Related Posts Plugin for WordPress, Blogger...

Wednesday, 30 September 2015

මෙන්න අලුත්ම අලුත් Tesla Model X Full Electric SUV

Tesla Model X Full Electric SUV


400Km per charge
Acceleration  - 0 to 100 KMh in 3.2 seconds
Top Speed - 255KMh
90kWh Lithium-ion Battery pack
All Wheel Drive system with front & rear motors
7 Seater
Automatic Falcon Wing Doors with obstacle sensors
Automatic Accident Avoidance Breaking
Production Year, September 2015
Assembled in Tesla Factory, Fremont, California
Designer     Franz von Holzhausen






Tuesday, 29 September 2015

අඟහරුවා මත ගලායන ද්‍රව ජලය සොයාගනී!!

"අඟහරුවා මතුපිට මේ වනවිටත් ගලායන ද්‍රවජලය පවතිනවා " මෙම අපූර්ව සොයාගැනීම පිලිබඳව නාසා ආයතනයේ අඟහරු ග්‍රහයා ගවේෂණය කිරීමේ ව්‍යාපෘතියේ ප්‍රධාන විද්‍යාඥ මයිකල් මෙයර් මාධ්‍ය දැනුවත් කිරීමේ හමුවකදී ප්‍රකාශකර සිටියා. තවදුරටත් අදහස් දැක්වූ ඔහු, මෙලෙස අඟහරු ග්‍රහයා මත ගලායන ජලය පැවතීම නිසා, අප දන්නා ආකාරයේ ජීවයකට පැවතීමේ පසුබිම තිබෙන බව ප්‍රකාශකර සිටියා.

අඟහරු ග්‍රහයාගේ කක්ශයේ ඉඳිමින් ගන්නා ලද ඡායාරූප දසදහස් ගණනක් අධ්‍යනයකල විද්‍යාඥයින්ට සෑම ග්‍රීෂ්ම ඍතුවකදීම අඟහරුමට කඳුබෑවුම් හා ආවාට බෑවුම්වලින් වෑස්සෙන ද්‍රවජලය හා එම ජලය මගින් ඇතිකරන රටා දැකගන්නට හැකිවී තිබෙනවා.



මෙලෙස ගලායන ජලය අනාගත අඟහරු ගවේෂණ චාරිකාවලදී ගවේෂණයට බඳුන්කරන ප්‍රධාන ස්ථාන වනුඇති බවට නාසා ආයතනය පවසනවා. එමෙන්ම නුදුරු අනාගතයේදී සිදුවෙතැයි බලාපොරොත්තුවන මිනිසුන් රැගත් අඟහරු ගවේෂණ චාරිකාවේදීද මෙවැනි ද්‍රව ජලය බහුල ස්ථානයක් ප්‍රධාන ගවේෂණ ප්‍රදේශයක් වනු ඇති.

පසුගිය මාර්තුවේදී නාසා ආයතනය, අඟහරු ග්‍රහයාමත මීට වසර බිලියන ගණනකට පෙර දැවැන්ත සාගරයක් තිබූ බවට සාක්ශි සොයාගත්තා. වසර බිලියන 4.5කට පෙර ඇතිවූ මෙම සාගරය වසර බිලියන 2කට පෙර වියලීගියේ යම් තවමත් හඳුනා නොගත් යම් හේතුවක් නිසා අඟහරුවාගේ වායුගෝලය තුනීවී යාම නිසයි. තුනී වායුගෝලයට ද්‍රව ජලය බොහෝකල් තබාගැනීමට අවශ්‍ය වායුගෝලීය පීඩනය නොමැති බැවින් සාගර ජලය කෙමෙන් කෙමෙන් සිඳීගියා. කෙසේවෙතත් අඟහරුවා මත මෙම සාගරය වසර බිලියන 1.5ක් පමණ පැවතුනු අතර එම කාලය පෘථිවිය මත ජීවය හටගැනීමට ගතවූ කාලයට වඩා වැඩි කාලයක් බව පැවසෙනවා. ඒ අනුව එම ඉපැරණි අඟහරු සාගරයේ පෘථිවි සාගරය මත මෙන්ම යම් ආකාරයක කාබණික ජීවයක් හටගන්නට ඇතැයි විශ්වාස කෙරෙනවා.


Sunday, 27 September 2015

ගූගල් ඔබට සුභ උපන්දියක්! Happy Birthday Google!

ගූගල් ඔබට සුභ උපන්දියක් වේවා කියා ඉත සිතින් ප්‍රාර්ථනා කරනවා. වසර 17ක් මුලුල්ලේ ලෝකවාසී ජනයාට ඔබ නොමිලයේ දෙන සේවාව සැබැවින්ම අමිලයි.

වේගවත් හා නිවැරදි සෙවුම් ප්‍රථිපල, නිදහසේ අදහස් ප්‍රකාශකිරීමට බ්ලොගර්, භාවිතයට ඉතා පහසු ජීමේල් නොමිල සේවාව, ගිගාබයිට් 15 නොමසුරු ගූගල් ඩ්‍රයිව්, මයික්‍රෝසොෆ්ට් ඔෆිස් දඬුඅඬුවෙන් අප ගලවාගෙන නිදහසේ ඕනෑම වේලාවක, ඕනෑම තැනක ඕනෑම පරිගණකයකින් භාවිතාකරන්න පුලුවන් ගූගල් ඩොක්ස්ද අපට ලබාදුන් ඔබ අපගේ කළණ මිතුරෙකි.

ඒවාගේම, ගන්නවා තියා හිතන්නවත් බැරි ගණන්වලට විකුණන අයිෆෝන්, අයිපෑඩ් දිහාබලාගෙන සුසුම් හෙලන්නට ඉඩතිබූ අපට, ඔබගේ ඇන්ඩ්‍රොයිඩ් නිසාවෙන් සාධාරණ මිලකට ස්මාර්ට්ෆෝනයක්, ටැබ්ලට් පරිගණකයක් ගෙන ජීවිතය පහසුකරගන්නට මෙන්ම ඕනෑම තැනක සිට අන්තර්ජාලයේ සැරිසරන්නට, පොත්/සඟරා කියවන්නට ඉඩ ලැබුණි!

ගූගල් කළණ මිතුර, ඔබ චිරාත්කාළයක් වැජබේවා!! 

දියුණුවන ලෝකයේ අපිට, ලොව දකින්නට ඔබ කරනා මෙහෙය අමිලයි! අසමයි! 

ඒ යුගමෙහෙය බෝහෝකල් සිදුකිරීමට ඔබට කළමණාකරණ ශක්තිය හා මූල්‍ය ජවය වැඩිවැඩියෙන් ලැබේවා!!!

