Related Posts Plugin for WordPress, Blogger...

Friday, 30 May 2014

අවුරුදු මිලියන 190ක් පැරණි ඩයිනොසෝර බිත්තර 340ක්

අවුරුදු මිලියන 190ක් පැරණි ඩයිනොසෝර බිත්තර තැන්පතුවක් අපි‍්‍රකාවෙන් හමුවී තියෙනවා. එහි බිත්තර 340ක් තියෙනවා. මෙතෙක් හමු වී ඇති ඉතාමත් පැරණි බිත්තර තැන්පතුව මෙයයි. ඩයිනොසෝරයන්ගේ බිත්තර දැමීමේ හා බිත්තර රැුකීමේ පුරුදු ගැන, ඔවුන්ගේ ප‍්‍රජනක චර්යාවන් ගැන හදාරන්න හොඳම අවස්ථාවක් මෙයින් ලැබෙන බවයි, විද්‍යාඥයන්ගේ අදහස වන්නේ.

බිත්තර තැන්පතු

මෙම බිත්තර රාශිය හමු වූ කැණීම් බිම ඇත්තේ දකුණු අපි‍්‍රකාවේයි. ජොහැන්නස්බර්ග් නුවර සිට කිලෝමීටර් 350ක් පමණ දුරින් පිහිටි ගෝල්ඩන් ගේට් හයිලන්ඞ්ස් ජාතික වනෝද්‍යානය ඨදකාැබ ඨ්එැ ්‍යසටයක්බාි භ්එසදබ්ක ඡු්රන තුළ වූ මේ කැණීම් බිමෙහි ඇති කැදැලිවල බිත්තර දමා ඇත්තේ මැසොස්පොන්ඩිලස් නම් ඩයිනොසෝර විශේෂයයි. මෙහිදී හමු වී තියෙනවා, බිත්තර තැන්පතු රාශියක්. ඒ විතරක් නොවෙයි, මෙහි තිබී විද්‍යාඥයන්ට සොයා ගෙන තියෙනවා, ඩයිනොසෝරයන්ගේ අත්වල සලකුණුත්. මේවා හමුවී ඇත්තේ පොසිල ආකාරයෙනුයි. මේ අනුව විද්‍යාඥයන් විස්මිත හෙළිදරවුවක් කර ගෙන තියෙනවා. ඒ තමා බිත්තර දැමූ පසුත් ඒවා රැුක පැටවුන් ආ පසු ඔවුන් ප‍්‍රමාණයෙන් දෙගුණයක් වන තෙක් තමන් බිත්තර දැමූ කැදැල්ලටම ඩයිනොසෝර අම්මලා විටින් විට ඇවිත් ගිය බව.

කැනඩාවේ ඔන්ටාරියෝ රාජකීය කෞතුකාගාරයේ පෘෂ්ඨවංශික පොසිලවේදය (පාෂාණභූතී ද්‍රව්‍ය පිළිබඳ විද්‍යාව* පිළිබඳ සම සංරක්ෂක ඬේවිඞ් එවන්ස් කියන්නේ: ”ඩයිනොසෝරයන්ගේ පොසිල අපට කොතෙකුත් හමුවෙලා තියෙනවා. ඒත් ඔවුන්ගේ ප‍්‍රජනක ජීව විද්‍යාවට අදාළ පොසිල තොරතුරු ඇත්තේ ඉතාමත් ස්වල්පයක් පමණයි. විශේෂයෙන් ම ඉතා පැරණි ඩයිනොසෝරයන්ගේ බිත්තර ගැන හදාරන්න මෙය අනගි අවස්ථාවක්” කියලයි.

පරිණාමීය බව



”වසර මිලියන 190ක් පැරණි මේ විස්මිත කැදලි සමූහය අපට ප‍්‍රථම වතාවට අවස්ථාව සපයා තියෙනවා, ඩයිනොසෝරයන්ගේ පරිණාමීය ඉතිහාසයේ මුල් යුගයේ ප‍්‍රජනනය පිළිබඳව අධ්‍යයනය කරන්න.” මෙසේ කියන්නේ පොසිල විද්‍යාඥයකු වන මහාචාර්ය රොබට් රීස් ඒ දුර්ලභ අධ්‍යයනය ගැන සඳහන් කරමිනුයි.
මෙම කැදලිවල එකක බිත්තර 34 බැගින් ළං ළංව අසුරා තියෙනවා. අවසාදිත පාෂාණ අතර රැුඳි මේ පොසිලවලින් හෙළිවන්නේ ඔවුන් රංචු වශයෙන් එක් ප‍්‍රදේශයක් තෝරාගෙන කැදලි තනා බිත්තර දමා ඇති බවයි. මීටර 6ක් පමණ දිගින් යුත් ඩයිනොසෝර මවගේ සිරුරේ ප‍්‍රමාණයේ හැටියට මේ බිත්තර ඉතා කුඩයි. ඒ බිත්තරයක විශ්කම්භය 6-7 ජප ක් පමණ වෙනවා. මේ කැදලිවල බිත්තර අසුරා ඇති අන්දම අනුව බිත්තර දැමූ පසු මව විසින් ඒවා එකටෙක ළංකර තබන්නට ඇතැයි යන්න මේ පිළිබඳව අධ්‍යයන කළ රොබට් රීස් කියනවා.

පැරණිම කලලය

මහාචාර්ය රීස් වැඩිදුරටත් කියන්නේ, ”මේ බිත්තර, කලලයන් හා කැදලි හමුවී ඇත්තේ කන්දක් කැපූ පාරක මීටර 25ක පමණ පාෂණ තීරුවකයි. අපට මෙහි කැදලි දහයක් පමණ හමුවුණා. අපට හිතෙනවා තවත් මෙවැනි කැදලි රැුසක් කන්ද මුදුනේ ප‍්‍රපාතාකාර බෑවුමේ ඇති කියලා. කාලගුණික කි‍්‍රයාවන් නිසා ඒවා නුදුරු අනාගතයේ දීම විනාශ වී යාමට ඉඩ ඇති බවයි.”

මේ පොසිල හමුවී ඇත්තේ මුල් ජුරාසික අවධියට අයත් අවසාදිත පාෂණ අතරෙයි. මැසොස්පොන්ඩිලස් නම් ඩයිනොසෝර විශේෂයට අයත් මෙතෙක් සොයා ගෙන ඇති පැරණිම කලලය මතු කර ගනු ලැබුවේත් මේ ස්ථානයේදිමයි. මෙම මැසොස්පොන්ඩිලස් ඩයිනොසෝරයන් දිගු බෙල්ලක් ඇති ශාක භක්ෂකයන්. ජුරාසික හා ක්‍රෙටීසියානු අවදිවලට අයත් සතුන් යෝධ සතුන් විශේෂයක්.

Source : http://www.wijeya.lk/archives/417

2013 නොබෙල් ත්‍යාගලාභියෝ


නොබෙල් ත්‍යාග ප්‍රදානය, 1901 වසරේ සිට වාර්ෂිකව සිදු කෙරේ. සාහිත්‍යය, විද්‍යාව, වෛද්‍ය විද්‍යාව සහ සාමය යන ක්ෂේත්‍රවලින් ලෝකයාගේ යහපත උදෙසා කැපී පෙනෙන සේවාවක් කරන පුද්ගලයන්ට සහ ආයතවලට නොබෙල් සම්මාන ප්‍රදානය කෙරේ. නොබෙල් ත්‍යාග ප්‍රදානය කෙරෙන්නේ, ජීවතුන් අතර සිටින විශිෂ්ටයන්ටය.

නොබෙල් ත්‍යාග ප්‍රදානය සිදුවන්නේ, ස්වීඩන ජාතික විද්‍යාඥයකු මෙන්ම නව නිපැයුම්කරුවකු ද වූ ඇල්ෆ්‍රඞ් නොබෙල්ගේ සංකල්පයකට අනුවය. ඩයිනමයිට් සොයා ගත් තැනැත්තා ඇල්ෆ්‍රඞ් නොබෙල්ය.
ඇල්ෆ්‍රඞ් නොබෙල් උපන්නේ 1833 වසරේය. ඔහු මියගියේ 1896 දීය. වයස අවුරුදු 17 වෙද්දී, ඔහුට භාෂා පහක් චතුර ලෙස කතා කිරීමට හැකියාව ලැබී තිබුණි. ඔහු ස්ඞීනයේ පිළිගත් විද්‍යාඥයෙක්, නව නිපැයුම්කරුවෙක්, ව්‍යාපාරිකයෙක්, සාමයට ලැදි අයෙක් මෙන්ම ගත් කතුවරයෙක් ද වෙයි. එපමණක් නොව, ඔහු පේටන් බලපත්‍ර 355 ක හිමිකරුවෙකි.

