූමිය ලෙසම පවතී. ශ්‍රී ලංකාවේ උසින් හතරවැනි ස්‌ථානයේ ලා ගැනෙන (උස මීටර් 2243) සමනල කඳු මුදුන මීට අයත්වන අතර (ශ්‍රීපාද පද්මය), ශ්‍රීපාද අඩවිය රත්නපුර, නුවරඑළිය හා කෑගල්ල දිස්‌ත්‍රික්‌ තුනට අයත්වේ.

යුනෙස්‌කෝ සංවිධානයේ විශේෂ කණ්‌ඩායමක්‌ ශ්‍රී ලංකාවට පැමිණ දුම්බර, හෝර්ටන්තැන්න හා ශ්‍රීපාද අඩවිය අධ්‍යයනයට ලක්‌කර තම නිර්දේශය යුනෙස්‌කෝ සංවිධානය වෙත ලබාදී තිබූ අතර 2010 ජූලි මාසයේදී ලෝක උරුම වනාන්තර ලෙස ප්‍රකාශයට පත්කරන ලද්දේ ශ්‍රීපාද අඩවිය, හෝර්ටන්තැන්න, නකල්ස්‌ හෙවත් දුම්බර වනාන්තරයයි. බ්‍රසීලයේදී පැවැති යුනෙස්‌කෝ සමුළුවේදී මෙම වනාන්තර ලෝක උරුමයන් බවට ප්‍රකාශයට පත් කෙරුණු අතර, මෙතෙක්‌ පැවැති ලෝක උරුම වනාන්තරය වන "සිංහරාජය" ද සමග මෙසේ අප රටේ ලෝක උරුම වනාන්තර හතරක්‌ ප්‍රකාශයට පත්වීම රටේ ශ්‍රී ලංකාවේ අපූර්ව ජෛව විවිධත්වය ලෝක අවධානයට පත්වූ තවත් අවස්ථාවකි.

ගමන් මාර්ග

පක්ෂීන් නැරඹීම සඳහා වන්දනාකරුවන් සිරිපා පතුලවෙත යන විවිධ මාර්ග යොදාගත හැකිය.

  1. සිරිපා ගම පුරාණ විහාරය අසලින් ඇරඹෙන පල්ලබැද්දල සිරිපා මාර්ගය
  2. කුරුවිට, එරත්න සිට ඇරඹෙන සිරිපා වන්දනා මාර්ගය
  3. නල්ලතන්නියේ සිට ඇරඹෙන සිරිපා වන්දනා මාර්ගය 

මීට අමතරව තවත් මංපෙත් තිබිය හැකිය.

සිරිපා රක්ෂිත වනාන්තර ප්‍රදේශවල පක්ෂීන් නැරඹීම

පක්ෂීන් නැරඹීම සඳහා සිරිපා අඩවියට පැමිණීමේදී සිරිපා කරුණාකිරීමේ වාරය මගහැරීමට හැකිනම් වඩාත් හොඳ වන්නේ අධික ජනගහනය, ඝෝෂාව, වාහන ආදිය නිසා පක්ෂීන් වනාන්තරය ඇතුලට වී සිටීම නිසායි.

එමෙන්ම වාරයේ මෙන් නොව අවාරයේ සිරිපාදේ මිනිස් පුළුටක් නොමැති නිසා මුළු ප්‍රදේශයේම ඇත්තේ දැඩි පිරිසුදු බවක්. ශ්‍රීපාදය හා අවට පරිසරය තුළින් පෙන්නුම් කෙරෙන චමත්කාරය ශ්‍රී ලංකාවේ වෙනත් ස්ථානයකින් දැක ගැනීමට නොහැකිය.

අවාරය කාලය තුළ පිපෙන මල් වර්ග, දලුලන වැල් වර්ග, ගස් වර්ග සංඛ්‍යාව සහ එහි විචිත්‍රවත් බව වචනයෙන් විස්තර කිරීමට අපහසුය. එම ගස් වර්ග, මල් වර්ග, පැළෑටි වර්ග, වැල් වර්ග දකින්න ලැබෙන්නේ අවාරයටම පමණක් වීම එහි තිබෙන විශේෂත්වයයි. සමහර මල් වර්ග, පැළෑටි වර්ග ඉතා දුර්ලභ වන අතර ඇතැම් උද්භිද විද්‍යාඥයන් පෙන්වා දෙන්නේ ලෝකයෙන්ම එම මල් වර්ග, පැළෑටි වර්ග තිබෙන එකම ස්ථානය වන්නේ ශ්‍රීපාද අඩවිය බවයි.

සිරිපා අඩවියේ දැකිය හැකි කුරුළු වර්ග

Ceylon Bird Club සමාජයේ වෙබ් අඩවියට අනුව සිරිපා අඩවියේ පහල ප්‍රදේශවල හා ඉහල ප්‍රදේශවල පක්ෂීන් ගණනාවක් දැකිය හැකිය.


සිරිපා රක්ෂිත වනාන්තර පහල ප්‍රදේශවල දැකිය හැකි පක්ෂීන්


Ceylon Blue Magpie - ශ්‍රී ලංකා කැහිබෙල්ලා (Urocissa ornata)  ශ්‍රී ලංකාවට ආවේණික දුර්ලභ පක්ෂියෙකි.