Comments


මා ලියන්නට සැළසුම් කරමින් සිටි ලිපිය ඔබ කලින්ම උඩුගන්වා තිබෙනවා. මාත් ඔබ සමග එක්ව ගූගල්ට සුබ උපන්දිනයක් හා දීර්ඝායුෂ පතනවා on ගූගල් ඔබට සුභ උපන්දියක්! Happy Birthday Google!

සුබ උපන් දිනයකට ආසිරි පැතුම් ඇත්තෙන්ම ගූගල්ගේ මෙහෙවර අතිවිශිෂ්ටයි on ගූගල් ඔබට සුභ උපන්දියක්! Happy Birthday Google!

Wednesday, 23 September 2015

ස්මිත්සෝනියන් සත්වෝද්‍යානයේ අලුත උපන් පැන්ඩා පැටියා!

බිහිවෙලා දවස් 3කට පස්සේ, කිරිකැටි පැන්ඩා සූප්පුවෙන් කිරිබොන හැටි
බිහිවෙලා දවස් 8කට පස්සේ, ඒ කියන්නේ අගෝස්තු 30 වැනිදා පැන්ඩා පැටවා, කූඩුවේ සී.සී.ටී.වී කැමරාවලට හසුවුන අකාරය.
පසුගිය අගෝස්තු 22වැනිදා අමෙරිකාවේ ස්මිත්සෝනියන් ජාතික සත්වෝද්‍යානයට ඉතා ප්‍රීතිමත් දිනයක් වුනා. ඒ, මෙයි-සියෑන්ග් කියලා නම්කරලා තියෙන පැන්ඩා දෙන පැටවෙකු බිහිකරපු නිසා. ඉතා දැඩිලෙස වඳවීයාමේ තර්ජනයට මුහුණපාලා සිටින චීනයේ යෝධ පැන්ඩාවන් රැකගැනීම සඳහා ලොවපුරා සත්වෝද්‍යානවල පැන්ඩාවන් බිහිකිරීමේ ව්‍යාපෘති ක්‍රියාත්මක වනවා.

Giant Panda Cub, Aug. 31

ස්මිත්සෝනියන් සත්වෝද්‍යානයේ ජීවවිද්‍යා සංරක්ෂණ ආයතනය (The Smithsonian's National Zoo and Conservation Biology Institute) විසින් පවත්වාගෙන යන යෝධ පැන්ඩා සංරක්ශණ මධ්‍යස්ථානයේ බිහිවුනු දෙවන පැන්ඩා පැටවායි මේ.  විසින් පවත්වාගෙන යන යෝධ පැන්ඩා සංරක්ශණ මධ්‍යස්ථානයේ බිහිවුනු දෙවන පැන්ඩා පැටවායි මේ. දැනට චීනයේ උණබට වනාන්තරවල යෝධ පැන්ඩාවන් 1,864ක් ජීවත්වන අතර තවත් 300ක් පමණ ලොවපුරා සත්වෝද්‍යානවල ජීවත්වනවා. යෝධ පැන්ඩාවුන්ගේ වාසභූමි අහිමිවීම නිසා ඉතා වේගයෙන් වඳවෙමින් යන සතුන් කොටසක්.


Giant Panda Cub, Sept. 1

. .Mei Xiang and her cub Sept. 3 
Giant panda cub exam Sept. 5 . .

Giant Panda Cub Health Check Sept. 8, 2015

. Mei Xiang and her cub Sept. 13, 2015

Mei Xiang and her cub Sept. 2

Giant panda cub exam Sept. 5

Tuesday, 22 September 2015

වොක්ස්වාගන් සමාගම සිය ඩීසල් කාර්වල විමෝචන පාලන පද්ධති අක්‍රිය කරලා!!! ක්‍රියාත්මක වෙන්නේ පරීක්ශාකරන විටදී පමණයි - අමෙරිකානු පරිසර ආරක්ශක ඒජන්සියෙන් නඩු!!!

මොකක්ද වෙලා තියෙන්නේ?

VW සමාගම, දැඩි වායු විමෝචක නීති තියෙන අමෙරිකාවේ එයාලා 2009 ඉඳන් විකුණපු ඩීසල් කාර් මාදිලි ගණනාවකට, ඒවායේ අපිරිසිදු විමෝචන පාලනය කරන පද්ධතිය සාමාන්‍ය ධාවනයේදී අක්‍රියවන විධියටත්, වාහනය විමෝචන ප්‍රමාණය සඳහා පරීක්ශා කරන අවස්ථාවලදී, එම අවස්ථා හඳුනාගෙන ක්‍රියාත්මක වන ලෙසත්, අනවසර පරිගණක මෘදුකාංගයක් ඇතුලත් කරලා.

මේ මෘදුකාංගය, වාහන සාමාන්‍ය ධාවනයේදී විමෝචන පාලන පද්ධතිය අක්‍රිය කරලා වාහනයේ තවරණය හා ජවය වැඩිවන විධියට සකස් කරනවා. ඒත් එවිට විමෝචන පාලන පද්ධතිය ක්‍රියාත්මක වන අවස්ථාවලට වඩා 40% පමණ නයිට්‍රස් ඔක්සයිඩ් වැනි දූශිත වායු මුදා හැරෙනවා.

එම මෘදුකාංගය හදලා තියෙන්නේ විමෝචනය පරීක්ශාකරණ උපකරණයක් සවිකරහම, එය හඳුනාගෙන විමෝචන පාලන පද්ධතිය ක්‍රියාත්මක කරලා, එය විමෝචන පරීක්ශණයන් (emission test) සමත්වෙන විධියට. සාමාන්‍යයෙන් විමෝව්චන පාලන උපක්‍රම ක්‍රියාත්මක වනවිට වාහනයේ එන්ජිමෙන් ලැබෙන ජවය අඩුවීම සාමාන්‍ය දෙයක්. ඒ අනුව වාහනයේ අඩුවන නිසාවන්නට ඇති වොක්ස්වගන් ඉන්ජිනේරුවන් මෙම මෘදුකාංගය ඇතුලත්කරලා සාමාන්‍ය ධාවනයේදී එම පද්ධතිය ක්‍රියාවිරහිත කරවන්නට සලස්වන්නට ඇත්තේ.

මෙම මෘදුකාංගය, Defeating Devices හෙවත් ආරක්ශණ හෝ පාළන උපක්‍රම හෝ නීති උල්ලංඝණය කිරීමට උපකාරීවන උපක්‍රමයක් ලෙස අමෙරිකානු පරිසර ආරක්ශණ ඒජන්සිය මගින් වර්ගීකරණය කොට ඇති අතරඒ අනුව "අපරාධ නීති සංග්‍රහය - criminal law" යටතේ අපරාධයක් ලෙස හඳුනාගෙන නඩු දමන්නට අමෙරිකානු පරිසරය සුරැකීමේ ඒජන්සිය සූදානම් වනවා.

