Related Posts Plugin for WordPress, Blogger...

Friday, 22 August 2014

පාසැල් යන කාළයේ අපි සිහින මැවූ ගැජට් එක...

අපි, ඒ කිව්වේ අපේ පරම්පරාවේ කට්ටිය ඉස්කෝලේ ගියේ දැන් කාලෙකට ඉස්සරින්. හරියටම කියනවනම් 1977 ඉඳන් 1990 වෙනකම් තමයි අපේ පරම්පරාවේ අය ඉස්කෝලේ ගියේ. අපිට සුන්දරම පාසැල් කාළය වුනේ අටේ පංතියේ විතර ඉඳන් ඒ.ලෙවල් වෙනකන් කාලේ. ඒ කාලේ තමයි අපි ගෑණු ළමයි ගැනත් උනන්දුවෙන්න පටන් ගත්තේ. දන්නේ නැති අයට දැනගන්නත් එක්ක කියන්න ඕනේ අපි ඉකෝලේ ගියේ පාසැල් බස් රථයේ, ඒ කියන්නේ ස්කූල් බස් එකේ. දැන් වගේ ස්කූල් වෑන් වැහි වැහැලා තිබුණේ නෑ ඒ කාලේ. බිග් මැච් කාළෙට බස් එක වැහෙන්න කොඩි විතරක් නෙමෙයි කොළ අතුත් එල්ලගෙන බස් එක තොරණක් කරගෙන පුදුම සතුටකින් තමයි ඒකාලේ පාසැල් ගියේ. දැන් වගේ බස් වල යන්න සල්ලි දුන්නෙත් නෑ අපේ තාත්තලා. අරගෙන දුන්නේ මාසෙටම යන්න පුලුවන් සීසන් ටිකට් එකක්. ඒ කිව්වෙ මාසික වාර ප්‍රවේශ පත්‍රයක්. දැන් ඉතින් ඒවා නෑනෙ.

දැන් කාලේ ඉස්කෝලෙ යන ළමයි සිහින මවන්නේ අලුත්ම අයිෆෝන් එකක් ගන්න, අයි පෑඩ් එකක් නැතිනම් අලුත්ම ගැලක්සි ටැබ් එකක් ගන්න. සමහර අය ලැප්ටොප් එකක් ගන්නත් සිහින මවනවා ඇති. අද අයිපෑඩ් එකක් සමග පෙනීසිටීම කොතරම් උන්මාදයක් වෙලාද කිව්වොත් සමහර ඉස්කෝලෙ යන වයසේ ළමයි කඩේට පාන් ගන්න එන්නේ, නැතිනම් දෙමව්පියන් එක්ක මැක්ඩොනල්ඩ්ස් එකට එන්නෙත්, දානෙ ගෙදරකට මළගෙදරකට යන්නෙත් අයිපෑඩ් එක අරගෙන. ඒක පාවිච්චි කරනවාට වඩා වටේට කරකවමින් පෙන්වන එක තමයි බොහෝවිට සිදුවන්නේ.

අපේ කාලේ, ඒ කියන්නේ 1980 ගණන්වල ඉස්කෝලේ යන කොල්ලෙකුට තියෙන්න පුළුවන් සිරාම ගැජට් එක තමයි.. "සෝනි වොක්මන්" කියන ජංගම කැසට් ප්ලේයර් එක. ඒව එකක් තියෙන එකා ඉස්කෝලේ ගැජට් කිං.


ජපානයේ සෝනි සමාගම ඔවුන්ගේ ඉතිහාසයේ ඉදිරිපත් කරපු හොඳම නිර්මාණයක් විදියට සෝනි වෝක්මන් ජංගම කැසට් ප්ලේයරය හඳුන්වන්න පුලුවන්. 1979 ජූලි 1වැනිදා ජපානයේ වෙලඳපොලට ඉදිරිපත් කරපු වෝක්මන් එක අමෙරිකන් වෙළඳපොලට එන්නේ 1980 ජූනි 1වැනිදා. ස්ටීරියෝ ක්‍රමයට හෙඩ් ෆෝන් ආධාරයෙන් සංගීතයට සවන්දෙන්න පුලුවන් විධියට නිර්මාණය කර තිබුනු වෝක්මන් එකේ තවත් විශේෂත්වයක් නම් හෙඩ් ෆෝන් දෙකක් සම්බන්ධ කරන්න පුලුවන් විධියට නිර්මාණය කොට තිබීම. තරුණ තරුණියන් ඉලක්ක කරගෙන නිර්මාණය කරලා තිබුණු නිසා යාළුවන් දෙදෙනෙකුට නැත්නම් පෙම්වතාට හා පෙම්වතියට එකට ඉඳගෙන සිංදු අහන්න පුලුවන් වෙන්නයි ඒ විධියට හෙඩ්ෆෝන් දෙකක් සම්බන්ධ කරන්න පහසුකම් සපයලා තිබුණේ.


AA ප්‍රමාණයේ බැටරි දෙකකින් බල ගැන්වුනු වෝක්මන් ස්ටීරියෝ ප්ලේරය ඒ කාලයේ හැටියට ඉතා හොඳ තත්වයේ සංගීත නාදයක් ලබා දුන්නා. ඩොල්බි ස්ටීරියෝ නොයිස් රිඩක්ෂන් තාක්ශණය හා බේස් බූස්ට් තාක්ශණය අඩංගු කරලා තිබුණ නිසා අධික මිළගණන් වලට විකුණුනු ලොකු කැසට් ප්ලේයර් වලින් ලැබුණු ප්‍රතිවාදන තත්වයට සමාන ප්‍රතිවාදන තත්වයක් වෝක්මන් එකෙන් ලබා දුන්නා.

වෝක්මන් ජංගම ප්ලේයරය මගින් ලොව පුරා සංගීත කර්මාණ්තයට ලබාදුන්නේ ඉමහත් රුකුලක්. ව්‍යායාමය සඳහා දුවන ගමන්, ඇවිදින ගමන්, බස් එකේ/කෝච්චියේ වැඩට යන ගමන්, පාසැල් යන ගමන් සිංදු අහන්න අවස්ථාව වෝක්මන් එක මගින් ලබා දුන්නා. අමෙරිකාව, බ්‍රිතාන්‍යය, ජපානය වගේ රටවල වෝක්මන් එකකින් සිංදු අහන ගමන් ජොගින් යන එක තරුණ තරුණියන් අතර ඉතා ජනප්‍රිය වුනා. හොලිවුඩ් චිත්‍රපටවල ඒකාලෙ බොහෝ තරුණ චරිත වෝක්මන් භාවිතා කරමින් සිංදු අහන චරිත නිසා වෝක්මන් උන්මාදය ලොව පුරා පැතුරුනා.


මේ උන්මාදයට "Walkman Effect "  කියලා නමකුත් පට බැඳුනා. වොක්මන් ජංගම සංගීත කැසට් ධාවකයෙන් තරුණ පරපුරට ඇතිවුන බලපෑම් ගැන පර්යේෂණ පවා සිදුවුනා. ඔවුන්ගේ එක් සොයාගැනීමක් වන්නේ වෝක්මන් වැනි ජංගම සංගීත යන්ත්‍රයකින් සංගීතයට සවන්දීමෙන් ඉතාම නීරස රැකියා හා ක්‍රියාකාරකම් වල නීරස හා ඒකාකාරි බව අඩු කරන්නට හේතු වන බව. උදාහරණයක් විධියට උදය කාලයේ ව්‍යායාම සඳහා දිවීම වැනි ක්‍රියාකාරකම් වල යෙදීම උනන්දුකරවීමට මේම යන්ත්‍ර හේතුවුන බව සොයා ගැනුනා. ඉන්ධන පිරවුම් හල්, කුඩා හෝටල් හා නවාතැන් පොලවල්, වෙනත් රාත්‍රියට පවා සේවා සපයන ස්ථානවල රාත්‍රී වැඩමුරයේ කම්මැලිබව හා නිදිමත නැතිකර ගන්නට වෝක්මන් එක බොහෝ පිහිට වුනා.

හොඳ වගේම වෝක්මන් එෆෙක්ට් එකේ නරකත් තිබෙන බව සොයා ගැනුනා. ප්‍රධාන වශයෙන්ම තරුණ තරුණියන්ගේ කන් ඇසීම අඩුවීමට වෝක්මන් හෙඩ්ෆෝන් භාවිතයෙන් උස් හඬින් සංගීතයට සවන්දීම හේතු වුනා. ඒ වගේම සමාජයෙන් ඈත්ව හුදෙකලා වීමට වෝක්මන් උපකාරී වීමත් සමාජ සම්බන්ධතා වලට එතරම් හොඳ නැති බව පර්යේෂකයින්ගේ මතය වුනා.

කාත් එක්ක වත් කතාකරන්නේ නැතුව මුලු දවසම වෝක්මන් එකෙන් සිංදු අහන තරුණ පරපුරක් ඒ කාලේ බිහිවෙමින් තිබුණා. අද ස්මාර්ට්ෆෝන්, අයිපොඩ් හා අයි පෑඩ් වගේම අන්තර්ජාලයේ සමාජ ජාල, එදා වෝක්මන් එක නවත්තපු තැනින් පටන්ගෙන තරුණ තරුණියන්ව තමන්ගේ කාමරවලට කොටු කරන්නට හේතුවෙලා.