Image (C) Oriental Bird Club

Ceylon Rufus Babbler / Sri Lanka Orange-billed Babbler රතු දෙමලිච්චා (Turdoides rufescens)

Image (C) Oriental Bird Club

Ashy Headed Laughing Thrush අළු-දෙමලිච්චා (Garrulax cinereifrons)

Image (C) Adventure Birding Sri Lanka

Layard’s Parakeet අළු ගිරවා (Psittacula calthropae)

Image (C) Sheau Torng Lim via Flickr.com

Ceylon Green Pigeon /  Pompadour green pigeon පිට රතු බටගොයා / පොම්පදෝරු බටගොයා (Treron pompadora)

Image (C) Chamith Chandrasekara via charlirox-slbirds.blogspot.com/

Black Eagle කළුකුස්සා (Ictinaetus malayensis)

Image (C) si.wikipedia.org

Mountain Hawk Eagle  හෙල් කොණ්ඩකුස්සා (Spizaetus nipalensis)

Image (C) Pathmanaath Samaraweera via www.orientalbirdimages.org

Ceylon Grey Hornbill ශ්‍රී ලංකා අළු කෑදැත්තා (Ocyceros gingalensis )

Image (C) Loïc Epelboin via www.oiseaux.net

Ceylon Crested Drongo   (Dicrurus lophorhinus)

Ceylon Crested Drongo (Sri Lanka Endemic). Sinharaja Rainforest, Sri Lanka (1 Jan 2012)
Image (C) Vinchel Budihardjo via Flickr.com


Ceylon Trogon / Malabar Trogon මහ ගිනි-කුරුල්ලා / ලෝහවන්නිච්චා (Harpactes fasciatus)


Image (C) Kithsiri Gunawardene via www.images.ceylonbirdclub.org

Scarlet Minivet / Flame Minivet / Orange Minivet දිලිරත් මිණිවිත්තා (Pericrocotus flammeus)

Image (C) Subhasis Roy via www.orientalbirdimages.org

Green-billed Coucal බට ඇටි-කුකුළා (Centropus chlororhynchus)

Note : සාමාන්‍ය ඇටිකුකුළාගේ හොටය කළු පැහැවන අතර, බට ඇටිකුකුළාගේ හොටය කහපාටට හුරු ලා කොළ පැහැයක් හෝ අඳුරු සුදුපැහැයක් ගනී.

Image (C) Athula Edirisinghe via The Internet Bird Collection

Ceylon Jungle Fowl වලි-කුකුළා (Gallus lafayettii)

Image (C) www.heatherlea.co.uk/birdwatching-holidays-new-sri-lanka

Ceylon Spurfowl හබන් කුකුළා (Galloperdix bicalcarata)

Image (C) Mapalagama K Premasiri via http://orientalbirdimages.org/

සිරිපා රක්ෂිත වනාන්තර උසින් වැඩි ප්‍රදේශවල දැකිය හැකි පක්ෂීන්


Ceylon Whistling Thrush / Ceylon Arrenga අරංගයා (Myophonus blighi) 

Image (C) Kithsiri Gunewardhena via www.ceylonbirdclub.org

Yellow-eared Bul Bul කහකන් කොණ්ඩයා (Pycnonotus penicillatus)

Image (C) Ayanthi Samarajeewa via www.images.ceylonbirdclub.org

Ceylon Hill White Eye / Sri Lanka White Eye සිතැසියා (Zosterops ceylonensis)

Image (C) Chamith Chandrasekara via charlirox-slbirds.blogspot.com

Grey-headed Canary Flycatcher අළුහිස් කහ-මැසිමාරා (Culicicapa ceylonensis)

Image (C) http://feathersofsrilanka.lk/

Dusky Blue Flycatcher / Dull Blue Flycatcher නීලන්-මැසිමාරා (Eumyias sordida)

Image (C) Pathmanath Samaraweera via http://animalia-life.com/

Ceylon Wood Pigeon මයිල පරවියා (Columba torringtoni)

Image (C) Fran Trabolon via Arkive.org

Scaly Thrush කායුරු තිරාසිකයා (Zoothera dauma)

Image (C) Gary Kinard via Flickr.com
Sources:

වන සංරක්ෂණ දෙපාර්තමේන්තුව - ලෝක උරුම වන භූමි

CEYLON BIRD CLUB - BIRD WATCHING SITES

ශ්‍රී ලංකාවේ කුරුළු නාමාවලිය

Rathnapura Palabaddale Trail to Sripada (Adam’s peak)

Kuruwita Erathna Trail to Sri Pada (Adam's Peak)

Ratnapura Palabathgala Trail to Sripada (Adam's peak)

Hatton, Nallathanni trail to Sri Pada (Adam's Peak)

Deraniyagala, Udamaliboda (Ihala-Maliboda) Trail to Sri Pada (Adam's Peak)

__________________________________________________________________________ Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Wednesday, 24 August 2016

පෘථිවිය 2.0 සොයාගැනේ? | Earth 2.0 found?

