CHAPTER 00000
අළුයම 2.35, ගුවන් තොටුපොල ධාවන පථයේ ඊසානදිග අන්තය, ශ්‍රී ලංකා ගුවන් හමුදා අධි ආරක්ෂිත කලාපය, කටුණායක.
තද කළු පැහැති සටන් ඇඳුමකින් සැරසුනු ඔහු සීරුවෙන් පය තැබුවා. ඊලාම් යුධ සමයේ ගුවන් හමුදා යානා නඩත්තු සිදුකල හැඟර් ගොඩනැගිල්ලක් වූ මෙය, යුද්ධයෙන් පසු අතහැර දමා තිබුණා. පිටතට සුවිසල් ගබඩාවක් මෙන් පෙනෙන මෙය තුල දකුණු ආසියාවේ අතිවිශාලතම පරිගණක මධ්‍යස්ථානයක් ක්‍රියාත්මක වන බව දන්නා ශ්‍රී ලාංකිකයින් ගණන අතැඟිලි ගණනටත් වඩා අඩුයි.
කටුණායක ධාවන පථය අසල ඇති අතහැර දැමූ විශාල ගුවන්යානා නඩත්තු හැඟරය, බ්‍රිතාන්‍යයේ ඉලෙක්ට්‍රොණික හා සංඥා බුද්ධි අංශය වන GCHQ හා එහි ඇමරිකානු ප්‍රතිරූපය වන NSA ඒජන්සිය මගින් ඒකාබද්ධව පවත්වාගෙන, යන ලොවම ආවරණය වන චන්ද්‍රිකා හා ෆයිබර් ඔප්ටික් අධිවේගී දත්ත සම්ප්‍රේෂණ ජාලයේ එක් පර්යන්තයක් බවට පත්වුනේ 2010 වසරේදීයි. ශ්‍රී ලංකා ගුවන්හමුදා අධි ආරක්ෂිත කළාපයක් ලෙස උස් වැටවල් වලින් හා කැමරාවලින් ආරක්ෂාවූ මෙය තුල විශාල පරිගණක සර්වර් පද්ධතියක් හා චන්ද්‍රිකා සමග තත්පරයකට ටෙරාබයිටයක තරම් වේගයෙන් දත්ත හුවමාරු කරන ඩිජිටල් VSAT පද්ධතියක් තිබුණා.
පාකිස්ථානය වැනි දකුණු ආසියානු හා ඇෆ්ඝනිස්ථානය වැනි නැගෙනහිර ආසියානු රටවල්වලින් ඇමරිකන්, බ්‍රිතාන්‍ය හා යුරෝපීය ඔත්තුබලන චන්ද්‍රිකා හා ඩ්‍රෝනවලින් එකතුකරන ටෙරාබයිට ලක්ෂගණනක දත්ත තාවකාලිකව ගබඩා කරගැනීම හා අවශ්‍ය ස්ථානවලට ප්‍රති-සම්ප්‍රේෂණය මේ සුවිසල් දත්ත ගබඩාව හරහා සිදුවුනා.
2010 ඔක්තෝම්බරයේ සිට රාත්‍රී කිහිපයකට වතාවක් මැදියමේ පැමිණි සළකුණු රහිත ප්‍රවාහන යානා මගින් ගෙන ආ අධිතාක්ෂණික උපකරණ එකලස් කරන ලද්දේත් එම යානාවලින්ම පැමිණි ඉන්ජිනේරුවන් හා තාක්ෂණවේදීන් විසින්. පූර්ණලෙසම ස්වයංක්‍රීයව ක්‍රියාත්මක වන මේ මධ්‍යස්ථානයේ නඩත්තු කටයුතු සඳහා තාක්ෂණ ශිල්පීන් රැගෙන තෙමසකට වරක් අළු පැහැති යානාවක් පැමිණියා. දින දෙකක් පමණ අසල නවතා තැබෙන යානය තමන් රැගෙන ආ පිරිස සමග පැමිණි අයුරින්ම මැදියම් රැයේ පිටව ගියා.
මුළුමනින්ම අඳුරුවූ ගොඩනැගිල්ල තුල ඇති සියයක් පමණවූ අධිබල පරිගණක යන්ත්‍රවල නිවි විවී දැල්වෙන LED බල්බ මගින් නිකුත්වූ රතු, කොළ හා නිල් ආලොකයෙන් ගමන් මග සොයාගන්නට ඔහුට හැකිවුනා. විටින් විට මහ හඬින් ඇසෙන මගී ජෙට් යානා එන්ජින් ශබ්දය හැරෙන්නට වෙනත් ශබ්දයකට තිබුණේ පරිගණක යන්ත්‍ර සිසිලන පද්ධතිවල හඬ පමණයි.
ඉතා සීරුවෙන් ගොඩනැගිල්ලේ අනෙක් කෙළවරට පැමිණි ඔහුට ඉලක්කය පෙනුනා. සිය විශ්වාසවන්ත ග්ලොක් ස්වයංක්‍රීය පිස්තෝලය දෑතින්ම එල්ලකල ඔහු ඔහු දකුණත මහපට ඇඟිල්ලෙන් ආයුධයේ ආරක්ෂා ලීවරය, සේෆ්ටි සැකසුමේ සිට බර්ස්ට් ෆයර් සැකසුමට වෙනස් කලා. මේ සැකසුමේදී වරක් කොකා ගැස්සීමේදී පිට පිට උණ්ඩ තුනක් බැගින් නිකුත්කලා.
ඇය ඔහුට පිටුපා විශාල පරිගණක තිරයක් ඉදිරිපිට අසුන්ගෙන සිටියා. එය මධ්‍යස්ථානයේ ප්‍රධාන පාලක ටර්මිනලය බව ඔහුට වැටහුනා. ඇයගේ අතැඟිලි කීබෝඩය මත විදුලි වේගයෙන් ඒ මේ අත යන ආකාරය පැත්තකින් ඇයවෙත ලඟාවෙමින් සිටි ඔහු දුටුවා. කඳ කෙළින් තබාගෙන ඇහි පිහ නොහෙලා තිරය දෙස බලාගෙන සිටි ඇය රොබෝවෙකු මෙන් දිස්වුනා.
හැකිතාක් ලංව ඇයව වික්ෂිප්ත කිරීමේ අරමුණින් සීරුවෙන් ඉදිරියට ගිය ඔහුගේ බූට් සපත්තුවට හසුවූ යමක් "කරස්!!" හඬින් කැඩුණා.
"ෂිහ්..." දත්කූරු කමින් සිය කරුමය ගැන සිතන ඔහුට ඇය ක්ෂණයෙකින් ගල් ගැසෙන ආකාරය පෙණුනා.
"හෙල්ලෙන්ඩ එපා........ඔලුවටම තියෙනවා........" ඉඳි පිලිමයක් මෙන් ගල්ගැසී තිරය දෙසම බලාසිටින ඇයට තර්ජනය කලා. හෙල්ලෙන්ඩ එපා යයි අණලැබුනත් එය වගකට නොගත් ඇය ක්ෂණයකින් නැගීසිට ඔහු වෙත හැරුනා. කෝපාවිෂ්ඨව සිටි ඇයගේ දෑස්, පිය නොගැහීම ඔහුවෙත එල්ලව තිබුණා. පරිගණක තිරයේ එලියෙන් ආලෝකමත්ව තිබූ ඇයගේ ගෙළෙහි මස්පිඩු තදවන ආකාරයත්, ඒ සමගම ඇයගේ දෑත් මිටමෙළවෙන ආකාරයත් ඔහු දුටුවා. තම මොහොතකින් ඇය තමන් වෙත කඩාපණින බව ඔහුට හැඟුනා.
"හෙල්ලෙන්ඩ එපා කිව්වා නේද?" ඔහු බුරාහැලුනා. ඇය තමන්ට වඩා දසගුණයක්වත් වේගවත් බවට ඔහු අනුමාන කලා. ඇයගේ හදවත පසාරුවන ලෙස වෙඩි තැබිය හැකිවුවත් එය සැබැවින්ම කල යුතුදැයි ඔහු තුලම දැඩි විරසකයක් තිබුණා. ආතතියෙන් යුතු දෙගිඩියාව ඔහුව පමාකලා. පමාව ඔහුගේ ගතම දහදියෙන් තෙත් කලා. ඇය තමා කවුදැයි හඳුනා නොගත් බව ඔහුට වැටහී තිබුණා.
හිස දෙපසට සෙමෙන් වැනූ ඇය "මට සමාවෙන්න..." කියද්දීම ඔහු සිය සාක්කුවක තිබූ කුඩා විදුලි පන්දම දල්වා ඔහුගේම මුහුණට එල්ලකර ගත්තා.
"මේ මම...." ඔහු කියද්දී කඩා පණින්නට සූදානම්වූ ඇය හිටිවනම නැවතුනා. කෝපාවිෂ්ඨ වියරු පෙනුමක් තිබූ ඇයගේ මුහුණ ක්ෂණයකින්ම සැහැල්ලුවූ බවක් පෙනුනා.
“ඇයි මට තුවක්කුක් දික් කරගෙන?......... මම කවද ඉඳන්ද ඔයාගේ හතුරෙක් වුනේ…? ……...ඔයා මගේ ට්‍රේනින් ඔෆිසර්......මම සන්නද්ධ බුද්ධි අංශයට ආවේ ඔයා නිසා....?” ඇය සැහැල්ලු ස්වරයෙන් කියා සිටියා.
"හම්ම්.. ඔවු ඇත්ත...." කියූ ඔහු මද වේලාවක් ඇය දෙස බලා සිට, සිය පිස්තෝලයේ ෆයර් සිලෙක්ටරය යලිත් සේෆ්ටි සැකසුමට කරකවා එය ඉණේ රුවා ගත්තා..."
"කියන්න බලන්න ඔයා මේ මහ රෑ මොනවද මේ අධි ආරක්ෂිත පරිගණක මධ්‍යස්ථානයේ කරන්නේ කියලා? මේක ලංකාවට අයිති තැනක් නොවෙයි කියලා දන්නවද?" දෑත් ඉණේ තබාගත් ඔහු ඇය දෙස බලමින් ඇසුවා.
"ඔවු.....මං දන්නවා.........නෛතිකව නම් අපි ඉන්නේ මහා බ්‍රිතාන්‍යයේ ස්වෙරී භූමිභාගයක.... බ්‍රිතාන්‍ය GCHQ හා ඇමරිකන් NSA එක හවුලේ ගෙනියන අධිවේගී දත්ත සම්ප්‍රේෂණ ජාලයේ දකුණු ආසියානු මධ්‍යස්ථානයේ..."
"මොනවද උන් ඔයාට කලේ? ඔයා දැන් මනුෂ්‍ය ගැහැණියක් නෙමෙයි නේද?"
"ඔයාට පිස්සුද? ඇයි එහෙම කියන්නේ? මම හිටපු කෙනාමයි..."
“නෑ නෑ.........ඔයා කරන දේවල් මනුස්සයින්ට කරන්න බෑ..."
“ඇයි ඒ?......... ඔයා කියන්නේ මනුස්සයින් තහනම් තැන් වලට ඇතුලු වෙන්නේවත්............ පරිගණක ජාලයක් හැක් කරන්නේ වත් නෑ කියලද? ………..මම කලේ ඒවානෙ?"
"ඔයා හැකර් කෙනෙක් වුනේ කවදා ඉඳලද?"
"මම ඔයාට වඩා කොම්පියුටර් ගැන දන්න බව ඔයාට අමතකද?"
"මම ඔයා ගැන පහුගිය තුන්මාසෙම ඇහැ ගහගෙනයි හිටියේ........දෙසැම්බර් 07 වැනිදායින් පස්සේ ඔයා සම්පූණයෙන්ම වෙනස් වුනා......."
“ඔයා මං ගැන ඔත්තු බැලුවා එහෙනම්..........ඒ කියන්නේ ඔයා මාව විශ්වාස කලේ නෑ කියන එකද? ……………...මම ඔයාව විශ්වාස කලා......ඔයා කියපු හැම දෙයක්ම කලා.....තවමත් එහෙමයි...."
“ඔයා මේ කරන්නෙත් මං කියපුවද?..............දෙසැම්බර් 07වැනිදාට කලින් දැනගෙන හිටපු ගැහැණියව මම විශ්වාස කලා……. එයාට මගේ ජීවිතය බාර දෙන්න වුනත් මම දෙපාරක් හිතන්නේ නෑ.........ඒත් දැන් ඉන්නේ එයා නෙමෙයි.........."
"මම එයාම තමයි......"
“නැහැ!! ඔයා යන්ත්‍රයක්.......රොබෝ කෙනෙක්ද ඇන්ඩ්‍රොයිඩ් කෙනෙක්ද කියන්න මම දන්නේ නෑ.........ඒත් ඔයා දැන් මැෂින් එකක් බව මට හොඳට තේරෙනවා......"
"මැෂින් එකක්??.............ඔයාට පිස්සු…!!!"
CHAPTER 00001
ආරක්ෂක අමාත්‍යාංශය, කොළඹ
"ඔයාට ඕන එක්කොම ඔය බ්‍රීෆින් ඩොකියුමන්ට් එකේ තියෙනවා?"
"DTRA සිලිකන් නිම්න සෙට් එකේ තවත් නොකෙරෙන ප්‍රොජෙක්ට් එකක්..."
"නෑ... මේක ඇත්ත.... දැනටම හතරදෙනෙකුගෙ ටීම් එකක් ට්‍රේනින් වෙනව...."
"මොනවා!!..ඔයා කොහොමද දන්නේ?"
"මම දන්නවනේ.... කොහොමද කියලා අහන්න එපා...ත්‍රිකුණාමලේ නේවි බේස් එකේ ට්‍රේනින් එක යන්නෙ..එයාලගෙ රිසර්ච් සෙන්ටර් එකත් එහෙනෙ තියෙන්නේ"
"මේවගේ සංකීර්ණ ව්‍යාපෘතියක් කරන්න තරම් DTRA එකට තාක්ශණය නෑනෙ..."
"DTRA කරන්නේ සිස්ටම් ඉන්ටග්‍රෙෂන් විතරයි...... ප්‍රොජෙක්ට් එක ක්‍රියාත්මක කරන්නේ ආමි එකෙන්, ලොකු ටෙක් කොම්පැණි ගොඩකින් තාක්ශණය ලැබිලා තියෙනවා..."
“මොන රටවල ටෙක් කොම්පැණිවලින්ද?
"වැඩි හරියක් ඇමරිකන්, තව ඊශ්‍රායල් කොම්පැණි දෙකතුනකුත් තියෙනවා..."
"මම කියන්නද කවී....මෙතන යන්නේ වෙන ගේමක්........මෙයාලා මේ ගූගල්, මයික්‍රෝසොෆ්ට් වල ජොබ් දාලා ලංකාවට ඇවිල්ලා තියෙන්නේ අපිට ආදරේට නෙමෙයි........මේ කරන්නේ ඇමරිකාවේ කොන්තරාත්තුවක්...."
"නැෂනල් සෙකියුරිටි ඇඩ්වයිසර් ඔයාගේ මාමා බව ඇත්ත. ඒත් ඔයා ඩිෆෙන්ස් මිනිස්ට්‍රියේ කන්සල්ටින් ලෝයර් කෙනෙක් විතරනෙ..සාක්කි නැතුව මිනිස්සුන්ට හිතලූ චෝදනා කරන්න එපා.....එහෙම වුනොත් එයාටත් හොඳ නෑ………ආමි එක ඇතුලේ වෙන දේවල් හරියට නොදැන අනවශ්‍ය කොකු දාගන්න එපා. ඔයා දන්නවනෙ ආමි කමාන්ඩර් මේ ප්‍රොජෙක්ට් එකට ලොකු බැකප් එකක් දෙනවා කියලා. ඒ විතරක් නෙමෙයි නේවි කමාන්ඩර් එයාගෙ ක්ලාස් මේට්. ඒනිසා තමයි නේවි බේස් එකේ Special Boat Squadron (SBS) ට්‍රේනින් ඒරියා එකේ DTRA combat යුනිට් එකට ට්‍රේන් වෙන්න අවසර දීලා තියෙන්නේ."
"ඒවට මම බය නෑ.....බලමුකෝ....නැෂනල් සෙකියුරිටි ඇඩ්වයිසර් මගෙ මාමා වෙන එකයි, ආමි-නේවි කමාන්ඩර්ලා ක්ලාස්මේට්ලා වෙන එකයි මගෙ රාජකාරිය කරන එකට අදාල නෑනේ…..මම නිකන් කළු කෝට් ලෝයර් කෙනෙක් නෙමෙයිනෙ කවී, මම කරන්නේ මට නැෂනල් සෙකියුරිටි ඇඩ්වයිසර් බාරදීපු රාජකාරියනේ. මට මේ ප්‍රොජෙක්ට් එක ගැන වාර්තාවක් හදන්න කියලා ඕඩර් කරලා තියෙන්නේ. අගෝස්තු මාසෙ සිකියුරිටි කවුන්සිල් මීටින් එකේදි මම ලියන රිපෝට් එකේ සාරාංශය දාලා එකේදී ප්‍රසන්ටේෂන් එකක් කරන්න ඕනෑ,..."
“කියන්න? කොහොමද සෙබළු තෝරගෙන තියෙන්නේ?"
"මම දන්නේ නෑ......"
"කවීෂා...ඇත්ත කියන්න…මම හිතුවේ මේක තවම කන්සෙප්ට් ප්‍රොපෝසල් එකක් විතරයි කියලා…...මේ බ්‍රීෆින් ඩොකියුමන්ට් එකේ තියෙන ඒවා ඇත්තටම මනුස්සයෙකුට කරලා තියෙනවා නම්, ඒ මනුස්සයා වැඩිකල් ජීවත් වෙන්නේ නෑ......බලන්න මොළයට ඩෝපමීන්, සෙරටෝනින්, ඇඟට ඇඩ්‍රිනලීන්, එෆිඩ්‍රිෆීන්....මේවා දැඩි ලෙස ඇබ්බැහිවීම් ඇතිකරනවා.... මේ මිනිස්සුන්ට වැඩි කල් නොගිහින් කුඩු ගහන මිනිස්සුන්ට වෙනදේ වෙනවා.... කොහෙන්ද මේගොල්ලෝ මේවගේ දේවල් කරන්න අවසර ගත්තේ??"
"මම දන්නේ නෑ දසුන්…මම දන්නේ ඔය බ්‍රීෆින් ඩොකියුමන්ට් එකේ තියෙන ඒවයි, එහෙන් මෙහෙන් ඇහෙන ඒවයි විතරයි…... මම දන්න විධියට මේ යුනිට් එකේ ඉන්නෙ ඊලාම් යුද්ධවලදි ආබාධිත වුනු ස්පෙෂල් ෆෝසස් ඔපරේටිව්ස්ලා. සමහර අය මුළු ඇඟම පණනැතිවුනු අය... ඔවුන්, තමන්ව ඕනෑම පර්යේෂණයකට ගන්න කියලා ආරක්ෂක අමාත්‍යාංශෙට තමන්ගේ කැමැත්ත දුන්නලු..."
"එයාලට මොනවද ලැබෙන්නේ??"
"ඔවුන්ට, ජීවිතේ ඉතුරු කාලේ ඇඳකට වෙලා ඉන්නේ නැතුව, නැවතත් යුධ සෙබළෙක් වීමේ වරම..... ඔවුන්ගේ අඹුදරුවන්ට/දෙමව්පියන්ට රුපියල් මිලියන 25ක පාරිතෝෂිකයක් බැගින්...."
"ප්‍රොජෙක්ට් එක මුන් පටන් අරගෙනත් ඉවරයි එහෙනම්......මේක ඇත්තටම වෙනවා...ඩිෆෙන්ස් සෙකට්‍රියි, නැෂනල් සෙකියුරිටි ඇඩ්වයිසරුයි හිතාගෙන ඉන්නෙ මේක තවම proof of concept stage එකේ කියලා ......."
(proof of concept stage - කල්පිතයක් ප්‍රායෝගික බව සනාථකරගැනීමට මූලික ප්‍රායෝගික පරීක්ෂණ සිදුකරණ අදියර)
"ඔව් දසුන් G10 ව්‍යාපෘතිය සෑහෙන්ඩ සාර්ථකයි...."
"හහ් ඔයත් ඒ පැත්තේ වගේ?"
"අනේ දසුන්, මාව එක එක පැත්තට කොටුකරන්න හදන්න එපා……මොකක්ද ඔය ප්‍රොජෙක්ට් එක ගැන ඔයාගෙ තියෙන තරහ?…......මම ආසයි ඇමරිකාව වගේ රටවලින් විතරක් අහන්න ලැබෙන රිසර්ච් ප්‍රොජෙක්ට් එකක් ලංකාවෙ වෙනවා දකින්න.....අර ඔයා කිව්වා වගේ මමත් නිකන් කෝට්කාරියක් නෙමෙයින්........"
"සොරි කවී, ඔයාට ටිකක් රිදුනා වගේ....."
"මට රිදෙන්න නම් මමත් එහෙම වෙන්න එපෑ....මම ඉලෙක්ට්‍රොණික් ඉන්ජිනියර් කෙනෙක් වුනාට පස්සෙ තමයි ලෝයර් කෙනෙක් වුනේ..." දසුන්ගේ මුඛරි හැසිරීම දන්නා කවීෂා ඔහුට මුදුනා වෙන්න දෙන්න අකමැතිවුනා.
“පුහ්……ඉලෙක්ට්‍රොණික් ඉන්ජිනියර්??…. SLIITද?”
"නෑ මොරටුව..."
"දිස්ට්‍රික් කෝටා එකෙන් වෙන්ඩැති මොරටුව සිලෙක්ට් වුනේ...?"
අන් සියල්ලන්ම තමුන්ට වඩා උගත්කමින් හා බුද්ධියෙන් පහත් යයි සිතන දසුන් සිය සුපුරුදු ගර්හාව දියත්කලා..
"ඔව්……….. කොළඹ දිස්ත්‍රික් කෝටා එකෙන්........ I am a Vishakiyan….තව මොනවාහරි දැනගන්න ඕනෙනම් හෙට එන්න, දැන් මට මීටින් වගයක් තියෙනවා..." කැපී යන ලෙස පිලිතුරු දුන් කවී හුනස්නෙන් නැගිට පිටව ගියා.
කොළඹ ශාන්ත තෝමස් විද්‍යාලයේ ඉගෙන ගත් දසුන් අටවැනි ශ්‍රේණියේ උගනිද්දී බරපතල විනය විරෝධී ක්‍රියාවක නිරතවීම හා එය හෙලිකරගත් විනය භාර ගුරුවරයාට කෝපවී පහරදෙන්නට යාම නිසා පාසැලෙන් අස් කරනු ලැබුවා. ශාන්ත තෝමසයෙන් නෙරපා හැරීමට හේතුව සඟවාගෙන සිටින්නට බොහෝ උත්සහකලත් දැන් ආරක්ෂක සේවාවල හා නීතිඥ වෘත්තියේ සිටින ඔහුගේ පාසැල් සමකාලීනයන් හරහා එය හෙලිවීම වලක්වන්නට දසුන්ට නොහැකිවුනා. එය හෙලිවීම ඔහුට විශාල හීන මානයක් ඇතිකලා. කවීෂා "I am a Vishakiyan - මම විශාඛා විද්‍යාලයේ" කිව්වේ ඔහුගේ පාසැල් අතීතය ගැන ඇය දන්නා බව පෙන්වීමට යයි සිතාගත් දසුන් දැඩිලෙස ලැජ්ජාවටත් කෝපයටත් පත්වුනා.
CHAPTER 00010
Defense Technology Research Agency (DTRA) කෘත්‍රිම බුද්ධි විද්‍යාගාරය, චීන වරාය, ත්‍රිකුණාමළය
"අහ්...ඔයා දසුන් වීරකෝන් වෙන්ඩ ඕනෙ?"
"ඔයා කවුද?"
"මම සන්දීප් වනසේකර..."
"කෝ ඔයාලගෙ ලොක්කා?"
"ලොක්කා කිව්වෙ?"
"අර කසුන් සේනානායක කියන හාදයා...."
"එයාද? එයා මේ වෙලාවෙ නම් ඉන්නේ තොප්පිගල කැලේ.....ෆීල්ඩ් ටෙස්ටින් එකක් නිරීක්ෂණය කරන්න ගිහින්...."
"මොනවා ෆීල්ඩ් ටෙස්ටින්? මේ ආබාධිත මිනිස්සුන්ව කැලේට උස්සගෙන ගියාද ඒ පාර....?"
"මිස්ටර් දසුන්.......එයාලා උස්සගෙන ගියේ නෑ......ඇවිදගෙන ගිහින් හෙලිකොප්ටර් එකට නැග්ගේ....බලන්න ආසද?"
තමන් දෙස ඔරවාගෙන සිටින ආරක්ෂක අමාත්‍යාංශ නීතිඥ දසුන් වීරකෝන් දෙස මදහස පාමින් බැලූ සන්දීප් සිය ලැප්ටොප් යන්ත්‍රයේ යමක් ක්ලික් කොට එය දසුන් දෙසට හැරවූවා.
"මට ආයෙ මතක් කරනවද ඔයා කවුද මෙතන කියලා?"
"මතක් කරන්න මම කිව්වෙ නෑනෙ...මම තමයි G10 සෙබළුන්ගේ Battlefield Neurological Simulator and Reaction Enhancer / Battlefield Situational Awareness and Tactical Counter-Measures පද්ධතිවල කෘත්‍රිම බුද්ධි මෘදුකාංග නිර්මාණය කලේ...." සන්දීප් දසුන්ගේ උපහාසාත්මක හැසිරීම අවබෝධකර ගෙන සිටියා. ඔහු සියලු තොරතුරු හොඳින් දැන ගෙන පැමිණ සිටි බව සන්දීප් දන්නවා.
"මචන් ඕකා ගල් ආඳා......." නැෂනල් සෙකියුරිටි ඇඩ්වයිසර්, සිය ඥාති පුත්‍රයාවන දසුන් වීරකෝන්ව ඩීට්‍රා ආයතනයේ වැඩ කඩාකප්පල් කර දැමීම සඳහා භාවිතා කරන්නට යන බවට අණතුරු අඟවමින් ආරක්ෂක අමාත්‍යාංශයේ සිටින සන්දීප්ගේ මිතුරෙක් කියා සිටියේ සතියකටත් කලින්.
"කල්පනාවෙන් වැඩ කරපන් මචන්, දසුනයා පට්ට මීටරේ....ඕකා ඒලෙවල් කලේ ලන්ඩන් සිලබස් ඉන්ටර්නැෂනල් ස්කූල් එකක, UK ගිහිල්ලා ලෝයර් කෙනෙක් වෙන්න ප්ලෑන් එක තිබිලා තියෙන්නේ....ආරංචියෙ විධියට මූ ලයින් දාගෙන හිටපු සල්ලිකාර කෙල්ලෙක්ගෙ අම්මා කෙනෙක් පාටියකදි මූ ඉන්න තැන කියලා තියෙනවා.......... ඕන මෝඩයෙකුට ලෝයර් කෙනෙක් වෙන්න පුලුවන් අපේ දුව නම් කරන්නේ මෙඩිසින් කියලා...... මූ මචන් ඒකිගෙ අම්මට ඇනෙන්ඩත් එක්ක ලන්ඩන් සිලබස් නවත්තලා ලෝකල් ඒ ලෙවෙල් සයන්ස් කරන්න පටන් අරගත්තා. ටියුෂන් සර්ලා ගෙදරට ගෙන්නගෙන මාස නවයෙන් අවුරුදු දෙකේම සිලබස් කවර් කරගෙන ප්‍රයිවට් කැන්ඩිඩේට් කෙනෙක් විධියට ඒ ලෙවල් කරලා මෙඩිකල් කොලෙජ් සිලෙක්ට් වුනා…....මෙඩිකල් කොලෙජ් ඉන්න ගමන්ම මූ ක්‍රිමිනල් ලෝ ස්පෙෂල් ඩිගියකුත් දාගත්තා.... දැන් දසුනයා ලංකාවෙ ඉන්න MBBS තියෙන එකම ක්‍රිමිනල් ලෝයර්……...පස්සේ ඇටර්නි ජෙනරල් ඩිපාර්ට්මන්ට් එකට ගියේ මාමා එතන නිසා., එතනත් ඌ තැනක් හදාගෙන තියෙන්නේ …උගෙ ස්පෙෂල්ටි එක ෆොරෙන්සික්ස් (අධිකරණ වෛද්‍ය)…..හැබැයි ඉතින් පුදුම උණකින් ඉන්නේ....දසුනයා ඒකාලේ ඇටර්නි ජෙනරල්වවත් වැඩිය ගණන් ගන්නේ නෑලු.....මාමා නැෂනල් සෙකියුරිටි ඇඩ්වයිසර් වුනා විතරයි, මිනිහව ඩිෆෙන්ස් මිනිස්ට්‍රියට ගත්තා කන්සල්ටන්ට් කෙනෙක් විධියට.…."
සන්දීප්ව කල්පණාවෙන් මුදවමින් දසුන් කටහඬ අවදිකලා. "අහ්...එහෙනම් මිස්ටර් වනසේකර තමයි මේ ආබාධිත, සෙබළු සුපිරි සෙබලු බවට පත්කරපු රූකඩ නටවන්නා....??" එවර ඔහු සන්දීප්ව ඇමතුවේ ඔහුගේ වාසගමින්. ඔහු උරණවී ඇති බව සන්දීප්ට තහවුරු වුනා. යමෙක් තමන්ට වඩා හෝ තමන් පමණටම දක්ෂයෙක් බව දැනගත් වහාම දසුන්ගේ හීනමානය හිස ඔසවනවා.
"ම්ම්.... ඔව් මගේ මෘදුකාංගවලින් තමයි ඔවුන් පාලනය වන්නේ.... හැබැයි මොවුන් රූකඩ නෙමෙයි..... සිත් පිත් ඇති මිනිස්සු..."
"මිස්ටර් වනසේකර මට තියෙන ගැටළුවත් ඒකම තමයි..... ඩෝපමීන්, සෙරටෝනින්, ඇඩ්‍රිනලීන්, එෆිඩ්‍රෙෆීන් වලින් පොඟවන මේ මිනිස්සු ඇත්තටම පාලනය කරන්න පුලුවන් වෙයි කියලා හිතනවද?"
"මිස්ටර් දසුන් ඔය ප්‍රශ්නෙ අහන්ඩ ඕනෑ Bio Lab එකේ කට්ටියගෙන්, මේක AI ලැබ් එක...." සන්දීප් දසුන්ට පිලිතුරු දුන්නේ ඇඟටපතට නොදැනී වගේ. තම පිලිතුරෙන් උද්ධච්ඡ දසුන් තවත් එදිරිවාදී වන බව ඔහු දැන සිටියා.
"මම හිතන්නේ මිස්ටර් සන්දීප් උත්තරේ දන්නවා.... ඒත් මට ඔප්පුකරන්න බෑනේ..... කියමු බලන්න, මේ මිනිස්සු මෙහෙයුමකදි වියරු වැටුනොත්, නැතිනම් නියෝග පිලිපදින්නේ නැතිවුනොත්, තමුන්ගේ සොෆ්ට්වෙයාර් වලට එයාලව පාලනය කරන්න පුලුවන්ද?"
CHAPTER 00011
ජාතික ආරක්ෂක කවුන්සිල රැස්වීම, ජනාධිපති මන්දිරය, කොළඹ - G10 ව්‍යාපෘති සමාලෝචන සැසිය
"මේ G10 ව්‍යාපෘතිය නිසි අවසර ලබාගෙන නෑනේද?"
"ජාතික ආරක්ෂක උපදේශක තුමනි, අපි ගතයුතු අවසර සියල්ල අරගෙන තියෙනවා..."
"බොරු කියන්ඩ එපා, G10 ව්‍යාපෘති යෝජනාවේ තියෙන්නේ මේක කෘත්‍රිම බුද්ධීන් යුතු රොබෝ සෙබෙලෙක් පිලිබඳ පර්යේෂණ ව්‍යාපෘතිය කියලා, මේකෙ කිසිම තැනක නෑ, ආබාධිත සෙබලුන් යොදාගෙන කරන පර්යේෂණයක් කියලා.."
"ඔව්...ඒක ඇත්ත....ආබාධිත සෙබලු නැවත යුධ බිමට යවන්න පුලුවන් තාක්ශණ නිර්මාණය හා ඊට අවශ්‍ය පර්යේෂන කිරීමේ අවසරය Project Reboot ව්‍යාපෘතියෙන් ලබාගෙන තියෙනවා..."
"මේ දෙක එකතුකරලා එක ව්‍යාපෘතියක් කරන්න අවසර දුන්නේ කවුද? රීබූට් ව්‍යාපෘති සැලැස්මේ කිසිම තැනක තියෙනවද මේ සෙබළුන්ට හෝමෝන හා නියුරෝට්‍රාන්ස්මිටර් කෘත්‍රිමව ලබාදීලා ඔවුන් කෘත්‍රිමව උත්තේජනය කරනවා කියලා?"