ලොව පැරණිම වඩු කර්මාන්තයේ නටබුන් ජර්මනියෙන් හමුවේ.. වසර 7000කට පෙර යකඩ ආයුධ නොතිබූ නව ශිලා යුගයේ වඩුවන් දැව කපන්නට යොදාගෙන ඇත්තේ ගින්දර!!


ජර්මානු පුරාවිද්‍යාඥයන් පිරිසක් විසින් ඉකුත් දිනයක ජර්මනියේ ලීප්සිග් නුවරට යාබද පුරාවිද්‍යා කැණීම් බිමක කැණීම් කටයුතු සිදුකරමින් සිටියහ. මඳින් මඳ පොළොව ඇතුළතට කැණීම් සිදුකළ විද්‍යාඥයන් පිරිසද මවිතයට පත් කරමින් මෙතෙක් ලොව හෙළි නොවූ අපූරු පුරාවිද්‍යා සාධකයක් මතුකර ගැනීමට ඔවුහු සමත් වූහ.

එම පුරාවිද්‍යාඥයන් පිරිස සොයා ගත් එම නවමු සොයාගැනීම වූයේ මෙයට වසර 7,000කට පෙර මිනිසා දැවයෙන් ඉදිකරන ලද ළිං සතරකි. මිනිසා වඩුවැඩ කිරීම් ආරම්භය මෑත කාලයේ යැයි බොහෝ දෙනකු නිගමනය කළ මතවාද ප්‍රතික්ෂේප කරමින් මෙම ඉපැරැණි දැව ළිං සතර මතු කරගත් පර්යේෂක පිරිස පවසන්නේ මෙම ළිං ක්‍රිස්තු පූර්ව 5,600ත් 4,900ත් අතර කාලය තුළ සකස් කළ ඒවා බවයි. කලින් පැවති මතය වූයේ දැව නිර්මාණ සිදුකිරීම සඳහා ඒවා නිසි පරිදි කැපීමට යකඩ කියත් වැනි සංකීර්ණ ආයුධ අවශ්‍ය බැවින්, එම ආයුධ සකසාගත හැකි කාළය වනතෙක් දැව කපා සකස්කොට භාවිතාකල වඩු කර්මාන්තයක් නොතිබූ බවයි.

ජර්මානු ජාතික විලී ටෙගල් හා ආචාර්ය ඩීට්රිච් හේකල්බර්ග් යන පුරාවිද්‍යාඥයන්ගේ ප්‍රධානත්වයෙන් මෙම නවමු සොයාගැනීම සිදුකළ අතර ඔවුහු පවසන්නේ ප්‍රථම මධ්‍යම යුරෝපීය කෘෂි ශිෂ්ටාචාරයට අයත් මිනිසුන් විසින් මෙම දැව ළිං සතර නිර්මාණය කරන්නට ඇති බවයි. වර්තමානයේ ළිං සෑදීම සඳහා එනම් ළිඳේ බැම්ම බැඳීම සඳහා යොදා ගන්නේ සිමෙන්ති බදාමයයි. එහෙත් මෙයට වසර 7,000කට පෙර වඩුවන් විසින් එවන් ළිං බැමි අලංකාරවත් ලෙස දැවයෙන් නිම කර ඇති බව මෙමඟින් තහවුරු වී තිබේ.

ජර්මනියේ ලීප්සිග් ප්‍රදේශයේ දිය පිරි වගුරු භූමි භාගයක් ඇතුළත මෙම කැණීම් කටයුතු සිදුකළ පර්යේෂකයන්ට ඕක් ලීයෙන් නිම කරන ලද මෙම දැව ළිං හමුවී තිබේ. නව ශිලා යුගයට අයත් යැයි සැලැකෙන පැරැණි ඕක් ලීයෙන් නිම කරන ලද මෙම ළිං හතර වසර 7,000ක් සුරක්ෂිතව පැවැතීමට හේතුව එම ප්‍රදේශයේ පැවැති ගොහොරු පරිසර වටපිටාව බව පර්යේෂකයෝ පවසති.

ගොහොරු පරිසරයේ යට විනාශ නොවී සුරක්‍ෂිතව පැවැති දැව ළිං බැමි සතරට අමතරව, දැවයෙන් නිම කරන ලද රූප නිර්මාණ, ගස්වල පොතුවලින් තැනූ බඳුන් සහ දැවයෙන් නිර්මාණය කරන ලද විවිධ නිර්මාණ කිහිපයක්ද ඔවුහු සොයා ගත්හ. විද්‍යාඥයන් පවසන්නේ ගොහොරු බිමේ උඩින් ජලය සහ මඩ තැන්පත්වී පැවැතීම නිසා මෙම වසර 7,000කට පෙර ඉදිකරන ලද දැව ළිංවලට වාතාශ්‍රය නොයෑම හේතුවෙන් ඒවා විනාශ වී නොමැති බවයි.

දැව කාලනිර්ණ විද්‍යාව හරහා මෙම දැව ළිං නිර්මාණය කළ කාලවකවානුව නිශ්චිත ලෙස හඳුනාගත් විද්‍යාඥයෝ එම ගස් කැපූ කාල වකවානුව, ගස් වර්ගය ආදී තවත් බොහෝ දැව පර්යේෂණයත් හරහා සොයා ගත්හ. ඒ අනුව මෙම පැරැණි ඕක් ගස් ඉතා විශාල යෝධ ගස් ලෙස පිහිටා තිබූ බවත් නව ශිලා යුගයේ මුල් කාලයේදී එවකට විසූ වඩුවන් විසින් ශිලාමය වෑයන් භාවිත කරමින් ඒවා පෙරළා දැව කොටස් වෙන්කර ඇති බවත් හෙළි කරගෙන තිබේ.

පෙරළා ගත් සුවිසල් වෘක්ෂයන්හි කඳන් පැළීමට ගල් මෙවලම් භාවිත කළ ලක්ෂණද විද්‍යාඥයන් සොයාගත්හ. කැබලි ලෙස සකස් කරගත් එම ලෑලි ගෙන සමචතුරස්‍ර හැඩයට තබා ගින්දරෙන් පුච්චා අවශ්‍ය පමණට කැබලි කරගැනීමට ඔවුහු සමත්වී තිබේ. විද්‍යාඥයන් පවසන්නේ අද පවතින වෑල්ඩින් ක්‍රමයට හා සමාන දැව පෑස්සුම් ක්‍රමයක් මෙයට වසර 7,000කට පෙර නව ශිලා යුගයේ වඩුවන් සතුව පැවැති බවයි.

ඉතා සූක්ෂ්ම ලෙස ළිදක වටප්‍රමාණයට සරිලන පරිදි දැවමය ළිං බැමි නිමැවීමට තරම් දියුණු තාක්‍ෂණයක් එවකට පැවැතීමෙන් එසමයෙහි මානවයා කෙරෙහි පැවැති වඩුවැඩ ශිල්පීයභාවයද මැනවින් පසක් වේ. මෙම දැවමය ළිං හතර වසර 7,000ක් පමණ ඉපැරැණි වඩු නිර්මාණ බවට කාල නිර්ණය සිදුකර ගැනීමත් සමඟ පුරාවිද්‍යාඥ විලී ටෙගල් මහතා මාධ්‍ය අමතමින් පවසා ඇත්තේ මෙබන්දකි.

"නව ශිලා යුගයේ විප්ලවය කියන්නේ මිනිස් වර්ගයාගේ ඉතිහාසයේ සිදුවූ පෙරළියයි. (neolithic revolution) එතෙක් මිනිසා එක් තැනක වාසය නොකොට දඩයම් ක්‍රමය සිදුකරමින් විවිධ තැන්වලට සංක්‍රමණය වුණා. නමුත් ඔවුන් නව ශිලා යුගයට ආ පසුව එක් තැනක වාසයට සීමා වුණා. එහි ප්‍රතිඵලයක් වුණේ කෘෂිකාර්මික ක්ෂේත්‍රයට මිනිසුන් එක් වීමයි. කෘෂිකර්මය සඳහා ජලය අවශ්‍ය වුණා. එහි ප්‍රතිඵලයක් ලෙස නව ශිලා යුගයේ මානවයා අති විශිෂ්ට තාක්ෂණික අංග නිරූපණය කරමින් දැවමය ළිං සාදන්න පටන් ගත්තා. දැවයට දැවයක් ඇලවීමේ ඇතැම් ක්‍රමවේදයන් සඳහා අදට වඩා එදා වඩුවන් සතුව දියුණු තාක්ෂණයක් පැවැතුනා කියලා මේ පර්යේෂණයෙන් අපි තහවුරු කරගත්තා."