මෙම මෘදුකාංගය 2009 සිට 2015 දක්වා අමෙරිකාව තුල විකුණූ VW ඩීසල් කාර් 482,000 පමණ අඩංගුකොට ඇති බව පැවසෙන අතර මෙම වාහන සියල්ලම නැවත කැඳවා නොමිලයේ ඒවා නියමිත පරිදි සකස්කරදීමට VW සමාගමට සිදුවනු ඇති. ඒ සඳහා බිලියන ගණනක බරපැණක් අමරිකාව තුල පමණක් VW හට දැරීමට සිදුවන ඇති අතර දැන් යුරෝපයේ හා ආසියාවේද පරිසර ආරක්ශණ ඒජන්සි, එම රටවල විකුණන ලද VW වාහන පිලිබඳ පරීක්ශා කිරීමට පියවර අරගනිමින් ඉන්නවා.

මීට අමතරව අමෙරිකානු කොන්ග්‍රස් මණ්ඩලයද මේ පිලිබඳව පරීක්ශණයක් කිරීමට සැරසෙන අතර අමෙරිකානු අධිකරණ දෙපාර්තමේන්තුවද වෙනම පරික්ශණයක් ආරම්භ කොට තිබෙනවා. දැනටමත් VW සමාගමේ කොටස් වටිනාකමෙන් 20%කින්  පමණ කඩාවැටී තිබෙනවා. දැනට වාර්තාවන අන්දමට මෙම නීතිවිරෝධී මෘදුකාංගය සහිතව අමෙරිකාවේ විකුණනලද එක් වාහනයක් සඳහා අමෙරිකානු ඩොලර් 37,500ක දඩයක් ගෙවීමට VW සමාගමට සිදුවිය හැකියි. ඒ අනුව දඩමුදල පමණක් ඩොලර් බිලියන 18ක් වනු ඇතැයි ගණන්බලා තිබෙනවා.

Monday, 21 September 2015

ශී‍්‍ර ලංකාවේ සත්ත්ව විශේෂ 346ක් වදවී යාමේ තර්ජනයට



ශී‍්‍ර ලංකාවේ සත්ත්ව විශේෂ 346ක් වදවී යාමේ තර්ජනයට ලක්ව ඇතැයි වනජීවී සංරක්ෂණ දෙපාර්තමේන්තුව පසුගියදා ප‍්‍රකාශයට පත් කළේය.
ලෝකයේ සියළුම ස්ථාන ආරක්ෂා කිරීමේ හැකියාවක් නොලැබෙන බැවින් ජෛව විවිධත්වය ඉතාමත්ම ඉහළ අගයක් ගන්නා එමෙන්ම විනාශවී යාමේ තර්ජනයට මුහුණපා සිටින ස්ථාන කිහිපයක් තෝරාගෙන ඒ කෙරෙහි වැඩි අවධානයක් යොමු කොට සුරැකීමට තීරණය කර තිබිණි.

එලෙස තෝරාගනු ලබන ස්ථාන ජෛව විවිධත්ව උණුසුම් කලාප ලෙස නම් කර ඇත. මෙලෙස තෝරාගත් කලාප අතරින් ශී‍්‍ර ලංකාවට හිමිවූයේ ප‍්‍රමුඛ ස්ථානයකි. ලංකාව ජෛව විවිධත්ව උණුසුම් කලාපයක් බවට පත්වීමේ එක් සුදුසුකමක් වන සියයට 70කට වඩා ස්වභාවික පරිසරය විනාශවී යාම යන සාධකය සපුරා තිබුණි.

වර්ග කිලෝ මීටර 65610ක් තරම් වූ භූමිභාගයක් සතු ශී‍්‍ර ලංකවේ භූ විෂමතාවය සහ දේශගුණික වෙනස්කම් මෙරට ජෛව විවිධත්වය වැඩිවීමට දැඩි සේ බලපා තිබේ.

මෙහි වැදගත්ම සාධකය වන්නේ මෙරට සෑම වර්ග කිලෝ මීටරයක්ම සැලකූවිට හෙක්ටයාර තුනක පමණ තෙත් බිමක් පිහිටා තිබේ. මේ තෙත්බිම් තුළ ජීවත්වන මිරිදිය මසුන් විශේෂ සංඛ්‍යාව 87කි. මෙයින් විශේෂ 27ක් පමණ ශී‍්‍ර ලංකාවට ආවේණිකය.

ශී‍්‍ර ලංකාවේ ස්වභාව විද්‍යා පර්යේෂණ ආරම්භ වී ගතවූ වසර 150ක පමණ කාලයේදී මෙරටින් සොයාගත් ශාක විශේෂ 1100ක් අතරින් විශේෂ 72ක් මේ වනවිට වඳවූ විශේෂ ලෙස සැලකේ. දැනට මෙරටින් වාර්තාව න මල් හටගන්නා හෙවත් සපුෂ්ක ශාක අතරින් විශේෂ 673ක් හෙවත් සමස්ථ ශාක ප‍්‍රමාණයෙන් සියයට 61ක් වඳවී යාමේ තර්ජනයට ලක්ව ඇත.

මෙහි වඩාත් හානිකර තත්ත්වය වන්නේ වඳවී යාමේ තර්ජනයට මුහුණපා සිටින ශාක විශේෂ අතරින් 412ක්ම ලංකාවට ආවේණික විශේෂ වීමයි. ඒවායින් සියයට 37ක් දැඩි අන්තරායකාරී තත්ත්වයේ තිබීම මෙරට පරිසරයට සිදුවී ඇති හානියට හොඳ සාක්ෂියකි. මේ ශාක විශේෂ 412 අතරින් එක් විශේෂයක් හෝ මෙරටින් සමුගතහොත් එය ලෝකයේ ශාකාගාර වල සංරක්ෂිත දර්ශක වලට පමණක් සීමා වූ ශාක බවට පත්වනු ඇත.
සත්ත්ව විද්‍යා පර්යේෂකයන් පවසන්නේ පසුගිය වසර 100ක කාලයේදී ශී‍්‍ර ලංකාවේ උභය ජීවී විශේෂ 21ක් වඳවී ගොස් ඇති බවයි.

