Related Posts Plugin for WordPress, Blogger...

Monday, 31 July 2017

ALIENS & EXTRA TERRESTRIALS : අපට වඩා නොදියුණු පිටසක්වල ශිෂ්ඨාචාරයක් හමුවුනොත් අප කුමක් කලයුතුද?



2013දී තිරගත වුනු ස්ටාර්-ට්‍රෙක් : ඉන්ටු ද ඩාර්ක්නස් චිත්‍රපටයේ ආරම්භයේදී කපිතාන් ජේම්ස් ටී කර්ක් හා ඔහුගේ සහයක කමාන්ඩර් ස්පොක්, USS එන්ටර්ප්‍රයිස් යානයේ කපිතාන්  හා ප්‍රධාන නිළධාරී තනතුරුවලින් පහ කරන්නේ ඔවුන් අභ්‍යවකාශයේ සැරිසරන සෑම ස්ටාර්ෆ්ලීට් යානයකම නිළධාරීන් දැඩිලෙස පිලිපැදිය යුතු ප්‍රයිම් ඩිරෙක්ටිව් නම් විධාන මාලාව කඩකල නිසාය. 

ප්‍රයිම් ඩිරෙක්ටිව් විධාන මාලාව, ඒවනවිට (ක්‍රි.ව 2200 පමණ කාලය) දියුණු තාරකා සංචරණ තාක්ෂණය සහිත ග්‍රහලෝක ගණනාවක් එක්ව බිහිකරගත්  United Federation of Planets නම් අන්තර්-ග්‍රහලෝක සංධානයේ විශ්ව ගවේෂණ කටයුතුවලදී පිලිපැදිය යුතු නීති මාලාවක්. 

Prime Directive නීතිමාලාවට අනුව ෆෙඩරේෂණයේ යානා, තාක්ෂණයෙන් නොදියුණු ශිෂ්ඨාචාර හා සබඳකම් පැවැත්වීම ඉතාමත් ප්‍රවේසමෙන් සිදුකල යුතු අතර ෆෙඩරේෂණයේ අධිතාක්ෂණික උපකරණ, අවිආයුධ හා යානා ඔවුන්ට දර්ශණය කරවීම පවා තහනම් වනවා. මෙයට හේතුව මෙවැනි නොදියුණු ශිෂ්ඨාචාරවල සංවර්ධනය ඔවුනටම ආවේණික ක්‍රමවලට, ස්වාභාවික පරිනාමය ක්‍රියාවලියක් මගින් සිදුවිය යුතුබවට තීරණය කොට තිබෙන නිසා. 

කපිතාන් කර්ක් මෙම නීතිය නිඹුරු නම් නොදියුණු මානව රූපී ගෝත්‍රිකයින් වසන ග්‍රහලෝකයකදී බිඳ දමන්නේ එම ග්‍රහලෝකය විනාශකල හැකි තරමේ ප්‍රභල ගිණිකඳු පිපිරීමක් USS එන්ටර්ප්‍රයිස් යානය සතුවූ සුපිරි තාක්ෂණික උපකරණයකින් වලක්වමින්. ඔහු එසේ සිදුකරන්නේ එම ග්‍රහලෝකයේ ගවේෂණයකිරීමේදි අණතුරකට පත්වී ගිණිකඳු පිපිරීමෙන් මරණයට පත්විය හැකි කමාන්ඩර් ස්පොක් බේරා ගැනීම සඳහායි. එමෙන්ම එම මෙහෙයුමේදී මේ නොදියුණු ගෝත්‍රිකයින්ට USS එන්ටර්ප්‍රයිස් යානයද දර්ශනය වන අතර එම සිද්ධියේ අවසන් රූපරාමුවේදී එම ගෝත්‍රිකයින් USS එන්ටර්ප්‍රයිස් යානාවේ රූපයක් ඇඳ එය  දෙවියෙකු මෙන් වන්දනා කරන ආකාරය පෙන්වනවා.

අනාගතයේ යම් දිනෙක, තාරකා අතර සංචරණයකල හැකි තාක්ෂණයක් දියුණුකර ගත් අවධියක, පිටසක්වල ග්‍රහලෝකයක දියුණු මනසකින් යුතු ශිෂ්ඨාචාරයක් ඇති බව තහවුරුකරගත් විය දියුණු මානවයින් වන අප කෙසේ ක්‍රියාකල යුතුද?

මේ වනවිටත් නාසා ආයතනය "planetary protection rules" හෙවත් ග්‍රහලෝක ආරක්ෂණ රීතිමාලාවක් ක්‍රියාත්මක කරනවා. ඒ, මානවයින් වෙනත් ග්‍රහලෝකවලට යවන යානාවල හෝ යවන ගවේෂකයින් ගෙන යන යානා හා උපකරණවල දැවටී පෘථිවියේ ක්ෂුද්‍රජීවීන් එම ග්‍රහලෝකවලට පැන ඒවා පෘථිවි ජීවයෙන් කිලිටිකිරීම (contamination) වැලැක්වීමටයි. ඒ අනුව වෙනත් ග්‍රහලොවකට ඇතුලුවන නාසා යානා හා උපකරණ දැඩි ජීවාණුහරණ ක්‍රියාවලියකට බඳුන් කරනවා.

මෑතකදී සෙනසුරු හා සෙනසුරුගේ චන්ද්‍රයන් ගවේෂණය කල කැසිනි යානය, ජීවය හටගැනීමට හෝ පවත්වාගෙන යාමට හැකි පරිසරයක් ඇති සෙනසුරුගේ චන්ද්‍රයන් වන එන්සිලේඩස් හෝ ටයිටන් මතට පතිතවීම වැලැක්වීම සඳහා වායු ග්‍රහයෙක් වන සෙනසුරු මතට කඩාවැට්ටවීමට සැලසුම් කොට තිබෙනවා.

අනාගතයේදී තාක්ෂණයෙන් නොදියුණු ශිෂ්ඨාචාර සොයාගැනීමේ ගවේෂණ සිදුකරන කාලයකදී, එම ග්‍රහලෝකවල නොදියුණු ශිෂ්ඨාචාර ආරක්ෂාකිරීම සඳහා මෙවැනිම රීතිමාලාවන් නිර්මාණය වනු ඇති. පෘථිවියේ අපට ඇති අතීත උදාහරණවලට අනුව තාක්ෂණයෙන් දියුණු යුරෝපීය ශිෂ්ඨාචාර හා නොදියුණු ආසියාතික-අප්‍රිකා-ඇමරිකා ශිෂ්ඨාචාරවල හමුවීම් වලදී එම හමුවීම් නොදියුණු ශිෂ්ඨාචාරවල විනාශයට හෝ ඒවා දැඩි වෙනස්වීම් වලට හේතුවුනා. ඔවුන්ගේ සාම්ප්‍රදායික ජීවන රටා, ඇදහිලි ක්‍රම, සංස්කෘතික ලක්ෂණ බොහෝසෙයින් නැතිවී ගිය අතර යුරෝපීයයන් ගෙන ආ, ස්වදේශිකයින්ට ප්‍රතිශක්තිය නැති ලෙඩ රෝග නිසා ලක්ෂ ගණනින් මිය ගියා. උතුරු ඇමරිකාවේ රතු ඉන්දියන් ශිෂ්ඨාචාර, ඔස්ට්‍රේලියාවේ ඇබොරිජිනි ශිෂ්ඨාචාර හා මධ්‍යම හා දකුණු ඇමරිකාවේ ඉන්කා ශිෂ්ඨාචාරය මෙලෙස විනාශවුනු ශිෂ්ඨාචාර වලට  හොඳ උදාහරණ වනවා.


__________________________________________________________________________
Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Sunday, 30 July 2017

SUPER PHYSICS : මිනිස් සිතට භෞතික ලෝකය පාලනය කල හැකි දැයි බැලීමට ක්වන්ටම් පරීක්ෂණයක් යෝජනාවේ.


බෞද්ධයන් වන අප; බුදුන් වහන්සේ, රහතන් වහන්සේ වැනි සිත ඉතා ඉහලට දියුණු කරගත් උතුමන් සිදුකල පෙලහැර පෑම් ගැන අසා ඇත. මේ සමහර පෙලහරවලදී සිතෙන් භෞතික වස්තූන් පාලනය කිරීම, වෙනස් කිරීම ආදිය සිදුකල බවට විස්තර පවතී. බුදුන් හා මහ රහතුන් සෘද්ධියෙන් වැඩම කරවීම හෙවත් භෞතික වස්තුවක්වූ තම සිරුර, භෞතික විද්‍යාත්මක නියම වලට පටහැනියයි පෙනෙන ආකාරයට අහසින් ගෙන යාම, ක්ෂණයකින් එක් තැනට සිට තවත් තැනකට ගෙනයාම ආදියද එවැනිම දියුණු සිතකින් භෞතික ලෝකයට සිදුකරන බලපෑම් ලෙස සැලකිය හැකිය. කිතුනු පුරාවෘත්ත වලද ජේසුතුමන් ගලීල මුහුදේ ජලය මත ඇවිදීම ආදී ප්‍රාතිහාර්යයන් ගැන සවිස්තරව දක්වා ඇත. මේ සියලු ප්‍රාතිහාර්ය හා පෙලහැරපෑම් වල පොදු ලක්ෂණය නම් චෛතිසික ශක්තිය හෙවත් සිතුවිලි බලය නම් අභෞතික මානසික ක්‍රියාවලිය මගින් භෞතික ලෝකයේ වස්තූන් මෙහෙයවීමයි.

භෞතික විද්‍යාව ගත්කල ක්වන්ටම් විද්‍යාවේ ක්වන්ටම් එන්ටැංගල්මන්ට් හෙවත් ක්වන්ටම් ආංශු දෙකක් අතර ඇති අන්‍යෝන්‍ය පැටලීම විද්‍යාඥයින්ට තවමත් විස්තර කල නොහැකි, එහෙත් පර්යේෂණාත්මකව තහවුරුකොට ඇති සංසිද්ධියකි. ඇල්බර්ට් අයින්ස්ටයින් විසින් "spooky action at a distance" හෙවත් ඈතකදී සිදුවන අමුතු ක්‍රියාව ලෙස හැඳින්වූ ක්වන්ටම් එන්ටැංග්ල්මන්ට් සංසිද්ධියේදී සිදුවන්නේ ක්වන්ටම් අංශු දෙකක් එකිනෙකාට කොතරම් ඈතින් තිබුණත් එක් අංශුවකට සිදුවනදේ අනෙක් අංශුවට දැනීම හෙවත් ඒ අංශුවට බලපෑම් කිරීමයි.

