Related Posts Plugin for WordPress, Blogger...

Sunday, 28 February 2016

ඇපල් අයි ෆෝන් කැමරාවට වඩා හොඳ කැමරා ඇති ඇන්ඩ්‍රොයිඩ් ස්මාර්ට්ෆෝන් දැන් වෙළඳපොලේ | Finally there are Android phones with better cameras than iPhone 6s, 6s Plus


2015 වසර ලබන විටත් (එනම් 2014 වසරේ එලි දැක්වුනු මාදිලි අතරින්) ලොව හොඳම කැමරා ෆෝනය වූයේ ඇපල් සමාගමේ අයිෆෝන් 6/6S කැමරාවයි. කොතෙක් පාරම් බෑවද ඇන්ඩ්‍රොයිඩ් ෆෝන් නිර්මාපකයින්ට ඇපල් අයිෆෝනයේ කැමරාව තරම් සුපැහැදිලි ඡායාරූප ගත හැකි කැමරාවක් සිය ෆෝනවලට ඇතුලත් කරන්නට බැරිවී තිබුණා. එහෙත්, 2015 වසරේදී මෙය වෙනස් කරන්නට ඇන්ඩ්‍රොයිඩ් නිර්මාපකයින්ට හැකිවී තිබෙනවා.

DxOMark ලෙස හැඳින්වෙන සමාගමක් සෑම වසරකම ලොව ස්මාර්ට්ෆෝන් කැමරා පරීක්ශාකොට ඒවායේ ඡායාරූප ගැනීමේ හැකියාව හා සුපැහැදිලිබව පිලිබඳව වාර්තාවක් එලි දක්වනවා. ඩීඑක්සෝමාර්ක් කැමරාවිශ්ලේෂණ ක්‍රියාවලියේදී කැමරාවක ගුණාංග ගණනාවක් පරීක්ශාවට බඳුන්කරනවා. කැමරාවේ සෙන්සරය හා ලෙන්සය පිලිබඳව කරන පරීක්ශාවන් පහත ආකාරයෙන් වනවා.

DxOMark Sensor Tests - සෙන්සරයට අදාල පරීක්ශාවන්

    ISO sensitivity (speed) - සෙන්සරය ආලෝකයට දක්වන සංවේදී තාවය. මෙය වැඩිවන විට කැමරාවකට (හෝ ස්මාර්ට්ෆෝන කැමරාවකට ) මද ආලෝකයේදී බොඳ නොවූ, දීප්තිමත් ඡායාරූප ගැනීමේ හැකියාව වැඩිවනවා)

    Noise  - ඡායාරූප ප්‍රොසෙස් කිරීමේදී එයට එකතුවිය හැකි අනවශ්‍ය/ඡායාරූපය අපහැදිලි කරන දෑ නොයිස් ලෙස ගැනෙනවා.

    Color sensitivity - සෙන්සරයේ වර්ණ සංවේදීතාවය. මෙය ඉහල මට්ටමක ඇතිවිට, ඡායාරූපය ස්වභාවික වර්ණ එලෙසම ප්‍රතිනිර්මාණය කිරීමට සමත්වනවා.

DxOMark Lens Tests - කැමරා ලෙන්සයට අදාල පරීක්ශාවන්


    Resolution - ලෙන්සයෙන් ලබාදෙන විබේධනය (මෙය සෙන්සරයේ වේබේධනය මනින මෙගාපික්සල් වලින් වෙනස් මානයක්)

    Distortion - ලෙන්සයෙන් ඇතිකරන විකෘතිතා

    Vignetting - ඡායාරූපයේ කෙලවරයන් (edges) අඳුරුවීම විග්නෙටින් ලෙස හඳුන්වනවා.

    Light transmission - ලෙන්සය මගින් සෙන්සරයට ආලෝකය සම්ප්‍රේෂණය කිරීමේ කාර්යක්ශමතාවය

    Chromatic aberrations - ලෙන්සය මගින් ආලෝකය වර්ණාවලියක් ලෙස බෙදා පෙන්වීමේ දෝෂය

2015 වසරේ අවසාන කාර්තුවේ ඩීඑක්සෝමාර්ක් සමාගම අයිෆෝන් 6/6S කැමරාව පිලිබඳව ඉදිරිපත්කල වාර්තාවෙන්, එය ලකුණු 100න් 82ක් එනම් 82% ලබාගත් බව වාර්තාකලා. මෙය ඉතාම හොඳ කැමරාවක් බව එයින් පැහැදිලියි. එහෙත් 2015 වසර තුල වෙළඳපොලට ඉදිරිපත්කල ඇන්ඩ්‍රොයිඩ් ෆෝන් මාදිලි 7ක්ම, ඇපල් අයිෆෝන් 6/6S ලබාගත් 82% ලකුණු සංඛයාව අභිබවා යන්නට, එනම් ඇපල් අයිෆෝන් 6/6S හොඳම ස්මාර්ට්ෆෝන් කැමරාව ලෙස තමන් තමන් සතුකරගෙන සිටි වාර්තාව බිඳ හෙලන්නට මෙම කැමරා සමත්වී තිබෙනවා.