ඩයිනමයිට් ලොවට හඳුන්වා දීමෙන්, ලෝකයට යහපතක් වූවාට වඩා සිදුවුණේ අයහපතක් බවත්, ඇල්ෆ්‍රඞ් නොබෙල් ‘මරණයේ වෙළෙන්ඳකු’ බවත් ප්‍රංශ පුවත්පතක් වාර්තා කළේය. එම ප්‍රවෘත්ති වාර්තාවෙන් නොබෙල්ගේ සිත පෑරුණේය. ලොවට කැපීපෙනෙන උත්තරීතර සේවයක් කරන පුද්ගලයන් හෝ ආයතන හඳුනාගෙන ඔවුන් ඇගැයීමේ අදහසක් ඔහුට පහළ වූයේ එම අවස්ථාවේදීය.

1895 වසරේ දී ඇල්ෆ්‍රඞ් නොබෙල් සිය අන්තිම කැමැත්ත සකස් කළේය. නොබෙල් ත්‍යාග ප්‍රදානයට මුදල් ලබා දීම සිදුවන්නේ නොබෙල්ගේ එම අන්තිම කැමැත්ත හරහාය. ආරම්භයේදී නොබෙල් ඊට එක් කළ මුදල ඇමෙරිකන් ඩොලර් මිලියන 265 ක් පමණ විය.

අද වන විට ත්‍යාග ප්‍රදානය සහ මුදල් ප්‍රතිපාදන සැපැයීම සිදුවන්නේ ‘නොබෙල් පදනම’ මගිනි. එය, 1900 පිහිටුවූ පෞද්ගලික ආයතනයකි. පිහිටා ඇත්තේ ස්වීඩනයේ ස්ටොක්හෝල්ම් නුවරය. නොබෙල් ත්‍යාග සඳහා සුදුස්සන් තෝරා ගැනීම සිදුකරන්නේ විද්වත් මණ්ඩල සහ ඒ ඒ ක්ෂේත්‍රයන්ට අදාල පිළිගත් ආයතන එකමුතු වීමෙනි.

නොබෙල් ත්‍යාගලාභීන්ට රන් පදක්කමක්, සහතික පත්‍රයක් සහ මුදල් තෑග්ගක් හිමිවෙයි. නාම යෝජනා බාර ගැනීමෙන් පසු, ත්‍යාග පිරිනැමෙන්නේ කාටදැයි නොබෙල් කමිටුව ප්‍රකාශ කරන්නේ සෑම වසරකම ඔක්තෝබර් මාසයේ දෙවැනි සතියේය. ත්‍යාග ප්‍රදානය සිදුවන්නේ දෙසැම්බර් 10 වැනිදා ස්ටොක්හෝල්ම් නුවරය. ඇල්ෆ්‍රඞ් නොබෙල් මියගියේ දෙසැම්බර් 10 වැනිදාය.

ආර්ථික විද්‍යාව වෙනුවෙන් නොබෙල් ත්‍යාගයක් පිරිනැමීමට ඇල්ෆ්‍රඞ් නොබෙල් අදහස් කරගෙන නොසිටියේය. ඔහුගේ අවසන් කැමැති පත්‍රයේ එවැන්නක් සඳහන් වී නැත. ආර්ථික විද්‍යාව වෙනුවෙන් නොබෙල් ත්‍යාග පිරිනැමීම සිදුවුණේ නොබෙල් කමිටුවේ සංකල්පයකට අනුව 1968 වසරේ සිටය.
සාමය වෙනුවෙන් පිරිනැමෙන නොබෙල් ත්‍යාගය අතිශයින් වැදගත් වෙයි. මෙවර ඒ සඳහා පාකිස්තානයේ බාලිකා අධ්‍යාපනය වෙනුවෙන් හඬ නැගීමේ වරදට තලේබාන් ඉස්ලාමීය ත්‍රස්තවාදීන්ගේ වෙඩි ප්‍රහාරයකට ලක් වී සුවය ලැබූ 16 හැවිරිදි මලාලා යූසොෆ්සායි ද සිටින්නීය. 2013 වසර සඳහා පිරිනැමෙන නොබෙල් සාම ත්‍යාගය ඇයට හිමිවුවහොත් එම ත්‍යාගය හිමිවන ලාබාලම තැනැත්තිය වන්නේ ද ඇයයි. මලාලා දැරිය ඇතුළුව, මෙවර නොබෙල් සාම ත්‍යාගයට 259 දෙනකුගේ නම් ඉදිරිපත් වී තිබුණි. නොබෙල් සාම ත්‍යාගය වෙනුවෙන් වැඩියෙන්ම නම් ඉදිරිපත් වූයේ මෙම වසරේ වීම සුවිශේෂි සිදුවීමක් ද වෙයි. ඔවුන් අතර සිරියානු අර්බුදයට සාමකාමී විසඳුමක් සෙවීමට මැදහත්වී කටයුතු කළ රුසියානු ජනපති ව්ලැඩිමීර් පුටින් ද සිටී. ඊට අමතරව ඇමෙරිකා රහස් ලොවට හෙළි කළ ඇමෙරිකානු සෙබළ බ‍්‍රැඞ්ලි මෑනිං මෙන්ම විකිලීක්ස් වෙබ් අඩවියේ සංස්කාරක ජුලියන් ඇසේන්ජ් ද සිටිති.

නොබෙල් සාම ත්‍යාගය

කෙසේ නමුත් වසරේ නොබෙල් සාම ත්‍යාගය හිමිවුණේ එක්සත් ජාතීන්ගේ රසායනික අවි පිටුදැකීමේ අධීක්ෂණ සංවිධානයටය. වසර දෙකකට වැඩි කාලයක් දිග්ගැස්සෙමින් පවතින සිරියානු අර්බුදය, තෙවැනි ලෝක යුද්ධය තෙක් දුර දිග යෑම වැළැකුණේත් ලෝක සාමය සුරැුකුණේත්, එක්සත් ජාතීන්ගේ රසායනික අවි පිටුදැකීමේ අධීක්ෂකයන් එම අර්බුදයට මැදිහත් වීම නිසාය. ඒ අනුව, 2013 නොබෙල් සාම ත්‍යාගය, එම සංවිධානයට පිරිනැමීමට තිරීණය කළේ යැයි හේතුපාඨ වශයෙන් නොබෙල් කොමිටුව පවසා ඇත.
ලෝකයේ රසායනික අවි සම්බන්ධයෙන් සොයා බලන්නේත් ඒවා තහනම් කිරීමට පියවර ගන්නේත් එක්සත් ජාතීන්ගේ රසායනික අවි පිටුදැකීමේ අධීක්ෂණ සංවිධානයයි. මෙම සංවිධානය පිහිටුවූයේ 1997 වසරේදීය. සිරියානු අර්බුදය සම්බන්ධයෙන් ලෝකය බල කඳවුරු දෙකකට බෙදී සිටී. සිරියානු ජනපති බෂීර් අල් අසාද්ගේ රජයට රුසියාව සහාය දෙද්දී, ඇමෙරිකාව, බි‍්‍රතාන්‍යය සහ ප්‍රංශය කැරැුලිකාර පාර්ශ්වයට සහාය දෙයි. එම අර්බුදය තවත් දුරදිග ගියේ නම්, තෙවැනි ලෝක යුද්ධය ඇරැුඹේවි යැයි බොහෝ දෙනා බිය පළ කළහ.

සිරියානු ජනපති අසාද්ගේ රජය, ඔවුන් සතු රසායනික අවි යොදා ගනිමින් පහර දී සිවිල් වැසියන් ඝාතනය කරනවා යැයි චෝදනා එල්ල වෙද්දී, සිරියාවට ගොස් ඒ ගැන සොයා බැලූවේ එක්සත් ජාතීන්ගේ රසායනික අවි පිටුදැකීමේ අධීක්ෂණ සංවිධානයේ නියෝජිතයන් සහ අවි පරීක්ෂකයන්ය.

මේවනවිට රුසියාව, සිරියානු රජය සහ ඇමෙරිකාව එක් වී, එකඟතාවයකට පැමිණ සිටින අතර, සිරියානු රජය ඔවුන් සතු රසායනික අවි අන්තර් ජාතික පාලනයකට නතු කර ඇත. එම අවි විනාශ කිරීමේ මෙහෙයුම් ද ආරම්භ වී ඇත. මේ සියල්ල සිදුවන්නේ ද එක්සත් ජාතීන්ගේ රසායනික අවි පිටුදැකීමේ අධීක්ෂණ සංවිධානයේ මෙහෙයවීම යටතේය. රන් පදක්කමට අමතරව, එම සංවිධානයට ඇමෙරිකන් ඩොලර් මිලියන 1.5 ක ත්‍යාග මුදලක් ද හිමිවෙයි.



වෛද්‍ය විද්‍යා නොබෙල් තෑග්ග

වෛද්‍ය විද්‍යාව වෙනුවෙන් නොබෙල් තෑග්ග විද්‍යාඥයන් තිදෙනෙකු අතරේ සමව බෙදී ගියේය. ජේම්ස් ඊ රොත්මන්, රැුන්ඩි ෂෙක්මන් සහ තෝමස් සුඩොෆ් යනු ඔවුන් තිදෙනාය. ජේම්ස් ඊ රොත්මන්, රැුන්ඩි ෂෙක්මන් ඇමෙරිකානු ජාතික විද්‍යාඥයන් වන අතර, තෝමස් සුඩොෆ් ජර්මන් ජාතික විද්‍යාඥයෙකි. මොවුන්ට නොබෙල් ත්‍යාගය හිමිවන්නේ මිනිස් සිරුරේ ෙසෙල ආශ‍්‍රයෙන් සිදුකළ නව සොයා ගැනීම් ඇගයීමට ලක් කරමිනි.