ක්වන්ටම් එන්ටැංගල්මන්ට් සංසිද්ධිය විද්‍යාත්මකව ඔප්පු කිරීම සඳහා 1964දී භෞතික විද්‍යාඥ ජෝන් බෙල් සුප්‍රකට පරීක්ෂණයක් යෝජනා කලා. ද බෙල් ටෙස්ට් ඔෆ් කවන්ටම් එන්ටැංගල්මන්ට් ලෙස හඳුන්වන මේ පරීක්ෂණයේදී පැටලුනු ක්වන්ටම් අංශු දෙකකින් එකක් A නම් ස්ථානයටද, අනෙක B නම් ස්ථානයටද යවන අතර  එම ස්ථාන දෙකේ ඇති උපකරණ දෙකක් මගින් එම අංශු දෙකෙහි යම් භෞතික තත්වයක් සටහන් කර ගනී. සටහන් කර ගන්නේ කුමන භෞතික තත්වයද යන්න තීරණය වන්නේ සම්පූණයෙන්ම අහඹු ලෙස වන අතර උපකරණ දෙකෙහි වෙනස් භෞතික තවයන් දෙකක් මනිනු ලැබේ. ලොව පුරා විද්‍යාගාරවල සිදුකරන ලද මේ බෙල් පරීක්ෂණවලදී ක්වන්ටම් එන්ටැංගල්මන්ට් සංසිද්ධිය තහවුරු වී ඇති අතර කොතරම් අහඹුලෙස භෞතික තත්වයන් තෝරාගත්තද එක් අංශුවක් මගින් අනෙක් අංශුව මත සිදුකරන බල පෑම තහවුරුවී ඇත.

කැනේඩියානු භෞතික විද්‍යාඥයෙක් වන ලූෂන් හාඩි, මිනිස් සිතට මෙම ක්වන්ටම් එන්ටැංගල්මන්ට් සිද්ධිය පාලනය කර හැකිද යන්න සොයා බැලීමට වෙනස් ආකාරයක බෙල් පරීක්ෂණයක් යෝජනා කරනවා. මෙහිදී පැටලුනු ක්වන්ටම් අංශු දෙකෙහි මැනගත යුතු භෞතික තත්වය කුමක් දැයි තෝරාගැනීමට මිනිසුන් යොදාගැනීමට අදහස් කරනවා. ඒ අනුව ඔවුන් සිය චිත්තබලය යොදා ක්වන්ටම් අංශුවලින් ගතයුතු භෞතික මානය කුමක්දැයි තීරණය කිරීම මගින් ක්වන්ටම් එන්ටැංගල්මන්ට් සංසිද්ධිය බිඳදැමීමට හැකිදැයි සොයා බැලීම මේ පරීක්ෂණයේ අරමුණ බව ලූෂන් හාඩි පවසනවා. එසේ පැටලුනු ක්වන්ටම් අංශු දෙකක හැසිරීම මිනිස් සිතට වෙනස් කල හැකිනම්, ඉතාමත් දියුණු තත්වයට පත් මිනිස් සිතකට භෞතික ලෝකය පාලන කල හැකි බවට තීරණය කල හැකිවනවා.


__________________________________________________________________________
Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

FUTURE : අපට හමුවන පිටසක්වල බුද්ධිය ඉලෙක්ට්‍රොණික බුද්ධියක් වීමට බොහෝ ඉඩ තිබේ!

සක්වල සැරිසරන්නට තරම් තාක්ෂණය දියුණුකරගත් බුද්ධිමත් ජීවයක් විශ්වයේ ඇතිනම් එය ඉලෙක්ට්‍රොණික බුද්ධියක් / කෘත්‍රිම බුද්ධියක් වීමට බොහෝ දුරට ඉඩ තිබෙනවා. මේ අනාවැකිය සිදුකරන්නේ තාරකා භෞතික විද්‍යාඥයෙකු වන කේම්බ්‍රිජ් විශ්වවිද්‍යාලයේ මහාචාර්ය    මාටින් රීස් ය. රාජකීය තාරකාවිද්‍යාඥවරයෙකු (royal astronomer) ලෙස රැජින ගෙන් වරම්ලබා සිටින මාටින් රීස් තාරකා විද්‍යාව පිලිබඳ ලොව ප්‍රමුඛපෙලේ විද්වතෙකි.

මාටින් රීස් අනුමාන කරන අන්දමට මානව ශිෂ්ඨාචාරයේ වුවද ජෛවමය අවස්ථාව තව වසර දෙතුන්-සියයකින් අවසන් වනු ඇති. එනම් ඒ වනවිට කෘත්‍රිම බුද්ධිය සෑම අතින්ම මානවයන්ට වඩා ඉහල තලයකට පැමිණ ඇති නිසා, විශ්ව ගවේෂණයට වඩාත් සුදුසු වන්නේ සදාකාලික ජීවයක් අත්කර ගන්නා කෘත්‍රිම බුද්ධි රොබෝවන්ය. 

 ඉතා පහසුවෙන් මරණයට පත්කල හැකි, කෙටි ජීවිත කාලයක් ඇති ජීවී මානවයින්ට වඩා අපගේ රොබෝ අනුප්‍රාප්තිකයින් පෘථිවියෙන් ඈත විශ්ව ගවේෂණයට යෙදවෙනු ඇත්තේ රොබෝවකට සිය ජීවය පවත්වාගෙන යාමට අවශ්‍ය සාධක, ජීවී මානවයින්ට වඩා ඉතා අවම බැවිනි. ගුරුත්ව රහිත, රික්තයේ රොබෝ යන්ත්‍රයකට බොහෝකල් ක්‍රියාත්මක විය හැකි නමුත් ජීවියෙකුට එය තත්පර කිහිපයකට සීමා වේ. පෘථිවියෙන් විශ්වය වෙත ගමන් කරන විශ්ව ගවේෂකයින් කෘත්‍රිම බුද්ධි රොබෝ යන්ත්‍ර වීමට බොහෝ ඉඩකඩ ඇත්තේ මේ නිසාය.

දියුණු ජීවීන් ජනිතවූ විශ්වයේ වෙනත් ග්‍රහලෝකයක වුවද මෙම සංසිද්ධිය මෙලෙසම විය හැකි අතර ඔවුන්ගේද අනුප්‍රාප්තිකයන් වන ඉලෙක්ට්‍රොණික පිටසක්වලයින් විශ්වය ගවේෂණය කරනු ඇත. ඒ අනුව නුදුරු අනාගතයේ යම් දිනයක පෘථිවිය කරා පිටසක්වල යානාවක් පැමිණෙන්නේ නම් එහි සිටින පිටසක්වල ගගනගාමීන් ඉලෙක්ට්‍රොණික ජීවීන් වීමට හොඳටම ඉඩකඩ තිබෙනවා.






__________________________________________________________________________
Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Saturday, 29 July 2017

POLITICS : හම්බන්තොට චීනාට දීම පිලිබඳ මගේ සතපහ

හම්බන්තොට වරාය චීනයට බදුදීම පිලිබඳව ගිවිසුම අද අත්සන් කරන ලද බව වාර්තාවිය. මේ ගිවිසුම පිලිබඳව රටම කතාවූ ආසන්නම විරෝධය වූයේ ඛණිජතෙල් සේවකයින්ගේ වර්ජනයයි. හම්බන්තොට තෙල් ටැංකි බදුදීම පිලිබඳව මොකක්දෝ කතාවක් වර්ජන ලොක්කන් කියනු ඇසිනි. හෙට අනිද්දා වනවිට හමුදාවටද, පොලීසියටද, ගුවන්යානා වලටද, විදුලිබලේටද තෙල් නැතිවනු ඇතැයි වහසිබස් දොඩවනුද ඇසුනි. කෙසේ වෙතත් වර්ජනයට රජය මුහුණදුන් ආකාරය ප්‍රශස්තය. යුධ හමුදාව හා ගුවන් හමුදාව යොදාගෙන වර්ජකයින්ගේ දළ බිඳීමට රජය සමත්වූ අතර දොස්තරලා මෙන්ම ජනපති හා සාකච්චාව යන අමුඩයට මුවාවී වර්ජනය අවසන් කලේ නැතිනම් අම්බානක ගුටි කෑම සහතිකවී තිබුණි.

වරාය විකුණනවා නොව බදු දෙන බව රජය කියයි. ඒකාබද්දේ. පෙරෙට්ටෝ හා ජවිපේට මෙන්ම බංකොලොත් වෘත්තිය සමිති නඩවලටද ඒක විකිණීමකි. එය සාමාන්‍ය දෙයකි. තමන්ට වාසි ලෙස ඔවුන් සෑම දෙයක්ම අර්ථකතනය කර ගනිති. කෙසේ වෙතත් රජය අඩිය ආපස්සට නොගත්තේය. එය සැබැවින්ම හොඳ තීන්දුවකි. විරුද්ධ පාක්ෂිකයින් හා සමිති කාරයින් කියනා ආකාරය රටක් ආණ්ඩුවක් ගෙන යන්නටනම් චන්ද තියා ආණ්ඩු පත් කරගන්නට ඕනෑ නැත. 

වර්ජන, විරෝධතා හා කළකෝලහාල පිටුපස විදෙස් බුද්ධි අංශයක් සිටින බව ලංකාවේ බුද්ධි අංශ අණතුරු අඟවා තිබේ. සහසුද්දෙන්ම එය ඉන්දියාවේ රෝ ඔත්තු සේවය විය යුතුය. රෝ ඔත්තු සේවය කෙරුවාව නිසා පෝෂණය වුනු කොටි සංවිධානය අතින්  ඉන්දියානු හමුදාවේ IPKF  සාමසාධක බළකායේ 1200ක් පමණ මිය ගොස් දහස්ගණනක් තුවාලවිය. රාජීව් ගාන්ධි ජීවිතයෙන් වන්දි ගෙව්වේය. ඒ ලේ සළකුණු සියල්ල නොමැකිය ලෙස හැකි ලෙස රෝ ගිණුමේ සටහන්වී තිබේ. වෙනත් රටවල අර්බුද ඇතිකොට ඉන්දියානු භූ-දේශපාලනික අරමුණු ඉටුකර ගැනීමට යාමේ රෝ උපායමාර්ග දැඩි විවේචනයට බඳුන්වූයේත්, ප්‍රභාකරණ් වනසන්නට අවසන් මෙහෙයුම් වලදී ඉන්දියාව කරබාගෙන, හොරෙන් උදව් කරමින් සිටියේත් මේ පාඩම නිසාය. 