පෘථිවියේ නිවුන් සොයුරිය යැයි විද්‍යාඥයින් පවසන ප්‍රොක්සිමා සෙන්ටෝරි තාරකාව වටා ගමන් කරන ග්‍රහලෝකය සිත්තර ඇසින්



























නාසා ආයතනයේ කෙප්ලර් අභ්‍යවකාශ නිරීක්ශණ යානයෙන් ගන්නා ලද ඡායාරූප හා දත්ත ආධාරයෙන්, යුරෝපීය අභ්‍යවකාශ ඒජන්සියට අයත් දකුණු යුරෝපීය අභ්‍යවකාශ නිරීක්ශණ ආයතනය (Southern European Observatory) මගින්, පෘථිවියට ආසන්නයේම ඇති ප්‍රොක්සිමා සෙන්ටෝරි තාරකාව වටා බ්‍රමණය වන පෘථිවියට ඉතාම සමාන ග්‍රහලෝකයක් සොයාගෙන ඇත.

මෙම ග්‍රහලෝකය, ප්‍රොක්සිමා සෙන්ටෝරි වටා ගමන් කරන කක්ෂය, ග්‍රහලෝකය මත ද්‍රව ජලය හටගැනීමට තුඩුදෙන පරාසයේ පවතින බව විද්‍යාඥයින් පවසනවා. "ගෝල්ඩිලොක්ස් zone" ලෙස හඳුන්වන මෙම පරාසයට වඩා ඇතුලත කක්ශයක ග්‍රහයා ගමන් කරන්නේනම්, තාරකාවට ආසන්නවීම නිසා දැඩි උණුසුමෙන් ද්‍රව ජලය හටගන්න්නේ නෑ. ඈතින් පිහිටියහොත්, ශීතල අයිස් ග්‍රහලෝකයක් වනවා.

මෙම ග්‍රහලෝකය අයත් ප්‍රොක්සිමා සෙන්ටෝරි තාරකාව 1915දී පෘථිවියට ලඟින්ම ඇති තාරකාව ලෙස හඳුනාගන්නා ලද අතර එය ආලෝක වර්ශ 4.2ක් ඈතින් පවතින බවට ගණන්බලා තිබෙනවා.


කෙප්ලර් අභ්‍යවකාශ නිරීක්ශණ යානය විසින් මීට පෙරද ගෝල්ඩිලොක්ස් පරාසයේ ඇති ග්‍රහලෝක සොයාගෙන ඇති නමුත් පෘථිවියට ලඟින්ම ඇති තාරකාවේ මෙවන් ග්‍රහලෝකයක් ඇති බව සොයාගත් පලමු අවස්ථාවයි. අනාගතයේ වෙනත් සූර්යයෙකු වෙත් ගවේෂණ යානයක් යවන්නේ නම්, එය යැවීමට සුදුසුම තාරකාව බවට ප්‍රොක්සිමා සෙන්ටෝරි පත්ව තිබෙනවා. 

අද දිනයේ (අගෝස්තු 24) යුරෝපීය අභ්‍යවකාශ ඒජන්සිය මගින් පැවැත්වීමට නියමිත ප්‍රවෘත්ති සාකඡ්ඡාවකදී මෙම ග්‍රහලෝකය පිලිබඳ විස්තර නිළවශයෙන් ප්‍රකාශ කෙරෙනු ඇති.

http://www.dailymail.co.uk/sciencetech/article-3754523/A-second-Earth-revealed-tomorrow-Habitable-planet-orbiting-sun-s-neighbour-host-alien-life.html

__________________________________________________________________________ Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Tuesday, 23 August 2016

Independence Day: Resurgence චිත්‍රපටයේ විද්‍යාත්මක විවරණය || The Science of Independence Day: Resurgence



මේ ලිපිය මගින්  Independence Day (1996) හා Independence Day: Resurgence (2016) චිත්‍රපටවල ගම්‍ය කරන පිටසක්වල තාක්ශණය සාරාංශ ගත කිරීමට හා  හා පිටසක්වලයින්ගේ හැරිසිරීම් රටා කොතරම් විද්‍යාත්මකදැයි සොයාබැලීමට උත්සහකොට ඇත.

1996 - Independence Day පටන් ගත්ත තැන සිට


1996 ජූලි 2වැනිදා, කිලෝමීටර් 860ක් පමණ විශාල පිටසක්වල යානයක් පෘථිවිය වටා කක්ශගත වේ. මෙය විශාලත්වයෙන් අපගේ සඳහි විශාලත්වයෙන් අඩක් වූ අතර එය කිලෝමීටර් 24ක් විශාල උපයානා 36කට වෙන්වී පෘථිවියේ විශාලතම නගර ඉහලින් ස්ථානගත වේ.

පසුව හෙලිවන ආකාරයට 1947දී රොස්වෙල් වෙත කඩාවැටුනු පිටසක්වල යානාව, මෙම ජීවීන් භාවිතාකරන කුඩා ප්‍රහාරක/ඔත්තුබලන යානාවක් වන අතර එය හා එහි ගමන්ගත් පිටසක්වල ජීවීන් තිදෙනා නෙවාඩාහි Area 51 රහසිගත කඳවුරට ගෙන ගොස් ඇත.

මව් යානයටත්, උපයානාවලටත්, කුඩා ප්‍රහාරක යානාවලටත් ඕනෑම අන්දමක ප්‍රහාරයකින් ආරක්ශාවිය හැකි Force Field නම් ආරක්ශක උපක්‍රමයක් ඇති අතර යානාවලට එල්ලවන ඕනෑම ප්‍රහාරයක් මෙම Force Field හි ගැටී අකර්මණ්‍යවේ.