"සර්, මේ සෙබළුන් දැඩිලෙස ආබාධිතවෙලා, ඇඳට සීමාවෙලා ඉන්න සෙබළු..... ඔවුන්ට මෙම කෘත්‍රිම උත්තේජන අවශ්‍යයි.."
"ඔව්...ඒත් මේ ව්‍යාපෘතිය ආබාධිත සෙබළු නැවත යුධබිමට අනුගතකිරීමේ ව්‍යාපෘතියක් නෙමෙයි නේද? ඔබලාගේ සැලැස්ම සියලුම විශේෂ බළකාවල සමාජිකයින් කෘත්‍රිම රසායණිකවලින් උත්තේජනය වන, කෘත්‍රිම බුද්ධි පරිගණක මගින් මෙහෙයවන ඔබලා කියන පරිදි සුපිරි සෙබළුන් කරන්න...ඔබලා මොනවගේ අධ්‍යනයන්ද කරලා තියෙන්නේ මෙතරම් විශාල මාත්‍රාවලින් හොමෝන හා නියුරෝට්‍රාන්ස්මිටර් ලබාදීමෙන් මේ සෙබළුන්ගේ මනසේ සිදුවිය හැකි දීර්ඝකාලීන වෙනස්කම් ගැන? ...කිසිවක් නෑ නේද? මෙවැනි සෙබළෙකු හෝ සෙබළ ඇණියක් පාළණයෙන් තොරවුනොත් කුමක් වෙයිද කියලා සිතාගන්න පුලුවන්ද?"
"අපට අවසරය තියෙනවා.... ජනාධිපතිතුමා අවසර දුන් EnHO (Enhanced Human Operator) විශේෂ ව්‍යාපෘතිය මගින් ලැබිලා තියෙනවා . EnHO හා රීබූට් ව්‍යාපෘති දෙක ඒකාබද්ධකරලා මේ අලුත් G10 ව්‍යාපෘතිය ඇතිකලේ බොහොම සාධනීය අරමුණු ඇතිව. එයටත් ජනාධිපතිතුමාගේ අත්සන ලැබී තිබෙනවා…..”
"පොඩ්ඩක් ඉන්න..." ආරක්ෂක ජාතික ආරක්ෂක උපදේශකවරයා අතක් ඔසවා ව්‍යාපෘති ප්‍රධානී කසුන් සේනානායකව නැවැත්වූවා.ලඟ අසුන්ගෙන සිටි සන්දීප් , කසුන්ට නිහඬවෙන ලෙස කකුල වද්දා සංඥා කලා.
“ජනාධිපතිතුමනි, මෙතනදි මම කියන්න ඕනෑ ඩීට්‍රා එකේ (DTRA - Defense Technology Resesearch Agency) අය ටිකක් අවංක මදි කියන එක. මේගොල්ලෝ ඔබතුමාවත් මේවට සාක්කි විධියට ගාවගන්නවා. ඒක වැරදියි. මේවා පත්තරවලට ගියාම එයලා ලියන දෙවල් දන්නවනෙ සර්?
“මම දන්නේ නෑ හමුදාපතිතුමාටවත් මේවා හරියට තේරෙනවද කියලා. එක එක වෙලාවට එක එක ලස්සන නම් වලින් ප්‍රොජෙක්ට් ප්‍රොපෝසල් හදාගෙන එනවා. Reboot කියනවා, EnHO කියනවා, G10 කියනවා. ඒවාවල තියෙන තාක්ෂණය ප්‍රයෝගිකද කියලවත් හොයලා බලලා තියෙනවද? මේ වැඩවල නීතිමය පැත්ත සලකලා බලලා තියෙනවද? මේ සෙල්ලන් කරන්නේ යකඩ රොබෝලා එක්ක නෙමෙයි, මනුස්ස ජීවිත එක්ක. ඒවගේම මේ රටේ මහජන මුදල් එක්ක”
සාවධානව අසා සිටි ජනාධිපතිවරයා මේ අවස්ථාවේ බාධාකිරීමක් කලා. සියලුදෙන නිෂ්ෂබ්දව ඔහුදෙස බැලුවා.
“මේ රටේ ජනාධිපතිවරයා විධියට මම ආඩම්බර වෙනවා ඩීට්‍රා ඒජන්සියේ වැඩකරන තරුණ ළමයින්ගේ තාක්ෂණ දැනුම හා කැපවීම ගැන. මේ අධිතාක්ෂණික දේවල් අපිට හරියට තේරෙන්නේ නෑ තමයි ආරක්ෂක උපදේශකතුමා….. ඒ නිසානේ තරුණ කොල්ලන්ට, කෙල්ලන්ට මේවා බාරදීලා තියෙන්නේ. මම ලඟදි ත්‍රිකුණාමලේ රැස්වීම් වගයකට ගිය ගමන්, හමුදාපතිතුමාගේ ආරාධනයෙන් ඩීට්‍රා රීසර්ච් සෙන්ටර් එකට ගියා. සුද්දගෙ කාල බෝම්බ දාන ප්ලේන් නවත්තන්න හදපු තැනක් ඒක. සුද්දගෙන් පස්සේ එතන වැඩකට අරගෙන තියෙන්නේ මේ ප්‍රොජෙක්ට් එකෙන්. එතන බොහොම දක්ෂ තරුණ තරුණියන් කුඩා කණ්ඩායමක් වැඩ කරනවා. ගූගල් වගේ පිටරට කොම්පැණිවල වැඩකරපු ළමයිනුත් එතන ඉන්නවා. මම ඒගොල්ලෝ එක්ක කතාකලා. එහෙ ඉඳගෙන ලක්ෂ ගණන් පඩිගන්න පුලුවන්කම තියෙද්දි තමයි මෙහෙ ඉන්නේ. ඉතින් උපදේශකතුමා අපි මේ තරුණයන්ව කළකිරවන්න නරකයි. මෙහෙ මේ ප්‍රොජෙක්ට් එක කඩාගෙන වැටුනොත් ටක් ගාලා ඇමරිකාවෙන් ග්‍රීන් කාඩ් දීලා ඔය තරුණයෝ ටික ඔක්කොම එහෙට ගනියි. එතකොට පාඩුව රටටමයි.”
"දැන් මේ ජී.10 ප්‍රොජෙක්ට් එකට මගේ අවසරය ගත්තා කියලා කියනවා. ඔව් මම අවසරය දුන්නා. හැබැයි මතක තියාගන්න, මම අවසරය දුන්නේ දැන් ඇඳට වැටිලා ඉන්න මේ නිර්භීත මිනිස්සුන් යලිත් දෙපයින් ඇවිද්දන්න, ඒ මිනිස්සුන්ට වටිනාකමක් දෙන්න පුලුවන් වෙයි කියලා. ඒනිසා එගොල්ලන්ගේ ජීවිත ගැන වගකීමෙන් වැඩ කරන්න ඩීට්‍රා එක දැන ගන්න ඕනෑ. ඒවගේම මේ වියදම් කරන්නේ මිනිස්සුන්ගේ සල්ලි කියන එකත් මතක තියාගන්න…”
"හමුදාපතිතුමාට මොනවද මේ ප්‍රොජෙක්ට් එක ගැන කියන්න තියෙන්නෙ? ඔබ සෑහිමකට පත්වෙනවාද G10 ව්‍යාපෘතිය යන විධිය ගැන?"
“ස්තූතියි ජනාධිපතිතුමනි......ආරක්ෂක මණ්ඩළයේ සමහර සාමාජික මහතුන්ට අපගේ අලුත් ව්‍යාපෘති ගැන යම් ආකාරයක ගැටලු තියෙන බව පේනවා. මම ඒවා නිරවුල් කරන්න උත්සහ කරන්නම්. මුලින්ම රීබූට් ව්‍යාපෘතිය ගැන කියන්න ඕනෑ. ඒක බොහොම සාර්ථකයි. තෝරාගත් ආබාධිත සෙබලුන් පනස් දෙනාම ඉතා සාර්ථකව සාමාන්‍ය ජීවිතයට අනුගත වෙලා තියෙනවා. අපි ඔවුන්ව නිරන්තරයෙන් නිරීක්ෂණය කරනවා. ඒවගේම හතර දෙනෙක් එයාලගෙ ඉල්ලීම මත නැවත බේසික් ට්‍රේනින් එකට යැවුවා. ඔවුන් හිතවාට වඩා හොඳින් ඒ කෝස් එක අවසන් කලා. දැන් ඔවුන් කොමාණ්ඩෝ කෝස් එකකට යොමුකරලා තියෙනවා. මේ ආබාධිත සෙබලු නැවතත් යුධ මෙහෙයුම් වලට යොමු කරන්න පුලුවන් නම් ඒක ශ්‍රී ලංකා යුධ හමුදාව ලබන විශාල ජයග්‍රහණයක්.
DTRA පර්යේෂණ කණ්ඩායම Enhanced Human Operator (EnHO) වැඩසටහන යෝජනා කලේ මෙවැනි සෙබලුන් සාමාන්‍ය සෙබලුන්ට වඩා වැඩිදියුණු හැකියාවන් තියෙන සෙබලුන් කරන්න. අපිට නිරෝගී සාමාන්‍ය සෙබලුන් මේ ආකාරයට වැඩිදියුණු කරන්න බෑ. ඒක නීතිවිරෝධීයි, ඒවගේම සදාචාර විරෝධීයි. ඒත් රට වෙනුවෙන් යුද්දෙට ගිහිල්ලා, අතපය පූජා කරලා, ආබාධිත වෙලා ජීවිතේ ඉතුරුකාලෙම ඇඳට වැටිලා, බේත් අහුරු පිටින් ගිලදදා ඉන්න, වැසිකිලියටවත් තනියම යන්න පුලුවන් කමක් නැති අවුරුදු 20-30 වයස් වල ඉන්න තරුණ කොල්ලන්ව ආයෙත් නැගිටවලා ගන්න තාක්ෂණයක් දියුණු කරන්න පුලුවන්නම් ඒක නීතිවිරෝධී හෝ සදාචාර විරෝධී නෑ. දෙපය පණ නැතිවුනු කෙනෙක්ටම විතරයි ආයෙ ඇවිදින්න විතරක් නෙමෙයි ආයෙත් දුවන්න, පනින්න, හමුදාවේ නැවත සක්‍රිය සේවයට යන්න පුලුවන්කම ලැබෙනවානම් ඒක මොනතරම් ආස්චර්යයක්ද කියලා තේරෙන්නේ…….”
“ඔවුන්ට හෝමෝන ඉන්ජෙක්ෂන් දෙන බව ඇත්ත. ඒත් වෛද්‍ය නිර්දේශ අනුව මේ ආබාධිතයින්ට කොහොමටත් ඔය හෝමෝන ට්‍රීට්මන්ට් දෙන්න ඕනෑ. නැතිනම් ඔවුන්ට දිවිරැකගන්න බෑ. ReBoot, EnHO දෙකම එකතුකරලා G10 වැඩසටහන හැදුවේ මේ අරමුණු ඔක්කොම ඉටුකරගන්න. මේකට G10 කියලා නමදාලා තියෙන්නේ විශේෂ අදහසකින්. අපි G10 කියලා කෙටියෙන් කියන්නේ Ten Giants කියන එකට. ඒ කියන්නේ දසමහා යෝධයින් කියන අරුත. මේ ආබාධිත තරුණ සෙබළුන්ට යෝධබල යෝධවීරිය දෙන්න හදන වෑයමක් මේක.
ඉදිරියේදී යුධ හමුදාවට මුහුණ දෙන්න වෙන්නේ කෙටි, බිහිසුණු ගරිල්ලා සටන්වලට නැතිනම් ජනාකීර්ණ නගරවල සිදුවන වීදි සටන්වලට. සමහරවිට රසායණික අවි, ජීව අවි යොදාගන්නා සටන් වෙන්න පුලුවන්. ලෝකෙ පුරාම ත්‍රස්තවාදි සංවිධාන අලුත් තාක්ෂණයෙන් සන්නද්ධ වෙනවා. අද වෙනකොට ජෛව ඉන්ජිනේරු තාක්ෂණය කොතරම් දියුණු වගේම ලාභද කියලා කියනවනම් අන්තර්ජාලයෙන් ජාන සංස්කරණ කට්ටල මිළදීගන්න පුලුවන්. මේවා අරගෙන ත්‍රස්තවාදීන්ට සරළ, එහෙත් විනාෂකාරී ජෛව අවි හදාගන්න පුලුවන්.
එවැනි ත්‍රස්තයින් කණ්ඩායමකට මුහුණ දෙන්න අපිට අපේ දක්ෂම විශේෂ බළකා යුනිට් එකක් වුනත් යවන එක අමාරුයි. ඒ සඳහා යවන්න ඕනෑ ඉතාමත් වේගවත්ව ඉලක්කයට ලඟාවෙන්න පුලුවන්, බොහොම බිහිසුණු ලෙස සටන්කරන්න පුලුවන්, සාම්ප්‍රදායික විශේෂ බළකා ක්‍රියාකරුවන්ට වඩා අතිවිශාල ප්‍රහාරක හැකියාවක් ඇති, රොබෝ තාක්ෂණයෙන් වැඩිදියුණු කල සන්නාහ හා කෘත්‍රිම බුද්ධි තාක්ෂණයෙන් උද්දීපනය කල සංවේදන ඇති අතිවිශේෂ සෙබළුන්. අපේ වෑයම එවැනි විශිෂ්ඨයින් ටිකදෙනෙකු හරි බිහිකරගැනීමයි.
CHAPTER 00100
ආරක්ෂක අමාත්‍යාංශය සංවිධානය කල රණවිරු උපහාර මියැසි රාත්‍රිය - බණ්ඩාරණායක ජාත්‍යන්තර සම්මන්ත්‍රණ ශාලාව.
"ගුඩ් ඊවිනින් මිස්...."
"ගුඩ් ඊවිනින්...." කවීෂා තමන්වෙත ලංවුනු තරුණයා දෙස ඕනෑවට එපාවට මෙන් දෑස් යොමුකොට යලිත් ඉවතබලා පිලිතුරු දුන්නා. ඉතාම හොඳින් හැඳ පැළඳගෙන සිටි ඔහුගෙන් හොඳ පෞරුෂයක් දිස්වුනා.
"ඔයා කවීෂා ජයමාන්න නේද?"
"කොහොමද නම හොයා ගත්තේ?" ඇය නළල රැළිකොට, මදක් තදින් ඇසුවා.
“මිස් මාව නොදන්නවා වුනාට මම මිස්ව දන්නවා..."
"ඇත්තට? මාව ගොඩක් අය දන්නවා........ ඔයාට ඊවිනින් එක ගතකරන්න කාව හරි හොයාගන්න ඕනෑනම් අර පැත්තට යන්න......... ඒ පැත්තේ ෆෝසස් වල කෙල්ලෝ ගොඩක් ඉන්නවා......හැබැයි පරිස්සමෙන්.........අනුන්ගේ කෙල්ලන්ට ලයින් දාන්න යන්න එපා..."
මදහස පෑ තරුණයා කමිස සාක්කුවෙන් කාඩ් පතක් ගෙන කවීෂා වෙත දිගුකලා.
"කැප්ටන් ජිත් ගුණවර්ධන.... මිලිටරි ඉන්ටෙලිජන්ස්...."
කාඩ්පත වෙත නෙත් යොමුකල කවීෂා එය උඩින් පල්ලෙන් කියවා යලිත් තරුණයා වෙත දිගුකලා.
"අපරාදෙ කාඩ් එකක් නාස්ති නොකර වෙන කෙනෙකුට දෙන්න...... අනිත් එක ඔෆිෂියල් වැඩවලට දීලා තියෙන විසිටින් කාඩ් ඔහොම කෙල්ලන්ට දික් කරන්න එපා කැප්ටන්...."
"ඔෆීෂියල් වැඩකට තමයි මම මිස්ට කතාකරන්නේ"
නැවතත් නළල රැළිකරගත් කවීෂා කෙලින්ම ජිත්ගේ මුහුණ දෙස බැලුවා. ඔහුත් ඇයගේ දෑස් මග නොහැර බලා සිටියා. මොහොතක් දෑස් රඳවගෙන සිටි ඇය, අත් බෑගයෙන් සිය ජංගම දුරකථනය ගෙන එහි ඇති පණිවුඩ කියවමින්...
"හම්....කියන්න බලන්න... මොකක්ද ප්‍රශ්ණෙ?"
"දසුන් වීරකෝන්...."
"දසුන් වීරකෝන්…??? මොකක්ද මිලිටරි ඉන්ටෙලිජන්ස් එකට දසුන් එක්ක තියෙන ප්‍රශ්ණෙ....?"
"මිස් දසුන්ව දන්නවා නේද?"
"දන්න නිසානෙ ඇහුවෙ එයත් එක්ක තියෙන ප්‍රශ්ණෙ මොකක්ද කියලා? මිස්ට වීරකෝනුත් මෙහෙ ඇවිත් ඉන්නවා....මම කෝල් එකක් දීලා ගෙන්නන්නද? එයාගෙන්ම අහගන්න පුලුවන්නේ...."
"මිස් ජයමාන්න.... ඔය තරමට හරස් වෙන්න එපා.......මම ඔයත් එක්ක හාද වෙන්න හදනවා නෙමෙයි......සීරියස් දෙයක් කතාකරන්න හදන්නේ........!!"
මදක් නිහඬව සිටි කවීෂා කපිතාන් ජිත් ලබාදුන් විසිටින්කාඩ් පත යලිත් කියවමින් සන්සුන් හඬින් කතා කලා
"කියන්න කැප්ටන්, මොනවද මගෙන් දැන ගන්න ඕනෑ.....?"
"මිලිටරි ඉන්ටෙලිජන්ස් එකට ඔයාගෙන් උදව්වක් ඕනෑ වෙලා තියෙනවා. මම ඔයත් එක්ක කතාකරන බව මගේ සීනියර් ඔෆිසර් දන්නවා. අපේ කට්ටිය මේ වටේ ඉන්නවා...එයාලා අපිව කවර්කරගෙන ඉන්නේ....."
එසැනින් වටිපිට බලන්නට උත්සහකල ඇයව ජිත් නැවැත්තුවා.
"වටපිට බලන්න එපා, මා දිහා බලාගෙන කතාකරන්න..."
"මොකක්ද ඔය ගොල්ලො මෙතන කරන්න හදන්න්නේ? මිෂන් එකක්ද?? මුලු ඩිෆෙන්ස් මිනිස්ට්‍රියමයි, මිලිටරි ටොප් බ්‍රාස් එකයි අද මෙතන!!!"
"ඔව්.....එක විධියක මිෂන් එකක්....ඒවගේම ඩිෆෙන්ස් මිනිස්ට්‍රියේ හැමෝම මෙතන ඉන්න එක මේවගේ වැඩකට හොඳම අවස්ථාවක්....අපිට ගොඩක් වැදගත් තොරතුරු සපයන්න පුලුවන් කෙනෙක්ව අපේ පැත්තට නම්ම ගන්න හදන මිෂන් එකක් කරන්නයි හදන්නේ..."
"මේ මාව? ඇයි?" කවීෂාගේ මුහුණ අඳුරුවුනා.
"දසුන් වීරකෝන්..... ඔයා මොනවද එයා ගැන දන්නේ?"
"වැඩිය දෙයක් නෑ....එයා මෙඩිකල් ඩොක්ට කෙනෙක්, ඒවගේම දක්ෂ ක්‍රිමිනල් ලෝයර් කෙනෙක්, නැෂනල් සිකියුරිටි ඇඩ්වයිසර්ගේ ඥාති පුත්‍රයෙක්..."
එයත් එක්ක මොකක් හරි සම්බන්ධයක් තියෙනවද?"
"මොනවිධිය සම්බන්ධයක්ද?" ඇය තියුණු බැල්මක් හෙලුවා.
"රාජකාරි සම්බන්ධතාවලට වැඩි යමක්........ ලඟ හිතවත් කමක්, නැතිනම් රොමෑන්ටික් රිලේෂන්ෂිප් එකක්...."
"නෑ.....එහෙම මුකුත් නෑ...... ඇයි මගේ පෞද්ගලික ජීවිතේ ගැන අහන්නේ....?"
“එහෙම සම්බන්ධකමක් තියෙනවානම් මෙතනින් එහාට මට ඔයත් එක්ක කතාකරන්න බෑ ඒකයි..."
"ඔයාලගෙ රස්සාව ඔත්තු බලන එක නේද? බැලුවෙ නැද්ද හොයලා...?"
"බැලුවා මිස්, හොඳට හොයලා බැලුවා.... ඒත් ඒක ඔයාගෙන්ම අහලා දැන ගන්න එක හොඳ නිසයි ඇහුවේ. අපි දන්නවා මිස්ට දසුන් වීරකෝන් එක්ක රාජකාරි ඇයි හොඳයියට වැඩි යමක් නෑ කියලා....නැතිනම් මම කවදාක්වත් මිස්ට කතා කරන්නේ නෑ...."
“අපිට මිස්ට වීරකෝන් ගැන ඇහ ගහගෙන ඉන්න මිනිස්ට්‍රිය ඇතුලේ කවුරු හරි ඕනේ...."
"මොනවා??? ඔයාලට පිස්සුද කැප්ටන්?"
"මට පිස්සුවක් තියෙනවා කියලා පේනවද ඔබතුමියට?" ජිත් මදක් කිපුණු බව පෙන්වමින් විමසුවා.
“පිස්සු නැතිනම් හැටි වෙන්න ඇති ඔයාලගෙ...! ඔයාල වැඩකරන්නෙත් ඩිෆෙන්ස් මිනිස්ට්‍රියේ, ඔයාලගෙ හෙඩ් ඔෆිස් එක තියෙන්නෙත් ඩිෆෙන්ස් මිනිස්ට්‍රියේ, ඒත් ඔයාලට ඩිෆෙන්ස් මිනිස්ට්‍රිය ඇතුලෙ ඔත්තුවක් බලවගන්න මිනිහෙක් නෑ කියලද කියන්නේ?" කවීෂා රවමින් ඇසුවා. ඇයගේ කටහඬහි කෝපය ගැබ්වී තිබුණා.
"මම මිස්ගේ
සිහින චාරිකා ෆේස් බුක් පේජ් එකේ ෆෑන් කෙනෙක්.........මිස් ලියපු කතා ඔක්කොම මම කියෙව්වා..." ජිත් හදිසියේම කතාව වෙනතක යොමුකලා. ඇයගේ එදිරිවාදී ප්‍රතිචාර වැඩිවෙමින් තිබුණ නිසා කතාව වෙනතක යොමු කරන්නට ඔහු සිතුවා....
ජිත් දෙස යොමුකල ඇයගේ මුහුණේ යලිත් සැහැල්ලු බවක් දිස්වුනා.
"මම කැම්පස් යන කාලේ ලියපු පිස්සු කතා ටිකක් කියවලා තියෙන්නේ.... " ඇය ඉවත බලාගෙන පිලිතුරු දුන්නා.
"ඒත් ඒවා වෙන කෙල්ලෝ ලියන ළාමක ප්‍රේම කතා වගේ නෙමෙයි........... ඔයා කතා නායිකාව වෙන රහස් පරීක්ෂක කෙටිකතා.... ඒවාවලට Nancy Drew කතාවල ආභාශය තියෙනවා වගේ පෙනෙනවා......ඔයා නැන්සි ඩෲ ෆෑන් කෙනෙක් නේද……..?"
"ඔව් මම නැන්සි ඩෲ, හාඩි බෝයිස් කතා ඔක්කොම කියවලා තියෙනවා......."
"මිස් කවීෂාට පුලුවන්ද අපේ නැන්සි ඩෲ වෙන්න?" ජිත් යලිත් මාතෘකාවට හැරුනා.
"කැප්ටන් ජිත්, ඔයානම් මාර කපටියෙක්........!" ඇය සිනාසුනා.
“"සමාවෙන්න මිස්.......රාජකාරියනෙ කරන්නේ......"
"ඒ කියන්නේ, ජනාධිපතිතුමාගේ ලඟම විශ්වාසවන්තයෙකු වෙන නැෂනල් සිකියුරිටි ඇඩ්වයිසර්ගේ නංගිගෙ පුතා ගැන මිලිටර් ඉන්ටෙලිජන්ස් එකට බරපතල සැකයක් තියෙනවා....."
"ඔව්......"
"ඇයි ඒ?"
"අපිට ඔයාව විශ්වාස කරන්න පුලුවන්ද?"
"බැරිනම් ඔයා මට මේ තරම් විස්තර කියනවද?"
“මේක සෑහෙන බරපතලයි..........අපරික්ෂාකාරීවුනොත් ඔයාට අණතුරක් වෙන්නත් පුලුවන්...."
"ඔයාලනම් නියම මිනිස්සු කැප්ටන් !!!............
--කවී ඔයාට පුලුවන්ද අපි වෙනුවෙන් ඔත්තු බලන්න?........හැබැයි මැරෙන්නත් ඉඩ තියෙනවා ! --
...........ඔයලා බඳවගන්න ඔත්තුකාරයෝ ඔක්කොටම ඔය කතාව කියලද පටන් ගන්නේ? නැතිනම් මට විතරද?"
කපිතාන් ජිත් සිනාසුනා. ඔහුගේ සගයෙකු වන, මනෝ විශ්ලේෂණ විශේෂඥ ඩොක්ටර් නදීෂ් සේනාධීර, කවීෂා ගැන සකස්කොට තිබූ විශ්ලේෂණ වාර්තාව කොතරම් නිවැරදි දැයි ඔහුට සිතුනා.
"කවීෂා කියන්නේ තද ගති පැවතුම් ඇති තරුණියක්. IQ එක සෑහෙන ඉහලයි. මිතුරියන් අඩුයි. මිතුරන් වැඩියි. ගැහැණුන් අවිශ්වාස කරන තැනැත්තියක් බව අනුමාණ කල හැකියි. පිරිමි ඇසුරට කැමතිවුනත් දිගුකාලීන සබඳතා ගොඩනගාගන්න අකමැතියි. පෙම්වතෙක් නැත. ඇයගේ විශ්වාසය දිනාගන්න අමාරුයි. එහෙත් හිතවත් වුවිට විශාල කැපකිරීම් කරන්න සූදානම් ගතියක් පෙන්වයි. තමන්ගේ ඒ දුර්වලකම දන්නා නිසාදෝ ඇය හිතාමතාම බොහෝ දෙනා අතේ දුරින් තබාගන්නට උත්සහ කරයි. සාමාන්‍ය තරුණියන්ට වඩා නිර්භය, එඩිතර ගතිලක්ෂණ ඇත. කටකාරියක් වන ඇය කිසිවෙකුට දෙවැනි වන්නට අකමැති ගතියක් පෙන්වයි. පෙම්වතෙකු හෝ ඉතා ලඟින් ආශ්‍රය කරන්නන් නොමැතිවීමට මේ ගතිලක්ෂණද බලපානවා යයි අනුමාන කල හැකිය. ත්‍රාසජනක අත්දැකීම් වලට කැමතියි. ක්‍රීඩාශීලීයි. දක්ෂ ටෙනිස් ක්‍රීඩිකාවක් වගේම පාසැල් කාළයේ පිහිණුම් ශූරියක්ද වනවා. මෙවැනි තරුණියන් හා හාදවීමට උත්සහ කිරීමට බොහෝ තරුණයින් බියක් දක්වයි, එහෙත් ඇයගේ විශ්වාසය දිනාගත හැකිනම්, ඇයව ඕනෑම දෙයකට පොළඹවා ගැනීමට පුලුවන...…….”
"නදීෂ් කෙල්ලගේ කේන්දරේ බැලුවා වගේ ලියලා තියෙන දේවල් හරියටම හරි..." යන සිතුවල්ල ජිත් හට ඇතිවෙද්දී කවීෂා කටහඬ අවදිකලා.
"මොකෝ සයිලන්ට් වුනේ එක පාරට?"
"නෑ....ඔයාගෙ සයික් ප්‍රොෆයිල්** එකේ තිබුණ ඒවා කොච්චර ඇත්තද කියලා හිතුවා......"
(** psychological profile - මනෝරේඛය)
"මං ගැන සයිකොලොජිකල් ප්‍රොෆයිල් එකකුත් හදලද?..." කවීෂා පුදුමයෙන් ඇසුවා.
"ඔයාට විතරක් නෙමෙයි, අපි උනන්දුවක් දක්වන හැම කෙනෙක්ම, ඒ කියන්නේ a person of interest කියලා අපි හඳුනගන්න හැමෝටම සයික් ප්‍රොෆයිල් එකක්, බිහේවියර් ප්‍රොෆයිල් එකක් හදනවා…..ඊට පස්සේ තමයි අපි ඇක්ෂන් එකක් ගන්නේ…”
“ඇයි ඉතින් මට මෙච්චර විස්තර කියන්නේ? ඔයලා රහස් රකින්න නෙමෙයිද ඉන්නේ?"
"මම කිව්වා වගේ අපි ඔයාගෙන් බලාපොරොත්තු වෙන්නේ බරපතල දෙයක්....අපිට ඔයාගේ විශ්වාසය දිනා ගන්න ඕනෑ කවීෂා.... ඒකට ඔයාට මුල ඉඳලම ඇත්ත කියන්න ඕනෑ....මම කරන්නේ ඒක..... ඔයා වගේ කෙනෙක්ව රවට්ටලා උපකාර ගන්න බෑ....... ඔයාගේ සයිකොලොජිකල් ප්‍රොෆයිල් එකෙන් අපි ඉගෙන ගත්ත වැදගත්ම දේ ඒක....අපි බලාපොරොත්තුවන දේ කරලා දෙන්න ඔයාට බුද්ධියයි, ආත්ම ශක්තියයි දෙකම තියෙන බව අපි දන්නවා.......ඇති කරගන්න ඕනෑ විශ්වාසය.......අපිට ඔයාව අවශ්‍යයි...... දසුන් වීරකෝන් ගැන ඔයා නොදන්න ගොඩක් දේවල් තියෙනවා....ඒත් මේක වෙලාව නෙමෙයි.......ඔයාගෙ ප්‍රයිවට් ෆෝන් නම්බර් එක දෙන්න පුලුවන්ද? මගේ එක කාඩ් එකේ තියෙනවා. පැය විසිහතරෙම මම ෆෝන් එක ආන්සර් කරනවා.....කැමතිනම් අපි ආයෙත් හමුවෙමු"
CHAPTER 00101
මාලබේ ව්‍යායාම මංතීරුව, චන්ද්‍රිකා කුමාරතුංග මාවත
පාන්දර පහ පසුවී විනාඩි පහක් යනවිට මාලබේ ටවුම පැත්තෙන් ආ කළුපැහැති නිසාන් ලීෆ් රථයක් චන්ද්‍රිකා කුමාරතුංග මාවතට ඇතුලුකලා. සෙනසුරාදා දිනයක් වූ බැවින් ඒ වනවිටත් ව්‍යායාම කරන්නන් පැමිණි වාහන කිහිපයක් මාර්ගයේ වම්පස නවතා තිබුණා. මදක් ඉදිරියෙන් ඉඩක් ඇති තැනක් සොයාගත් කවීෂා වාහනය නතර කොට ඉන් බසිද්දී ජිත් ඇය වෙත පැමිණියා. අළු පැහැති ට්‍රැක් බොටම් එකකින් සැරසී සිටි ඇයගේ ඇඟටම ඇළුනු සුදු පැහැ ස්පෝර්ට්ස් ටී ශර්ට් එක නිසා උඩුකයේ සුන්දරත්වය මනාව දිස්වුනා. රූමතියක් නොවුනත් සුන්දර මුහුණක් හා පිරිපුන් නාරි දේහයක් හිමි ඇය ඕනෑම පිරිමියෙකුගේ දෑස් ඇදගන්නට සමත්වුනා.
"ගුඩ් මෝනින්...."
"හායි! ගුඩ් මෝනින් කැප්ටන්....!"
"මට ජිත් කියලා කියනවද?"
"ඒක ඔයාගෙ ඇත්ත නමද?"
"පාවිච්චි කරන නම.......ඇත්ත නම අනුප්‍රජිත්...."
“ඒක දෙමළ නමක් නේද?"
"ඔව්..."
"ඔයා දෙමළ නෙමෙයිනෙ..."
"අම්මා දාපු එකනෙ........මොකක්ද දෙමළ පිච්චර් එකක හිටපු අම්මා ආසවුනු කොල්ලෙක් ගේ නමක්..." ජිත් සිනාසෙමින් පැවසුවා.
“ඇත්තද?”
“දුවමුද?"
"වෝම් අප් කරලා පුරුද්දක් නැද්ද කැප්ටන් ජිත්ට?" කවට මුහුණක් මවාගෙන ඇසූ කවීෂා තාපන ව්‍යායාම පටන්ගත්තා.