රසායන විද්‍යා නොබෙල් තෑග්ග

රසායන විද්‍යාව සම්බන්ධයෙන් පිරිනැමෙන නොබෙල් ත්‍යාගය විද්‍යාඥයන් තිදෙනකුට පිරිනැමීමට, නොබෙල් කමිටුව ඉකුත් 9 වැනිදා තීරණය කළේය. ඔවුන් තිදෙනා ඇමෙරිකා ඔස්ටි‍්‍රයානු පුරවැසියකු වන මාර්ටින් කාර්පුස්, ඇමෙරිකා බි‍්‍රතාන්‍ය පුරවැසියකු වන මයිකල් ලෙවිට් සහ ඇමෙරිකා ඊශ‍්‍රායල පුරවැසියකු වන ආර්යි වෝෂෙල්ය.

භෞතික විද්‍යා නොබෙල් තෑග්ග

Peter Higgs
Franciois Englert
භෞතික විද්‍යාව වෙනුවෙන් පිරිනැමෙන තෑග්ග විද්‍යාඥයන් දෙදෙනකු අතරේ බෙදී ගියේය. ඒ, සර්න් න්‍යෂ්ටික පර්යේෂණායතනයේ විද්‍යාඥයන් දෙදෙනකු අතරේය. ඔවුන් දෙදෙනා හිග්ස් බෝසෝනය ලොවට හඳුන්වා දුන් විද්‍යාඥ පීටර් හිග්ස් සහ ඔහුට සහාය දුන් විද්‍යාඥ ෆ්‍රන්සුවා එන්ග්ලේය.

නොබෙල් සාහිත්‍ය තෑග්ග

සාහිත්‍යය සඳහා පිරිනැමෙන නොබෙල් ත්‍යාගය මෙවර හිමිවූයේ, කැනෙඩියානු ජාතික ගත්කතුවරියකටය. ඇය ඇලිස් මුන්රෝය. 82 වැනි වියෙහි පසුවන මුන්රෝ, පසුගිය දශක කිහිපය පුරා විවිධ සම්මාන වලින් පිදුම් ලබා ඇති අතර, ඇය පසුගිය වසර කිහිපය තුළ විශාල සාර්කත්වයක් අත්පත්කර ගත් තැනැත්තියකි. විනීත, සැහැල්ලූවෙන් කටයුතු කරන නිහතමානි චරිතයක් ලෙස ද බොහෝ දෙනා විසින් හඳුන්වනු ලබයි.
1931 ජූලි 10 වැනිදා කැනඩාවේ වින්හැම්හි ඔන්ටෝරියෝහිදි ඇය උපත ලැබුවාය. ඇයට අවුරුදු 11 සම්පූර්ණ වනවිටම ඇය ලේඛිකාවක වන බව ඇය විසින්ම තීරණය කර ගෙන තිබුණාය. කැනඩාවේ උපත ලද තවත් ශ්‍රේෂ්ඨ ලේඛිකාවක් වන මාග‍්‍රට් ඇට්වුඞ්ට වඩා  සම්පූර්ණයෙන් වෙනස් චරිතයක් ලෙස විචාරනයන් විසින් මුන්රෝව හඳුන්වනු ලබයි. ඇයගේ පළමු කෘතිය ඇය බටහිර ඔන්ටෝරියා විශ්ව විද්‍යාලයේ ඉගෙනුම ලබන විට ප්‍රකාශයට පත්කළ අතර ඒ 1950 වසරේදිය.

 ආර්ථික විද්‍යා නොබෙල් තෑග්ග

ආර්ථික විද්‍යාව වෙනුවෙන් පිරිනැමෙන නොබෙල් ත්‍යාගය ද තිදෙනකු අතරේ බෙදී ගියේය. ඒ, යූජීන් එෆ් ෆැමා, ලාර්ස් පීටර් හැන්සන් සහ රොබට් ජේ සිලර් අතරේය. යූජීන් එෆ් ෆැමා ඇමෙරිකානු ජාතික ආර්ථික විශේෂඥයෙකි. හැන්සන්, ඇමෙරිකාවේ චිකාගෝ සරසවියේ මහාචාර්යවරයෙකි. රොබට් ජේ සිලර්, ඇමෙරිකාවේ යේල් සරසවියේ මහාචාර්යවරයෙකි. නොබෙල් ත්‍යාගලාභීන්ගේ නම් ප්‍රකාශ කර අවසන් වී ඇතත්, ඔවුන්ට සම්මාන ප්‍රදානය සිදු කෙරෙනු ඇත්තේ එළැඹෙන දෙසැම්බර් 10 වැනිදාය.

Source: http://www.wijeya.lk/archives/642

Saturday, 24 May 2014

දේශීය ඉංජිනේරුවන්ගේ දැනුමෙන් තැනූ, අඩි 18,000ක් දිග ලක්ෂපාන උමග

ලංකාවේ ජල විදුලිබල පද්ධතියේ දේශීය ඉංජිනේරු දැනුමෙන් නිමවුණු, නව ලක්‍ෂපාන විදුලි බලාගාරයට කැනියන් ජලාශයේ සිට ජලය ගෙන එන අඩි 18600 ක්‌ දිග, එනම් කිලෝ මීටර් හයක් දිග උමං මාර්ගය නිරීක්‍ෂණයට ලක්‌ කිරීමේ අවස්‌ථාවය. 1974 වසරේදී ක්‍රියාවට නැඟෙන මෙම නව ලක්‍ෂපාන විදුලි බලාගාරය සඳහා ජලය ගෙනඑන උමං මාර්ගය තැනීමේ කටයුතු 1969 වසරේදී ආරම්භ කෙරෙන අතර සම්පූර්ණයෙන්ම දේශීය ඉංජිනේරු ඥනය යොදා ගනිමින් එය සිදුකෙරෙන්නෙකි. එතැන් පටන් පුරා වසර 40 කට වැඩි කාලයක්‌ තිස්‌සේ දේශයට ජල විදුලිය උත්පාදනය කරමින් නව ලක්‍ෂපාන බලාගාරයද එම උමං මාර්ගයද කැනියොන් ජලාශයද ජාතියට සලසා ඇත්තේ අනුපමේය සේවාවකි. මෙම වසර 40 තුළදී මෙම විදුලි බලාගාරය කෙසේ වෙතත් උමං මාර්ගයේ කිසිදු අලුත්වැඩියාවක්‌ සිදුකෙරී තිබුණේ නැත. එහෙත් 1976 දී පටන් මෙම උමං මාර්ගය සුවිසල් නළ දෙකකට සම්බන්ධවී බලාගාරය දක්‌වා ගෙන එන ගමන් මාර්ගය ආරම්භයේ එනම් උමං පිටවුම අසලින් ජල කාන්දුවක්‌ වාර්තාවන්නට පටන් ගත්තේය.
නමුත් 1994 වසර දක්‌වා එය උමං කාන්දුවක්‌ ලෙස හඳුනාගෙන නොතිබූ අතර නල්ලතන්නිය ශ්‍රීපාදය දෙසට යන බොහෝ සංචාරක පිරිස්‌ දිය නෑවේද මෙම උමං පිටවුම අසල දිය උල්පත් වලිනි. එපමණක්‌ නොවේ උල්දිය ව්‍යාපෘතිය ලෙසින් නම් කෙරුණු ජල ව්‍යාපෘතියක්‌ද මෙම දිය උල්පත් භාවිතයට ගෙන ක්‍රියාවට නැඟුණේය.