Sources;
http://www.mawbima.lk/95-65293-news-detail.html
http://www.dailymail.co.uk/sciencetech/article-2255383/The-carpenters-7-000-year-old-German-water-wells-reveal-earliest-known-use-wood-construction.html

Thursday, 21 August 2014

සයිමන්ට විස්සයි, නිව්ටන්ට විසි එකයි [ස්මාර්ට් ෆෝන් පරපුරේ මී මුත්තන් දෙදෙනෙකුගේ කතාව]

ලොව මුල්ම ස්මාර්ට් ෆෝන ලෙස සැළැකෙන ‘‘අයි බී එම් සයිමන්‘‘ පසුගියදා තම 20 වැනි උපන්දිනය සැමරීය. එමෙන්ම ලොව මුල්ම මැසේජ් පෑඩ් එක ලෙස සැලකෙන ඇපල් නිව්ටන් වෙළඳපොලට නිකුත්ව දැන් වසර 21කි.
Apple Newton Message Pad - 1993 (Image Credit - Wiki Media Commons)
IBM Simon Cellular Smartphone - 1994 (Image Credit - Wiki Media Commons)
අයි.බී.එම් සයිමන්

සයිමන් ඇමරිකාවේ අයිබීඑම් සමාගමේ නිශ්පාදනයකි.ජංගම දුරකථනයක් හා සාක්කු පරිගණකයක දෙමුහුමක් ලෙස නිර්මානය කෙරුණු එය වර්තමානයේ නැතුවම බැරි උපාංගයක් බවට පත්ව ඇති ස්මාර්ට් ෆෝනයන් වල පළමු උත්සාහයයි.

ගඩොල් භාගයක් තරමේ වන ‘‘සයිමන්‘‘ ග්‍රෑම් 500 ක් පමණ බරැතිය. සංවේදී LCD තිරයකින් හා එම තිරය මත ඇඳීීමට ලබාදී තිබුණු විශේෂ පෑනකින් (Stylus) එය සමන්විතය. අයි.බී.එම් සමාගම නිර්මාණය කොට ජපානයේ මිට්සුබිෂි ඉලෙක්ට්‍රික් සමාගම මගින් නිශ්පාදනය කරන ලද සයිමන් සෙලියුලර් ස්මාර්ට් ෆෝනය එලිදැක්වුනේ 1994 අගෝස්තු මසදීය.

දුරකථන ඇමතුම් ගැනීම,ෆැක්ස් පත් යැවීම මෙන්ම සංවේදී තිරය මත පෑනෙන් එක එක දේ ඇඳ හෝ ලියා හෝ විද්‍යුත් ලිපියක් ලෙස පරිගණකයක් වෙත යැවීමේ හැකියාවද එයට ඇත. මීට අමතරව වැනි මෘදුකාංග (ඇප්ස්) මෙහි අඩංගු විය. මීට අමතරව address book, calendar, appointment scheduler, calculator, world time clock, electronic note pad  වැනි මෘදුකාංග (ඇප්ස්) මෙහි අඩංගු විය.

මතක ධාරිතාවය මෙගාබයිට් 1ක් වූ සයිමන් ස්මාර්ට්ෆෝනය AMPS තාක්ශණයේ සෙලියුලර් ජාල සමග සම්බන්ධවිය හැකි ලෙස නිර්මාණය කොට තිබුණි. AMPS ඇනලොග් සෙලියුලර් තාක්ශණයක් වන අතර එකල ශ්‍රී ලංකාවේ "මොබිටෙල්" ජාලය AMPS තාක්ශණයෙන් ක්‍රියාත්මක විය.

සයිමන් අයිබීඑම් සමාගම සිතූ පරිදි ජනපි‍්‍රය නොවුනි.එහි විශාලත්වයත්, සංකීර්ණ භාවයත් සාමාන්‍ය ජංගම දුරකථනයක් භාවිතා කිරීමට පුරුදුව සිටි පරිශීලකයෝ එයට ආකර්ෂණය වීම වැළැක්වූ හේතු විය

.
අමෙරිකානු සෙලියුලර් සමාගමක් වන බෙල් සවුත් සමාගම අයි.බී.එම් සයිමන් ස්මාර්ට් ෆෝනය පිලිබඳව පලකල වෙළඳ දැන්වීම්

ඇතැමුන් සයිමන් මිලදී ගත්තද පසුව හෙළිවූයේ දුරකථන ඇමතුමක යෙදිය හැකිව සිටින්නට හැක්කේ පැයක පමණ කාලයක් පමණක් බවය.එම කාලය ගතවී අවසානය වන විට බැටරිය බින්දුවටම බසී. මෙවන් කරුණු නිසා සයිමන් අසාර්ථක ව්‍යාපෘතියක් වුනි.ඩොලර් 899 කට මිල කර වෙළඳපොළට නිකුත් කෙරුණද මාස කිහිපයක ඇවෑමෙන් මිල ඩොලර් 599 ක් දක්වා පහත බැස්සේය.මෙනිසා තවත් මාස කිහිපයක් බලා සිට සයිමන් සදහටම වෙළඳපොළෙන් ඉවත් කර ගැනීමට අයිබීඑම් සමාගම කටයුතු කළේය

ඇපල් නිව්ටන්

මුලුමනින්ම පරිගණක නිර්මාණය කිරීමෙ සමාගමක් ලෙස තිබූ ඇපල් සමාගම මුල්වරට පාරිභෝගික ඉලෙක්ට්‍රොණික භාණ්ඩ (consumer electronics) නිර්මාණයක් ලෙස ඉදිරිපත් කලේ මැසේජ් පෑඩ් එකයි.

ඇපල් සමාගම මගින් නිර්මාණය කල මෙය නිශ්පාදනය කලේ ජපානයේ ෂාප් සමාගමයි. මුල්වරට තිරයේ ලියන අත් අකුරු හඳුනාගෙන ඒවා පරිගණක අකුරු බවට පරිවර්තනය කල හැකි තාක්ශණයක් (hand writing recognition technology) ප්‍රායෝගිකව හඳුන්වා දුන්නේ නිව්ටන් මැසේජ් පෑඩ් එක මගිනි. අයි.බී.එම් සයිමන් තිරයේද ස්ටයිලස් එකක් ආධාරයෙන් රූප ඇඳිය හැකිව තිබුණු නමුත් අකුරු හඳුනාගැනීමේ හැකියාව එයට නොතිබුණි. එකල එතරම් නොමේරූ තාක්ශණයක් ව තිබුණු අත් අකුරු හඳුනාගැනීමේ තාක්ශණය නිසිපරිදි ක්‍රියාත්මක නොවීම නිව්ටන් මැසේජ් පෑඩ් එකේ අසාර්ථකත්වයට බොහෝසේ දායකවූ බව විචාරකයින්ගේ පිලිගැනීමයි.
ඇපල් සමාගම නිව්ටන් මැසේජ් පෑඩය පිලිබඳව පලකල වෙළඳ දැන්වීම්
මීට අමතරව LCD සංවේදී තිරය මත ජනනය වන on screen keyboard මගින් සයිලස් එක හරහා අකුරු ලිවීමේ හැකියාවද තිබුණි. මෙය අද සියලු ස්මාර්ට් ෆෝන් වල එන on screen keyboard එකට සැම අතින්ම සමාන විය.සෙලියුලර් ජාල හා සම්බන්ධවීමේ හැකියාවක් නොතිබූ බැවින් ස්මාර්ට් ෆෝනයක් ලෙස ගත නොහැකි වුවද, අද අප භාවිතා කරන අයිෆෝන් හා ඇන්ඩ්‍රොයිඩ් ස්මාර්ට්ෆෝන වල ඇති  බොහෝ තාක්ශණයන්ගේ තිඹිරිගෙය වන්නේ ඇපල් නිව්ටන් මැසේජ් පෑඩයයි.

Wednesday, 20 August 2014

එබෝලා ::: මොකක්ද මේ අලුත් ලෙඩේ???

එබෝලා වෛරසය ඉලෙක්ට්‍රෝණ අණ්වීක්ශයකින් පෙනෙන ආකාරය
Ebola virus disease (EVD) නැතිනම් Ebola hemorrhagic fever (EHF) යනු වෛරස් මගින් හටගන්නා මාරාන්තික රක්තපාත උණකි. එබෝලා රක්තපාත උණ ඇති කරන වෛරස් 4ක් මේ වනවිට හඳුනාගෙන ඇත. Bundibugyo virus (BDBV), Sudan virus (SUDV), Taï Forest virus (TAFV), Zaire Ebola virus (ZEV) යනු එබෝලා රක්තපාත උණ ඇති කරන වෛරස් වර්ග 4යි. එබෝලා රක්තපාත උණ බෝවීම සඳහා එම වෛරසය ආසාදිත වූයෙකුගේ ශාරීරික තරල (ලේ, කෙළ, සෙම්/සොටු, ශුක්‍රාණු/යෝනි තරල ) ස්පර්ශවී ශරීරයට වෛරසය ඇතුළුවීම මගිනි. වෛරසය ආසාදිතයෙකු භාවිතකල එන්නත් කටු මගින්, ආසාදිත රුධිරය පාරවිලයනය මගින්ද මෙය බෝ විය හැක.


