Related Posts Plugin for WordPress, Blogger...

Friday, 31 March 2017

හඳුන්වාදෙන Snapdragon 835


Qualcomm සමාගම නිර්මාණය කොට ඇති Snapdragon 835 නූතන ස්මාර්ට්ෆෝනයක් ක්‍රියාත්මක වීමට අවශ්‍ය ප්‍රධාන උපාංග සියල්ලම එකම චිප් එකක් මත අඩංගුකර system on a ship (SoC) ලෙස නිර්මාණය කොට තිබෙනවා.

ක්වල්කොම් ස්නැප් ඩ්‍රැගන් 835 ගැන වැඩිදුර තොරතුරු දැනගන්න මේ කෙටි වීඩියෝව බලන්න. (ධාවන කාලය මිනිත්තු 2.59)








__________________________________________________________________________



Creative Commons License
VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Wednesday, 29 March 2017

අද දොරට වඩින Samsung Galaxy S8





සැම්සුන්ග් සමාගමේ අලුත්ම ගැලැක්සි S8 ස්මාර්ට්ෆෝනය අද දින ඇමරිකාවේ නිව් යෝර්ක් හා බ්‍රිතාන්‍යයේ ලන්ඩන් නුවරවල්දී එලිදැක්වේ. මෑතකදී සැම්සුන්ග් සමාගමට Note 7 ස්මාර්ට්ෆෝනය පුපුරායාමේ තාක්ෂණික දෝශය නිසා අත්විඳින්නට සිදුවූ පසුබෑම් හමුවේ, මෙම එලිදැක්වීම ඉතා වැදගත් වන බව විචාරකයින්ගේ මතයයි.

ගැලැක්සි S8, ක්වල්කොම් සමාගම නිමැවූ අලුත්ම අලුත් ස්නැප්ඩ්‍රැගන් 835 ප්‍රොසෙසරයෙන් බලගැන්වෙන පලමු ස්මාර්ට්ෆෝනය වනු ඇති.



Networks: GSM / HSPA / LTE

Screen size: 5.8-inch
Resolution: 1440 x 2960 (QHD+)

Processor: Snapdragon 835

RAM: 4GB
Storage: 64GB

Rear camera: 12MP
Front camera: 8MP

Battery: 3,000mAh

Special Features:

  • Rear fingerprint scanner
  • Water and dust resistant
  • No physical home button
  • Iris scanner
  • Bixby AI assistant
  • Headphone jack

Samsung Galaxy S8 and S8 Plus




__________________________________________________________________________

Creative Commons License
VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Tuesday, 28 March 2017

පොත් විකුණා රොකට් හදන ඇමසෝනියාවේ ජෙෆ් බීසෝස්


"තවමත් සොයා නොගත් දේ බොහෝය. තව බොහෝ දෑ සිදුවීමටද තිබේ. අන්තර්ජාලයේ බලපෑම කෙතෙක් තීව්‍ර වන්නට ඉඩ ඇතිදැයි කිසිවෙකුටත් තවම හරි අවබෝධයක් නැති අතර තවමත් ගෙවෙන්නේ අන්තර්ජාල විප්ලවයේ පලමු දවසයි...."

ඉහත වැකිය ඇමසන්.කොම් නිර්මාතෲ ජෙෆ්‍රී බීසෝස්ගේ (රුවන් වැකියක්?) වන අතර එය ඵලකයක ලියා ඇමසන් මූලස්ථානයේ එනම් ඇමසෝනියාවේ ප්‍රධාන ගොඩනැගිල්ලේ අමුත්තන් පිලිගැනීමේ ආලින්දයේ තබා ඇතැයි පැවසේ.

Day 01 උන්මාදය

"තවමත් අප සිටින්නේ පලමු දිනයේය..... We are still on Day 1" යන්න ඇමසෝනියාවේ පවතින උන්මාදයක් යයි කිව හැකිය. මේ උන්මාදයේ නියමුවා බීසෝස් වේ. උන්මාදයේ තරම කොතරම්ද යත්  සියැටල් නුවර පිහිටි ඇමසෝනියා මූලස්ථානයේ ප්‍රධාන ගොඩනැගිලි දෙකම "ඩේ වන්" ලෙස තබා ඇත. එකක් "Day 1 South" ලෙස බෞතීස්ම කර ඇති අතර අනෙක් ගොඩනැගිල්ල "Day 1 North" ලෙස හඳුන්වයි.

ඇමසෝනියාවේ කැන්ටිම "ගරාජ්" ලෙස නම් කොට ඇත්තේ HP ආරම්භ කල විලියම් හිව්ලට් හා ඩේවිඩ් පැකාර්ඩ්, ඇපල් නිර්මාතෲ ස්ටීව් ජෝබ්ස් මෙන්ම ජෙෆ් බීසෝස්ද සිය ව්‍යාපාරය ආරම්භ කලේ ඔවුන් එවක පදිංචිව සිටි නිවසේ ගරාජයේ බව සැමට සිහිපත් කරවන්නටය.

පොත් වෙළඳාම උඩු යටිකුරු කල බීසෝස් ඉන්පසුව සිය අවධානය ඉලෙක්ට්‍රොණික භාණ්ඩ හා වෙනත් දෑ වෙතද යොමුකලේය. අදවන විට ඒ සියල්ල විකුණනවාට අමතරව ස්මාර්ට් දුරකථන හා ටැබ්ලට් ලෝකයද කළඹවමින් ඇමසන් ෆයර් හා ඇමසන් කින්ඩල් නමින් දුරකථන හා ටැබ්ලට් සන්නාම නිර්මාණය කොට ඇත.

ලෝක පොත් මුදලාලිලාට පාඩමක්

පොත් විකිණීමට අමතරව පොත් ප්‍රකාශයටද අතගැසූ බීසෝස්, පෙරකල පොත් ප්‍රකාශණ ලෝකයේ අරටු බැසගෙන සිටිමින්, අමාරුවෙන් පොත් ලියන ලේඛකයින්, විශේෂයෙන්ම අලුතින් පොත් ලියන නවමු ලේඛකයින්ගේ හොඳ පොත් පවා පල කිරීම ප්‍රතික්ශේප කරමින් ඔවුන් ඇද වට්ටන මුග්ධ පොත් මුදලාලිලාටද පාඩමක් උගන්වා තිබේ. 

අද ඕනෑම පොත් ලේඛකයෙකුට, ඇමසන් හා ලාභ බෙදාගැනීමේ පදනම මත සිය පොත් ඇමසන් ඊ-පොත් ලෙස පලකොට ඇමසන් අඩවියේ විකුණාගත හැක. එපමණක් නොව කැමතිනම් කතෲවරයෙකුට ඇමසන් CreateSpace.com ප්‍රකාශ සේවාව මගින් තම පොත මුද්‍රිත පොතක් ලෙසද කරදරයකින් තොරව පලකරවාගත හැකිය. පොතක් ලියා එය පලකරවාගන්නට පොත් මුදලාලිලාට පින් සෙන්ඩුවෙන්නට සිදුවූ කාලය අවසන් කලේ ඇමසෝනියාවේ ජෙෆ් බීසෝස්ය.

තෙරේසා රගාන්, වසර 19ක් තිස්සේ සාම්ප්‍රදායික පොත් ප්‍රකාශකයින් විසින් ප්‍රතික්ෂේප කල නවමු ලේඛිකාවකි. පොත් මුදලාලිලා දිගින් දිගටම ප්‍රතික්ෂේප කොට, අවසන ඇමසන් ඔස්සේ පලකල ඇයගේ එක් පොතක්  Best Seller අලෙවි වාර්තා තබන්නට සමත්වී ඇත.
එහෙත් තවමත් ගෙවෙන්නේ බීසෝස්ගේ පෙරලිකාර ඉන්ටර්නෙට් විප්ලවයේ පලමු දිනයයි..

සුපිරි පෙරලිකාරයා නැතහොත් සුපිරි ව්‍යාකූලකරන්නා

සුප්‍රකට ෆෝබ්ස් ව්‍යාපාරික සඟරාව ජෙෆ් බීසෝස් හඳුන්වා දෙන්නේ "The Ultimate Disrupter" හෙවත් සුපිරි පෙරලිකාරයා නැතහොත් සුපිරි ව්‍යාකූලකරන්නා ලෙසයි. අතගසන සෑම ව්‍යාපාරයක්ම උඩුයටිකුරු කිරීමට බීසෝස් සතු නිසඟ හැකියාව උහු මෙම අන්වර්ත නාමය ලැබීමට ඉතාම සුදුස්සා බව ඇමසන් කොටස් හිමියන් මෙන්ම වෝල් ස්ට්‍රීට් ආයෝජකයින්ද එකලෙස විශ්වාස කරයි. මෙම පෙරලිකාර ගමනේදී ඔහුගේ තීක්ෂණ බුද්ධිය, ව්‍යාපාර ඥාණය මෙන්ම උන්මාදයක් මෙන් නාභිගතවන "පාරිභෝගිකයාට වඩා වැදගත් කිසිවක් නැත" යන විශ්වාසය මහඟු සහයක් සපයයි. ඇමසෝනියාවේ අතුගාන්නාගේ සිට සියල්ලන්ම පාරිභෝගිකයා ඉහලින්ම තෘප්තිමත් කිරීමේ නිරන්තර මෙහෙයුමක, නොනවතින අරගලයක යෙදී සිටී.

විකුණුම් ඉලක්ක හා ලාභ ඉලක්ක නොවැදගත් ලෙස සළකන බීසෝස්, පාරිභෝගිකයා තෘප්තිමත් කලවිට  අන් සියල්ලම ඉබේම සම්පූර්ණ වන බවට විශ්වාස කරයි. ඕනෑම රටක සිටින ඕනෑම ගණුදෙනු කරුවෙකුට jeff@amazon.com ඊමේල් ලිපිනය හරහා ජෙෆ් බීසෝස්ට තම ගැටලුව හෝ යෝජනාව යොමුකල හැකි අතර ඒ ඊමේල් පණිවුඩ තමන්ම කියවන බවත්, අවශ්‍ය ඒවාට පෞද්ගලිකවම පිලිතුරු ලියන බවත්, අනෙක් ඊමේල් වලට අවශ්‍ය  පියවර/විසඳුම් ගැනීම සඳහා නියෝගයක්ද සමග අදාල නිළධාරියාවෙත යොමු කරන බවත් ජෙෆ් බීසෝස් පවසනවා.

එතකින්ද නොනවතින ජෙෆ් බීසෝස් සියලු ඇමසෝනියානුවන්ට නියෝග කොට ඇත්තේ තමන්ගෙන් පාරිභෝගික ගැටලු ගැන යොමුවන සියලුම ඊමේල් පණිවුඩවල ගැටලු වලට පැය කිහිපයක් ඇතුලත විසඳුම් ලබාදී, එම ගැටලුව ඇතිවීමට හේතුවත්, මින් ඉදිරියට එම ගැටලුව නැවතත් ඇති නොවීමට ගන්නා පියවරත් පිලිබඳ වාර්තාවක් තමන් වෙත කෙලින්ම එම දිනය තුලම ලබාදිය යුතු බවයි. 
අසාර්ථකවීමට ලොව හොඳම තැන අපේ ඇමසෝනියාවයි! - ජෙෆ් බීසෝස්

I believe we are the best place in the world to fail (we have plenty of practice!) because failure and invention are inseparable twins - Jeff Bezos (2016 Annual Letter to Shareholders)

අසාර්ථක දෑ කිරීමට ලොව හොඳම තැන අපේ සමාගමය යයි මම විශ්වාස කරනවා. ( අසාර්ථක දේවල් කොට අපට බොහෝ පලපුරුද්දක් තිබේ ) ඒ ඇයිද යත්, අසාර්ථකත්වය හා නව නිර්මාණ වෙන්කල නොහැකි නිඹුල්ලුන් වන නිසාය.  - ජෙෆ් බීසෝස් (2016 වාර්ශික වාර්තාවේ සමාගම් සභාපතිගේ ලිපිය )

එම ලිපියේ, තම සංකල්ප වැඩිදුරත් විස්තරකරන බීසෝස්;

අපට අවශ්‍ය වන්නේ විශාල සමාගමක් මෙන්ම නිරන්තරයෙන් නව නිර්මාණ, නව සේවා හා නව තාක්ෂණයන් බිහිකරන නව නිපැවුම් යන්ත්‍රයක් (invention machine) වීමටයි. අප ලබාදෙන ඉහලම පාරිභෝගික සේවාව හා පාරිභෝගික තෘප්තිය ලබාදීමට නම් දැවැන්ත ආදයමක් ඇති,  අතිවිශාල සමාගමක් විය යුතුමය. එහෙත් අපට අවශ්‍ය එවැනි විශාලත්වයත් සමගම කුඩා සමාගමක් තුල දැකිය හැකි වේගයෙන් තීන්දු ගැනීම, විශාල අවදානම් ගැනීමට මැලි නොවීම හා ඉකමණින් වෙනස් වීමේ හැකියාවද පවත්වාගෙන යාමයි.