කැනියොන් ජලාශයේ සිට මෙසේ අප ඇතුල් වූ උමං පිටවුම දක්‌වා අඩි 18,600 ක දිගකින් සමන්විත මෙම උමඟේ උස මීටර් 3.1 කි. පළල මීටර් 3.6 කි. උමං පිවිසුම් කට මුහුදු මට්‌ටමේ සිට අඩි 3100 ක්‌ ඉහළින් පිහිටා ඇති අතර උමං පිටවුම් කට පිහිටා ඇත්තේ මුහුදු මට්‌ටමේ සිට අඩි 2881 ක්‌ තරම් උසකිනි. එනම් උමගයේ ආතතිය අඩි 219 ක්‌ දක්‌වා වෙනසක්‌ ඇතිවන පරිදි තනා තිබේ. මෙසේ තනා ඇති ප්‍රධාන උමඟය පොළොව මතුපිට සිට මීටර් 300 ක්‌ ගැඹුරින් ගමන් ගන්නා අතර. ස්‌ථාන දෙකකදී උමඟ තුළට ප්‍රවේශ විය හැකි පරිදි තවත් පැති උමඟ දොරටු දෙකකින් සම්බන්ධ කෙරේ. ඒ, උමඟ තැනීමේදී අභ්‍යන්තර සුන්බුන් ඉවත් කිරීම, පහසුකම් සැපයීම, වාතනය වැනි කටයුතු සඳහා වන අතර මෙවන් ප්‍රතිසංස්‌කරණයකදී ද සේවා හා පහසුකම් උමඟ තුළටත් උමඟයෙන් පිටතටත් ලබා ගැනීම සිදුවන්නේ ද මෙම පැති උමඟ මගිනි.
එක්දහස් නවසිය හැත්තෑ හතර වසරේදී ආරම්භ කෙරුණ නව ලක්ෂපාන බලාගාරය මස්කෙළිය ඔය සම්බන්ධ කරගෙන කැනියොන් පොකුණ හරහා ජලය ලබා ගනිමින් U හැඩැති උමං මාර්ගයක් දිගේ ගමන් කර ජල විදුලිය නිපදවන්නේය. මේ සඳහා භාවිත කැරෙන ටර්බයින වර්ගය වන්නේ පෙල්ටන්ය. උමං මාර්ගය ප්‍රතිසංස්කරණ කැරෙන අතරේම මෙම විදුලි උත්පාදක යන්ත්‍ර ද ප්‍රතිසංස්කරණය කරනු ලැබේ. කෙසේ වෙතත් ලක්ෂපාන බලාගාරවල වාර්ෂිකව ගි. වො. පැය 1400 ක විදුලියක් නිපදවේ.

උමං මාර්ගය තැනු කාලයේ පටන්ම එහි සුළු දිය කාන්දුවක් තිබී ඇත. එක්දහස් නවසීය හැත්තෑ හයේ දී පමණ මේ දිය කාන්දුව නිසා උමඟ අවට පදිංචි ජනතාව බියට පත්ව ගම්බිම් අතහැර දමා ගොස් ඇත. කාලයත් සමඟ ජල කාන්දුව වැඩිවී ඇති අතර එය තත්පරයට වතුර ලීටර් 250 - 300 අතර කාන්දු වීමක් දක්වා වර්ධනය වී තිබේ. උමං මඟ දිගේ කාන්දු වන ජලය දිය උල්පතකින් එන ජලය යැයි සිතු ගැමියෝ ඒවා ප්‍රයෝජනයට ගෙන ඇත. පසුගිය කාලය පුරාම නල්ලතන්නිය හරහා සිරිපාදේ ගිය ජනතාව උමං මාර්ගයෙන් කාන්දු වී කඳු මැදින් පීලිවලින් ගැලු ජලයෙන් ස්නානය කර ඇත.

ප්‍රධාන ඉංජිනේරු හේරත් මහතා කියන පරිදි ලක්‍ෂපාන උමඟයේ දිය කාන්දුව ඇතිව තිබෙන්නේ මෙසේ මීටර් සියයක යකඩ සිලින්ඩරය නිමාවෙන් පසු සෘජුවම ස්‌වාභාවික පාෂාණයට නිරාවරණය වූ මීටර් 54 ක කලාපයයේය. හුණු ගලෙන් සමන්විත මෙම ප්‍රදේශය පසුගිය අවුරුදු 40 ක කාලයේදී ජලය සමග ක්‍රියා කිරීම හේතුවෙන් දැඩි ඛාදනයකට ලක්‌ව තිබූ බව හේරත් මහතා සඳහන් කළේය. ඇතැම් තැන්වල විශාල ආවාට ආකාරයට හුණු ගල් තුළ කුහර සෑදී තිබුණු බවද සඳහන් කළ ප්‍රධාන ඉංජිනේරුවරයා කියා සිටියේ මෙම ආවාට ඔස්‌සේ කාන්දු වූ ජලය උල්පත් මෙන් පහළ ජනාවාස සහිත පරිසරයට ගලා ගිය බවට හඳුනාගත් බවයි.
මේ අනුව මෙසේ අවදානම් කලාපයක්‌ ලෙස හඳුනාගත් මීටර් 54 ක්‌ වූ හුණුගල් පාෂාණමය උමං කොටස කොන්ක්‍රීට්‌ ආස්‌තරණය යොදා, ආවාට වසා පිළිසකර කරන්නට විදුලිබල මණ්‌ඩලයේ ඉංජිනේරුවරු තීරණයකට එළැඹියහ. උමඟයේ ප්‍රතිසංස්‌කරණ කටයුතු ඇරඹුණේ ඉන්පසුවය. මීට අදාළ මුදල් ප්‍රතිපාදන පිළිබඳව වෙනම කතා කළ යුතු වුවත්, රටේම වාසනාවකට මෙන් මීට අදාළ වියදම් ඇස්‌තමේන්තුව වශයෙන් රුපියල් මිලියන 145 ක්‌ කලට වේලාවට ලැබීමේ ප්‍රතිඵලයක්‌ ලෙස ලක්‍ෂපාන උමඟයේ ප්‍රතිසංවර්ධන කටයුතු ඇරඹිණ. ලෝක බැංකු ආධාර යටතේ වේලි ආරක්‍ෂණ ව්‍යාපාතියෙන් රුපියල් මිලියන 100 ක්‌ද, විදුලි බල මණ්‌ඩලයෙන් රුපියල් මිලියන 45 ක්‌ ද ලෙස මෙසේ මුදල් ලැබී තිබිණි.

Photo Credit: Silumina, 09/03/2014
Sources:
http://www.silumina.lk/2014/03/09/_art.asp?fn=af1403091&p=1
http://www.divaina.com/2014/05/25/nimna01.html

Saturday, 17 May 2014

වෙනත් ග්‍රහලෝකයක පදිංචියට යන ගවේශකයින් ආහාර සපයගන්නේ කෙසේද?

හවායි දූපතේ පිහිටි නාසා ආයතනයේ HI-SEAS පර්යේෂණාගාරය

ඉදිරි අනාගතයේදී වෙනත් ග්‍රහලෝකයක (උදා: අඟහරු ) පදිංචියට යන පෘථිවි වාසීන් කෑම සපයාගන්නේ කෙසේදැයි යන පැනය විද්‍යාත්මක පර්යේෂණ හා ගවේෂණ රාශියකට උදෘතය වී තිබෙනවා. දැනට නිර්මාණය කොට ඇති  විසඳුම්වලට අනුව වෙනත් ග්‍රහලෝකයක පදිංචියට යන්නවුන් මුලින්ම හයිඩ්‍රොෆොනික් ක්‍රමයට වගාකිරීම සිදුකරනු ඇති. හයිඩ්‍රොෆොනික් ක්‍රමය යටතේ පැල පසෙහි සිටුවීමක් සිදු නොවන අතර ඒවා ආධාරක මත රඳවා විශේෂයෙන් සකසන ලද පෝශක ද්‍රාවණයක මුල් ඇදෙන්නට සලස්වනවා. බොහෝ බෝග වර්ග මෙලෙස සාර්ථකව වගාකල හැකිබව පර්යේෂණ වලදී පෙනීගොස් තිබෙනවා.

වෙනත් ග්‍රහලෝකයකදී ආහාර සපයාගැනීම පිලිබඳව පර්යේෂණ සිදුකරන අමෙරිකාවේ කෝනෙල් විශ්වවිද්‍යාලයේ ආචාර්ය ජීන් හන්ටර් පවසන ආකාරයට මුලින්ම ඉක්මණින් වැවෙන සලාද කොලවර්ග, කැරට්, බීට්, කොළ ගෝවා, තක්කාලි, පිපිඤ්ඤා වැනි ආහාරවර්ග මුලින්ම වගාකිරීම ආරම්භ කල යුතුයි. ඒ, එවැනි එළවළු වර්ග ඉක්මණින් වැඩී පලදාව ලබාදෙන බැවින් හා එතරම් අපහසුවකින් තොරව කුඩා ඉඩ ප්‍රමාණවල වගාකරගත හැකි බැවිනුයි. දෙවැනි පියවර ලෙස කාබෝහයිඩ්‍රේට සපයන අල, බතල හා තිරිඟු, ඉරිඟු හා ගොයම් වගාකිරීම ආරම්භ කල හැකියි. ප්‍රෝටීන බෝග (මාංශ බෝග ) වගාකිරීම තෙවන පියවර වනවා. කෙසේවෙතත් බොහෝ කාළයක් යනතුරු වෙනත් ග්‍රහලෝකවල කොළණි පිහිටුවාගන්නා පෘථිවි වැසියන්ට ශාකමය ආහාරවේලකින් (vegetarian) යැපෙන්නට සිදුවනු ඇති. ඒ වෙනත් ග්‍රහලෝකයක සත්වපාලන සිදුකිරීම පිලිබඳව පර්යේෂණ සිදුවී ඇත්තේ ඉතා අවමයෙන් නිසා.