කොන්ගෝව, උගැන්ඩාව, ගැබෝන්, ලයිබීරියාව, අයිවරි කෝස්ට් වැනි අප්‍රිකාවේ දුගී රටවල්වල කලින් කලට වසංගතයක් මෙන් පැතිරෙන එබෝලා රෝගයේ ප්‍රධාන වෛරස ගබඩාව (virus reservoir) වවුළන් බවට විද්‍යාඥයින් විසින් හඳුනාගෙන ඇත. වවුලන් රෝගවාහකයන් ලෙස සිටින මෙම වෛරසය මිනිසාට පැතිරෙන්නේ බොහෝවිට අප්‍රිකානු රටවල වවුල් මස් හා වෙනත් වන සතුන් ආහාරයට ගැනීම මගිනි. වවුල් මස්වලින් මෙම වෛරසය කෙලින්ම මිනිස් සිරුරට ඇතුලුවිය හැකි අතර ඊට අමතරව වවුලන් විසින් බාගෙට කා අතහරින පලතුරු ආහාරයට අගන්නා වඳුරන්, ගෝරිල්ලන් වැනි සතුන්ටද මෙම වෛරසය ඇතුලුවෙයි. අප්‍රිකාවේ වඳුරු මස් ප්‍රණීත දඩමසක් ලෙස සැළකෙන අතර ආසාදිත වඳුරන් මස් කරද්දී හා හොඳින් නොපිසූ ආසාදිත මස් ආහාරයේදී එබෝලා වෛරසය ශරීරගත විය හැකිය.


එබෝලා රෝග ලක්ශණ

වෛරසය ශරීරගත වී දින 7-9 ගතවන විට
උණ, හිසරදය, දැඩි මස්පිඩු වේදනාව

වෛරසය ශරීරගත වී දින 10 ගතවන විට
තදින් උණ ගැනීම, ලේ වමනය, තෝන්තු ගතිය

වෛරසය ශරීරගත වී දින 11 ගතවන විට
මොළයේ අභ්‍යන්තර ලේ ගැලීම්, නාසයෙන්, ඇස්වලින්, කටින් ලේ පිටවීම, සමේ ලේ ගෙඩි හටගැනීම

වෛරසය ශරීරගත වී දින 12 ගතවන විට
සිහිසුන් වීම, දැඩි අභ්‍යන්තර ලේ වහනය, මරණය



2014 බටහිර අප්‍රිකානු එබෝලා වසංගත තත්වය

මෙම වසංගතය ආරම්භ වී ඇත්තේ බටහිර අප්‍රිකානු රටක් වන ගිනී රාජ්‍යයේය. 2013 දෙසැම්බරයේ ව්‍යාපතිය ඇරඹී ඇති මෙය පිලිබඳව ලෝක සෞඛ්‍ය සංවිධානය දැනුවත් වන්නේ 2014 මාර්තුවේදීය. ඒ වනවිට වසංගතය ලයිබීරියාව, සියෙරා ලියෝන් හා නයිජීරියාව දක්වා පැතිර ගොස් තිබුණි. 1976දී එබෝලා වෛරස් රෝගය හඳුනාගැනීමෙන් පසු ඇතිවී විශාලතම එබෝලා වසංගතය මෙයයි. 2014 අගෝස්තුව වන විට මෙම වසංගතයෙන් 1229 මියගොස් ඇති බව වාර්තා විය.




Friday, 15 August 2014

ඉපැරණි අධිතාක්ශණි යුගයක් බිහිකල සුපිරි මිනිසුන්වූ රාවණ ගෝත්‍රය

රාමා ඉපැදී ඇත්තේ  මීට වසර මිලියන 1.2කට පමණ පෙර ත්‍රිත යුගය නම් කාළයේ බව හින්දු ආගමික ධර්මග්‍රන්ථ පිලිබඳ ගැඹුරින් හැදෑරූ ඉන්දීය ප්‍රාඥයින් විශ්වාස කරති. රාමාගේ සමකාලීනයෙකු වූ රාවණාද එවැනිම අති පැරැන්නෙකු යැයි උපකල්පනය කල හැකිය. නූතන විද්‍යා සොයාගැනීම් වලට අනුව නූතන මානවයා හෙවත් හෝමෝ සැපියන් වරුන් ලොව පහලවූයේ මීට වසර 200,000කට පෙර යයි උපකල්පණය වේ. ඒ ෆොසිල සටහන් හා ජානමය පර්යේෂණ ආධාරයෙනි.

එසේනම් රාමා මෙන්ම රාවණාද හෝමෝ සැපියන් විය නොහැකිය (කළබල වන්නට එපා - දිගටම කියවන්න )

නූතන මානවයාත් (homo sapiens), නියැන්ඩර්තාල් මානවයාත් (homo neanderthalensis) සමකාලීනයන් වන අතර ඔවුන් වසර ලක්ශ ගණනක් වෙන් වෙන් සමාජ වශයෙන් ජීවත්වූවා පමණක් නොව හෝමෝසැපියන් වරුන් හා නියැන්ඩර්තාල් වරුන් අතර ලිංගික සබඳතා ඇතිවී දෙමුහුන් මානවයින්ද බිහිවිය. මේ සඳහා ජානමය සාධක විද්‍යාඥයින් හට ලැබී තිබේ. නියැන්ඩර්තාල් මානවයින් භාවයට යෑම පිලිබඳව එක් කල්පිතයක් වන්නේ නියැන්ඩර්තාල් මානවයින් ඊට වඩා වේගයෙන් බෝවෙමින් වර්ධනය වූ හෝමෝ සැපියන් වරුන් හා සම්මිශ්‍රව නියැන්ඩර්තාල් ලක්ශණ නිලීනව ගිය බවයි. නියැන්ඩර්තාල් ජාන අඩංගු මානව ගෝත්‍ර අදත් අප අතර වාසය කරති. ඒ අනුව නියැන්ඩර්තාලුන් අභාවයට ගියත් ඔවුන්ගේ ජාන තවමත් මානව ශරීර තුල නොනැසී පවතී.

Homo heidelbergensis
දැනට පිලිගැනෙන මතය අනුව නියැන්ඩර්තාල් මානවයා හා හෝමෝසැපියන් මානවයා යන දෙවර්ගයම හෝමෝ හිඩෙල්බර්ජෙන්සිස් (හෝමෝ රොඩේසියන්සිස්) යන මානවයාගෙනි. හෝමෝ හිඩෙල්බර්ජෙන්සිස් මානවයා වසර මිලියන 1.3 කාලයක සිට වසර ලක්ශ 2ක් තරම් මෑතක් වන තුරුම ලොව රජකල අතර නූතන මානවයාට බෝහෝ සෙයින් සමාන, හෝමෝ සැපියන්ගේ මොළය තරම්ම විශාල මොළයක් සහිත දියුණු මානවයෙකි.

එනම් හෝමෝ හිඩෙල්බර්ජෙන්සිස් ජීවත්ව ඇත්තේ හින්දු යුග වලට අනුව ත්‍රීත යුගයේදී යයි කිව හැකිය.

7ක් පමණ උස, පුළුල් ශක්තිමත් ශරීරවලින් හෙබි, ආරෝහ පරිණාහ දේහයකින් සමන්විත වූ හිඩෙල්බර්ජෙන්සිස් මානවයා ඉහල බුද්ධියකින්ද යුතුවූවාය.

ශ්‍රී ලාංකික/දකුණු ආසියාතික මිනිසුන්ට වඩා උස මහත අමෙරිකානුවෙකුගේ සාමාන්‍ය උස අඩි 5කුත් අඟල් 9ක් පමණ යයි අමෙරිකානු සෞඛ්‍ය අමාත්‍යාංශයේ දත්ත පවසයි. අඩි 7ක් උස හිඩෙල්බර්ජෙන්සිස් මානවයා අමෙරිකානුවෙකු අභියස වුවද යෝධයෙකු මෙන් දිස්වේ.

දැනට ඇති විද්‍යාත්මක මතය නම් දියුණු තාක්ශණික සිශ්ඨාචාරයක් ඇතිකල එකම මානවයා හෝමෝ සැපියන්ය. එයද සිදුවීයේ වසර 200,000 තරම් මෑත කාලයකදීය (පෘථිවි ඉතිහාසය හා බුද්ධිමත් මානවරූපී ද්වීපාදිකයින් intelligent hominid bipeds -  ලොව සැරිසැරූ වසර මිලියන 7ක කාල පරිච්ඡේදය හා සසඳනවිට)
.
2010 වසරේදී අන්තර්ජාතික පර්යේශණ කණ්ඩායමක් විසින් ආදීතම මානවයින් මීට වසර මිලියන 3.4කට පමණ පෙර ශිලා ආයුධ භාවිතාකල බවට පැහැදිලි සාක්ශි ඉතියෝපියාවෙන් සොයාගෙන තිබේ. ගල් ආයුධ යොදාගෙන මරාගත් සතුන්ගේ ඇටකටු වල එම ගල් ආයුධ භාවිතා කිරීමෙන් සටහන්වූ කැපීම් සටහන් ආධාරයෙන් මෙම නිගමනයට එළඹී තිබේ. ඊට පෙර ශිලා ආයුධ භාවිතය පටන්ගත්තේ වසර මිලියන 2.6කට පෙර බවට නිගමනය කොට තිබුණි. ඒ, එතෙක් හමුවූ පැරණිතම ගල් ආයුධ ඒ කාලයේ නිර්මාණය කල බවට නිගමනය කොට තිබූ බැවිනි. 2010 සොයාගැනීමට අනුව ශිලා ආයුධ භාවිතය වසර 800,000 තරම් විශාල කාල පරිච්ඡේදයකට පෙර සිට සිදුවී ඇතිබව තහවුරු වී ඇත.