මේ වනවිට මෙරටින් හමුවන පෘෂ්ඨවංශී සත්ව විශේෂ 223ක් අතරින් 138ක් හෙවත් සියයට 62ක් ශී‍්‍ර ලංකාවට ආවේණික විශේෂ වෙයි. සත්ත්ව විශේෂ අතරින් සියයට 33ක් හෙවත් විශේෂ 57ක් වදවී යාමේ තර්ජනයට ලක්ව ඇත. ලෝක සංරක්ෂණ සංගමය ශී‍්‍ර ලංකාව පිළිබඳ රතු දත්ත වාර්තාව ඉදිරිපත් කරමින් පවසන්නේ සෑම පෘෂ්ඨවංශී විශේෂ 12ක් අතරින් එක් විශේෂයක් අනාගතයේ වඳවීයාමට ඉඩ තිබෙන බවයි.
විනාශවී යාමේ තර්ජනයට ලක්වූ සත්ව කාණ්ඩ අතරින් වැඩිම බලපෑමට හසුව ඇත්තේ උරගයන් වන අතර එහි දෙවැනි තැන උභය ජීවීන්ට හිමිව ඇත.

පක්ෂීන්, ක්ෂීරපායීන් සහ මත්ස්‍යයන් මේ තර්ජනාත්මක ලේඛණයේ අනුපිළිවෙලට පසුවෙති. ක්ෂීරපායී විශේෂ දෙකක් අතරින් එක් විශේෂයක් ද, උභය ජීවී විශේෂ දෙකක් අතරින් එක් විශේෂයක් ද, උරග විශේෂ තුනක් අතරින් එක් විශේෂයක් ද මත්ස්‍ය විශේෂ තුනක් අතරින් එක් විශේෂයක් ද, පක්ෂි විශේෂ හයක් අතරින් එක් විශේෂයක් ද නුදුරු අනාගතයේදීම මේ රටින් තුරන්ව යාමේ අවදානමට ලක්ව ඇති බවට පරිසරවේදීහු අනතුරු අඟවා ඇත.

කොදු ඇටපෙළක් නොමැති හෙවත් අපෘෂ්ඨවංශී සතුන් ද දැඩි ලෙස වඳවී යාමේ තර්ජනයට මුහුණ පා ඇත. ඒ අතරින් ශී‍්‍ර ලංකාවේ හමුවන බත්කූරන් විශේෂ 120ක් අතරින් විශේෂ 57ක් ලංකාවට ආවේණික වන අතර ලංකාවට ආවේණික විශේෂ 20ක් වඳවී යාමේ තර්ජනයට ලක්ව ඇත.

මෙරට විශේෂිතම සත්ත්ව කාණ්ඩයක් වන්නේ මිරිදිය කකුළුවන්ය. මෙතෙක් වාර්තා වී ඇති මිරිදිය කකුළුවන් විශේෂ 51 ම ශී‍්‍ර ලංකාවට ආවේණික වන අතර ඉන් විශේෂ 37ක් වඳවීයාමේ තර්ජනයට ලක්ව තිබේ.
දිවිමකුළුවන් විශේෂ හතක් අතරින් පහක් ලංකාවට ආවේණික අතර ඉන් එක් විශේෂයක්ද වඳවීයාමේ තර්ජනයට ලක්ව තිබේ. මෙරටින් වාර්තාවන භෞමික ගොළුබෙල්ලන් 246කින් 204ක්ම ලංකාවට ආවේණික වෙයි.

කොඳු ඇටපෙළක් රහිත සතුන් අතරින් වැඩිම තර්ජනයට ලක්ව ඇත්තේ සමනළයින්ය. ලංකාවේ හමුවන සමනළ විශේෂ 243කින් විශේෂ 20ක් ලංකාවට ආවේණික වන අතර එම විශේෂ සියල්ල මෙරටින් වඳවීයාමේ තර්ජනයට ලක්වූ විශේෂවේ.

දැනට වාර්තාවී ඇති තොරතුරු අනුව සත්ව විශේෂ වැඩිම ප‍්‍රමාණයක් තර්ජනයට ලක්වූ දිස්ති‍්‍රක්කය රත්නපුර දිස්ති‍්‍රක්කය වන අතර වැඩිම ශාක ප‍්‍රමාණයක් තර්ජනයට ලක්ව ඇත්තේ මහනුවර දිස්ති‍්‍රක්කයේය

Source: http://www.sinhala.srilankamirror.com/news/item/8099-346-species-in-sl-face-extinction-threat


COMMENTS

ශී‍්‍ර ලංකාවේ සත්ත්ව විශේෂ විතරක් නෙවෙයි. සිංහල ජාතියත් වදවී යාමේ තර්ජනයට ලක්වෙලා. ඉතින් සත්තු ගැන හිතනවට වැඩිය මිනිස්සු ගැන හිතන්න වෙලා. ඉන්න මිනිස්සු අතරත් ආදරය, කරුනාව​, මිනිස්කම වගේ දේවල් වදවී යාමේ තර්ජනයට ලක්වෙලා. on ශී‍්‍ර ලංකාවේ සත්ත්ව විශේෂ 346ක් වදවී යාමේ තර්ජනයට

Sunday, 20 September 2015

ජාත්‍යන්තර පොත් ප්‍රදර්ශණය 2015

2015 ජාත්‍යන්තර පොත් ප්‍රදර්ශණය, පසුගිය 18දා උත්සවශ්‍රීයෙන් විවෘතවුනා. 18දින් උදයවරුවේම ප්‍රදර්ශණය නැරඹීමේ අවස්ථාව මා උදාකරගත්තේ එදා නොසිතූ ලෙසින් නිවාඩුවක් ගැනීමට සිදුවුනු නිසා. උදේ 10වනවිට අවශ්‍ය කාරණය ඉටුවූ බැවින්, ඉතිරිකාලය පොත් ප්‍රදර්ශණය නරඹන්නට යන්නට සිතුනා. 10.30 වනවිටත් උත්සව සභාවේ වැඩකටයුතු අවසන්ව නොතිබූ බැවින්, දිගු පෝලිමක් දක්නට ලැබුනේ, නරඹන්නන් ප්‍රධාන ප්‍රදර්ශණශාලාවට ඇතුලුකරගැනීම ආරම්භකොට නොතිබූ නිසයි. එහෙත් බණ්ඩාරනායක ප්‍රදර්ශණභූමිය පිලිබඳව හොඳ අවබෝධයක් මට තිබූනිසා, ප්‍රධාන පෝලිමට එක් නොවී, ප්‍රධාන සම්මණ්ත්‍රණශාලාවේ පිටුපසින් ප්‍රදර්ශණ භූමියට ඇතුලුවන්නට මට පුලුවන් වුනා. ඒ වනවිටත් ප්‍රධාන ප්‍රදර්ශණශාලාවට නරඹන්නන් ඇතුලත් කරගැනීම ආරම්භ නොවී තිබුණත්, එම භූමියේ ඇති වෙනත් ප්‍රදර්ශණකුටි නරඹන්නන් සඳහා විවෘතව තිබූ බැවින් කාලය කාදැමීමකින් තොරව පොත් ටිකක් බලා ගැනීමේ අවස්ථාව හිමිවුනා.