කේසේ වේතත් කොළණි වැසියනටට සත්ව ප්‍රෝටීන ලබාගැනීම සඳහා ප්‍රෝටීන අධික කෘමිසතුන් ඇතිකිරීමේ හැකියාව තිබෙන බව ඔවුන් පවසනවා. එපමණක් නොව, මෙලෙස කුඩා ඉඩ ප්‍රමාණවල බෝග වගාව ඉතා අකාර්යක්ශම අධික ශ්‍රමයක් වැයවෙන කටයුත්තක් බව පවසන මහාචාර්ය හන්ටර් කොළණි වැසියනට සිය දෛනික කාලයෙන් විශාල ප්‍රමාණයක් ආහාර නිපදවාගැනීම සඳහා වැය කරන්නට සිදුවිය හැකිබවට අණතුරු අඟවනවා. කොතරම් සාර්ථක ලෙස වගාකටයුතු සිදුකල හැකිවූවත් අඟහරු වැනි ග්‍රහයෙකු මතට ගොඩබසින ගවේශකයින් මාස 6 සිට වසරක පමණ කාළයකට සෑහෙන ආහාර රැගෙන යායුතු වනවා. නැත හොත් කලින් කලට පෘථිවියෙන් එවිය යුතු වනවා. ඒ අවශ්‍ය ගොඩනැගිලි නිර්මාණය කරගෙන වගාව ආරම්භ කිරීමට කල් ගතවන බැවිනුයි.

මේ පිලිබඳව වැඩිදුර හැදෑරීම සඳහා අපූරු පර්යේෂණයක් නාසා ආයතනය මගින් හවායි දූපතේ පිහිටවූ පර්යේෂණාගාරයක සිදුකරනු ලැබුවා. Hawaii Space Exploration Analog and Simulation (HI-SEAS) ලෙස හඳුන්වන ලද මෙය සීල් තැබූ පර්යේෂණාගාරයක්. අමෙරිකාවට අයත් හවායි දූපත් සමූහයේ විශාලතම දිවයිනේ පිහිටා ඇති මව්නා-ලෝවා ගිණිකන්දේ බෑවුමක, මුහුදු මට්ටමේ සිට අඩි 8000ක් ඉහලින් මෙම පර්යේෂණාගාරය පිහිටුවා තිබේ. මෙම ප්‍රදේශයේ භූවිශමතා අඟහරු ග්‍රහයා මත දක්නට ලැබෙන භූමි ස්වභාවයට යම් අන්දමකින් සමානවීම, මෙම ස්ථානය තෝරාගැනීමට හේතුව බව නාසා ආයතනය පවසනවා.

මෙය තුල පර්යේෂකයින් 8 දෙනෙකු දින 120ක්, බාහිර ලෝකය සමග කිසිදු සබඳතාවයකින් තොරව ජීවත් වුනා. ඔවුන් සඳහා පෙර පිසින ලද පැකට් ආහාර මෙන්ම බීජ හා හයිඩ්‍රොෆොනික් ලෙස ආහාර වගාකරගත හැකි පහසුකම් ලබාදී තිබුනා. පසුගිය 2013 අගෝස්තුවේ අවසන් වුනු මෙම පර්යේශණයේදී අනාගත වෙනත් ග්‍රහලෝකවල කොළණි පිහිටුවා ගන්නා මිනිස් ගවේෂකයින් හට උපකාරවිය හැකි දත්ත රාශියක් එක් රැස් කරගත් බව නාසා ආයතනය පවසනවා.

ආහාර වගාකිරීම, පිසීම, ඒවායේ පෝෂ්‍යගුණය, දීර්ඝ කාලීනව මෙලෙස වගාකල ආහාර මත යැපීමෙන් ශරීර සෞඛ්‍යට වන බලපෑම මෙන්ම වෙනත් ග්‍රහලෝකයක පිහිටුවාගත් ජනාවාසවල වැසිකිලි-කැසිකිලි නිර්මාණය කලයුත්තේ කෙසේද, කසළ හා මළද්‍රව්‍ය බැහැර කරන්නේ කෙසේද, ජලය සපයාගන්නේ කෙසේද යනාදී විද්‍යාත්ම ගැටලු රාශියක් මෙහිදී අධ්‍යයනය කරමින් තිබෙනවා. මෙම පර්යේෂණයේ ප්‍රථිපල තවමත් සකසා අවසන්වී නෑ. පර්යේෂකයින් 6දෙනෙකු සහිතව මෙහි දෙවැනි අදියර (HI-SEAS 2)  2014 මාර්තු 24 වැනිදා ඇරඹුනු අතර ඔවුන් දින 120ක් මෙහි ගත කරමින් පර්යේෂණ කටයුතුවල යෙදෙනු ඇත.

HI-SEAS පර්යේෂණාගාරයේ සංචාරයක යෙදෙන වීඩියෝව නරඹන්න.

 

Thursday, 15 May 2014

ස්ටාර් වෝර්ස් චිත්‍රපටයේ දැක්වෙන ආකාරයේ කෘත‍්‍රිම අතක් නිෂ්පාදනය කෙරේ


ස්ටාර් වෝර්ස් චිත‍්‍රපට මාලාවේ ද එම්පයර් ස්ට‍්‍රයික්ස් බැක් සිනමාපටයේදී ඩාත් වේඩර් සමග සටනකින් අතක් නැතිවූ ලූක් ස්කයිවෝකර්ට ලබාදෙන කෘතිම අතට සමාන රොබෝ හස්තයක් නිර්මාණය කිරීමට අමෙරිකානු සමාගමක් සමත්වී ඇත.ස්වභාවික අතකට ඉතා ආසන්න මෙම කෘත්‍රිම අත වෙළඳපොළ නිෂ්පාදනය සඳහා අවසර දීමට ඇමරිකානු ආහාර සහ ඖෂධ පරිපාලන මණ්ඩලය විසින් තීරණය කර ඇතැයි වාර්තා වේ.  මෙම කෘත‍්‍රිම හස්තයට ලූක් ලෙස නම් තබා තිබෙන්නේ ස්ටාර්-වෝස් චිත්‍රපටයේ මෙම හොඳ හා නරක අතර වීරාඛ්‍යාන සටන සිහිවීම සඳහා බව පැවසේ.







මෙහි එක් නිර්මාණකරුවෙකු වන ඞීන් කැමෙන් පවසන්නේ නව කෘත‍්‍රිම අත විසින් ආබාධිත පුද්ගලයන්ගේ ජීවිතය වෙනස් කිරීමට සමත් වනු ඇති බවයි. DEKA Arm System මෙය අමෙරිකාවේ DEKA Research and Development සමාගමේ නිර්මාණයකි.

ඇමරිකානු හමුදා විශ‍්‍රාමිකයන්ගේ දෙපාර්තමේන්තුවට සම්බන්ධ පර්යේෂණ 4කදී මෙම 36 ඩෙකා හස්ත පද්ධතිය පරීක්ෂා කර බලා ඇති අතර එහිදී හෙළිවී ඇත්තේ මිදි ගෙඩියක් අහුලා ගැනීම, දොර යතුරු භාවිතා කිරීම, ලියුම් කවරයක් විවෘත කිරීම, බිත්තරයක් නොකඩා අහුලා ගැනීම, ධාන්‍ය ආහාරයට ගැනීම සහ චීන චොප්ස්ටික්ස් කූරු භාවිතා කිරීම ආදී සාමාන්‍ය ජීවිතයේ හැසිරීම් මෙම කෘත‍්‍රිම අත සමග කළ හැකි බවයි.


මේ බව ආහාර සහ ඖෂධ පරිපාලන මණ්ඩලය විසින් නිකුත් කර ඇති නිවේදනයකද දක්වා තිබේ. පර්යේෂණයට සහභාගී වූවන්ගෙන් 90%ක් පවසා ඇත්තේ මින් පෙර සිදුකළ නොහැකි හැසිරීම් ලූක් භාවිතා කර සිදුකළ හැකිවූ බවයි.


ඉලෙක්ට්‍රෝඩ මගින් නිකුත් කරන විද්‍යුත් සංඥා චලන හැසිරීම් 10කට පරිවර්තනය කරන මෙම කෘත‍්‍රිම හස්තය උරහිස, ඉහළ හෝ පහළ බාහු ප‍්‍රදේශයන්ට බද්ධ කළ හැකි නමුත් වැළමිට හෝ මැණික්කටුව යන ස්ථාන වලට සවි කළ නොහැකි බව පැවසේ.


VW සමාගම ඉන්ධන පිරිමැස්ම සඳහා ගියර 10ක ට්‍රාන්ස්මිෂන් පද්ධතියක් නිර්මාණය කරති.