"ඔයා එන්න කලින් මම වෝම් අප් එක කරලා.....පිංකෙත පන්සල ලඟට දුවලා ආවා...."
"හ්ම්......මං ඒත් බැලුවා දුවන්නත් කලින් දාඩිය දාගෙන මොකද කියලා...."
"දැන් හරි....යමු......" තාපන ව්‍යායාම අවසන් කල ඇය ජිත් ලඟන් සිට ගත්තා. ව්‍යායාම මංතීරුවට බැසගත් ඔවුන් දිවීම ඇරඹුවා. ජිත් සිය ඔරලෝසුවේ විරාම ඝටීකාව (stop watch) ක්‍රියාත්මක කරද්දී වෙලාව අළුයම 5.20 බව එහි තිරයේ දිස්වුනා.
"කීයටද මෙතනට ආවේ?"
"ඊයේ රෑ ඉඳන් මෙතන අප්පා........ ඔයාව කොහොම හරි අල්ලගන්න එපෑ......." ජිත් පවසද්දී ඇය දෙවුර ගස්සමින් සිනාසුනා.
“තව කීදෙනෙක් ආවද ඔයාගෙ සපෝට් ෆෝසස් විධියට...?”
“කවුරුත් නෑ......මං විතරයි..”
තමන් හඳුනන, ආරක්ෂක අංශවලට සම්බන්ධ බොහෝ පිරිමින්ට වඩා සැහැල්ලුවෙන් හැසිරෙන ජිත් පිලිබඳව පැහැදීමක් ඇයගේ සිතෙහි ඇතිවෙමින් තිබුණා. බුද්ධි අංශ නිළධාරියෙකු වූ ඔහු පිලිබඳව ආරක්ෂක අමාත්‍යාංශයේ තමන් දන්නා ඉහල නිළධාරීන් හරහා තොරතුරු සපයාගත් කවීෂා, ජිත් මිලිටරි ඉන්ටෙලිජන්ස් බුද්ධි අංශයේ හොඳ නමක් දිනාගෙන සිටින දක්ෂයෙකු බව වටහාගත්තා. ඔහු තමන් ගැන නිසි තක්සේරුවකින් සිටිනා බවද ඇයට තෙරුම් ගියා. ගැහැණුන්ගේ හැකියාවන් මෙන්ම අවශ්‍යතා ගැනද නිසි තක්සේරුවක් ඇති, බොරු චාටු බස් හා අනිසි ලෙන්ගතුකම් නොපාන පිරිමින් හා එක්ව වැඩිකිරීම බොහෝ පහසු බව ඇය අත්දැකීමෙන් දන්නවා. දසුන් වීරකෝන් ගැන තවදුරටත් කතාකිරීමට ජිත්ව ගෙන්වාගන්නට ඇය තීරණය කලේ ඒ අනුවයි.
"දසුන් ගැන කියමුද බලන්න...." නිහඬව ගෙවුනු විනාඩි කිහිපයකින් පසු ඇය ඇසුවා.
"දසුන් වීරකෝන් ගැන ලොකු අවුලක් අපිට තියෙනවා. දැන් සති තුනකට කලින් අඩි 40ක කන්ටේනර් එකක් පරීක්ෂා නොකර නිදහස් කරන්න මෙයා කස්ටම්ස් එකට බලකරලා තියෙනවා. කස්ටම්ස් එකට මෙයා දීපු තොරතුරුවල විධියට ඒ කන්ටේනර් එකේ ඩීට්‍රා එකට බොහොම හදිසි අවශ්‍යතා කියලා ගෙන්වපු බඩු වගයක්. ඒත් ඔයයි මමයි දෙන්නම දන්නවා දසුන් ඩ්‍රීට්‍රා ප්‍රොජෙක්ට් එක ගැන සිකියුරිටි කවුන්සිල් එකට ලියපු රිපෝට් එක. අපේ විශ්ලේෂණයේ විධියට දසුන්ට ප්‍රශ්නෙ තියෙන්නේ ඩ්‍රීට්‍රා එකෙන් කරන ප්‍රොජෙක්ට් එක නෙමෙයි. මිනිහගෙ ආරෝව ඒකෙ වැඩකරන කොල්ලො කෙල්ලෝ එක්කයි. තමුන්ට වඩා දක්ෂයින්ට, වැඩකාරයින්ට, මොළකාරයින්ට දසුන් පුදුම විධියට වෛරකරනවා. ඒක මානසික රෝගයක් වගේ…”
"අපිට තියෙන තොරතුරුවල විධියට දසුන් කස්ටම්ස් එකේ ලොක්කෙකුට කතාකරලා ෆෝන් එක නැෂනල් සිකියුරිටි ඇඩ්වයිසර්ට දීලා තියෙනවා. එයා තමයි ඕඩර් කරලා තියෙන්නේ කන්ටේනර් එක වහාම නිදහස් කරන්න කියලා...එතන ලොකු අවුල් දෙකක් තියෙනවා....... පලවෙනි එක නැෂනල් සිකියුරිටි ඇඩ්වයිසර් ඩීට්‍රා යුනිට් එකට දැඩි විරෝධයක් එල්ල කිරීම. එයා හිතන්නේ ඩ්‍රීට්‍රා එක සල්ලි නාස්තියක් කියලා. සිලිකන් වැලී එකේ ඉඳලා ආපු ලංකාවෙ ටික දෙනෙකුට ආණ්ඩුවේ සල්ලි වලින් හොඳ නිවාඩුවක් ගතකරන්නයි, ආපහු ඇමරිකාවට යනකොට එයාලගෙ CV එකට දාගන්න හදාගත්ත වැඩකට නැති ප්‍රොජෙක්ට් එකක් කියලයි නැෂනල් සිකියුරිටි ඇඩ්වයිසර් හැමෝටම කියන්නේ......එහෙව් මිනිහා කලබලේ ඩ්‍රීට්‍රා එකට ආපු කන්ටේනර් එකක් නිදහස් කරන්න ඕඩර් කරයිද?"
"අනිත් එක තමයි, "ජාතික ආරක්ෂක උපදේශකවරයාගෙන් ලැබුණු අණ අනුව නිදහස් කරන ලදී කියලා" කන්ටේනර් ලියකියවිලි වල දාලා තියෙන මිනිට් එකට අනුව ඇමතුම ලැබුණ වෙලාවෙ දසුන් ඩිෆෙන්ස් මිනිස්ට්‍රියේ ඉඳලා නෑ. ඒවෙලාවෙ නැෂනල් සිකියුරිටි ඇඩ්වයිසර්, ඩිෆෙන්ස් සෙකට්‍රිත් එක්ක, European Union එකේ ආගමන-විගමන ප්‍රධානීන් කිහිපදෙනෙකු එක්ක මිනිස්ට්‍රියෙ සාකච්ඡාවක ඉඳලා තියෙන්නේ...පැය තුනක් ගිය ඒ රැස්වීමේදී කිසිම බාධාවක් කරන්න එපා කියලා ඩිෆෙන්ස් සෙක්ට්‍රි එයාගේ ස්ටාෆ් එකට නියෝග කරලා තිබුණා...."
"එතකොට කොහොමද නැෂනල් සිකියුරිටි ඇඩ්වයිසර් කස්ටම්ස් ලොක්කට කතාකරේ? දසුන් මිනිස්ට්‍රියේ හිටියෙත් නැත්තම්, එයා කොහොමද ෆෝන් එක දෙන්නේ?"
"අපිට තියෙන ලොකුම ප්‍රශ්නෙත් ඒකයි.........දසුන් නැෂනල් සිකියුරිටි ඇඩ්වයිසර්වත් නොමග යවලා, එයාගෙ නම පාවිච්චි කරලා වෙන ලොකු ගේමක් ගහනවා...."
"ඒත් කෝල් එක?"
"එහෙම ෆේක් කෝල්ස් දෙන්න පුලුවන් රහස් තාක්ෂණයක් තියෙනවා. ඒක වැඩකරන්නේ Artificial Intelligence (AI) ඇප් එකකින්. ඕනෑම කෙනෙකුගේ කට හඬේ සාම්පල් ප්‍රමාණයක් ඇතුලු කරාම, ඒ AI ඇප් එකට අර මනුස්සයාගේ කට හඬින් ඕනෑම දෙයක් කියන විධියට වොයිස් ක්ලිප් එකක් හදන්න පුලුවන්ලු. ඒ ඇප් එක ඇමසන් ඇලෙක්සා, ඇපල් සිරී, මයික්‍රෝසොෆ්ට් කෝටානා වගේ AI වොයිස් ඇප් එකකට සම්බන්ධ කලාම අර මනුස්සයාගේ කටහඬින් සංවාදයක් ගෙනියන්න පුලුවන්ලු....හැබැයි ඒ තාක්ෂණය තාම වාණිජ මට්ටමින් එලිදක්වලා නෑ.........AI ලැබ්වල පර්යේෂණ මට්ටමේ තියෙනවා කියලා තමයි අපිට රිපෝට් වෙලා තියෙන්නේ....."
“ඔය වැඩේ දසුන් කලා කියලා හිතන්නේ කොහොමද? දසුන්ගේ කටහඬත් ඔය විධියටම ෆේක් විධියට හදලා වෙන කෙනෙක් දසුන්ව කොටු වෙන විධියට වැඩේ කලා වෙන්න බැරිද? අනිත් එක ඔයවගේ තාක්ෂණයක් ලංකාවේ තියෙන්නේ කාලඟද?"
දිවයමින් සිටි කවීෂා එක්වරම නැවතුනා. ඇයගේ මුහුණේ විෂ්මය මුසු කරදරකාරී ස්වරූපයක් මැවී තිබුණා.. කවීෂා පසුකර මදක් ගොස් ආපසු හැරුණු ජිත්, නළලේ දාඩිය බිඳු පිසදමමින්… "ඇයි කවී? මොකද?"
කවීෂාට හුස්ම අල්ලන්නට ඉඩදුන් ජිත්, සිය පිටෙහි එල්ලාගෙන ගිය කුඩා බෑගයෙන් ජල බෝතල් දෙකක් ගෙන එකක් ඇයට දී අනෙකෙන් ජලය උගුරු කිහිපයක් බිව්වා.
"ලංකාවේ දක්ෂම AI ටීම් එක කොහෙද ඉන්නේ?" බෝතලේ කටේ තියාගෙන වතුර බොමින් සිටි ජිත් දෙස බලමින් කවීෂා ඇසුවා. ඒ පැණයෙන් ජිත් ගැස්සුනා. ඉස්මෝලේ යන්නට ආවා.
“ඩීට්‍රා AI ලැබ් එකේ....." දෙදෙනාටම එකවර කියවුනා.
“දෙයියනේ........" කවීෂා මංතීරුව අසල සවිකර තිබූ කොන්ක්‍රීට් බංකුවක හිඳ ගත්තා. ජිත් ඇයට එක්වුනා.
"කොහෙන්ද කන්ටේනර් එක ආවේ?"
"චීනේ......ටියැන්ජින් වරායෙන්......"
ජිත් මදක් කල්පනා කලා. වටින් ගොඩින් එලිය වැටෙමින් තිබුණා.
"මම හිතුවේ ඩීට්‍රා එකේ ඉන්නේ හොඳ කොල්ලෝ කෙල්ලෝ ටිකක් කියලා....." කවීෂාගේ කටහඬෙහි කණගාටුවක සේයාවක් ගැබ්වී තිබුණා.
"වෙන්න බෑ කවී......ඩීට්‍රා එකෙන් නෙමෙයි වැඩේ වෙලා තියෙන්නේ……එයාලා චීනෙන් හරි වෙන රටකින් හරි බඩු ගෙන්වන්න කිසිම ඇණවුමක්, ඉල්ලීමක් කරලත් නෑ.…..අපි ත්‍රිකුණාමලේ ආමි, නේවි, එයාෆෝස් බේස් වලින් අහලා බැලුවා.........කන්ටේනර් එකක් ඇවිත් නෑ.....ඒක කොහෙ ගියාද දන්නේ නෑ. ඒ වගේම මේ දවස්වල ඩීට්‍රා යුනිට් එකේ හැමෝම හිටියේ බේස් එකේමයි. එයාලගෙ ලොකු ෆීල්ඩ් ටෙස්ටින් වගයක් යනවා....ප්‍රොජෙක්ට් ලීඩර් කසුන් සේනානායකගෙ ඉඳන් ටීම් එකේ කිසිම කෙනෙක් මාසෙකින් නිවාඩුවක් අරගෙන නෑ.......ගොඩ දෙනෙක් නිදාගන්නෙත් ලැබ් වලමයි කියලයි ආරංචිය. උන් පැය විසිහතරම වැඩලු....."
"ඔය වැගේ වැඩක් කරන්න ලැබ් එකෙන් එලියට යන්න ඕනෙ නෑනෙ............අනිත් එක කන්ටේනර් එක වෙන කොහෙ හරි දාලා ඇති.........කොහොමටත් ඕකෙ තියෙනවා ඇත්තේ ප්‍රොජෙක්ට් එකට ගෙනාපුව නෙමෙයිනේ....ටීම් එකේ දෙතුන් දෙනෙකුගෙ සයිඩ් බිස්නස් එකක් වෙන්න බැරිද?"
"අනික් අතට දසුන් වගේ කෙනෙක් කොහොමද ඔච්චර අධි තාක්ෂණික මෙවලමක් හොයාගන්නේ?"
"කවුරු හරි දුන්නා වෙන්න බැරිද?"
"සමහරවිට එයාව බ්ලැක්මේල් කරලා බලෙන් කර ගත්තද දන්නේ නෑ...."
"දසුන් වගේ මිනිහෙක්ව බ්ලැක් මේල් කරන්න නම් ලේසි නෑ...අනෙක දසුන්ගේ තාත්තා ලොකු සල්ලි කාරයෙක්…බැඳුම්කර සීන් එකෙන් පස්සේ ඒ සල්ලිවලින් අරගෙන තිබුණු අරක්කු කොම්පැණිය ඈවර කරනකොට ගත්තේ දසුන්ගේ තාත්තා.... ..දසුන් සල්ලි පස්සෙ පන්නන්නේ නෑ..... "
"බ්ලැක්මේල් කරන්න සල්ලි ගණුදෙනු ඕනෑ නෑනෙ.....මිනිහගෙ මොකක් හරි වීක්නස් එකක් අල්ලගෙන ඇති...."
“සමහරවිට චීන ආයුධ කොන්ත්‍රාත්කාරයෝ හරි වෙන කොන්ත්‍රාත් කාරයෝ හරිද දන්නේ නෑ......"
"ඒත් ලඟදි ලොකු ආයුධ ටෙන්ඩර් නම් එන්න නෑ...." කවීෂා මුහුණේ දහදිය පිසදමමින් කිව්වා.
CHAPTER 00110
අළුයම 3.45, චුන්ඩිකුළම් ජාතික වනෝද්‍යානයට කිලෝමීටර් 88ක් ගිණිකොණ දෙසින්, කෝකිළායි කුරුළු අභයභූමි වෙරළ තීරයට ඉහලින්
“While bird one-five-niner this is Echo tower…...you are clear for landing approach…..Turn left heading two three zero” [වයිට් බර්ඩ් 159 මේ එකෝ පාලන කුළුණ, ගොඩබැසීමේ ක්‍රියාවලිය ඇරඹීම සඳහා අවසර දෙනවා……... අංශක 230ක් වමට හරවන්න...]
“Roger that Echo tower…...altitude three-two-thousand…..airspeed one-seven-zero knots...turning to heading two-three-zero” [පණිවුඩය ලැබුණා, පියාසර උස අඩි 32000, වේගය නාවික සැතපුම් 170යි, අංශක 230ක් වමට හරවමින් සිටිනවා……….]
“White bird one-five-niner read back altitude and heading?” [වයිට් බර්ඩ් 159 ඔබගේ පියාසර උස හා ගමන් දිශාව නැවත පවසන්න...]
“White bird one-five-niner read back altitude and heading? Looks like you lost too much altitude……… we lost radar contact...” [වයිට් බර්ඩ් 159 ඔබගේ පියාසර උස හා ගමන් දිශාව නැවත පවසන්න......... පේන විධියට ඔබ ගොඩක් පහත් කරලා වගේ.........ඔබගෙන් එන රේඩාර් සංඥා නැතිවී ගොස් තිබෙනවා.......]
“White bird one-five-niner this is Echo tower ….come in please” [වයිට් බර්ඩ් 159 කරුණාකර අමතන්න....]
“White bird one-five-niner this is Echo tower ….come in please”
“White bird one-five-niner this is Echo tower ….respond please ”
“White bird one-five-niner this is Echo tower ….please switch to emergency frequency …” [වයිට් බර්ඩ් 159 කරුණාකර ආපදා සංඛ්‍යාතයෙන් අමතන්න....]
“mayday…... mayday……mayday……..white bird one-five-niner calling….. we heard an explosion in the cabin...…mayday……. mayday………..we have gunfire in the ca………….” [හදිසි ආපදාවක්.....හදිසි ආපදාවක්.....හදිසි ආපදාවක්......මේ වයිට් බර්ඩ් 159 අපට මගී කැබින් එකෙන් පිපුරුම් ශබ්දයක් ඇහුනා......හදිසි ආපදාවක්.....හදිසි ආපදාවක්.....හදිසි ආපදාවක්......මගී කැබින් එකතුල වෙඩිතබා ග...]
“White bird this is Echo tower ….read back…” [වයිට් බර්ඩ් මේ එකෝ කුළුණ, කරුණාකර අවසන් පණිවුඩය නැවත පවසන්න.......]
“White bird this is Echo tower ……do you copy?….read back please?” [වයිට් බර්ඩ් මේ එකෝ කුළුණ…………ඔබට ඇහෙනවද?…………………. කරුණාකර අවසන් පණිවුඩය නැවත පවසන්න.......]
“White bird this is Echo tower….do you copy?…” [වයිට් බර්ඩ් මේ එකෝ කුළුණ…………ඔබට ඇහෙනවද?.........]
CHAPTER 00111
උදෑසන 5.30, යුධ සන්නද්ධ බුද්ධි අංශ රක්ෂක නිවාසය හා ක්ශේස්ත්‍ර මෙහෙයුම් කාර්යාලය, සිංහපුර පාර, පැලවත්ත
"හදිසියේ කල කැඳවීමට මෙතනට ආපු හැමෝටම ස්තූතියි ……………..කැප්ටන් ජිත්, එයාෆෝස් HQ එකෙන් ලැබුණ තොරතුරු කියන්න....." යුධ සන්නද්ධ බුද්ධි අංශ ක්ෂේස්ත්‍ර මෙහෙයුම් අණදෙන නිළධාරී බ්‍රිගේඩියර් ජනක දසනායක අණකලා.
"සර් කඩාවැටිලා තියෙන්නේ එයාෆෝස් එකේ හාබින් Y12 ට්‍රාන්ස්පෝට් ප්ලේන් එකක්. ෆ්ලයිට් කෝඩ් එක -වයිට් බර්ඩ් 159 - පයිලට්ලා දෙන්නට අමතරව පැසෙන්ජර් කැබින් එකේ 19 දෙනෙක් ඉඳලා තියෙනවා. ඒ අතරින් දෙන්නෙක් එයාෆෝස්. අනික් දාහත් දෙනාගෙන් හතර දෙනෙක් G10 සෙබළුන්. ඉතිරි 13දෙනාම ඩීට්‍රා එකේ අය. එක්කෙනෙක් ඇරෙන්න මුළු ඩීට්‍රා ටීම් එකම ෆ්ලයිට් එකේ ඉඳලා තියෙනවා..."
"කවුද ඉතුරුවුන හාදයා?"
"සන්දීප් වනසේකර, AI ටීම් එකේ ටීම් ලීඩර්..."
"මිනිහා දැන් කොහෙද?"
"එයාෆෝස් මිලිටරි පොලීසියෙන් ඩිටේන් කරගෙන ප්‍රශ්ණ කරනවා...."
"එයාෆෝස් එකට කියන්ඩ අපේ ඇනලිස්ට්ලාත් ප්‍රශ්ණකිරීම් නිරීක්ෂණය කරන්න එනවා කියලා.....ජිත්, ඔයා මේ ඉන්වෙස්ටිගේෂන් එක බාරගන්න.....ඇයි සන්දීප් වනසේකර ගිහින් නැත්තෙ?"
"ටෙලිමෙටරි (telemetry) ක්‍රමයට සෙබලුන්ගෙන් සජීවීව එන දත්ත ඇනලයිස් කරන්න එයා ලැබ් එකේ නැවතුනා කියලා කට උත්තරයක් දීලා තියෙනවා...."
"මිෂන් එකේ විස්තර තියෙනවද? මොකක් කරන්නද මේ අය ඔක්කොම එක ෆ්ලයිට් එකකට නැගගෙන තියෙන්නේ?"
"ඔව් සර්, එයා ෆෝස් එකට DTRA යොමුකරපු පියාසැරි ඉල්ලුම්පත්‍රයේ (flight request form) තියෙන විධියට එයාලගෙ ප්ලෑන් එක විස්තර කරලා තියෙන්නේ - low altitutde jump and jungle trek excercise for field data gathering - විධියට"
"මොකක්ද කරන්න හදලා තියෙන්නේ..?"
"සර් ඉස්සෙල්ලම බයෝ ටීම් එකයි, AI ටීම් එකයි , එයාලගෙ මොබයිල් යුනිට් උපකරණයි චුන්ඩිකුළම් ජාතික වනෝද්‍යානයේ උතුරු කෙරවලේ තියෙන ෆීල්ඩ් ඔෆිස් එකකට ගෙනියන්නයි ප්ලෑන් කරලා තියෙන්නේ. එතන පරණ LTTE ගුවන් පථයක් තියෙනවා. දැන් ඒක එයාෆෝස් එකෙන් අලුත්වැඩියා කරලා හදිසි ආපදා හා පුහුණු ගොඩබැස්සවීම් කරන්න ධාවන පථයක් විධියට තියාගෙන ඉන්නවා. පාන්දර 4ට ප්ලේන් එක ලෑන්ඩ් කරලා, ටීම් එකයි බඩුයි බස්සලා ආයෙත් ගුවන් ගත වෙන්නයි බලාපොරොත්තුවෙලා තියෙන්නේ..."
“චුන්ඩිකුළම් වනෝද්‍යානයේ දකුණු කෙලවරේ drop zone එකකට G10 ටීම් එකේ දැනට සූදානම් කරමින් ඉන්න සෙබළු හතර දෙනාව පැරීෂූට් වලින් බස්සවන්නයි ප්ලෑන් කරලා තියෙන්නේ. අඩි 1000ක් උඩින් එයාලා යානයෙන් ඉවත් වෙන්න සූදානම් කරලා තිබුණා. එයාලගෙ පැනීම් වලට උදව් කරන්න එයාෆෝස් එකේ “ජම්ප් මාස්ටර්” ඔෆිසර් කෙනෙකුයි, “ලෝඩ් මාස්ටර්” ඔෆිසර් කෙනෙකුයි ෆ්ලයිට් එකේ ගිහින් තියෙනවා.”
G10 සෙබලු හතරදෙනා පැරිෂූට් වලින් ගොඩබැහැලා, ඊට පස්සේ චුන්ඩිකුලම් කැලේ මැද්දෙන් කිලෝමීටර් 30ක දුරක් පයින් ඇවිදගෙන, ඩීට්‍රා ටීම් එක ඉන්න ගුවන් පථය සොයාගෙන යන එක තමයි මේ එක්සර්සයිස් එක. ඒ යන අතරෙ G10 සෙබලුන්ගේ රොබෝ-බාහිර සැකිල්ල (robotic-exosckeleton), කෘත්‍රිම බුද්ධි පරිගණක හා සංවේදකවල ක්‍රියාකාරිත්වය පිලිබඳව දත්ත එකතුකරන්න ඔවුන් සැලසුම් කරලා තිබුණා.
"ටවර් එකෙන් ලෑන්ඩින් ඇප්රෝච් එකට ඩිරෙක්ෂන්ස් දීලා, ඒ ඩිරෙක්ෂන්ස් ක්‍රියාත්මක කරන බව පයිලට්ලා දැනුම් දීලා ටිකවෙලාවකින් තමයි ප්ලේන් එක කඩා වැටිලා තියෙන්නේ.....අන්තිම රේඩියෝ මැසේජ් එකේදී පයිලට්ලා කියලා තියෙනවා කැබින් එකෙන් පිපුරුම් ශබ්දයක් ආවා, වෙඩිතියාගන්නවා වගේ ශබ්ද ඇහුණා කියලා...."
"G10 සෙබළු ආයුධ ගෙනිහිල්ලා තියෙනවද?"
"නෑ....සන්දීප්ගෙන් කරපු මූලික ප්‍රශ්ණකිරීමේදී එයා කියලා තියෙනවා ඔවුන්ට කිසිම ආයුධයක් නිකුත්කරලා නෑ, ඒවගේම ජීව උණ්ඩ යොදාගෙන ලයිව්-ෆයර් පුහුණුව තාම පටන් අරගෙන නෑ කියලා…”
"ආමි එක මොකද කියන්නේ?"
"ආමි එකෙන් තවම රෙස්පොන්ස් එකක් නෑ. ත්‍රිකුණාමලේ චීනවරාය එයාබේස් එකේ ෆලයිට් සිකියුරිටි භාරව ඉන්න ෆ්ලයිට් සාජන්ට් දැනුම්දීලා තියෙනවා, ෆ්ලයිට් එක පිටත්වෙන්න ඉස්සෙල්ලා කරපු සිකියුරිටි ඉන්ස්පෙක්ෂන් එකේදී ආයුධ හා පුපුරණ ද්‍රව්‍ය තිබුණේ නෑ කියලා ඉන්ස්පෙක්ෂන් රිපෝට් එකේ තියෙනවා කියලා...."
"එතකොට පයිලට්ලා වෙඩි තියාගන්නවා, බෝම්බ පුපුරණවා ඇහෙනවා කිව්වේ කොහොමද?"
"ඒක තමයි සර් ගැටලුව........ප්ලේන් එක වෙරලෙන් කිලෝමීටර් 5ක් විතර ඈත මුහුදට වැටිලා තියෙන්නේ, මේ වෙනකොට නේවි එකේ පැට්රෝල් බෝට්ටු ඒ පැත්තට ලංවෙලා කියලයි ආරංචිය....තවම කල් වැඩියි මුකුත් හරියටම හිතාගන්න..."
CHAPTER 01000
Y12 අණතුරෙන් දින දෙකකට පසු; සවස 7.45, Beach Club Bar අවන්හල, ග්ලෝබල් ටවර්ස් හෝටලය.
"හලෝ? ජිත්?, මම කොහෙටද එන්න ඕනෑ....?"
"ගෝල්ෆෙස් හොටෙල් එකට එන්න. එතන ඔයාගෙ කාර් එක පාක් කරලා එන්ට්‍රන්ස් එකට ඇවිදින්න……. ඔයාගෙ නම දීපු ඌබර් ටැක්සියක් එතන තියෙයි ඒකෙ නගින්න. ඔයා එන්න ඕනෙ වැල්ලවත්තෙ ග්ලෝබල් ටවර්ස් හෝටලේට..."
"ඌබර් එක ඔයාලගෙ එකක්ද?"
"නෑ අපේ එකක් නෙමෙයි, හැබැයි ඔයාගෙ නමයි, ෆෝන් නොම්බරයයි දීලා අපි බුක් කරපු එකක්....ඔයාගෙ ෆෝන් එකේ ඌබර් ඇප් එකෙන් බුකින් එක ගියාවගේ අපි බුකින් එක කලේ..."
"හ්ම්ම්.....ඒකත් එහෙමද? ග්ලෝබල් ටවර්ස් වල කොතනටද එන්න ඕනෙ?" කවීෂා නොරුස්නා ස්වරයකින් ඇසුවා.
"ලොබී එකේ Beach Club Bar එකට එන්න. මම එතන ඉන්නවා..."
කලුපැහැති සායකින් හා ලැම හා ගෙල හොඳින් වැසෙන අලු පැහැති “ටර්ටල් නෙක්” පන්නයේ ටී-ෂර්ටයකින් සැරසී, එයට උඩින් කළු පැහැ බ්ලේසරයක් පැළඳ සිටි කවීෂාගේ හැඩකාර සිරුර දෙස ඌබර් රියැදුරා ඇහිපිය නොහෙලා බලා සිටිද්දී ඇය ග්ලෝබල් ටවර්ස් හෝටලයේ ප්‍රධාන පිවිසුමෙන් ඇතුලට ගියා. පිලිගැනීමේ නිළධාරිණියගේ උපකාරයෙන් විනාඩි කිහිපයකදී Beach Club Bar එක සොයා ගත් ඇය අවන්හල සිසාරා නෙත් යොමුකලේ ජිත් කොහෙදැයි සොයමින්.
"හලෝ ගුඩ් ඊවිනින් කවීෂා!" ජිත් හුනස්නෙන් නැගිට කවීෂා පිලිගෙන ඇයට අසුන්ගන්නට ආරාධනා කලා.
"ගුඩ් ඊවිනින් ජිත්! තෑන්ක්ස්..."
"ලස්සන තැනක්! නිතරම මෙතනට කෙල්ලෝ අරගෙන එනවද?"
"අපෝ නෑ....මට කෙල්ලෝ එන්ටර්ටේන් කරන්න වෙලාවක් නෑ...මොනවද බොන්නේ?"
"මුකුත් එපා...."
"අනේ...ඇයි එහෙම කියන්නේ? මොනවහරි බොමු..." කියූ ජිත් වේටර්වරයාට සන්කලා.
"මොවද සර්ටයි මැඩම්ටයි ගේන්න ඕනෑ....?"
"මැඩම්ගෙන් අහන්න, මැඩම් ඕඩර් කරන දෙයක් මටත් ගේන්න..."
"ඇල්කොහොල් නැති මොනවද තියෙන්නේ....?" කවීෂා වේටර් දුන් මෙනූ පත කියවන්න වුනා. ජිත් සිය ජංගම දුරකථනයේ පණිවුඩයකට ප්‍රතිචාර ටයිප් කරමින් සිටියා.
"රාස්ප්බෙරි මොහිටෝ එක හොඳයි මැඩම්...ඇල්කොහොල් නෑ....කැමතිනම් සීනි නැතුව ස්වීට්නර් දාලා ගන්නත් පුලුවන්...."
"හරි මට ස්වීට්නර් දාපු රාස්ප්බෙරි මොහීටෝ එකක්.......ඔයාටත් ඒකක් හොඳයිද?"
"මට හොඳට සීනි දාපු රාස්ප්බෙරි මොහීටෝ එකක් ගේන්න....දවල්ට කන්නත් බැරිවුනා......."
"හරි සර්..."
“මොකෝ දවල්ට කෑවෙ නැත්තෙ? ගෙදරින් බත් එක දුන්නේ නැද්ද?"
"මම තනියම ඉන්නේ.......ගෙවල් කඩුගන්නාවේ....ඒත් කෑවෙ නැත්තේ ඒක නිසා නෙමෙයි....මම ඊයේ හිටියේ චුන්ඩිකුලම් පැත්තේ....ක්‍රෑෂ් ඉන්වෙස්ටිගේෂන් එකට ගියා, පෙරේදා දවසම චයිනාබේ ඩීට්‍රා ලැබ් එකෙයි, එයාබේස් එකෙයි ගතකලා....කොළඹට ආවේ පහට විතර. ගෙදර ගිහිල්ලා වොෂ් එකක් දාගත්ත ගමන් ආවේ...."
"හප්පා එහෙනම් හොඳටම මහන්සි ඇති...."
"ගාණක් නෑ....ඔයාව මීට් වුනාට පස්සේ ඔෆිස් එකට යන්න තියෙනවා.......කොහොමද මිස්ටර් වීරකෝන්? මොනවද මිනිහා කරන්නේ? ක්‍රෑෂ් එකෙන් පස්සේ මිනිහගෙ හැසිරීම කොහොමද?"
"එයා හොඳටම කළබළවෙලා වගේ පේනවා, සුදුමැලිවෙලා, ඇදිලා ගිහිල්ලා....වැඩි කතාවකුත් නෑ...වෙනදට මාව දැක්කම ඇවිල්ලා මාත් එක්ක ටිකක් කියවලා යනවා, එත් අද මාව දැක්කම වැඩිය කතා නොකර මග අරින්න හැදුවා..... මොකක්ද මීටින් එකක් කියලා මාරු වුනා....."