පසුගිය වසරේ ප්‍රදර්ශණය ඉතාමත් නොසැළකිලිමත් හා අසංවිධානාත්මකව තිබුණත්, මෙවර සංවිධායකයින් එවැනි බොහෝ ගැටලු නිරාකරණය කොට, පොත් ලෝලීන් හට හොඳ අත්දැකීමක් ලබාදීම සඳහා වෙහෙසී තිබුණා. ප්‍රධාන ශාලාවෙන් පිටත පොත් ප්‍රදර්ශණ කුටි අතිවිශාල සංඛ්‍යාවක් තිබූ අතර, දැඩි උශ්ණත්වයට අමතරව වෙන කිවයුතු ගැටලුවක් තිබුණේ නෑ. නරඹන්නන්ගේ අවශ්‍යතා සඳහා ආහාරපාන විකුණන ස්ථාන විශාල ප්‍රමාණයක් තිබූ අතර බණ්ඩාරනායකශාලාවේ සේවකයින්ගේ ආපනශලාවද නවීකරණය කොට නරඹන්නන් සඳහාද විවෘතව තැබීම නිසා ගල්කිස්ස මහ හෝටලයේ ආපනශාලාවේ ආහාර පාණ සඳහ අධික මුදලක් ගෙවීමෙන් වැලකී කුසගින්න/පිපාසාව පියවාගැනීමට බොහෝදෙනෙකුට හැකිවුනා.

පොත් ගැන කියනවානම්, වෙනදාමෙන්ම මෙවරත් දේශීය පොත්ප්‍රකාශකයින්ගේ පොත් රාක්ක පිරී තිබුණේම නවකතාවලින්. රූමත් කාන්තාවකගේ ඡායාරූපයකින් පිටකවරය සැරසූ නවකතා දහස් ගණනක් සෑම පොත් ප්‍රකාශකයෙකුගේම පොත් රාක්ක වසාගෙන සිටියා. මීට අමතරව තවත් විශාල ඉඩ ප්‍රමාණයක, හෝඩියේ සිට උසස්පෙල දක්වා පාසැල් උපකාරක පොත් අරක්ගෙන සිටියා. නවකතා හා උපකාරක ටියුෂන් පොත් අඩුකලවිට, තුන්වැනියට වැඩියෙන්ම තිබුණේ ඉංග්‍රීසි නවකතා, කෙටිකතා හා ළමා ප්‍රබන්ධයි හා ඉංග්‍රීසියෙන් අධ්‍යාපනය ලබන්නන්හට අවශ්‍ය පෙලපොත් වලිනුයි.

පසුගිය 2014 ප්‍රදර්ශණයෙන් ගත්ත පොත
"The Rifle and the Hound in Ceylon - Samuel Baker :
Thisara Prakashakayoe"
ගියවර මා පොත් ප්‍රදර්ශණයෙන් මිළදීගත්තේ එකම එක පොතයි. ඒ තිසර ප්‍රකාශකයින් නැවත මුද්‍රණය කරනලද, සැමුවෙල් බේකර් විසින් 1853දී ලියන ලද "The Rifle and the Hound in Ceylon" නම් දඩයක්කරුවෙකුගේ දිනපොතයි. එම පොත මා ඉතා ආශාවෙන් කියවූවේ එහි ඇති සතුන් මරණ විස්තර නිසා නොව, එකල ලංකාවේ ජනජීවිතය, යටත්විජිත පාලකයින් ලංකාව ගැන සිතූ හැටි, කතාකල හැටි දැනගන්නට ඇති හොඳම මූලාශයක් නිසායි. සැමුවෙල් බේකර් ගැන නොදන්නා අයට දැන්ගන්න කියනවා නම්, ස්කොට්ලන්ත ජාතික සැමුවෙල් බේකර්, සිංහලෙන් මහ එළිය කියලා හඳුන්වන, අද අපි හෝර්ටන් තැන්න කියන අපූර්ව භූමිය දැකගත් පලමු යුරෝපීයයා ලෙස වාර්තාවෙනවා. ඔහු මහ එලිය හෝර්ටන් තැන්න ලෙස නම්කලේ එකල ලක්දිව ආණ්ඩුකාරවරයාවූ රොබර්ට් හෝර්ටන්ට ගෞරවයක් ලෙස කියලා සඳහන් වනවා. ඒවගේම අද අපි නුවර එළිය කියලා හඳුන්වන නගරයේ ආරම්භක පදිංචිකාරයෙක් ලෙස, වැවිලිකරුවෙකුවූ සැමුවෙල් බේකර් ප්‍රසිද්ධයි. හෝර්ටන් තැන්නේ බේකර්ස් ඇල්ල, සැමුවෙල් බේකර් සිහිවෙන්න නම්කරලා තියෙනවා.

මේ වාරේ ගත්ත පොත් දෙක

මෙවරද තිසර ප්‍රකාශකයෝ ප්‍රදර්ශණ කුටියට ගිය මා, තිසර ප්‍රකාශකයෝ සමාගමේ නිර්මාතෲ හා ලංකාවේ සිටි ජේශ්ඨ සිවිල් සේවකයෙකුවූ, 1970 සිට 1975 දක්වා වනජීවී දෙපාර්තමේන්තුවේ අධ්‍යක්ශකධූරය හෙබවූ එස්.ඩී සපරමාදු මහතා විසින්, වනජීවී අධ්‍යක්ශකවරයා ලෙස ගතකල කාලය අලලා රචිත "Sri Lanka a Wildlife Interlude" නම් වෙළුම් දෙකකින් යුතු ග්‍රන්ථයේ පලමු වෙළුම මිළදීගත්තා.