එනම් මානවයාගේ දියුණුව ඉතා මෑතකදී සිදුවූවක් යන කල්පිතය හා හෝමෝ සැපියන් වරුන් අන් සියළු මානවයින්ට වඩා උසස් බවට පලවන කල්පිත වියැකී යන්නට පටන්ගෙන ඇත.

දැන් මානව විද්‍යාඥයින් පවසන අන්දමට පරිණාමයේ හිනිපෙත්ත හෝමෝ සැපියන් මානවයා නොවේ. පරිණාමය යන ක්‍රියාදාමය, රේඛීයව (linear) නිශ්චිත ඉලක්කයක් කරා යන්නක් නොව විවිධ පරිසර තත්වයන්ට අනුව සත්වයන් අනුවර්තනය කරවමින් හැඩගැස්වීමේ ක්‍රියාවලියක් පමණකි. ඒ අනුව මීට පෙර කාළයකද දියුණු මානවයින් සිටියා යන්න උපකල්පණය කල හැකිය. ඔවුන් හෝමෝ සැපියන්ද නැතිනම් ඊට පෙර සිටි මානව වර්ගයක්ද යන්න පැහැදිලි නැතත් ඔවුන් හෝමෝ සැපියන් නොවුනු පලියටම නොදියුණු යයි සිතීම මුලාවකි. උදාහරණයක් ලෙස මිනිස් මොලය තරම්ම විශාල මොලයක් තිබූ අඩි 7ක් උස උත්ටුංග දේහදාරී හොමෝ හිඩෙල්බර්ජෙන්සිස් දියුණු සිස්ඨාචාරයක් ඇති නොකලා යයි කිව හැක්කේ කාටද? මීට වසර මිලියන 1.3කට පෙර ලොව සැරිසැරීම ආරම්භ කල මේ මානවයා වසර ලක්ශ කිහිපයක ඇවෑමෙන් අද මෙන්ම හෝ ඊට සමාන දියුණු තාක්ශණික සිශ්ඨාචාරයක් ඇති කලා විය හැකිය.

වසර ලක්ශ කිහිපයක ඇවෑමෙන්, ශීත යුග වලින් අයිස් බෝල බවට පත්වි නැවට උණුසුම් පෘථිවියේ නිරන්තර ඛාදනයන්ට හසුව මෙම මානවයින් සිදුකල තාක්ශණික නිර්මාණ දුහුවිලි බවට පත්වන්නට ඇත. නැතහොත් අනාගත පුරාවිද්‍යාඥයින්ට සොයාගත හැකිවන ලෙස පෘථිවියේ තවමත් ගවේෂණයට බඳුන් නොවූ ප්‍රදේශයක, නැතහොත් මුහුදු පතුලේ ගිලී තිබෙන්නට පුළුවන.

රාවණා මෙන්ම රාමා හා සිතාද, ලක්ශ්මණ හා විභිෂණද හෝමෝ හිඩෙල්බර්ජෙන්සිස් මානව ගණයේ දියුණු මානවයින් වීමට ඉඩක් නැතැයි සිතනවාද? සියල්ල සිදුවූයේ පසුගිය වසර ලක්ශ 2 දෙක තුල පමණක්ද? ගෞතම බුදුන්වහන්සේ පවසන ආකාරයට උන්වහන්සේට පෙර බුදුවරුන් 27 නමක් ලොව පහලවී දහම් දෙසා ඇත. මේ 27 දෙනාම පහල වූයේ වසර ලක්ශ 2ක් වැනි සුළු කාලයක් තුලදීද? එසේනම් සෑම වසර 7400කට වරක්ම බුදුවරයෙකු පහලවී තිබේ. සෑම බුදුවරයෙකුම හෝමෝ සැපියන් මානවගණයේ යයි සළකන්නේ නම් හා ෆොසිල සාධක සත්‍ය නම් එසේ විය යුතුය. නැතහොත් සැපියන්ට පෙර ජීවත්වූ ආදී මානවයින් අතරින්ද බුදුවරුන් මෙම මහ රහතුන්ද බිහිවී ඇතැයි සිතිය යුතු නොවේද? එසේත් නැතිනම් විද්‍යාව කුමක් කීවද වසර කෝටි ගණනාවක්ම හෝමෝ සැපියන්වරුන්ම ලොව පාලනය කල එකම මානව ගණය විය යුතුය.

එපමණක් නොව මේ බුදුවරුන් ධර්මදේශනා පැවැත්වූයේ කාහටද යන්නද ගැටළුවකි. ගල් ආයුධ වලින් කොටමින්, යන්තම් සතෙකු මරාගෙන, මස් කෑලි ගින්නේ පලහා කමින් සිටි වනචාරින්ට (හෝමෝ සැපියන්ට පෙර සිටියවන් ගැන විද්‍යාව කියන ආකාරයට) ගැඹුරු දහමක් අවබෝධ කොටගත හැකිද? එසේනම් මේ බුදුවරුන් පහලවූ යුගවල ගැඹුරු, තර්කානුකූල දහමක් අවබොධකරගත හැකි, අතිශය දියුණු මනසක් සහිත මානවයින්ද සිටිය යුතුමය. ඔවුන් හෝමෝ සැපියන්ද නැද්ද යන්න ඔබ තීරණය කරන්න.

විද්‍යාව 100% සත්‍යයිද, ඉන් කියවෙනදේ පමණක් ගතයුතු යයි සිතීම විශාල මුලාවකි. 2010ට පෙර මුද්‍රණය කල සියලු මානව විද්‍යා හා පුරා විද්‍යා පොත්වල සටහන්ව තිබුණේ මානවයින් ශිලා ආයුද නිපදවන්නට පටන් ගත්තේ වසර මිලියන් 2.6කට පෙර සිට බවයි. 2010 ඉතියෝපියානු සොයාගැනීම් වලින් මෙය වසර 800,000ක් අතීතයට ගියේය. විද්‍යාවේ ස්වරූපය එයයි. නිරීක්ශණ මත ගොඩනැගූ කල්පිත උඩ විද්‍යාව දිවෙයි. අලුත් යමක් නිරීක්ශණය වූවිට, කල්පිත වෙනස් වෙයි, සිද්ධාන්ත අලුත්වෙයි.

ආගමික විශ්වාසද එලෙසමය. (මේ කතාකරන්නේ බුද්ධ දේශණා පිලිබඳව නොවේ - විශ්වාස හා මතිමතාන්තර ගැන පමණී)  ඒවාද 100% විශ්වාස කල යුතු නොවේ. ඒවා කාලානුරූපව වෙනස් වෙමින් පැමිණ ඇති නිසා මුල් සත්‍යය කුමක් දැයි දැන ගැනීම උගහටය.

රාවණ, රාමා හා සීතා 

රාමායනයේ කුමක් කීවද, ඉපැරණි යුගයක අහසින් යා හැකි යන්ත්‍ර තිබූ, ලක්ශ ගණනින් ජනයා විසූ දියුණු නගර තිබූ, එම දැවැන්ත නගර මොහොතින් අළුදුහුවිලි බවට පතකල හැකි බිහිසුණු අවි තිබූ කාල වකවාණුවක් (හෝ වකවාණු කිහිපයක්ම) මෙම පෘථිවියේ තිබූ බව රාමායනයටත් වඩා පැරණි මූලාශ්‍ර විශාල ප්‍රමාණයකින් කියැවේ. ඒවා ප්‍රබන්ධද නැද්ද යන්න තීරණය කිරීමට ඉක්මණ් නොවන්න. සියල්ල විවෘත මනසකින් දකින්න.

ඉපැරණි පිටසක්වලයින් ලබාදුන් තාක්ශණයෙන් මෙම සිශ්ඨාචාර බිහිවූ බව එක් මතයකි. ඒ මතයට අනුව පිටසක්වලින් පැමිණි මානව රූපී දියුණු ජීවීන් මිනිසාට තාක්ශණ ඥාණය ලබාදී ඔවුන්ව දියුණු කරවා යන්නට ගියෝය. රාමා සීතා හා රාවණ එවැනි පිටසක්වලයින් විසින් දියුණු කරවන ලද ආදී මානව ගෝත්‍ර කිහිපයකට අයිති, අධි තාක්ශණික සිශ්ඨාචාරයක වැසියන් විය හැකිය.