“National Security Advisorත් ටිකක් අන්දමන්ද වෙලා වගේ....මුලු ඩීට්‍රා රීසර්ච් ටීම් එකම ඉවරයිනෙ…...ක්‍රෑෂ් එක කොහොම වුනාද කියලා හිතාගන්න බෑ......එයාෆෝස් එක රිපෝට්කරන විධියට මොන හේතුවකට හරි ප්ලේන් එක පුපුරලා තියෙනවා. නේවි බෝට්ටුවකින් මුහුද යටට කැමරා පහත් කරලා ගත්ත වීඩියෝ එකක් මිනිස්ට්‍රියට ඇවිල්ලා. ඩෙෆෙන්ස් සෙකට්‍රියි, එයාගෙ ලඟම ටීම් එකයි ඒක අද උදේ බැලුවා. මම දැක්කේ නෑ, ඒත් දැක්ක අය කියන විධියට ප්ලේන් එකේ පැසෙන්ජර් කැබින් එක පුපුරලා ප්ලේන් එක දෙකට කැඩිලා මුහුදට වැටුනා වගේ පේනවලු...."
කියමින් සිටිදෑට අවධානය යොමු නොකරමින් ජිත් සිය ජංගම දුරකථනයේ තිරය ස්වයිප් කරමින් සිටිනවා දුටු කවීෂා කතාව නවත්වා ඔහු දෙස තරහින් බලා සිටියා.
"තරහ වෙන්න එපා මැඩම්, ඔයා කියපුවා අකුරක් නෑර මම අහගෙන හිටියා, වැදගත් දෙයක් පෙන්නන්නයි හදන්නේ....ඉවසන්නකෝ..." තිරයෙන් දෑස් ඉවතට නොගෙනම ජිත් කියද්දී කවී අහක බලා ගත්තා.
"මේ බලන්න මේ වීඩියෝ එක......මේක කුච්චුවේලි මුහුදුවෙරළ අයිනේ තියෙන Jungle Beach Resort හෝටලේ මුහුද පැත්තට හයිකරපු CCTV කැමරාවක සටහන් වුනු එකක්. හෝටලේ සිකියුරිටි ගාඩ් ක්‍රෑෂ් එක දැකලා හෝටලේ නයිට් මැනේජර්ට කියලා, එයා පොලීසියට කියලා තියෙනවා. සිකියුරිටි පොලීසියට එයා දැක්ක දේ ගැන කට උත්තරයක් දීලා තියෙනවා. ඒ පොලිස් රිපෝට් එක මට හම්බුවුනාට පස්සෙ මම ඊයේ ඒ හෝටලේට ගියා. ක්‍රෑෂ් එක දකිනකොට සිකුරිටි හිටපු තැන ඉඳන් ආපහු හෝටලේ දිහා බලකොට තමයි මම CCTV කැමරාව දැක්කේ. වීඩියෝ එක පැහැදිලි නෑ. ක්‍රෑෂ් එක වෙන්නේ කෝකිළායි කුරුළු අභයභූමිය හරියේ. හෝටලේ තියෙන්නේ කුච්චිවේලි වල 27වැනි කිලෝමීටර් කනුව හරියේ. එතන ඉඳන් කෝකිලායි වලට කිලොමීටර් 30ක් විතර තියෙනවා. ඒත් ප්ලේන් එක පුපුරණ ගිණිබෝලේ හොඳට පැහැදිලියි….”
ජිත් පෙන්නපු වීඩියෝ නැවත නැවත ප්‍රතිවාදනය කරමින් කවීෂා එය නිරීක්ෂණය කලා.
"හරියටම පුපුරණ වෙළාව බලන්න...." ජිත් පැවසුවා. කවී කළු-සුදු වීඩියෝවේ ගිණිබෝලය මතුවනවිටම වීඩියෝව pause කලා.
"පාන්දර 3:46:26යි...." කවී CCTV කැමරාවේ ටයිම් ස්ටෑම්ප් එකේ වෙලාව කියමින්, ජිත්ගේ මුහුණ බැලුවා.
"මේ තියෙන්නේ එකෝ කොන්ට්‍රොල් ටවර් එකයි, Y12 එකයි අතර වුනු රේඩියෝ පණිවුඩ හුවමාරුවල ට්‍රාන්ස්ක්‍රිප්ට් එක, ඒ සංවාද වුනු වෙලාවල් එක්ක.......බලන්න ඉස්සෙල්ලම කොන්ට්‍රෝල් ටවර් එක ඇල්ටිටියුඩ් එකයි, හෙඩින් එකයි නැවත කියන්න කියලා පයිලට්ලාගෙන් ඉල්ලපු වෙලාව...."
3:47AM “White bird one-five-niner read back altitude and heading?” [වයිට් බර්ඩ් 159 ඔබගේ පියාසර උස හා ගමන් දිශාව නැවත පවසන්න...]
"වෙලාවල් හරියටම සමානයි....ඉතින්?" කවීෂා කුතුහලයෙන් ජිත් දෙස බැලුවා.
"දැන් බලන්න ට්‍රාන්ස්ක්‍රිප්ට් එකේ විධියට පයිලට්ලා ප්ලේන් එකේ ඇතුලේ වෙඩිතියාගන්නවා කියලා කියන වෙලාව.."
3:53 AM “mayday…... mayday……mayday……..white bird one-five-niner calling….. we heard an explosion in the cabin...…mayday……. mayday………..we have gunfire in the ca………….” [හදිසි ආපදාවක්.....හදිසි ආපදාවක්.....හදිසි ආපදාවක්......එකෝ ටවර් මේ වයිට් බර්ඩ් 159 අපට මගී කැබින් එකෙන් පිපුරුම් ශබ්දයක් ඇහුනා......හදිසි ආපදාවක්.....හදිසි ආපදාවක්.....හදිසි ආපදාවක්......මගී කැබින් එකතුල වෙඩිතබා ග...]
“තුනයි පනස් තුනට....ඒත් තුනයි හතලිස් හතට ප්ලේන් එක පිපුරුවා නේද?"
"කවී මම දැන ගත්ත විධියට ටවර් එකෙන් ඉස්සෙල්ලම ස්පීඩ් එකයි ඇල්ටිටියුඩ් එකයි ආපහු කියන්න ඉල්ලන්නේ ඒ මොහොතේ රේඩාර් ප්ලේන් එකෙන් එන රේඩාර් සිග්නල් එකයි, ට්‍රාන්ස්පොන්ඩර් සිග්නල් එකයි දෙකම නැතිවුන නිසා.....ඒ 3.47ට. මම හිතන විධියට පාන්දර 3.53 වෙනකොට ප්ලේන් එක මුහුදට වැටිලත් ඉවරයි...."
"එතකොට, ප්ලේන් එක ගිණිබෝලයක් වෙලා විනාඩි 6කට පස්සේ 3.53ට කොහොමද පයිලට්ලා මේ-ඩේ හදිසි ආපදා මැසේජ් එකක් එවන්නේ ප්ලේන් එක ඇතුලේ පුපුරණ සද්ද, වෙඩි තියාගන්න සද්ද ඇහෙනවා කියලා....?" කවීෂා සුදුමැලිවී ඇසුවා.
“මගේ තියරිය කියන්නද කවි? මේ අන්තිම මැසේජ් එක ආවේ ප්ලේන් එකෙන් නෙමෙයි.....ගොඩක් වෙලාවට මේ මැසේජ් එකත්, ඩිෆෙන්ස් සෙකට්‍රි, කස්ටම්ස් එකට දීපු කෝල් එක වගේම හදපු මැසේජ් එකක්....."
"මේකටත් දසුන් සම්බන්ධයි කියන එකද?"
"නෑ...මම හිතන්නේ නෑ මේ වැඩේට දසුන් හරි අපේ AI ස්පෙෂලිස්ට් සන්දීප් හරි සම්බන්ධයි කියලා...මේක කරන්න ඇත්තේ, කලින් ටෙලිෆෝන් මැසේජ් එක පිටිපස්සේ හිටපු අයමයි....මම හිතන්නේ දසුනුත් බය වෙලා ඉන්නේ"
"ඉතින් මොකටද මේ විදිය රේඩියෝ මැසේජ් එකක් යැව්වේ?"
"මම හිතන්නේ මේක ප්ලේන් ක්‍රෑෂ් එක වුනේ ඩීට්‍රා සෙබලුන් පාළණයෙන් ගිලිහිලා ප්ලේන් එක ඇතුලේ වෙඩිතිබ්බා, නැතිනම් පිපුරුම්ක් ඇතිකලා කියන මතය හදන්න......එතකොට පරීක්ෂණ යන්නේ ඒ පැත්තට...ඇත්තටම ප්ලේන් එකේ බෝම්බයක් තියන්න ඇති..."
“මොකටද ඩ්‍රීට්‍රා යුනිට් එක විනාශ කරනේ? මොකක්ද මේක පිටිපස්සේ ඉන්න අයට තියෙන වාසිය?"
"ඒකනම් කියන්න බෑ කවී....සමහරවිට අනාගතේ තර්ජනයක් එයි කියලා විනාශකලා වෙන්න පුලුවන්, සමහරවිට දසුන් වීරකෝන්ව කොටුකරලා, බයකරලා තියාගන්න කරපු උපක්‍රමයක් වෙන්නත් පුලුවන්.....ඩීට්‍රා එකට වැඩියෙන්ම විරුද්ධවුන කෙනෙක් දසුන්....එයා ගැනත් සැකයක් ඇතිවෙනවා මයි...නැතත් එහෙම වෙයි කියලා එයාව බයකරලා තියාගන්න පුලුවන්.....NSA වුනත් මේකට ගෑවෙන්න පුලුවන් ඉඩකඩ හැදිලා ඉවරයි....අභිරහස් කන්ටේනර් එකට කෙලින්ම දසුනුයි, National Security Advisor සම්බන්ධවෙලා ඉවරයි...ඒවා කස්ටම්ස් ඩොකියුමන්ට් වල සටහන් වෙලා තියෙනවා....ආයෙ මකන්න, හන්ගන්න බෑ.....ප්ලේන් එකේ හයිකල බෝම්බේ ආවේ ඒ කන්ටේනර් එකේ කියලා රාවයක් පැතිරුනොත් දසුන්ව අත් අඩංගුවට ගන්නයි, NSAට පාර්ලිමේන්තු අණුකමිටුවක පරීක්ෂණයකට මුහුණ දෙන්න වෙන එකයි අනිවාර්යයි....මේකෙ පිටිපස්සේ ඉන්න අය දැනටමත් ඒබව දසුන්ට දන්වලා ඇති......ඔයා කියන විධියට දසුන් බයවෙලා ඉන්නේ ඒනිසා වෙන්න ඇති......."
CHAPTER 01001
Y12 අණතුරෙන් දින තුනකට පසු; උදෑසන 05.25, ආරක්ෂක අමාත්‍යාංශ නිවාස සංකීර්ණය, ස්කෙල්ටන් පාර, කොළඹ 05
CCTV ආරක්ෂක කැමරා තිරය නිරීක්ෂණය කල ජිත් නිවසේ දොර විවර කලා. දොරටුව අභියස සිටි සෙබලා ආචාරකලා.
"සමාවෙන්න සර්...මේ ලියුම බ්‍රිටිෂ් ඇම්බසියෙන් ආපු නෝනා කෙනෙක් දුන්නා....දැන්මම දෙන්න කියලා කිව්වා....."
"බ්‍රිටිෂ් ඇම්බසියෙන්?" නළල රැළිකරගත් ජිත් ලියුම් කවරය අතට ගත්තා. එය බ්‍රිතාන්‍ය මහ කොමසාරිස් කාර්යාලයේ නිළ ලියුම් කවරයක් බව පෙනෙන්නට තිබුණා.
"කවුද මේක බාර ගත්තේ?"
"මම සර්...මම අද ගේට්ටුවෙ සෙන්ට්‍රි ඩියුටි..සර්ගෙ අතටම දෙන්න කියලා කියපු නිසා වෙන කෙනෙකු අතේ එව්වේ නෑ...."
"මේක දීපු සුද්දිව විස්තර කරන්න පුලුවන්ද? කොහොමද එයා ආවේ?"
“Pick Me නැනෝ ටැක්සියකින් ආවේ. නොම්බරේ WP CAA - 3457. අවුරුදු 30ක් විතර බවයි පෙනුනේ. 5 8”ක් විතර උසයි. කොට දුඹුරුපාටට හුරු රන්වන් පාට කොණ්ඩයක් තිබුණා. පිටිපස්සට කරලා පෝනි ටේල් එකක් බැඳලා. පී.ටී කිට් එකක් ඇඳගෙන හිටියේ, තද නිල්පාට ට්‍රැක් බොට්ම් එකකුයි, ඒ පාටම ටීෂර්ට් එකකුයි ඇඳලා හිටියේ...සුදුපාට Reebok ජොගින් සපත්තු දාගෙන හිටියා....කළුපාට wrap-around කණ්නාඩි කුට්ටමක් දාලා හිටපු නිසා ඇස් දැක්කේ නෑ.....කළුපාට කැසියෝ G-SHOCK ඔරලෝසුවක් අතේ බැඳලා තිබුණා...."
“කොහොමද කියන්නේ උස හරියටම 5 8"යි කියලා? දන්නේ කොහොමද?"
“සර් අපේ ගේට්ටුව අඩි 6ක් උසයි. පොලොවෙන් අඟල් 2ක විතර වාසියක් තියලා හයිකරලා තියෙන්නේ. ඒ නෝනා ගේට්ටුව ලඟ ඉන්නකොට ගේට්ටුවට වඩා අඟල් 5ක් විතර කොට බවයි මම දැක්කේ....ඒ නිසා එයා 5 8" විතර වෙන්න ඕනෑ...."
"එතකොට එයාගෙ උස 5 9" වෙන්න ඕනෑ නැද්ද?" ජිත් සෙබලාව පිරික්සන අදහසින් ඇසුවා.
"සර් සපත්තු අඩියට අඟලක් විතර අතහැරලයි 5 8" කිව්වේ...." සෙබලා බොහෝ විශ්වාසයෙන් පැවසුවා.
“සර්ගෙ මූණෙ කරදර පාටක් තියෙනවා........ප්‍රශ්ණයක්ද සර්...?"
"මම මේ බලන්නේ කවුද කියලා?"
"සර් සිකියුරිටි කැමරාවලට අහුවෙලා ඇති....ඒක බලන්න එනවා කියලා ගාඩ් රූම් එකට කියන්නද?"
“ඔව් කියන්න මම එනවා කියලා....උදේ 7.00 ෂටල් බස් එකට කියන්න මාව අරගෙන යන්න කියලා...."
"හරි සර්...." සෙබලා ආචාරකොට යන්න හැරුනා.
“කෝප්‍රල්!"
"සර්?"
"ඔයා වනිගරත්න නේද?"
"ඔව් සර්..."
"බුද්ධි අංශෙ වැඩ කරන්න ආසද?"
කෝප්‍රල් වනිගරත්නගේ මුහුණ ආලෝකමත් වුනා.
"සර් කරනවා වගේ රාජකාරි නේද?.....මම හරිම ආසයි...." ඔහු ප්‍රීතියෙන් කිව්වා. ජිත් බුද්ධි අංශයේ නිළධාරියෙකු බව හමුදා නිවාස සංකීර්ණයේ අයට එතරම් රහසක් වුනේ නෑ.
“තව මාස තුනකින් විතර අලුත් කාණ්ඩයක් බඳවා ගන්නවා...මම කියන්නම් ඇප්ලිකේෂන් එක දාන්න ඕනෑ කාලෙට...."
"බොහොම ස්තූතියි සර්...." සෙබලා සතුටින් ඉපිල කිව්වා.
"දැන් තැන් තැන් වල කියවන්න එපා ....සද්ද නැතුව ඉන්නවා...."
"හරි සර්...මම කාටවත් කියන්නේ නෑ..." කෝප්‍රල් වනිගරත්න අඩියට දෙකට ඉගිල්ලුනා. ඔහු සිටියේ දැඩි සතුටකින්.
කෝප්‍රල් වනිගරත්ත ගැන ජිත් කලක සිටම ඇස ගසාගෙන සිටියා. බලංගොඩ පැත්තේ කුඩා ගමකින් පැමිණ සිටි ඔහු බොහෝ දෑ ඉගෙන ගන්නට කැමති, අමාරුවෙන් ඉංග්‍රීසි පත්තරේ පවා කියවන, වෙනත් අඩු නිළවල සෙබලුන්ට වඩා වෙනස් අයෙකු බව ජිත් නිරීක්ෂණය කලා. කට පමණක් නොව ඇඟද පරිස්සම් කරගෙන, ලෙඩ දාගෙන්නේ නැතුව හැමගේ සිත් දිනාගෙන ඉන්න දක්ශ කොල්ලෙක් ලෙස, හමුදා නිළ නිවෙස් සංකීර්ණයේ නිළධාරීන් අතරද කෝප්‍රල් වනිගරත්නගේ නම කියැවුනා.
"මොළේ කල්පණා කරලා කරන්න ඕනෑ වැඩක් නම් වනිගරත්නට දීලා කරවගන්න .... අනිත් උන් වගේ නෙමෙයි, ඌ හොඳ මීටරේ...." ජිත්ගේ සම-නිළ නිළධාරීන් අල්ලාප සල්ලාපවලදී කතාවුනා.
ලියුම් කවරය අරින්නට පෙර විදුලි බල්බයකට අල්ලා ඇතුලත නිරීක්ෂණය කරන ගමන් එය ගෙනැවිත් දුන් සුදු ගැහැණිය ගැන වනිගරත්න කල විස්තරය මෙනෙහි කලා.
"මිනිහට වැදගත් දේවල් කිසිදෙයක් මිස් වෙලා නෑ....ඇඳුම, සපත්තු බ්‍රෑන්ඩ් එක, අත් ඔරලෝසු බ්‍රෑන්ඩ් එක, කොණ්ඩෙ පාට, බැඳලා තිබුණ විධිය...ආපු වාහනේ නොම්බරේ.....හැම දේම මීටරේට දාගෙන...." ජිත් වඩාත්ම කැමතිවුනේ වනිගරත්න, ඇයගේ උස ඇස්තමේන්තු කරන්නට යොදාගත් සරල, එහෙත් ඉතා නිවැරදි උපක්‍රමයි.
"ට්‍රේන් කරලා ගත්තම හොඳ ඇනලිස්ට් කෙනෙක් වෙන්න පුලුවන්....පස්සේ ෆීල්ඩ් ඔපරේෂන් වලට ගන්න පුලුවන් වෙයි....." වනිගරත්න, සන්නද්ධ බුද්ධි අංශයට සුදුසු යයි රෙකමදාරුවක් කරන්නට ජිත් ඒවන විටත් තීරණය කර තිබුණා. සාමාන්‍ය සම්ප්‍රදායට අනුව බුද්ධි අංශයට එන නවකයින් බුද්ධි අංශ නිළධාරීයෙකුගේ රෙකමදාරුව යටතේ බඳවා ගැනෙන්නේ නම්, ඔවුන්ව රෙකමදාරු කරන නිළධාරීන් යටතේම පුහුණුවට අනුයුක්ත කරනවා. ඒ අනුව කෝප්‍රල් වනිගරත්නගේ TO හෙවත් Traininig Officer බවට පත්වී ඔහුගේ බුද්ධි අංශ පුහුණුව ගැන වගකීම පැවරෙනු ඇත්තේ කපිතාන් ජිත් වෙතටයි.
ලියුම්කවරය තුල කුඩා කොලකැබැල්ලක ඡායාවක් දුටු නිසා ජිත් එය විවෘත කලා. එහි දිග නොම්බරයක් ලියා තිබුණා. බැලූබැල්මට ස්කයිප් නොම්බරයක් බවයි පෙනුනේ. සාමාන්‍යයෙන් ස්කයිප් කෝල් ට්‍රේස් කොට එය ලබන්නා සිටින ස්ථානය ආදිය දැනගැනීමට නොහැකියි. මයික්‍රොසොෆ්ට් සමාගමට අයිති VoIP තාක්ෂණයක් මගින් ස්කයිප් ඇමතුම් කේතවන නිසා සංවර්ධිත රටවල බුද්ධි අංශවලට හැර වෙනත් රටවල බුද්ධි අංශවලට සක්යිප් ඇමතුම් දෙන්නන්, ලබන්නන්ගේ අනන්‍යතා සොයාගැනීම ඉතාමත් අපහසුයි.
ජිත් සිය ජංගම දුරකථනයට අංකය ඇතුලුකොට ඇමතුම ගත්තා. කිහිපවතාවක් නාදවුනු පසු, අනෙක් පසින් රිසීවරය ඉස්සූ බව ජිත්ට දැනුනා. ඔහු කතාකලා.
“Hello this is Captain Jith Gunawardene, who is this please?” [හලෝ මේ කැප්ටන් ජිත් ගුණවර්ධන...කවුද මේ?]
“Hello Captain, good morning!...this is Kate from British High Commission, I need to meet you” [සුබ උදෑසනක් කැප්ටන්, මම කේට්, බ්‍රිටිෂ් හයිකොමිෂන් එකෙන්......මට ඔයාව හමුවෙන්න ඕනෑ....]
“May I ask the reason?” [හේතුව කියන්න පුලුවන්ද....?]
“Have some info regarding a certain air crash. Meet me on the south side entrance steps of the Independence Hall. 7.00AM” [ගුවන් අණතුරක් ගැන තොරතුරු තියෙනවා....මාව අද උදේ 7ට නිදහස් චතුරශ්‍රයේ දකුණු පැත්තේ පඩිපෙල උඩදි හමුවෙන්න....]
“I can't meet you at 7.00 its school traffic time…come at 8.00” [හතට එන්න බෑ....ඉකෝලෙ ට්‍රැෆික් නිසා, අටට එන්නම්...]
“No, that's too late for me….. if you can't be there by half past seven you can forget about it” [බෑ පරක්කු වැඩියි. හතහමාරට එන්න බැරිනම් අමතක කරලා දාන්න..]
“Ok 7.30….” [ හරි හතහාමාරට එහෙනම්...]
“I need to know whether I am speaking to the right person……. I will be wearing a blue sweatshirt and a blue track bottom. Be on the steps. When I come there, I will call you from my skype number..” [මට තහවුරු කරගන්න ඕනෑ මම කතාකරන්නේ හරි කෙනාටද කියලා.......පඩිපෙල ලඟ ඉන්න. මම ආවහම ස්කයිප් නොම්බරෙන් ඔයාගෙ ෆෝන් එකට කෝල් එකක් දෙන්නම්.....]
අනෙක් පසින් කේට් ලෙස තමන් හඳුන්වාගත් කාන්තාව දුරක්ථනය විසන්දිකරන හඬ ඇසුනා. ඇයගේ කතාවිලාසය කොක්නි යනුවෙන් හැඳින්වෙන දකුණු ලන්ඩන් ආශ්‍රිත පෙදෙස්වල වැඩි වශයෙන් භාවිතා කෙරෙන ඉංග්‍රීසි කතාවිලාසයක් බව ඔහුට වැටහුනා. ඒ අනුව මැය අඩුම ගණනේ බ්‍රිතාන්‍ය වැසියෙකු විය යුතු බවට ඔහුට සිතුනා.
ඔහු වහාම සිය අණදෙන නිළධාරී බ්‍රිගේඩියර් ජනක දසනායක දැනුවත් කලා. විදෙස් රටක ඔත්තුකරුවෙකු, තානාපති කාර්යාල සේවකයෙකු පමණක් නොව සාමාන්‍ය විදේශිකයෙකු පවා හමුවීමට යන අවස්ථාවලදී විශේෂ පියවර රැසක් ගත යුතුව තිබුණා. යම් ආකාරයක අනවබෝධයක්, ගැටුමක් හෝ වෙනත් ආපදා අවස්ථාවක් ඇතිවුවහොත් බුද්ධි අංශ සම්බන්ධවීම නිසා ජාත්‍යන්තර පලහිලව්වක වුවද පැටලීමට සිදුවිය හැකි බැවින් මේ පියවරයන් ගත්තා. විදෙස් කාන්තාවන් හමුවනවිට, තවත් කළපණාකාරීව, එම කාන්තාවන්ට ලිංගික අතවර කරන්නට හැදුවා යන චෝදනාව කිරීමට කිසිදු ඉඩක් නොදී කටයුතුකල යුතුබවට බුද්ධි අංශවලට අණලැබී තිබුණා.
වෙඩි තැබීමකදී ජීවිතාරක්ෂාව සැලසෙන සැහැල්ලු බුලට්පෲෆ් සන්නාහ ජැකට්ටුව, ඉණ පටියට සවිකල හෝ, වෙනත් ආකාරයකට සඟවාගත් ඉදිරිපස හා පසුපස බොඩි කැම් කැමරා හා වොයිස් රෙකෝඩින් කට්ටලය, පැහැරගෙන යාමකදී ගෙන යන්නේ කොහේටදැයි පෙන්වන ඇඳුමට යටින් සවිකල ජී.පී.එස් ට්‍රැකින් ඩිවයිසය, නොපෙනෙන්නට සඟවාගෙන යන Glock 17 පිස්තෝලය ආදී ආම්පණ්න රැසක් රැගෙන යා යුතු අතර ඒවා සියල්ල නිසිපරිදි පැළඳගැනීම තනිව කල නොහැකිවුනා. ඒ සඳහා තාක්ෂණික නිළධාරියෙකුගේ සහය ඇවැසි වුනු අතර ඔහුගේ සෑම පියවරක්ම නිරීක්ෂණය කිරීම සඳහා මෙන්ම හදිසි අවස්ථාවකදී ගලවා ගැනීම සඳහද කණ්ඩායමක් සූදානම්ව සිටියා.
CHAPTER 01010
උදෑසන 6.52, රක්ෂක නිවාස අංක #3 හා ක්ෂේස්ත්‍ර මෙහෙයුම් කාර්යාලය, මලලසේකර මාවත, කොළඹ 7.
බ්‍රිගේඩියර් දසනායකගේ අණපරිදි ජිත් හා තවත් පිරිසක් උදෑසන 6.45 වනවිට මලලසේකර මාවතේ තුරුලතාවලින් ගහන ඇතුලු මාවතක ඇති රක්ෂක නිවාසය වෙත වාර්තාකලා. මෙවැනි රක්ෂක නිවාස පහක් කොළඹ නගරය තුල ඇති අතර රටපුරාම එවැනි ස්ථාන 40ක් පමණ තිබුණා. ඒවා ආරක්ෂක අමාත්‍යාංශය මගින් මිළදිගෙන සන්නද්ධ බුද්ධි අංශය වෙත ලබාදී තිබුණේ ක්ශේෂ්ත්‍ර මෙහෙයුම් සැළසුම් කිරීමට හා හදිසියකදී ඔත්තුකරුවන් හා මෙහෙයුම් නිළධාරීන්ට රැකවරණ ගත හැකි පරිද්දෙනුයි.
සන්නද්ධ බුද්ධි අංශයේ එක් ප්‍රහාරක මෙහෙයුම් අංශයක් වන Tactical Action Group (TAG) ලෙස හැඳින්වෙන විශේෂ බළකා පුහුණුව ලැබූ සතර දෙනෙක් හා තාක්ෂණික නිළධාරීන් දෙදෙනෙකු පැමිණ සිටියා. TAG කණ්ඩායමේ නායකයා වූයේ විශේෂ බළකා ලුතිනන් අෂාන් බෝපිටියයි. ජිත්, අෂාන් හා බ්‍රිගේඩියර් දසනායක කොන්ෆරන්ස් කෝල් ආකාරයෙන් සම්බන්ධවී මෙහෙයුම සැළසුම් කලා. ජනාකීර්ණ පෙදෙස්වල, හා නගර මධ්‍යයේ මෙහෙයුම් සිදුකිරීමට විශේෂ පුහුණවක් ලැබ තිබූ අෂාන්ගේ කණ්ඩායම හදිසි අවස්ථාවකදී ජිත්ගේ ආරක්ෂාවට සූදානම් වී සිටියා
.
බුලට් පෲෆ් වෙස්ට් එක හැඳගත් පසු අෂාන් ඔහුට උණඩ පිරවූ ග්ලොක් පිස්තෝලයක් ලබා දුන්නා. ග්ලොක් පිස්තෝලය ජිත් හොඳින් පුහුණුව ලැබූ, දෑස් වසාගෙන වුවද ගලවා යලි සවිකර හැකි තරමට හුරු ආයුධයක්. එය බුලට් පෲෆ් වෙස්ට් එකටම සවිකර තිබූ පිස්තෝල රඳවනයේ රුවාගත් ජිත්ගේ බුලට් පෲෆ් ජැකට්ටුවට ජී.පී.එස් යන්ත්‍රය සවිකලේ තාක්ෂණ නිළධාරීන් විසින්. උඩින් කළු පැහැ ව්‍යායාම සඳහා භාවිතාකරන ටීෂර්ටයක් හැඳගත් අතර එය කලු ට්‍රැක් බොටමයට ගැලපුනා. ටීෂර්ටයේ ඉදිරිපස බොත්තම් කාසයේ හා පිටුපස කොළරයේ බොඩි කැමරා කට්ටලය හා වීඩියෝ හා හඬ පටිගතකිරීම් යන්ත්‍රය සවිකලේද ඔවුන් විසින්. එම පටිගත කිරීමේ යන්ත්‍රය කුඩා ජංගම දුරකථනයක් මෙන් පෙනුනා.
ආයුධ රැගෙන යාමේ නීතිවලට අනුව තනිවම මෙහෙයුමක් සිදුකිරීමේදී හෝ ඔත්තු බැලීමේදී බුද්ධි අංශ ආයුධ රැගෙන යන්නේ නෑ, හදිසි පරීක්ෂාවකදී ආයුධයක් සමග හසුවීම බුද්ධි අංශ සාමාජිකයින්ට වුව කරදරකාරී වූ අතර එය මහජනයා කැළඹීමට පත්කිරීමට හා පුවත් මැවීමට හේතුවන නිසා තහනම් නියෝග පනවා තිබුණා. ආයුධ ගෙනයන්නේ නම් සහය සඳහා TAG කණ්ඩායමක් සිටීම අනිවාර්ය වුනා. ඔවුන් විනාඩි කිහිපයක් තුල සිය ඒජන්තයා වෙත පැමිණීමට සූදානමින් සිටියා.
කැමරා හා පටිගත කිරීමේ යන්ත්‍ර හා ජී.පී.එස් යන්ත්‍රය නිවැරදිව ක්‍රියාත්මක වන බව තහවුරුකරගත් තාක්ෂණ ශිල්පීන්, ජිත් මෙහෙයුමට සූදානම් බව ලුතිනන් අෂාන්ට දැන්වූවා.
දැන් හතයි දහයයි. සර් මලලසේකර මාවතෙන් මේට්ලන්ඩ් ප්ලේස් එකට ගිහිල්ලා එතනින් නිදහස් මන්දිරයට යන්න. අපි සර්ව පේන තැන්වල ඉන්නවා. සර් නිදහස් මන්දිරේ වටේ රවුමක් ජොග් කරලා පඩිපෙලේ ඉඳගන්න කියූ ලුතිනන් අෂාන් ආචාර කොට සිය කණ්ඩායම සමග ඔවුන්ගේ ලෑන්ඩ් කෲසර් ජීප් රථය වෙත පියමන් කලා. ඔවුන් සියලු දෙනාම උදෑසන ව්‍යායාම කරන්නන් ලෙස සැරසී සිටියා.
හතයි විසිපහ වනවිට නිදහස් මන්දිරය වටා සෙමින් දිවයන ජිත් ඔවුන්ට දර්ශණය වුනා. මදක් විවේක ගන්නට මෙන් දකුණු පඩිපෙල මත නැවතුනු ජිත්, ඉණට අත් තබාගෙන බෙල්ලට ව්‍යායාම කරන ආකාරයට හිස කැරකෙව්වා. සැබැවින්ම ඔහු වටපිට නිරීක්ෂණය කරන බව අෂාන්ගේ කණ්ඩායම දැනසිටියා.
උදෑසන 7.32, නිදහස් මන්දිරයේ දකුණු පියගැටපෙල අසල;
වැඩිවේලාවක් යන්නට පෙර නිල්පැහැ ක්‍රීඩා ඇඳුමකින් සැරසුනු යමෙක් තමන්ගේ දකුණු පසින් සිටින බව ජිත්ට ඇස් කොනින් පෙනුනා. මොහොතකින් ඔහුගේ ජංගම දුරකථනය නාදවුනා. එහි "Kate" නම දිස්වූ අතර ඒ ඇමතුම තමන් ගබඩාකරගෙන තිබූ ස්කයිප් අංකයෙන් බව තහවුරු වුනා. දුරකථනය සාක්කුවට දමාගත් ජිත් ඇය දෙස බැලුවා.
“Nice day for a jog isn't it?” [ජොග් එකකට හොඳ දවසක් නේද?] ඇය ප්‍රසන්නව විමසුවා
“Yes… certainly…..” [ඔව්, ඇත්තටම...] ජිත් පිලිතුරු බැන්දා
“Great!! Join me then…..” [නියමයි! මාත් එක්ක දුවන්න එනවද?] කියූ ඇය සෙමින් නිදහස් උද්‍යානයේ වතුරමල් ඇති පැත්තට දිවයන්න පටන් ගත්තා.ඇය දුවන්න එන්නයි කියපු නිසා සැලැස්ම වෙනස් වුනා. ඔවුන් කලින් හිතුවේ ඇය පඩිපෙල මත හිඳගෙන කතාබස් කරනු ඇති කියලයි. "අෂාන්ගේ කොල්ලොන්ට මාව ෆලෝ කරන්න පුලුවන් වෙයිද මන්දා?" ජිත්ට හිතුනා.