"Sri Lanka, a Wild Life Interlude - Volume One :
S D Saparamadu : Thisara Prakashakayoe"
ඉතා ව්‍යක්ත ලෙසත්, සරල ලෙසත් ලියා තිබෙන මේ පොතෙහි පලමු පරිච්ඡේද දෙකම 18 වැනිදාම කියවා අවසන් කල අතර එම පරිඡ්චේදවල ශ්‍රී ලංකා වනජීවී දෙපාර්ථමේන්තුව, වනසංරක්ශණ දෙපාර්තමේන්තුවේ කොටසක්ව තිබී, එය වෙනම දෙපාර්තමේතුවක් බවට පත්කල කාලයේ එහි තිබූ තත්වය, ලංකාවේ ප්‍රධාන වනෝද්‍යාන දෙක වන යාල හා විල්පත්තුවේ තිබූ තත්වයද පිලිබඳ ඉතා වටිනා මෙන්ම රසවත් තොරතුරු දැගන්නට ලැබුණා. එමෙන්ම එහි විස්තර කොට තිබූ තවත් වැදගත් මෙන්ම වටිනා තොරතුරක් වන්නේ වනජීවී අධ්‍යක්ශකවරයා ලෙස, පොතේ කතෲ එස්.ඩී සපරමාදු මහතා පින්නවල අලි අනාථාගාරය ඇරඹීමට මූලිකව ක්‍රියාකල ආකාරයත් එවක සිරිමා බණ්ඩාරණායක මැතිනියගේ සමගි පෙරමුණු රජයේ (1970-1977) වනසම්පත් හා සංචාරක අමාත්‍යවරයාවූ පී.බී කළුගල්ල අමාත්‍යතුමා ඊට ලබාදුන් නොමද සහයත් පිලිබඳ ඓතිහාසික තොරතුරුයි.

දෙවැනියට මා සිත්ගත් පොත, සූරිය ප්‍රකාශකයින් විසින් පලකරන ලද, දිවයින පුවත්පතේ ජ්‍යේෂ්ඨ මාධ්‍යවේදියෙකුවන "සමන් කළුආරච්චි" විසින් රචිත "කොළඹ පුරාණය" ග්‍රන්ථයයි. නිතැතින්ම විද්‍යාවට අමතරව වනදිවිය, ඡායාරූපකරණය මෙන්ම ඉතිහාසය ගැනද දැඩි උනන්දුවක් දක්වන මට, මෙම පොත ඉතාමත්ම වැදගත් මෙන්ම රසවත් තොරතුරු ලබාදෙන, ඉතා හොඳ ගවේශණාත්මක ග්‍රන්ථයක් ලෙස පෙනෙනුනු බැවින් එයද මිලදීගත්තා.

"කොළඹ පුරාණය - සමන් කළුආරච්චි
 : 
සූරිය ප්‍රකාශකයෝ"
එම පොතෙහිද පලමු පරිච්ඡේද කිහිපය කියවා අවසන්කිරීමට තරම් මේ සතිඅන්තය විවේකීවූ නිසා 2015 පොත් ප්‍රදර්ෂණයෙන් මා තෝරාගත් පොත් දෙකම ඉතා හොඳ, සම්පූර්ණයෙන්ම කියවා අවසන්කල හැකි, මාගේ දැනුම මෙන්ම මාගේ දරුවන්ටද යම් යම් දේ කියාදිය හැකි පොත් දෙකක් බව තහවුරුවුනා. එය මට ඉතාමත් සතුටක්.

කොළඹට එම නම ලැබුණු ආකාරය ගවේෂණය කරමින් ආරම්භවූ කොළඹ පුරාණය පොතෙහි පෘතෘග්‍රීසි, ලන්දේසි හා ඉංග්‍රීසී පාළන සමයන්හි කොළඹ නගරයේ ඉතිහාසයට හා එහි ව්‍යාපතියට වැඩිබරක් දෙනවා. පොතෙහි අටවැනි පරිච්ඡේදය වූ කොළඹ පැරණි පාරවල් හා ප්‍රදේශවලට ඒවායේ නම් ලැබුණු හැටි ඉතාමත්ම රසවත්.

උදාහරණයක් ලෙස සුනිල් එදිරිසිංහ "සෙලෙස්තිනාට, එනතුරු බලා සිටින්න" යැයි අයැදෙන කයිමන් දොරකඩට ඒ නම ලැබුණු හැටි අපූරුයි. මෙම කයිමන් දොරකඩ යනු කොටුව හා පිටකොටුව වෙන්කෙරුනු සාන්ත ජෝන් ඇල (එය ඉංග්‍රීසීන් විසින් ගොඩ කරන ලදී) හරහා දමා තිබූ සල පාලමට (drawbridge) කොටුවෙන් ඇතුලුවන ස්ථානයයි. එම ස්ථානයේ දොරටුව ඇරීම වැසීම දැනුම්දෙන්නටයි, අදටත් පවතින කයිමන් ඝණ්ටාර කුළුණ නිර්මාණය වුනේ. ඉතින් එතනට කයිමන් කියලා නම වැටිලා තියෙන්නේ බේරේ වැවේ ඉන්නා කිඹුල්ලු, සාන්ත ජෝන් ඇළදිගේ ඇවිත් ඒ හරියෙන් ඇලට විසිකරන කුණු කන්නට රැස්වෙන නිසාලු. කයිමන් කියන්නේ ඕලන්ද (ලන්දේසි නැතිනම් Dutch) භාශාවෙන් කිඹුලා කියන එක.

පොත්දෙකම කියවගෙන යන අතරේ වැදගත් කියලා හිතෙනදේවල් තිබුණොත් අලුත් සටහනක් තියන්නම්.....

COMMENTS

පොත් ප්‍රදර්ශනේට වඩා, පොත් දෙක තුනක් උනත් දාල තියෙන විස්තර ටික මසුරං වටිනව. on ජාත්‍යන්තර පොත් ප්‍රදර්ශණය 2015


Sunday, 13 September 2015

පංති කාමරයේ අයිපෑඩ් විප්ලයවය ආපසු හැරවේ?

අයිපෑඩ් වැනි භාවිතාවට පහසු ටැබ්ලට් පරිගණක ජනප්‍රියවීමෙන් පසු, එය පංතිකාමරයේ නව විප්ලවයක් ලෙස සැලකීමට බටහිර රටවල බොහෝ අධ්‍යාපනඥයින් පටන් ගත්තා. භාවිතයට ඉතා පහසු මෙවැනි නව තාක්ශණික උපාංග මගින් සිසු-සිසුවියන්ගේ ඉගෙනීමට ඇති උනන්දුව වැඩි කෙරෙන බවටත් අදහස් පලවුනා.

කෙලින්ම ගුරුවරයා මූලික (teacher centered) අධ්‍යාපන ක්‍රමයකට වඩා සිසුන් මූලික කරගත් (student centered) අධ්‍යාපන ක්‍රමයකට යොමුවීමේ වැදගත්කම බොහෝ කාලයක සිට අධ්‍යාපනඥයින් පෙන්වාදෙමින් සිටි අතර අයිපෑඩ් වැනි ටැබ්ලට් පරිගණක, භාවිතයට පහසුවීමත්, ඉතා බල සම්පන්නවීමත්, පහසුවෙන් විවිධ අධ්‍යාපණික වැඩසටහන් (educational apps) නිර්මාණය කොට ස්ථාපනය කරගැනීමට හැකිවීමත් නිසා අමෙරිකාවේ, බ්‍රිතාන්‍යයේ, කැනඩාවේ හා ඔස්ට්‍රේලියාවේ පාසැල් මෙම අයිපෑඩ් උපාංග පංතිකාමරයට හඳුන්වාදීමේ මූලිකව ක්‍රියාකලේ, ඒ අනුව ගුරු මූලික ඉගැන්වීමේ ක්‍රමවේදයෙන්, සිසු මූලික අධ්‍යාපන ක්‍රමයකට අඩිතාලම දැමේයයි යන පහන් චේතනාවෙන්.