මේ අපහසු අභියෝගය ජයගැනීමට අපට පුලුවනිද? 

මම සැමවිටම සුභවාදීව සිතන්නට කැමතියි. ඇමසෝනියාවේ අප බිහිකොට ඇති ආයතන සංස්කෘතිය මේ අභියෝගය ජයගැනීමට අපට සහය වනු ඇත. එහෙත් එය ඉතා අපහසු කාරියක් බවද අපි හොඳාකාරවම දන්නෙමු.

අප වැනි විශාල ආයතන නිරන්තරයෙන්ම විවිධාකාරී උගුල්වල පැටලෙයි. ඒවායින් ආරක්ෂාවීමට අප සැවොම ඉතා අවධානයෙන් සිටිය යුතු බව මගේ විශ්වාසයයි. මා දැක ඇති, විශාල සමාගම් වැටී නැසෙන එක් උගුලක් නම් විවිධාකාර ගැටලු විසඳීම සඳහා එකම ආකාරයේ විසඳුම් බිහිකිරීමේ රටාවක් ඇතිවීමයි (“one-size-fits-all” decision making). ඕනෑම ආයතනයක තීන්දු ගැනීමේ වේගය හා නවමු නිර්මාණ බිහිකිරීම අඩාල කිරීමට මේ ආකාරයේ තීන්දුගැනීමේ රටාවකට හැකියාව තිබේ.







වේගවත්ම ඩොලර් බිලියන 100ය

වසර 22ක් පැරණි ඇමසන්.කොම්, ලෝක ව්‍යාපාර ඉතිහාසයේ ඩොලර් බිලියන 100 ආදායම් ඉලක්කය වෙත් වේගයෙන්ම ලඟාවූ සමාගමයි. ඔවුන්ගේ ක්ලවුඩ් කම්පියුටින් සේවය වන Amazon Web Services අංශය පමණක් ඩොලර් බිලියන 10ක ආදායම් වාර්තාවක් තබා ලොව විශාලතම අන්තර්ජාල ක්ලවුඩ් සේවාව බවට පත්වී ඇත.

අප මෙය සිදුකලේ කොහොමද?

ඉතා වැදගත් මූලික ප්‍රතිපත්ති කිහිපයක් මත බිහිකල ආයතන සංස්කෘතිය මගින් හැඩගැසුනු හා එම ප්‍රතිපත්ති නිරන්තරයෙන් ක්‍රියාවට නැගීමට කැපවුනු සේවක මඩුල්ල

තරඟකරුවන් ගැන කිසි ලෙසකින් කරදර නොවී ගණුදෙනුකරුවන් තෘප්තිමත් කිරීමට ඇති උන්මාදනීය කැපවීම.

නිතරම නව නිර්මාණ, නව විසඳුම් සොයා යෑම හා ඒවායේ අසාර්ථක බව විඳදරාගෙන ඉදිරියට යාමට ආයතනය තුල ඇති ඉඩකඩ.

අසාර්ථකවීම කිසිවිටකත් අපගේ සේවක/සේවිකාවන්ගේ වෘත්තීය ප්‍රගමනයට බාධාවක් නොවන අතර බොහෝවිට එය උපකාරීවේ.

අතිසාමාන්‍ය (supernormal) සාර්ථකත්වයක් ලැබීමටනම් සෑමවිටම සාම්ප්‍රදායික චින්තයට (conventional wisdom) විරුද්ධව යා යුතුය. එහෙත් එවිට අසාර්ථකවීමේ සම්භාවීතාවය 90% වැඩිය. බොහෝ සමාගම් වලට මෙවැනි අසාර්ථකත්ව සම්භාවිතාවයක් දරාගත නොහැකිය. එහෙත් ඇමසෝනියාවේ එය ගැටලුවක් නොවේ. ඒ ඇයිද යත්, ලැබෙන 10% සාර්ථකත්වයේ වටිනාකම ඩොලර් බිලියන ගණනින් වන නිසාය. අප වේගවත්ම ඩොලර් බිලියන 100 කරා ලඟාවූයේ සාම්ප්‍රදායික චින්තයට විරුද්ධව ලංසු තැබූ නිසාය.

Blue Origin ඇමසෝනියාවේ රොකට් කොම්පැණිය

1982 වසරේදී 18 හැවිරිදි පාසැල් සිසුවෙකු වූ ජෙෆ් බීසෝස් ඇමරිකාව පුරා සිසු-සිසුවියන් ලක්ෂ 12ක් පමණ අයදුම් කරන, ඉතා අපහසු තරඟ විභාග පෙලකින් ඉහලම ලකුණු ලබාගන්නන්ට පමණක් හිමිවන National Merit Scholarship ශිෂ්‍යත්වයක් දිනා ගත්තා. එමෙන්ම ඒවසරේදී බීසෝස් උගත් Miami Palmetto High School පාසැලේ දීප්තිමත්ම ශිෂ්‍යා (high school valedictorian) ලෙස තේරුණේත් ඔහුමයි.

මෙම විශිෂ්ඨ දක්ෂතා නිසාම මාධ්‍යවල අවධානයට බඳුන්වූ 18 හැවිරිදි ජෙෆ් බීසෝස්, 1982 වසරේදී මයාමි හෙරල්ඩ් පුවත්පතට සම්මුඛ සාක්ච්ඡාවක් ලබාදෙමින්, සිය අනාගත බලාපොරොත්තු මෙසේ විස්තර කලා.

"I want to build space hotels, amusement parks and colonies for 2 million or 3 million people who would be in orbit. 'The whole idea is to preserve the earth. The goal was to be able to evacuate humans. The planet would become a park."

ඇමරිකාවේ අනෙක් ප්‍රයිවෙට් රොකට් කාරයා වෙන ඊලෝන් මස්ක් වගේම ජෙෆ් බීසෝස් කුඩා කාළයේ ඉඳන්ම අභ්‍යවකාශයට ආසා කලා. වසර 2000 වනවිට බිලියනපතියෙකුවූ නිසා සිය අභ්‍යවකාශ ආශාවන් සපුරාගන්නට බීසෝස් බ්ලූ ඔරිජින් කියලා අභ්‍යවකාශ සමාගමක් ආරම්භ කලා.

ඉහතින් සංසන්දනය කොට ඇත්තේ ඊලෝන්ගේ ස්පේස් එක්ස් නිර්මාණය කරන ලොකුම රොකට්ටු දෙක හා බීසෝස්ගේ බ්ලූ ඔරිජින් නිර්මාණය කරන ලොකුම රොකට්ටු දෙකයි. ස්පේස් එක්ස් හා බ්ලූ ඔරිජින් සමාගම් දෙකම සිය රොකට්ටුවල බලසම්පන්න ප්‍රථම අදියට නැවත නැවත භාවිතා කල හැකි ලෙස නිර්මාණය කර තිබෙනවා.

New Glenn ලෙස නම්කොට ඇති මෙම විශාල රොකට්ටුව බ්ලූ ඔරිජින් සමාගම විසින් නිර්මාණය කොට නිෂ්පාදනය කරන BE-4 (Blue Engine 4) අධිබල රොකට් එන්ජින් 7කින් බල ගැන්වෙනවා. මීතේන් හා ද්‍රව ඔක්සිජන් දහනය කරන මෙම රොකට් එන්ජින් දැනටමත් නාසා ආයතනයේ රොකට් ගුවන්ගත කරන යුනයිටඩ් ලෝන්ච් ඇලියන්ස් නම් සමාගම් සමූහයේ අලුත්ම රොකට්ටුව වන වල්කන් රොකට්ටුවට සවිකිරීමට ගිවිසුම් අත්සන් කොට තිබෙනවා. මීට පෙර යුනයිටඩ් ලෝන්ච් ඇලියන්ස් භාවිතා කල ඇට්ලස් රොකට්ටුවට භාවිතා කලේ රුසියාවේ නිෂ්පාදිත RD-8 නම් එන්ජිමක්. ඇමසන් BE-4 එන්ජිම සාර්ථක වීමත් සමග ඇමරිකන් රොකට් සඳහා රුසියාවෙන් එන්ජින් මිළදී ගැනීම නතරවනු ඇති.

2020 වනවිට දැවැන්ත නිව් ග්ලෙන් රොකට්ටුවේ පරීක්ෂණ කටයුතු අවසන් වනු ඇති අතර සමහරවිට බීසෝස් ගේ පාසැල් වියේ සිහිනය වූ අභ්‍යවකාශයේ ස්ථිර ජනාවාස ඇතිකිරීමේ සිහිනය සැබෑ කරගැනීමේ අඩිතාලම මේ විශාල රොකට්ටුවත් සමග උදාවනු ඇත.

Bezos the "Rocket Man" at Blue Origin Launch Pad



Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Sunday, 26 March 2017

Zero to One : සිලිකන් නිම්නයේ සුපිරි ආයෝජකයා Peter Thiel ගේ අත්පොත


වෘත්තියෙන් කළමණාකරන කථිකාචාර්යවරයෙකු  මා පීටර් ටීල් (Peter Thiel - Pronounced Teel) පිලිබඳව බොහෝ වර අසා තිබුණේය. ඊලෝන් මස්ක් සමග පේ-පෑල් විද්‍යුත් ගෙවුම් සමාගමේ සමාඅරම්භකයෙකු ලෙස සැලකෙන පීටර් ටීල් ෆේස්බුක් සමාගමේ පලමු ආයෝජකයා වූ අතර ඩොලර් 500,000ක කුඩා ආයෝජනයෙක් පමණක් ඔහු ලැබූ ලාභය ඩොලර් මිලියන ගණනකි. 


සිලිකන් නිම්නයේ ජනප්‍රවාදගත (legendary) ආයෝජකයෙකු වන පීටර් ටීල් මේවන විට බිලියනපතියෙකු වන අතර ඔහු නියෝජනය කරන ආයෝජක සමාගම් (venture capital firms) ගූගල්, ස්පේස් එක්ස්, ටෙස්ලා, ලින්ක්ඩින් හා තවත් සිලිකන් නිම්නයේ අධිතාක්ෂණික සමාගම් සිය ගණනක ආයෝජනය කොට ඇත.

අද වනවිට ඔහුගේ දල වත්කම ඩොලර් බිලියන 2කට අධික වන අතර ඔහු ලෝකයේ විශාලම ධනවතුන් 400දෙනාගේ ලැයිස්තුවේ 248වන ස්ථානයේ සිටී. බොහෝවර අසා දැන සිටියත්, පීටර් ටීල් පිලිබඳව ලිපියක් ලිවීමට සිත්වුනේ කරුණු දෙකක් නිසාය. 

එකක් නම් මා උගන්වන "Entrepreneurship - ව්‍යවසායකත්වය" පාඨමාලාවේ එක් දේශණයක් සකස් කිරීමට ෆේස්බුක් නිර්මාතෲ මාර්ක් සකර්බර්ග් සහභාගීවූ සම්මුඛ සාකච්ඡාවක් යූ-ටියුබ් ඔස්සේ නැරඹීමේදී හෙලිවුනු කරුණුය. මාර්ක් පවසන අන්දමට ෆේස්බුක් ආරම්භ කල සමයේ ඔහු 19හැවිරිදි තරුණයෙකු වූ අතර ව්‍යාපාර කළමණාකරණය හෝ උපායමාර්ග සැකසීම පිලිබඳව කිසිදු දැනීමක් ඔහුතුල නොතිබුණි. ෆේස්බුක් සමාගමට පලමුවැනි ආයෝජනය ගෙනආ පීටර් ටීල් ව්‍යාපාරයක් කළමණාකරණය කිරීම පිලිබඳව බොහෝදෑ කියාදුන් බව කෘතඥ පූර්වකව සිහිපත් කල මාර්ක් සකර්බර්ග් ෆේස්බුක් සමාගමේ සුපිරි ජයග්‍රහණවලට පීටර් ටීල් සුවිශාල දායකත්වයක් දැරූ  බව පවසූවා. ඒ අනුව ප්‍රකෝටිපති තරුණ ව්‍යාපාරිකයෙකු වන මාර්ක් සකර්බර්ගේ ව්‍යාපාර කළමණාකරණ ගුරුවරයා වන්නේ පීටර් ටීල්ය.