මෙම Force Field එක පාලණය වන්නේ යානයේ පරිගණක පද්ධතියෙන් බව වටහාගන්නා  MIT විශ්ව විද්‍යාලයේ  අතිදක්ශ ඉලෙක්ට්‍රොණික ඉන්ජිනේරුවෙකු හා පරිගණක විශේෂඥයෙකු වන ඩේවිඩ් ලෙවින්සන්, මෙම Force Field අකර්මණ්‍ය කිරීම සඳහා යානයේ පරිගණකය සුලුවේලාවකට අකර්මණ්‍ය කල හැකි පරිගණක වෛරසයක් ඒරියා 51 ඇති 1947 කඩාවැටුනු පිටසක්වල යානය ආධාරයෙන් අත්හදා බලයි.

මෙම ප්‍රහාරක යානයෙන් පරමාණු බෝම්බයක් හා පරිගණක වෛරසය රැගෙන උප යානයක් වෙත පියාසර කරන ඩේවිඩ් ලෙවින්සන් හා මැරීන් හමුදාවේ ප්‍රහාරක ජෙට් නියමු කපිතාන් ස්ටීවන් හිලර් (විල් ස්මිත්) වෛරසය උපයානයට මුදා හැර එහි හා එයට ඉලෙක්ට්‍රොණිකව සම්බන්ධව ඇති අනෙක් සියලු උපයානාවල Force Field අකර්මණ්‍ය කරදමයි. ඒ අවසරයෙන් සියලු උපයානාවලට දැවැන්ත ප්‍රහාරයක් එල්ල කරන අතර, න්‍යශ්ඨික බෝම්බයෙන් ලෙවින්සන්/හිලර් අකර්මන්‍යකල උප යානය විනාශවේ.

1996 චිත්‍රපටයෙන් අප දැනගන්නා විද්‍යාත්මක  කරුණු

1940 ගණන්වල සිටම මෙම පිටසක්වලයින් පෘථිවිය පිලිබඳව සෙවිල්ලෙන් සිට ඇත. 1947දී රොස්වෙල් වෙතට කඩා වැටුනේ මොවුන්ගේ ඔත්තුබලන/ප්‍රහාරක යානාවකි. එහි පිටසක්වලයින් තිදෙනෙකු ගමන් කොට ඇත.

1947 රොස්වෙල් වලට කඩාවැටුනු පිටසක්වලයින් තිදෙනාගෙන් දෙදෙනෙකු මිය යන අතර අනෙකා කෝමා තත්වයෙන් සිටී. මොවුන් අදාලව කරන ලද පර්යේෂණවලට අනුව ඔවුන්;

පෘථිවියේ ඇති සියලු ජීවය මෙන්ම කාබන් මූලික ජීවීන්ය

ඔක්සිජන් ආස්වාස කරති

කුඩා දුර්වල ජීවීන් වන මොවුන් මුලු ජීවිතකාලයම ජීව-යාන්ත්‍රික පිටසැකිල්ලක් තුල (bio-mechanical exoskeleton ) ජීවත්වේ.

එම සැකිල්ල ඔවුනට ඕනෑම පරිසරයක ජීවත්වීමට අවශ්‍ය ඔක්සිජන්, පෝශණය, මෙවලම් හා ආයුධ භාවිතය සඳහා ශක්තිමත් හා සුනම්‍ය දෑත්, හා සංචරණය (locomotion) සඳහා පාද යුගලක් හා අවශ්‍ය යාන්ත්‍රික ශක්තිය ලබාදේ.

ඔවුන්ගේ යානා ගමන් කරන අධික වේගයන් හා ගුරුත්ව බලයන්ගෙන් (g-forces) ආරක්ශා කරන පියාසර ඇඳුමක් (flight suit) ලෙස ක්‍රියාත්මක වීමද මෙම සැකිල්ල මගින් සිදුකරයි.

4. ස්ථීර පදිංචියක් නැති (nomadic) ජීවන රටාවක් ඇති මෙම පිටසක්වල ජීවී වර්ගය විශ්වයේ සැරිසරමින් විවිධ ග්‍රහලෝකවලට පහරදී එහි ඇති ජීවය විනාශකොට, ග්‍රහලෝකයේ සියලු සම්පත් සූරාගනී. එක් ග්‍රහලොවක් විනාශකල පසු තවත් එකක් සොයමින් ගමන් කරයි.

5. ටෙලිපති (චෛතිසික) බලයෙන් සන්නිවේදනය කරන ඔවුන්ට මිනිස් මනසට ඇතුලුවී ඔවුන්ගේ සිතැඟි දැක්වීමේ හැකියාව ඇත.

2016 - Independence Day: Resurgence චිත්‍රපටයෙන් අප දැනගන්නා විද්‍යාත්මක කරුණු

Harvester Ships

මෙම පිටසක්වලයින් සතුව, පෘථිවියට 1996දී පැමිණි මව් යානාවට වඩා අතිවිශාල "harvester" නම් මව් යානා ඇත. පෘථිවියට 2016දී පැමිණෙන හාවස්ටර් යානය සැතපුම් 3000ක්, එනම් කිලොමීටර් 4800 පලල, අඟහරු ග්‍රහයාටත් වඩා විශාල (අඟහරුවා කිලෝමීටර් 3400ක් පමණ විශාලත්වයකින් යුතුය ) අති දැවැන්ත යානයකි.