මේ සඳහා ගුරුවරුන්ගේ කෙසේවෙතත් දෙමව්පියන්ගේ නොමද අනුග්‍රහය හා බලපෑම එක්වුනු අතර ඒ අනුව පසුගිය වසර කිහිපය පුරාවට බටහිර රටවල පාසැල් ඩොලර් බිලියන ගනණින් මහජන බදු මුදල් වැයකරමින් සිසුනට අයිපෑඩ් ලබාදෙන්නට කටයුතු කලා.


එහෙත් නොබෝදා ලන්ඩනයේ සන්ඩේ ටයිම්ස් හා ටෙලිග්‍රාෆ් පුවත්පත්, එරට අධ්‍යාපන අමාත්‍යාංශය මගින් සිදුකල පරීක්ශණයක තොරතුරු හෙලිකලා. එමගින් වාර්තාවූයේ අයිපෑඩ් හා ස්මාර්ට්ෆෝන් පංතිකාමරයට පැමිණීම ඉගැන්වීමට හා ඉගෙනුමට (teaching and learning) සහයක් වනවාට වඩා බාධාවක් වී ඇති බව බ්‍රිතාන්‍ය ගුරුවරුන් බොහෝ පිරිසක් ප්‍රකාශකර සිටින බවයි.

මෙම ගැටලුව කොතරම් බරපතලද යත්, නොබෝ දිනකින්ම පංතිකාමරවලට අයිපෑඩ් හා ස්මාර්ට්ෆෝන් ගෙන එඊම තහනම් කරන්නට බ්‍රිතාන්‍ය අධ්‍යාපන අමාත්‍යාංශය කටයුතු අකරමින් සිටින බව වාර්තාවනවා. බ්‍රිතාන්‍ය බදු ගෙවන්නන්ගේ බදු මුදල් පවුම් මිලියන ගණනක් වියදක් කරමින් සිසු සිසුවියන්ට අයිපෑඩ් හා වෙනත් ටැබ්ලට් පරිගණක ලබාදීමෙන් පසුව සිදු කරන්නට යන මෙම තහනම එරට ජනතාවගේ විවේචනයට හේතුවී තිබෙනවා.

නිසි සැලසුමක් හා ගුරුවරුන්ට මෙන්ම සිසුන්ටද නිසි පුහුණුවක් ලබා නොදෙමින්, නව තාක්ශණය සියලුම් දොස්වලට පිලියමක් ලෙස අධ්‍යාපණ බළධාරීන් සැළකීම මෙම ධන නාස්තියට හේතුව ලෙස විචාරකයින් පවසනවා.

අයිපෑඩ්, ටැබ්ලට්, ස්මාර්ට්ෆෝන් පංතිකාමරයේ භාවිතාකරන්නේ කෙසේද? - අපේ අත්දැකීම්

විශ්වවිද්‍යාල ආචාර්යවරයෙකු වන මා මෙන්ම මාගේ වෘත්තියමය සහෘදයින් ගණනාවක්ම, මේවනවිට අපගේ විශ්වවිද්‍යාල දේශණශාලා තුල, ස්මාර්ෆෝන් හා අයිපෑඩ් භාවිතා කරමින් ඉගැන්වීමේ කටයුතුවල යෙදෙනවා. මෙහිදී අවධාරණය කලයුතු ප්‍රධාන කාරණය නම්, අයිපෑඩය හෝ ස්මාර්ෆෝනය, ඉගැන්වීම පහසුකරවීම, සිසු-සිසුවියන්ට ඉගෙනගැනීමේ කාර්යය තෘප්තිමත් මෙන්ම යම් ආකාරයකට තමන් සතුකරගැනීමේ උපක්‍රමයක් ලෙස පමණක් භාවිතා කලයුතු බවයි.

උදාහරණයක් ලෙස , අප සැළසුම් සහගතව, යම් යම් දේශණතුලදී සිසුනට තොරතුරු සෙවීම, ඒවා විශ්ලේශ්ණය, නව දැණුම ලබාගැනීමේ උපක්‍රයක් ලෙස ස්මාර්ට්-ෆෝන් හා ටැබ්ලට් භාවිතා කරනවා. අප දේශණය අතරතුරේදී නව සංකර්ල්පයක් හඳුන්වා දෙනවිට, කෙලින්ම එම සංකල්පයේ අර්ථය (definition) හෝ විස්තර ලබාදීමට පෙර, එම සංකල්පය කළුලෑල්ලේ හෝ ප්‍රොජෙක්ටරයේ ප්‍රදර්ශණය කොට, ඒ සඳහා අන්තර්ජාලයේ ඇති අර්ථදැක්වීම් හා විස්තර සොයන ලෙස සිසුනට අණකරනවා. එවිට සිසුන් සිය පෞද්ගලික ස්මාර්ට්ෆෝන හෝ ටැබ්ලට් ආධාරයෙන් ගූගල් සෙවුම් හරහා විතර සොයන අතර ඒවා සිය සටහන් පොත්වල සටහන් කරගන්නවා.

මෙය කණ්ඩායම් ක්‍රියාකාරකමක් ලෙස කිරීමෙන් ස්මාර්ට්ෆෝන හෝ ටැබ්ලට් නැති සිසුසිසුවියන් ඇති සිසුසිසුවියන්ගේ කණ්ඩායම් වලට අනුගත කිරීමෙන් පංතිකාමරයේ ඇති නැති ගැටලුව මගහරවාගත හැකි අතර, සිසුනට කණ්ඩායමක් ලෙස සාමූහිකව ඉගෙනීමද හුරු කරනවා.

අවශ්‍ය තොරතුරු ලබාගැනීමෙන් පසුව, කණ්ඩායමක් ලෙස එම තොරතුරු සාකච්ඡාකොට, තමන් සොයාගත් දේ පංතියේ අන් අයටද ඉදිරිපත් කිරීමේ අවස්ථාව ලබාදෙන අතර, එම සංකල්පයට අදාල රූපසටහන් වැනිදෑද අන්තර්ජාලයෙන් සොයාගැනීමේ වගකීමද සිසුනටම පැවරෙනවා.  කෙසේවෙතත්, මේ උපක්‍රම ඉගැනීම පහසුකිරීමේ හා වඩාත් ප්‍රියජනක කිරීමේ උපක්‍රම මිස විශ්වවිද්‍යාල අධ්‍යාපනය අයිපෑඩයට හා අන්තර්ජාලයට භාරදීමක් කිසිසේත්ම නොවන බව ආචාර්යවරුන්, දෙමව්පියන් මෙන්ම වෙනත් පාර්ශවකරුන්ද අවබෝධකර ගත යුතුයි.