දෙවැන්න නම්, පීටර් ටීල් විසින් රචිත Zero to One නැමති නවමු ව්‍යාපාර අරම්භ කිරීම පිලිබඳව ඔහුගේ අත්දැකීම් අලලා රචිත පොත කියවන්නට ලැබීමය. පිටු 160ක කුඩා පොතක් වන එය අතිශයෙන් වැදගත් තොරතුරු, නවමු ව්‍යාපාරවල දියුණුවට අදාලවන කල්පිත මෙන්ම සිලිකන් නිම්නයේ අධිතාක්ෂණ උප්සංස්කෘතිය පිලිබඳ රසවත් තොරතුරු වලින් පිරී තිබුණි.

මෙම ලිපිය පීටර් ටීල්ගේ "සීරෝ ටු වන්" පොතෙහි ඉතාමත් වැදගත් කරුණු කිහිපයක් අලලා ලියැවී ඇත.






Zero to One : Peter Thiel


ව්‍යාපාරික ලෝකය සුවිශේෂීය. එක්වරක් සිදුවුනු දෙයක් නැවත සිදු නොවේ. ඊලඟට බිහිවන බිල් ගේට්ස් මෙහෙයුම් පද්ධති (operating systems) නිර්මාපකයෙකු ලෙස බිලියනපතියෙකු නොවනු ඇත. එමෙන්ම අනාගත ලැරී පේජ් හා සර්ගෙයි බ්‍රින් (ගූගල් නිර්මාපකයින් දෙදෙනා) සෙවුම් යන්ත්‍රයක් නිර්මාණය කොට ප්‍රකෝටිපතියන් නොවනු ඇති. අනාගත මාර්ක් සකස්බර්ග් සමාජ ජාල නිර්මාණකරුවෙකු නොවනු ඇති. අලුත් ව්‍යාපාරයක් ගැන සිතන ඔබ, මොවුන් අනුකරණය කරන්නට යනවානම්, ඔබ ඔවුන්ගේ සාර්ථකත්වයෙන් කිසිවක් ඉගෙන ගෙන නැත. ඔවුන් නිර්මාණය කල සුවිශේෂ වි‍යාපාර අනුකරණය කරන කිසිවෙකුට ඔවුන්ගේ දියුණුවට ආසන්න වීමට හෝ නොහැකි වනු ඇත.

ඇත්තෙන්ම අනුකරණය, නව නිර්මාණකරණයට වඩා ලෙහෙසිය, එහෙත්  ශුභපල රහිතය. අනුකරණයේදී සිදුවන්නේ සාර්ථක එක් ව්‍යාපාරයක් අනුකරණය කරන, එහෙත් ආරම්භකයින්ට ආර්ථික වටිනාකම් (economic value to founders) ලබා නොදෙන ව්‍යායාමයකි. 1 ලෙස පැවතුන යමක් n දක්වා වැඩිකීරීමේන් වාසියක් ඇති නොවේ. නව නිර්මාණයකදී නොතිබුනු යමක් එනම් 0 අවස්ථාවේ ඇති යමක් 1 (එනම් යමක් ඇති තත්වයට ගෙන ඒමකි ). පේපෑල්, මයික්‍රෝසොෆ්ට්, ගූගල්, ෆේස්බුක්, ස්පේස් එක්ස්, ඇපල් වැනි සමාගම් සියල්ලම එසේ නොතිබූ යමක් නිර්මාණය කොට එනම් 0 සිට 1 දක්වා යමක් ඇති කල සමාගම්ය. ඒවායේ සාර්ථකත්වයට හේතුව මෙන්ම මෙම පොතට Zero to One ලෙස නම් තැබීමටත් හේතුව එයයි.

Zero to One පොතෙහි අරමුණු නවමු නිර්මාණ ඇතිකරන සමාගම් බිහිවන්නේ කෙසේදැයි ගවේෂණය කිරීමයි. පේ පෑල් සමාගම ආරම්භකිරීම, මාර්ක් සකර්බර්ග්ට ෆේස්බුක් සමාජ අඩවිය ඩොලර් බිලියන ගණනක සමාගමක් කිරිමට ලබාදුන් සහයෙන් ලැබූ අත්දැකීම් මෙන්ම ලොව පලමු පෞද්ගලික රොකට් සමාගම බිහිකල මා මිතුරු ඊලෝන් මස්ක් සමග වැඩකිරීමෙන් ලත් පන්නරය හා අත්දැකීම්ද මේ පොතෙහි අඩංගු කොට ඇත.

සාර්ථක සමාගම් යම් ආකාරයක් ඒකාධිකාරයක් ඇතිකරයි

ඒකාධිකාරයන් ඇතිවීම රජයන් මෙන්ම ආර්ථික විද්‍යාඥයින්ද පිලිකෙව් කරති. එයින් පාරිභෝගිකයාට අවැඩක් වෙන බවද, නවමු නිර්මාණ බිහිවීම අඩපණවන බවද ආර්ථික විද්‍යාඥයින් තර්ක කරයි. කෙසේ වුවද රජයන්, යම් ආකාරයකට නවමු නිර්මාපකයින්ට ඒකාධිකාරයක් ඇතිකරගැනීමට ඉඩදෙයි. රජයන් විසින් බුද්ධිමය දේපොල පනත් ඇතිකොට පේටන්ට් බලපත්‍ර, ලියාපදිංචි සන්නාම හා වෙනත් බුද්ධිමය දේපොල අයිතීන් සහතික කරන්නේ නවමු නිර්මාපකයින්ට සිය නිර්මාණ මගින් ඒකාධිකාරයක් ගොඩනගා ගැනීමට ඉඩදීම සඳහායි. මෙහිදී ආර්ථික විද්‍යාඥයින්ට වඩා රජයන් ප්‍රායෝගික හා සාධනීය ලෙස ක්‍රියාකරන බව පෙනේ.

මේ සාකච්ඡාවේදී අප නීතිවිරෝධී, පාරිභෝගිකයින් සූරාකන ඒකාධිකාරී හැසිරීම් ප්‍රතික්ෂේප කරන අතර සාධනීය ඒකාධිකාරියක් ලෙස අප සලකන්නේ අන් හැම තරඟකරුවෙකුටම වඩා ඉතාමත් හොඳ භාණ්ඩයක් හෝ සේවාවක් නිර්මාණය කොට, ආදේශක භාණ්ඩවලට වඩා අතිශයින්ම සුපිරි පාරිභෝගික තෘප්තියක් ඇතිකරන සමාගම් ඒමගින් ගොඩනගා ගන්නා පාරිභෝගික පක්ෂපාතිත්වයයි (customer loyalty).

මෙයට හොඳම උදාහරණය වන්නේ ක්‍රි.ව 2000 වසරෙන් පසු අන්තර්ජාල සෙවුම් යන්ත්‍රයි. කලක් අන්තර්ජාල සෙවුම් ලෝකයේ යෝධයාව සිටි යාහූ (Yahoo!) සමාගමෙහි සෙවුම් ප්‍රථිපල වලට වඩා, අතිශයින් නිවැරදි සෙවුම් ප්‍රථිපල අධිවේගයෙන් ලබාදෙන්නට සමත්වූ ගූගල්, යාහූ අභිභවා ඒකාධිකාරියක් ගොඩනගාගත් අතර නුදුරු අනාගතයේ අන්තර්ජාල සෙවුම් වලට ඇති ගූගල් ඒකාධිකාරිය බිඳදැමිය හැකි, ගූගල් වලටත් වඩා සුපිරි සෙවුම් යන්ත්‍රයක් නිර්මාණය වනු ඇතැයි සිතීම අපහසුය. ඒ අනුව ගූගල් සෙවුම් ඒකාධිකාරිය නීතිවිරෝධී ඒකාධිකාරියක් නොව, සුපිරි නිමාණයක් මගින් ලබාගත් ඒකාධිකාරියකි. ගූගල් උපයන ඩොලර් බිලියන ගණනක ආදායම මෙම සුපිරි නිර්මාණයෙන් බිහිකර ගන්නා ලද ඒකාධිකාරියේ ප්‍රතිපලයක්වේ.

ව්‍යාපාර ලෝකයේ ඒකාධිකාරියක් ඇතිවුන්, සෑම විටම එය සැඟවීමට උත්සහ කලයුතුය.

කොතරම් සාධාරණ ලෙස නිර්මාණය කරගත්තද "ඒකාධිකාරිය" අපුල වචනයකි. බටහිර රටවල පාර්ලිමේන්තු හා රජයේ නිළධාරීන් ඒකාධිකාරියක් ඇති සමාගම් පසුපස පන්නන්නේ ඒවා කෙසේ හෝ බිඳදැමීමටය. එවැනි ක්‍රියාවලින් මගින් තමන් ජනතාවාදී බව පෙන්වීමට දේශපාලකයින් මෙන්ම, රජයේ නිළධාරීන්ද කැමති බව පෙනේ. 

ඒකාධිකාරි චෝදනා නිසා මයික්‍රෝසොෆ්ට් සමාගමට දශක ගණනාවක් තිස්සේ ඇමරිකාවේ හා යුරෝපයේ උසාවිගානේ රස්තියාදු වන්නට සිදුවූ අතර සාර්ථක නිර්මාණවලින් පාරිභෝගික විශ්වාසය දිනාගැනීමේ වරදට ඩොලර් මිලියන ගණනින් දඩ ගෙවන්නටද සිදුවිය.

අද ලොකුම ඉලක්කයක් වන්නේ ගූගල්ය. ලෝක සෙවම් දත්ත වලින් 88% වැඩි ප්‍රමාණයක් ගෙන දෙන්නේ ගූගල් සෙවුම් සේවාවය. සෙවුම් ප්‍රථිපල හා සබැඳි දැන්වීම් හරහා ඔවුන් උපයන ආදායම ඩොලර් බිලියන ගණනකි. එහෙත් ගූගල් සමාගම සෑම විටම පවසන්නේ ඔවුන් සෙවුම් සමාගමක් නොව දැන්වීම් සේවා සමාගමක් මෙන්ම අන්තර්ජාලය හා බැඳි සේවාවන් ගණනාවක් සපයන අධිතාක්ෂණික සමාගමක් ලෙසයි.

සෙවුම් ලෝකයේ 88% වෙළඳපොල පංගුවක් හිමිවුවත්, දැන්වීම් ලෝකයේ ගූගල් අතිවිශාල තරඟකරුවන් රැසක් සමග සටන් වදින, ලෝකයේ මුලු වෙළඳ දැන්වීම් ආදායමෙන් කුඩා ප්‍රතිශතයකට හිමිකම් කියන තවත් එක් තරඟ කරුවෙකි. එමගින් ගූගල් සිය සෙවුම් ඒකාධිකාරිය වසාගන්නට තැත්කරන්නේ මයික්‍රෝසොෆ්ට් වැනි සමාගම් වලට මුහුණ දෙන්නට සිදුවූ අමිහිරි අත්දැකීම් නිසාවෙනි.ෆේස්බුක්ද මෙවැනි උපක්‍රම භාවිතා කරයි. ලොව අංක ඒකේ සමාජ ජාලය වන ෆේස්බුක්, ව්‍යාපාරික ලෝකයේ පෙනීසිටින්නේ ගූගල් මෙන්ම දැන්වීම් සේවා සපයන සමාගමක් ලෙසිනි. ඔවුන්ගේ ප්‍රධාන ආදායම් මාර්ගයද ගූගල් මෙන්ම වෙළඳ දැන්වීම් නිසා, මෙම අර්ථදැක්වීමේ වරදක් පෙනෙන්නට නැත.

ව්‍යාපාරික ලෝකයේ සුවිශේෂී භාණ්ඩයක් හෝ සේවාවක් නොමැති සමාගම්, තමන්ට නැති සුවිශේෂී බවක් උලුප්පා දක්වන්නට උනන්දු වන අතර මෙය විශාල වරදකි.