"කට්ට ගෑණි....මේකි බ්‍රිටිෂ් ඇම්බසියෙ වෙන්න බෑ....බ්‍රිතාන්‍ය බුද්ධි සේවාවෙන්ද? සමහරවිට බ්‍රිතාන්‍ය කොක්නි උරුවෙන් ඉංග්‍රීසි කථාකරන්න පුහුණුවුනු රුසියානු FSB ඔත්තුකාරියක් වෙන්නත් බැරිනෑ….” ජිත් කල්පණා කළා.
ජිත් ඇයට මීටර් පහක් පමණ පසුපසින් ගමන්කලා. ඇය වරක් දෙවරක් ඇස් කොණින් ඔහු පසුපසින් එනවාදැයි නිරීක්ෂණය කරන අයුරු ජිත් දැක්කා. ඒත් ඇය වේගය බාලකලේ නෑ. වයස 30ක් පමණවූ ඇයට සිහින් එහෙත් ශක්තිමත්, ක්‍රීඩාශීලී සිරුරක් තිබුණා. උස වනිගරත්න කියූ ආකාරයටම 5 8ක් පමණ වුනා. ඇය පැළඳ සිටි රීබොක් සපත්තු සයිස් 9 හෝ සයිස් 10 වියයුතු බවට ජිත් නිගමනය කලා. අඩි 5යි අඟල් 8ක් උස ගැහැණියකට ඒ සපත්තු විශාල වැඩියි. ඒ අනුව ඇය දැඩි හමුදා පුහුණුවක් ලැබූ තැනැත්තියක් විය යුතුයි. කොමාණ්ඩෝ පුහුණුව වැනි දැඩි හමුදා පුහුණුවලදී නිතිපතා කිලෝ 50ක් 60ක් වැනි විශාල බරක් ඇති උපකරණ මලු රැගෙන සැතපුම් ගණන් දිවයායුතු වනවා. වසර 18 පමණ ලාබාල තරුණ කාලයේ එවැනි විශාල බරක් නිතරම ඔසවාගෙන දිවයාමට සිදුවීමෙන් දෙපා විශාල වන අතර ඇය පැළඳ සිටින සපත්තු විශාල වීමට හේතුව එය විය යුතු බවට ඔහු අනුමාන කලා.
ඉදිරියට දිවගිය ඇය දකුණු පසට හැරී ශ්‍රී ලංකා පදනම් ආයතන ගොඩනැගිල්ල පසුකරමින් පාපන්දු සම්මේලන ගොඩනැගිල්ලද පසුකොට රේස් කෝස් පිටියට පිවිසුනා. ඒ සමගම ඇයගේ වේගය බාලවුනා. ජිත්ට ඇය අසලට පැමිණෙන්නට සංඥාව එය බව ඔහු තේරුම් ගත්තා.
“Are we going to stop and have this chat…?”
[අපි නැවතිලා කතාකරන්නේ නැද්ද? ] ජිත් ඇයගෙන් ඇසුවා.
“No… let's keep running… hope u can keep up..”
[නෑ අපි දිගටම දුවමු....ඔයාට මගේ වේගෙන් යන්න පුලුවන් කියලා හිතනවා]
“No worries…” [ප්‍රශ්ණයක් නෑ ...] ජිත් පිලිතුරු බැන්දා
“So...who are u? and what can u tell me about the crash…?”
[ඔයා කව්ද? ප්ලේන් ක්‍රෑෂ් එක ගැන මොනවද දන්නේ?]
“Call me Kate…I will level with you, I am not from HC, I am from MI6….” [මට කේට් කියන්න...මම ඔයාට ඇත්ත කියන්නම්....මම හයිකොමිෂන් එකෙන් නෙමෙයි....මම MI6 බ්‍රිතාන්‍ය බුද්ධි අංශයේ...]
“Well…..any white woman with a cockney accent can say she is MI6….even an accent trained Russian agent…”
[කොක්නි උරුවෙන් කතාකරන ඕනෑම ගෑණියෙකුට පුලුවන්නේ MI6 කියන්න.... ඇක්සන්ට් ට්‍රේනින් ලබපු රුසියන් ඔත්තුකාරියකට වුනත්....]
“Wow…. you identified my accent…? Have you lived in the UK..?”
[ෂහ් ඔයා මගෙ ඇක්සන්ට් එකත් හඳුනගත්තා....ඔයා එන්ගලන්තෙ ජීවත්වෙලා තියෙනවද?]
“No...its my job to know ….” “How do I know that you are MI6?”
[නෑ මගෙ රස්සාව ඕවා දැනගෙන ඉන්න එක ] [මම කොහොමද ඔයා MI6 කියලා තහවුරු කර ගන්නේ?]
“We know about your op in Bangalore, India…. You guys killed a UK citizen…”
[අපි ඔයාලගෙ බැන්ගලෝර් මෙහෙයුම ගැන දන්නවා....ඔයාලා එක්සත් රාජධානියේ පුරවැසියෙක් මරලා දැම්මා...]
“So this meetup is about our Bangalore operation?”
[ඒ කියන්නේ මේ හමුවීම අපේ බැන්ගලෝර් මෙහෙයුම ගැන කතා කරන්නද?]
“No no…. you did us a favour by killing that piece-of-shit who was planning to link-up with ISIS…”
[නෑ නෑ ……….ISIS ත්‍රස්තයින්ගේ උදව්වෙන් ත්‍රස්තවාදී නායකයෙක් වෙන්න හීන බලපු ඒ කාළකණ්නියව මරලා දාලා ඔයාලා ඇත්තටම අපිට උදව්වක් කලේ….....]
“I have sent a link to your phone….there is a ZIP file on that link….download it….as soon as you do...the link will stop working…….you will find some interesting photos and videos….. I also want to tell you that the Y12 was not bombed. It was shot down by what we believe to be a experimental railgun…”
[මම ඔයගෙ ෆෝන් එකට ලින්ක් එකක් එව්වා. එකෙ ZIP ෆෝල්ඩර් එකක් ඇති. ඩවුන්ලෝඩ් කරගන්න. ඩවුන්ලෝඩ් කරපු ගමන් ලින්ක් එක ක්‍රියාවිරහිතවෙයි. ඔයාලට වැදගත් ෆොටෝ/වීඩියෝ ඒ ෆෝල්ඩරේ ඇති…...ඒවගේම Y12 යානයේ බෝම්බයක් නොතිබුණු බව කියන්න ඕනෑ. ඒක පර්යේෂණ මට්ටමේ තියෙන රේල්ගන් කාළතුවක්කුවකින් වෙඩිතියලා බිමදැම්මා කියන එක තමයි අපේ අනුමානය....]
“What’s a rail gun?” [රේල්ගන් කියන්නේ මොකක්ද?]
“It is an kinetic energy weapon which fires a piece of metal at hypersonic speeds….like Mach 4+ using very powerful magnets and lots of electricity…”
[රේල්ගන් කියන්නේ ගතික ශක්ති අවියක්. ඒකට පුලුවන් ලෝහ උණ්ඩයක් හයිපර්සොනික් වේගයෙන් වෙඩි තියන්න. මක් 4ක විතර වේගයක් උණ්ඩයට ලබාදෙන්න පුලුවන්. උණ්ඩය ප්‍රචාලනය කරන්නේ ප්‍රභල විදුලි ධාරාවකින් ජනනය වන අධිබල චුම්බක ශක්තියෙන්....]
“What you are saying is that someone built a high tech railgun in this country…..?”
[ඔයා කියන්නේ ලංකාවේ කවුරුහරි අධි තාක්ෂණික රේල්ගන් එකක් හදලා කියලද?]
“What I am saying is that two high-power superconducting magnets built by a French company for a Chinese kinetic energy research center did not arrive in China….we think it came to Sri Lanka…..”
[මම කියන්නේ මේකයි. ප්‍රංශ සමාගමක්, චීනයේ ගතික-ශක්ති පර්යේෂණාගාරයක් වෙනුවෙන් හදලා යවපු අධිබල සුපිරි සන්නායක චුම්බක දෙකක් චීනයට ගිහිල්ලා නෑ. අපි හිතන්නේ ඒක ලංකාවට ආවා කියලයි....]
“This is crazy…” [මේක නම් පිස්සු කතාවක්....]
“Listen Jith...it sounds crazy….but do you think MI6 would allow me to reveal myself as a MI6 agent to you if they thought this wasn't serious? Now that Sri Lankan intelligence know that I am MI6….i have to leave this country tonight….I can never come here again….. So please find out what hell is going on and who is doing this and stop them before they shoot down a passenger jet with hundreds of innocent people….or do something worse”
[මේ අහන්න ජිත්...මම කියනදේ පිස්සු කතාවක් කියලා ඔයාට හිතෙනවා ඇති, ඒත් ඔයා හිතනවද MI6 බුද්ධි සේවය කවදාක්වත් මට මගේ නියම අනන්‍යතාවය ඔයාට හෙලිකරන්න ඉඩදෙයි කියලා මේ ගැන අපි තදින්ම විශ්වාස කරන්නේ නැතිනම්? දැන් මගේ අනන්‍යතාවය ලංකාවේ බුද්ධි අංශ දන්න නිසා මට අද රෑම මේ රටෙන් පිටවෙන්න වෙනවා. ආයෙ කවදාක්වත් මට ලංකාවට එන්න ලැබෙන්නේ නෑ. ඒ නිසා කරුණාකරලා හොයන්න මොකද්ද මේ වෙන්නේ? කවුද මේක කරන්නේ කියලා? ඔයගොල්ලෝ පරක්කු වුනොත් ඊලඟ ඉලක්කය මිනිස්සු සියගාණක් යන මගී ගුවන්යානයක් වෙන්න පුලුවන්....සමහර විට ඊටත් භයානක දෙයක් වෙන්න පුලුවන්....]
“Bloody hell!!!………....but is that all you have for me?…. A speculation or a theory? Can you give me some actionable intelligence?
[හත්තිලව්වයි!........ ඒත් මෙච්චරද ඔයාට දෙන්න පුලුවන් තොරතුරු? ඔයා මට ලබලා දිලා තියෙන්නේ අනුමානයක් විතරයි....! මට ක්‍රියාමාර්ගයක් ගන්න පුලුවන් බුද්ධි තොරතුරක් දෙන්න බැරිද?]
“One name……. Terry Yang…” [නමක් කියන්නම් ...... ටෙරී යැන්ග්...]
“Who is he?” [ඒ කවුද? ]
“Look him up…….he is famous in China….” [හොයලා බලන්න....මිනිහා චීනේ හරි ප්‍රසිද්ධයි...]
“Why can't MI6 help us?” [ MI6 එකට අපිට උදව්කරන්න බැරිද?]
“Our hands are tied…….. PM is going to China to sign a massive trade agreement…. If any MI6 involvement on Chinese interests in Sri Lanka comes out, Chinese will cancel the signing…. We can’t afford that… we got parliamentary elections in a few months….”
[බෑ...අපි හිරවෙලා ඉන්නේ...අපේ අගමැති චීනෙට යනවා බිලියන ගාණක ව්‍යාපාරික ගිවිසුම් අත්සන් කරන්න......MI6 එක චීනෙ ගෑවිච්ච මොකකට හරි අතදැම්මොත් චීන්නු ගිවිසුම් අත්සන්කරන එක අවලංගු කරන්න ඒක අවසරයක් විධියට ගනියි කියලා අපිට බයක් තියෙනවා.....ඒක වෙන්න දෙන්න බෑ....තව මාස කිහිපයකින් එක්සත් රාජධානියේ මැතිවරණය තියෙනවා....]
What about the CIA? Can they tell us anything? [CIAඑකට උදව්වක් කරන්න බැරිවෙයිද?]
CIA…??? [සී.අයි.ඒ?? ] ඇය හඬනගා සිනාසුනා.
“Jith, There was a time when CIA was top dog in the intelligence community. These days CIA only learns something when it is on papers… This is your op Jith… you got to do this on your own…….. And not matter what you do, don't talk to the Chinese…”
[ජිත්…. කාලෙකට ඉස්සෙල්ලා නම් සී.අයි.ඒ එක බුද්ධි තොරතුරු ලෝකයේ ලොක්කා වෙලා හිටියා ඒත් දැන් එහෙම නෑ.......මේ දවස්වල සී.අයි.ඒ එක මොකක් හරිගැන දැනගන්නේ ඒක පත්තරේ ගියහම....මේක ඔයාලගේ රටේ ඔයාලගෙ ඔපරේෂන් එකක් ජිත්....ඔයගොල්ලන්ට තනිවම කරන්න වෙන වැඩක්.......හැබැයි මොනවා කරත් චීන බුද්ධි අංශෙ ගාවගන්න එපා....එයාලට දැනෙන්න අරින්නත් එපා....]
ඒ සමගම ඇයගේ දුරකථනය නාදවෙනු ඇසුනා. එය ගෙන පරීක්ෂාකල කේට්....
“I have to go… my transport is here… ..” [මං යන්න ඕනෑ....මගේ වාහනේ ඇවිල්ලා.....] කියූ ඇය කඩිණම් ගමණින් තුරඟ තරඟ පිටියෙන් එලියට පැමිණ නවත්වා තිබූ කුලීරථයක නැගගත්තා. ඇය යන අයුරු බලාසිටි ජිත්, ඇය ලබාදුන් තොරතුරුවල මුල-මැද-ගලපාගන්නට බැරුව කැළඹිලි සිතින් ලතවුනා.
CHAPTER 01011
Y12 යානය කඩා වැටී සත් දිනක් ගතවීමට ආසන්නයේ; රාත්‍රී 8.45 පමණ
"හලෝ ජිත්? මිස් කෝල්ස් 8යි! ඇයි මොකද? හදිස්සියක්ද?"
"ඇයි ඔයා ෆෝන් එක ආන්සර් කරේ නැත්තේ......අපි ටිකක් කළබල වුනා ඔයාට කරදරයක් කියලා..."
"මම ලොකු වැඩක හිටියේ....සයිලන්ට් දාලා තිබුණේ.....ඔයාව හම්බුවෙන්න පුලුවන්ද? වැදගත් දෙයක් කතාකරගන්න තියෙනවා...."
"ඔයා කොහෙද ඉන්නේ?"
"මම දැන් මිනිස්ට්‍රියෙන් එලියට බහින ගමන්?"
"මෙච්චර රෑවෙනකන් මිනිස්ට්‍රියේ මොකද කලේ?"
"ජිත්! ඔයා ප්‍රශ්ණ අහන්නේ මගේ හස්බන්ඩ් වගේ නේ......ගෙදරින් වත් මගෙන් ඕවා අහන්නේ නෑ....!" කවීශා නුරුස්නා ස්වරයකින් උස් හඬින් කිව්වා
“සොරි කවී මම ඔයාගේ පෞද්ගලික ජීවිතයට කරදර කරනවා නෙමෙයි.......ඔයාගෙ ආරක්ෂාව ගැන වගකීම තියෙන්නේ මට.....ඒකයි මම කරදර වෙන්නේ...."
"ඕකේ ඕකේ......අපි කොහෙදි හරි හම්බුවෙමුද? හැබැයි ක්ලබ් එකක නම් බෑ......"
"ටොරිංටන් ප්ලේස් එකේ ආකේඩ් එකට එන්න පුලුවන්ද?"
"පුලුවන්.... ආකේඩ් එකේ කොතනටද?"
"කාර්පාක් එකේ වාහනේ නවත්වන්න.....මම ඔයාව එතනින් ගන්නම්......."
"හරි...."
රාත්‍රියේ වාහන තදබදයක් නොතිබුණු නිසා කවීෂාට පැය කාළක් ඇතුලත ගාලුමුවදොර ආරක්ෂක අමාත්‍යාංශයේ සිට ටොරින්ංටන් චතුරශ්‍රයට පැමිණෙන්නට හැකිවුනා. ඇය වාහනය නතර කොට ප්‍රධාන ලාම්පු නිවා දැමූ සැනින් ජිත් ගේ ඇමතුමකින් ඇයගේ දුරකථනය නාදවුනා.
"මගෙ පික් අප් එක ඔයාගෙ කාර් එක පිටිපස්සේ. ඉක්මණට ඇවිල්ලා නගින්න..."
කවීෂා සිය රථයේ දොර වසා දුරස්ථපාලකයෙන් අගුළු දමා ඇයගේ රථයට පිටුපසින් නවත්වාගෙන සිටි පික් අප් රථය දෙස බැලුවා. ඇය බලන බව දුටු ජිත්, රියදුරු අසුනේ සිටි ඔහුව ඇයට හඳුනාගත හැකිවන පරිදි ඇතුලත විදුලිපහණ දල්වා මොහොතකින් නිවා දැම්මා. ඔහු හඳුනාගත් කවී කඩිනම් ගමනින් පැමිණ රථයට ගොඩවුනා.
“කොහෙද යන්නේ?”
"කොහෙවත් නෑ......මේකෙ කොළඹ වටේ රවුමක් දෙකක් යනගමන් කතා කරමු, ඊට පස්සෙ මම ඔයාව ගෙදර ගිහින් දාන්නම්...."
"එතකොට මගෙ කාරෙක?"
"මට යතුර දෙන්න......මම මෙස් එකට ගිහින් අපේ කොල්ලෙකුට කියන්නම් කාර් එක ඔයාගෙ ගෙදරට ගෙනත් දාන්න කියලා.....කමක් නෑ නේද?"
"හ්ම්ම්...."
"බස්සියක් වගේ හුම් ගාන්නෙ මොකද? බඩගිණිද?.... මූණ හෙම්බත්වෙලා.....දවල්ට කෑවේ නෑ නේද?" ජිත්, කවීෂාගේ මුහුණට එබෙමින් ඇසුවා. කවීෂා මුකුත් නොකියා තොල පෙරලුවා.
"පිලවූස් එකෙන් චීස් කොත්තුවක් වාහනේට ගෙන්නගෙන කමුද?"
"හා!!!" ඇය මුවපුරා සිනහසෙමින් කීවා.
"නැත්නම් රෝයල් කොලෙජ් එක ලඟ රහීමා එකෙන් පරාටා කන්නත් පුලුවන්...." ජිත් තවත් යෝජනාවක් ගෙනාවා.
"චීස් කොත්තු......."
"ඕකේ මැඩම්......යුවර් විෂ් ඉස් මයි කමාන්ඩ්....." බෞද්ධාලෝක මාවතේ සෙමෙන් පදවමින් සිටි ජිත් බ්‍රිතාන්‍ය මහකොමසාරිස් කාර්යාලය අසලින් යූ ටර්නයක් ගසා ආපසු බම්බලපිටිය දෙසට යන්නට වුනා.
"හයිකොමිෂන් එක ලඟින් වමට දාලා ගියානම් ලේසි නැද්ද?" කවීෂා විමසුවා.
"ගාලුපාර කොළඹ පැත්තට වන් වේ නෙ...බම්බලපිටියෙන් දැම්මම පිලවූස් එක ඉස්සරහ නවත්තගන්න පුලුවන්...."
රාත්‍රී 9.15
කටට දෙකට ගිල දැමූ උණු උණු චීස් කොත්තුව කෝක් සීරෝ වීදුරුවකින් සෝදා පහලට හැරිය ජිත් නිහඬව වාහනය පැදවූයේ කවීෂාට කතාකරන්නට ඕනෑ යයි කියූ දෙය සකසාගන්නට ඇයට අවස්ථාව දෙමින්. ඇය කුමක් හෝ බරපතල යමක් පැවසීමට සූදානම් වන බව ඔහුට ඉවෙන් මෙන් වැටහුනා.
"ජිත්, සන්දීප් වනසේකරව කොළඹ ආමි HQ එකට ගෙනල්ලා. දැන් එතන ඩිටේන් කරගෙන ප්‍රශ්ණ කරනවා. මම ඩිෆෙන්ස් මිනිස්ට්‍රි ලොයර් කෙනෙක් නිසා එයාගෙ ප්‍රශ්නකිරීම් නීරික්ෂණය කරන්නයි, එයාගෙන් ප්‍රශ්ණකාරී තැන් ගැන අහන්නයි අවසර ඉල්ලුවා. අද උදේ ආමි එකෙන් පණිවුඩයක් ආවා මම ආරක්ෂක අමාත්‍යාංශයේ නීති සම්බන්ධීකාරක විධියට සන්දීප්ගේ කේස් එකට සම්බන්ධ වෙනවට විරුද්ධත්වයක් නෑ කියලා. ඩිෆෙන්ස් සෙකට්‍රි අද උදේ මීටින් එකකට මාවත් ගෙන්නුවා. National Security Advisorත් මීටින් එකේ හිටියා. වෙලා තියෙන දේ අනුව සන්දීප්ගේ රඳවා ගැනීමේ නීතිමයභාවය ගැන මගෙන් ඇහුවා.
මම කිව්වා හරියටම යමක් කියන්න නම්, සන්දීප්ගේ ප්‍රශ්ණ කිරීම් වල ඔක්කොම ට්‍රාන්ස්ක්‍රිප්ට් මට ආමි එකෙනුයි එයාෆෝස් එකෙනුයි නිදහස් කරලා දෙන්න කියලා. ඒවා බලලා, ඒවායින් මතුවන ප්‍රශ්ණකාරීතැන් ගැන සන්දීප්ගේ පැහැදිලිකිරීම් බලලා නීතිමය තත්වය ගැන මගේ තක්සේරුව දෙන්න පුලුවන් කියලයි මම දැනුම් දුන්නේ. ඒවගේම සන්දීප් ග්‍රීන් කාඩ් හෝල්ඩර් කෙනෙක් නිසා ඇමරිකන් ඇම්බසියෙන් දැන් ප්‍රෙෂර් කරනවා. එයාලා අහනවා ඇයි සන්දීප්ව හිරකරගෙන ඉන්නේ කියලා. ඉක්මණින් චෝදනා තියෙනවනම් ඉදිරිපත් කරන්න, නැතිනම් නිදහස් කරන්න කියලා.
අද හතර විතර වෙනකම් මම එයාෆෝස් එකෙනුයි, ආමි එකෙනුයි එවපු, සන්දීප්ගේ ප්‍රශණකිරීම් වල ට්‍රාන්ස්ක්‍රිප්ට් කියෙව්වා. ඊට පස්සේ මම ගියා සන්දීප් හම්බුවෙන්න. ඇත්තටම මට පේන විධියට සන්දීප් මේ ක්‍රෑෂ් එකට කිසිම සම්බන්ධයක් නෑ. ඒ කොල්ලා අඬ අඬා ඉන්නේ . එයා බඳින්න ඉඳලා තියෙන්නේ DTRA බයෝ ලැබ් එකේ ඩොක්ටර් ඊෂා බර්තොලමියුස් කියලා කෙනෙක්ව. එයා බයෝ කෙමිස්ට්‍රි ගැන පී.එච්.එඩී එකක් තියෙන, කැලිෆෝනියාවේ ජීවත් වුන ලංකාවේ කෙල්ලෙක්. සන්දීප් Google Assitant AI project ටීම් එකෙන් අස්වෙලා ඩීට්‍රා ටීම් එකට බැඳිලා තියෙන්නෙත් ඊෂා එක්ක ඉන්න ලංකාවට එන්න ඕනෑ නිසා. දෙන්නා ලබන මාසෙ එන්ගේජ් වෙන්න හිතාගෙන ඉඳලා තියෙන්නේ. එන්ගේජ්මන්ට් මුද්ද හදන්න දීපු ඕඩරේ රිසිට් එක එයාගෙ වොලට් එකේ. ඒක මට පෙන්නුවා. මම ෆෝන් එකෙන් ෆොටෝ එකක් ගත්තා. මම ඔයාට WhatsApp කරන්නම්. කාවහරි ඒ රත්තරන් සාප්පුවට යවලා ඒ ගැන හොයාලා බලන්න්න පුලුවන් නේද? මුද්දෙ ඕඩරේ දෙන්න සන්දීප්මද ගියේ කියලා ෂොප් එකේ සිකුරිටි කැමරා ටේප් වල ඇති මම හිතන්නේ.
ට්‍රාන්ස්ක්ක්‍රිප්ට් වලන් මතුවෙන ගැටලු ඔක්කොටම එයා සෑහීමකට පත්වෙන්න පුලුවන් විධියට උත්තර දුන්නා. ඒවා සළකලා බලලා මම හෙට උදේට ඩිෆෙන්ස් සෙකට්‍රිට මගේ රිපෝට් එක දෙනවා. සන්දීප් කියන විධියට එයා ප්ලේන් එකට බඩු ලෝඩ් කරනකොටත් රන්වේ එක ලඟ ඉඳලා ප්ලේන් එක පිටත්වුනාමයි ඩේටා කලෙක්ෂන් පටන් ගන්න ලැබ් එකට ගිහිල්ලා තියෙන්නේ. එයා කොහොමටවත් පිලිගන්නේ නෑ G10 සෙබලුන්ගේ හැසිරීම් විකෘතිවෙලා, එයාලා කළබලයක් කරලා හරි වෙඩි තියාගෙන හරි ප්ලේන් ක්‍රෑෂ් එක වුනා කියලා.
ටීම් එකේ අය ලඟවත්, එයාෆෝස් එකෙන් දීපු ලෝඩ් මාස්ටර්, ජම්ප් මාස්ටර් ඔෆිසර්ලා ලඟවත් ආයුධ තිබිලා නෑ. පිපිරීමක් ඇති කරන්න පුලුවන් කිසිම දෙයක් එයාලගෙ ඉක්විප්මන්ට් වල තිබුණේ නෑ කියලා සන්දීප් සහතික වෙනවා. පස්සේ මම එයාට MI6 එකේ කේට් දීපු තොරතුරු ගැන ඉඟියක් දුන්නා. ඔයා මට කියපු හැම දෙයක්ම මම කියන්න ගියේ නෑ. එත් මම කයිනටික් එනර්ජි වෙපන්ස් ගැනයි, රේල් ගන් තාක්ෂණය ගැනයි ඇහුවා. එයාට ඒ ෆීල්ඩ් එක ගැන සෑහෙන දැනුමක් තියෙනවා. AI ෆීල්ඩ් එකේ දැන් හිටියට එයා මාස්ටර්ස් ඩිග්‍රිය වෙනකම් ඇප්ලයිඩ් ෆිසික්ස් (applied physics) පැත්තේ රීසර්ච් කරපු කෙනෙක්. සන්දීප් කියන විධියට රෙල්ගන් තාක්ෂණයේ අමාරුම කොටස අධිබල සුපර් කන්ඩක්ටින් මැග්නට් තාක්ෂණය. ඒවගේ මැග්නට් තියෙනවා නම්, රේල් ගන් එකක් ඇසම්බල් කර ගන්න එක එච්චර අමාරු නෑ කියලා කියනවා. සන්දීප් ක්‍රෑෂ් එකට සම්බන්ධයි කියලා සැකයක් ඇතිවෙන කිසිම හේතුවක් නෑ කියලා මම මගේ රිපෝට් එකේ ලියනවා.
දවස් දෙකතුනකින් එයාව නිවාස අඩස්සියෙන් නිදහස් කරයි. මම හිතන්නේ සන්දීප්ව අපේ ඉන්වෙස්ටිගේෂන් එකට සම්බන්ධකරගත්තොත් හොඳයි කියලා. ඔයා මොකද හිතන්නේ?
මදක් වෙලා නිහඬව සිටි ජිත් හඬ අවදිකලා.
"මෙහෙමයි කවී, ඔයා මගෙන් අහන්නේ නැතුව දැනට ඉතාමත්ම රහසිගතව තියෙන තොරතුරු සන්දීප්ට දීපු එකනම් මම කොහොමටත් අනුමත කරන්නේ නෑ. ඕක ලීක් වුනොත් මමයි, මිලිටරි ඉන්ටෙලිජන්ස් එකයි විතරක් නෙමෙයි, බ්‍රිටිෂ් ඉන්ටෙලිජන්ස් එකත් අමාරුවේ වැටෙනවා. ඒත් ඔයා සන්දීප් ගැන හිතන විධියයි, එයාට මේවා කියන්න ගත්ත තීරණයයි මම චැලෙන්ජ් කරන්නේ නෑ. අපි බලමු මොකද වෙන්නේ කියලා. සන්දීප් වගේ විශේෂඥයෙක් මේ ඉන්වෙස්ටිගේෂන් එකට වැදගත් සම්පතක් වෙයි. ඒවගේම මේ අභිරහස විසඳගන්න එයාට දැන් බලවත් පෞද්ගලික හේතුවකුත් තියෙනවා. බඳින්න ඉන්න කෙල්ලවයි, එයාගෙ යාලුවො හැම දෙනාවමයි අමු අමුවේ මරාදැම්මේ කවුද, මොන හේතුවකටද කියලා හොයාගන්න එයා කරන්න පුලුවන් හැම දෙයක්ම කරයි.... මම මගේ කමාන්ඩින් ඔෆිසර්ට කතා කරලා බලන්නම්...."
CHAPTER 01100
Y12 අණතුරෙන් සති දෙකකට පසු; Y12 අණතුර පිලිබඳව බුද්ධි තොරතුරු සමාලෝචන හා උපාය සකස්කිරීමේ රැස්වීම, සන්නද්ධ බුද්ධි අංශ රක්ෂක නිවාසය හා ක්ශේස්ත්‍ර මෙහෙයුම් කාර්යාලය, පැලවත්ත
මුලසුන හෙබවූ බ්‍රිගේඩියර් ජනක දසනායකගේ අවසරයෙන් ආර්ථික විද්‍යාව හා ව්‍යාපාර පිලිබඳ විශේෂඥ, සන්නද්ධ බුද්ධි තොරතුරු විශ්ලේෂක විකුම් අල්මේදා කණ්ඩායම ඇමතීමට නැගී සිටියා.
මට ලැබුණු අණ අනුව මම චීන ජාතික ප්‍රකෝටිපති ව්‍යාපාරික ටෙරී යැන්ග් ගැන පූර්ණ විශ්ලේෂණයක් කලා. මා සොයාගත් දේවල් දැන් ඉදිරිපත් කරන්නම්.
62හැවිරිදි ටෙරී යැන්ග්ගේ නියම නම යැන්ග් ටාඕ සී. ඔහු වෙනත් චීන කෝටිපතියන්ට වඩා වෙනස්, මාධ්‍යවල පෙනී නොසිටින නිහඬ ජීවිතයක් ගත කරනවා. ඔහු බිලියනපතියෙක් වුනේ ඩෙන්ග් ෂියාඕ පිංග් චිනයේ ආර්ථිකය වෙළඳපොලකරණය කරමින් ඇතිකල ඉඩකඩම් වෙළඳාම හා පෙට්‍රෝලියම් සිල්ලර වෙළඳාම් ලිහිල් කරණ ප්‍රතිපත්ති වලින් පසුවයි. ශූර ආයෝජකයෙකු වූ ඔහු අතහැර දමාතිබූ චීන රජයට අයත් ඉඩම් ඉතා අඩු මිළට මිළදීගෙන විශාල කර්මාණ්ත කලාප, නිවාස සංකීර්ණ හා කාර්යාල හා සාප්පු සංකීර්ණ ගොඩනැගුවා. YTS Property Holdings නම් ඔහුගේ දේපොල වෙළඳ සමාගම චීනයේ ප්‍රධාන කාර්මික හා වෙළඳ නගර අටකම විශාලතම ඉඩකඩම් හා මූර්ත දේපල හිමි සමාගම වනවා. Shanghai, Hangzhou, Shenzhen, Guangzhou, Wuxi, Nanjing, Ningbo හා Beijing ප්‍රධාන නගරවල ඔහුගේ සමාගම සතු දේපොලවල වෙළඳපොල වටිනාකම ඩොලර් බිලියන 600ක් බවට ඇස්තමේන්තුකර තිබෙනවා. YTS Liquid Energy යන නමින් හඳුන්වන ඔහුගේ ඉන්ධන බෙදාහැරීමේ හා ඉන්ධන අලෙවිසැල් ජාල සමාගම සතුව චීනය පුරා ඉන්ධන වෙළඳසැල් 6000ක් තිබෙනවා. ඒවගේම මේ සමාගම චීනයේ අන්තර්ජාතික ගුවන්තොටුපොලවල් හයක ගුවන්යානා ඉන්ධන සැපයිමේ ඒකාධිකාරිය තිබෙනවා. YTS Liquid Energy සමාගමේ වාර්ෂික ආදායම ඩොලර් බිලියන 16ක් බවයි මට ලැබුණු වාර්තාවල තියෙන්නේ.