අයිෆෝන් 6/6S කැමරාවලට වඩා හොඳ කැමරා ඇති ඇන්ඩ්‍රොයිඩ් ස්මාර්ට් ෆෝන් 7 මෙන්න.

  • Sony Xperia Z5
  • Samsung Galaxy S6 Edge
  • Google Nexus 6P
  • LG G4
  • Samsung Galaxy Note 4
  • Motorola X Style
  • Sony Xperia Z3+



ඉහට තීරු ප්‍රස්තාරයේ පෙන්වන්නේ මෙම කැමරා ලබාගත් ඩෙක්සෝමාර්ක් පරීක්ශණ ලකුණු ප්‍රමාණයන්. මේ අනුව සෝනි එක්ස්පීරියා Z5 ස්මාර්ට්ෆෝන් කැමරාව ලකුණු 87ක් එනම් ඇපල් අයිෆෝන් 6/6S කැමරාවට වඩා ලකුණු 5ක් වැඩිපුර ලබාගෙන හොඳම ස්මාර්ට්ෆෝන් කැමරාව බවට පත්වී තිබෙනවා.




Recent Posts Widget
----------------------------------------------------------------------------------------------------------

Monday, 22 February 2016

බුදුරුවගල මහායාන සෙල් රූප | Buduruwagala Mahayana Rock Carvings

Buduruwagala Rock Carvings : Photo Credit - Terence K Arachchi 20/02/2016
 ඌව පළා‍‍තේ මොණරාගල දිස්ත්‍රික්ක‍‍යේ වැල්ලවාය ප්‍රාදේශීය ‍ලේකම් ‍කොට්ඨාසයේ බුදුරුවගල ග්‍රාම නිලධාරි වස‍‍මේ බුදුරුවගල ග්‍රාමයේ පිහිටා ඇත. වැල්ලවාය නගර‍යේ සිට තිස්සමහාරාම මාර්ගයේ කි.මී. 4 ක් ගියවිට හමුවන බුදුරුවගල පාසල ඉදිරිපස ඇති අතුරු මාර්ග‍යේ කි.මී.3 ක් පමණ ගියවිට මෙම ස්ථානයට ළඟාවිය හැකි ය. මෑත කාලයක් වනතුරුම මෙම ප්‍රදේශයේ අලි ඇතුන්ගෙන් ගහණ හුදකලා ප්‍රදේශයක් වශයෙන් පැවැතුණි.




දැනට ලංකාවේ ඇති පිහිටි ගලක නෙළන ලද උසම ප්‍රතිමාව ලෙස සැලකෙන්නේ බුදුරුවගල ශෛලමය බුද්ධ ප්‍රතිමාවය. හිටි ඉරියව්වෙන නිරූපිත මෙහි උස මීටර 13 ක් (අඩි 46 ක් පමණ) පමණ වෙයි. ප්‍රතිමාව සමඟ දෙපස තවත් ප්‍රතිමා හයක් මෙම ගල් බිත්තියේ පෙළට නෙළා තිබෙයි. ගල් බිත්තිය අඩි 70 ක් පමණ දිගය. පිහිටි පර්වතයක අර්ධ උන්නතව ‍‍‍නෙළන ලද ක්‍රි.ව.8-10 ශත වර්ෂවලට අයත් (එනම් මීට වසර 1000කට පමණ පෙර නෙළන ලදයි ) යැයි සැල‍‍කෙන මූර්ති 7 ක් ‍‍මෙම ස්ථාන‍යේ දක්නට ලැ‍බේ. සප්ත මහායාන මූර්ති ‍‍ලෙස සැලකෙන මෙහි මධ්‍ය‍යේ ප්‍රධාන බුදුරුව සහ ‍‍‍දෙපස පරිවාර මුර්ති 3 බැගින් දක්නට ලැබේ. කලා නිර්මාණයන්ගේ ස්වභාවය අනුව මහායානිකයන් විසින් කළ නිමැවුමක් බව පුරාවිද්‍යාඥයන්ගේ අදහස වෙයි.