වොල්ක්ස්වගන් යනු ලෝක ප්‍රකට ජර්මානු මෝටර් රථ නිශ්පාදකයෙකි. නට්සි ආඥාදායක ඇඩෝල්ෆ් හිට්ලර්ගේ අදහසක් අනුව, ජර්මනියේ වැඩකරන ජනයා සඳහා ලාබදායි, ඉතා පහසුවෙන් නඩත්තුකල හැකි කුඩා කාර් රථයක් නිර්මාණය කොට නිශ්පාදනය කිරීම සඳහා 1937දී වොල්ක්ස්වගන් සමාගම ඇරඹුනි. වොල්ක්ස්වගන් යන ජර්මන් නමෙහි තේරුම වන්නේද මහජනයාගේ වාහනය (වොල්ක්ස්=ජනයා | වගන්=වාහනය) යන්නයි. ඔවුන්ගේ සුප්‍රකට නිර්මාණය වන්නේ පසුපස එන්ජිම පිහිටි, ජලය යොදන රේඩියේටරයක් හා ජල සිසිලන පද්ධතියක් නොමැතිව, තනිකරම වාතයෙන් සිසිල්වන (air cooled) එන්ජිමක් සහිත වොල්ක්ස්වගන් බීටල් කාරයයි. මෝටර් රථ කර්මාණ්තය පිලිබඳව පර්යේෂණ පවත්වන ඉතිහාසඥයින් සඳහන් කරන අන්දමට බීට්ල් කාරයේ එන්ජිම වාතයෙන් සිසිල්විය යුතුබවට එය නිර්මාණය කල ඉන්ජිනේරුවන් හට අණකොට ඇත්තේ හිට්ලර් විසින්මයි. එයට හේතුව දැඩි හිම පතනයක් ඇති ජර්මනියේ ශීත සෘතුවේදී මෙහි එන්ජිමෙහි ජලය මිදී එන්ජිම පණගැන්වීමට නොහැකිවීම වැලැක්වීම සඳහායි.

1938-2003 දක්වා වසර 65ක් තුල මිලියන 21.5ක් පමන බීටල් කාර් රථ ලොව පුරා අලෙවි වුනි.

එලෙස ආරම්භවුනු වොල්ක්ස්වගන් සමාගම අද ලොව මෝටර් රථ ක්ශේෂ්ත්‍රයේ දැවැන්තයෙකි. අමෙරිකාවේ දැවැන්ත ජෙනරල් මෝටර්ස් සමාගම පවා අභිබවා ඇති එය දැනට ජපානයේ ටොයෝටා සමාගමට හා ජපාන-ප්‍රංශ ඒකාබද්ධ  ව්‍යවසායක් වන නිසාන් රෙනෝ (Nissan-Renault) බද්ධ-සමාගමට පමණක් පිටුපසින් සිටිමින් ලොව තුන්වැනි මෝටර් රථ දැවැන්තයා බවට පත්වී ඇත. අදවන විට වොල්ක්ස්වගන් සමාගම, වොල්ක්ස්වගන් සන්නාමයට අමතරව ජර්මනියේ අව්ඩි ( Audi) හා පෝර්ෂ් (Porsche), ඉතාලියේ බුගාටි (Bugatti) හා ලැම්බෝර්ගිනී (Lamborghini) මෙන්ම මහා බ්‍රිතාන්‍යයේ සුපිරි-සුඛෝපභෝගී මෝටර් රථ මාදිලියක් වන බෙන්ට්ලි (Bently) සමාගමේද නිළ හිමිකරුවන් වේ.

මෝටර් රථ තාක්ශණය වැඩි දියුණු කිරීම සඳහා විශාල වශයෙන් ආයෝජනය කරන වොක්ල්ස්වගන් සමාගම ඉහල කාර්යක්ශමතාවයක් හා පරිසර දූෂණය අවම ඩීසල් එන්ජින් තාක්ශණයේ දැවැන්තයෙකි. ඇඩ්වාන්ස්ඩ් ඩීසල් එන්ජින් ටෙක්නොලොජි ලෙස හඳුන්වන මෙම තාක්ශණයට අනුව පෙට්‍රෝල් එන්ජින් වලටත් වඩා පරිසර දූශණය සිදුකරන වායු විමෝචනය අඩු, පෙට්‍රෝල් එන්ජින්වලට වඩා ඉහල ඉන්ධන පිරිමැස්මක් ඇති ඩීසල් එන්ජින් නිර්මාණය කිරීමට ඔවුන් සමත්වී ඇත. අද ලොව විශාලම ඩීසල් කාර් නිශ්පාදකයා වන්නේ වොල්ක්ස්වගන් සමාගමයි. යුරෝපා සංගමයේ දැඩි පරිසර දූෂක වායු විමෝචන තත්වයන් අභිබවයා යාමට මෙම ඩීසල් එන්ජින් සමත්ව ඇත.

නොබෝදා ඔස්ට්‍රියාවේ වියනා නුවරදී මුළුදුන් අන්තර්ජාතික මෝටර් රථ තාක්ශණ සම්මන්ත්‍රණයකදී වොල්ක්ස්වගන් සමාගම සිය නවතම නිර්මාණය වන ගියර 10යේ ට්‍රාන්ස්මිශන් තාක්ශණය පිලිබඳව අනාවරණය කලේය. මෙම සමුළුවට සහභාගිවුනු VW සමාගමේ සභාපතිවරයා වන ආචාර්ය මාටින් වින්ටර්කෝර්න් හා නිර්මාණ අංශයේ ප්‍රධානී හාන්ස් ජේකොබ් ප්‍රකාශකල අන්දමට මෙමගින් විශාල වේග පරාසයන් ප්‍රමාණයක් සඳහා වෙන වෙනම ගියරය බැගින් ඇති නිසා ඉන්ධන කාර්යක්ශමතාවය 20%කින් පමණ ඉහල නැංවෙනවා. ඔවුන් පවසන අන්දමට මෙම ගියර පද්ධතිය 2015 එලිදැක්වෙන වොල්ක්ස්වන්ගන් පසාට් (VW Passat) කාරයට අඩංගුකොට එලි දැක්වෙන අතර ඉදිරිකාලයේදී වොල්ක්ස්වගන් සමාගම නිශ්පාදනය කරන සියලුම මෝටර් රථ මාදිලිවල මෙම ගියර පද්ධතිය අඩංගු කොට නිපැදවෙනු ඇති.

Sources:
http://www.wired.com/2014/05/vw-10-speed-transmission/
http://www.roadandtrack.com/go/news/vw-10-speed-transmission?src=rss

Wednesday, 14 May 2014

Boeing Black: අමෙරිකානු රහස් ඔත්තුසේවා සඳහා නිමැවුනු ස්මාර්ට් ෆෝනය

ඔබත් රට වෙනුවෙන් රහසේ ක්‍රියාත්මක වන ඔත්තුක‍රුවෙකු, නැතිනම් විශේෂ ආරක්ෂක ඒජන්සියකට අනුයුක්ත නියෝජිතයෙකු යැයි සිතමු. සාමාන්‍යයෙන් ජේම්ස් බොන්ඩ් වර්ගයේ චිත්‍රපටයකදී නම් ඔබට සන්නිවේදනය සඳහා අතිනවීන මෙවලම් භාවිත කිරීමට ලැබුණත්, සැබෑ ජීවිතයේදී එය එලෙසින්ම සිදුනොවේ. කෙසේ වුවත් ඉහත සඳහන් කළ ආකාරයේ වෘත්තියක පසුවන ඔබට සාමාන්‍ය ආකාරයේ ස්මාට්ෆෝනයකින් ඔබගේ වෘත්තියට අදාළ සංවේදී තොරතු‍රු, දත්ත හුවමා‍රු කරගැනීමට, සන්නිවේදන කටයුතුවල යෙදීමට නොහැකි බවද අමුතුවෙන් කිවයුතු නොවේ. මෙම හඳුන්වාදෙන Boeing Black ස්මාට්ෆෝනය පැමිණෙන්නේ එම ගැටලුවට විසඳුමක් ලෙසටයි.

අමෙරිකාවේ බෝයිං සමාගම මගින් නිර්මිත මෙය දළ ආකෘතියේ සිටම සංවේදී දත්ත ආරක්ෂා කිරීම සහ ආරක්ෂිත සන්නිවේදන හැකියාවන් තහවු‍රු කිරීම මූලික අවශ්‍යතාව ලෙස සලකමින් නිර්මාණය වී ඇත. මෙම Boeing Black ස්මාට්ෆෝනය සෑමවිටම ඒ හරහා පසුවන දත්ත කේතනය කරන අතර, එහි දත්ත ගබඩාවන්ද විශේෂයෙන්ම කිසිවෙකුට පිවිසිය නොහැකි ලෙසින් සංකීර්ණ ඇල්ගොරිදමයන් භාවිත කරමින් ආරක්ෂා කිරීමට මූලිකත්වය ලබාදෙයි. එසේම දෘඩාංග මත පදනම් ක්‍රිප්ටෝ එන්ජින් පද්ධතියේම ස්ථාපිත ආරක්ෂණ උපක්‍රම, ආරක්ෂිත පණගැන්වීම් මෙහි පිහි‍ටුවා ඇති අතර, අතිවිශේෂිත ලෙසින් ආරක්ෂක උපක්‍රම දියුණු කළ ඇන්ඩ්‍රොයිඩ් විශේෂ සංස්කරණයක් මෙහි මෙහෙයුම් පද්ධතිය ලෙසින් ක්‍රියාත්මක වේ.