කොහොම වුනත් මීට අවුරුදු 7කට කලින් ටෙරී යැන්ග්ට මොළයේ පිලිකාවක් වැළඳී ඇතිබව සොයාගන්නවා. ඒ සමගම ඔහු සිය එකම දියණිය වන යැන්ග් නිංග් මා හෙවත් නිමා යැන්ග් සිය ව්‍යාපාරයට හවුල්කර ගන්නවා. ඇය ටෙරී යැන්ග් ගේ ව්‍යාපාරවලට සම්බන්ධවන විට වයස 28යි. දැන් 35 හැවිරිදි ඇය, ටෙරී යැන්ගේ ව්‍යාපාර අධිරාජ්‍යයේ ප්‍රධාන සමාගම් දෙකක, එනම් YTS Property, YTS Liquid Energy සමාගම් වල ප්‍රධාන මෙහෙයුම් නිළධාරිනී (Chief Operating Officer - COO) ලෙස කටයුතු කරනවා. පසුගිය මාස 6ක් පුරාම ටෙරී යැන්ග් සිය කාර්යාලයට පැමිණ නොමැති අතර ඔහු නේවාසිකව ප්‍රතිකාර ගන්නා බව චීන ව්‍යාපාරික මාධ්‍ය අනුමාන කරනවා.
නිමා යැන්ග් දක්ෂ පරිගණක විද්‍යාඥවරියක්. ඇයට ස්ටැන්ෆර්ඩ් විශ්වවිද්‍යාලයෙන් neural networks නම් පරිගණක තාක්ෂණය පිලිබඳ ආචාර්ය උපාධියක් තියෙනවා. ඒවගේම හාවර්ඩ් විශ්වවිද්‍යාලයෙන් MBA ව්‍යාපාරික උපාධියක් තියෙනවා. ව්‍යාපාරයට සම්බන්ධවූ වහාම ඇය සිය පියාව පරිගණක හා තොරතුරු තාක්ෂණ කර්මාණ්තයේ ආයෝජනය කරන්නට පොළඹවා ගත්තා. ඔවුන්ගේ පරිගණක හා තොරතුරු තාක්ෂණ ආයෝජන සියල්ලම Centaris නම් පරිපාලන සමාගමක් (holding company) හරහා මෙහෙයවනවා. මේවෙනකොට විශාල දියුණුවක් ලබලා තියෙන සෙන්ටාරිස් සමාගම චීන ත්‍රිවිධ හමුදා සඳහා තොරතුරු තාක්ෂණ මෙවලම්, ස්වයංක්‍රීය රොබෝ යන්ත්‍ර හා කෘත්‍රිම බුද්ධි මෘදුකාංග නිර්මාණය කෙරෙන සමාගම් හා පර්යේෂණ ආයතනවල විශාලම ආයෝජකයෙක්බවට පත්වෙලා තියෙනවා.චීනයේ විශාලම කෘත්‍රිම බුද්ධි පර්යේෂණ ආයතන හතරකම අයිතිය සෙන්ටාරිස් සමාගම සතුවෙනවා. YTS සමාගම් දෙකෙහි ප්‍රධාන මෙහෙයුම් නිළධාරිණිය වන නීමා, සෙන්ටාරිස් සමාගමේ ප්‍රධාන විධායක නිළධාරිණිය (CEO) මෙන්ම ප්‍රධාන තාක්ෂණ නිළධාරිණිය (Chief Technology Officer - CTO) වනවා. ඒ අනුව සෙන්ටාරිස් සමාගමේ උපායමාර්ග හා ආයෝජන සියල්ලම නිමා යැන්ග් ගේ දැක්මට අනුව සිදුවෙනවා කියලා හිතන්න වෙනවා.
මෑතක සිට චීන තොරතුරු තාක්ෂණ ක්ෂේස්ත්‍රය තුල සෙන්ටාරිස් සමාගමේ අලුත්ම රහස් ව්‍යාපෘතියක් ගැන කතාබහ වෙනවා. එනම් සෙන්ටාරිස් සමාගම, ඔවුන්ගේ YTS සමාගම් සමූහයේ සියලුම මෙහෙයුම් තීරණ මෙන්ම උපායමාර්ගික තීන්දුද ස්වයාර්තව ගතහැකි සුපිරි කෘත්‍රිම බුද්ධි යන්ත්‍රයක් නිර්මාණය කරමින් සිටින බවට පැතිරෙන රාවය. මේ වෑයම සාර්ථකවුව හොත් YTS / Centaris සමාගම් සමූහය කෘත්‍රිම බුද්ධි CEO කෙනෙකු මගින් මගින් පාලනය කරන ලොව ප්‍රථම සමාගම වනු ඇතැයි විචාරකයින් පවසනවා. මේ වෑයමට එක් හේතුවක් ලෙස YTS / Centaris අධිරාජ්‍යයේ නිර්මාතෲ ටෙරී යැන්ගේ රෝගී තත්වය දිනෙන් දිනම අසාධ්‍ය වෙමින් පැවතීම කියලා හිතන්න පුලුවන්.
ඊටත් වඩා අපේ ඉන්වෙස්ටිගේෂන් එකට වැදගත් වෙන දෙයක් මම සොයාගත්තා. යුධ තාක්ෂණ විශ්ලේෂණය පිලිබඳව නම්දරා ඇති Jane’s Defense Review සඟරාවට අනුව සෙන්ටාරිස් සමාගම විද්‍යුත් චුම්බක තාක්ෂණ ආයුධ නිර්මාණයට අතගහලා තියෙනවා. එවැනි ආයුධ නිපදවාගැනීම ප්‍රමුඛතාවයේ සලකා ක්‍රියා කිරීමට චීන රජය පටන්ගෙන ඇති නිසා සෙන්ටාරිස් සමාගමේ පර්යේෂණවලට චීන රජයේ පූර්ණ සහය හිමිවී තිබෙනවා. චීන නාවික හමුදාවේ යුධ නෞකාවලට රේල් ගන් ආයුධ නිර්මාණය සඳහා සෙන්ටාරිස් හා තවත් චීන සමාගම් කිහිපයක් තරඟවැදී සිටින අතර සෙන්ටාරිස් සමාගම රේල් ගන් තාක්ෂණයෙන් ගුවන්යානා නාෂක අවි නිපදවීමටද පර්යේෂණ පවත්වන බව වාර්තාවනවා.
තවත් වැදගත් සිද්ධියක් තමයි 2017 මාර්තුවේදී සෙන්ටාරිස් සමාගම ප්‍රංශ අධිතාක්ෂණ සමාගමක් වන Rexel සමාගමේ පාලනය සියතට ගැනීමට උත්සහ කිරීම. රෙක්සෙල් සමාගම සුපිරි සන්නායක හා සුපිරි සන්නායක විද්‍යුත් චුම්බක නිෂ්පාදනය කරන ලොව විශාලතම සමාගම් වලින් එකක්. කොහොම වුනත් ප්‍රංශ රජයේ මැදිහත්වීම මත රෙක්සෙල් සමාගමේ විශාල කොටස් හිමියන් සිය කොටස් සෙන්ටාරිස් සමාගමට විකිණීම ප්‍රතික්ෂේප කරලා තියනවා. එහෙම වුනත් සෙන්ටාරිස් සමාගම, රෙක්සෙල් සමාගමේ විශාලතම ගැනුම්කරුවෙකු වෙනවා වගේම අතර සමාගම් දෙක අතර තාක්ෂණ හුවමාරු හා පේටන්ට් බළපත්‍ර හුවමාරු ගිවිසුම් ගණනාවක් තිබෙනවා.මම අනුමාන කරන විධියට MI6 ඔත්තුසේවයෙන් අපිට කියපු සුපිරිසන්නායක චුම්බක රෙක්සෙල් සමාගමෙන් සෙන්ටාරිස් සමාගමට යවපු ඒවා වෙන්න ඕනෙ.
ඒ විධියට බලනකොට සෙන්ටාරිස් සමාගම ලංකාවේ මේ වෙන සිද්ධිවලට සෘජු සම්බන්ධයක් තියෙනවා කියලා අනුමාන කරන්න පුලුවන්. එම්.අයි 6 එක අපිට ටෙරී යැන්ග් ගැන හොයන්න කියලා ඔත්තුවක් දුන්නේ ඒ නිසා වෙන්න ඕනෙ.
කෝලිත, ඔයාගෙ රිපෝට් එක දෙන්න බලන්න. බ්‍රිගේඩියර් දසනායක විධානය කලා. සන්නද්ධ බුද්ධි තොරතුරු විශ්ලේෂක හා සයිබර් හා සංඥා බුද්ධි තොරතුරු (cyber and signals intelligence) විශේෂඥ කෝලිත මෙන්ඩිස් නැගී සිටියා.
MI6 එකෙන් අපට ලබලාදීපු ෆෝල්ඩරයේ තිබූ ඡායාරූප හා වීඩියෝ විශ්ලේෂණයට අදාල තොරතුරු මා ඉදිරිපත් කරන්නම්. මේ ඡායාරූප හා වීඩියෝ වල පෙන්නන තැන සිංගප්පූරුවේ රැෆල්ස් ප්‍රදර්ශණ හා සම්මණ්ත්‍රණ සංකීර්ණයේ බව අපට තහරුවුරු වෙලා තිබෙනවා. විඩියෝවට අදාල දර්ශණ රැෆල්ස් සම්මණ්ත්‍රණ ශාලා සංකීර්ණයේම පිහිටි ෆෙයාර්මොන්ට් හෝටලයේ මිළ අධික සුඛෝපභෝගී කාමරයක සිදුවූ ඒවා බවත් තහවුරුයි.
මේ ඡායාරූපවල ඉන්න කාන්තාව හා දසුන් වීරකෝන් ෆෙයාර්මොන්ට් හෝටලයේ ඇති විවිධ අවන්හල් හා සමාජශාලාවල ඉතා කුළුපගව ගැවසෙන ආකාරය පෙන්වනවා. මේ කාන්තාවගේ අනන්‍යතාවය හෙලිකරගන්න තවම බැරිවුනත් ඇය චීන පුරවැසි කාන්තාවක් බවත් ඇය චීනයේ ජාතික බුද්ධි සේවය වන MSS ඒජන්සියේ ඔත්තුකාරියක් බවත් අප අනුමාන කරනවා. ඇය හා දසුන් වීරකෝන් අතර කලක පටන් ලිංගික සබඳතාවයක් තිබී ඇති බව මේ වීඩියෝවෙන් ඔප්පුවෙලා තියෙනවා. මේ කාන්තාව MSS ඔත්තුසේවයේ බව අප අනුමාන කරන්නේ ඔබට මේ තිරයේ පෙනෙන ඡායාරූපය ඔස්සේ කල පරීක්ෂණ වලට අනුවයි.
ඇය භාවිතාකල මේ ලක්ෂරි කාර් එක සිංගප්පූරුවේ Hertz නම් කුලීරථ සමාගමට අයත් එකක්. මේ රථයේ ලියාපදිංචි අංකය අනෙක් ඡායාරූපවල ඉතා පැහැදිලිව පෙනෙන නිසා ඒ ගැන අපි සොයාබැලුවා. මේ ඡායාරුපය ගෙන ඇති දින හා ඊට පැය 72ක පෙර හා පසු කාලසීමාවලදී හර්ට්ස් සමාගමෙන් මේ අංකය ඇති කුළීරිය ලබාගෙන ඇත්තේ කවුරුන් විසින් දැයි අප සිංගප්පුරුවේ සිට ක්‍රියාත්මක වන තොරතුරු මූළාශ්‍රයක උදව්වෙන් සොයාගත්තා. අපට වාර්තාවුනු ආකාරයට මේ කාලසීමාවේදී මේ සුඛෝපභෝගී BMW රථය Hibiscus Imports and Exports Co Pvt නම් සිංගප්පූරුවේ ලියාපදිංචි සමාගමක් විසින් කුලියට ගෙන තිබෙනවා. බුද්ධි තොරතුරු හුවමාරු ගිවිසුම් යටතේ CIA ඔත්තුසේවය ශ්‍රීලංකා සන්නද්ධ බුද්ධි අංශයට ලබාදුන්, අග්නිදිග ආසියාවේ චීන බුද්ධි අංශ ක්‍රියාකාරකම් පිලිබඳව නිකුත්කල වාර්තාවක Hibiscus Imports and Exports Co Pvt සමාගම චීන MSS බුද්ධි සේවය මගින් සිංගප්පූරුවේ ආ ආසන්න රටවල විවිධ ක්‍රියාකාරම් සඳහා යොදාගන්නා සමාගමක් බව හෙලිකොට තිබෙනවා. ඒ අනුව මේ කාන්තාව MSS බුද්ධි සේවයේ ක්‍රියාකාරිණියක් බවට වන අනුමානය තවත් ශක්තිමත් වෙනවා.
මේ කාන්තාව ලංකාවට පැමිණී ඇතිදැයි සොයා බැලීමට කටුණායක ගුවන්තොටුපොල ආගමන විගමන කවුන්ටරවල පසුගිය මාස හයක ආරක්ෂක කැමරා දර්ශණ facial recognition තාක්ෂණය යොදාගෙන විශ්ලේෂණය කරන්නට අප කටයුතු කලා. පුද්ගලයින් මිලියනයකගේ පමණ මුහුණු විශ්ලේෂණය කිරීමෙන් පසු මැය ලංකාවට පැමිණ ඇති බව සොයාගත්තා. සති දෙකක් පමණ ගතවූ මේ විශ්ලේෂණයේදී මේ කාන්තාව පස් වතාවක් චීන ගමන්බළ පත්‍ර තුනක් යොදාගෙන ලංකාවට පැමිණ ඇති අතර ඇය ඒ සෑම වතාවකම දින පහක් හෝ ඊට වැඩි කාළයක් ලංකාවේ ගතකොට තිබෙනවා.ඒවගේම දසුන් වීරකෝන් පිටරට සවාරි යන බොහෝ අවස්ථාවල මේ කාන්තාව මගදී ඔහුට එකතුවෙලා තියෙනවා. ඒ අනුව MSS ඒජන්තවරියක් වන මේ කාන්තාව ලංකාවේ ජාතික ආරක්ෂක උපදේශකවරයාගේ ඇතුලු කවයේ වඩාත් විශ්වාසදායක පුද්ගලයෙකුගේ අනියම් බිරිය බවට පත්වී ඇති බවට සැකයක් නෑ.
ඒවගේම බුද්ධි තොරතුරු හුවමාරු ගිවිසුම් යටතේ අපට ජර්මනියේ BND ඔත්තුසේවයෙන් ලැබුණු වාර්තාවක චීන MSS ඔත්තුසේවය ලිංගික සබඳතා මගින් මිනිසුන් පොළඹවාගැනීම සඳහා යොදාගන්නා ඔත්තුකාරියන්ට එම්ෆතින් (emphathin) නම් ජීව රසායණ ද්‍රව්‍යය ලබාදෙන බවට අණතුරු අඟවා තිබෙනවා. එම්ෆතින් මගින් ඇඩ්‍රොස්ටෙනෝල් නම් ලිංගික ආකර්ෂණ ෆෙරමෝනය නිකුත්වීම උත්තේජනය කරනවා කියලා වෛද්‍ය මතයක් තියෙනවා.
අධිමාත්‍රාවෙන් ඇඩ්‍රොස්ටෙනෝල් ෆෙරමෝනය නිකුත්කරන කාන්තාවන් හා හාදවන පිරිමින්, ඒ ගැහැණුන් වෙනුවෙන් ඕනෑම දෙයක් කිරීමට පොළඹවන දැඩි ලිංගික ආකර්ෂණයක් ඇති කරනවා. දසුන් වීරකෝන් අතිවිශාල අවදානමක් ගනිමින් මේ කාන්තාව සමග හැසිරෙන්නේ මේ ෆෙරමෝනයේ බලපෑමට හසුවීමෙන් බවට අප විශ්වාස කරනවා.ඒවගේම මානසික බැඳිම් ඇතිකරන විවිධ මනෝවිද්‍යා උපක්‍රමත් චීන බුද්ධි අංශ භාවිතා කරනවා. මේ කාන්තාවගේ පෙළඹවීමෙන් දසුන් වීරකෝන් ආරක්ෂක අමාත්‍යාංශයේ ඉතාමත් සංවේදී ආරක්ෂක තොරතුරු MSS ඔත්තුසේවය අතට පත්කරන බවයි අප විශ්වාස කරන්නේ…………"
“ස්තූතියි කෝලිත...සන්දීප්!, ඔයා ලෑස්තිනම් ඊලඟට ඔයාගෙ අවස්ථාව..”. බ්‍රිගේඩියර් දසනායක පවසද්දී "මම ලෑස්තියි සර්" කියමින් සන්දීප් වනසේකර ප්‍රොජෙක්ටරය සවිකොට තිබූ ලැප්ටොප් යන්ත්‍රය වෙත ගොස්, සිය වාර්තාව රැගත් පවර්පොයින්ට් ගොනුව ක්‍රියාත්මක කලා.
"ඉස්සෙල්ලම ඔයාගැන හැඳිවීමක් කරලා හිටියොත් හොඳයි සන්දීප්, මෙතන ඉන්න සමහර අය ඔයාව හමුවෙන්නේ පලමුවතාවට...." කපිතාන් ජිත් යෝජනා කරද්දී බ්‍රිගේඩියර් දසනායක එය හිසවනා අනුමත කලා. සන්දීප්ව සන්නද්ධ බුද්ධි අංශයට සම්බන්ධකරගත යුතුයැයි යෝජනාකල කවීෂා ජයමාන්න, සන්දීප්ගේ වාර්තාව ඇසීමට ඉතා ඕනෑකමින් සූදානම් වෙනු පෙනුනා.
“ස්තූතියි මට මේ මෙහෙයුමට දායක වෙන්න අවස්ථාව ලබා දුන්නාට. මම සන්දීප් වනසේකර. මම භෞතික විද්‍යාඥයෙක් වගේම කෘත්‍රිම බුද්ධි පරිගණක වැඩසටහන් නිර්මාණ කරන මෘදුකාංග ඉන්ජිනේරුවෙක්. G10 ව්‍යාපෘතියේ සෙබලුන්ගේ පාලන කටයුතු සිදුකරන කෘත්‍රිම බුද්ධි මෘදුකාංග දෙක නිර්මාණය කලේ මා නායකත්වය දුන් කණ්ඩායම….
සුපිරි සන්නායක වලින් ජනනයවන විද්‍යුත් චුම්භක ශක්තියෙන් ක්‍රියාත්මක වන රේල් ගන් අවි පිලිබඳව මා ගැඹුරින් හදාරා නැතත් ඒවා ක්‍රියාත්මකවන භෞතික විද්‍යාත්මක සිද්ධාන්ත ඉතා හොඳ අවබෝධයක් තිබෙනවා….”
“රේල් ගන් එකක් කියන්නේ අධිබල විද්‍යුත් චුම්බකයකින් යම් ඝණ ප්‍රක්ෂිප්තයක් ත්වරණය කරමින් ඒ ප්‍රක්ෂිප්තයේ කයිනෙටික් එනර්ජි හෙවත් ගතික ශක්තියෙන් විශාල විනාශයක් කරන්න පුලුවන් අවියකට. මෙවැනි ප්‍රක්ෂිප්තයකට නැතිනම් ප්‍රොජෙක්ටයිල් එකකට ශබ්දයේ වේගය මෙන් හතර ගුණයක වේගයක්, එනම් පැයට කිලෝමීටර් 4900ක් වගේ වේගයක් තියෙනවා. මේ වගේ තවරණයක් දෙන්න ඉතා කෙටි කාළයකට අධික විදුලි බලයක්, ඒ කියන්නේ මෙගාවොට් 25ක විතර බලයක් තත්පර 5ක් වගේ කාළයකට ලබාදියයුතු වෙනවා….”
“මෙවැනි බලයක් ලබල දෙන්න විශාල විදුලිබල උපපොලක් අවශ්‍ය වෙනවවා. ඒත් නවීන බැටරි තාක්ෂණය හා කැපෑසිටර් තාක්ෂණයෙන් මෙවැනි බලයක් කෙටිකාළයකට ගබඩාකරගන්න පුලුවන් උපක්‍රම තියෙනවා. ඒත් ඒවගේ පද්ධතියක් චාර්ජ් කරන්නත් සෑහෙන විදුලියක් ඕනෑ වෙනවා. ඒවගේම එවැනි පද්ධතියකින් ක්‍රියාත්මක වන අවියකට එකවරක් ප්‍රහාරයක් එල්ලකල පසු ඊලඟ ප්‍රහාරය කරන්න පැය 4ක් 5ක් පද්ධතිය ආරෝපණය කරන්න වෙනවා. කොහොම වුනත් Y12 යානය කඩාවැටුනේ රේල් ගන් ප්‍රහාරයකින් නම්, මේවගේ බළපද්ධතියකින් ක්‍රියාත්මක වෙන එකක් වෙන්නට බොහෝ දුරට ඉඩ තියෙනවා……”
“ඊලඟට අපිට හොයාගන්න තියෙන්නේ මේ අවියේ ට්‍රැකිං හා ගයිඩන්ස් කොහොමද වුනේ කියන එක. ඉලක්කය ට්‍රැක් කරමින් අවිය එල්ල කරේ කොහොමද කියන එක ගැටලුවක්. ඒ සඳහා මොවුන්ට අවියට සම්බන්ධ කරපු ට්‍රැකිං රේඩාර් එකක් තිබුණද නැතිනම් වෙන උපක්‍රමයක් භාවිතා කරාද කියලා හිතන්න වෙනවා. කොහොම වුනත් රේල් ගන් එකකින් විදින ප්‍රොජෙක්ටයිල් එකකට මිසයිලයකට වගේ මගදී ඉලක්කය වෙනස් කරගන්න බෑ. ඒ නිසා ඉතාමත් නිවැරදිව හරි ඉලක්කය ගන්න ඕනෑ. ඒත් මේ Y12 ෆ්ලයිට් එක බොහොම හෙමින්, තනි කෙලින් පියාසර කරපු නිසා ට්‍රැකිං අමාරු වෙන්න විධියක් නෑ. Y12 කියන්නේ චීනෙ හදන යානා මාදිලියක්. මේ යානයේ ගුවන්විදුලි පණිවුඩ වලට ඇහුම්කන්දෙන්නයි, ට්‍රාන්ස්පොන්ඩර් එකෙන් එන සංඥා හා දත්ත ඔස්සේ යානයේ ගමන් මග නිවැරදිව හොයාගන්නයි අවශ්‍ය උපකරණ බොහොම ලෙහෙසියෙන් ලංකාවට එවන්න පුලුවන්. ඒවාත් අර අතුරුදහන් වුනු කන්ටේනර් එකේ තියෙන්න ඇති. නැතිනම් අපි නොදන්න තව කන්ටේනර් වරායෙන් පන්න ගත්තද දන්නෙත් නෑ…..”
"සන්දීප්! සමාවෙන්න බාධා කරනවට......අපිට හොයාගන්න බැරිවෙයිද රේල් ගන් එක ෆයර් කරේ කොතන ඉඳන්ද කියලා....?" සන්දීප්ගේ විස්තරයට බාධා කරමින් ජිත් විමසා සිටියා.
“අපිට තියෙන දත්ත අඩු නිසා හරියටම හොයාගන්න අමාරුයි. ඒත් අනුමානයට ආසන්නව හොයාගන්න පුලුවන් වෙයි කියලා හිතනවා. මට ෆල්යිට් එකේ බ්ලැක්බොක්ස් එකේ ඩේටා ලබලා දෙන්න පුලුවන්ද? බ්ලැක් බොක්ස් ඩේටාවල අන්තිමට සටහන්වුනු ජී.පී.එස් ඩේටා අනුව ප්‍රහාරය වදිනකොට යානය අහසේ තිබුණ තැන හොයාගන්න පුලුවන්. ඒවගේම ඇල්ටිටුඩ්, ස්පිඩ්, ඩිරෙක්ෂන් ඩේටා අරගත්තම යානයට වදින්න ප්‍රොජෙක්ටයිල් එකක් විදිනවානම් ඒවා වල ගමන් මාර්ග ප්ලොට් කර ගන්න පුලුවන් වෙයි....”
“කොච්චර ඉක්මණට කරගන්න පුලුවන්ද? ප්ලෑන් එකක් තියෙනවද?" සන්දීප්ගේ විස්තර කිරීම ඉතා උණන්දුවෙන් අසා සිටි බ්‍රිගේඩියර් ජනක දසනායක විමසා සිටියා.
"ඔව් සර්.... ප්ලෑන් එකක් තියෙනවා........මේ ගන් එක ෆයර් කරන්න / නැතිනම් ෆයරින් බැටරි චාර්ජ් කරන්න ලොකු කරන්ට් එකක් ඕනෙ නිසා, සබ්-ස්ටේෂන් එකක් හදන්නේ නැතිව ඔය වගේ කරන්ට් එකක් ගන්න නම්, හයිටෙන්ෂන් ට්‍රාන්ස්මිෂන් ලයින් එකකින් හොරෙන් කරන්ට් ගන්න ඕනෑ.....එහෙම කරන්න නම් ඈත පිටිසර ජනශූන්‍ය ප්‍රදේශයකදී ඕක කරන්න ඕනෑ. ඒ වැඩේ ලේසි නෑ....."
"මේ තියෙන්නේ විදුලිබල මණ්ඩළයේ හයිවෝල්ටේජ් ට්‍රාන්ස්මිෂන් ලයින් සිතියම...." සන්දීප් සිතියමක් ප්‍රොජෙක්ටර් තිරයේ දක්වමින් කියා සිටියා.
මේකේ සී.ඊ.බී එකේ හයිවෝල්ටේජ් ට්‍රාන්ස්මිෂන් ලයින්ස් පෙන්වලා තියෙනවා. සිතියම දිහා බැලුවම පේනවා ප්ලේන් එක වට්ටපු රේල් ගන් එකට බලය ගන්න සුදුසුම ප්‍රදේශය වව්නියාව හා කිලිනොච්චි උපපොලවල් දෙක අතර දිවෙන හයිටෙන්ෂන් ලයින් එක කියලා. මේ ලයින් යන්නේ ඝණ කැලෑ මැද්දෙන්. ඒ නිසා කාටත් නොදැනෙන්න හොරෙන් හයිටෙන්ෂන් පවර් අරගන්න පුලුවන් කියලා මම හිතනවා.
අපි පුලුවන්තරම් ඉක්මණට මේ ඒරියා එකේ ඩ්‍රෝන් සර්වේ එකක් කරන්න ඕනෑ. දවල්ට නෝමල් ලයිට් එලියෙනුත්, රෑට ඉන්ෆ්‍රා-රෙඩ් බෑන්ඩ් එකෙනුත් ස්කෑන් කරන්න පුලුවන් නම් ඒ පැත්තේ මොනවා හරි අනවසර දෙයක් සිද්ධවෙනවානම් ඒක දැනගන්න පුලුවන් වෙයි.
“සොරි සන්දීප්, එච්චර ඉක්මණට ඩ්‍රෝන් සර්වේ එකක් කරන්න එයාෆෝස් එකෙන් ඩ්‍රෝන් ගන්න අමාරුයි. එහෙම කරන්න නම් ප්‍රසිඩන්ට්ගේ ඕඩර් එකක් ඕනෑ. එහෙම වුනොත් අනිවාර්යයෙන් ඒක දසුන් දැන ගන්නවා….” බ්‍රිගේඩියර් දසනායක සන්දීප්ට අසුබ ආරංචියක් දුන්නා.
"ම්ම්ම්………. කමක් නෑ...අපිට ලෑන්ඩ්සැට්, ඉන්මාර්සැට් වගේ චන්ද්‍රිකා ඡායාරූප සේවයකින් අලුත්ම ඡායාරුප ගන්න පුලුවන් ක්‍රමයක් තියෙනවද?"
"ඔව් ඔව්...අපිට ලෑන්ඩ්සැට්, ඉන්මාර්සැට් සර්විස් දෙකම එක්ක ඇග්‍රීමන්ට් තියෙනවා....." සයිබර් හා සංඥා බුද්ධි තොරතුරු විශේෂඥ කෝලිත පිලිතුරු දුන්නා.
"නියමයි......පහුගිය මාස 2ක ඔය ප්‍රදේශය ඡායාරූපගත වුනු ලෑන්ඩ්සැට්, ඉන්මාර්සැට් ඉමේජස් අරගෙන සන්සන්දනය කරහම මොනවාහරි වෙනසක් වෙලා තියෙනවද කියලා බලන්න පුලුවන්වෙයි...."
"එහෙනම් හරි, කෝලිත, ඔයාට පුලුවන්ද සන්දීප් එක්ක මේ වැඩේ පටන් ගන්න? ඩිජිටල් ඉමෙජ් ලැබ් එකේ නදුන්වයි, ඉමෙජ් ඇනලිසිස් ස්පෙෂලිස්ට් ට්‍රෙවෝන්වයි සම්බන්ධ කරගන්න....මට හෙට හවස මේ වෙලාවට ප්‍රෝග්‍රස් රිපෝට් එකක් ඕනෑ...."
හරි සර් කියමින් බ්‍රිගේඩියර් වරයාගේ අණ කෝළිත පිලිගත් අතර සියලුදෙන නැගී සිටියා. ජිත්ට හා කවීෂාට නවතින ලෙස සන් කල ඔහු අන් අය පිටව ගිය පසු කවීෂා ඇමතුවා.
“කවීෂා ඔයා දසුන් ගැන ඇහගහගෙන ඉන්න. මිනිහා මිනිස්ට්‍රියේ මොනවද කරන්නේ, කාවද හම්බුවෙන්නේ වගේ දේවල් ගැන සෙවිල්ලෙන් ඉන්න. හැබැයි හැමවේලාවෙම කළ්පණාවෙන්. අපි මේ පැටලෙන්නේ ලේසි පාසු මිනිස්සු එක්ක නෙමෙයි. මේ රටේ බලවත්ම මිනිස්සු එක්ක වගේම ලෝකෙ බලවත්ම රටක බුද්ධි අංශයක් එක්ක. මේක බොහොම සංවේදී මෙහෙයුමක්. ඔයා කිසිම වෙලාවක අනවශ්‍ය අවදානම් ගන්න යන්න එපා. හිතලූ වැඩ කරන්නත් එපා. කරන හැම දෙයක්ම, යන හැම තැනක් ගැනම ජිත්ව දැනුවත් කරලා කරන්න……”
“හරි සර්...අපිට දසුන්ව ඇතුලට ගන්න බැරිද?"
"නෑ නෑ....දැන්ම කල්වැඩියි........අපි දසුන්ව ගත්තොත්, මේකෙ පිටිපස්සෙ ඉඳන් දසුන්ව නටවන රූකඩ නටවන්නෝ වහංවෙනවා.......බලාගෙන ඉමු....."
CHAPTER 01101
එදිනම සවස 7.30ට පමණ. මේට්ලන්ඩ් පෙදෙසේ Sinhalese Sports Club (SSC) සංකීර්ණයේ ටැවනර්ස් බාර් අවන්හල.
ජිත් අවන්හලට ඇතුලුවී වටපිට බැලුවා. ඈතින් අසුන්ගෙන සිය දුරකථනයේ පණිවුඩ කියවන ශ්‍රී ලංකා රේගුවේ සුපිරින්ටෙන්ඩන්ට් ජයලත් තෙන්නකෝන්ව දැක ඔහු වෙත යන්නට වුනා. ජිත්ට වඩා වසර 15ක් පමණ වැඩිමල් ජයලත්, ජිත්ගේ පුංචි අම්මාගේ සැමියා වුනා. ජිත්ට වඩා වැඩිමල් වුවත් ඔහු ජිත්ව ඇසුරුකලේ ලඟම ඥාතියෙකුට වඩා හොඳම මිතුරෙකු ලෙසින්.
"හලෝ ජයලත් අන්ංකල්..."
"හලෝ ජිත්....කොහොමද? හුඟකාළෙකින් නේද?"
"ඔව් අංකල්....ඉතින් කොහොම මේ දවස්වල කස්ටම්ස් එක එහෙම?"
“කියල වැඩක් නෑ ජිත්...දන්නවනෙ ඉතින් අපිට නිවනක් නෑ කියලා. දැන්නම් එපා වෙලා….. රෑට නිදාගන්ඩත් නෑ, මොකෙක් හරි ලොක්කෙක් නැත්නම් ලොක්කෙක්ගෙ නෑයෙක් හරි දෙගොඩ හරියෙ කෝල් කරනවා අරක රිලීස් කරලා දෙන්ඩ මේකෙ ඩියුටි අඩු කරලා දෙන්ඩ කියලා. ෆෝන් ඕෆ් කරන්ඩත් බෑ අපිත් ඔයාලා වගේම හැම වෙලාවෙම ඔන් කෝල්නෙ……මොනවා හරි බොමුද?”
“ටොනික් වෝටර් හරි ජින්ජර් ඒල් හරි බොන්නම්........ඔන් ඩියුටි තාම..." ජිත් සිනාසුනා.