මැද රූපය - මතු බුදුවන මෛත්‍රී බුදුන්වහන්සේ | මෛත්‍රී බුදුන්ගේ වමත දෙසින් වජ්‍රපානී බෝධිසත්වයින් වහන්සේ | මෛත්‍රී බුදුරුවෙහි දකුණු අත පැත්තේ නෙලා ඇති රුව මංජු ශ්‍රී බෝධිසත්වයානන් වහන්සේයි.   : Photo Credit - Terence K Arachchi 20/02/2016
 බුද්ධ ප්‍රතිමාවක් ප්‍රධාන කොට තවත් බෝසත් ප්‍රතිමා නිසා ප්‍රචලිත වූ ස්ථාන ඓතිහාසික මෙන්ම කලාත්මක අතින් ද වැදගත් විශේෂිත පුරාවිද්‍යා බිමකි. ගල් බිතුවක් මත දැවැන්තව නෙළා ඇති බුදුරුව නිසා මෙතන නාමය බුදුරුවගල වශයෙන් ප්‍රසිද්ධියට පත් වූවා විය හැක. එහෙත් පුරාණ ස්ථාන නාමය, කවුරුන් විසින් කවර දා කරන ලද්දැක්දැයි යන බවත් අද වන තුරු නිශ්චිතව තහවුරු කර ගෙන නොමැත.

ගල් පව්වේ බිත්තිය මධ්‍යයේ දැවැන්ත ප්‍රතිමා නෙලා ඇත්තේ අර්ධ උන්නතව ය. බුදුරුව දෙපස පරිවාර ප්‍රතිමා තුන බැගින් දර්ශනය වෙයි. බුද්ධ ප්‍රතිමාවේ විශාලත්වය සහ දෙපස සෙසු ප්‍රතිමාවන්ගේ ස්වරූපය නිසා මෙය දීපංකර බුදුරදුන්ගේ පිළිබිඹුවක් බව අනුමාන කෙරේ. පිළිමයේ විශාලත්වය අනුව බුදුන් වහන්සේගේ ලෝකෝත්තර ස්වරූපය ඉස්මතු වන බව මහායානිකයන් කල්පනා කළ බව පෙනෙයි.

ප්‍රධාන බුද්ධ ප්‍රතිමාව - දීපංකර බුදුන්වහන්සේ : Photo Credit - Terence K Arachchi 20/02/2016

 මේ පිළිබඳව ‘ඓතිහාසික බුදුරුවගල’ නම් ග්‍රන්ථයේ ආචාර්ය මාලිංග අමරසිංහ මෙසේ සඳහන් කර තිබෙයි. ‘ක්‍රි.ව. 6 වන සියවසට අයත් මහායාන වාස්තු විද්‍යා ශාස්ත්‍ර ග්‍රන්ථයක් වන ‘මංජු ශශ්‍රී භාෂිත චිත්‍ර කර්ම ශාස්ත්‍ර’ නම් කෘතියේ මහායාන බෝධිසත්වවරු අට දෙනෙක් පිළිබඳව සඳහන් වෙති. මේ නිසා එකල සමාජයේ මේ බෝධිසත්වවරුන් පිළිබඳ දැන සිටින්නට ඇති අතර ඇතැම්විට ඔවුන්ගේ ප්‍රතිමා ද නෙළන්නට ඇතැයි සිතිය හැක. විශේෂයෙන් රුහුණේ මෙවැනි විශාල බෝධිසත්ව ප්‍රතිමා නිර්මාණය කර තිබීම තුළින් පැහැදිලි වන්නේ මේ කාලයේ මහායාන බුදු දහම රෝහණ දේශයේ වඩාත් ප්‍රචලිතව පැවැතුණු බව ය.’

ප්‍රධාන බුද්ධ ප්‍රතිමාවේ දකුණු පස ඇති ප්‍රතිමා ත්‍රිත්වයේ මැද නෙළා ඇත්තේ අවලෝකීතේශ්වර බෝධි සත්ව ප්‍රතිමාවකි. එහි උස මීටර් 7.16 කි. (අඩි 25 කට ආසන්නය) එම ප්‍රතිමාවේ වම් පසින් නෙළා ඇති ත්‍රිභංග ඉරියව්ව පිළිබිඹු කරන තාරා දේවී ප්‍රතිමාවේ උස මීටර් 5.98 ක් පමණ වෙයි. (අඩි 21 ක් පමණ) මහායානිකයන්ට අනුව තාරාදේවිය අවලෝකීතේශ්වර බෝධිසත්වයන්ගේ භාර්යාවය.