COMMENTS


ඔබ යම්කිස් ජයග්‍රාහී ක්‍රියාදාමයකට ප්‍රෙව්ශ වී ඇතත් මෙවැනි උපකරණ පිළිබඳ නිසි හැඳිනීමක් හො පුහුණවක් නොලද ගුරු පරපුර විශාල ගැටළුවකට මුහුණ දෙමින් අසාර්ථක වන ආකාරය අපේ රටේ පන්තිකාමර වලදී (පාසල් අධ්‍යාපනය) දැකගන්න පුළුවන් වෙලා තියෙන්නෙ අයිපෑඩ් ස්මාර්ට් පෝන් තහනම්ව ඇති තත්ත්වයක් යටතේ. ගරුවරයා අසාර්ථක වෙද්දී සිසුපරපුර අසරණව වල් වැදෙමින් සිටින බව මා හිතන්නේ ලොව පුරාම අත්දකිමින් සිටිනවා විය හැකියි. ප්‍රධාන හේතුව දැනුම වෙනස්වන වේගයෙන් ගුරුවරයා යාවත් කාලීන නොවීම විය හැකියි නේද ? ඔබතුමා ඉදිරිපත් කළේ මහත් සැලකිල්ලේන් සාමාන්‍ය අය අතර පවා ඇතිවිය යුතු සංවාදයකට යොමු කිරිමක් on පංති කාමරයේ අයිපෑඩ් විප්ලයවය ආපසු හැරවේ?



Wednesday, 9 September 2015

දැන් ගූගල් නාට්ටාමි (හෙවත් Google to begin delivering fresh groceries)


ලංකාවේ අපි නොදන්නවා වුනාට ගූගල් සමාගම ඇමරිකාවේ සමහර නගරවල අන්තර්ජාල සාප්පු හා මිළදීගත් බඩු බෙදාහැරීමේ සේවාවක් පවත්වාගෙන යනවා. අන්තර්ජාල ව්‍යාපාරික පුවත් සේවාවලට අනුව, ගූගල් ෂොපින් එක්ස්ප්‍රස් ලෙස හැඳින්වෙන මෙම සේවාව දැන් සිල්ලර බඩු (ග්‍රොසරි) බෙදෑහැරීමේ සේවාවන් සඳහා පුලුල්වෙලා.

මෙම සිල්ලර බඩු බෙදාහැරීමේ සේවාව කැලිෆෝනියාවේ සැන් ෆ්‍රැන්සිස්කෝ නුවරින් ආරම්භ කරන බව තමයි ගූගල් ආරංචිමාර්ග සඳහන් කරන්නේ. අමෙරිකාවේ විශාල සිල්ලර බඩු සුපිරි වෙළඳසැල් වන "හෝල් ෆුඩ්ස් - Whole Foods" හා "කොස්ට්කෝ - Costco " සුපිරි වෙළඳසැල් ජාල දෙක හා ඒකාබද්ධව මෙම ගූගල් ෂොපින් එක්ස්ප්‍රස් සේවාවේ සිල්ලර බඩු බෙදාහැරීමේ සේවාව ක්‍රියාත්මක වනවා.

ගූගල් ෂොපින් එක්ස්ප්‍රස් වෙබ් අඩවිය පිවිසී, තමන් වාසය කරන ප්‍රදේශයේ තැපැල් කේතය (Zip Code/Postal Code) ඇතුලු කිරීමෙන් අනතුරුව හෝල් ෆුඩ්ස් හා කොස්ට්කෝ සුපිරි වෙළඳ සැල්වල විකුණන්නට තියෙන සිල්ලර බඩු අන්තර්ජාලය හරහා මිළදීගෙන ගූගල් ෂොපින් එක්ස්ප්‍රස් සේවාව හරහා ගෙදරටම ගෙන්නාගන්න දැන් පහසුකම් සලස්වමින් යනවා.

සිල්ලර බඩුවලට අමතරව නැවුම් එළවළු හා පළතුරුත් මෙම සේවාව හරහා ඇණවුම් කරන්නට පුලුවන් බව ගූගල් පවසනවා.

ගූගල් ෂොපින් එක්ස්ප්‍රස් සේවාවේ අන්තර්ජාල බිහිදොර
විචාරකයින් පවසන අන්දමට ගූගල් ෂොපින් එක්ස්ප්‍රස් සේවාව බිහිකරලා තියෙන්නේ ඇමසන් සමාගමේ ඇමසන් ප්‍රයිම් (Amazon Prime) සේවාවට තරඟකාරී පිලිතුරක් ලෙසින්. දැනටමත් අන්තර්ජාල වෙළඳාමේ වගේම ක්ලවුඩ් අන්තර්ජාල සේවා (Internet Cloud Services) වල දැවැන්තයෙක් ලෙස ගූගල් සමාගමට අභියෝග කරන ඇමසන් සමාගමට තවත් එක් ව්‍යාපාරික අංශයක් - එනම් පාරිභෝගික මිළදී ගැනීම් බෙදාහැරීමේ සේවාවේත් දැවැන්තයෙකු වීම වැලැක්වීම ගූගල් ෂොපින් එක්ස්ප්‍රස් සේවාවේ අරමුණ ලෙස ගැනෙනවා.

2016 Toyota Prius

ටොයෝටා සමාගමේ ජනප්‍රියම රථ මාදිලියක් වන ප්‍රියස් හයිබ්‍රිඩ් රථයේ 2016 නව නිමැවුමේ එලිදැක්වීමේ නිළ උත්සවය ඊයේ (සැප් 8) අමෙරිකාවේ ලාස් වේගාස් නගරයේදී පැවැත්වුනා.


විචාරයකයින් පවසන ආකාරයට මීට වසර 15කට පෙර මුල්ම ප්‍රියස් රථය හඳුන්වාදී වසර 15කින් එලිදැක්වෙන මෙම රථය, ටොයෝටා සමාගමේ තවත් අලුත්ම නිර්මාණයක් වන හයිඩ්‍රජන් බලයෙන් ධාවනයවන මිරායි රථයේ නිමැවුමට සමානකම් දක්වනවා.


Related Posts Plugin for WordPress, Blogger...