එපමණක් නොව යමෙකු මෙම ස්මාර්ට් ෆෝනය විවෘත කොට එහි ඇති දත්ත උකහාගන්නට උත්සහ කලහොත් එම දත්ත ක්ශණයකින් විනාශවී යන ලෙස නිර්මාණය කරන ලද "self-destruct mechanism" උපක්‍රමයකින්ද ආරක්ශිතය. ඒ අනුව අස්ථානගත වන හෝ සතුරන් අතට පත්වන බෝයිං බ්ලැක් ස්මාර්ට්ෆෝනයකින් තොරතුරු ලබාගැනීමේ හැකියාව විරල බව බෝයිං පවසයි.

මෙහි අඟල් 4.3 ක තිරයක් ඇති අතර, Dual-Core 1.2GHz ප්‍රොසෙසරයකින් බලගැන්වේ. එසේම 4G-LTE ඇතුළු වෙනත් ඕනෑම දියුණු ස්මාට්ෆෝනයක ඇති සම්මත දත්ත හුවමා‍රු තාක්ෂණයන්ද මෙහි තිබේ. ජේම්ස් බොන්ඩ් වර්ගයේ ස්මාට්ෆෝනයක් ලෙසින් සලකන විට මෙහි දෘඩාංග ශක්‍යතා මඳ බවක් ඔබට සිතෙන්නට හැකි වුවත්, සැබැවින්ම මෙම ස්මාට්ෆෝනය භාවිතයේ මුඛ්‍ය පරමාර්ථය වන්නේ ඉහළ ග්‍රැ‍ෆික් නිර්මාණ ඇති ක්‍රීඩා භාවිතය නොව ආරක්ෂිත සන්නිවේදනය හා සබැඳි යෙදුම් බව මෙහිදී සිහිපත් කළ යුතුය.

තවද මෙහි ඩුවල් සිම් පහසුකම ඇති අතර එක් සිම් පතක් සාමාන්‍ය වාණිජ සෙලියුලර් සේවා සමග සම්බන්ධවීම සඳහා වෙන්කොට ඇති අතර අනෙක් සිම් පත අමෙරිකානු රජයේ රහස්‍ය සෙලියුලර් ජාළයට සම්බන්ධවීම සඳහා අවශ්‍ය විශේෂ සිම් පත් සඳහා වෙන්කොට ඇත. එසේම මෙහි බයෝමෙට්‍රික් සංවේදකයක් නැතිනම් චන්ද්‍රිකා සම්බන්ධක ඇන්ටෙනාවක් හෝ වෙනත් අවශ්‍ය උපාංගයක් සවිකළ හැකි දෘඩාංග විස්තීරණ පෝට් එකක්ද තිබේ.

කෙසේ වුවත් අවසාන වශයෙන් කිවයුත්තේ මෙම Boeing Black  ස්මාට්ෆෝනය මිලදීගැනීමට හැකියාව ඇත්තේ රජයේ අනුමැතිය ලත් ආරක්ෂක බුද්ධි අංශවල හෝ විශේෂ ආරක්ෂක ඒජන්සියක සේවයේ නියුතු අයෙකුට පමණක් බවයි. මෙය නිර්මාණය කරන බෝයිං සමාගමේ සේවකයිට පවා එය මිළදීගැනීමට අවසර නොලැබෙනු ඇත. බෝයිං සමාගම සිය සමස්ත සේවක ප්‍රජාව වෙනුවෙන්ම කැනඩාවේ Research In Motion (RIM) සමාගමේ බ්ලැක්බෙරි ස්මාර්ට්ෆෝන ලබාදී ඇත.

මූලාශ්‍ර:

http://arstechnica.com/information-technology/2014/02/deep-black-more-details-on-boeings-new-secure-android-smartphone/

http://ada.lk/article/14499/රහස්-ඔත්තුක‍රුවෙකුගේ-ස්මාට්-ෆෝනය--Boeing-Black


Friday, 2 May 2014

ඩිජිටල් කැන්වසයේ මැවුනු ෆොටෝෂොප් සිහින

චිත්‍රයේ නම : Mistress Lili (පාලිකා ලිලී)
නිර්මාණය කලේ : රෙබෙකා පුඑබ්ලා, ස්පාඤ්ඤය
භාවිතාකල මෘදුකාංග : ෆොටෝශොප්, 3D මැක්ස්, මෙන්ටල් රේ, සීබ්‍රෂ් (ZBrush)


චිත්‍රයේ නම : Barbarian Warrier (රෞද්‍ර රණකාමියා)
නිර්මාණය කලේ : සිල්වියා ෆියුසෙට්ටී, ඉතාලිය
භාවිතාකල මෘදුකාංග : ෆොටෝශොප්, පෝසර් (Poser), සොෆ්ට්ඉමෙජ්  XSI


චිත්‍රයේ නම : Sniper (වෙඩික්කාරී)
නිර්මාණය කලේ : මඩීනා චියෝනිඩී, නෙදර්ලන්තය
භාවිතාකල මෘදුකාංග : ෆොටෝශොප්, මායා



චිත්‍රයේ නම : Mistress Of Dragons (මකර ස්වාමිදුව)
නිර්මාණය කලේ : ඩැනියෙල් සෙරා, ඉතාලිය
භාවිතාකල මෘදුකාංග : ෆොටෝශොප්, මායා, සීබ්‍රෂ් (ZBrush)


චිත්‍රයේ නම : Combat Suit (සටන් ඇඳුම )
නිර්මාණය කලේ : පැට්‍රික් ඔලෙජ්නිසැක්, පෝලන්තය
භාවිතාකල මෘදුකාංග : ෆොටෝශොප්




චිත්‍රයේ නම : Golden Rose (රන් සෙව්වන්දිය )
නිර්මාණය කලේ : යැන්ග් ෆැන්, එක්සත් ජනපදය
භාවිතාකල මෘදුකාංග : ෆොටෝශොප්





චිත්‍රයේ නම : Desolation Angel (වියෝගයේ සුරදූතිකාව)
නිර්මාණය කලේ : ගොන්ග් චෙන්ග්, තායිවානය
භාවිතාකල මෘදුකාංග : ෆොටෝශොප්


චිත්‍රයේ නම : RoboTarRT12 (රොබෝ සෙබලිය)
නිර්මාණය කලේ : ඇනටොලියි සිඩොරොෆ්
භාවිතාකල මෘදුකාංග : මායා, ෆොටෝශොප්, සීබ්‍රෂ් (ZBrush)


චිත්‍රයේ නම : Super Keffieh (සුපිරි කාන්තාර සටන්කරුවා)
නිර්මාණය කලේ : නිවාන්හ් චන්තාරා, කැනඩාව
භාවිතාකල මෘදුකාංග : ෆොටෝශොප්


චිත්‍රයේ නම : Hera (හේරා දෙවඟන)
නිර්මාණය කලේ : සුතිවත් දෙචැකැම්ෆූ, තායිලන්තය
භාවිතාකල මෘදුකාංග : ෆොටෝශොප්


චිත්‍රයේ නම : The Fiddler: Destroy (විනාශකාරී බටනලා වයන්නා)
නිර්මාණය කලේ : ඩොනල්ඩ් බ්‍රැඩ්ෆර්ඩ්, නවසීලන්තය
භාවිතාකල මෘදුකාංග : මායා 3D, ෆොටෝශොප්




චිත්‍රයේ නම : Rouge Hacker (ඉබාගාතේ යන හැකරුවා )
නිර්මාණය කලේ : ජෝර්න් හූරී, එන්ගලන්තය
භාවිතාකල මෘදුකාංග : ෆොටෝශොප්


චිත්‍රයේ නම : Police Enforcer (නීතිය සුරකින්නා)
නිර්මාණය කලේ : ජෝර්න් හූරී, එන්ගලන්තය
භාවිතාකල මෘදුකාංග : ෆොටෝශොප්


චිත්‍රයේ නම : Proteos (ප්‍රොටියෝස් යනු ග්‍රීක දේව කථාවල කියැවෙන මුහුදු දෙවියෙකි, ඔහුට සිතැඟි පරිදි සිය රූපය වෙනස්කරගත හැකිය )
නිර්මාණය කලේ : මැක්සිම් රෙවින්, රුසියාව
භාවිතාකල මෘදුකාංග : ෆොටෝශොප්


චිත්‍රයේ නම : Future Trooper (අනාගත යුධ සෙබළා)
නිර්මාණය කලේ : ජොන්සන් ටින්ග්, මැලේසියාව
භාවිතාකල මෘදුකාංග : ෆොටෝශොප්



චිත්‍රයේ නම : War Reporter (යුධ පුවත් වාර්තාකාරිනී)
නිර්මාණය කලේ : බෙන් ලෝ, කැනඩාව
භාවිතාකල මෘදුකාංග : ෆොටෝශොප්








චිත්‍රයේ නම : Infiltration Operation (කාන්දුකරණ මෙහෙයුම)
නිර්මාණය කලේ : පාර්ක් ජොන්ග් වොන්, කොරියාව
භාවිතාකල මෘදුකාංග : ෆොටෝශොප්


අඟහරු මත තවමත් යෙහෙන් වැජඹෙන කිව්රියෝසිටි රොබෝ විද්‍යාගාරය


මානව තාක්ශණ දියුණුවේ අග්‍රඵලයක් යැයි කිවහැකි කිව්රියෝසිටි රොබෝ විද්‍යාගාර රෝවරය තවමත් අඟහරුවා මත විද්‍යා ගවේෂණවල යෙදෙමින් රතු ග්‍රහයා පිලිබඳ අපේ දැනුම මුවහත් කරමින් සිටී. 2011 නොවැම්බරයේ ගුවන්ගතවී, 2012 අගෝස්තු 6 වැනි දින අඟගරු ග්‍රහයා මතට සැපත්වුනු කිව්රියෝසිටි රෝවරය මේ වනවිට රතුග්‍රහයා මත මාස 18ක දීර්ඝ කාළයක් පර්යේෂණ කටයුතුවල නියැලෙමින් සිට ඇත.