අවලෝකිතේශ්වර බෝධිසත්වයානන් වහන්සේ හා තාරා දේවිය : Photo Credit - Terence K Arachchi 20/02/2016

මෙම ප්‍රතිමාව හැර අනෙකුත් සෑම ප්‍රතිමාවක්ම සමභංග ඉරියව්වෙන් නෙළා ඇතත් මෙහි ඇති ස්ත්‍රී රූපය ත්‍රිභංග ස්වරූපයෙන් නෙළා ඇත්තේ ස්ත්‍රී ලාලිත්‍ය වඩා හොඳින් නිරූපණය කිරීමට අවශ්‍ය වූ නිසා යැයි සිතිය හැකි ය. අවලෝකිතේශ්වර බෝධි සත්ව රූපයයේ දකුණු අත පැත්තේ දකින්නට ලැබෙන ප්‍රතිමාව සුධන කුමාර ප්‍රතිමාවයි. මහායාන සම්ප්‍රදායට අනුව සුධන කුමාරා ද බෝධිසත්වවරයෙකි. එහි උස මීටර් 6.53 ක් පමණ වෙයි. (අඩි 23 ක් පමණ)

ප්‍රධාන බුද්ධ ප්‍රතිමාවේ වම් පසින් දිස්වෙන රූප ත්‍රිත්වයේ මැද නෙලා ඇති ප්‍රතිමාව මතු බුදු බව ලබන මෛත්‍රී බෝධිසත්ව ප්‍රතිමාවය. මෙහි උස මීටර් 7.3 කි. (අඩි 25 1/2 ක් පමණ) එම බෝධිසත්ව රූපයේ වම් අත පැත්තේ නෙලා ඇති ප්‍රතිමාව වජ්‍රපානී බෝසත් ප්‍රතිමාවය. මෙහි උස මීටර් 6.4 කි. (අඩි 22.4 ක් පමණ) වජ්‍රපානී බෝසතුන්ගෙන් ධර්මයේ හඬ සහ එහි ආරක්‍ෂාව සංකේතවත් කරනු ලබන බව කියැවෙයි.

මෛත්‍රී බෝසත් රුවෙහි දකුණු අත පැත්තේ නෙලා ඇති රුව මංජු ශ්‍රී බෝධිසත්ව ප්‍රතිමාවයි. මෙමඟින් මහායාන සම්ප්‍රදායට අනුව මහා ප්‍රඥාව සංකේතවත් කරවනු ලබයි. ඔහු මෛත්‍රී බෝධිසත්වයන්ගේ ධර්මාචාර්යවරයා මෙන්ම උපදේශකවරයා ද වන බව මහායානිකයන්ගේ මතය වේ.

මේ අනුව බුදුරුවගල ඇති ප්‍රතිමා හත වම් අත සිට දකුණට පිළිවෙලින් නම් කළහොත් මෙසේ හඳුනාගත හැකිය. සුධනකුමාර, යෝගී අවලෝකීතේශ්වර, තාරා, දීපංකර බුද්ධ, මංජු ශශ්‍රී, මෛත්‍රී හා වජ්‍රපානී වශයෙනි.
මෙම පිළිම නෙළු මහා ශෛලමය බිත්තිය ඉතා දැඩි බවක් ඇති නිසා සෑම පිළිමයක්ම නෙලීමට ශිල්පීන්ට දැඩි වෙහෙසක් ගැනීමට සිදු වී ඇති බවක් පෙනෙයි. ඒ නිසා එම පිළිම සියල්ල නෙලා ඇත්තේ අර්ධ උන්නත ආකාරයට ගලේ ස්වාභාවික හැරීම් ආදිය ප්‍රයෝජනයට ගනිමින් ය.

මෙහි දිස්වන ස්වරූපය අනුව ප්‍රධාන බුද්ධ ප්‍රතිමාව නෙලීමේ දී ද මෙම අපහසුතාවයට ශිල්පියා මුහුණ දී තිබෙන බව එහි ස්වරූපය අනුව සිතා ගත හැක. පිළිමයේ මුව හතරැස් ය. සිවුරේ සියුම් රැළි ආදිය ගලේ ස්වරූපය නිසා නිසි පරිදි මතු කර පෙන්වීමට නොහැකි වී තිබේ. එම අඩුපාඩුව මැකීමට පිළිම මතුපිටින් හුණු ආලේප කර පිළිමය නිසි ආකාරයට සකස් කර ඇති බවක් පෙනේ. අද එම බදාම ස්ථරයන් දකින්නට නැතත් එහි ශේෂ කොටස් තැන තැන දිස් වෙයි.

සුධන කුමාර සහ මෛත්‍රී බෝසත්වරුන්ගේ පිළිමයන්හි විස්තර තරමක් දුරට ඉතිරිව තිබේ. මෙහි වටකුරු මුහුණු ආදියේ විචිත්‍ර බවක් පෙන්නුම් කරයි.