එසේත් නොමැතිනම් වසර ලක්ශ 2ක් තරම් ලාබාල හෝමෝ සැපියන් ගෝත්‍රයට පෙර විසූ, එලෙසම බුද්ධිමත් මානව ගෝත්‍රයක් දියුණුවේ හිනිපෙත්තේ පැවති අවධියේ විසූ ඇත්තන් විය හැකිය. ඒ ස්වර්ණමය යුගය පිලිබඳ මතක සටහන් වසර ලක්ශ ගණනක් පුරා කටික් කට (හෝ ලිඛිතව ) පැමිණ දැන් දේව කතා ලෙස ලොව පුරා තවමත් සැරිසරයි.

එමෙන්ම රාවණා පිලිබඳ උනන්දුවක් දක්වන ලාංකිකයින් නොදන්නා කරුණක් වන්නේ රාවණ කතාව ලංකාවට හා ඉන්දියාවට පමණක් සීමාවූ කථාවක් නොවන බවයි. රාවනා පිලිබඳ පුරාවෘත බුරුමය, ඉන්දුනීසියාව, ජාවා/සුමාත්‍රා, ලාඕසය, කම්පූචියාව, තායිලන්තය වැනි රටවල් ගණනාවක පැතිර පවතින බවයි. ඔවුන් රාවණා පිලිබඳව ඇති විශ්වාසද අප තුල ඇති විශ්වාස වලට යම් දුරකට සමානය. බුරුමයේ, ඉන්දුනීසියාවේ මෙන්ම මැලේසියාවේද, ඔවුනටම ආවේණික රාම රාවණ සංග්‍රාමයක් පිලිබඳව විස්තර කෙරෙයි. ඒ අනුව රාම රාවණ හා සිතා මෙන්ම ලක්ශ්මණ හා විභිශණද ආසියාව පුරාම හොඳින් දන්නා චරිත පෙළකි.

මේ සියල්ලම ඉන්දියාවේ වාල්මිකී විසින් ලියන ලද රාමායනයට සමාන ලෙස දැන් අනුවර්තනය වී ඇතත් මුලු මහත් අග්නිදිග ආසියාවම ඉන්දියානු වාල්මිකීගේ කාව්‍යයක් සිය සංස්කෘතියට මුලුමනින්ම වැද්ද ගත්තා යයි සිතිය නොහැකිය. එසේනම් අනෙකුත් ඉන්දියානු වෘත, උදාහරණයක් ලෙස මහා භාරත් කාව්‍යයද එලෙසම එම රටවල සංස්කෘතියන් තුල මුල් බැසගෙන තිබිය යුතුය. එහෙත් එවැන්නක් පිලිබඳව අසන්නට නොලැබේ.උදාහරණයක් ලෙස මහාභාරත කාව්‍යය, භගවත් ගීතාව, භගවත් පුරාණය වැනි හින්දු ග්‍රන්ථ මෙන්ම වේද ග්‍රන්ථ හා ඒවායේ කථාපුවත්ද මේ අග්නිදිග ආසියාතික සංස්කෘතිවල මුල් බැසගෙන නැත. එහෙත් රාමායනය එසේ වී ඇත. මෙයට හේතුව රාමායනයේ විස්තර කරන කතාවස්තුව පිලිබඳ දැනුමක් මෙම සංස්කෘතීන් තුල, රාමයනය ලියවීමටත් පෙර සිටම තිබූ බවට විශ්වාස කල හැකිය. සම්පූර්ණයෙන්ම ආගත්තුක යමක් සංකෘතියකට එකතුවන වාට වඩා පහසුවෙන් ආගන්තුක නොවන, යම් අවබෝධයක් ඇති යමක් සංකෘතියක් තුලට පහසුවෙන් එක්වී අනුවර්තනය වේ.

අසුරයෙකු ලෙස හැඳින්වෙන රාවණ දියුණු පෘථිවි වැසි මානවයෙකු වනවිට සුරයෙකු වූ රාම පිටසක්වලයෙකු වූවා විය නොහැකිද?

හැඩි දැඩි රාවණ පෘථිවි වාසී, හෝමෝ සැපියන් හෝ වෙනත් හෝමෝ ගෝත්‍රයේ දියුණු මානවයෙකු වන විට, මටසිළුටු රාමා හා සියුමැලි සීතා පිටසක්වලයින් වීමටද ඉඩ ඇත. පිටසක්වලින් පැමිණියවුන් දෙවියන් ලෙස ඇදහීම ලොව පුරාම සංකෘතීන් වල ලක්ශණයකි. අහසින් යන යානා වලින් පැමිණෙන, දිලිසෙන සන්නාහ ඇඳුම් කට්ටල වලින් සැරසුන, නිම්හිම් නොමැති සේ පෙනෙන තාක්ශණික බලමහිමයන් ගෙන් සපිරුණු මොවුන් පෘථිවි වැසි "නොදියුණු මානවයින්" කෙරෙහි අණුකම්පාවෙන් ඔවුන් දියුණු ජීවීන් කිරීමේ හා සිලාචාර කිරීමේ "උදාරතර පරමාර්ථයෙන්" කටයුතුකලා වන්නටද පුලුවන.

රාම වැනි පිටසක්වලයින්ගේ මේ උද්ධච්ඡ ක්‍රියාකලාපය පෘථිවි වාසී දියුණු මානවයින් වූ රාවණ හා ඔහුගේ සමකාලීනයින් නොඉවසන්නට ඇතැයිද සිතිය හැකිය.

උදාහරණයක් ලෙස 1930ගණන් වල උපතලැබූ නට්සිවාදයට අනුව ලොව උසස්ම ජාතිය වන්නේ ආර්ය ජර්මන් ජාතියයි. ඔවුන් නෝර්ඩික් දෙවිවරුන් ගෙන් පැවත එන සුදු, උස උත්තුංග දේහධාරී, නිල් ඇස් හා රන්වන් හිසකෙස් ඇති සුපිරි මිනිසුන් බව නට්සීන් විශ්වාස කලහ. මෙම විශ්වාසවලට පදනම වූයේ නෝර්ඩික් දේවකතා වල එන ඇස්ගාර්ඩියන් නම් දේව ගෝත්‍රයයි. අමෙරිකාවේ මාර්වල් කොමික්ස් චිත්‍රපට සමාගම "තෝර්" චිත්‍රපට මාලාවෙන් ජනප්‍රිය කොට ඇට්තේ නට්සීන් සිය ආත්මය කරගත් නෝර්ඩික් පුරාවෘතයයි. තෝර් චිත්‍රපටයට අනුව ඇස්ගාඩියන් වරු මිනිස් ලෝකය හා තවත් දියුණු මානවයින් වසන ලෝක 6ක් ආරක්ශා කිරීමේ වගකීම ඇති ලෝක පාලක දේවියන් ලෙස පෙනී සිටින මානවරූපී  පිටසක්වල ජීවීන් පිරිසකි.

තෝර් විසින්ම පලමුවන චිත්‍රපටයේදී සිය ප්‍රසාදියා (admirer) වන ජේන් ෆොස්ටර් විද්‍යාඥවරියට පවසන අන්දමට ඇස්ගාර්ඩ් යනුවෙන් හඳුන්වන ඔවුන්ගේ ලෝකය තාක්ශණය ඉතා දියුණු මට්ටකමක් පවතින අතර එය කොතරම් දියුණුද යත් ඔවුන්ගේ තාක්ශණික හැකියාවන් ඉන්ද්‍රජාල මායාවන් ගෙන වෙන් කොට හඳුනා ගත හැකිය.

"Your Ancestors Called it Magic, but you call it Science. I Come From a Land Where They Are One and the Same"


තෝර් සිය ලෝකය වන ඇස්ගාර්ඩ් පිලිබඳව ජේන් ෆොස්ටර්ට විස්තර කරමින් සිටී....
තෝර් සිය ආදිකතෘ දෙවියා කරගත් නට්සීන් මුලු ලෝකයම සිලාචාර කිරීමේ හා සිස්ඨාචාරගත කිරීමේ ව්‍යාපෘතියක් ආරම්භකල අතර දෙවන ලෝකය යුද්ධය ලෙස පසුකලක හඳුන්වන්නට පටන්ගත්තේ මේ නට්සි ව්‍යාපෘතියයි. නෝර්ඩික් දෙවියන්ගෙන් පැවත එන නිල් දෑස් ඇති, රන්වන් හිසකෙස් ඇති  සුදු නට්සීන්ගේ ව්‍යාපෘතියට විරුද්ධව මහපොලොවේ උපන් මිනිසුන් අවි අතට ගෙන දිවිහිමියෙන් සටන්කලාක් මෙන් එදා රාවණ හා ඔහුගේ සමකාලීනයන් එක් පෙරමුණකට පැමිණ  පිටසක්වල රාමා, සීතා, ලක්ශ්මණ හා හනුමාගේ සිලාචාර හා සිස්ඨාචාරගත කිරීමේ ආක්‍රමණික ව්‍යාපෘතියට විරුද්ධවද සටන් වදින්නට ඇත.