යලිත් රෝ නැටුම් එලියට ඒම එතරම් හොඳ නැත. ඒත් ලංකාවේ මෙහෙයුම් කරන්නේ රෝ පමණක් නොවේ. අති විශාල චින ආයෝජන නිසා නිසැකයෙන්ම චීන විදෙස් ඔත්තුසේවය වන MSS (Ministry of State Security) ඒජන්සියද ලංකාවේ දැඩි ලෙස ක්‍රියාත්මක වන බවත් ඔවුන්, චීන ආයෝජන හා චීනයට ලංකාව තුල ඇති ආර්ථික හා දේශපාලනික බලපෑම් කිරීමේ හැකියාව ආරක්ෂාකරගැනීමටත් කැපවනු ඇති බව විශ්වාසය. MSS ලංකාවේ රෝ ඒජන්තයින්, ඔත්තුකරුවන් හා ඔවුන් ලංකාවේ දේශපාලන බලවේග සමග ඇති සම්බන්ධතා පිලිබඳව ඇස ගසාගෙන සිටින බවට කිසිදු සැකයක් නැත.අතර එනිසාම රෝ ඔත්තු සේවයට 1980-90 ගණන්වල ලංකාවේ සිදුකල භූමිකාව කල නොහැකිවනු ඇත. ලංකාවේ බුද්ධි අංශවලට රෝ ඔත්තුසේවයේ අලුත් කුමණ්ත්‍රණ පිලිබඳ තොරතුරු හා තහවුරුකිරීම් චීන ඔත්තුසේවය හරහා ලැබෙන බවට සැකයක් නැත.

හම්බන්තොට වරාය චීනයට ලබාදීම මාගේ කියැවීමේ හැටියට කල යුතු හා කල හැකි එකම දෙයයි. ඩොලර් බිලියන ගණනක ණය කන්දක් මත ගොඩනැගූ, එහෙත් භාවිතය අතින් ඉතා පහල අඩියක ඇති මෙම වරායට නැව් ගෙන්නා ගනීමට මෙන්ම එම වරාය ආශ්‍රිතව ඇති කර්මාණ්ත පුරයට ආයෝජන ගෙන්නා ගැනීමටත් මේ තීන්දුව හේතුවනු ඇත. ලොව පුරාම විහිදෙමින්,   ලොව පුරා ආයෝජනය කරමින් වේගයෙන් විශාල බහුජාතික සමාගම් බවට පත්වෙමින් ඇති චීන සමාගම් වල සැපයුම් ජාලයේ එක් වැදගත් කේන්ද්‍රයක් බවට ලංකාව පත්කර ගැනීමට මේ ගිවිසුම ඉවහල් වනු ඇත.

ඉතිහසය පුරාවටම ඌණ සංවර්ධිත, විරැකියාව බහුල හම්බන්තොට, මොණරාගල ආදී ප්‍රදේශවල ගැමි තරුණ තරුණියන් හට රැකියා අවස්ථා හා හොඳ ජීවන තත්වයක් පිලිබඳ බලාපොරොත්තු හම්බන්තොට වරාය හා කාර්මික පුරවරය සක්‍රියවීමෙන් සපල වනු ඇත. එසේ වීමට නම් වරායට නැව් හා කාර්මික පුරවරයට ආයෝජන පැමිණිය යුතුය. එසේ කිරීමට හොඳම උපායමාර්ගය දැන් රජය විසින් ගෙන තිබේ. 

මේ සාධනීය පියවර වලට වෘත්තීය සමිති ඩයිනසෝරයන් හා උන් නටවන ඒකාබද්ධ-පෙරටුගාමී-ජවිපෙ රූකඩ නටවන්නන් විරුද්ධ වන්නේ රටට ඇති ආදරයට නම් නොවේ. දහසකුත් එකක් බාධක මැද රජය මේ පණින්නට (හෝ රට පන්නවන්නට ) තැත් කරන ආර්ථික පිම්ම සාර්ථක වුවහොත් ඔය නඩයටම යන එන මං නැතිවන බව ඔවුන් හොඳින්ම දන්නා දෙයකි. අතමිට මුදල් ගැවසෙන, කැමති ආකාරයකට ජීවත්විය හැකි රැකියාවක් ලැබී තෘප්තිමත් වන තරුණ පරපුරක් රටේ දුශ්කර පෙදෙස්වල බිහිවුව හොත් ඔය බුරුත්තටම පෝස්ටරයක් අලවාගන්නට, කොළ බෙදන්නට, විරෝධතාවලට දක්කවන්නට පිරිසක් නැති වන බව දකින ඔවුන් දැඩි පීඩනයකට පත්වී ඇත. බොරු මුසාවාද හැරෙන්නට නූතන ලෝකයට සරිලන ආර්ථික දැක්මක් ඇති ජවිපෙට හා පෙරටුගාමීන්ට වහලුන් නොමැතිව ඉදිරිගමණක් නැත. උගුර ලේ රහ වනතෙක් මේ මොර ගාන්නේ, මැරෙන්නට හදන්නේ ඒ නිසාය. 

රාජපක්ෂ නඩයේ එකම බලාපොරොත්තුව කෙසේ හෝ නැවත රජවී නවත්තපු තැන සිට නැවතත් කාගෙන කාගෙන යාමයි. ඒ සඳහා බොරු චීන විරෝධයක් පෙන්වූවද මේ වන විටත් බැසිල් හරහා චීනයට කළබල නොවන ලෙසත්, තම විරෝධය ප්‍රතිපත්තිමය විරෝදයක් නොව දේශපාලන අවස්ථාවාදයක් පමණක් බවටත් සහතිකදී පණිවුඩ යවා ඇතුවාට සැක නැත.

එමෙන්ම ගිවිසුමට විරුද්ධවන ඇත්තන් පවසන ලංකාව තුල චීනය බලවත්වීමේ භූ-දේශපාලනික අණතුරක් ගැන දොඩවයි. චීනය බලවත් වී ඇත්තේ ලංකාව තුල පමණක්ද?


ඇමරිකාවේ අධිතාක්ෂණික, කාර්මික හා වෙනත් සමාගම් බොහොමයක සපයුම් දාමය හා නිශ්පාදන කේන්ද්‍ර ඇත්තේ ඇමරිකාවේ නොව චීනයේය. ඇමරිකාවේ විශාලම සුපිරි වෙළඳසැල් ජාලය වන වොල්-මාර්ට් ජාලය මගින් විකුණන භාණ්ඩවලින් 70%ක්ම චීනයේ නිෂ්පාදිත ඒවා බවට වාර්තා වී ඇත. එමෙන්ම 2016 වනවිට චීන සමාගම් විසින් ඇමරිකාවේ සිදුකොට ඇති සෘජු ආයෝජන (foreign direct investments) වල වටිනාකම ඩොලර් බිලියන 300ක් බවට වාර්තාවී තිබෙනවා.

ඒ අනුව ඇමරිකාව ඩොලර් ට්‍රිලියන 1.2ක් නැතිනම් ඩොලර් බිලියන 1200ක් ණයදී, ඇමරිකාවේ මිනිස්සු කන, බොන, අඳින පලඳින, පාවිච්චිකරන බඩුබාහිරාදියෙන් 70%ක් හදන, ඇමරිකාවේ දේපොල හා සමාගම් වල ඩොලර් බිලියන 300ක් ආයෝජනය කොට ඇති චීනයට ඇමරිකාවට කල හැකි භූ-දේශපාලනික බලපෑම කොතරම් දැයි සිතාගන්නට පුලුවන්ද? ඇමරිකාව තාමත් ලෝකයේ යුධ, දේශපාලනික හා නව තාක්ෂණ සුපිරිබලවතා වුවද ආර්ථික බලවතා වන්නේ චීනයයි.

මෙය තේරුම් ගන්නට නොහැකිව වර්ජනය කරන මෝඩයින්ගේ සිත්වලට මරික්කාර් ඇතුලුවීමේ වරදක් දකින්නට පුලුවන්ද?



__________________________________________________________________________
Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

INNOVATIONS : ශල්‍යකර්මවල තුවාල අලවන්න සුපර්-ග්ලූ එකක්!



ශල්‍ය වෛද්‍යවරුන් ශල්‍යකර්මවලදී මුහුණදෙන ප්‍රධාන ගැටලුවක් වන්නේ කැපුම් තුවාල නිසිපරිදි වසා දැමීමේ සාර්ථක හා ආරක්ෂිත ක්‍රමයක් නොමැතිවීමයි. මැහුම් දැමීම කාලය ගතවන, ඉතා සූක්ෂ්මව සිදුකල යුතු ක්‍රියාවක්. සිරුර අභ්‍යන්තරයේ මැහුම් දැමීමට ගතවන කාලය අතරතුර රෝගියා සිහි මූර්ජිතව තබාගත යුතු අතර මැහුම් දමන කාලය අතරතුරද රුධිරය වහනය වෙමින් එක් රැස් වනවා. මෙම එක් රස් වන රුධිරය නිසිපරිදි ඉවත්කිරීමද සිදුකල යුතුයි.

අභ්‍යන්තර හා බාහිර තුවාල ඉක්මණින් වසා දැමීමට හොඳම ක්‍රමය සුපර් ග්ලූ හෙවත් ක්ෂණිකව ඇලවෙන ගම් වුවත්, අද භාවිතාවන සුපර්-ග්ලූ සයනයිඩ් සංයෝගයක් අඩංගු විෂ ද්‍රව්‍යයක් නිසා භාවිතා කිරීමට නොහැකියි. මේ සඳහා විසඳුමක් ලෙස ඇමරිකානු විද්‍යාඥයින් පිරිසක් ස්වභාවික සුපර් ග්ලූ විශේෂයක් නිපදවා තිබෙනවා.

මෙම ජෛව-සුපිරි ග්ලූ වර්ගය නිපදවා ඇත්තේ යුරෝපයේ වෙසෙන නම් හම්බෙල්ලන් විශේෂයක් (slug) ශ්‍රාවය කරන සෙවල වලින්. මෙම සෙවල ආධාරයෙන් හම්බෙල්ලන් තමන් සිටින පෘෂ්ඨය හා තදින් බැඳී සිටින අතර විලෝපිකයින්ට ඔවුන් ආහාරයට ගැනීමට අපහසු වෙනවා. මෙම සෙවල ජලයේ දිය නොවන අතර ඕනෑම පෘෂ්ඨයක ඇලවීම සිදුවනා. එමෙන්ම ජීවී ද්‍රව්‍යයන් නිසා වස-විසෙන් තොරයි.

මේ ස්වභාවික ගම් වර්ගය ආධාරයෙන් හාවර්ඩ් විශ්වවිද්‍යාලයේ පර්යේෂකයින් විසින් සංයෝග කරන ලද ජෛව-සුපිරි ග්ලූවර්ගය තෙත සහිත ඔනෑම මතුපිටක ඇලවෙනවා. එනිසා ශල්‍යකර්මවලදී කැපුම් තුවාල එකතුකිරීමට, සම මතුපිට ගැඹුරු කැපුම් හා කිරීමටද යොදාගත හැකි බවයි ඔවුන් පවසන්නේ.