ඒ අපහසුතා කෙසේ වුවද මහා රළු ගල් තලාවක මුහුණත එක දිගට මෙම ප්‍රතිමා පෙළ නෙලා ගලෙන් සියුම්ව මතු කර ගැනීමට නොහැකි අඩුපාඩු මකාගැනීමට හුණු බදාම ස්ථරයන්ගෙන් පුරවා ඒ ඒ පිළිම වලට අදාළ සුදු, රන්වන්, රතු ආදී පැහැයන්ගෙන් අලංකාර කරමින් එදා නිර්මාණ ශිල්පියා දැවැන්ත අභියෝගයක් ජයගෙන තිබේ. ඒ අනුව පිළිම නෙළු කාලයේ දී මෙම ගල් බිත්තිය ඉතා අලංකාරව විචිත්‍ර පැහැයන්ගෙන් දර්ශනය වී තිබෙන්නට ඇත.

 මෙම ලිපිය සම්පාදනය කිරීමේදී පහත මූලාශ්‍රවලින් උපුටාගන්නා ලදී.

http://www.lonelyplanet.com/sri-lanka/the-hill-country/wellawaya/sights/landmarks-monuments/buduruwagala
http://www.lakehouse.lk/budusarana/2012/07/26/tmp.asp?ID=temp02
http://www.archaeology.gov.lk/web/index.php?option=com_content&view=article&id=145:buduruwagala&catid=51:sites&Itemid=99&lang=si

----------------------------------------------------------------------------------------------------------
Recent Posts Widget
----------------------------------------------------------------------------------------------------------

Sunday, 14 February 2016

අපේ 'අසල්වාසියා' නිපැදවූ බිහිසුනු BRAHMOS 'සුපර්සොනික්‌' කෲස් මිසයිලය [ඉරිදා දිවයින]

Air launch version of BRAHMOS - ගුවන් යානයකින් විදිය හැකි BRAHMOS මිසයිලය
ශබ්දය තප්පරයකට මීටර් 343.2 ක වේගයෙන් ගමන් කරයි. එනම් පැයට කිලෝමීටර් 1235 ක වේගයෙනි. මේ අනුව විනාඩියකට ශබ්දය යන වේගය දළ වශයෙන් කිලෝ මීටර් 20 කි. තත්ත්වය මෙය නම් ශබ්දයේ වේගයෙන් ගමන් කරන වාහනයක්‌ හදා ගැනීමට ඔබට හැකියාව ඇතොත් ඒ වාහනයේ නැගී අධිවේගී මාර්ගය දිගේ විනාඩි 5 කින් ගාල්ලට යැමට ඔබට පුළුවන. ශබ්දය පරදවන වේගය සුපර්සොනික්‌ වේගය ලෙස හඳුන්වනු ලැබේ.

සුපර්සොනික්‌ වේගයෙන් ගමන් කළ හැකි ගුවන් යානයක්‌ සෑදීමට 1944 දී පර්යේෂණ පටන් ගත් ඇමරිකන් රජය 1948 දී පැයට කිලෝමීටර් 1600 ක වේගයෙන් යන ගුවන් යානයක්‌ නිපදවීය. 1969 දී  ප්‍රංශය හා එන්ගලන්තය එක්‌ව පැයට කිලෝමීටර් 2180 ක වේගයෙන් යන මඟී ගුවන් යානයක්‌ නිපදවා එයට කොන්කෝර්ඩ් යන නම තැබුවේය. එහි ගමන් කළ හැකි වූ මඟීන් ගණන 128 කි. 1976 දී මෙවැනි යානා 62 ක්‌ සාදන ලද අතර, ඒවා මඟීන් ගෙනයාම සඳහා යොදවන ලදී. එහෙත් මේ යානාවලින් පරිසරයට කරන විශාල හානියක්‌ විය. එනම් මේ යානය ගමන් කරන විට වාතය සමඟ හටගන්නා අධික ඝර්ෂණය නිසා විශාල ගිගිරුමක්‌ ඇති විය. එමෙන්ම ඕසෝන් නාශක නයිට්‍රස් ඔක්සයිඩ් වැනි දුම් විශාල ලෙස පිටකල නිසා පෘථිවිය වටා තිබෙන ඔසෝන් ස්‌ථරයේ හිල් හැදෙන්නට විය. ඒ බැවින් 2003 නොවැම්බර් 26 වැනිදා කොන්කෝඩ් යානා පැන්ෂන් ගන්වන ලදී.