Harvester Queen

මෙවැනි හාවෙස්ටර් යානයක රැජිණක් (harvester queen) ලෙස හඳුන්වන බලසම්පන්න පාලිකාවක් ඇති අතර මෙය යානය තුල සිටින ලක්ශ ගණනින් වන පිටසකවලයින් සියල්ලගේම නායිකාව ඇයවේ. මෙවැනි නායිකාවන් ගණනාවක් දැවැන්ත හාවෙස්ටර් යානාවලින් විශ්වයේ තැනින් තැන යමින් ග්‍රහලෝක තමන් සතුකරගන්නා අතර ඔවුන් සියලුදෙනාම චෛතිසිකව එකිනෙකාට සම්බන්ධව සිටී.

විශ්වයේ ජීවත්වන බොහෝ ශිෂ්ඨාචාර මොවුන් අතින් විනාශවී ඇති අතර ඔවුන් වසන්ගතයක් මෙන් විශ්වය පුරා පැතිර සිටී.

Hive Mind

හයිව් මයින්ඩ් හෙවත් මීවද මනසක් ආකාරයට මොවුන් ක්‍රියාත්මක වන අතර මීවදයක රැජින මෙන්, මෙම පිටසක්වල ජීවීන් පවතින්නේ රැජිණගේ ආරක්ශාවට හා ඇයගේ අණ ක්‍රියාත්මක කිරීමටය. ඔවුන් සියලුදෙනාම යම් රැජිණකගේ මනසට චෛතිසිකව සම්බන්ධව ඇති අතර විශ්වය පුරා පැතිර සිටින සියලුම හාවෙස්ටර් රැජිණියන් සිය මනස් මගින් එකිනෙකා හා සම්බන්ධව සිටී.

Alien Technology

ඔවුන්ගේ තාක්ෂණය අපගේ තාක්ෂණයට වඩා වසර 1000ක් වත් ඉදිරියෙන් ඇති තාක්ෂණයකි. තාරකා අතර සංචරණය (interstellar travel) ඉතා පහසුවෙන් සිදුකරති. 

අධික වේගයෙන් යන අතිවිශාල පිටසක්වල යානා ගොඩනගති. පෘථිවිය වටා ඇති අභ්‍යවකාශය නිරන්තරයෙන් නිරීක්ෂණය කරන Deep Space Network නිරීක්ෂණ පද්ධතියට හසුනොවී පෘථිවිය අසලටම පැමිණීමට මොවුන්ට හැකිවන්නේ ඔවුන් පණුසිදුරු (Wormholes / අයින්ස්ටයින්-රෝසෙන් පාලම්) ආධාරයෙන් ගමන් කරණ නිසාවිය යුතුය.

සූර්යයා තුල බළය නිපැදවෙන න්‍යෂ්ඨික විළයනය (nuclear fusion) මගින් බලය ලබාගත හැකි ෆියුෂන් එන්ජින් මගින් ඔවුන්ගේ යානා බලගැන්වේ.

ආරක්ශිත ආවරණයක් ලෙස ක්‍රියාත්මක වන Force Field නම් ආරක්ශක උපක්‍රමයක් නිර්මාණය කරගෙන ඇත.

ඔවුන්ගේ හාවෙස්ටර් යානා බලගැන්වීම සඳහා ග්‍රහලෝකවල මධ්‍යයේ ඇති "inner core" කොටස උකහා ගන්නා බව චිත්‍රපටයේ සඳහන්වේ. කෙසේ වෙතත් පෘථිවියේ "ඇතුළු මධ්‍යය" යකඩ හා නිකල් වලින් සමන්විත ඝණ ගෝලයක් බව සොයාගෙන ඇති අතර මෙය මගින් යානා බල ගැන්වෙන්නේ කෙසේදැයි පැහැදිලි නැත. නමුත් පෘථිවියට සිය ඇතුළු මධ්‍යය අහිමි වුවහොත්, එමගින් පෘථිවිය සතු චුම්බක ක්ෂේත්‍රය අහිමිවීම මගින් වායුගෝලය අහිමිවී සියලු ජීවය අවසන් විය හැකිය.

චිත්‍රපටයේ ගම්‍ය කරන පිටසක්වල තාක්ශණය හා පිටසක්වලයින්ගේ හැරිසිරීම් රටා කොතරම් විද්‍යාත්මකද?

මෙයට "ඔව්" මෙන්ම "නැත" ලෙසද පිලිතුරු සැපයිය හැකිය.