__________________________________________________________________________
Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

ELECTRIC CAR TECHNOLOGY : ටෙල්සා මොඩ්ල් 3 ගැණුම්කරුවන්ට නිකුත්කිරීම ඇරඹේ

ඊයේ සවස (28වැනි සිකුරාදා) කැලිෆෝනියාවේ ෆ්‍රෙමොන්ට් නුවර, ටෙස්ලා කර්මාණ්තශාලාවේ පැවැති උත්සවයකදී ටෙස්ලා සමාගමේ සභාපති හා ප්‍රධාන විධායක ඊලෝන් මස්ක්, මුල්ම ගැණුම්කරුවන් 30 දෙනාට ටෙස්ලා මොඩල් 3 මාදිලියේ වාහන වල යතුරු ලබා දුන්නා. ටෙස්ලා සමාගම මීට පෙර වෙළඳපොලට ඉදිරිපත්කල මොඩල් S හා මොඩල් X මාදිලිවලට වඩා බෙහෙවින් මිලෙන් අඩු මොඩල් 3 මාදිලියේ මිල ඇමරිකානු ඩොලර් 35,000 සිට 44,000 දක්වා වනවා.

ඩොලර් 35,000කට මිළදීගත හැකි මාදිලිය එක් ආරෝපණයකින් කිලෝමීටර් 350ක් ධාවනය කල හැකි අතර වඩා විශාල බැටරියක් ඇති ඩොලර් 44,000කට මිළකොට ඇති මාදිලිය එක් ආරෝපණයකදී කිලෝමීටර් 500ක් ධාවනය කල හැකි වනවා.



මේ වනවිට ඩොලර් 1000ක අත්තිකාරම් මුදලක් ගෙවා මොඩල් 3 මාදිලිය මිලදී ගැනීමේ ඇනවුම් කල පාරිභෝගිකයින් ගණන 500,000කට අධික බව ඊලෝන් මස්ක් මෙම උත්සවයේදී පවසා සිටියා. ඇණවුම්කල පිලිවෙලට ලබාදෙන මොඩල් 3 මාදිලිය මෑතකදී ඇණවුම් කල අයට ඒවා ලැබෙන විට 2018 දෙසැම්බර් පමණ වනු ඇති බවද පැවසුනා.

මොඩල් 3 මාදිලියේ ප්‍රධාන නිර්මාණකරුවන් කණ්ඩායමේ ටෙස්ලා ප්‍රධාන තාක්ෂණ නිළධාරී (Chief Technology Officer) ජෙෆ්‍රී ස්ට්‍රව්බෙල් හා ප්‍රධාන නිර්මාණ ශිල්පී (Chief Designer) ෆ්‍රෑන්ස් ෆොන් හොල්ස්හෝසන්ද වනවා. ටෙස්ලා සමාගමේ අනෙක් සියලුම මාදිලි සඳහාද නිර්මාණ හා තාක්ෂණික දායකත්වය මොවුන් ලබාදී තිබෙන අතර අද වනවිට සේවක සේවිකාවන් 33,000ක් හා ඩොලර් බිලියන 22ක වත්කම් ඇති ටෙස්ලා සමාගම ආරභයේදී සිටිම මොවුන් සමාගමේ සේවය කොට තිබෙනවා.

මොඩල් 3 කාරයේ ඇතුලත
නවීන නිර්මාණ සංකල්පයකට අනුව නිමැවී ඇති මොඩල් 3 මාදිලියේ ඇතුලත ඩෑෂ් බෝඩ් එකක් හෝ වෙනත් බොත්තම් හා ඩයල යනාදී කිසිවක් නැති අතර රියදුරාට දකුණු පසින් ඇති (වමෙන් පදවන මාදිලිවල ) අඟල් 15 ටච් ස්ක්‍රීන් පරිඝණක තිරයෙන් වාහනයේ සියලුම කටයුතු පාලනය වන අතර සියලුම තොරතුරු රියැදුරාට ලබාදේ. මීට අමතරව රියදුරාට කාරයේ පරිගණකය අමතා වාචික විධාන (voice commands) දිය හැකි අතර සුක්කානමේ ඇති නලා බොත්තම් දෙක ආධාරයෙන්ද පරිගණකයට විධාන දිය හැකිය.






__________________________________________________________________________
Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

TECHNOLOGY : ලෝකයේ විශාලම මයික්‍රෝචිප් නිෂ්පාදකයා - ඇමරිකාවේ ඉන්ටෙල්? නෑ කොරියාවේ සැම්සුන්ග්!

සැම්සුන්ග් නිෂ්පාදනය කරන අලුත්ම ඇපල් අයිෆෝන් බලගන්වන ඇපල් A9 ප්‍රොසෙසරය
සැම්සුන්ග් සමාගම් සමූහය මේවන විට ඩොලර් බිලියන ඩොලර් බිලියන 12.6ක ලාභයකුත්, 54ක ආදායමකුත් වාර්තා කොට තිබෙනවා. මේ ඩොලර් බිලියන 54රේ ආදායමෙන් ඩොලර් බිලියන 15ක්ම දායකවී තිබෙන්නේ සැම්සුන්ග් සමාගමේ සැම්සුන්ග් සෙමිකන්ඩක්ටර්ස් නම් මයික්‍රෝප්‍රොසෙසර් හා මෙමරි චිප් නිෂ්පාදන ආයතනයයි. ලෝකයේ විශාලම මයික්‍රෝචිප් සමාගම ලෙස විරුදාවලි ලබා සිටින ඉන්ටෙල් සමාගම මේ කාලය තුල  වාර්තාකොට ඇති ආදායම ඩොලර් බිලියන 14.8ක්. ඒ අනුව සැම්සුන්ග් සමාගම, පසුගිය වසර 24 පුරාම ලෝකයේ විශාලම මයික්‍රෝචිප් නිෂ්පාදකයා ලෙස කිරුළ හෙබවූ ඉන්ටෙල් සමාගම පසුකොට ලෝකයේ ලොකුම සිලිකන් මයික්‍රෝචිප් නිෂ්පාදන සමාගම බවට පත්වී තිබෙනවා.

සුප්‍රකට ඇපල් අයිෆෝන් සඳහා A9 ප්‍රධාන ප්‍රොසෙසරය මෙන්ම මෙමරි හා වෙනත් උපාංගද සැම්සුන්ග් සමාගම නිෂ්පාදනය කරනවා. කෙසේ වෙතත් ඇපල් A9 ප්‍රොසෙසරය නිෂ්පාදනය කරන එකම සමාගම සැම්සුන්ග් නොවේ. සැම්සුන්ග් සමාගමට අමතරව තායිවානයේ TSMC සමාගම ඇපල් A9 ප්‍රොසසර් නිෂ්පාදකයෙකු වනවා.

මේ වසරේ දොරට වඩින 10වැනි සංවස්තර අයිෆෝනයේ තිරය OLED තාක්ෂණයේ තිරයක් වන අතර එය සැපයිමේ කොන්ත්‍රාත්තුව ලබා ඇත්තේත් ඇපල් සමාගමයි. ඒ අනුව 2017 අලුත්ම අයිෆෝනයේ ප්‍රධාන ප්‍රොසෙසරය, මෙමරි පරිපථ හා OLED තිරය යන ප්‍රධාන කොටස් තුනම සැම්සුන්ග් සමාගමේ නිෂ්පාදන වනවා.



__________________________________________________________________________
Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Friday, 28 July 2017

HISTORY : අවුරුදු 3500ක් පරණ කෑම පෙට්ටිය!!


අවුරුදු 3500කට පෙර ස්විට්සර්ලන්ත-ජර්මන් දේශසීමා ආසන්නයේ අති දුෂ්කර ස්විස් ඇල්ප්ස් කඳුවැටිය තරණය කරමින් සිටිය පුද්ගලයෙකු හෝ කණ්ඩායමක් සතුව තිබූ ලීයෙන් කල කෑම පෙට්ටියක් පුරාවිද්‍යාඥයින්ට හමුවී තිබෙනවා. ලෝට්ෂෙන් කපොල්ල ලෙස හැඳින්වෙන මෙම ප්‍රදේශයේ වසර දහස් ගණනක් දැඩි හිම තට්ටුවලින් වැසී තිබුණත්, ගෝලීය උණුසුම්කරණය නිසා දැන් හිම දියවෙමින් පවතින බැවින් මෙවැනි කෞතුක වටිනාකමක් ඇති පෞරාණික වස්තූන් සොයාගැනීමට හැකිවෙමින් තිබෙනවා.

වසර 3500කට පෙර ලෝකඩ යුගයේ නිර්මාණයක් වන මෙය. ස්විස් පයින් හා යුරෝපීය ලාර්ච් නම් ගස්වල ලීයෙන් නිමවා ඇති මෙය විශ්ලේෂණය කල විද්‍යාඥයින්ට එය තුල තිබී ස්පෙල්ට් හා එමර් යන වර්ගවල තිරිඟු හා බාර්ලි ධාන්‍යයේ යැයි සිතිය හැකි ජාන සළකුණු හමුවී තිබෙනවා. ඒ අනුවයි මෙය කෑම පෙට්ටියක් බවට ඔවුන් නිගමනය කරලා තියෙන්නේ. 

ජර්මනියේ Max Planck Institute for the Science of Human History පර්යේෂණ ආයතනයේදී මේ අපූරු කෑම පෙට්ටිය පිලිබඳව වැඩිදුර පර්යේෂණ පැවැත්වෙනවා.



ලෝකඩ යුගය වනවිට කෑම බීම ප්‍රවාහණය සඳහා පිලිස්සූ මැටි බඳුන් යොදාගත්තද මේ අධික ශීතල ඇති ගිරිදුර්ග කපොල්ල පසුකර දුෂ්කර ගමණක් යන්නවුන් ලීයෙන් තැනූ කෑම පෙට්ටි ගෙන යන්නට ඇත්තේ ඒවා ඉතා සැහැල්ලු නිසා වන්නට පුලුවන්. අදටත් විනෝදාංශයක් ලෙස දීර්ඝ ඇවිදීම් (හයිකිං) වල යෙදෙන්නන් තමන් ගෙන යන බර පිලිබඳව දැඩි සැළකිල්ලක් දක්වන්නේ වෙහෙසට පත්වූ විට වැඩි බර රැගෙන යාම ඉතා අපහසු නිසා. ලෝකඩ යුගයේ ජීවත්වූ නූතන හෝමෝ සැපියන් මානවයින්ද අප මෙන්ම බුද්ධිමත් නිසා ඔවුන්ද එලස කල්පණාකොට දිගු ගමන් සැළසුම් කරන්නට ඇති.

මීට පෙර මේ ආසන්න ප්‍රදේශයෙන් යුරෝපයේ පැණිම මමීකෘත මිනිසා ලෙස සැළකෙන ඔට්සිගේ දේහය සොයා ගත්තා.