ඉහත සඳහන් කතන්දරය අපට සිහිපත් වූයේ ඉන්දියාව විසින් ඉන්දියාවේ ම ස්‌වදේශික සමාගමකින් සුපර්සොනික්‌ වර්ගයේ මිසයිල 200 ක්‌ ඩොලර් බිලියන 13 ක මිලට ගැනීමට ඇනවුම් කර ඇති බව අන්තර්ජාලයේ පළවීමත් සමඟම ය. මේ මිසයිල නිපදවන්නේ ඉන්දු - රුසියන් පෞද්ගලික සමාගමක්‌ වන කේරළයේ BRAHMOS Pvt Ltd ආයතනය මගිනි. මේ සමාගමෙන් 50.5% ක්‌ ඉන්දියාවට අයත් අතර 49.5% ක්‌ රුසියාවට අයත් ය. 1998 දී මේ සමාගම පටන් ගැනීම සඳහා මූලික ගිවිසුම් අත්සන් කරන ලදී. ආරම්භක ආයෝජනය වශයෙන් රුසියාව ඩොලර් මිලියන 123.75 ක්‌ ද ඉන්දියාව ඩොලර් මිලියන 126.25 ක්‌ ද යොදවන ලද්දේය. ඔවුන් සිය ආරම්භක කම්හල පටන් ගත්තේ කේරළයේ තිරුවානන්දපුරම් නගරයේ ය. BRAHMOS නම එම කොම්පැනියට තබන ලද්දේ ඉන්දියාවේ  ගංගාවක්‌ වන Brahmaputhra සහ රුසියාවේ Moscow නගරය යන නම් දෙකේ මුල් කොටස්‌ එකතු කරය. 

මෙහිදී අපි ඉන්දියාවේ අදීන චින්තනයට හිස නමමු. අපි අහස්කූරක් හැදුවත් එයට තබන්නට උත්සාහ කරන්නේ සංකර නමකි. එහෙත් ස්‌වදේශික චින්තනයක්‌ ඇති ඉන්දියානුවා පසුගිය කාලයේදී තම රටේ සාදන ලද මිසයිල හතරකට ස්‌වදේශික සංස්‌කෘත නම් තැබීය. එයින් පළමුවන මිසයිලය අග්නිය. දෙවැන්න පෘථිවිය. තුන්වැන්න ආකාශ්ය. සිවුවැන්න නාග් ය. බ්‍රහ්මොස්‌ යනු කෙටි දුර මිසයිලයකි. එය ගමන් කරන උපරිම දුර කි. මී. 290 කි. විනාඩි 15 කට අඩු කාලයක්‌ තුළ එයට සිය ගමනාන්තයට ළඟා විය හැකිය. අසල්වාසි පාකිස්‌තානය, බංග්ලාදේශය සහ චීනය යන රටවල ඉලක්‌කයකට මේ මිසයිලය යෑවීමට නම් විනාඩි 4 - 5 කට වඩා ගත වන්නේ නැත. අඩි 28 ක්‌ උස අඩි 2 ක විෂ්කම්භයක්‌ ඇති මෙයට 200KG බර බෝම්බයක් සවි කළ හැකිය.

මිසයිලයකට සවි කරනු ලබන පිපුරුම් අවිය (war head) තීරණය කරනු ලබන්නේ සතුරාගේ ස්‌වභාවය අනුවය. සතුරා මැඬපැවැත්වීමට බැරි තරම් නපුරු නම්, විශාලත්වයෙන් ඉතා වැඩි නම් සහ තවදුරටත් වර්ධනය වන්නේ නම් මිසයිලයට සවි කරන්නේ පරමාණු පිපුරුම් අවියකි. පරමාණුක පිපිරුමක්‌ යනු ලෝකයේ භයානකම පිපිරුමය. බ්‍රහ්මොස්‌ සමාගම ඉන්දියන් ආණ්‌ඩුවට මේ මිසයිල විකුණන්නේ එකක්‌ ඩොලර් විසිහත් ලක්‍ෂ තිස්‌දාහ බැගිනි. එය ලංකාවේ මුදලින් රුපියල් කෝටි 40 කට සමානය. මේ මිසයිලයේ තවත් වැදගත් ලක්‍ෂණයක්‌ තිබේ. එයට පොළවට අඩි 46000 ක්‌ උඩින් ගමන් කර නිවැගදි ඉලක්‌කයට ළඟා වීමට පුළුවන. එසේම පොළවට සමාන්තරව අඩි 12 ක්‌ උඩින් ගමන් කිරීමට ද හැකිය.