තමන් නොදියුණු අසුරයන් යයි පිලිකෙව් කරමින්, දුර්වල මිනිසුන්ට තමුන් දෙවියන් යයි පෙන්වා ගනිමින් රාමා ඇතුළු දේව නඩය ගෙනයන වැඩපිලිවෙල වහල් ව්‍යාපෘතියක් ලෙස සැළකූම මහ පොලොවේ උපන් දියුණු මානව ගෝත්‍රයක් වූ වන රාවණ හා සමකාලීනයන් පිටසක්වලයින්ට නොදෙවෙනි ආකාරයටම සිය තාක්ශණය දියුණු කරගන්නට ඇත. සියා යානා වලින් අහසින් යමින් දෙවියන් ලෙස පෙනී සිටිමින් මිනිසුන් නොමග යවමින් සිටි රාමලාට පාඩමක් ඉගැන්වීමට මෙන්ම නොමග ගිය මිනිසුන් යලි හරවා ගැනීමටද රාවණ සිය තාක්ශණික ශිල්ප ඥාණය යොදාගන්න්ට ඇත.

"බලපල්ලා උන්ට පුළුවන් හැම දේම අපිටත් පුලුවන්.....උන් දෙවියන් නොව අප වැනිම ප්‍රාණීන් පිරිසකි...දැන්වත් රාමා ඉදිරියේ දණින් නොවැටී මිනිසුන් ලෙස සිට ගනියව්!!!" කියන්නාක් මෙන් පිටසක්වල රාමගේ පියාසර විමාන පරදවන්නට සිය දඬු මොණර යානා අහසේ කරණම් ගස්වමින් රාවණා ඇතුලු මානව සේනා, මානවයන්ගේ තාක්ශණ මහිමය විදහා දක්වන්නට ඇත. හෝමෝ සැපියන් වුවද, හෝමෝ නියැන්ඩර්තලෙන්සිස් වුවද, ඊට පෙර විසූ හෝමෝ හිඩෙල්බර්ජෙන්සිස් වුවද, යටත්ව සිටීම කිසිවිටකත් හෝමෝ ගණයේ මානවයින්ගේ ලක්ශණයක් නොවීය.

විශාලවූත්, දියුණුවූත් මොළය, ද්වීපාදික ගමන, සුනම්‍ය ලෙස මෙහෙයවිය හැකි ඇඟිලි පහකින් යුතු දෑත යන ලක්ශණ නිසා ඉතා ඉක්මණින් අණුවර්තනය වීමේ හැකියාව, සතුරාගෙන් වුවද ඉගෙන ගැනීමේ හැකියාව, උගත්දේ වැඩි දියුණු කරගැනීමේ හැකියාව, නිර්මාණශීලීත්වය යනාදී හැකියාවන් තිබෙන්නේ සැපියන් මානවයාට පමණක් යයි කිව හැක්කේ කාටද? හෝමෝ ගණයේම නියැන්ඩර්තාලෙන්සිස් හට හෝ හිඩෙල්බර්ජෙන්සිස් හට මේ හැකියාව නොතිබුණේ යයි කාට කිව හැකිද?

:: සබැඳි ලිපි ::

රාවණා රජුගේ දඬුමොණර එන්ජිම යලිත් ප්‍රතිර්මාණය කරමු....
dදඬුමොණර/විමාන තාක්ෂණය නූතන යුධ ගුවන්යානා තාක්ෂණයට අනුව කියවමු..
dශ්‍රී ලාංකිකයෙකු අතින් නිමැවෙන රසදිය සුළි එන්ජිමක් හා ස්පන්ධන ප්‍රස්ඵෝටන එන්ජින් සහිත ප්‍රහාරක යානයක්??
dස්වභාවික කොරල් වැටියක්ද? රාමායනයේ කියවෙන හනුමාන් තැනූ පාලමද?

වසර දහස් ගණනක් පිටසක්වල රාමාට යටත්ව සිටිමින්, ඔවුන්ගෙන් උගත හැකි හැමදේම උගෙන රාමලාගේ තාක්ශණයට සමාන තාක්ශණයක් බිහිකර ගැනීමට වසර ලක්ශ ගණනකට පෙර ජීවත්වූ රාවණා ප්‍රමුඛ මානවයින්ට හැකියාව ලැබෙන්නට ඇතැයි කිව නොහැකිද? මෙහි කූටප්‍රාප්තිය රමා රාවණ යුධය විය නොහැකිද?

පිටසක්වල රාම හා මානව රාවණ එක් ශක්‍යතාවයක් (possibility) පමණි. රාමා මෙන්ම රාවණාද සමාන්තරව දියුණුවූ, එකිනෙකා නොරිස්සන මානව ගණදෙකක් වීමටද ඉඩ තිබේ. තාක්ශණික දියුණුවේ හිණි පෙත්තටම ගොස්, න්‍යශ්ඨික අවි නිපදවාගෙන එම අවි වලින් යුධවැදී ඉරණම විසඳා ගන්නට ගොස් නැවතත් ගල් යුගයට වැටුනු අවාසනාවන්ත ඛේදවාචකයක කාව්‍යමය සටහන රාමායනය වීමටද ඉඩ ඇත.

කතෘ සටහන : මෙය කියවන විට, වාල්මිකීගේ ප්‍රබන්ධයක්, හින්දු යුග කාල, රාවන ඇදහිල්ල හා නූතන විද්‍යාව පටලවාගෙන ඇතැයි ඔබට සිතිය හැකිය. එසේ සිතීමේ වැරැද්දක් නැත. එහෙත් මාවිසින් සිදුකොට ඇත්තේ සිදුවිය හැක්කක්, කල්පිතයක් ලෙස ගොඩ නැගීම පමණකි. එබැවින් මේ ලිපිය කල්පිතයක් ලෙස පමණක් ගෙන සළකන්න.


READER COMMENTS

ඔබ තුමාගෙන් මෙවැනි සුරංගනා කතාවක්නම් මම කොහොමවත් බලාපොරොත්තු වුනේ නෑ. on ඉපැරණි අධිතාක්ශණි යුගයක් බිහිකල සුපිරි මිනිසුන්වූ රාවණ ගෝත්‍රය


හිතවත් ධර්ම ශ්‍රී මහතාණෙනි; මාගේ ලිපිය සුරංගනා කතාවක් ලෙස සැළකීමට ඔබට ඇති අයිතිය පිලිගනිමි, එමෙන්ම ගරු කරමි. එහෙත් පිලිතුරක් සැපයිමට අවසර ඇතැයි සිතමි....

පලමුවෙන්ම මාගේ ලිපියේ කුමන කොටස සුරංගණා කතාවක් සේ පෙනෙන්නේ දැයි දැන ගැනීමට කැමැත්තෙමි. එහි ආදී මානවයන් පිලිබඳව කොට ඇති විස්තර ශාස්ත්‍රීය ලිපි හොඳින් පරිශීලනය කොට ලියා ඇත. රාම හා රාවණා පිලිබඳ විස්තරද එලෙසමය.

මා විසින් සිදුකොට ඇත්තේ මෙම විද්‍යාත්මක හා සංස්කෘතික කරුණු එකිනෙක ගැටගැසිය හැකි කල්පිතයක් ඉදිරිපත් කිරීම පමණකි. කල්පිතයක් යනු ඉංග්‍රීසියෙන් කොන්සෙප්ට් එකක් හෙවත් යමක් පහදාදීමේ හෝ විස්තර කිරීමෙහිලා භාවිතා කල හැකි උපකළ්පණ අඩංගු ප්‍රකාශයකටය.

මාවිසින් සිදුකොට ඇත්තේද එවැනි උපකල්පණ සහිත කොන්සෙප්ට් එකක් ගෙන හැර දැක්වීම පමණකි. තවත් ඕනෑම කෙනෙකුට එවැනි කල්පිත ඉදිරිපත් කිරීමේ නිදහස ඇත. 

ලංකාවේ රාවණා පුරාවෘතය ඈඳාගෙන බොහෝ බහුබූත ව්‍යාපෘති සිදුවෙයි. මුලුලොවටම තාක්ශණය බෙදුවේ රාවණා ප්‍රමුඛ සිංහ මිනිසුන් හෙවත් ආදී සිංහලයින් බව එක් බහුබූතයකි. ඉපැරණි සුමේරුයානු පුරාවෘත වල අහසින් පැමිණි සිංහ මිනිසුන් තමන්ට දියුණු තාක්ශණයක් දායාද කල බව සටහන් කොට ඇත. රාවණාගේ දඬුමොණරය හා සිංහල ජාතියේ සංකේතය වන සිංහයා ඈඳාගෙන ඉදිපත්කරන මෙම කල්පිත මාවිසින් ඉදිරිපත් කොට ඇති කල්පිතයට වඩා බොහෝ දුර්වල බව මගේ හැඟීමයි.