කෑම පෙට්ටිය හමුවූ ලොට්ෂෙන් කපොල්ල 




__________________________________________________________________________
Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Wednesday, 26 July 2017

THE INTERNET : ඇඩෝබි සමාගම Flash තාක්ෂණය පෙන්ෂන් යවයි!


ඇඩෝබී සමාගම නිර්මාණය කල ෆ්ලෑෂ් තාක්ෂණයේ ආරම්භය 1995 තරම් ඈතට දිවයනවා. 1995 ෆියුචර්වේව් නම් සමාගමක් ඇපල් මැකින්ටොෂ් හා වින්ඩෝස් පරිගණකවල සජීවීකරණ සිදුකල හැකි ඇනිමේෂන් මෘදුකාංගයක් හඳුන්වාදුන්නා. ඒ වනවිව අන්තර්ජාලයේ world wide web ජාලය ජනප්‍රියවෙමින් තිබුණ අතර තම මෘදුකාංගය වෙබ් අඩවිවල සජීවීකරණ පහසුවෙන් නිර්මාණය කල හැකි තාක්ෂණයක් බව වටහා ගත් ෆියුචර්වේව් සමාගම එකල වනවිට පරිගණක ග්‍රැෆික් ලෝකයේ තරුවක් බවට පත්වෙමින් සිටි ඇඩෝබි සමාගමට තම තාක්ෂණය අලෙවිකිරීමට උත්සහ කලත් ඇඩෝබි සමාගම එතරම් උනන්දුවක් දැක්වූයේ නෑ.

ඒ වනවිට සජීවීකරණ හා පරිගණක ක්‍රීඩා සඳහා  බහු-මාධ්‍ය නීර්මාණ මෘදුකාංගයක් ලෙස (multi-media content creation tool) ශොක්වේව් නම් මෘදුකාංගයක් ඉදිරිපත් කරමින් සිටි මැක්‍රෝමීඩියා සමාගම ෆියුචර්වේව් සමාගම මිලට ගෙන ෆිව්චර්වේව් ෆ්ලෑෂ් තාක්ෂණය මැක්‍රෝමීඩියා ෆ්ලෑෂ් ලෙස අලෙවිකරන්නට (1996) පටන් ගත්තා. වෙබ් අඩවි සජීවීකරණයේ, සීඩී රොම් තැටි ආධාරයෙන් ක්‍රියාත්මක වන බහුමාධ්‍ය මෘදුකාංඝ හා පරිගණක ක්‍රීඩා නිර්මාණය සඳහා නැතුවම බැරි තාක්ෂණයක් ලෙස ෆ්ලෑෂ් ප්‍රචලිත වන්නට පටන් ගත්තේ ඉන් පසුවයි.

2005දී මැක්‍රෝමීඩියා සමාගම ඇඩෝබි සමාගම විසින් මිළදීගැනීමෙන් පසු, මැක්‍රෝමීඩියා ෆ්ලෑෂ්, ඇඩෝබි ෆ්ලෑෂ් ලෙස අලුතින් භෞතීස්ම වුනා.

වෙබ් අඩවිවල පහසුවෙන් සජීවිකරණයන් පෙන්වීමට ෆ්ලෑෂ්  කෙතරම් ප්‍රයෝජනවත් වූවත්, එහි ඇති ප්‍රධාන අඩුපාඩු කිහිපයක් වූවා. මේ අඩුපාඩු ඉතා කදිමට පෙන්වාදුන්නේ අයිෆෝන් නිර්මාතෲ ස්ටීව් ජෝබ්ස් විසින්. 2010දී ස්ටීව් ජෝබ්ස් අයි-OS මෙහෙයුම් පද්ධතියෙන් සම්පූර්ණයෙන්ම ෆ්ලැෂ් ඉවත්කොට දැමුවා. ජෝබ්ස් පැවසූ අන්දමට ෆ්ලෑෂ් තාක්ෂණය - පරිගණකයේ හෝ ෆෝනයේ මතකය හා ප්‍රොසෙසරයට වැඩි බරක් යොදන, ආරක්ෂාව අතින් ඉතා පහල නිසා ආධුනික හැකර්වරයෙකුට වුවද පහසුවෙන් පරිගණකයකට ඇතුලුවීමට ඉඩ සලසන, බුද්ධිමය දේපොල නීති නිසා වෙනස්කම් කිරීමට ඉතා අපහසු, කරදරකාරී තාක්ෂනයක්. 2012න් පසු ඇන්ඩ්‍රොයිඩ් මෙහෙයුම් පද්ධතියද ෆ්ලෑෂ් භාවිතාකරන්නේ නෑ.

HTML5, WebGL වෙබ් පිටු සැකසීමේ තාක්ෂණ නිසා දැන් ෆ්ලෑෂ් නොමැතිව වෙබ් පිටුවල සජීවීකරණ සිදුකල හැකි බැවින් ෆ්ලෑෂ් යල් පැනගිය තාක්ෂණයක් බව වටහාගත් ඇඩෝබි සමාගම පවා 2015 වනවිට සිය මෘදුකාංග HTML5/WebGL තාක්ෂණය වෙත යොමුකලා.

පසුගිය අඟහරුවාදා ඇඩෝබී සමාගම නිළවශයෙන් ෆ්ලෑෂ් තාක්ෂණය වැඩිදියුණු කිරීම හෝ ෆ්ලෑෂ් ප්ලේයර් බෙදා හැරීම නවත්වන බවට ප්‍රකාශකල අතර 2020 වනවිට ෆ්ලෑෂ් තාක්ෂණය සම්පූර්ණයෙන්ම අන්තර්ජාලයෙන්ද ඉවත්වනු ඇති.






__________________________________________________________________________
Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Tuesday, 25 July 2017

POLITICS : යහපාලකයිනි! ප්‍රායෝගික දේශපාලනය ඉගෙන ගන්න Game of Thrones බලන්න
























අතිශයින්ම ජනාදරයට පාත්‍රව ඇති ගේම් ඔෆ් ත්‍රෝන්ස් රූපවාහිණී වෘතාන්තයේ සත්වන කාණ්ඩය (Season 7) පසුගිය ජූලි 16 වැනිදා ප්‍රේක්ෂක හමුවන පැමිණියා. ගේම් ඔෆ් ත්‍රෝන්ස් නරඹන සෑම කෙනෙකුගේම අපේක්ෂාව වන්නේ යකඩ සිංහාසනයේ සිංහාසනාරූඪ වන්නට වාසනාව ලබන්නේ කවුරුන්ද යන්න දැනගැනීමටයි. එපමණක් නොව කෙතරම් බලසම්පන්නයෙකු වුවද ඕනෑම මොහොතක කුරිරු මරණයකට ගොදුරුවිය හැකි, මිතුරන් වෙසින් එන සතරන් සැම තැනම දිස්වන, රුදුරු ප්‍රචන්ඩත්වයෙන් පිරි මේ මනහ්කල්පිත රාජධානි සතම (Seven Kingdoms) එක්සේසත් කොට නයිට් වෝකර් අමනුෂ්‍ය බලය බිඳ දමන්නේ කවුද? රජකම හෝ බළය කෙසේ වෙතත් සීසන් එක අවසන් වනතෙක්, ආයුෂ හා අතපය රැක ගන්නට කීදෙනෙකුට හැකිවේද?

ඇමරිකානු ලේඛක ජෝර්ජ් ආර් ආර් මාටින් විසින් රචිත "A song of fire and ice" නම් නවකතා මාලාවේ අනුවර්තනයක් ලෙස ඩේව්ඩ් බෙනිඕෆ් හා ඩී.බී වෙයිස් විසින් රූපවාහිණී කතාමාලාවක් ලෙස ඉදිරිපත් කෙරෙන මෙයට ගේම් ඔෆ් ත්‍රෝන්ස් ලෙස නම් තබා ඇත්තේ කොටස් සතකින් යුතු පොත් සතක් ලෙස ප්‍රකාශවුනු සොන්ග් ඔෆ් ෆයර් ඇන්ඩ් අයිස් නවකතා මාලාවේ පලමු පොතවූ "අ ගේම් ඔෆ් ත්‍රෝන්ස්" පොත ඇසුරිනුයි.

විවිධ රාෂ්ඨපාලන ඔවදන්, උපායමාර්ග හා ක්‍රියාදාමයන්ගෙන් පිරී ඇති ගේම් ඔෆ් ත්‍රෝන්ස් කතාවස්තුවේ මූලික හරය වන්නේ බලය ලබාගැනීමටත් රැක ගැනීමටත් "හොඳවීම හා ගෞරවාන්විතව හැසීරීම" පමණක් කිසිසේත් නොසෑහෙන බවයි. ශූරලෙස අවස්ථාවලින් ප්‍රයෝජන ගැනීම, සතුරන් ලවා වෙනත් සතුරන් වැනසීම, වගේම රජෙකු වුවත්, රටේ වෙනත් බළගතු පුද්ගලයින් හා පවුල් සමග අනවශ්‍ය ආරවුල්වල පැටලීමට නොයාම හා එසේ කිරීමේ ආදීනවද ගේම් ඔෆ් ත්‍රෝන්ස් කතාවස්තුව පුරාවටම පෙන්වාදී තිබෙනවා. එමෙන්ම සීමා රහිතව දුෂ්ඨවීම, කළගුණ අමතකවීම මෙන්ම අනවශ්‍ය ලෙස කළගුණ සළකන්නට යෑමද එකසේ අගුණ වනවා. 

ගේම් ඔෆ් ත්‍රෝන්ස් කතාවලින් පෙන්වා දෙන තවත් වැදගත් පාඩමක් නම් බලය ලබාගැනීමටත්, පවත්වාගෙන යාමටත් චරපුරුෂයින්ගේ හා ඔත්තු සේවාවල වැදගත් කමයි. තමන්ගේ සතුරන් පිලිබඳව පමණක් නොව තමන්ගේ ලඟම හිතවතුන් පිලිබඳවද හොඳින් ඇසගසාගෙන විමසිල්ලෙන් සිටින චරපුරුෂ සේවාවක් බලය අපේක්ෂාකරන මෙන්ම බලය ඇති පුද්ගලයින්ගේද ආරක්ෂාව සඳහාම වනවා. එමෙන්ම දේශපාලන හා යුධමය සන්ධානවල වැදගත් කම මෙන්ම එවැනි සන්ධාන හා එකඟතාවල ඇති අවිනිෂ්චිත භාවයද පෙන්වා දෙනවා.