කෲස් මිසයිල ගණයට අයත් බ්‍රහ්මොස් මිසයිලය අහල පහල තිබෙන උස්‌ ගස්‌වල, කලුගල්වල හෝ උස්‌ ගොඩනැඟිලිවල නොගැටෙයි. එය ගැටෙන්නේ අභිමත ඉලක්‌කය මත පමණි. මේ මිසයිලය ඉලක්‌කය බලා ගුවන් ගත කළ පසු එය ගමන් කරන මාර්ගය පාලන මැදිරියක සිට නැරඹීමට පුළුවන.

ඉන්දියාව විසින් සුපර්සොනික්‌ මිසයිල 200 ක්‌ ඇනවුම් කරනු ලැබ ඇත්තේ පිස්‌සුවට නොවේ. වටේට තිබෙන රටවලින් ඔවුනට තර්ජන ඇත. අසල්වාසී බංගලාදේශයේ සහ පාකිස්‌තානයේ සිටින ඉස්‌ලාමීය ත්‍රස්‌ත කණ්‌ඩායම් ඉන්දියාවට විරුද්ධව කුමන්ත්‍රණ කරති. එසේම කාශ්මීර බෙදුම්වාදී ත්‍රස්‌තවාදීන් හැම විටම ඉන්දියාවට ප්‍රහාර එල්ල කරති. මේ නිසා ඔවුන්ට මිසයිල අත්‍යවශ්‍යය. මෙතැනදී ලංකාව ගැන ඉන්දියාවට කිසිදු ප්‍රශ්නයක්‌ නැත. එයට හේතුව බ්‍රහ්මොස්‌ මිසයිල පුච්චන්නේ නැතිව එක ටැලිෆෝන් කෝල් එකෙන් ලංකාව කළමනාකරණය කර ගැනීමට ඉන්දියාවට හැකි වීමය.

අනුර සොලමන්ස්, දිවයින ඉරිදා 14/02/2016


වෙබ් ලින්කුව -  http://www.divaina.com/2016/02/14/feature20.html


****** කතෘ සටහන ********

මේ ලිපිය ලියන ලද දිවයින අනුර පුවත්පතේ අනුර සොලමන්ස් උගත් මහතා එසේ ටෙලිෆෝන් ඇමතුමකින් ලංකාව කළමණාකරණය කරගැනීමට ඉන්දියාවට හැකි බව කීවද ලංකාව නිසා ඉන්දියාවට රජීව් ගාන්ධිද, ඉන්දියානු යුධ භටයින් සියගණනක්ද අහිමිවිය. අදටත් ලංකාවට චීනය ලංවීම ගැන ඉන්දියව මහත් කැළබීමෙන් සිටී.  

එමෙන්ම ලංකාවද ඉන්දියාවට නොමනා ලෙස සැලකීමේ ආදීනවද අපි අත්වින්දෙමු. හිටපු ජනාධිපති ජේ.ආර් ජයවර්ධන සිය මෝඩ කම නිසා වරක් ඉන්දියානු අගමැතිනිය වූ ඉන්දිරා ගාන්ධි මැතිනියට "ශුද්ධවූ එළදෙන - holy cow" ලෙස හැඟෙන පරිදි අපහාසාත්මක කතාවක් කලේය. 

ඉන් කුපිත වූ ඉන්දියාව දෙමල ත්‍රස්තවාදී සංවිධාන - පිරපාහරන්ද ඇතුලුව - ඉන්දියාවේ අවි පුහුණුව ලබාදී මේ රට තිස් අවුරුදු යුද්ධයක් ලබාදුන්නේය. දේශානුරාගයෙන් කයිවාරු ගැසීමට ඔනෑ කෙනෙකුට පුලුවන් වුවද රටේ පාලකයින් කල්පණාවෙන් වැඩකල යුතුය. රටේ ප්‍රමාණය, ජනගහණය හා ආර්තික ශක්තිය ගැන අවබෝධයකින් නොගැලපෙන ලොකු අය සමග හැප්පෙන්නට නොයා යුතුය. 

එක්සත් ජාතීන්ගේ සංවිධානයට අනුව ලොකු කුඩා සෑම රටක්ම එක සමාන වුවත් එක චන්දයක් හිමිවුනත් ලොකු රටවල් කරන දේවල් පාලනය කරන්නට එජා සංවිධානයට බැරිය. රුසියාව ක්‍රිමියාව අල්ලාගෙන යුක්‍රේනයට පහරදෙනවිට එජා සංවිධානය ප්‍රකාශ නිකුත් කරමින් යෝජනා සම්මත කරගනිමින් ඉන්නවා විනා වෙන මුකුත් කරන්නේ නැත.