"ඔව්"

මේ පිටසක්වලයින්ගේ හැසිරීම මානව හැසිරීම හා සමානය. මානවයින්ද එකිනෙකා, විශේෂයෙන්ම බලවතුන් දුර්වලයින් යටත්කර ගැනීම, ධනය හා සම්පත් සූරාකෑම හා වහලුන් ලෙස තබාගැනීමේ හැසිරීම් පෙන්වයි. නට්සි ජර්මනියේ හිට්ලර්, මධ්‍යම අමෙරිකාවේ ඇස්ටෙක් ශිෂ්ඨාචාරය විනාශකල ස්පාඤ්ඤ ආක්‍රමණිකයින් (1500 AD), මොන්ගෝලියානු ආක්‍රමණික ජෙන්ගිස් ඛාන් (1200 AD) , නැගෙනහිර යුරෝපයේ පැතිරසිටි ප්‍රජාවක්වූ හන්වරුන් එක්සත් කොට යුරෝපයට හා රෝම අධිරාජ්‍යයට මහත් අභියෝගයක් එල්ලකල ඇටිලා (430 AD) මෙයට උදාහරණ වේ.


ඒ අනුව,  ආක්‍රමණික, මානව ආචාරධර්ම ගරු නොකරන, ඕනෑම ජීවියක් දෙවරක් නොසිතා විනාශකරන පිටසක්වල ජීව ප්‍රජාවන් සිටිය හැකිය. 

නෝබෙල් ත්‍යාගලාභී ස්ටීවන් හෝකින්ස් මෙවැනි ආක්‍රමණකාරී පිටසක්වලයින් ගැන බරපතල අණතුරු ඇඟවීමක් සිදුකොට ඇත. ඔහුට අනුව මානව වර්ගයා දැනටමත් සිය ග්‍රහලෝකය ගැන විශ්වයේ සැරිසරණ ආක්‍රමණිකයින්ට හෙලිකොට ඇත. ඒ 1900සිට නොකඩවා මුදාහැරෙන රේඩියෝ තරංග මගිනි.

මහාචාර්ය ස්ටීවන් හෝකින්ස්ට අනුව, විශ්වයේ දියුණු ශිෂ්ඨාචාරවලින් නිකුත්වන රේඩියෝ තරංග අපට හසු නොවීමට එක් හේතුවක් විය හැක්කේ ඔවුන් සිය ග්‍රහලෝක ආක්‍රමණික වසංගතකාරී පිටසක්වල ගෝත්‍රවලින් වසන් කරගැනීම සඳහා සිය ග්‍රහලෝකවලින් කෘත්‍රිම රේඩියෝ තරංග නිකුත්වීම නවතාගෙන ඇති නිසා විය හැකිය.

"නැත"

මෙම චිත්‍රපටවල දැක්වෙන ආකාරයට පිටසක්වල ආක්‍රමණකාරී ගෝත්‍ර පෘථිවියට (හා වෙනත් ලෝකවලට) යන්නේ ඒවායේ සම්පත් සූරාගැනීමට නම්, ඒ සඳහා කෝටිගණනින් ග්‍රහලෝක, චන්ද්‍රයින් හා විශාල ග්‍රහක චක්‍රවාටය පුරා ඇත . ජීවය පවතින ග්‍රහලෝක සොයාගෙන ආලෝක වර්ෂ ගණනින් සැරිසැරීමට අවශ්‍යතාවයක් තර්කාණුකූලව සිතාගත නොහැක.  

එසේ විය හැක්කේ ජීවය නෑසීම පමණක් අරමුණු කරගත් පිටසක්වල ගෝත්‍රයක් සිටීනම් පමණකි. 

1964දී සෝවියට් තාරකාවිද්‍යාඥ නිකොලායි කාඩෙෂෙෆ් නිර්මාණය කල Kardashev Scale හෙවත් කාඩෙෂෙෆ් පරිමාණයට අනුව පිටසක්වලයින්ගේ තාක්ශණික දියුණුව විවිධ කාණ්ඩවලට බෙදා වෙන්කොට ඇත. 

මෙම බෙදීම සිදුකොට ඇත්තේ එම ශිෂ්ඨාචාරය වර්ධනය කරගෙන ඇති තාක්ශණයට අනුව ඔවුන් සතු බළශක්තිය උකහාගැනීමේ හැකියාව පදනම් කරගෙනය. ඒ අනුව TYPE I, TYPE II  හා TYPE III ලෙස පිටසක්වල ශිෂ්ඨාචාර වර්ගකොට ඇත.



TYPE I - තම මව් ග්‍රහලෝකය සතු සියලුම බළශක්ති ප්‍රභව වලින් බලය උකහාගැනීමේ හැකියාව ඇත. නැසීගිය තාරකා විද්‍යාඥ කාල් සේගාන්ට අනුව මානවයා තවමත් ටයිප් I මට්ටමට පැමිණ නැති අතර ඔහුගේ උපකල්පණය අනුව මානවයා 0.7 වැනි මට්ටමකට පැමිණ ඇත.

TYPE II - තම මව් තාරකාවෙන් නිකුත්වන සියලුම බළශක්තිය තම ප්‍රයෝජනය සඳහා ගතහැකි මට්ටමට තාක්ශණය දියුණුකරගත් ශිෂ්ඨාචාරයක් ටයිප් II ශිෂ්ඨාචාරයක් ලෙස හැඳින්වේ.

මානවයා මෙම තත්වයට පත්වීමට තවත් අවුරුදු 1000ක් හෝ ඊට වැඩි කාළයක් ගනු ඇත. 