“මේ දවස්වල 24X7 වගේ....? වේටර්!..........ටොනික් වෝටර් බෝතලයක් ගේන්න ලයිම් පෙතියි අයිසුයි දාපු වීදුරු දෙකක් එක්ක....!"
"හරි සර්...!" ඇණවුම පිලිගත් වේටර්වරයා කඩිනමින් බාර් එක වෙත යද්දී ජිත් කටහඬ අවදිකලා.
"ඔව් අංකල්, Y12 ක්‍රෑෂ් එක මාර මෙස් එකක්....ඒ නිසා වැඩ ඉවරයක් නෑ.....ඉවරවෙන පාටකුත් නෑ..."
"මං දන්නවා ඔයාට ඒක ගැන විස්තර කියන්න බැරි බව, ඔන් ඩියුටි නිසා මම වැඩිවෙලා ඔයාව තියාගන්නේ නෑ.....මේ ඩොකියුමන්ට්ස් බලන්න.....ඔයා දීපු තොරතුරු අනුව මම අපේ ඉන්ෆෝමේෂන් සිස්ටම් එක චෙක් කරද්දී මේවා එලියට ආවා....."
“මේවා අපේ “Compliance and Facilitation Directorate” එකේ ටැග් වෙච්ච කස්ටම්ස් ක්ලියරන්ස් ෆෝම් වගයක්. මේවා කන්ටේනර් 6ක ඒවා. සිනෝ-ටැප්‍රෝබේන් ට්‍රේඩින් කියලා කොම්පැණියකින් ගෙන්නපුවා.”
“මම කොම්පැණි රෙජිස්ට්‍රාර් ඔෆිස් එකේ ඉන්න යාලුවෙකුට කියලා තොරතුරු හොයාගත්තා. අපි නිතරම එයාලගෙන් සැක කටයුතු කොම්පැණිවල තොරතුරු ඉල්ලනවා. කොම්පැණි රෙජිස්ට්‍රාර් ඔෆිස් එකේ සටහන් වලට අනුව මේ සිනෝ-ටැප්‍රෝබේන් ට්‍රේඩින් කොම්පැණිය අයිතිවෙන්නේ සීලාන් ඉම්පෝට් ඇන්ඩ් එක්ස්පෝට් කියන කොම්පැණියට. සීලන් ඉම්පෝට් ඇන්ඩ් එක්ස්පෝට් කොම්පැණිය අයිති කාටද කියලා හොයනකොට ඒක අයිති සෙරෙන්ඩිබ් ස්පිරිට්ස් පී.එල්.සී කියන කොම්පැණියට. ඔයා දන්නවද සෙරෙන්ඩිබ් ස්පිරිට්ස් කොම්පැණියේ අයිතිකාරයා කවුද කියලා?" ජයලත්, ජිත් දෙස බලමින් ඇසුවා.
"ඔව්....අනුරුද්ධ වීරකෝන්.....ඔව් ලංකාවේ ප්‍රසිද්ධම අරක්කු කොම්පැණියේ විශාලම කොටස් හිමියා…එයාගේ පුතා වෙන්නේ ඩිෆෙන්ස් මිනිස්ට්‍රියේ දසුන් වීරකෝන්…..මේ කන්ටේනර් වල මොනවද තිබිලා තියෙන්නේ?" ජිත් ෆෝම් කොල පරික්ෂාකරමින් ඇසුවා.
“ඇරලා බලලා තියෙන්නේ එකයි. එකෙ බොහොම හයිටෙක් කොම්පියුටර් තිබිලා තියෙනවා. අනෙක් කන්ටේනර් පහෙත් ඒවාමයි තියෙන්නේ කියලා ඩික්ලයා කරලා තියෙනවා..එයාලගෙ ඩොකියුමන්ට් වල තියෙන විධියට ලොකු ඩේටා සෙන්ටර් එකකුයි, ක්ලවුඩ් සර්වර් සෙන්ටර් එකකුයි හදන්න ඕනෙ බඩු තමයි ගෙන්නලා තියෙන්නේ...."
"අඩි හතලිහෙ කන්ටේනර් හයකම කොම්පියුටර් ?"
"එහෙම තමයි කියලා තියෙනේ...කොහොමටත් අපේ කොම්ප්ලයන්ස් යුනිට් එකෙන් මේ ඩොකියුමන්ට්ස් වල විස්තර සැක සහිතයි කියල ටැග් කරලා වැඩිදුර හොයන්න කියල සෙන්ට්‍රල් ඉන්ටෙලිජන්ස් ඩිරෙක්ටොරේට් එකට යවලා තියනවා….අරක්කු කොම්පැණියකට අයිති පොඩි කොම්පැණියක් මෙච්චර විශාල කොම්පියුටර් තොගයක් ගෙනවන එක අස්වාභාවිකයි කියන තර්කය අනුවයි කොම්ප්ලයන්ස් එකෙන් සෙන්ට්‍රල් ඉන්ටෙලිජන්ස් එකට යවලා තියෙන්නේ.....ඒත් සෙන්ට්‍රල් ඉන්ටෙලිජන්ස් එකෙන් ලොකු ඇක්ෂන් එකක් අරගෙන නෑ......තවම පෙන්ඩින් ඉන්වෙස්ටිගේෂන් කියලා මාර්ක් කරලා තියෙනවා....ඒ මිනිස්සුන්ට කරගන්න බැරි තරම් වැඩ....ඒක වෙන්න ඇති තාම ඇක්ෂන් අරගෙන නැත්තේ..."
“කොහොම වුනත් සෙන්ට්‍රල් බෑංක් එකේ ඉන්න මගේ හොඳම යාලුවෝ හරහා මේ ගණුදෙනුවේ LC (letter of credit) එකේ ෆොරින් එක්ස්චේන්ජ් හුවමාරු වුනේ කොහොමද කියලා හොයලා බැලුවා. සෙන්ට්‍රල් බෑංක් එකේ, එක්ස්චේන්ජ් කොන්ට්‍රෝල් ඩිපාර්ට්මන්ට් එකේ මගේ යාලුවෙකුගෙන් දැන ගත්ත විධියට LC එකට ඩොලර් ඇවිල්ලා තියෙන්නේ බෑංක් ඔෆ් ඩයිලාන් කියන චීන බැංකුවෙන්. එයාලා සිනෝ ටැප්‍රෝබේන් කොම්පැණියට මේ LC එකට ඕනෑ ඩොලර් එවලා තියෙනවා....සෙන්ට්‍රල් බෑංක් එකට ඇවිල්ලා තියෙන තොරතුරු අනුව මේ සල්ලි එවපු බෑංක් ඔෆ් ඩයිලාන් එකවුන්ට එක සෙන්ටාරිස් කියලා කොම්පැණියට අයිති එකක්...ලංකාවට සල්ලි එවනකොට මොකටද එවන්නේ කියලා විස්තරයක් කරන්න ඕනෑ....සෙන්ටාරිස් එකෙන් දීලා තියෙන විස්තරේ අනුව එයාලා වෙනුවෙන් ඩේටා සෙන්ටර් එකකුයි, ක්ලවුඩ් සර්වර් සෙන්ටර් එකකුයි හදන්න ඕනෑ බඩු ගෙන්වන්න සිනෝ ටැප්‍රෝබේන් කොම්පැණියට මේ සල්ලි එවනවා කියල තියෙනවා..."
“ අපේ සිස්ටම් එකේ පෙන්නන විධියට සිනෝ ටැප්‍රෝබේන් කොම්පැණියටවත්, සීලන් ඉම්පෝට්ස් එක්ස්පෝට්ස් කොම්පැණියවත් මේ ගණුදෙනුවට කලින් හරි ඊට පස්සේ හරි කිසිම ආනයන, අපනයන ගණුදෙනුවක් කරලා නෑ. හැබැයි මේ දෙකේම අවසන් අයිතිකාරය වෙන සෙරෙන්ඩිබ් ස්පිරිට්ස් කොම්පැණිය නම් අරක්කු බිස්නස් එකට ඕනෑ උපකරණ, එතනෝල් හා වෙනත් රසායණික ද්‍රව්‍ය නම් නිතරම ඉම්පෝට් කරනවා…..”
"ඒ කියන්නේ මේ කොම්පැණි දෙක එකම එක ගණුදෙනුවක් කරන්න හදාගත්ත බොරු කොම්පැණි...?"
"මට හිතෙන්නේ එහෙමයි......සෙන්ටාරිස් ගැන ඔයාලා මොනවා හරි දන්නවද?"
“අපේ ඉන්වෙස්ටිගේෂන් වලදි සෙන්ටාරිස් ගැන තොරතුරු ටිකක් හෙලිවෙලා තියෙනවා. ඒක චීන කෝටිපතියෙකුට අයිති හයිටෙක් කොම්පැණියක්. එයාලා මැෂින් ලර්නින්, ආර්ටිෆිෂන් ඉන්ටෙලිජන්ස්, එක්ස්පර්ට් සිස්ටම්ස්, නියුරල් නෙට්වර්ක්ස්, ඩේටා මයිනින් වගේ තොරතුරු තාක්ෂණයේ ඉහලම පැතිවල රීසර්ච් කරන කොම්පැණියක්..."
“හ්ම්ම්...එතකොට ගැටලුව වෙන්නේ ඒවගේ හයිටෙක් එකපර්ටීස් තියෙන කොම්පැණියක් ලංකාවේ අරක්කු කොම්පැණියකට අයිති කවුරුත් නොදන්න කොම්පැණියකට ලොකු ඩේටා සෙන්ටර් එකක් හදන්න බඩු එව්වේ ඇයි කියන එක......මම තව හොයලා බලන්නද?"
"එපා එපා ජයලත් අංකල්.....මේ වැඩේ අණතුරුදායකයි. අංකල් මේ ගැන වෙන කාටහරි කියලා තියෙනවද?"
"නෑ නෑ...ඔයාගෙ ඉල්ලීමට හොයපු නිසා මම වටින් ගොඩින් හෙව්වා මිසක් ඔෆීෂියල් විධියට සටහන් වෙන කිසිම විධයකින් තොරතුරු ගත්තේ නෑ..."
"ඒක හොඳයි........දැන් මේක ගැන හොයන එක නවත්වන්න......මේක පිටිපස්සෙ ඉන්නේ මේ රටේ ලොකුම දළකාරයෝ....අපි පරිස්සම් වෙමු...."
"හොඳයි ජිත්, ඔයා මේවා ගැන මට වඩා දන්නවනේ......"
"මම යන්නද අංකල් එහෙනම්....?" ජයලත් තෙන්නකෝන් ලබාදුන් කඩදාසි කිහිපය පරිස්සමින් නවා උඩ සාක්කුවේ දාගන්නා ගමන් ජිත් ඇසුවා.
තව පැය කාළකින් විතර තමරා එයි......එයාගෙ එරෝබික්ස් ක්ලාස් එක දැන් ඉවරවෙන්න ලඟයි...."
"අද බෑ අංකල්.....මේ ලැබුණු තොරතුරු බොහොම වටිනවා...අදම මේ ගැන හොයන්න ඕනෑ......තමරා පුංචිවයි.....ලසිනි දුවවයි බලන්න මම ලඟදිම එන්නම්කෝ...."
"හොඳයි ජිත්, ලසිනිගෙ 16වැනි උපන්දිනේ ලබන මාසෙ.....තමරා පොඩි ගෙට්ටුගෙදර් එකක් ලෑස්ති කරනවා.....අනිව එන්න...."
"ෂුවර් අංකල්......ලසිනි දැන් ලොකු කෙල්ලෙක් එහෙනම්........මම ගිහින් එන්නම්....පුංචිව මතක් කලා කියන්න....."
සිය මාමා වූ ජ්‍යේෂ්ඨ රේගු නිළධාරියාගෙන් සමුගත් ජිත් අඩියට දෙකට වාහනයට ගොස් ජංගම දුරකථනයෙන් අංකයක් ඇමතුවා.
“කෝප්‍රල් පීරිස්....මේ වෙලාවෙ කොහෙද ඉන්නේ....?"
"සර් මම ගෙදර යන ගමන්........හදිස්සියක් නම් ආපහු එන්නම්.....බයික් එකේ හින්දා ඉක්මණට එන්න පුලුවන්...සර් කොහෙද ඉන්නේ?"
"නෑ නෑ එපා....මම දැන් ඇඩ්‍රස් එකක් ටෙක්ස්ට් කරනවා....ඒක බලලා මතක තියාගෙන මැසේජ් එක මකලා දාන්න....හෙට උදේම ලෑන්ඩ් රෙජිස්ට්‍රියට ගිහිල්ලා ඔය ඇඩ්‍රස් එකේ තියෙන දේපොලවල තෝම්බු හොයලා ඔක්කොම විස්තර අරගෙන එන්න.....උදෙන්ම ඕනෑ...හැබැයි ඔෆීෂියල් විධියට ඉල්ලන්න එපා.......කැචර් කෙනෙකුට කීයක් හරි දීලා පස්ස දොරෙන් ඉක්මණට වැඩේ කරගෙන දහයට ඉස්සෙල්ලා ඔෆිස් එකට එන්න...හරිද?"
"හරි සර්....ගුඩ් නයිට් සර්...."
CHAPTER 01110
පසුදින රාත්‍රී 10.10, 5වැනි පටුමග, කාක දූපත, කොළඹ 15
සන්දීප් හා ජිත් එහි ලඟාවෙන විට අෂාන්ගේ නඩය එහි පැමිණ සිටියා. කාක දූපතේ, නාරා ආයතනය පෙනෙන මානයේ අඩි 12ක් පමණ උස තාප්පයකින් වටවූ සුවිසල් මන්දිරයක් අසල හමුදා ට්‍රක් රථයක් නවතා තිබූ අතර එහි බොනට්ටුව විවරවී තිබුණා. කොළ ටී ෂර්ට් වලින් හා කාකි කොටකලිසම් වලින් සැරසී සිටි කිහිපදෙනුකු ට්‍රක් රථයේ යම් අලුත් වැඩියාවක් කරනු පෙනෙන්නට තිබුණා. ඒ අසල යුධ හමුදා ඉන්ජිනේරු බළකායේ ආපදා රථයක්ද නවතා තිබුණා. ජිත් ඒ පිරිස අතර සිටි අෂාන් හා ඔහුගේ සගයන් කිහිප දෙනෙකු හඳුනාගත්තා.
"අපේ කොල්ලො ටිකක්..." පිරිස පෙන්වමින් සන්දීප්ට පැවසූ ජිත්, ඔහුගේ පික් අප් රථය මාර්ගය අසලට පැමිණ සිටි අෂාන් අසල නතර කලා.
"කොහොමද තත්වෙ?" වීදුරුව පහලට දැමූ ජිත් විමසා සිටියා.
"කිසි හැල හොල්මනක් නෑ...අපි හවස ඉඳන් මෙතන....."
"මේක අයිති සිනෝ ටැප්‍රෝබේන් කොම්පැණියටද?" සන්දීප් විමසා සිටියා.
"ඔව්.... ලෑන්ඩ් රෙජිස්ට්‍රියේ තොරතුරුයි, නගර සභා රෙකෝඩ්ස් වලටයි අනුව 2015දී එන්ගලන්තෙ ඉන්න දෙමළ මනුස්සයෙක් එයාගෙ පරණ ගේත් එක්ක මේ ඉඩම ටැප්‍රොබේන් කොම්පැණියට විකුණලා තියෙනවා...මේ ගේ හදලා තියෙන්නේ ඊට පස්සේ.." ජිත් විස්තර කලා.
"තට්ටු තුනක මහ විසාල ගෙයක්නෙ මේක…”
“ඉඩම ඇතුලෙ CEB එකේ ට්‍රාන්ස්ෆෝමර් එකකුත් තියෙනවා....අපි පොඩි කැමරා ඩ්‍රෝන් එකක් හෙමීට වත්ත උඩින් යවලා බැලුවා...කවුරුවත් නෑ......මාස හයකින් විතර මේන් ගේට් එක ඇරලාවත් නෑ... හැබැයි සයිඩ් එකේ පොඩි ගේට්ටුවක් නම් නිතරම ඇරලා තියෙනවා.....ඩ්‍රෝන් විඩීයෝ එකේ විධියට කිලෝවොට් 25ක ලොකු ස්ටෑන්ඩ් බයි ජෙනරේටර් එකකුත් පේන්න තියෙනවා. පේන විධියට මුලුගේම ඒ.සී කරලා තියෙන්නේ. ලොකු චිලර් ප්ලාන්ට් එකක් දුවනවා. වත්ත ඇතුලේ සෙලියුලර් ටවර් එකේ වයර් යන්නේ ගේ ඇතුලට...“
“අපි තව ටීම් එකක් අද උදේ මේ පැත්තේ ආර්ථික සංවර්ධන අමාත්‍යාංශයේ සංගණනයක් කරන විධියට වටේ ගෙවල් වලට ගිහිල්ල මිනිස්සුන්ගෙන් තොරතුරු එකතුකරන අතරේ මේ ගේ ගැනත් අහලා තියෙනවා. රෑට ඉබේට වත්තෙ ලයිට් වැටෙනවලු, සතියකට සැරයක් වෑන් එකකින් චීන්නු වගයක් එනවලු. හදන කාලේ කන්ටේනර් දෙක තුනකින් බඩු ගෙනාවා මතකයිලු. ගොඩක් වැඩ කරලා තියෙන්නේ චීන්නු. ගේ අයිති චීන කොම්පැණියකට කියලයි මිනිස්සු කියන්නේ...."
"මේ සෙලියුලර් ටවර් එක අයිති කොයි ටෙලිෆෝන් කොම්පැණියටද කියලා බැලුවද?"
"ඔව් කැප්ටන්, අපේ හොයලා බැලුවා....ඒක ලංකාවෙ කිසිම ටෙලිකොම් කොම්පැණියකට අයිති නෑ. හැබැයි ඩයලොග් කොම්පැණියෙන් කිව්වා ඒගොල්ලන්ගේ බ්‍රෝඩ් බෑන්ඩ් ඩේටා නෙට්වර්ක් එකෙන් මේ ටවර් එකට වන් ගිගාබිට් ඩේටා ලින්ක් එකක් තියෙනවලු..." අෂාන් පිලිතුරු දුන්නා.
“බලමු...." කියමින් වාහනයෙන් බැසගත් ජිත් ඒ වනවිටත් හමුදා ට්‍රක් රථයට මුවා වී සෙලියුලර් ටවර් එක නිරික්ෂණය කරමින් සිටි සන්දීප්ට එකතුවුනා. අෂාන්ද ඔවුන් අසලට පැමිණියා.
"මේ ටවර් එකෙන් කෙලින්ම උතුරු පැත්තට ලොකු ඩේටා ලින්ක් එකක් යවනවා වගෙයි පෙන්නේ...." ටවරය නිරීක්ෂණය කරමින් සිටි සන්දීප් පැවසූවා.
"වහලෙ උඩ ලොකු සැටලයිට් ඩිෂ් එකක් තියෙනවා....අඩි 10ක් විතර පලල ලොකු එකක්......මේ තියෙන්නේ...." අෂාන් ඔහු අත තිබූ ටැබ්ලට් පරිගණකයෙන්, ඩ්‍රෝන් යානයෙන් ලබාගත් වීඩියෝව පෙන්වූවා.
"මම ඩේටා කොමියුණිකේෂන් ෆීල්ඩ් එක ගැන වැඩිය දන්නේ නෑ...ඒත් පේන විධියට මේ ඩිෂ් එක සැටලයිට් ඩේටා ඩවුන්-ලින්ක් එකක්.....අප්-ලින්ක් එක ඩයලොග් එකෙන් අරගෙන ඇති....මට හිතෙන විධියට සෙන්ටාරිස් ලගෙ සර්වර් ෆාම් එක තියෙන්නේ මෙතන. සර්වර් ෆාම් එකකට ඕනෙ කරන්ට්, ඒසී, ස්ටෑන්ඩ් බයි පවර් ජෙනරේටර්, ඩේටා ලින්ක් වගේ ඔක්කොම පහසුකම් පෙන්න තියෙනවා..."
“ජෙනරේටර් එක ලඟ තියෙන මේ සුදුපාට ලොකු පෙට්ටි දෙකක් වගේ පෙන්නේ මොනවද?" ජිත් විමසුවා. එම දසුන් දෙස විමසුම් ඇසින් බැලූ සන්දිප්;
"බැක්-අප් බැටරි යුනිට් දෙකක්.....කරන්ට් ගිය වෙලාවක ජෙනිය ස්ටාර්ට් වුනේ නැතිනම්, මේකෙන් කරන්ට් එක දෙනවා...පේන විධියට පැය දොලහක් විතර බැකප් පවර් දෙන්න පුලුවන් ලොකු යුනිට් දෙකක්…….තව ටිකක් රෑවෙලා ඇතුලට රිංගලා බලමුද ජිත්?" සන්දීප් යෝජනා කලා. ජිත් අෂාන්ගේ මුහුණ බැලුවා.
"අපි රෙඩී....." අෂාන් මදහස පාමින් පැවසුවා.
“CCTV කැමරා කීයක් විතර තියෙනවද?" ජිත් අෂාන් දෙස බලමින් ඇසුවා.
"අපි හයක් ගැන්නා....තව ඇති........ඒ වගේම මෝෂන් ඩිටෙක්ටර් එලාම් සිස්ටම් එකකුත් ඇති.........තව මොන මොනවා තියෙනවද දන්නේ නෑ....."
"කැමරා අවුල් කරන එකනම් අමාරු නෑ....මෝෂන් ඩිටෙක්ටර් තමයි වැඩේ....." ජිත් පැවසූවා.
"කරන්න දෙයක් නෑ සර්...රිස්ක් එකක් ගමු...."
“චීන්නු කොහෙ හරි ඉඳන් ඉන්ටර්නෙට් ඩේටා ලින්ක් එකක් හරහා මෙතන 24X7 මොනිටර් කරනවා ඇති...දැනටමත් උන් අපිව නෝට් කරලාද දන්නේ නෑ....."
"විනාඩි 30කට විතර ඩේටා ලින්ක් එක කපා ගන්න පුලුවන් නම් උන්ට මොනිටර් කරන්න බැරි වෙනවා....ඒත් ඒක කරන්න පුලුවන්ද මන්දා..." සන්දීප් අදහසක් දුන්නා.
"පුලුවන්....මම බ්‍රිගේඩියර්ට කතාකරලා ඩයලොග් නෙට්වර්ක් ඔපරේෂන් සෙන්ටර් එකෙන් වැඩේ කරව ගන්නම්...." ජිත් විශ්වාසයෙන් පැවසුවා.
"මේ පැත්තේ ඩයලොග් ටවර් එකේ ඩේටා සර්විස් එකත් නවත්තගන්න ඕනෑ......කවුද දන්නේ සෙකියුරිටි සිස්ටම් එකට බැකප් ඩේටා ලින්ක් එකක් වෙනම අරගෙනද කියලා......" සන්දීප් තව තොරතුරක් දුන්නා.
"රෑ දොලහෙන් පස්සේ ඩයලොග්, මොබිටෙල්, එස්.එල්.ටී, ලංකා බෙල්...ඔය ඔක්කොම කපමු, පැය බාගයයිනෙ....අවුලක් වෙන එකක් නෑ......මීට කලින් ඔපරේෂන් වලදිත් අපි එහෙම කරලා තියෙනවා..." ජිත් සිය ජංගම දුරකථනය රැගෙන වාහනය වෙත යමින් පවසා සිටියා.
CHAPTER 01111
Y12 අණතුරෙන් සති දෙකකට පසු; මධ්‍යම රාත්‍රී 12.25, ආරක්ෂක අමාත්‍යාංශ නිවාස සංකීර්ණය, ස්කෙල්ටන් පාර, කොළඹ 05
කෙලවරක් නැතිව නාදවෙන දුරකථනය නිසල රාත්‍රියේ මහ හඬක් නැගුවත් පෙරදා රාත්‍රී නිදිවර්ජිත මෙහෙයුමෙන් පසු, පසුදින දවසම රාජකාරි කටයුතුවල නිරතවන්න වූ නිසා දැඩි ලෙස වෙහෙසට පත්ව සිටි ජිත් අවදිවන්නට මදක් ප්‍රමාද වුනා.
"හලෝ??"
"හලෝ ජිත්....මේ අමිත් බණ්ඩාර....මට ඔයාගෙ කමාන්ඩිං ඔෆිසර් ෆොටෝ එකක් වට්ස්-ඇප් කරන්න කිව්වා. ටිකක් ලොකුයි...ටැබ්ලට් එකෙන් බලනවද? හදිසියි කියලා කිව්වා...."
"ඇත්තද පොඩ්ඩක් හිටපන් මචන්....චාර්ජ් එකට දාලා තියෙන්නේ...."
ජිත්ගේ පාසැල් සමයේ මිතුරෙකු වූ අමිත් වෘත්තියෙන් ඡායාරූප ශිල්පියෙකු වූ අතර වනජීවී ඡායාරූපකරණයෙන් නමක් දිනාගෙන සිටියා. National Geographic, Bird Life International, World Wildlife Fund වැනි ලෝකප්‍රකට වනජීවී ආයතන වෙනුවෙන් විවිධ ව්‍යාපෘති වලට සහභාගී වන අමිත් වනජීවී ඡායාරූපකරණය සඳහාම ලංකාවට එන විදෙස් සංචාරකයින් හට මග පෙන්වන්නෙක් ලෙසද ක්‍රියාකලා. අමිත්ගේ තාත්තා මෙන්ම මාමාත් හමුදා නිළධාරීන් වුනා. ඒ නිසා ආරක්ෂක අමාත්‍යාංශයේ විශ්වාසවන්ත ඡායාරූප ශිල්පියෙකු ලෙසත් ඔහු විවිධ අවස්ථා සඳහා සහභාගීකරවා ගත්තා.
"රෑ දහයමාරට විතර මට බ්‍රිගේඩියර්ගෙන් කෝල් එකක් ආවා..ඇහුවා කොහෙද ඉන්නේ කියලා. මම හිටියේ යාල කිට්ටුව එලිෆන්ට් රීච් හෝටලේ....මගෙන් ඇහුවා ටෙලිෆොටෝ ලෙන්ස් එකක් අරගෙන ඉක්මණට මත්තල එයාපෝට් එක ලඟට යන්න පුලුවන්ද කියලා.......මත්තලට රෑ එකොලහමාරට ප්‍රයිවෙට් ජෙට් එකක් ලෑන්ඩ් කරනවා. ඈතක ඉඳන් ඒ ජෙට් එකෙන් එන්නේ කවුද, මෙහෙන් ඒ අයව හම්බුවෙන්න යන්නේ කවුද කියලා ෆෝටෝ, වීඩියෝ ගන්න පුලුවන්ද ඇහුවා....ගත්ත ෆෝටෝ මම එයාට යැවුවා...මේක ඔයාට යවන්න කියලා කිව්වා..."
"හොඳටම එලිය අඩුයි.......මම හිතන්නේ උවමනාවෙන්ම ඒ පැත්තේ ලයිට් ඕෆ් කරලයි තිබුණේ.....මම Infra-red මෝඩ් එකෙන් ගත්ත ෆොටෝ එකක් ඔය. තව ෆොටෝ තියෙනවා. ඒවා ඔක්කොම ෆෝටෝ ලැබ් එකට යවන්න කිව්වා...."
CHAPTER 10000
නොවැම්බර් 20, රාත්‍රී 7.45ට පමණ, වෝටර්ස් එජ් හෝටලයට නුදුරු දියත උයන රථගාල, බත්තරමුල්ල
"කවී ලෑස්තිද?"
"ඔව්.... හොඳයිද?..." ඇය දෑස් විසල් කරමින් ජිත් දෙස බැලුවා. තද නිල් පැහැති කොක්ටේල් ඩ්‍රෙස් මාදිලියේ ගවුමක් හැඳ අඩි උස සපත්තු පැළඳ සිටි ඇය සැබැවින්ම ආකර්ෂණීය වූවා.
"ගොඩක් ලස්සනයි..... " ජිත් කියද්දී ඇය සෙමෙන් වටයක් කැරකුනා.
"කවී මිස්!..... මෙන්න ear piece එක..." කවීෂාගේ රූ සිරියාවෙන් මන්මත්ව මොහොතකට සියල්ල අමතකව සිටි ජිත් යලි පියවි ලොවට ආවා. ක්‍රියාන්විතයේ තාක්ෂණික මෙහෙයුම භාරව සිටි ඉලෙක්ට්‍රොණික ඉන්ජිනේරු ලුතිනන් දුමිඳු ඩයස් කවිෂා පැළඳිය යුතු සන්නිවේදන කට්ටලය දිගු කලා.
"ඉයර් පීස් එක කනේ ඇතුලටම තදකරන්න. එතකොට වැටෙන්නේ නෑ..... ටිකක් වෙලා යනකන් නුහුරු බවක් දැනෙයි, ඇහෙන දේවල් පැහැදිලි නෑ වගේ තේරෙයි, ඒත් ටිකකින් කන පුරුදුවෙලා හරි යනවා. අපි රේඩියෝ සෙට් වලින් කියන දේවල් ඔක්කොම ඔයාටත් ඇහෙනවා. ඔයාට උපදෙසක් දෙනවානම්, ඔයාගේ නම කියලා තමයි පටන් ගන්නේ....අපිට කතාකරන්න ඕනෙ වෙන වෙලාවට මේ ෆෝන් එක කනේ තියාගෙන කෝල් එකක් ගන්නවා වගේ කතා කරන්න. මේක නෝමල් ෆෝන් එකක් නෙමෙයි..හැමවෙලාවෙම ඇක්ටිව් මයික්‍රෝෆෝන් එකක් තියෙනවා. ඊට අමතරව ජී.පී.එස් ට්‍රැකින් ඩිවයිස් එකක් වගේම ඉන්ඩෝ ලොකේටර් ට්‍රන්ස්මීටර් එකකුත් තියෙනවා... ජී.පී.එස් සිග්නල් නැතිවෙලාවට ඔයා ඉන්න තැන අපිට දැන ගන්න පුලුවන්..... ඔයාගෙ වටේ සිද්දවෙන හැම කතාබහක්ම අපිට අහන්න පුලුවන්...."
“හරිනේද මිස්....?" ලුතිනන් ඩයස් ඇසුවා.
කවීෂා අසලින්ම සිටි ජිත්ට ඇය චකිතයකින් සිටින බව දැනුනා. "බය වෙන්න එපා කවී.... ඔයා ඇතුලේ තනි වෙන්නේ නෑ..... අෂාන් හැමවෙලාවෙම ඔයාව පෙනෙන මානේ, ඉක්මණට ඔයා ලඟට එන්න පුලුවන් දුරින් ඉඳියි.... අෂාන්ගේ යාලුවෙක් විධියට විදූෂත් ඉන්නවා.... දෙන්නම ස්පෙෂල් ෆෝසස්....එයාලට හැඬල් කරගන්න බැරි දෙයක් නෑ..."
"එයාලා ළඟ වෙපන්ස් තියෙනවද?"
"නෑ....... අපේ ප්‍රෝටොකෝල් වලට අනුව සිවිලියන්ලා ගොඩක් ඉන්න තැන්වල රහස් ක්‍රියාන්විත වලදි වෙපන්ස් ගෙනියන්න බෑ...බය වෙන්න එපා.....අෂානුයි, විදූෂයි ඇවිදින වෙපන්ස් දෙකක්..."
"ඔයා කොහෙද ඉන්නේ?"
"මම ඉන්නේ Water’s Edge කාර් පාක් එකේ...අපේ mobile operations ට්‍රක් එකේ ඉඳන් මම හැමදේම අහගෙන ඉන්නේ…”
“You are OK…………… right?” ජිත් ඇයගේ මුහුණට එබෙමින් ඇසුවා.
“Okey...I guess…." ඇය මදක් අවිශ්වාසයෙන් මෙන් පිලිතුරු දුන්නා...
“කරදර වෙන්න එපා....ඔයාට පෙර-ක්‍රියාන්විත ආතතිය ඇවිල්ලා....ඕක නෝමල්...... මිෂන් එක පටන්ගත්තම හරියනවා....” කියූ ජිත් ඇයගේ උරහිසට තට්ටුවක් දැම්මා.
ඒ සමගම ඇය අසලට ආවේ මැදිවියට ආසන්නවූ කාන්තාවක්. "කවී මේ ඩොක්ටර් අනුලා....ඩොක්ටර් අනුලා ටොක්සිකෝලොජිස්ට් කෙනෙක් ….." ජිත් ඇයව කවීෂාට හඳුන්වාදුන්නා. ඇය කුඩා මෝර ගුලියක් මෙන් පෙනුනු යමක් ඇය අතට දුන්නා.