සැබෑ ලෙසම සුවිශේෂී සමාගම් ඒ අනුසාරයෙන් තමන්ට ලැබී ඇති ඒකාධිකාරය සඟවන්නට තැත්කරද්දී, සුවිශේෂිත්වයක් නොමැති බොහෝ ආරම්භක සමාගම් (start-up companies) නැති සුවිශේෂී බවක් ආරෝපණය කරගන්නට තැත්කරයි. මෙය වරදක් වන අතර මෙවැනි ක්‍රියා අවසන් වන්නේ ආයෝජකයින්ට සිය ආයෝජන අහිමිවීමෙනි.

නවමු ව්‍යාපාරිකයින් බොහෝවිට සිදුකරණ, අතිශය හානිකර වරදක් වන්නේ තමන්ගේ ඉලක්ක වෙළඳපොල (target market) ඉතා පටුවෙන් නිර්වචනය කොට, එමගින් එම ඉතා පටු වෙළඳපොලෙහි එකම සමාගම තමන් බව පෙන්වීමට තැත් කිරීමයි. හැකිතාක් පටුවෙන් තම ඉලක්ක වෙළඳපොල නිර්වචනය කොට එහි ලොකුම සමාගම / එකම සමාගම තමන් බවට පම්පෝරි ගසනවාට වඩා නව ව්‍යවසායකයින් (new entrepreneurs) සිදුකල යුත්තේ තමන් නිර්වචනය කරගත් වෙළඳපොල සැබැවින්ම ලාභ ලැබිය හැකි, විකිණීම් වැඩිකරගත හැකි වෙළඳපොලක් බව නිශ්චිතවම තහවුරු කරගැනීමයි.

උදාහරණයක් ලෙස 2001 වසර කාලයේදී මා ආරම්භකල පේපෑල් සමාගම කැලිෆෝනියාවේ මවුන්ටන් විව් ප්‍රදේශයේ කැස්ත්‍රෝ වීදියේ ස්ථාපනය වී තිබූ අතර, දිවා ආහාරය සඳහා කාර්යාල සගයින් සමග කැස්ත්‍රෝ වීදියට පැමිණි අපට  ආහාර ගැනීමට තෝරා ගැනීම සඳහා ලොකු, කුඩා, අඩුමිල, වැඩිමිල, ඉන්දියන්, චීන, මෙක්සිකන් ආහාර සපයන අවන්හල් සිය ගණනක් තිබුණි. මේවා අතර තරඟකාරිත්වය අධික වූ අතර බොහෝ අවන්හල් (මිළ අධික ස්ථාන පවා) ඉතා කුඩා ලාභයන් ලැබූ ඒවා විය. 

අවන්හල් ව්‍යාපාරය යනු පාරිභෝගිකයින් ඇද බැඳ තබාගත හැකි, සුපිරි නවමු අත්දැකීම් ලබාදිය හැකි අවස්ථා ඉතා අඩු සේවාවකි. අඩුමිලට රසවත් ආහාර ලබාදුන් ස්ථානද බොහෝ වූ අතර ඉහල මිළකට ආහාර සැපයූ, ඉහල පැලැන්තියේ අවන්හල් අතර තරඟයද ඉතා දැඩිවිය. අවන්හල් අතර තරඟය කොතරම් දැඩිවූවාද යත්, එක් සුපිරි අවන්හලක අයිතිකරුවෙකු වූ ප්‍රසිද්ධ සූපවේදියෙකු, සිය අවන්හලට එක්තරා සඟරාවක් මගින් ලබාදුන් නරක විචාරයක් (negative review) හේතුවෙන් සියදිවි නසාගත්තේය.

නිරන්තරයෙන් පාරිභෝගිකයින් ඇදගත හැකි සුවිශේෂී බවක් නොමැති කැස්ත්‍රෝ වීදියේ අවන්හල් වල තත්වය එසේ වුවද, එවක ඉලෙක්ට්‍රොණික ලෙස අන්තර්ජාලයෙන් ගෙවීම් සේවා ලබාදෙන එකම සමාගම වූ අපගේ පේපෑල් සමාගම කිසිදු අපහසුවකින් තොරව ලක්ෂ ගණනක් පාරිභෝගිකයින් ඇදගත් අතර, ඔවුන්ගේ ගෙවීම් වලින් අපට ලැබුණු කුඩා කොමිස් මුදල අපට මිලියන ගණනින් ආදයාම් ගෙනාවේය. එයට එකම හේතුව අපගේ සේවාවට සමකල හැකි ආදේශක කිසිවක් නොතිබීමෙන් අපලබා සිටි වෙළඳපොල ඒකාධිකාරියයි.

ඒ අනුව සෑම නව ව්‍යවසායකයෙකුගේම එකම අරමුණ විය යුත්තේ සැබෑ විවිධාංගීකරණයක් ඇති, ආදේශක භාණ්ඩ/සේවා නොමැති, විශාල වෙළඳපොලක් බිහිකරගත හැකි ව්‍යාපාරයක් නිර්මාණය කරගැනීමයි.

අප යෝජනාකරන ඒකාධිකාරයේ නරක ප්‍රතිපල තිබේද?

ඒකාධිකාර සමාගම් පාරිභෝගිකයාගේ තෝරගැනීමේ අවස්ථා සීමාකොට එමගින් ඉහල මිළගණන් වලට බඩු විකුණමින් පොකැට්ටුවට අනර්තයක් සිදුකරයි. එහෙත් ඒ ස්ථායි ඒකාධිකාරි (static monopoly) තත්වයන් යටතේදීයි. එනම් රජයන් මගින් ස්ථාපනය කරන ලද ඒකාධිකාර හෝ නීතිවිරෝධී ලෙස වෙළඳපොල තරඟය නිෂ්ක්‍රිය කරන ක්‍රියාකාරකම් වල යෙදෙන (illegal anti competitive practices) සමාගම් තිබෙන්නේ නම් පමණකි.

නිදහස් වෙළඳපොල ස්ථායි නොවන අතර නිරන්තර වෙනස්වීම් වලට භාජනයවේ. ඒ අනුව ඒකාධිකාරියක් පවත්වාගෙන යන සමාගමක් ඊටවඩා සුපිරි අත්දැකීමක් ලබාදෙන විවිධාංගීකරණයවූ භාණ්ඩයක්/සේවාවක් ලබාදෙන සමාගමකට පරාජය විය හැකිය. උදාහරණයක් ලෙස වසර 2000ට පෙර අන්තර්ජාල සෙවුම් ඒකාධිකාරයය යාහූ සතුවූ අතර 2000න් පසු එය ගූගල්ට හිමිවිය.

ඒ අනුව නිර්මාණශීලී සමාගම්වලට ඒකාධිකාරියක් ගොඩනගාගැනීමට ඉඩලැබීම නව නිර්මාණ බිහිවීම සඳහා දැඩි දායකත්වයක් ලබාදෙයි. ඒකාධිකාරිබව ලැබී වෙළඳපොල නායකත්වයට පත්වීමෙන් පසු ලැබෙන අධික ලාභය  නව සුපිරි නිර්මාණ බිහිකිරීමට ව්‍යවසායකයින්ට ඉමහත් අභිප්‍රේරණයක් (motivation) ලබාදෙයි. 

උදාහරණයක් ලෙස ඇපල් සමාගම ස්මාර්ට්ෆෝන හා ටැබ්ලට් පරිගණක ලෝකයේ විශාල වෙළඳපොල පංගුවක් හිමිකරගෙන ඒකාධිකාරී ලාභ ලබාගනී. ඇපල් සමාගම මේ තත්වය හිමිකරගත්තේ පාර්භෝගිකයින්ට තෝරාගැනීමේ අවස්ථා අහිමි කිරීමෙන්ද (restricting choice)? කොහෙත්ම නැත. ඇපල් සිදුකලේ තෝරාගැනීමේ අවස්ථා වැඩිකරමින්, පාරිභෝගිකයින්ට ඉහලම අත්දැකීමක් ලබාදෙන අතිශයන්ම උසස් තත්වයේ නිර්මාණ බිහිකොට, ඉහල මිලක් ගෙවීමට පාරිභෝගිකයින් සිය කැමැත්තෙන් එකඟකරවා ගැනීමයි.

තවත් උදාහරණ ඇත. ගූගල් ඇන්ඩ්‍රොයිඩ් හා ඇපල් iOS මගින්, මයික්‍රෝසොෆ්ට් සමාගම සතුකරගෙන තිබූ මෙහෙයුම් පද්ධති ඒකාධිකාරය කඩාදාමා ඇත. වේගයෙන් ජංගම පරිගණක භාවිතයට යොමුවන අදලෝකයේ ප්‍රමුඛතම ජංගම පරිගණක මෙහෙයුම් පද්ධති වන්නේ මයික්‍රෝසොෆ්ට් වින්ඩෝස් නොව  ඇපල් iOS  හා ගූගල් ඇන්ඩ්‍රොයිඩ්ය. 

භාවිතයට පහසු, බලසම්පන්න ජංගම මෙහෙයුම් පද්ධතියක් නිර්මාණය කරගැනීමට මයික්‍රෝසොෆ්ට් සමාගම අසමත්වීමේ වන්දිය වන්නේ වේගයෙන් ව්‍යාපත්වන ජංගම පරිගණක ලෝකයේ දැවැන්තයෙකු වෙනුවට කුරුමිට්ටෙකු වන්නට යෝධ මයික්‍රෝසොෆ්ට් සමාගමට සිදුවීමයි. නිර්මාණ-ප්‍රමුඛ ව්‍යාපාර ඒකාධිකාරීයේ ප්‍රධාන ලක්ෂණය මෙයයි. එනම් ව්‍යාපාර ඒකාධිකාරීය යන තත්වය ස්ථිර තත්වයක් නොවන අතර නවමු නිර්මාණ අධෛර්ය කරනවා වෙනුවට නවමු නිර්මාණවලට පැරණි ඒකාධිකාරිය බිඳදමා අලුත් ඒකාධිකාරියක් තනාගෙන අධික ලාභ ලබාගැනීමට අවස්ථා ලබාදේ.

ලියෝ ටෝල්ස්තෝයි සුප්‍රකට ඇනා කැරනිනා වෘතාන්තය ආරම්භ කරන්නේ මෙසේයි "All happy families are alike; each unhappy family is unhappy in its own way - ප්‍රීතිමත් පවුල් බොහෝ සෙයින් සමානවන අතර අසන්තුෂ්ටිය රජකරන පවුල්වල දුක්බරතාවයන්ට විවිධාකාර හේතූන් ඇත."

ව්‍යාපාරික ලෝකයේදී මෙම කියමන ප්‍රතිලෝම යයි මට සිතේ. 

ව්‍යාපාරික ලෝකයේ ප්‍රීතිමත් සමාගම් (විශාල ලාභ ලබන සමාගම්) එකිනෙකාට බොහෝ සෙයින් වෙනස්ය. ඔවුන් ලාභ ලබන්නේ පාරිභෝගිකයින්ගේ සුවිශේෂී අවශ්‍යතාවයක් ඉටුකොට එමගින් ලබන ඒකාධිකාරියෙනි. දුක්බර සමාගම් බොහෝසෙයින් සමානය. ඒවා අසාර්ථකවී ඇත්තේ එකම හේතුවක් නිසාය. එනම් තරඟකරුවන්ගෙන් ගැලවීමට මගක් සොයාගැනීමට නොහැකිවීම නිසාය.

ව්‍යාපාරකිරීම යනු යුද්ධකිරීමද? සටන් මානසිකත්වයෙන් ඉවත්වන්න. තමන්ගේ ඒකාධිකාරිය ගොඩනගා ගන්න

"Business is War" ව්‍යාපාරකිරීම යනු යුද්ධකිරීමයි. මෙය බොහෝ ව්‍යාපාරිකයින් අතර ප්‍රචලිත කියමනකි. යුධ මානසිකත්වය ව්‍යාපාර කළමණාකරණය උගන්වන විශ්වවිද්‍යාල පාඨමාලාතුලට පවා කාවැදී ඇත. චීන දාර්ශණික සන්-සූ සම්පාදනය කල "The Art of War" මෙන්ම පෘසියන් ජෙනරාල්වරයෙකු වූ කාර්ල් ෆොන් ක්ලෝස්විට්ස් රචනාකල "Vom Kriege (On War)"  සමහර MBA පාඨමාලාවල අනිවාර්ය කියැවීම් බවට පත්කොට ඇත.