චිත්‍රපටයේ දැක්වෙන පිටසක්වලයින් මෙම Type II මට්ටමට තාක්ශණය දියුණු කරගෙන ඇති බව පෙනේ. කිලෝමීටර් 3000ක් විශාල අභ්‍යවකාශ යානා තැනීමට, ආලෝකවර්ෂ ගණනාවක් ඈතින් ඇති ග්‍රහලෝක වෙත ඉතා ඉක්මණින් යාම වැනි තාක්ශණික හපන්කම් මෙවැනි අතිශය දියුණු ශිෂ්ඨාචාරයකින් බලපොරොත්තුවිය හැකිය.

තාරකාවක සියලුම බළය තමන් සතුකරගත හැකි තරමට තාක්ශණය දියුණුකරගත් ශිෂ්ඨාචාරයක්, විශ්වයේ තමන් සතුකරගත හැකි කෝටි ගණන් තාරකා හා ජීවිය නොමැති ග්‍රහලෝක තිබියදී නොදියුණු ජීවීන් සිටින ග්‍රහයෙකු විනාශ කරන්නට ආලෝක වර්ශ ගණන් මග ගෙවා එන්නේ ඇයි දැයි තර්කාණුකූලව විස්තර කල හැකිද?

මෙය නූතන උදාහරණයකට සමාන කලහොත්, අමෙරිකාව සිය ස්ටෙල්ත් ප්‍රහාරක යානා හා අතිනවීන අවිආයුධ සමග පැමිණ, තමන්ට කිසිදු තර්ජනයක් නැති අප්‍රිකාවේ නොදියුණු පිග්මි ගෝත්‍රිකයින්ගේ ගමක් වැටලීම තරම් නිෂ්ඵල ක්‍රියාවක් නොවන්නේද?

පෘථිවිය මෙන්ම මානවයාද, සුවිශේෂ බව විශ්වාස කිරීම මානවයින්ගේ ලක්ශණයක් වුවත් පෘථිවියේ හෝ අපගේ සෞරග්‍රහමණ්ඩළයේ හෝ සුවිශේෂවූත් (දැනට ජීවයම හැරෙන්නට ) වෙනත් දෙයක් නොමැති බව විද්‍යාඥයින්ගේ මතයයි. එමෙන්ම මේ වනවිටත් පෘථිවිය හා බොහෝ සමාන, ද්‍රව ජලය ඇතැයි අනුමාන කෙරෙන ග්‍රහලෝක විශාල ප්‍රමාණයක් සොයාගෙන ඇත. ඒවායේද පෘථිවියේ මෙන්ම යම් ආකාරයක ජීවය ඇතැයිද අනුමාන කෙරේ.

පිටසක්වල දියුණු ජීවයකට, ජීවත්වීම සඳහා ග්‍රහලෝකයක් අවශ්‍යනම්, අපටත් වඩා පහසුවෙන් ඔවුනට මෙවැනි ග්‍රහලෝකයක් සොයා ගැත හැකි අතර, එම ග්‍රහලෝකය terra-forming තාක්ශණය ආධාරයෙන් තමන්ට අවශ්‍ය ආකාරයට සකසාගැනීමටද ඔවුනට පුලුවන. 


එසේනම්, දැවැන්ත යානා රැගෙන පෘථිවිය ආක්‍රමණය කිරීම තේරුමක් නැති නිශ්ඵල ක්‍රියාවක් නොවේද?

__________________________________________________________________________ Creative Commons License
VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Thursday, 18 August 2016

අපේ අලුත් ෆේස් බුක් ගෲප් එක: Dark Star - අඳුරු තාරකාව [ අභිරහස් ලෝකය, පිටසක්වල ජීවීන්, සැඟවුනු තාක්ෂණය]



අපේ අලුත් ෆේස් බුක් ගෲප් එකක් පටන් ගත්තා. ඒකෙ නම "Dark Star හෙවත් අඳුරු තාරකාව".

පිටසක්වල ජීවීන්, පිටසක්වල තාක්ෂණය, පිටසක්වල යානා, අත්භූත සිදුවීම්, සැඟවුනු තාක්ෂණය වැනි මාතෘකා සාකච්ඡා කරන්නටත්, දැනුම බෙදාගන්නටත් මේ ෆේස්බුක් ගෲප් එක වෙන්වෙලා තියෙනවා.

කැමති අය එකතුවෙන්න කියලා ආරාධනා කරනවා.

Dark Star Facebook Group











__________________________________________________________________________

Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Saturday, 13 August 2016

PVC පයිප්ප වලින් බයිසිකල් පාක් කරන්න Bicycle Stand එකක් හදමු!! - Lets make a bicycle stand with PVC pipes!!

PVC පයිප්ප වලින් මම හදපු බයිසිකල් ස්ටෑන්ඩ් එක
නිවාඩුකාලේ ගෙදර කම්මැලිකමේ ඉන්න දුවලා පුතාලා එක්ක එකතුවෙලා එයාලගෙ බයිසිකල් පාර්ක් කරගන්න පුලුවන් PVC බයිසිකල් ස්ටැන්ඩ් එකක් හදමු.

මේවගේ බයිසිකල් 3ක් පාක් කරන්න පුලුවන් PVC බයිසිකල් ස්ටෑන්ඩ් එකක් ලේසියෙන්ම රුපියල් 2500කට අඩුවෙන් හදාගන්න පුලුවන්. මේ වගේ එකක් යකඩින් හදන්න අපේ ගෙවල් ලඟ පට්ටලෙන් රුපියල් 6500ක් යනවා කිව්වා.