කතාමාලාවේ පලමු වාරයේම (Season 01) දිවි අහිමි කරගත් නෙඩ් ස්ටාර්ක්, අවංක බවේ, පක්ෂපාතීත්වයේ හා ගෞරවාන්විත ලෙස හැසිරීමේ ප්‍රතිමූර්තියක් වනවා. එහෙත් නුවණ මෙහෙයවා කටයුතු නොකිරීම, රාජ්‍යයේ ප්‍රධාන ඇමතියා (Kings Hand) වුවද රජමාළිගයේ සිදුවන රහසිගත කුමණ්ත්‍රන, රැජිනගේ හා ඇයගේ සොයුරාගේ අසම්මත හැසිරීම, හා ඔවුනට දාව ඉපදුනු, රජු තමන්ගේ යයි සිතන දරුවන් ආදී කිසිවක් නොදත් නෙඩ් ස්ටාර්ක්, ඔහු සේවය කල රජු අවාසනාවන්ත ලෙස මිය යාමෙන් වැඩිකලක් යන්නට පෙර කුමණ්ත්‍රණයකට හසුව කුරිරු මරණයකට ගොදුරුවූවා පමණක් නොව සිය බිරිඳ හා දරුවන් සයදෙනාටද බිහිසුණු ඉරණමක් අත්කර දෙනවා.

නෙඩ් ස්ටාර්ක්ගේ සුජාත පුත්‍ර රොබ් ස්ටාර්ක් මෙන්ම ඔහුගේ අවජාතක පුත්‍ර ජොන් ස්නෝ (සැබැවින්ම ජොන් ස්නෝ, නෙඩ් ස්ටාර්ක්ට දාව උපන්නෙක් නොව ඩෙනර්ස් ටාර්ගේරියන්ගේ සහෝදරයා, රේගාර් ටාගාර්යන්ට දාව නෙඩ් ස්ටාර්ක්ගේ නැගනිය ලියානා ස්ටාර්ක්ට ලැබුණු දරුවෙකි.) මිය යන්නේ ස්ථානෝචිත ප්‍රඥාවෙන් ක්‍රියා නොකර හදවතට එකඟව ක්‍රියා කරන්නට යාම නිසාය. ජොන් ස්නෝ සිය අවසානය ලඟා කරගන්නේ සිය හිතේෂිවන්තයින්ගේ දැඩි විරෝධය මත  නිවැරදි යයි ඔහුට හැඟුනු තීන්දු ගැනීම නිසාය. කෙසේ වෙතත් දෛවය ජොන් ස්නෝට තවත් අවස්ථාවක් ලබාදී ඇත.


නෙඩ් ස්ටාර්ගේ දියණියක් වන ධෛර්යවන්ත, සටන්කාමී ආර්යා ස්ටාර්ක් සිය පියා හා පවුලේ සාමාජිකයින් විනාශ මුඛයට ඇදදැමූවන්ගෙන් පලිගැනීමේ චේතනාවෙන් දැවෙයි. ඇයගේ ගැලවුම්කාරයා වන්නේ ඇයගේ පියා මරාදැමූ සැන්ඩෝර් ක්ලෙගැනේය. ලාබාල වයසේ රජවූ කුරිරු ජොෆ්‍රිගේ පෞද්ගලික ආරක්ශකයා මෙන්ම ප්‍රධාන අලුගෝසුවාද වන සැන්ඩෝර් ආර්යා ස්ටාර්ක්ට ආරක්ෂාව සලසන අතර ඇයගේ මග පෙන්වන්නාද බවට පත්වෙයි. කෙසේ වෙතත් පලිගැනීමේ අරමුණින්ම දැවෙන ආර්යාට සිය උරුමයට අනුව රාජකීයත්වයක් ලබාගත හැකිද යන්න තීරණය වන්නේ ඇයට ඇයගේ වෛරයේ සීමාවන් කළමණාකරණය කරගත හැකිද යන්න මතයි.

රූමත්, බොළඳ කුමරියක්වූ ඩෙනෙර්ස් ටාගාර්යන්ගේ පියා ආර්යස් ටාගාර්යන් කලක් සත්-රාජධානිවල රජුවිය. නෙඩ් ස්ටාර්ක්ගේද උදව්වෙන් රොබර්ට් බැරතියන් ආර්යස් මරා රජකම ලබාගත් අතර ඒවන විට ඩෙනෙර්ස් උපතලබා නොතිබුණි. ඇයගේ මව, ඇයගේ පියාගේ සොයුරියද වූවාය. සටන්කාමී ගෝත්‍රික නායකයෙකු වූ ඛල් ඩ්‍රෝගෝ හා විවාහ වන ඩෙනෙර්ස් ගැබ්බර අවධියේදි සැමියා අහිමිවෙයි. සත් රාජධානිවලට ලේ උරුමකම් ඇති ඩෙනෙර්ස් ගැබ්බර බව දැනගන්නා රොබර්ට් බැරතියන් ඇයව මරාදැමීමට ඝාතකයින් යොදවන නමුත් එය වැරදී යයි. ඩෙනෙර්ස්ගේ එකම ඉලක්කය සිය සතුරන්ව විනාශකොට සිය ලේ උරුමය වූ යකඩ සිහසුන හිමි සත්-රාජධාණිවල රැජින වීමයි. උපායශීලීත්වයෙන් හා ගෞරවාන්විත හැසිරීමෙන් කැපවුනු හිතේෂින්වන්තයින් පිරිසකුත් ගොඩනගා ගන්නා ඇයට යකඩ සිහසුන ලබාගැනීමට කොතෙක් සතුරන් විනාශ කරන්නට සිදුවේද?

ගේම් ඔෆ් ත්‍රෝන්ස් අපට කියාදෙන අවසන් පාඩම වන්නේ යහපත් පාලකයින් ශක්තිමත් මිතු-සන්ධාන ඇතිකරගන්නවා මෙන්ම සතුරන්ද අඩු කරගන්නා බව සැබෑ වුවත් හැම දෙයකටම සීමාවක් තිබිය යුතු බවයි. ගේම් ඔෆ් ත්‍රෝන්ස් සත්වැනි දිගහැරුමේ පලමු එපිසෝඩයේදීම සන්සා ස්ටාර්ක් සිය අඩ-සොයුරු ජොන් ස්නෝට දුන් අවවාදය ඉතා වැදගත්ය. යහපත් කම හොඳ වුවද එය නුවනක්කාරකමට යටවිය යුතු නැත. එනම් අවශ්‍යවූ විට, සැහසිව, අනුකම්පා විරහිතව තීන්දුගත යුතු අතර ප්‍රතිපත්ති හෝ සම්ප්‍රදායන් කරේ තබාගැනීමෙන් වාසි වන්නේ සතුරාට බව දැන ගැනීම සෑම පාලකයෙකුටම වැදගත්ය. කල් පවතින ජයග්‍රහණ සකසා ගන්නේ, යහපත් මෙන්ම අවැසිවිට නම්‍යශීලීවද, අවැසිවිට බිහිසුණු හා අණුකම්පා විරහිතවද ක්‍රියාත්මක වන, උපායශීලීව හා දීර්ඝකාලීනවද සිතා බලා කටයුතු කරන පාලකයින්ය.

හත්පොලේ ගාගෙන සිටින යහපාලක රජ/යුවරජ යුවල මෙන්ම වෙන්ඩ රජ ගෝඨාද, හිටපු රජ පර්සිද මුලසිට අගටම ගේම් ඔෆ් ත්‍රෝන්ස් නැරඹිය යුතු බව අපගේ යෝජනාවයි.





__________________________________________________________________________
Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Sunday, 23 July 2017

BUSINESS STRATEGY : ඉන්දියානුවන් කෝටි 50කට නිකන්වගේ දෙන්න යන අනිල් අම්බානිගේ 4G ෆීචර් ෆෝන් එක.


මුකේෂ් අම්බානි ප්‍රධාන කොටස් හිමියා හා සභාපති වන රිලයන්ස් සමාගම ඉන්දියාවේ විශාලම සමාගම් සමූහවලින් එකක්. බොහෝ ප්‍රකෝටිපති ඉන්දියානු සමාගම් මෙන්ම රිලයන්ස් සමාගමත් අම්බානි පවුලේ ව්‍යාපාරයක්. දුගියෙකුව සිට දැවැන්ත රිලයන්ස් සමූහ ව්‍යාපාරය ගොඩනැගූ ශූර ව්‍යාපාරික ධිරුබායි අම්බානිගේ පුතුන් දෙදෙනා වන මුකේෂ් හා අනිල් අතර බෙදීගිය සමාගම් අතරින් දැන් කරලියට පැමිණ තිබෙන්නේ මුකේෂ් සභාපති හා කළමණාකරණ අධ්‍යක්ෂක දූරය හොබවන රිලයන්ස් ඉන්ඩුස්ට්‍රීස් සමාගමයි. 2016/2017 මූල්‍ය වසර සඳහා ඩොලර් බිලියන 51ක ආදායමක් ඉපැදවූ මුකේෂ්ගේ රිලයන්ස් සමාගම විටින්විට ඉන්දියානු ව්‍යාපාරික ක්ශේෂ්ත්‍රය වියවුල් කරන අන්දමේ ව්‍යාපාරික උපක්‍රම භාවිතා කරන සමාගමක්. 

මුකේෂ් අම්බානිගේ අලුත්ම ව්‍යාපාරික උපක්‍රමය වන්නේ ඉන්දියාවේ එකතැන පල්වෙන ජංගම දුරකථන කර්මාණ්තය දැවැන්ත විපර්යාසයකට බඳුන්කිරීමයි. නවතම ඇස්තමේතුවලට අනුව ඉන්දියාවේ ජංගම දුරකථන භාවිතා කරන්නන් මිලියන 780ක් සිටිනවා. මෙයින් දුරකථන කෝටි 50ක් හෙවත් මිලියන 500ක්ම ෆීචර් ෆෝන් හෙවත් 1G/2G තාක්ෂණයන් භාවිතා කරන පැරණි මාදිලියේ ජංගම දුරකථන වනවා. 

මෙවැනි ෆීචර් ෆෝන් වැඩියෙන්ම භාවිතා කරන්නේ අඩු ආදායම් ඉන්දියානුවන් වන අතර ස්මාර්ට්ෆෝන් එකක් ගැනීමට වියදම් කිරීමට තරම් මුදල් නොමැති  නැතහොත් එතරම් මුදලක් වැයකිරීමට අකමැති ඉන්දියානුවන් මිලියන 500ක් තමයි තවමත් මේ පරණ ෆීචර්ෆෝන් භාවිතා කරන්නේ.

රිලයන්ස් සමූහයේ අලුත් සාමාජිකයෙකු වන Reliance Jio Infocomm Limited සමාගම මෙහෙයවන්නේ මුකේෂ් අම්බානිගේ නිවුන් දරුවන් වන ආකාෂ් අම්බානි හා ඊෂා අම්බානි විසින්.  රියලන්ස් ජියෝ සමාගමේ අරමුණ මේ ඉන්දියානුවන් කෝටි 50ටම, නොමිලයේම වාගේ භාවිතාකල හැකි 4G තාක්ෂණයේ ෆීචර් ෆෝනයක් ලබාදීමයි. 