යුධකර්මයේ පාරිභාෂික වදන් බොහොමයක් ව්‍යාපාරික පාරිභාෂික බවට පත්ව ඇත. " Strategy" යන වචනය පවා හමුදා ශබ්දකෝෂයේ වචනයකි. කෙසේ වෙතත් මාගේ අදහස වන්නේ ව්‍යාපාර කිරීම යුද්ධ කිරීම හා සමාන නොවන බවයි. බොහොදෙනා ව්‍යාපාරකිරීම ලෙස වරදව වටහාගෙන සිටින්නේ තරඟකරුවන් සමග ඇතිකරගෙන තිබෙන විනාශකාරී ගැටුමයි. 

මිනිසා ගැටුම් ඇතිකරගන්නේ තරඟ කරන්නේ ඇයි? කාර්ල් මාක්ස් හා විලියම් ශේක්ස්පියර් හේතූන් දෙකක් පෙන්වාදේ. 

මාක්ස්ට අනුව මිනිසුන් ගැටුම් ඇතිකර ගන්නේ තමන්ට වඩා වෙනස් අය සමගය. තමන්ට වඩා පැවැත්මෙන් හා ආකල්පවලින් වෙනස් අය සමග ගැටීම මිනිස් ස්වභාවයයි. මේ වෙනස් බව වැඩිවන්නට වැඩිවන්නට ගැටුම දරුණුවේ.

ශේක්ස්පියර් මීට ඉඳුරා ප්‍රතිවිරුද්ධ අදහසක් දරයි. ඔහුට අනුව බොහෝ සටන්වල ප්‍රතිවාදීන් බොහෝ සෙයින් සමානය. වෙනස්කම් අවමයි. එනයින් ඔවුන් ගැටෙන්නේ කුමක් සඳහාද යන්න තේරුම් ගැනීම අපහසුවේ. බොහෝවිට සටන්වදින්නන්ද තමන් සටන් කරන්නේ කුමක් සඳහාද යන්න නොදනී.

සමාගම් තුල සටන්කාමී මානසිකත්වයක් බිහිකොට සිය තරඟකාරීන් තුල බිල්ලෙකු මවාගන්නේ එම සමාගම් තුල සේවය කරන ඉහල නිළධාරීන්ය. ආත්මාර්ථයෙන් තමන්ගේ පැවැත්ම තහවුරුකර ගැනීම සඳහා ඔවුන් තරඟකාරී සමාගම් තමන්ගේ පැවැත්මට තර්ජනයක් ලෙස සලකා ගැටුම් නිර්මාණය කරගනී. කලක් යනවිට සමාගමේ අයිතිකරුවන්ද මෙම ගැටුමට අනුගත වන අතර ඉන් අහිමිවන දෑ බොහෝය.

උදාහරණයක් ලෙස කැලිෆෝනියාවේ සන් මයික්‍රෝසිස්ටම්ස් (Sun Microsystems) ගත හැකිය. සන් මයික්‍රෝසිස්ටම්ස් අධිබල පරිගණක හා මෙහෙයුම් පද්ධති හා ජාලකරණ තාක්ෂණ නිර්මාණ සමාගමකි. සුප්‍රකට ජාවා පරිගණක භාශාවද ඔවුන්ගේ නිර්මාණයකි. මෙහි සමාරභක පාර්ශවකරුවෙකු හා සමාගමේ ප්‍රධාන විධායක නිළධාරී තනතුර දැරුවේ සන් සමාගමේ පරිගණක තාක්ෂණය නිර්මාණය කල ඇන්ඩි බෙක්ස්ටොල්හයිම්ගේ ස්ටැන්ෆර්ඩ් සරසවි මිතුරෙකුදවූ ස්කොට් මැක්නීලිය.

සිය තාක්ෂණයන් වැඩිදියුණු කරමින් ඒකාධිකාරියක් ගොඩනගාගන්නවා වෙනුවට ස්කොට් මැක්නීලි එවක අතිශයින්ම සාර්ථක සමාගමක්වූ මයික්‍රෝසොෆ්ට් සමාගම සමග වෛර බැඳගත්තේය. මයික්‍රෝසොෆ්ට් සමාගමට පහරපිට පහරදුන් ස්කොට් මැක්නීලි ප්‍රසිද්ධියේම බිල් ගේට්ස් අවඥාවට ලක් කරයේය. කෙසේ වෙතත් අවසානයේ සන් සමාගම පාරිභෝගිකයින්ගෙන් ප්‍රතික්ශේප වූ අතර මුලු සමාගමම ඔරැකල් සමාගම විසින් මිලදී ගත්තේය. අද ජනප්‍රියම පරිගණක භාශාවක් වන ජාවා නිර්මාණය කලද, මයික්‍රෝසොෆ්ට් වෛරය නිසා ඉන් නිසි ප්‍රයෝජන ගැනීමට සන් සමාගමට නොහැකි විය.

පසුකලක ඇතිවූ ගූගල් හා මයික්‍රෝසොෆ්ට් තරඟයද දෙපාර්ශවයටමට පාඩු ඇති කලේය. මෙම තරඟය නිසා ඇපල් සමාගම ඉදිරියට පැමිණි අතර, එසේ නොවී ගූගල් සමාගම සිය ඇන්ඩ්‍රොයිඩ් මෙහෙයුම් පද්ධතිය එලිදැක්වීමට මුලු බරතබා ක්‍රියාකලේනම්, ඇපල් වෙළඳපොල අල්ලා ගැනීමට පෙර ඇන්ඩ්‍රොයිඩ් ඒකාධිකාරියක් සාදා ගැනීමට ගූගල් හට හැකියාව තිබුණි.

හොඳ තරඟකරුවෙකුගෙන් ගැලවීමට එක් මගක් වන්නේ දෙපාර්ශවයටම වාසිවන ආකාරයට එක්වීමයි. 1999දී අප පේපෑල් ආරම්භකල අවධියේදී ඊලෝන් මස්ක් X.com නමින් ප්‍රතිවිරුද්ධ අන්තර්ජාල ගෙවුම් සේවාවක් ආරම්භකොට තිබුණි. අපගේ සේවාවට හැම අතින්ම සමාන සේවා ලබාදුන් ඊලෝන්ගේ X.com කරට කර දැඩි තරඟයක් දුන් අතර, මින් දෙපාර්ශවයටම අවඩැක් වන බව තේරුම් ගත් මා, මගේ ව්‍යාපාරික සගයා වන මැක්ස් ලෙව්චින් සමග සාකච්ඡාකොට, අපහා බද්ධවන ලෙස ඊලෝන් මස්ක්ට යෝජනා කලෙමු.

අති දක්ශ තාක්ශණවේදියෙකු මෙන්ම ශූර ව්‍යාපාරිකයෙකුද වන ඊලෝන් අපගේ යෝජනාවට එකඟවිය. ප්‍රතිපලය වූයේ ඊලෝන්ගේ X.com සමාගම අප සමාගම හා බද්ධවී ඊලෝන් අප සමාගමේ සම-ආරභකයෙකු හා අධ්‍යක්ශකවරයෙකු ලෙස පත්වීමයි. මෙයින් තරඟය අවසන්වූ අතර පසුව පේපෑල් සමාගම ඩොලර් බිලියන 1.5කට ඊ-බේ සමාගමට විකුණා කෝටිපතියන් වීමට අප තිදෙනාටම හැකිවිය.

තිරසාර ඒකාධිකාරියක් (sustainable monopoly) පවත්වාගැනීම සඳහා අනාගත ලාභ උපරිමකරගැනීමට වෙහෙසිය යුතුය.

ඒකාධිකාරියක් ගොඩනගා ගැනීම අපහසුය. එහෙත් එය දිගටම පවත්වාගැනීම තවත් අපහසුය. මේ සඳහා දිගින් දිගටම නව නිර්මාණකරණයේ යෙදී සිටිය යුතුය. ගූගල් සමාගම යූ-ටියුබ්, ඇන්ඩ්‍රොයිඩ් මෙහෙයුම් පද්ධතිය, ගූගල් ඩොක්ස්, ක්‍රෝම් OS, රෝබෝ කාර් ආයෝජන ආදිය සිදුකරන්නේ අනාගතයේ වැදගත්වය තාක්ෂණයන් වෙත දැන්ම ඇතුලුවී ස්ථාවරත්වය ගොඩ නගාගැනීමටයි.

ඇමසන් සමාගම පොත්පත් විකිණීමට අමතරව අතිශයින් ලාභදායි ක්ලවුඩ් කොම්පියුටින් සේවා වලට ඇතුලුවී ඇත්තේද, ඇමසන් ස්ටුඩියෝස් නමින් ටෙලිවෘතාන්ත නිර්මාණ සමාගමක් ආරම්භ කොට ඇත්තේද මේ අනාගත මුදල් ධාරා (future cashflow) හා ලාභ ඉලක්ක කරගෙනය.

කලක් අධිකලෙස ජනප්‍රියවූ සින්ගා (Zynga) පරිගණක ක්‍රීඩා සමාගම හා ගෲපොන් වට්ටම් සේවාව කඩාවැටුනේ අනාගත ආදායම් වෙනුවෙන් සිදුකලයුතු සැලසුම් හා ආයෝජන සිදුනොකොට වර්තමානයේ ලාභ පමණක් ඉලක්ක කරගෙන ක්‍රියාත්මක වීම නිසයි.

අදටත් අතිශයින් ලාභ ලැබුවද, ඇපල් සමාගමේ අනාගතය පිලිබඳව ආයෝජකයින් ප්‍රශ්ණ කරන්නේත් අයිෆෝන් විකුණමින් අද ලබාගන්නා අධික ලාභය තව කලක් පවත්වා ගැනීමට ඇපල් සමාගමට නොහැකිවනු ඇතැයි සැක පලවන නිසායි. ඉදිරියේදී ඩොලර් බිලියන ගණනින් ආදායම් ඉපදැවිය හැකි නිර්මාණයක් ඇපල් සමාගම සතු නොවේ යයි බොහෝ ආයෝජකයින් සැක පල කරනවා.

නිර්මාණශීලී ඒකාධිකාරියක් ගොඩනගා ගන්නේ කෙසේද?

1] කිසිවෙකුටත් සමකල නොහැකි, පේටන්ට් ආරක්ෂාව ඇති තාක්ෂණයක් ගොඩනගා ගන්න. මෙම තාක්ෂණය, තරඟකරුවන් සතු තාක්ෂණයට වඩ 10ගුණයක් වත් සුපිරිවිය යුතුමය. ගූගල්, ඇමසන්, ඇපල් ආදීන් සතුව ඇත්තේ මෙවන් තාක්ෂණයන්ය. ඊලෝන් මස්ක් ගේ ටෙස්ලා ඉලෙක්ට්‍රික් කාර් සමාගමද එසේය.

2] ජාල සංසිද්ධිය (Network Effects) නිර්මාණය කරගන්න. ජාල සංසිද්ධිය යනු යම් භාණ්ඩයක් හෝ තාක්ෂණයක් වැඩි වැඩියෙන් භාවිතා වන්නට වන්නට එහි ප්‍රයෝජනය වැඩිවීමයි. ගූගල් ඇන්ඩ්‍රොයිඩ් හුදාහරණ වේ. වැඩි වැඩියෙන් ඇන්ඩ්‍රොයිඩ් ජනප්‍රිය වනවට එයට සරිලන් ඇප්  නිර්මාපකයින් මෙන්ම ඇන්ඩ්‍රෝයිඩ් භාවිතයෙන් ස්මාර්ට්ෆෝන්, ටැබ්ලට් හා වෙනත් උපාංග බිහිකරන්නන් වැඩිවේ. එවිට ඇන්ඩ්‍රොයිඩ් තව තවත් ජනප්‍රිය වේ. ෆේස්බුක්, මයික්‍රෝසොෆ්ට්,ඇමසන් යන සියල්ලටම මෙය පොදුය. පාරිභෝගිකයින් වැඩි වැඩියෙන් ඇමසන් වෙතින් බඩු ගන්නාවිට, ඇමසන් තුල බඩුවිකුණන ස්වාධීන වෙළෙන්දන්ද වැඩිවේ, එවිට තවත් පාරිභෝගිකයින් ඇමසන් වෙත ආකර්ෂනයවේ.