හදාගන්න හැටි පියවරන් පියවර දාලා තියෙනවා.

අවශ්‍ය දේවල්

1" පයිප්ප ලෙන්ත් 4යි (අඩි 30ක කෑලි කපන්න පුලුවන් වෙන්නේ ලෙන්ත් 4ක් ගත්තොත් )

T කනෙක්ටර් 18යි

L කනෙක්ටර් 6යි

පයිප්ප ගම්


පයිප්ප කපා ගත යුතු පිලිවෙල.




පයිප්ප  අත් කියතකින් හරි හැක් සෝ එකකින් හරි පහත පිලිවෙලට කෑලි කපා ගන්න. 

අඟල් 18.5 කෑලි - 6යි
අඟල් 16.5 කෑලි - 6යි
අඟල් 9.5 කෑලි - 6යි
අඟල් 8.5 කෑලි - 6යි
අඟල් 1.75 කෑලි - 9යි


සවිකිරීම - පලමුවන පියවර | Assembly Step 01




අඟල් 18.5 කෑලි 6ය, අඟල් 9.5 කෑලි 6යට T කනෙක්ටර් ආධාරයෙන් සවිකර ගන්න - සැළකිය යුතුයි - දැන්ම පයිප්ප ගම් ගාලා අලවන්න එපා. ඔක්කොම හයිකරලා, වෙනස්කම් කරන්න ඕනෑනම් කරලා ඉවරවෙලා  ජොයින්ට් වලට ගම් ගාලා ෆික්ස් කරමු.

හයිකරල ඉවරවුනාම රූපයේ විධියට කෑලි ටික තියෙන්න ඕනෑ. මේ විධියටම තියාගන්න, එතකොට ඉදිරි එකලස් කිරීම් වලට පහසුයි.


සවිකිරීම - දෙවන පියවර | Assembly Step 02



T කනෙක්ටරයට අඟල් 8.5 කෑලි 6 අමුණාගන්න.


සවිකිරීම - තුන්වන පියවර | Assembly Step 03



රූපයේ පෙනෙන ආකාරයට අඟල් 18.5 කොටසට L හා T කනෙක්ටර් සම්බන්ධ කරගන්න

ඉන්පසු එම කනෙක්ටර් තුලට අඟල් 1.75 කැබලි 6 සම්බන්ධ කරන්න. රූප සටහනේ දකුණු කෙලවරේ මෙම සම්බන්ධ කිරීම කලයුතු ආකාරය පෙන්වා ඇත. වම් කෙලවරේ එය සවිකල පසු පෙනෙන ආකාරය දක්වා ඇත.

එය තවත් පැහැදිලිව පහත රූපවල දක්වා ඇත.





සවිකිරීම - සතරවන පියවර | Assembly Step 04




16.5 කෑලි දෙකක් රූපයේ පෙනෙන ආකාරයට සම්බන්ධ කරගන්න. දැන් මේ එකලස් කිරීම වෙනත් පැත්තකින් බැලූ විට පෙනෙන ආකාරය බලමු.



සවිකිරීම - පස්වන පියවර | Assembly Step 05



රූපසටහනේ පෙනෙන ආකාරයට 16.5 කැබැලි දෙකක්, 1.75 කැබලි 3 හා T හා L කනෙක්ටර් සවිකරගන්න.

සවිකිරීම - සයවැනි පියවර  | Assembly Step 06




ඉතිරි 16.5" කැබලි 2ක, 1.75 කැබලි 3 හා T හා L කනෙක්ටර් සවිකරගත් පසු ඔබගේ බයිසිකල් ස්ටැන්ඩ් එක සම්පූර්ණ වන අතර, එය මෙලෙස දිස්විය යුතුය.




මෙහි සයිකල් 3කට ඉඩ ඇති අතර, ගම් ආලේප කොට ජොයින්ට් සීල් කිරීමට පෙර නිවසේ ඇති බයිසිකල් මෙහි රඳවා සීරුමාරු කිරීම් කලයුතු දැයි බලන්න.

සයිකල් වල ඉදිරි රෝද අපහසුවකින් තොරව රූපයේ පෙනෙන ආකාරයට ඇතුලුකල හැකි අතර එවිට බයිසිකලට වෙනත් ආධාරකයක් නොමැතිව හොඳින් ස්ථාවරව තිබිය යුතුය.

ඔබගේ බයිසිකල් මහත රෝද ඇති මවුන්ටන් බයිසිකල් නම්, රෝද ඇතුලු කරන හිදැස පලල් මදි වන්නට පුලුවන්. එවිට කල යුත්තේ අඟල් 1.75 කැබැලි 9 වෙනුවට අඟල් 2" හෝ 2.25" වැනි කැබලි 9 කපාගෙන සවිකොට බැලීමයි. වෙනත් වෙනස් කමක් අවශ්‍ය නෑ.

























මම හදපු PVC බයිසිකල් ස්ටැන්ඩ් එක ඇත්තටම පේන විධිය වීඩියෝවකින් බලමු.











__________________________________________________________________________ Creative Commons License
VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________
Related Posts Plugin for WordPress, Blogger...