රජීව් ගාන්ධි මැරෙන තුරුම ඉන්දියාව දෙමල බෙදුම්වාදීන්ට සියලු රැකවරණ දුන්නේය. ඔවුන්ගේ ආරක්ශකයා ලෙස ක්‍රියාකලේය. ජෙනරාල් කොබ්බෑකඩුව ඇතුලු රණවිරුවන් යාපනය අල්ලන්නට යන ගමන ඉන්දියාව ලංකාවට තරවටුකොට නැවැත්තුවේය. ගුවනින් පරිප්පු දැම්මේය. පරිප්පු දාන යානාවලින් ඕනෑනම් කොළඹට බෝම්බ දමන්නටද පුලුවන් බව නොකියා කීවේය. බලෙන් ගිවිසුම් ගසා සාම සාධක හමුදාවක් ලෙස ආක්‍රමණ හමුදාවක් එව්වේය.

පරිප්පු දැමූවිට මුකුත් නොකල එජා සංවිධානය බෝම්බ දැමූවද මුකුත් නොකරන බව ඇත්තකි. එදා පරිප්පු දමන විට කට පියාගෙන සිටි එජා සංවිධානය අද යුධ අපරාධ සොයන්නට එයි. එදා ඉන්දියාවට බයේ නිකන් සිටි එජා සංවිධානය අද අමෙරිකාවට හා යුරෝපායට ඕනෑ නිසා යුධ අපරාද යෝජනා සම්මත කර ගනී. කතා සාප්පුවක්වූ එජා සංවිධානය පාලනය කරන්නේ ලොකු රටවල් මිස සොක්කන්ගේ රටවල් නොවේ.


ලෝකයේ හැටි එහෙමය. මේ බව බුදු බණෙහිද සඳහන්ය. නොගැලපෙන බලවතුන් හා යුද්ධයට යනන්ට එපා යයි බුදුන් වහන්සේ රජවරුන්ට අවවාදදී ඇත. ඒ මිනිස්සු මැරෙයි කියා නොව දිනන්නට බැරි නිසාය.

Recent Posts Widget
----------------------------------------------------------------------------------------------------------

Wednesday, 3 February 2016

එලීන් කොලින්ස්, අජටාකාශ ශටල් නියමුවෙකු ලෙස ශටල් යානයක් පියාසරකල පලමු කාන්තාව

වසර 21කට පෙර, අද වැනි දිනක... එලීන් කොලින්ස්, අජටාකාශ ශටල් නියමුවෙකු ලෙස ශටල් යානයක් පියාසරකල පලමු කාන්තාව ඉතිහාසගත වුනා. ඒ 1995 පෙබරවාරි මස තුන් වැනිදා ගුවන්ගත වූ STS-63 කේතයෙන් හැඳින්වුනු ඩිස්කවරි ශටල් මෙහෙයුමයි.


අණදෙන නිළධාරියා ලෙස කටයුතුකල පලපුරුදු ගගනගාමී ජේම්ස් වෙදර්බීගේ මග පෙන්වීම යටතේ ශටල් යානය පියාසරකරවන නියමුවාලෙස කටයුතුකල එලින් කොලින්ස් එක්සත් ජනපද ගුවන්හමුදාවේ කර්නල්වරියක වන අතර නාසා ආයතනයේ ගගනගාමියෙකු ලෙස බැඳීමට පෙර එක්සත් ජනපද ගුවන්හමුදාව් අත්හදාබැලීමේ ගුවන්යානා පරීක්ශාවට බඳුන්කරන පරීක්ශණ ගුවන් නියමුවෙකු (test pilot) ලෙස සේවය කලා.
USAF Test Pilot - Eileen Collins
1997දී නැවත වතාවක් STS-84 කේතයෙන් හැඳින්වුනු අජටාකාශ මෙහෙයුමේදී ඇට්ලෑන්ටිස් ශටල් යානයේ නියමුවා ලෙසද කටයුතුකල එලීන් කොලින්ස් 1999දී ගුවන්ගත වුනු STS-93 ලෙස හැඳින්වුනු මෙහෙයුමේදී කොළම්බියා ශටල් යානයේ අණදෙන නිළධාරිනිය ලෙස කටයුතු කලා.

Eileen Collins - Mission Commander, STS-93, Space Shuttle Columbia
කොළම්බියා ශටල් යානය අණතුරට ලක්වීමෙන් පසු නවතාදමා තිබූ ශටල් මෙහෙයුම් නැවත ඇරඹීමේ මෙහෙයුම ලෙස 2005 වසරේදී ගුවන්ගතවුනු STS-114 ඩිස්කවරි ශටල් මෙහෙයුමේදී එලීන් කොලින්ස් මිශන් කමාන්ඩර් තනතුර හෙබවූවා.


Recent Posts Widget
----------------------------------------------------------------------------------------------------------
Related Posts Plugin for WordPress, Blogger...