රිලයන්ස් ජියෝ සමාගමට නායකත්වය දෙන මුකේෂ්ගේ නිවුන් දුව හා පුතා - ඊෂා හා ආකාෂ්

රිලයන්ස් ජියෝ සමාගම ඉන්දියානුවන් වෙත ඉදිරිපත් කරන මොබයිල් සැලස්මට අනුව මෙම 4G ෆෝනය ලබාගැනීමට ඔවුන් ඉන්දියානු රුපියල් 1500ක ආපසු දෙන තැම්පතුවක් තැබිය යුතුයි. එවිට ඔවුන්ට මෙම ෆෝනය ලැබෙන අතර වසර තුනකට පසු ෆෝනය ආපසු දී මෙම 1500 ලබාගත හැකියි. 

එපමණක් නොව මේ වසර තුනටම ඔවුන්ට දුරකථන ඇමතුම් සඳහා ගෙවීමක් සිදුකරන්නට වන්නේ නෑ. සියලුම දේශීය ඇමතුම් නොමිලයේම ලැබෙනවා එපමණක් නොව රුපියල් 153ක් මසකට ගෙවා අධිවේගී 4G අන්තර්ජාල පහසුකම ලබාගන්නටත් ජියෝ පාරිභෝගිකයින්ට පුලුවන්.






__________________________________________________________________________
Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

BUSINESS STRATEGY : මෘදුකාංග ඉන්ජිනේරුවන් වර්ජනය කලහොත් ලොවම ඇණහිටිනු ඇත!!!


රොබෝ වාහන, ස්වයංපාලන ඩ්‍රෝනයානා, කෘත්‍රිම බුද්ධිය අඩංගු මෘදුකාංගා හා උපාංගවලින් පිරීයන බවට සහතික නුදුරු අනාගත ලෝකයට, මෘදුකාංග ඉන්ජිනේරුවන් අද සිවිල් ඉන්ජිනේරුවන් හා වෛද්‍යවරුන් තරමටම නැතුවම බැරි වෘත්තියක් වනු ඇත. අද වෛද්‍යවරුන් වැඩ වරන විට රටම භීතියට පත්වන්නා සේ තව වසර කිහිපයකින් මෘදුකාංග ඉන්ජිනේරුවන් වැඩ වරන්නට තීරණය කල හොත් රටක ආර්ථික යන්ත්‍රයම ඇණ හිටින තරමටම ලොව සියලුම රටවල් පරිගණක හා මෘදුකාංග මත යැපෙන බව නිසැකයි.

මෘදුකාංග ඉන්ජිනේරුවෙකු යනු, පරිගණක විද්‍යාව, ගණිතය හා ඉන්ජිනේරු විද්‍යා මූළධර්ම මත පදනම්ව පරිගණක තුල දිවෙන වැඩසහන් සැළසුම් කිරීම, නිර්මාණය, පරීක්ෂාකිරීම හා යාවත්කාලීන කිරීම සිදුකරණ වෘත්තිකයින් පිරිසකි. නූතනයේ මිනිසා ලබ ඇති බොහෝ ජයග්‍රහණ මෘදුකාංග ඉන්ජිනේරුකරණයේ ජයග්‍රහණද වේ. මීට හරියටම වසර 48කට පෙර, 1969 ජූලි 24 වැනිදා සඳ මත පියවර තැබූ නීල් ආම්ස්ට්‍රෝන් රැගත් රොකට්ටුවට පොලවෙන් ඉහලට ඔසවා සඳමත තැබුවේ පරිගණක මෘදුකාංග ඉන්ජිනේරුකරණයේ විස්මිත ජයග්‍රහණ මතය. පරිගණක හා මෘදුකාංග ඉන්ජිනේරුකරණය නොමැතිව එම සඳ ගමන මෙන්ම වෙනත් අභ්‍යවකාශ ගමන් සිහින පමණක්ම වනු ඇත.

මෘදුකාංග ඉන්ජිනේරුවෙකු ලෙස ඔබ, ඔබගේ දැනුම තාක්ෂණයේ දියුණුවට, ව්‍යාපාර දියුණුවට පමණක් නොව අනාගතය වෙනස් කිරීමටද දායක වන්නෙකු බව සිතේ තබාගන්න. 

පසුගාමී ගොම ගොඩක් ව තිබූ ඉන්දියාව තාක්ෂණ ලෝකයේ නමක් රැන්දූ රටක් බවට පත්කරන්නට, ගූගල් හා මයික්‍රෝසොෆ්ට් වැනි දැවැන්ත සමාගම් වල ප්‍රධාන විධායක ධූරවලට ඉන්දියානුවන් ඔසවා තබන්නට පිඹුරුපත් හැදුවේ 1980දශකයේ ඉතා කුඩාවට ආරම්භවූ ඉන්දියානු මෘදුකාංග කර්මාණ්තය හා එහි නියැලුනු අති දක්ෂ ඉන්දියානු මෘදුකාංග ඉන්ජිනේරුවන්ය.


ලංකාවේ මෘදුකාංග කර්මාණ්තය

ලංකාවේ මෘදුකාංග කර්මාණ්තයේ පෙරගමන්කරු වන්නේ Sri Lanka Association of Software and Service Companies හෙවත් SLASSCOM  ආයතනයයි. ලංකාවේ මෘදුකාංග හා ආශ්‍රිත සේවා කර්මාණ්තයේ වැඩි දියුණුව සඳහා උපායමාර්ග සැකසීමට, ආයතනවලට උපදේශණ සේවා සැපයිමට මෙන්ම කර්මාණ්තයේ උන්නතිය වෙනුවෙන් රාජ්‍ය ප්‍රතිපත්ති හා සැළසම් අනුගතකරවා ගැනීමේ පරමාර්ථවලින් පිහිටුවා ගත් ස්ලැස්කොම් ආයතනය 2022 වනවිට අපගේ මෘදුකාංග කර්මාණ්තය ගමන් කලයුතු මාර්ගය හා උපායමාර්ග සාකච්ඡාකිරීමට උපායමාර්ග ලේඛණයක් (strategy document) සකස්කොට තිබෙනවා.

මෙහි දක්වා තිබෙන දත්තවලට අනුව 2015/2016 වසර වනවිට 80,000ක් පමණ මෘදුකාංග කර්මාණ්තයේ විවිධ අංශවල රැකියා ලබා තිබෙනවා. ඔවුන්ගේ ඉලක්කය වන්නේ 2022 වනවිට ලංකාවේ මෘදුකාංග කර්මාණ්තයේ සෘජු රැකියා 100,000ක් බිහිකිරීමටයි.

SLASSCOM Strategy Document 2016
එමෙන්ම 2007දී ඩොලර් මිලියන 213ක මෘදුකාංග අපනයන ආදායමක් ලැබූ ලංකාව 2015 වනවිට එය ඩොලර් මිලියන 850ක් දක්වා වර්ධනය කරගෙන තිබෙන අතර ස්ලැස්කොම් ඉලක්කය වන්නේ 2022 වනවිට ලංකාවේ මෘදුකාංග කර්මාණතයෙන් ඩොලර් මිලියන 5000ක් (බිලියන 5ක) අපනයන ආදායමක් උපයාගැනීමයි.

SLASSCOM Strategy Document 2016
ලංකාවේ මෘදුකාංග කර්මාණ්තය ලැබූ අන්තර්ජාතික ජයග්‍රහණ කිහිපයක් (ස්ලැකොම් වාර්තාව ඇසුරින්)

1] කටාර් ගුවන්සේවය හා එමිරේට්ස් ගුවන්සේවයේ ගුවන් ටිකට්පත් හා වෙනත් සේවා වෙන්කිරීමේ මෘදුකාංගය ශ්‍රී ලංකාවේ නිර්මාණය කරන ලද්දකි.

2] 2015 මොබයිල් වර්ල්ඩ් කොන්ග්‍රස් සමුලුවේදී ඩයලොග් ආසියාටා සමාගමේ ජංගම දුරකථන ඇසුරින් මුදල් සම්ප්‍රේෂණ සේවා මෘදුකාංගය හොඳම මුදල් සම්ප්‍රේෂණ මෘදුකාංගය ලෙසත් එම සමුලුවේදීම ඩයලොග් ආසියාටා සමාගම හොඳම තාක්ෂණ භාවිතා කරන්නා (best technology enabler) ලෙසත් සම්මාන ලැබුවා.

3] ෆීජී රාජ්‍යයේ හා මුරුසි රාජ්‍යයේ ආගමන විගමන හා වීසා මෘදුකාංගය ලංකාවේ නිර්මාණය කරන ලද්දකි.

4] ලන්ඩන්, ජොහැන්නස්බර්ග් (දකුණු අප්‍රිකාව ), ඉතාලිය හා මැලේසියාවේ කොටස් වෙළඳපොලවල කොටස් ගණුදෙනු ස්වයංක්‍රීයව සිදුකරන්නේ ශ්‍රී ලංකාවේ නිර්මාණය කරනලද මෘදුකාංගයකිනි.

5] Google Summer of Code වැඩමුළු මාලාවේ හොඳම සහභාගිත්වය හා වැඩිම සිශුන් ගණනක් සහභාගීවීමේ සම්මානය වසර 9ක් තිස්සේ අඛණ්ඩව මොරටුව විශ්වවිද්‍යාලයට හිමිවී ඇත.

6] සංචරක සේවා කර්මාණතයේ ප්‍රමුඛ සඟරාවක් වන බ්‍රිතාණ්‍යයේ Travolution සඟරාව මගින් පවත්වන සංචාරක සේවා සම්මාන උළලේදී ලංකාවේ CodeGen මෘදුකාංග සමාගම 2016 වසරේ Technology Team of the year 2016 සම්මානය දිනාගෙන ඇත.

7] 2015 Asia Pacific ICT Alliance Awards (APICTA)  සම්මාන උළලේදී ලංකාවේ Zone24X7 සමාගම Gold award for the Best R&D Product සම්මානය දිනාගත්තේ ඔවුන් නිර්මාණය කල ‘AZIRO’ inventory robot නම්  රොබෝ තාක්ෂණය සඳහාය.






__________________________________________________________________________
Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Saturday, 22 July 2017

OPINION : ලින්කින් පාර්ක් හා වික්ටෝරියා පාර්ක්



ලින්කින් පාර්ක් හි චෙස්ටර් බෙනිංග්ටන් මියගොස් ඇත. 1976 උපන් චෙස්ටර් සිය දිවි නසා ගන්නා විට වයස 41කි. හෙදියක හා පොලිස් රහස් පරීක්ෂකයෙකුගේ දරුවකු වූයේය. චෙස්ටර්ට වසර 11දී සිය දෙමාපියන්ගේ දික්කසාදය දරාගැනීමට නොහැකිවූ අතර ඔහු මත්ද්‍රව්‍ය භාවිතයට පුරුදුවුනි.