පසුගිය 2012 අගෝස්තු 6 වැනි දින රතු ග්‍රහයා මත වසරක් සම්පූර්ණකල කිව් රියෝසිටි රොබෝවා එය සැමරීම සඳහා සිය චැසියෙහි සවිකොට තිබෙන කුඩා ස්පීකරයකින් "Happy Birthday to You" ගීතය වාදනය කලේය. මෙය වෙනත් ග්‍රහලෝකයක් මත වාදනය කල ප්‍රථම මානව ගීය වන අතර එය අඟහරුවා මත වාදනය කරන අතරතුරම එහි සිට සජීවීව පෘථිවිය කරාද එම ගීය සම්ප්‍රේශණය කලේය. ඒ අනුව ග්‍රහලෝක දෙකක් අතර සන්නිවේදනයවූ ප්‍රථම ගීය ලෙසද "Happy Birthday to You" ගීය ඉතිහාසයට එක්වේ.

අඟහරුවා මතින් නිඋරන්තරව හමායන දුහුවිලි කුණාටුවලින් තැම්පත්වුනු දුහුවිලි වලින් නැහැවී සිටින රෝවරය දීර්ඝ කාන්තාර ගමනක යෙදෙන රථයක් මෙන් පෙනේ. එහෙත් අඟහරු ග්‍රහයාගේ කටුක, අතිදුෂ්කර කාළගුණයට හා දේශගුණයට ඔරොත්තු දෙන ලෙස නිර්මාණය කර ඇති කිව් රියෝසිටි යුහුසුළුව පර්යේෂණ කටයුතුවල නියැලෙමින් සිටී. කිව් රියෝසිටි රෝවරය වෙනුවෙන් සැළසුම් කොට ඇති ප්‍රධාන පර්යේෂණ කටයුතු අවසන්වීමට තවත් මාස 6ක් පමණ තිබෙන අතර. ඉන් අණතුරුව රොබෝවාගේ "සෞඛ්‍ය තත්වය" අනුව නව පර්යේෂණ සැළසුම් කෙරෙනු ඇති.

පහත ඇතුලත්කොට ඇති පැනරෝමා ඡායාරූපය, කිව්රියෝසිටියේ කැමරා මගින් පසුගිය අප්‍රේල් 27 වැනිදා ගන්නා ලද ඡායාරූප 138 එකට ඇමිණීමෙන් නිර්මාණය කොට ඇති අතර. එය ක්‍රොඒෂියානු ඡායාරූප ශිල්පී ඇන්ඩෲ බොඩ්‍රෝෆ්ගේ නිර්මාණයකි.


Mars Panorama - Curiosity rover: Martian solar day 613 in Out of this World

Thursday, 1 May 2014

Black Hawk හෙලිකොප්ටරය නියමු රහිත රොබෝ හෙලිකොප්ටරයක් වෙයි.


අමෙරිකානු ත්‍රිවිධ හමුදාවල ජනප්‍රියම හෙලිකොප්ටරය වන සිකෝර්ස්කි සමාගම නිපදවන බ්ලැක් හෝක් හෙලිකොප්ටරය නියමුවෙකු රහිතව පියාසර කරවීම සඳහා අනුවර්තනය කිරීමට එම සමාගම සමත්වී ඇත. සාමාන්‍යයෙන් නියමුවන් දෙදෙනෙකු විසින් පියාසර කරවන මේ යානය එක් නියමුවෙකු පමණක් යොදාගෙන සහයක නියමුවා ලෙස හෝ ප්‍රධාන නියමුවා ලෙස හෝ රොබෝ නියමුවාට ක්‍රියාත්මක විය හැකිය. එලෙසම අතිශයින් අණතුරුදායක මෙහෙයුම් වලදී හෝ එදිනෙදා ප්‍රවාහන මෙහෙයුම් වලදීද යානය මිනිස් නියමුවෙකු රහිතව ස්වයංක්‍රීය පියාසර කරවීමටද මෙම රොබෝ නියමුවා සමත්ය. ටොන් පහක් බරැති මෙම යානය වෙනුවෙන් රොබෝ නියමුවෙකු නිර්මාණය කිරීම 2007 වසරේදී ඇරඹුණු අතර ඒ සඳහා මූල්‍ය දායකත්වය අමෙරිකානු යුධහමුදාව විසින් දරන ලදී.

මෙම රොබෝ නියමුවා ක්‍රියාත්මක වන්නේ සිකෝර්ස්කි සමාගම නිර්මාණය කල "මේට්‍රික්ස් - Matrix " නම් ගුවන්යානා පියාසර කරවිය හැකි, කෘත්‍රිම බුද්ධියකින් සමන්විත මෘදුකාංගයක් මගිනි. මෙම මේට්‍රික්ස් මෘදුකාංගය මගින් මිනිස් මැදිහත්වීමකින් තොරව බ්ලැක් හෝක් යානය ගුවන්ගත කරවීමේ සිට සම්පූර්ණ මෙහෙයුම ක්‍රියාත්මක කරවීම දක්වා සියලු කාර්යයන් සිදුකල හැකිය.

අමෙරිකානු ත්‍රිවිධ හමුදා සිය වියදම් අඩුකරගැනීම සඳහාත් ක්‍රියාන්විත පලදායිතාවය (operational effectiveness) එලෙසෙම රඳවාගන්නා අතරම හමුදාවල පිරිස්බලය අඩුකරගැනීම සඳහාත් වඩවඩාත් රොබෝ තාක්ශණය වෙත යොමුවෙමින් පවතී. පසුගිය සතියේ අමෙරිකානු පෙන්ටගනයට අනුබද්ධ, යුධ තාක්ශණයේ නිම්වළලු පුළුල් කිරීමේ කාර්යයේ නියුතු "DARPA - Defense Advanced Research Agency" ආයතනය අමෙරිකානු ගුවන් හමුදාවේ යානාවල පියාසර කාර්ය මණ්ඩළය අඩුකොට එම යානා පියාසර කරවීම රොබෝ නියමුවන්ට භාරකිරීමේ හැකියාව සොයා බැලීමේ ව්‍යාපෘතියක් නිළවශයෙන් ආරම්භ කලේය.

Aircrew Labor In-Cockpit Automation System (ALIAS) ලෙස හඳුන්වන මෙම ව්‍යාපෘතියේ අරමුණ දැනට අමෙරිකානු ත්‍රිවිධ හමුදාව සතු ඕනෑම ගුවන්යානයක් පියාසර කරවිය හැකි,ඉතා ඉක්මණින් ඕනෑම යානයකට සවිකල හැකි, අවශ්‍යවිට ඉවත්කල හැකි රොබෝ ගුවන් නියමුවෙකු නිර්මාණය කිරීමයි. ඒ අනුව පියාසර කරවීමට නියමුවන් 3ක් හෝ 4ක් අවශ්‍ය දැවැන්ත ගුවන්යානාද එක් නියමුවෙකු සමගින් පියාසාර කරවීමට හැකිවෙතයි විශ්වාස කෙරේ. රොබෝ නියමුවාට මිනිස් නියමුන්  තුන් හතර දෙනෙකුගේ කාර්යයන් තනිව සිදුකල හැකිවනු ඇති අතර යානය ගුවන්ගත කිරීම, පියාසර කරවීම, ගොඩබැස්සවීම යන සියල්ලම එය විසින් සිදුකරනු ඇති අතර මිනිස් නියමුවාගේ කාර්යය වනුයේ එම රොබෝ  නියමුවාගේ ක්‍රියාකාරිත්වය අධීක්ශණය කිරීම පමණකි.

සිය Matrix කෘත්‍රිම බුද්ධි රොබෝ ගුවන් නියමු මෘදුකාංගය, ඩාර්පා ආයතනයේ ALIAS ව්‍යාපෘතිය හා බද්ධ කිරීමට සිකෝර්ස්කි හෙලිකොප්ටර් සමාගම බලාපොරොත්තුවේ.

2014 පෙබරවාරියේදී මෙම රොබෝ බ්ලැක් හෝක් හෙලිකොප්ටරය සිදුකල පරීක්ශණ පියාසැරියක වීඩියෝව නරඹන්න 

Related Posts Plugin for WordPress, Blogger...