3] කුඩාවට ආරම්භ කරන්න. කුඩා වෙළඳපොල පංගුවක (market segment) බලසම්පන්න තරඟ කරුවෙකු වීම, විශාල වෙළඳපොලක කුඩා තරඟකරුවෙකු වීමට වඩා පහසුයි.

ඇපල්, ගූගල්, ට්විරර්, මයික්‍රෝසොෆ්ට් යන සියල්ලම කුඩාවට, කුඩා, තරඟකාරිත්වය අවම වෙළඳපොල පංගුවක ආරම්භවූ සමාගම්ය. ඇපල් විනෝදයට පරිගණක එකලස් කරන්නන්ට (hobby computing) සිය පලමු පරිගණකය නිමැවුවේය. පසුව එය නිවසේ විනෝදයට, දැනුමට භාවිතා කල හැකි එකක් ලෙස වැඩි දියුණු කලේය. අයි.බී.එම් වැනි ව්‍යාපාරික පරිගණක නිර්මාණ සමාගම් (business computer systems) හා තරඟ කරන්නට ඇපල් "Apple Liza" නම් මාදිලියක් ඉදිරිපත් කලද එය දැඩි ලෙස අසාර්තක විය. කඩාවැටෙන්නට ගිය ඇපල් යලි ගොඩ ආවේ ඇපල් මැකින්ටොෂ් පරිගණකයෙනි. එය නිවෙස් පරිගණකයක් මෙන්ම සුපිරි ග්‍රැෆික් හැකියාව ඇති, පලමු Graphical User Interface එකක් සහිත (වින්ඩෝස් වැනි - එහෙත් වින්ඩෝස් පැමිණෙන්නට බොහෝ පෙර ) පරිගණකය විය. එය ග්‍රැෆික් නිර්මාණ කරුවන් අතර අතිශය ජනප්‍රිය වීමෙන් අලුත්, ලාභදායි වෙළඳපොල පංගුවක් සකසා ගත්තේය. එම ග්‍රැෆික් ඩිසයින් පරිගනක වෙළඳ පොල පංගුවේ ඇපල් මැකින්ටොෂ්ට සමකල හැකි පරිගණකයක් නොවීය. ඇපල් එහි ඒකාධිකාරිය හිමිකර ගත්තේය.

මයික්‍රෝසොෆ්ට් ඉස්සෙල්ලාම හැදුවේ නිවෙස් පරිගණකවල එකල (1975-1985) ජනප්‍රිය, ඉගැනීමට පහසු භාෂාවක් වූ BASIC භාෂාව ස්ථාපනය කල මෘදුකාංගයකි. එය Micro-Soft BASIC ලෙස හැඳින්වුනි. එම වෙළඳපොල තරඟයක් නොමැති එකක් විය. එහි ස්ථාපනයවූ බිල් ගේට්ස් ශූර ලෙස දුර දක්ණා නුවනින් අයි.බී.එම් සමාගමේ පුද්ගලික පරිගණකය වූ IBM PC පරිගණකයේ මෙහෙයුම් පද්ධතිය (PC-DOS) නිර්මාණය කිරීමේ කොන්ත්‍රාත්තුව භාර ගත්තේය.

එමෙන්ම ඕනෑම අයෙකුට කොපිකල හැකි ආකෘතියෙන් නිමවා තිබූ  Open Architecture පරිගණක නිර්මාණ ආකෘතිය යටතේ වෙනත් පරිගණක සමාගම් නිපදවන පරිගණක සඳහා නිළ මෙහෙයුම් පද්ධතිය සැපයිමේ අවසරයද එකල ලාබාළ තරුණයෙකු වූ බිල් ගේට්ස් අයිබීම් ලොක්කන් ගෙන් ලබාගත්තේ විස්මිත ලෙසය. බිල් ගේට්ස්ගේ නැගීම ආරම්භ වූයේ එම අති දක්ෂ ගණුදෙනුවෙන් පසුවය. එහෙත් ඔහුද කුඩාවට ආරම්භ වී ටිකෙන් ටික වර්ධනය විය. කෙලින්ම අයි බී එම් වැනි සමාගමකට අභියෝග කරන්නට ගියානම් අද බිල් ගේට්ස් ගැන දන්නා අයට වඩා නොදන්නා අය වැඩිවන්නට ඉඩ තිබුණි.

ෆේස්බුක්ද එලෙසමය. එය ආරම්භවූයේ ලෝකයේම ජනයා ජාලගත කරන්නට නොව හාවර්ඩ් විශ්වවිද්‍යාලයේ 6000ක් පමණ සිසුකැල ජාලගත කරන්නටය. පසුව එය වෙනත් විශ්විද්‍යාලවලද ව්‍යාප්තකලේය. Facebook ලෝක ව්‍යාප්තිය පසුකලක ඇරඹූ ව්‍යාපෘතියකි.

4] කුඩා වෙළඳපොලෙහි දැවැන්තයෙකු වූ වහාම ආසන්න වෙළඳපොලවල් ආක්‍රමණය කොට බලය ගොඩ නගාගන්න. ඇමසන් මුලින්ම පොත් විකුණූ අතර, ඉන්පසු සී.ඩී තැටි වෙළඳපොල ආක්‍රමණය කලේය. අනුක්‍රමයෙන් විවිධ වෙළඳපොලවල් ආක්‍රමණය කල ඇමසන් අද විකුණන්නේ නැති දෙයක් සොයාගත නොහැකි තරමට වර්ධනය වී ඇත.

මයික්‍රෝසොෆ්ට්ද එසේමය මුලින් බේසික් භාෂාව හා PC DOS මෙහෙයුම් පද්ධති නිර්මාණය කල එය පසුව වින්ඩෝස් මෙහෙයුම් පද්ධතිය, මයික්‍රෝසොෆ්ට් වර්ඩ් නම් වර්ඩ්ප්‍රොසෙසරයද නිර්මාණය කලේය. වර්ඩ් වලට එක්සෙල් එකතුවූයේ පසුවය. එකල ජනප්‍රිය ස්ප්‍රෙඩ් ෂීට් එක වූයේ ලෝටස් 1-2-3 නම් මෘදුකාංගයකි. ජනප්‍රියම ප්‍රසන්ටේෂන් සොෆ්ට්වේයාර් එක වූයේ හාවර්ඩ් ග්‍රැෆික්ස් නම් ප්‍රසන්ටේෂන් මෘදුකාංගයකි. පවර් පොයින්ට් නිමැවුනේ ඊටත් පසුවය. අද මේවා සියල්ලම මයික්‍රෝසොෆ්ට් ඒකාධිකාරියට නතුව තිබේ.

5] වෙළඳපොල අනවශ්‍ය ලෙස ව්‍යාකූල (disrupt) කොට, අනවශ්‍ය අවධානය දිනාගැනීමෙන් වලකින්න. Disruptive Technology සිලිකන් නිම්නයේ ජනප්‍රිය වචනයකි. සිලිකන් නිම්නයේ බොහෝ දෙනාට අවශ්‍ය වන්නේ තම කර්මාණ්තය හෝ වෙළඳපොල සෙළවිය හැකි, තරඟකරුවන් අතුගා දැමිය හැකි ඩිස්රප්ටිව් තාක්ෂණයකි.

කෙසේ වෙතත් Disruptive Technology යන්නෙහි නියමාකාර අරුත වන්නේ නව තාක්ෂණයක් මගින් කලින් වැඩි මිලකට, අඩු පහසුකම් යටතේ ලබාදුන් භාණ්ඩයක් හෝ සේවාවක් ඉහල පහසුකම් සමග අඩු මිළකට ලබාදීමයි. උදාහරණයක් ලෙස සෙලියුලර් දුරකථන තාක්ෂණය, කලක් පාරිභෝගිකයින් රැහැනකට බැඳදමා තිබූ, අවම පහසුකම් හා බිල් වැඩි රැහැන් දුරකථන තාක්ෂණය සොලවා පෙරලා දැමූ ඩිස්රප්ටිව් තාක්ෂණයකි.

ඩිස්රප්ටිව් තාක්ෂණයක් ප්‍රචලිත කිරීමේදී දැනට එම වෙළඳපොලෙහි ස්ථාපිත තරඟකරුවෙන්ගෙන් එල්ලවන ප්‍රහාර වලට මුහුණදීමට හැකියාව තිබිය යුතුය. එවැනි මූල්‍යමය / තාක්ෂණමය / භෞතික සම්පත් හැකියාවක් නොමැතිනම්  කෙසේ හෝ තම භාණ්ඩය/සේවාව තරඟකරුවන්ගෙන් විශේෂීකරණය කරගෙන (differentiate from competition) දැවැන්තයන් සමග අනවශ්‍ය ගැටුමකට යාම වලකාගත යුතුය. 

6] සන්නාමය ගොඩනගා ගන්න. එහෙත් සන්නාමය පිටුපසින් සුවිශේෂ තාක්ෂණික වාසියක් (technological advantage) හෝ තරඟකාරී වාසියක් (competitive advantage) තිබිය යුතුමය. තරඟකාරී වාසියක් නොමැතිව සන්නාමය ප්‍රවර්ධනය කිරීමට යාම නිෂ්පලය. අද යාහූ සෙවුම් සේවාවට සිදුව ඇති දෙය බලන්න. මරිසා මයර් යාහූ ප්‍රධාන විධායක වූ වහාම ඇය යාහූ සන්නාමය ප්‍රවර්ධනයට අතිවිශාල ධනස්කන්ධයක් වැය කලාය. එහෙත් යාහූගේ ප්‍රධාන තරඟකරුවාවූ ගූගල් වෙත ඇති සුපිරි සෙවුම් තාක්ෂණය යාහූ සතුව නොතුබුණි. එමෙන්ම සෙවුම් ලොවේ කිරුළ ගූගල් ඩැහැගත් පසු, යාහූ ආයතනය යොමුකල යුතු උපක්‍රමීය දිශානතිය (strategic direction) පිලිබඳවද පැහැදිලි දැක්මක් මරීසා මයර්ට නොතුබූ බව පෙනේ.

ඇය කලේ විවිධ එකතුකල සේවා (added services) මගින් කඩාවැටෙන භාවිතකරන්නන් ගහණය (user base) ගොඩගැනීමට උත්සහ කිරීම පමණකි. මේ සියල්ලම ගූගල් හටද කලහැකි බව මරීසා අවබෝධකර ගත්තේ නැත.

උපක්‍රමීය දිශානතිය හා යාහූ සතුවූ අනන්‍ය තාක්ෂණි වාසි ලාභදායි වෙළඳපොල පංගුවක් වෙත (market segment) යොමුකර ගැනීමට නොසලකා හැරි මරීසා මේවන විට ඉතාම අසාර්ථක ආයතනයක ප්‍රධානියාව සිටී. ඇය යාහූ ආයෝජකයින්ට අතිවිශාල ධනස්කන්ධයක් අහිමිකොට ඇත.

7] පරිමාණානුකූල පිරිමැසුම් (Economies of scale) නිර්මාණය වන ලෙස මෙහෙයුම් සැළසුම් කරන්න. මෙයින් පිරිවැය අඩුවී ලාභ වැඩිකර ගැනීමට හෝ වාසිය පාරිභෝගිකයාටදී මිල අඩුකොට තවත් පාරිභෝගිකයින් ඇද ගැනීමට හැකිවේ.

.










Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

අවුරුදු 7ක්ම බ්ලොග් ලිව්වා....නෙළුම් යායට ගියා.......නෙළුම් පිපී ඇති හැටි දුටුවා........


නෙළුම් යාය සම්මාන උලෙලට මා එක්වුනු  මුල්ම අවස්ථාව මෙය වුනා. සම්මානෙකුත් ලැබුණ නිසා සතුටුයි. නොලැබුණත් ඇත්තටම සතුටු වෙන්න පුලුවන් දේවල් ගොඩක් තිබුණා. 

මගේ  බ්ලොග් එකේ පලමුවැනි ලිපියේ දාතම වෙන්නේ 2010 පෙබරවාරි. මේ 2017 මාර්තු. හරියටම අවුරුදු 7ක්ම  ලිපි 700 ගාණක් ලියලා ලියලා ලියලා (නාලක කිව්වා වගේ අතින් කයිට් කරගෙන) යම් අගැයිමක්, පිලිගැනීමක් ලැබුණු එක කොච්චර හොඳද?