දික්කසාදයෙන් පසු චෙස්ටර්ට පියා සමග වෙසෙන්නට සිදුවූයේ ඔහු නීතියෙන් චෙස්ටර්ගේ අයිතිය ලබාගත් නිසාය. එහෙත් වයස 17දී ඔහු මව සමග ජීවත්වන්නට පටන් ගත් අතර ඔහු මත් ලෝලියෙක් බව මව දැනගත් පසු නිවසේ දැඩි නීති පැනවින. එමපණක් නොව පාසලේදී වෙනත් සිසුන්ගේ ගැරහුමට හා ශාරීරික පීඩාවලටද ගොදුරුවිය. 

එක් පුවත් සාකච්ඡාවකදී චෙස්ටර් තමාට පාසැලේදි මැර සිසුන් බිම පෙරලාගෙන පහරදුන් බව පවසා සිටියා. තමා කෙට්ටු හා අමුතු පෙනුමක් ඇති ළමයෙකු නිසා එසේ පහරකෑමට ලක්වූ බව ඔහු පවසා සිටියා.  එපමණක් නොව තවත් එක් පුවත්පත් සාකච්ඡාවකදී ඔහු හෙලිකර සිටියේ වයස 7ක් තරම් ලාබාල අවධියේදී ඔහුව වැඩිහිටි පිරිමි ළමයෙකු ලිංගික අපචාරයට බඳුන්කල බවයි. වසර 6ක් පුරා මේ අන්දමට චෙස්ටර් ලිංගික අපයෝජනයට ලක්වුනත් ඔහු ඒ පිලිබඳව හෙලි නොකරසිටියේ සමලිංගිකයෙකු යයි සමච්චලයට බඳුන්වන්නට වේ යයි යන බියෙන්.

පාසැලෙන් අස්වී බර්ගර් කිං ආපනශාලා ජාලයේ සේවය කල ඔහු, පසුව ඉන් ඉවත්ව සිය ගායක ජීවිතය ඇරඹුවා. චෙස්ටර් බෙනිංග්ටන් ඇතුලත් ලින්කින් පාර්ක් සංගීත කණ්ඩායම ලෝක ප්‍රචලිත වන්නේ වසර 2000දී වෝනර් මියුසික් ලේබලය යටතේ නිකුත්කල සිය පලමු ඇල්බමය අතිශයින් ජනප්‍රියවීමෙන් පසුවයි.

කලක් තිස්සේ විවිධ ආබාධවලට ලක්වෙමින් සිටි චෙස්ටර් එක් සංගීතක් ප්‍රසංගයකදී සිදුකල රංගණයකදී වළලුකර ආබාධයකට ලක්වූ අතර එහෙත් දැඩි වේදනාව දරාගෙන මුලු ප්‍රසංගයම අවසන් කරනතෙක් වෛද්‍යාධාර පැතුවේ නෑ. ඔහුව පරීක්ෂාකල වෛද්‍යවරුන් ඔහුගේ අස්ථිබිඳීමක් සිදුවී ඇති බව නිරීක්ෂණය කලා. ඒ අනුව චෙස්ටර් බෙනිංග්ටන් ජීවිතයේ බොහෝ දුක්විඳ, අමාරුවෙන් ඉහලට හා මිනිසෙක් බව වටහාගන්නට පුලුවන්.

චෙස්ටර් ගැන දුක්වන්නන් හා ශෝක ප්‍රකාෂයට වලි දමන්නන්

මා ලින්කින් පාර්ක් ලෝලියෙකු නොවන අතර, එම කණ්ඩායමේ එකම ගීතයකට හෝ සවන්දී ඇතිබවක් මතක නෑ. නමුත් මා බටහිර මෙන්ම දේශීය සංගීතයද දැඩි ලෙස ප්‍රිය කරන්නෙක්. පාසැල් යන කාලයේ මිල්ටන්ගේ, කපුගේගේ සිංදු වගේම මැඩෝනාගේ, මයිකල් ජැක්සන්ගේ, ටීනා ටර්නර්ගේද ගීත එක ලෙස රසවින්ද අතර, සංගීතය යනු ජාතියක්, රටක් ලෙස වෙන්කරගත නොහැකි විශ්ව වින්දනයක් බව අදහනවා.

චෙස්ටර්ගේ මරණයත් සමග (මීට පෙර පෝල් වෝකර්ගේ මරණයේදී මෙන්ම) ඇතිවී තිබෙන ෆේස් බුකි රංඩුව ලංකාවේ නූතන පොදු සංස්කෘතියේ පිරිහීම විදහා දක්වනවා යන්න මගේ අදහසයි.

රෝගී අයිතිවාසිකම් ආරක්ෂාකිරීමට දිවිහිමියෙන් කැපවීම මත අඛණ්ඩ වැඩවර්ජන කරමින් රෝගීන්ට ප්‍රතිකාර නොකර සිටින මානව හිතවාදී, සුපිරි වෛද්‍ය පැලැන්තිය මෙන්ම නිදහස් අධ්‍යාපනය සුරකින්නටයි කියමින් ඉගෙන ගන්නා විශ්වවිද්‍යාල සිසු-සිසුවියන් පාරට දක්කමින් ගාටවන ගමන් අවුරුදු 3න් කල යුතු උපාධිය අවසන් නොකර, අවුරුදු 7ක් යනකන් විශ්වවිද්‍යාලයේ බින්න බැස සිටින සුපර්-බ්‍රයිට් සිසු නායකයින්ද සිටින මේ සංස්කෘතියේ ඉහලට සිට පහලටම අරක්ගනිමින් පුවත් මවන්නේ ආත්ම වංචණිකයින් බව පැහැදිලියි.

ඉතිහාසයේ කවදාක්වත් නැති තරමට සංඝයා විවේචනය කරනවා, සංඝයාට ගරහනවා යයි කියමින් ආණ්ඩුවට තග දමන මල්වතු-අස්ගිරිලා, ඉතිහාසයේ කවදාක්වත් නැති තරමට පිහිරී ඇති සඟ විනය ගැන වචනයක් වත් කතා කරන්නේවත්, අබැටක ක්‍රියාමාර්ගයක් නොගන්නේ ගිහියන්ට වඩා දරුණු ලෙස සඟ-සමාජය පිරිහී ඇති බැවින්.

පිරිහීම කෙතරම්ද යත් තමන්ගේ පිරිහීම නිසාම ලැබෙන ගැහැට බෞද්ධ විරෝධී ක්‍රියාදාම ලෙස අඳුනාගන්නට තරම්ම සඟ රජවරුන් මුග්ධවී ඇති සැටි කණගාටුදායක නොවේද? මල්වතු-අස්ගිරි නායකයින්ට අනුව වැරැද්ද ඇත්තේ සඟුන් දස වැඩ/සට්ටැඹි වැඩ කිරීම නොව සඟුන් කරන දසවැඩ/සට්ටැඹි වැඩ ගිහියන් විවේචනය කිරීම හා ජන මාධ්‍ය මගින් හෙලිකිරීමයි. සිවුර පොරොවාගෙන ඕනෑම පහත් වැඩක් කලද, ගිහියාට අවවාද උපදෙස් දෙන්නට, පසඟ පිහිටුවා වැඳුම් ලබන්නට මෙන්ම පහත් වැඩ ඉවසමින් උතුමන් ලෙස පිදුම් ලබන්නටද තමන්ට දේව වරම් ඇතැයි සිතන සඟ පරපුර සිටින්නේ කසාද බඳින සාදුලා සිටින මහායාන රටක නොව තේරවාද බෞද්ධ රටකයි.


මෙලෙස සඟ-වෙද-සරසවි සිසු වැනි සමාජයේ පෙරගමන්කරුවන්ගේ පිරිහීමේ, දැඩි අන්තවාදී ලෙස හැසිරීමේ ප්‍රතිපලයක් වන්නේ රු.99/- ඩේටා කාඩ් එකෙන් ෆේස් බුකියේ රඟන නූගත් මෝඩ බහුතරය තවත් චූන් වීමයි. තමන්ගේ අමන හැසිරීම, මුග්ධකම, මුඛරිකම සිංහල බෞද්ධකම ලෙස හඳුන්වාදෙන මේ සිඟාලයින් ලංකාවේ අනාගත භාරකරුවන් හා දරුපරපුරේ පියවරුන් (මෙසේ හැසිරෙන්නන් බොහෝවිට පිරිමින් හෝ පිරිමි ප්‍රොෆයිල්වලින් පෙනී සිටිනා ගැහැණු වීම නිසා) මෙන්ම ආණ්ඩු පත්කරන චන්දදායකයින් වීමත් කොතරම් වියවුල් සහගතද?

ඕනෑම හොරෙකු/තක්කඩියෙකු වුවද මළපසු පාංසකූලයදී උපාසක මහත්තයා යයි අමතා පින්පමුණුවන ජාතියක්ව සිටි අපට, කුඩාකල සිටම අපමණ දුක් ගැහැට විඳිමින් තම ක්ශේෂ්ත්‍රයේ හිනිපෙත්තට පැමිණ ලොව වටා අසන්නන්ගේ ජනාදරයට පාත්‍රවූ ලෝක ප්‍රකට ගායකයෙකු අවාසනාවන්ත ලෙස මිය ගියවිට එයට ශෝක ප්‍රකාශ කිරීම පොෂ්වීමට දැඟලීමක් නැතිනම් පට්ට ජෝක් එකක් වීම කොතරම් අවාසනාවක්ද?

දැන් පවතින ආණ්ඩුව පමණක් නොව ඊලඟට එන ආණ්ඩුවද, එහි දේශපාලකයින්ද බලයට ගෙන එන්නට චන්දය දෙන්නේ මෙවැන් ගොන්තඩි වීම රටේ අනාගතයට කෙතරම් අවදානමක්ද? අපිට චන්දෙ දෙන්න, අපි ආවොත් හම්බයෝ නැති කරනවා, දෙමළු කුඩුකරනවා, ලින්කින් පාක්ලා වික්ටෝරියා පාක් එකේ එල්ලනවා කීවොත් මේ රු.99/- ඩේටා කාඩ් සි-හෙළු-වන් උන්ව බලයට උස්සා නොතියන්නේද? ඊට පස්සේ මෙන්න මුන් අපිව කනෝ - රට කනෝ කිය කියා බුකිය දෙවනත් කරන්නේත් මේ රු.99/ බුකි දේශප්‍රේමීන්ම නේද?

හම්මේ ඉතින් නේද?





__________________________________________________________________________
Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________
Related Posts Plugin for WordPress, Blogger...