ලොවම සිවිලයිස් කිරීමේ අතීතකාමී ආශාව අප ජාතිය තුල ඇති මහා දුර්වල කමකි. ගැහැණුන්ට, දරුවන්ට, ගුරුවරුන්ට, වැඩිහිටියන්ට, උගතුන්ට ගරු කරන්නට, සළකන්නට නොදත්, පාදඩයින් වීරත්වයේ ලා සළකන, පාදඩයින්ටම චන්දය දෙන, පාදඩයින්ගේ පා දුහුවිලි වන්නට උපන් හපන්කමක් ඇති නූතන සිංහල ජාතිය මේ පරාධීන බව නිසාදෝ අතීත වීරක්‍රියාවලට මහත් රුචියක් දක්වයි. හරියටම "අපි දැන් බල්ලා මාක් වුනාට ඒ කාලේ ලෝකේ හෙල්ලු පොරවල්..." යනුවෙන් කියන්නාක් මෙනි.

ධර්ම ශ්‍රී මහතාණෙනි, මාගේ මේ ලිපිය එවැනි අතීතකාමී මායාවක් නොවේ. මාගේ කල්පිතය අනුව රාවණා යනු, ඔබත් මමත් අයිතිවන හෝමෝ සැපියන් ගණයේ මානවයෙකුද නොවේ. ඒ අනුව ඔහු සිංහලයෙකුද, දෙමළෙකුද ඉන්දියානුවෙකුද නොවේ. මා සිතන පරිද්දෙන් රාවණා යනුවෙන් මහා බලසම්පන්න, මහා ප්‍රාඥයකින් මෙන්ම තාක්ශණයේ හිනිපෙත්තේ සිටි පුද්ගලයෙකු සිටියානම්, ඔහු හා ඔහුගේ වර්ගයා හෝමෝ සැපියන්වරුන් පහලවීමටත් පෙර ජීවත්වුනු වෙනත් මානව ගෝත්‍රයක සාමාජිකයෙකි.


Vidya Gaweshana - Terence K Arachchi


මම දවසක් ඔය බුදු වරුන්ගේ කතාව මඩවල උපාලි හාමුදුරුවන්ගෙන් ඇහුවා. ඔය කියන බුදුවරු 27 දෙනා කොහෙද ඉපදුනේ? දැනට අපි දන්නා විද්‍යාවත් එක්ක ඒක පිළිගන්න බැරි කතාවක් නේද කියල. මොකද බුද්ධිමත් ලෙස සැලකිය හැකි මිනිස්සු ජිවත් වූ කාලයත් බුද්ධ දේශනාවේ සඳහන් කල්ප ලක්ෂ ගානක් පෙරුම් පුරන කතාවත් එකිනෙකට පරස්පරයි නේද කියල.. ඒ හාමුදුරුවෝ කිව්වේ මෙන්න මෙහෙම දෙයක් ඔය හැම බුදු කෙනෙක් ම ඉඳල තියෙන්නේ මේ පෘථිවියේ තමයි. හැමදාම සිද්ද වෙන්නේ මේ විදියට මිනිස්සු පරිණාමය වෙලා දියුණු වෙලා විනාශ වෙලා යනවා. ආයේ නැවත මේ පෘථිවියේම ජිවය හට ගන්නවා මිනිස්සු දියුණු වෙනවා බුදු වරු පහල වෙනවා ආයේ විනාශ වෙලා යනවා කියන එක. ඒ කියන්නේ මේක එක සැරයක් සිද්ද වෙච්ච දෙයක් නෙවෙයි. ඔය කතාව බිග් බෑන් තියරි එකයි. පුරාණ වේදයේ එන ලෝකය ඇතිවීම කියන දේ එක්කත් ගලපන්න පුළුවන්. දැන් වෙනකොට විද්‍යාවෙන් හොයාගෙන තියෙනවා බිග් බෑන් එක සිද්ද වෙන්න කලින් ඒ සියලුම ශක්තිය පුංචි ගෝලාකාර වස්තුවක් විදියට තියෙන්න ඇති කියල. (COSMOS සිරිස් එකේ එක කොටසකදී ඔය කතාව කියනවා ). වේද ග්‍රන්ථ වල ඕක සඳහන් වෙන්නේ හිරන්‍ය ගර්භය කියල. හිරන්‍ය ගර්භය කියන්නේ පුංචි ගෝලාකාර on ඉපැරණි අධිතාක්ශණි යුගයක් බිහිකල සුපිරි මිනිසුන්වූ රාවණ ගෝත්‍රය






Wednesday, 13 August 2014

ඇමෙරිකන් F-35 සුපිරි යානයට අභියෝග කරන රුසියානු සුපිරි යානය T-50


රුසියාව විසින් පස්වන පරම්පරාවේ සුපිරි ප්‍රහාරක යානයක් නිපදවා තිබේ. රුසියානු හමුදාවට අනුබද්ධ Sukhoi Corporation විසින් 2010දී සිට පරික්ෂණ කටයුතු පියාසැරියන් සිය ගණනක් සිදුකර මෙම නව සුපිරි යානය නිපදවා තිබේ. මේ පිලිබඳව පසුගියදා මාධ්‍යයට ප්‍රකාශයක් නිකුත් කරමින් රුසියානු හමුදාව පවසන්නේ  2016දී තම SU-35 ප්‍රහාරක යානා බලඇණියට වෙනුවට T-50  නම් වූ මෙම නව ප්‍රහාරක යානා එකතු වන බවය.

පස්වන පරම්පරාවේ ප්‍රහාරක යානා යනු රේඩාර් වලට නොපෙනී යාම, දිගු දුර මෙහෙයුම්වල යෙදීමේ හැකියාව, සම්පූර්ණයෙන්ම පරිගණකගත පාලනය සහිතව නියමුවාට පාලනය කිරීම පහසු වීම, ත්‍රස්ට් වෙක්ටරිං (thrust vectoring) නම් සුවිශේෂී එන්ජින් තාක්ශණය, චන්ද්‍රිකා හා අවට පියාසර කරන මිතුරු යානා සමග ස්වයංක්‍රීයව තොරතුරු හුවමාරු ජාලයක් සකසා ගෙන ප්‍රහාර සම්බන්ධීකරණය සහ සැලසුම් කිරීම ආදී හැකියාවලින් සමන්විත ප්‍රහාරක යානා වේ. මේතාක් කල් එවැනි පස්වන පරම්පරාවට අයත් F-35 නම් වූ ප්‍රහාරක යානයක් හිමිව තිබුනේ ඇමරිකාවට පමණි.

යුධ විශේෂඥයින් උපුටා දක්වමින් ඇමරිකානු මාධ්‍ය සඳහන්කර තිබුනේ 2020 වන තුරු කිසිදු රටකට පස්වන පරම්පරාවේ ප්‍රහාරක යානා නිර්මාණය කිරීමට නොහැකි වන බවය. එහෙත් ඒ සියළු පුවත් පුස්සක් බවට පත් කරමින් රුසියාව නිපදවූ T-50 නම් වූ මෙම ප්‍රහාරක යානය, ඇමරිකාවේ එතෙක් මෙතෙක් නිර්මාණය වූ අති දැවැන්තම ආයුධ ව්‍යාපෘතිය වූ F-35 යානයටත් වඩා නවීන හැකියාවෙන් යුක්ත බව හෙලි වී තිබේ. එමෙන්ම චීනයද පස්වන පරම්පරාවේ ප්‍රහාරක යානයක් සාර්ථක ලෙස අත්හදා බලමින් සිටින බව නිවේදනය කර තිබේ.

Role                 Stealth multirole fighter
National origin Russia
Manufacturer         NAPO, KnAAPO
Designer                 Sukhoi
First flight         29 January 2010
Introduction         December 2016
Status                 Flight testing/pre-production
Primary users         Russian Air Force, Russian Navy
Number built         5 prototypes
Program cost         US$8–10 billion (est.)
Unit cost                 T-50: US$50+ million[8]
Variants                 Sukhoi/HAL FGFA

නමුත් උත්කර්ෂයට නැංවූ ඇමරිකානු F-35 යානය මේ විටින් විට අර්බූදයට ලක්වීම පිලිබඳව ඇමරිකානු ජනතාව සහ මාධ්‍ය දැඩි විවේචනයක් එල්ල කරන්නේ එය අති විශාල මුදලක් කා දැමූ අසාර්ථක ව්‍යාපෘතියක් බව කියමිනි. නිතර සිදුවන කාර්මික දෝෂ නිසා ඇමරිකානු හමුදාවට තම සියළු F-35 යානා පියාසැරි කිහිප විටක්ම නවතා දැමීමටද සිදු විය.

කෙසේ වෙතත් නව රුසියානු ප්‍රහාරක යානය පිලිබඳව නොනිළ වශයෙන් මීට පෙර තොරතුරු අනාවරනය කර තිබුනි. මේ පිලිබඳව ඇමරිකාව දැඩි අවධානයකින් පසු වන්නේ තමන්ට හිමිව තිබූ යුධ වාසිය අහිමිවීම, අනෙක් රටවලට තර්ජනය කිරීමේ තම හැකියාවට බලපෑමක් එල්ල කරන බැවිනි. එමෙන්ම රුසියාවද මෙම නව යානය පිලිබඳ තොරතුරු අනාවරණය කර ඇත්තේ ඇමරිකාවට අනතුරු ඇඟවීමක් ලෙස බවද වාර්තා වේ.


Related Posts Plugin for WordPress, Blogger...