ඒ වගේම එහෙම පිලිගැනීමක් දෙන්න ලස්සන උත්සවයක් සංවිධානය කරන්න බොහෝ වෙහෙස මහන්සි වූ සහෘද මිනිස් කැලට මගේ ප්‍රණාමය පුද කරන්න ඕනෑ. 

මේ වගේ වැඩක් කරන එක කොච්චර අමාරුද කියලා දන්නේ මේවගේ වැඩක් කෙසේ වෙතත් අඩුම ගානේ පොඩි උත්සවයක් හරි සංවිධානය කරන්න බර කරට ගත්ත එකෙක් විතරයි. ඒ නිසා කොතරම් විවේචන තිබුනත්, මේ වැඩේ සංවිධානය කරපු, බර ඇදපු, ප්‍රචාරය කරපු, බැණුම් අහපු හැමෝටම ගොඩාක් ස්තූතියි. 

මේ වැඩේට මහන්සිවුනු ඒ බොහොම කෙනෙක් මම නමින් හඳුනාගත්තත්, රූපෙන් හඳුනන්නේ නෑ. 

සුමිත් කළණසිරි වගේම, නෙලුම් යාය ගැන මට පණිවුඩ එවමින් මාව දැනුවත් කල ලක්මාල් කන්දෙවිතාන වගේම නෙලුම් යාය ව්‍යායාමයේ බොහෝ දෙනෙක් මම මේ දැන් වුනත් පාරෙදි දැක්කොත් අඳුනන්නේ නෑ. ඇනෝනිමස් බ්ලොග් අවකාෂයේ සැරිසරන අපි වැඩිදෙනෙක් පාඩුවේ වැඩේ කරගෙන යනවා මිස ජාලගත වෙන්න ආසා නොකරන නිසා වෙන්න ඇති. 

මම නමින් හා රූපෙන් අඳුනන්නේ දෙන්නයි. එක්කෙනෙක් නාළක ගුණවර්ධන. ඒ ඔහු ආනන්දේ අපට වඩා ටිකක් ජේෂ්ඨ ආදිසිසුවෙකු නිසයි. ඇත්තම කියනවානම් විද්‍යා ලිපි ලියන්න ආභාෂය, උනන්දුව මම ලබාගත්තෙ නාළකගෙන්. මට වඩා ජේෂ්ඨ නාළකව වුනත් පෞද්ගලිකව හඳුනන්නේ නැත්තේ අපි ඉස්කෝලෙ 9 පන්තියේ ඉන්නකොට නාළක උසස් පෙල විභාගෙ ලියපු, ශිෂ්‍යනායක ලොකු අයියා කෙනෙකු වීම නිසයි. ඒත් නාළක අයියා ඒකාලේ සයන්ස් ලියන්න කියවන්න ආස අපිවගේ උන්ට වීරයෙක් වුනා. ඉස්කෝලෙ යන කාලෙම දිවයින වගේ පත්තරවලටත්, කල්පනා වගේ සඟරාවලටත් ලිපි ලියපු නාළකව අපි දැක්කේ යෝධයෙක් වගේ. ඒවගේම අපේ තවත් වීරයෙකු වුනු ආතර් සී ක්ලාක් විද්වතාව ඇසුරු කරන්නට, එකට වැඩකරන්නට වාසනාව ලබාගත් නාළක අපිට පෙනුනේ එක්තරා විධියක සුපර්-හීරෝ කෙනෙක් වගේ. 

අනිත් එක්කෙනා අපේ W3 පැරා. එයාව දන්නේ එයාගෙ W3 එක ආසාවෙන් කියවන නිසාත්, ජනවාරි පෙරලියෙන් පස්සේ ඒවගේ නිහඬව යමක් කරපු මිනිස්සුන්ටත් රූපවාහිණී නාළිකාවල දොර ඇරුණු හින්දයි.

නැවතත් මේ හැමෝටම ස්තූතියි කියලා කියන්න ඕනෙ.

මේ ටික ලියපු එකේ, නෙළුම් යාය උළෙලේ ඉදිරි සම්මාන උත්සව වලදී හදාගන්න පුලුවන් පොඩි පොඩු අඩුපාඩු ටිකකුත් දැක්ක නිසා ලියන්නම්. විවේචනයක් නම් නෙමෙයි. ඒවාට ඕනෑ තරම් අය ඉන්නවා. මේ කියන්නේ වැඩේ තව ටිකක් ඉම්පෲව් කරන්න පුලුවන් විධි.

Nominee Registration Desk

නෙළුම් යාය සංවිධායක මචන්ලා මේකනම් හරිම වැදගත්. ඉවෙන්ට් එක පටන් ගන්න ඉස්සෙල්ලා සම්මාන ලාභීන් ඇත්තටම ඇවිල්ලා ඉන්නවද, නැතිනම් නියෝජිතයෙකු හරි එවලද කියලා දැනගන්න මේක වැදගත්. හෝල් එකේ දොර ලඟ මේසයක් තියලා ගැණු ළමයි දෙන්නෙකුට වැඩේ බාර දෙන්න. එතනට අමුත්තන් යොමු කරන්න පිරිමි ළමයෙකුත් ඉස්සරහා තිබ්බානම් හොඳයි.එතකොට ලිස්ට් එකේ ඉන්න අය ආවද නාවද කියලා සළකුණු වෙනවා. එතකොට අවිනිෂ්චිතභාවය අඩුවෙනවා කියලා හිතෙනවා.

ටිකක් දිග වැඩියි වගේ

සම්මාන ගොඩයි. ඒත් පැය 2කින් ඉවර කරන්න බලන්න. ලංකාවෙ අපි හරි බිසී අයනේ. අනිත් එක බස්වල නැගලා ඈත යන්න ඉන්න මිනිස්සුන්ට 6 පහුවුනාම අමාරුයි. මැද්දෙ ඉවෙන්ට්ස් අඩුකරලා, වේගයෙන් සම්මාන දීලා ඉක්මණට ඉවර කරන්න පුලුවන් නම් හොඳයි. අන්තිම හරියේදී බෝරිං ගතිය, මිනිස්සු නැගිටලා යන එක අඩුකරන්න පුලුවන්, ඉවෙන්ට් එක වේගෙන් යනවානම්. 

3pm-5pm තමයි නියම වෙලාව.

පටන් ගන්න කලින් කන්න දෙන්න :)

සාමාන්‍යයෙන් මේවගේ උත්සවවල කන්න දෙන්නේ අන්තිමට. ඒත් එතකොට කෑම ඉතුරු වෙනවා. 

පැය 3ක ඉවෙන්ට් එකක් ඉවරවෙලා කාලා යන්න ඉන්න අය අඩුවෙන්න පුලුවන්. බස්වල දුර යන්න ඕනෑ අය, තනියම යන්න ඕනෑ කාන්තාවෝ, ගෑණු ලමයි වගේම වෙන වෙන වැඩ වලට යන්න ඕනෑ අයත්, බඩගිණි වුනත් නොකා යනවා. මේක මගේ අත්දැකීමක්. ඒ නිසා පටන් ගන්න ඉස්සෙල්ලා කන්න දෙන්න. එහෙම කරහම වාසි මේවයි;

1] 3ට පටන් ගන්න ඉවෙන්ට් එකට 12ටත් කලින් ගෙදරින් පිටත්වෙන, හරියට දවල්ටවත් නොකෑ අයට බඩගින්නේ තවත් පැය 3ක් විතර ඉන්න ඕනෑ නෑ. බඩ පුරවගෙන ඉඳගන්න පුලුවන්

2] කෑම කන අතරේ සම්මානවලට නිර්දේශ වුන අයට රෙජිස්ටර් වෙන්න කියලා නිවේදනය කරන්න පුලුවන්. නිර්දේශිත අඩවි හා බ්ලොග් කරුවන්ගේ ලයිස්තුවකුත් කැම කන හරියේ ප්‍රදර්ශණයට තිබුණානම් වැඩේ තව ලේසි වෙනවා.

3] කන බොන ගමන් බ්ලොග් කාරයෝ එකිනෙකා හඳුනා ගන්නත් පුලුවන් නේද? පරක්කු වුනොත් කාලා දුවනවා, නැතිනම් නොකා දුවනවා.

4] ආරාධිත අමුත්තන් පරක්කු වුනොත් චාටර් නැතුව එයාලා එනකම් වැඩේ පටන්ගන්නේ නැතුව අදින්න පුලුවන්. කකා බිබී ඉන්නකොට පරක්කු වුනත් තරහා වෙන අය අඩුයිනෙ.

විනිසුරුවරු / සංවිධායකවරු ආරම්භයේදීම හඳුන්වා දෙන්න.

මේවගේ වැඩ කරන එක ස්තුතියක් නැති (thankless), බැනුම් අහන වැඩ. එහෙම පරිප්පුකාගෙන වැඩේ ඇදගෙන ගිය මිනිස්සු නිසානෙ නෙළුම් යාය ඉදිරියට යන්නේ. ඉතින් විනිසුරුවරුන් හා සංවිධායකවරුන්, බර කරට අරන් ඇදපු අයව පටන් ගනිද්දිම හඳුන්වලා දෙන්න. සමහර අය කැමති නැතිවෙයි. ඒත් වැඩේට කරගහපු මිනිස්සු කව්ද කියලා හැමෝම ඉන්න අතරේ පෙන්වන එක , හඳුන්වාදෙන එක වඩාත් හොඳයි නේද? නැතිනම් ඒ මිනිස්සුන්ටත් ටිකදවසකින් එපා වෙයිනෙ.

මම දැක්ක අඩුපාඩු / දියුණුකල හැකි කරුණු ඔච්චරයි.

අනෙක් ඒවා ඕනෑම ඉවෙන්ට් එකක අවුල්වෙන/වෙන්න පුලුවන් සාමාන්‍ය දේවල්. ලයිට් යන එක, සමහර වීඩියෝ ක්ලිප් දුවන්නේ නැති එක, සවුන්ඩ් කචල් ඕවා සාමාන්‍ය දේවල් විතරයි.

අවසානයේ නැවතත් මම කියන්න ඕනෑ;

අතින් වියදම් කරගෙන, පෞද්ගලික විවේක කාළය වැයකරගෙන ලෝකෙට යමක් දෙන්න වෑයම් කරන අපි වගේ මිනිස්සුන්ට යම් වටිනාකමක් දෙන්නට මහන්සිගත් නෙළුම් යාය සංවිධායක මඩුල්ලට වගේම අනුග්‍රාහකයින්ටත් බොහෝම ස්තූතියි.













__________________________________________________________________________



Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Tuesday, 21 March 2017

Silicon Samantha රොබෝ ලිංගික සහකාරිය


සිලිකන් සමන්තා රොබෝ ලිංගික සහකාරියකි. ස්පාඤ්ඤයේ පරිගණක ඉන්ජිනේරුවෙකු වන සර්ගෙයි සැන්ටෝස් විසින් නිර්මිත ඇය කෘත්‍රිම බුද්ධියෙන් හෙබි අතර සිය ආදරවන්තයාට කතා කිරීමට හැකියාව ඇත්තියකි. සර්ගෙයි පවසන අන්දමට සමන්තාගේ සිරුර පුරාම ස්පර්ෂ සංවේදක සවිකොට ඇති අතර ඇය ස්පර්ශයට ප්‍රතිචාර දක්වයි. දෙතොල්, පියයුරු හා යෝනි ප්‍රදේශයේ ඇති සංවේදක නිසා ඇය ලිංගික ක්‍රියාවන්ට ඉතා තාත්විකය ප්‍රතිචාර දක්වන බව පැවසේ. ඇයගේ මුව කාන්තාවකගේ මුඛයට අනුරූපව නිර්මාණය කොට ඇති නිසා ඉතා තාත්වික ලෙස චුම්බනය (සිපගැනීම ) කිරීමටද ඇය සමත්ය.



සෙක්ස් බොට්ස් හෙවත් තාත්විකව ලිංගික කියාවලිවල යෙදිය හැකි රොබෝවන්, කෘත්‍රිම බුද්ධි තාක්ෂණයේ හා සංවේදක තාක්ෂණයේ දියුණුවත් සමගම අති විශාල දියුණුවක් ලබනු ඇතැයි විද්වතුන් පවසන අතර නුදුරු අනාගතයේදීම ගණිකා වෘත්තිය මෙන්ම තනිකඩ පිරිමින්ගේ හා ගැහැණුන්ගේ ලිංගික අවශ්‍යතා ආරක්ෂාකාරීව මෙන්ම රහසිගතව තෘප්තිමත් කරගැනීමට මෙම තාක්ෂණය භාවිතා වනු ඇත.




Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Fly over Mars | අඟහරුවා මතින් පියාසර කරන්න


2005 අගෝස්තුවේ නාසා ඒජන්සිය අඟහරුවා වෙත යවනු ලැබූ Mars Reconnaissance Orbiter යානය මේ වනවිට, සිය High Resolution Imaging Science Experiment (HiRISE) කැමරාවෙන් අධිවිබේධන ඡායාරූප 50,000ක් පමණ ලබාගෙන පෘථිවිය වෙත එවා තිබෙනවා. 

නාසා ආයතනය මගින් මහජනතාව වෙත නිකුත්කල මෙම ඡායරූප ආධාරයෙන් පින්ලන්ත ජාතික සිනමාකරුවෙකු වන Jan Fröjdman අඟහරුවා මතින් පියාසර කරන යානයක සිටින්නෙකුට පෙනෙන ආකාරයට වීඩියෝවක් නිර්මාණය කොට තිබෙනවා. මාර්ස් ෆ්ලයි ඕවර් ලෙස හඳුන්වා ඇති මෙම වීඩියෝව නරඹන්නෙකුට, අඟහරුවාට ඉහලින් පියාඅසර කරන්නෙකුට එම ග්‍රහලෝකය කෙසේ දිස්වෙන්නේදැයි සිතා ගත හැකියි.





මීට පෙර පරිගණක ග්‍රැෆික් තාක්ෂණය හා සජීවීකරණ තාක්ෂණය යොදාගෙන මෙවැනි වීඩියෝ නිර්මාණය වී ඇති නමුත් මෙම වීඩියෝවේ ඇති විශේෂත්වය මෙය අඟහරුවාගෙන් ලැබුණු සැබෑ ඡායාරූප පමණක් යොදාගෙන නිර්මාණය කොට තිබීමයි.





Leave a Comment using Facebook Comments Plugin | ඔබගේ ෆේස්බුක් ගිණුම හරහා ප්‍රතිචාරයක් තබා යන්න

__________________________________________________________________________

Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Monday, 20 March 2017

ලංකාවේ ඉන්ටර්නෙට් වේගය ඔස්ට්‍රේලියාවටත් වඩා ඇත්තටම වැඩිද? 2016 State of the Internet නිළ වාර්තාව කියවා ඇත්ත දැන ගනිමු



ලංකාවේ ජනමාධ්‍ය පුවත් මවන්නට උපන් දක්ෂතා පෙන්වයි. ඔවුන් දිනපතා මවන පුවත් සැබෑනම් එක්කෝ මේ රට ලෝකයේ සුපිරිම රටක් විය යුතුය. නැතිනම් සෝමාලියාවටත් වඩා අරාජික විය යුතුය. වෙනත් රටවල මෙවැනි පුවත් මවන්නේ ටැබ්ලොයිඩ් හෙවත් ගොසිප් මාධ්‍ය විසින් වුවද ලංකාවේ ජාතික පුවත්පත් හා ඒවා අනුබද්ධ වෙබ් අඩවි පවා පුවත් මවයි.

"ලංකාවේ ඉන්ටර්නෙට් වේගය ඔස්ට්‍රේලියාවටත් වඩා වැඩී..." මේ නොබොදා ඩේලි මිරර් වෙබ් අඩවිය මැවූ පුවතකි. ඔවුන් ඒ සඳහා මූලාශ්‍ර ලෙස බ්‍රිතාන්‍යයේ ඩේලිමේල් නම් සුප්‍රකට ගොසිප් ටැබ්ලොයිඩ් පුවත්පත දැක්වූවත්, පුවත පුරාම, මෑතකදී "අකමායි" නම් සමාගම එලිදැක්වූ ජාත්‍යන්තර වශයෙන් පිලිගැනෙන "State of the Internet Report" වාර්ෂික වාර්තාව පිලිබඳව සඳහන් කරයි.

හවස හයෙන් පසු ෆේස්බුක් පිටුවක් පවා හරියට පෙන්වාගන්නට බැරි තරම් මන්දගාමී බ්‍රෝඩ්බෑන්ඩ් 4G අන්තර්ජාල සබඳතා ඇති ලංකාවේ ඉන්ටර්නෙට් වේගය සැබැවින්ම ඔස්ට්‍රේලියාවට වඩා වැඩිද?

අකමායි සමාගමේ "ස්ටේට් ඔෆ් ද ඉන්ටර්නෙට් 2016" වාර්තාව කියවාබලා, ඇත්ත නැත්ත දැනගනිමු.
























අකමායි සමාගමේ වාර්තාවේ (එම වාර්තාව මෙතනින් බාගතකරගන්න ) 28 වැනි පිටුවේ ඇති දත්තවලින් ලංකාවේ ජනමාධ්‍ය පුවත් මවන ආකාරය හොඳින් තේරුම්ගත හැකිය.


අකමායි වාර්තාවේ  28 වැනි පිටුවේ පහතින් දත්ත වගු දෙකක් දක්වා ඇත. Figure 20 ලෙස දක්වා ඇති වගුවේ මාතෘකාව "Average Connection Speed (IPv4) by APAC Country/Region - ආසියා පැසිෆික් කලාපයේ රටවල අන්තර්ජාල සබඳතාවල සාමාන්‍ය වේගය" යනුවෙන් සටහන් කොට ඇත. 

ඒ අනුව දකුණු කොරියාව ආසියා පැසිෆික් කලාපයේ මෙන්ම ලෝකයේම වේගවත්ම අන්තර්ජාල සබඳතා ඇති රට ලෙස යලිත් වරක් කිරුල දිනාගෙන ඇත.

ඔස්ට්‍රේලියාවේ අන්තර්ජාල සබඳතා වේගය 10.1Mbps ලෙස වාර්තා කොට ඇති අතර ලංකාවේ එම වේගය 7.3Mbps  කි. ඒ අනුව ලංකාවේ අන්තර්ජාල වේගය ඕස්ට්‍රේලියාවේ වේගයට වඩා වැඩියයි කියමින් මෝඩ ආතල් දෙන්නේ ඩේලි මිරර් වාර්තාකරුවාට ඉංග්‍රීසි පුලුවන් වුනාට 10.1>7.3 යන සරල ගණිතමය සිද්ධාන්තය පිලිබඳව ඇති අනවබෝදය නිසා විය හැකි බවට අනුමාන කරන්නට පුලුවන. 

එම දත්ත වගුවට දකුණින් ඇති Figure 21 දත්ත වගුවේ නම්, ලංකාව ඔස්ට්‍රේලියාවට වඩා ඉහලින් සිටී. එහෙත් එම වගුවේ පෙන්වන්නේ අන්තර්ජාල වේගය නොව, 4Mbps සාමාන්‍ය වේගයකින් යුතු බ්‍රෝඩ්බෑන්ඩ් අන්තර්ජාල සේවා රටෙහි අන්තර්ජාල සේවා පාරිභෝගිකයින් අතර පැතිරී ඇති ප්‍රතිශතයයි (Mbps Broadband Adoption (IPv4) by APAC Country/Region). ඒ අනුව ලංකාවේ අන්තර්ජාල පාරිභෝගිකයින් අතරින් 88% දෙනෙකු අවම 4Mbps වේගයෙන් යුතු අන්තර්ජාල සබඳතා භාවිතා කරන අතර අතිවිශාල රටක් (මහාද්වීපයක් වන ) ඔස්ට්‍රේලියාවේ අවම 4Mbps වේගය ඇති අන්තර්ජාල සේවා පහසුකම් ලබාගෙන ඇත්තේ 76% ප්‍රතිශතයක් පමණි.

මෙවැනි වාර්තා පලකරමින් පාසැල් දරුවන් පවා රවටන, එහෙත් මහා ලොකුවට ජනමාධ්‍ය නිදහස ගැන, ජනමාධ්‍යවල වගකීම් ගැන කයිවාරු ගසන , සටනට අර අඳින  මාධ්‍ය ඔස්තාර්ලාගේ වගකීම් විරහිත මාධ්‍යකරණය සැබැවින්ම කණගාටුවට කරුණකි.

ඔබගේ දැනුම සඳහා......

ලෝකයේ වේගවත්ම අන්තර්ජාල සබඳතා ඇති රටවල් 10ය

ඇමරිකාවේ වේගවත්ම අන්තර්ජාල සබඳතා ඇති ප්‍රාන්ත 10ය



ආසියාවේ වේගවත්ම අන්තර්ජාල සබඳතා ඇති රටවල් 15ය



යුරෝපයේ වේගවත්ම අන්තර්ජාල සබඳතා ඇති රටවල් 20
















__________________________________________________________________________


Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Sunday, 19 March 2017

World Press Photo 2017 ජයග්‍රාහී ඡායාරූප ගත් කැමරා මාදිලි






















ලෝක ජනමාධ්‍ය ඡායරූපකරණ ආයතනය (World Press Photo Foundation) විසින් 60වන වරටත් සංවිධානය කල 2017 World Press Photo Contest තරඟාවලියේ ජයග්‍රාහකයින් මේවන විට නම්කොට ඇති අතර, ප්‍රථම ස්ථානය ඇසෝසියේටඩ් ප්‍රෙස් ඡායාරූපශිල්පී බර්හන් ඔස්බිලිසි විසින් දිනා ගත්තා. පහත දැක්වෙන එම ඡායාරූපය ගනු ලැබුවේ තුර්කියේ අන්කාරා නුවර සිදුවූ ඝාතනයක් අතරතුරයි.

2016 දෙසැම්බර් 19 වැනිදා මෙලෙස ඝාතනයට ලක්වූයේ තුර්කියේ රුසියානු තානාපති අන්ද්‍රේ කාර්ලෝෆ් මහතාය. තුර්කි ජාතික පොලිස් නිළධාරියෙකු, රුසියාව, සිරියාවේ එල්ල කරන ප්‍රහාරවලින් සිදුවන ජනඝාතනයට විරෝධය පලකරන්නට මෙම ඝාතනය සිදුකල බව පැවසෙනවා. මේ ඡායාරූපයේ දැක්වෙන්නේ රුසියානු තානාපතිවරයාට වෙඩිතැබූ තරුණ පොලිස් නිළධාරියා එම මොහොතේ එතැන බියෙන් මුසපත්ව සිටි ජනතාවට කෑගසා සිය ඝාතනයට හේතුව ප්‍රකාශකරන අන්දමයි.

    
රටවල් 126ක ඡායාරූපශිල්පීන් 5034දෙනෙකු ඉදිරිපත්කල ජනමාධ්‍ය ඡායාරූප 80,408 කාණ්ඩ 8කින් ජයග්‍රාහකයින් තෝරාගෙන තිබෙනවා. මෙම ජයග්‍රාහී ඡායාරූපශිල්පීන් භාවිතකල කැමරාමාදිලි පිලිබඳ වාර්තාවක් පෙටාපික්සල් ඡායාරූපකරණ බ්ලොගයේ සටහන්ව තිබී අපට හමුවුනා.

2017 World Press Photo Contest ජයග්‍රහණ අත්කරදුන් කැමරා සන්නාම හා මාදිලි



වැඩිම ජයග්‍රහණ සංඛ්‍යාවක් ලබාගෙන ඇත්තේ කැනන් කැමරා භාවිතාකරන ශිල්පීන් වන අතර දෙවන හා තුන්වන ස්ථාන නිකොන් හා ෆුජිෆිල්ම් දිනාගෙන තිබෙනවා. කෙසේ වෙතත් මෙම වැඩි ජයග්‍රහණවලට හේතුව කැනන් කැමරා වත තත්වය නිකොන් කැමරාවලට වඩා උසස් නිසා නොව, දැනට ලොව වැඩියෙන්ම ජනප්‍රිය වෘත්තීය මට්ටමේ DSLR කැමරා සන්නාමය කැනන් වීම නිසයි.

ජයග්‍රාහී ජනමාධ්‍ය කැමරාශිල්පීන් භාවිතාකල කැමරා මාදිලි


















__________________________________________________________________________

Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________
Related Posts Plugin for WordPress, Blogger...