"ඔයා දසුන් එක්ක කතාකර කර ඩ්‍රින්ක් එක ගන්න.....වෙලාවට අෂාන් ඇවිල්ලා දසුන්ට ඩිස්ටර්බ් කරලා....හලෝ දසුන් කියලා එයාව ඉන්ට්‍රඩියුස් කර ගන්න හදයි ....අෂාන් දසුන්ට අත දෙන්න හදනකොට ඔයා දසුන්ගේ අතේ තියෙන ඩ්‍රින්ක් එක ඉල්ල ගන්න..ඒ අතරේ ඔයාගේ අතේ තියෙන ඩ්‍රින්ක් එක අෂාන් එක්ක එතනට ආපු විදූෂ ගනියි.....දසුන්ගේ අවධානය අෂාන්ට යොමුවෙලා තියන අතරේ ඔයා මේක එයාගෙ ඩ්‍රින්ක් එකට මිරිකන්න ඕනෑ....අතේ ගෑවුනාට බය වෙන්න එපා....ඔයාට තත්පර 30ක් ලැබෙයි....ඊට වඩා නෑ....දසුන්ගේ අතට එයාගෙ ඩ්‍රින්ක් එක ආපහු දෙන්න....... විනාඩි පහක් යනකොට එයාට ඉෆෙක්ට් එක දැනෙයි....ඔයාට තේරෙයි එයාගෙ ඇස් ලොකුවෙලා වපර වෙන්න යනවා කියලා....ඒත් එක්කම එයාට බැලන්ස් නැතුව යයි...එයාට කලන්තේ හැදිලා වැටෙන්න යනකොට ඔයා එයාව අල්ලගන්න....එතකොට අෂානුයි විදූෂයි ආපහු එතනට එයි. දසුන්ව අල්ලගෙන ඉන්දවන්න එයාලා උදව් කරයි..."
ජිත් මෙහෙයුමට පෙර සිදුකරණ පුහුණු සැසි කිහිපයකදීම ඉතා සියුම්ව විස්තර කොට, කවීෂාට ඒ සියල්ල මතකයෙන් කිවහැකි වන තෙක්ම යලි යලිත් වනපොත් කරවූ ක්‍රියාදාමය අවසන් වරට සිහිපත් කලා.
"ඊලඟට ඔයා හැමෝටම ඇහෙන්න ...I am going to call an ambulance... කියලා ෆෝන් එක අරගෙන කෝල් එකක් ගන්නවා වගේ පෙන්වන්න...කලබල වෙලා වගේ ඇක්ට් කරන්න...." ජිත් වැඩිදුර උපදෙස් දුන්නා.
"මොනවද මේකේ තියෙන්නේ?" කවී ඇසුවා
"අධි මාත්‍රාවෙන් phencyclidine...සාමාන්‍ය ව්‍යවහාරයේ PCP කියලයි කියන්නේ......ගොඩක් සැර මත්ද්‍රව්‍යයක්.....ක්ලාන්තවෙලා විනාඩි දෙකතුනකින් දසුන් මීමැස්මොරේ හැදුනා වගේ දතකට පූට්ටුවෙලා ගැහෙන්න ගනී...ඒ කියන්නේ ඔවර්-ඩෝස් තත්වයට ඇවිල්ලා….අපිටත් ඕනේ එයාව ඕවර්ඩෝස් කරවලා හෝටලෙන් එලියට ගන්න පොටක් පාදගන්න…..." ඩොක්ටර් අනුලා විස්තර කලා.
"ඒ වෙනකොට අපේ ඇම්බියලන්ස් එක ඇවිල්ලා තියෙයි..ඩොක්ටර් අනුලයි, එයාගෙ නර්ස් නෝනයි ඇම්බියුලන්ස් එකේ ඉන්නවා...දසුන්ට ඉක්මණට ප්‍රති-ඖෂධය දෙන්න ඕනෑ….. නැතිනම් හදවත නවතින්න පුලුවන්........ඔයා අෂාන්ලා එක්ක එකතුවෙලා දසුන්ව ඇම්බියුලන්ස් එකට උස්සගෙන යන්න…....ඒ දෙන්නා දසුන් එක්ක ඇම්බියුලන්ස් එකට නගියි....ඔයා නගින්න එපා....එලියේ ඉන්න.....ඒ වෙනකොට කාර් එක අරගෙන මම එතනට එන්නම්....ඔයා මාත් එක්ක එන්න....අපේ අනිත් කට්ටියත් එතකොටම පිටත් වෙනවා.....දසුන් වැටිලා විනාඩි දහයක් යනකොට හැමෝම වෝටර්ස් එජ් එකෙන් පිටවෙලා තියෙන්න ඕනෑ...." ජිත් අවධාරණය කලා…
"එතකොට CCTV?" කවී ඇසුවා.
“අෂාන් දසුන්ට කතාකරන්න යනකොට විදුෂ අපිට සිග්නල් එකක් දෙනවා. අපේ ටෙක්නිකල් ටීම් එකක් CCTV රූම් එකේ කොන්ට්‍රෝල් PC එකට වෛරස් එකක් දාලා තියෙන්නේ. ඒක අපේ කට්ටිය ඊයේ කලා. උසාවි නියෝගයකට සී.සී.ටී.වී රෙකෝඩ්ස් වගයක් ගන්න ඕනෑ කියලා උසාවි නියෝගයක් අරගෙන වෝටර්ස් එජ් ගිය ටීම් එක වෛරස් එක ඉන්ස්ටෝල් කරලා ආවා. විදූෂගේ සිග්නල් එක ආපු ගමන් අපිට ඒක රිමෝට් ඇක්ටිව් කරන්න පුලුවන්. වෛරස් එකෙන් CCTV වීඩියෝ රෙකොඩ් අවුල් කරලා දායි...ඒවගේම අපේ මොබයිල් ඔපෙරේෂන් ට්‍රක් එකේ මීටර් 150-200ක් වටේට මොබයිල් ෆෝන් OS අවුල් කරන්න පුලුවන් ට්‍රන්ස්මීටර් එකක් තියෙනවා. ඒ ට්‍රාන්ස්මීටර් එකෙන් රේන්ජ් එකේ තියෙන ඔනම ස්මාර්ට්ෆෝන් එකක බ්ලූටූත් පහසුකම හරහා ඒකෙ OS එක අවුල් කරන්න පුලුවන්. ඇන්ඩ්‍රොයිඩ්, ඇපල් ෆෝන් ජාති දෙකම එකසැරේට අවුල් කරන්න අපේ බ්ලූටූත් ට්‍රාන්ස්මීටර් එකට පුලුවන්. විදූෂගෙ සිග්නල් එක ආපු ගමන් අපි ඒකත් ඔන් කරනවා....මිෂන් එක ඇක්ටිව් වෙන විනාඩි 15 කාළයේ වෝටර්ස් එජ් එක ඇතුලේ CCTV නවතිනකොටම හැමෝගෙම ස්මාර්ට්ෆෝන් රීසෙට් වෙයි. එතකොට ෆොටෝ, වීඩියෝ ගන්න එක නවත්වගන්න පුලුවන්….”
“WOW!!!…..."ලංකාවේ ඉන්ටෙලිජන්ස් ඒජන්සිවලට ඔච්චර හයිටෙක් සෙල්ලම් දාන්න පුලුවන්ද?...." කවී සැබැවින්ම විෂ්මයට පත්වූ බවක් පෙනුනා.
ජිත් ආඩම්බර සිනහවක් පා..."You will see…” යයි පැවසූවා.
CHAPTER 10001
රක්ෂක නිවාසය, රක්ණා-ලංකා පයිනස් වතුයාය, ඔහිය
"කැමරාව ටිකක් හරවන්න..... මූණ පේන්නේ නෑ....."
"ආ දැන් හරි.....මිනිහට කොහොමද?"
"තාම අමාරුයි වගේ......"
"කෝ ඩොක්ටර් අනුලා?"
"මම ඉන්නවා....." කියමින් වෛද්‍ය අනුලා මාපිටිගම වීඩියෝ කැමරාවට හසුවන මානයට පැමිණියා.
"කොහොමද දසුන්ගෙ තත්වෙ?"
"දැන් හොඳයි බ්‍රිගේඩියර්.... හැබැයි හිතුවට වඩා ලොකු රියැක්ෂන් එකක් ආවා........මෙයාගෙ හදවත වයසට වඩා වීක්....පොඩිකාලේ රුමටික් උණ හැදිලා තියෙනවා වගේ....."
"අෂාන්, ප්‍රශ්ණකිරීම්වල තත්වෙ කොහොමද?"
"සර්...මිනිහට අපි මත්තලදි ගත්ත ෆොටෝ එක පෙන්නුවා........ඒකේ මිනිහා ඉන්න බව එයා පිලිගත්තා....අර ගෑණුකෙනා දසුන් එක්ක හැසිරුණ චීන ගෑණි, නම ඩේසී වූ.....ඩේසී වූ එයාගෙ අනියම් බිරිඳ කියලත් එයා පිලිගත්තා.... අනිත් මිනිහා ඩේසිගේ බොඩිගාඩ්ලු......ඩේසි MSS එකේ ඔත්තුකාරියක් කියලා දන්නේ සම්බන්දෙ දුරදිග ගියාට පස්සෙලු......දැන් එයාව බ්ලැක්මේල් කරන්න පුලුවන් ෆොටෝ වීඩියෝ ගොඩක් MSS එකට තියෙනවලු....."
"ලොකු බ්‍රීෆ් කේස් එකේ දාලා ඩේසී වූ දසුන්ට දීලා තියෙන්නේ සල්ලිද?"
"නෑ......දසුන් ඒකෙ මොනව තියෙනවද කියලා දන්නේ නෑ කිව්වා.......ඒක කාක දූපතේ ඩේටා සෙන්ටර් එකට අතින්ම ගිහිල්ලා බාර දෙන්න කිව්වලු...."
"මිනිහා ඒක දීලද?"
"එතනට ඇවිත් හිටිය චීනෙකුට දුන්නලු....."
වීඩියෝ කැමරාව දෙස බලාගෙන සිටි බ්‍රිගේඩියර් ජනක දසනායක හිස හරවා ජිත්ට කතාකරනු ඔහිය රක්ෂක නිවාසයේ සිට සකයිප් හරහා මූලස්ථානය අමතමින් සිටි අෂාන් දුටුවා.
"ජිත්, ටීම් එකක් යවන්න කාක දුපතේ ඩේටා සෙන්ටර් එක පැත්තට...ඒ පැත්තේ CCTV කැමරාවල පහුවුනු විසිහතර පැයේ රෙකෝඩින් වල බැකප් ගන්න.........බලමු දසුන් ඇත්තටම එතනට ගියාද.......පෙට්ටිය දීපු චීනා හඳුනගන්න පුලුවන් විධියට වැටිලා තියෙනවද කියලා..."
"හරි සර්...." ජිත් අණ පිලිගනිද්දී බ්‍රිගේඩියර්වරයා යලිත් කැමරාව වෙත යොමුවුනා.
“දසුන් දන්නවද Y12 එක බිමදාන්න හේතුව?"
"අපි ඇහුවා...මිනිහා කියන්නේ ඒක ටෙස්ට් ෆයරිං එකක් කියලා.....ඒවගේම ඩීට්‍රා එකේ AI රීසර්ච් නවත්වන්න මොකක් හරි උවමනාවක් එයාලට තිබිලා තියෙනවා කියලත් මිනිහා අනුමාන කරනවා......."
“MSS එකේ ඩේසි වූ, සෙන්ටාරිස් එකේ නිමා යැංග් අතර මොනවගේ සම්බන්ධයක්ද තියෙන්නේ? ඩේසි වූ වගේම නිමා යැංග් MSS එකට වැඩ කරනවද? නැතිනම් ඩේසි වූ MSS එකේ වැඩකරන ගමන් නිමා යැංග්ට පාර්ට්-ටයිම් උදව් කරනවද?"
“හරියට පැහැදිලි නෑ සර්....දසුන් කියන විධියට ඩේසී වූ MSS එකට වැඩකරනවා කිව්වට, MSS එක ඇතුලේ තියෙන වෙනම රහස් කණ්ඩායමක සාමාජිකාවක්. ඒ කණ්ඩායමට සල්ලි වියදම් කරන්නේ නිමා යැංග් කියලයි දසුන් කියන්නේ...."
"දසුන් අපිව නොමග යවනවා වෙන්න බැරිද?"
"වෙන්න බෑ සර්....හොඳටම වැටිලා ඉන්නේ....මිනිහා දන්නවානෙ Y12 ෆ්ලයිට් එක බිම දැම්මේ නිමා යැංග්/ඩේසි වූ නියෝජනය කරන කල්ලිය කියලා....එයාලාට MSS එක ඇතුලේ බලසම්පන්න නිළධාරීන්ගේ අනුග්‍රහය තියෙනවා වගේ පේනවලු....මට පේන විධියට දසුන් අපි මිනිහව කුදලගෙන ආපු එකට කැමැත්තෙන් ඉන්නේ.........මිනිහා කියනවා කොළඹට ගෙනියන්න එපා එයාගේ ජිවිතේ අණතුරේ කියලා....මිනිහා පුදුම බයකින් වගේ ඉන්නේ.....ඇහුවා මේ සේෆ් හවුස් එක වටේ ආයුධ සන්නද්ධ ගාඩ්ලා දාලා ඉන්නවද කියලා....මිනිහා කියනවා උන් තැන දැන ගත්තොත් මෙතනට වුනත් ඇටෑක් එකක් දෙන්න පුලුවන් කියලා..."
"පිස්සු.....ඔය මිනිහා අර PCP පෙත්ත නිසා මොළේ කොලොප්පන් වෙලා කියන ඒවා වෙන්න ඇති...ඒත් මිනිහගෙ ජීවිතේ අණතුරේ කියන එක ඇත්ත… ඔය කියන විධියට මේ ඔපරේෂන් එක කරන්නේ MSS එක ඇතුලේ නීතිවිරෝධී කල්ලියක් නම්, උන් පුලුවන් වෙන පලවෙනි වාරෙම දසුන්ව මරණවා...."
"ඔය සේෆ් හවුස් එක යට කොන්ක්‍රීට් බන්කර් එකක් තියෙනවා නේද?"
"ඔව් සර්...."
"දසුන්වයි, ඩොක්ටර් අනුලාවයි.....නර්ස්වයි හැම වෙලාවෙම බන්කර් එක ඇතුලේ තියන්න.....ඔයාලා හැම වෙලාවෙම වෙපන්ස් රෙඩී කරන්ගෙන ඉන්න....දිගටම ප්‍රශ්ණ කරන්න........ගන්න පුලුවන් හැම තොරතුරක්ම ගන්න........මිනිහා කියන දේවල් වීඩියෝ කරනවා නේද?"
"ඔව් සර් බන්කර් එක ඇතුලේ වීඩියෝ රෙකෝඩර් එක සෙට් කරලා තියෙන්නේ.... ප්‍රශ්ණ කරන්නේ එතන..."
“සප්ලයිස් කොහොමද?"
"සතියකට ඕනෑ කෑම, බොන වතුර තියෙනවා............ජෙනියට දාන්න ලීටර් 25 පෙට්‍රල් කෑන් දෙකක් ඉතුරුවෙලා තියෙනවා......ඒ නිසා ටවුමට යන්න ඕනෑ නෑ....."
CHAPTER 10010
ඉරණමඩු ජලාශයේ නිරිතදිග ඉවුර, මුලතිව් දිස්ත්‍රික්කය.
ජිත්, අෂාන්, විදූෂ හා සන්නද්ධ බුද්ධි අංශයට අනුයුක්ත දිගුදුර විහිදුම් විශේෂ බළකායේ (LLRP) බලකායේ ලුතිනන් රංග සේනානායක ඇතුලු සතරදෙනෙකුගෙන් යුතු නිරීක්ෂණ කණ්ඩායම ගුවන් ගතවී පැයක් පමණ වූවා. ඒ කාළය කතාබහෙන් තොරව ගතවූයේ කුඩා හෙලිකොප්ටරයේ එන්ජින් ඝෝෂාව නිසාම නොවේ. හිඟුරක්ගොඩ ගුවන්හමුදා කඳවුරෙන් ගුවන්ගතවූ බෙල් 206 යානය, ඉලක්ක ස්ථානයට කිලෝමීටරයක් පමණ ඈතින් ගොඩබස්වන ලෙසයි අණලැබී තිබුණේ. පැය ඉක්මයත්ම හිඟුරක්ගොඩ සිට නාවික සැතපුම් සියය ගෙවීගිය අතර යානය ඉරණමඩු ජලාශයට ආසන්න බව ගුවන් නියමුවන් දැනුම් දුන්නා.
ඉරණමඩු ජලාශය අසල ඉතා රහසින් පවත්වාගෙන ගිය අභිරහස් කඳවුර නිරීක්ෂණය කිරීමට යැවූ සන්නද්ධ බුද්ධි අංශයේ Tactical Action Group (TAG) කන්ඩායමෙන් පණිවුඩ හුවමාරු නැවතී දැන් පැය අටක් ගතවෙලා. පාන්දර තුනට පමණ ප්‍රහාරක කණ්ඩායම කඳවුර අසල වාඩිලාගත් බවට රේඩියෝ පණිවුඩ ලැබුණා. ඈතින් සිටිමින් පැය දෙකක් පමණ නිරීක්ෂණ හා ඡායාරූප ගැනීමේ කටයුතු වල නිරතවූ ඔවුන් කඳවුර අතහැර දැමූ එකක් ලෙස පෙනෙන බව පවසා, එයට ඇතුලුවන්නට සූදානම් වන බව පැවසූවේ පාන්දර පහටයි. ඒවන විටත් ප්‍රදේශයම ඝණ අඳුරින් වැසී තිබුණ බව කපිතාන් රණවක දැනුම් දී තිබුණා. සන්නද්ධ බුද්ධි අංශයේ TAG කණ්ඩායම් යුධ හමුදාවේ කොමාණ්ඩෝ, විශේෂ බළකා රෙජිමේන්තු වලින් මෙන්ම, හමුදා බුද්ධි අංශයේ කළු මෙහෙයුම් ඒකකය වන දිගුදුර විහිදුම් බළකායෙන් අනුයුක්ත කල, ඊලාම් යුධවල සටන් අත්දැකීම් ඇති දක්ෂයින් වුනා. මුලතිව් වනාන්තරයේ සිදුවූ මේ ක්‍රියාන්විතයට අවසන් ඊලාම් යුද්ධයේදී ඉරණමඩු ජලාශය අසල සිදුවූ බිහිසුණු සටන්වලට මුහුණදී අත්දැකීම් තිබූ කපිතාන් සඳුන් රණවකගේ නායකත්වයෙන් යුතු දිගුදුර විහිදුම් විශේෂ බළකායේ සෙබළුන් 12ක් යොදවා තිබුණා.
කඳවුරට ඇතුලුවී විනාඩි දහයක් යන්නට පෙර, තමන්ට තුවක්කු සවිකල පාද සතරක් ඇති යන්ත්‍ර මගින් පහරදෙන බව කපිතාන් රණවක කළබළයෙන් වාර්තාකලා. එම යන්ත්‍ර වියරු වැටුනු සුනඛයින් මෙන් ප්‍රතිප්‍රහාර නොතකා ඉදිරියටම එමින් මැෂින් තුවක්කු හා ග්‍රෙනේඩ් වලින් පහර එල්ලකරන බව ඔහු පැවසුවා. හතර අතින් වෙඩි හඬ ගිගුම් දෙන අයුරු රේඩියෝ පණිවුඩ හරහා ඇසුනු අතර මොහොතකින් සියලුම සෙබළුන්ගේ රේඩියෝ යන්ත්‍ර නිහඬවුනා. වැඩි වේලාවක් ගතවන්නට පෙර ඉරණමඩු ජලාශය අසල කැලයෙන් විශාල පිපිරුම් හඬවල් ඇසුනු බව වන්නි හමුදා අණදෙන මධ්‍යස්ථානය යුධහමුදා මූලස්ථානයට වාර්තා කලා. සිදුවන්නේ කුමක්දැයි සොයා බැලීම සඳහා හමුදා ඛණ්ඩයක් යවන්නට වන්නි අඥාපති යුධ හමුදා මූලස්ථානයෙන් කල ඉල්ලීම සන්නද්ධ බුද්ධි අංශයේ මැදිහත්වීම මත ප්‍රතික්ෂේප වුනා. TAG ප්‍රහාරක ඒකකය ඉරණමඩු ප්‍රදේශයට ඇතුලුවීමට දින කිහිපයකට පෙර මුලතිව් වනාන්තරයතුල පුහුණු ක්‍රියාන්විතයක් පැවැත්වීමට දිගුදුර විහිදුම් බළකාය අවසර ගෙන තිබුණා. පිපිරුම් ශබ්ද එම පුහුණු ක්‍රියාන්විතයේ අදියරක් බව පවසා සැබෑ තත්වය වසන් කරගැනීමට ක්ෂේස්ත්‍ර මෙහෙයුම් ප්‍රධානී බ්‍රිගේඩියර් ජනක දසනායකගේ බලවත් ඉල්ලීම මත සන්නද්ධ බුද්ධි බළකායේ බළකාධිපති මේජර් ජෙනරාල් සුසිල් ලියනගේ එකඟවුනා.
කපිතාන් ජිත් හා ලුතිනන් රංග අතර පියාසැරිය පෙර සිදුවූ සාකච්ඡාවට අනුව ඉලක්ක ස්ථානය වෙත ලඟාවී එහි ආරක්ෂාව තහවුරු කිරීම රංගගේ කණ්ඩායම විසින් සිදුකරන අතර ජිත්, අෂාන් හා විදූෂ එය අවසන්වන තෙක් හෙලිකොප්ටරය අසල සූදානමින් සිටිය යුතුවුනා.
චන්ද්‍රිකා ඡායාරූප පරීක්ෂාවේදී ඉරණමඩු ජලාශයේ නිරිතදිග ඉවුරු පෙදෙසේ ඝණ වන ලැහැබක් තුල ක්‍රියාත්මක වෙමින් තිබූ අභිරහස් කඳවුරක් හමුවුනේ සතියකට පමණ පෙරයි. සන්දීප් අනුමාන කල පරිද්දෙන්ම විදුලිබල මණ්ඩලයේ අධිවෝල්ටීය සම්ප්‍රේෂණ රැහැන් ඇද ඇති මාර්ගය අසලමයි මේ කඳවුර පිහිටා තිබුණේ. අවට වනාන්තරයේ ගස් මුදුන් වලින් හා එය ආවරණය වනලෙස ඉහලින් ඇද තිබූ කැමොෆ්ලෑජ් නෙට් නිසා කඳවුර හොඳින් ආවරණය වී තිබුණා. සන්දීප් යෝජනා කල පරිදි උතුරට දිවෙන අධිවෝල්ටීයතා රැහැන් ඇදෙන මාර්ගය අවට පෙදෙස්වල අධෝරක්ත චන්ද්‍රිකා චායාරූප පිරික්සීමේදී අස්වාභාවික ලෙස තාපය විහිදුවන ස්ථානයක් ලෙසයි මෙය මුලින්ම හඳුනාගැනුනේ. පසුව යැවූ ඩ්‍රෝන කැමරාවලට කිසිවක් පෙනෙන්නට නොතිබුණත්, රාත්‍රී කාළයේ ඩ්‍රෝනවල ඇති අධෝරක්ත කැමරාවලට කන්ටේනර් පෙට්ටි මෙන් පෙනෙන නිමැවුම් හයකින් සමන්විත කඳවුර නිරාවරණය වුනා.
එම අභිරහස් කඳවුර දින දෙකක් ඩ්‍රෝන යානා වලින් දිවා රෑ නිරීක්ෂනය කල අතර ඉන්පසුව සිදුවන්නේ කුමක් සොයා බැලීමට බුද්ධි අංශයේ TAG ප්‍රහාරක කණ්ඩායමක් යවන්නට තීරණය වුනා. කඳවුර තුල අධිබල බැටරි ක්‍රියාතමකවන බව අධෝරක්ත ඡායාරූපවලින් තහවුරු වුනා. සන්දීප් අනුමාන කල පරිදිම එම බැටරිවලට අවශ්‍ය අධිබල ආරෝපණ විදුලිය, අධිවෝල්ටීයතා රැහැන්වලින් හොරෙන් ලබාගෙන තිබූ බව, අධි විබේධන ඩ්‍රෝන ඡායාරූප මගින් එම කඳවුර අසලම තිබූ රැහැන් කුළුණ නිරීක්ෂණයෙන් තහවුරු වුනා. එමෙන්ම කඳවුර තිබෙන ස්ථානයත්, Y12 යානය අහසේ පුපුරාගිය ස්ථානයටත් අදාල දත්ත ලබාගෙන සන්දීප් ගේ සහයෙන් සයිබර් හා ඉලෙක්ට්‍රොණික අංශයේ කෝලිත ඇතුලු කණ්ඩායම සිදුකල ත්‍රිමාණ අනුරූපනයකදී (3D simulation), එම කඳවුරෙන් විදින අධිවේගී ප්‍රක්ෂිප්තයක් Y12 යානයේ ගැටීමට ඇති සම්භාවිතාවය 98% බවට නිගමනය වී තිබුණා.
ත්‍රිමාණ අනුරූපන වලදී හෙලිවූ තවත් බියකරු තොරතුරක්වූයේ අභිරහස් කඳවුර ස්ථානගතවී ඇති ආකාරය අනුව එහි සිට ශ්‍රී ලංකාව ඉහලින් යන ජාත්‍යන්තර මගී ගුවන්යානා වලින් 60% පමණ ඉලක්ක කරගත හැකි වනබවයි. එම යානා ඉතා ඉහලින් පියාසර කරන නිසා, කඳවුර තුල ක්‍රියාත්මක වෙතැයි අනුමාන කල රේල් ගන් කාළතුවක්කුවේ සුළු සීරුමාරුවකින් පසු මධ්‍යම කඳුකරය ඉහලින් යන යානාවක් වුවද ඉලක්ක කරගත හැකි බවටද තහවුරු වුනා. MI6 බුද්ධි අංශයේ කේට්, ජිත් වෙත ලබාදුන් තොරතුර මේ දත්ත හා කදිමට ගැලපුනු නිසා වහාම කඳවුර අත්පත් කරගත යුතු බවයි තීරණය වුනේ.
අභිරහස් කඳවුර තුලට සීරුවෙන් විහිදීගිය රංග ඇතුලු කණ්ඩායමෙන් ජිත් හට ඇමතුමක් ලැබෙන්නට විනාඩි තිහක් පමණ ගතවුනා. ආරක්ෂිත බව දැන්වූ හෙයින් එය තුලට පිවිසි ජිත් ඇතුලු පිරිසට පිපිරී සහමුලින්ම විනාශවී ගිය අඩි 40ක කන්ටේනර් පෙට්ටි හයක් දකින්නට ලැබුණා. ඒවා තුල තිබූ සියල්ල දැවී ගොස් තිබුණා. කන්ටේනර් පෙට්ටි හයම සීරුවෙන් පරීක්ෂාකල ඔවුන්ට එයින් තුනකම අධිබල බැටරි පද්ධති තිබූ බවත්, ඒවා අධිසැර කුළුණෙන් ලබාගත් විදුලියෙන් ආරෝපණය කරන්නට ඇති බවත් පෙනී ගියා. බැටරි ඇති කන්ටේනර් පුපුරා ගොස් තිබූ අතර අනෙක් කන්ටේනර් තුනම ඒවා තුල ඇති සියලු දෑ සමග දැවී හළුවී ගොස් තිබුණා. කඳවුරට ඇතුලුවූ TAG කණ්ඩායමට අත්වූ ඉරණම හෙලිවුනේ පැය කිහිපයක පරීක්ෂාවකින් පසුවයි. කණ්ඩායමේ සියලු දෙනාම මරාදමා හෝ පණපිටින් එක් කන්ටේනරයක් තුලට දමා එය පුපුරා හැරිය බව ඉතුරුවී තිබූ සාක්ෂිවලින් තහවුරු වුනා.
එය සිදුකරන්නට ඇත්තේ කවුරුන් විසින්දැයි තොරතුරක් ලැබුණේ නෑ. එමෙන්ම පහරදෙනවා යයි කියූ පාද සතරක් ඇති රොබෝ යන්ත්‍ර පිලිබඳ එකම හෝඩුවාව රොකට් ග්‍රෙනේඩ් ප්‍රහාරයකින් උණුවී ඇඹරීගොස් තිබුණු අධෝරක්ත ඩිජිටල් දුරදක්ණයක මතකයේ සටහන්ව තිබී සොයා ගත්තේ අෂාන්. එහි මෙමරි කාඩ්පත සීරුවෙන් ඉවත්කරගත් අෂාන් එය සිය ජංගම දුරකථනයට ඇතුලු කොට පරීක්ෂා කිරීමේදී , ග්‍රෙනේඩ් ප්‍රහාරයේ කම්පණය හා තාපය නිසා විකෘත නොවූ එකම එක ඡායාරූපයක් සොයාගත හැකිවුනා. නයිට් විෂන් ආකාරයෙන් සටහන්ව තිබූ ඒ ඡායාරූපයේ පාද සතරක් ඇති, විශාල සුනඛයෙකුගේ ප්‍රමාණය යයි සිතිය හැකි රොබෝ යන්ත්‍රයක් දිස්වුනු අතර එහි පිට මත විශාල පතරොම් පෙට්ටියක් සහිත මැෂින් තුවක්කුවක් හා රොකට් ග්‍රෙනේඩ් විදිනයක් සවිකොට තිබූ බව පෙනුනා.
රොබෝවරුන්ගේ යාන්ත්‍රික පා සටහන් අතර මිනිසුන් සතරදෙනෙකුගේ පා සටහන්ද පැහැදිලිව තිබූ බැවින් කඳවුර විනාශකිරීම හා TAG ඒකකය ඝාතනය කිරීම තනිකරම රොබෝවරුන්ගේ ක්‍රියාවක් නොවන බව සිතාගත හැකිවුනා. සන්නද්ධ රොබෝ යන්ත්‍ර යොදාගෙන TAG කණ්ඩායමට දැඩි හානි සිදුකොට ඉන් අණතුරුව සාක්ෂි වසන් කිරීම සඳහා ඔවුන්ගේ සිරුරු මෙන්ම ප්‍රහාරයට යොදාගත් සන්නද්ධ රොබෝ යන්ත්‍රද කන්ටේනරයක් තුලට දමා එය පුපුරුවා හැර තිබෙන බව ලුතිනන් රංග සේනානායකගේ මූලික නිගමනය වූ අතර සිදුවී ඇති විනාශය පිලිබඳව හොඳම පැහැදිලි කිරීම එය බව ජිත් හා අෂාන් ද පිලිගත්තා.
CHAPTER 10011
8.45PM, සන්නද්ධ බුද්ධි බළකායේ S.A.R අංශය, ආරක්ෂක අමාත්‍යාංශය
ඉරණමඩු නිරීක්ෂණ චාරිකාවෙන් පසු කෙලින්ම ආරක්ෂක අමාත්‍යාංශයට වාර්තාකරණ ලෙස ජිත් හා රංගට අණලැබී තිබුණා. සියලු තොරතුරු රැගෙන එන ලෙසයි බ්‍රිගේඩියර් ජනක නියෝග කොට තිබුණේ. ගුවන් හමුදා මූලස්ථානයේ හෙලිකොප්ටර් අංගනයෙන් ගොඩබැස්ස ඔවුන්, එවා තිබූ වාහනයේ නැගී කෙලින්ම ආරක්ෂක අමාත්‍යාංශය වෙත යනවිට රාත්‍රී 8 පසුවී තිබුණා.
“ඔයාලා කියන විධියට, අපේ කොල්ලෝ දොළොස් දෙනා මරලාදාලා තියෙන්නේ ඔය කඳවුරේ හිටපු චීන්නු හතර දෙනා?" උපැස් යුවල යටින් බ්‍රිගේඩියර් දසනායක දෙස බැලූ මේජර් ජෙනරාල් සුසිල් ලියනගේ බැරෑරුම් හඬින් ඇසුවා. විනාශවී ගිය අභිරහස් කඳවුරේ ඡායාරූප, ඩ්‍රෝන හා චන්ද්‍රිකා ඡායාරූප සිය ගණනක් ඇතුලත් ඩොසියරය ඔහු අසල තිබුණා. කපිතාන් ජිත් ගුණවර්ධන, ලුතිනන් අෂාන් බෝපිටිය හා ලුතිනන් රංග සේනානායක මදක් ඈතින් ඇති පුටු කිහිපයක අසුන්ගෙන සිටියා.
“එයාලගෙ පවුල් වලට අපි මොකද කියන්නේ ජනක??............. ආමි කමාන්ඩර්ට අපි මොනවද කියන්නේ? ජනාධිපතිට? ඩිෆෙන්ස් සෙකට්‍රිට? නැෂනල් සිකියුරිටි ඇඩ්වයිසර්ට?”
“සර් චයිනීස් MSS එකට මිනිස්ට්‍රියේ හැම තොරතුරක්ම ගියේ දසුන් වීරකෝන් හරහා. තව කීදෙනෙක් ගෙන් චීන්නුන්ට තොරතුරු යනවද දන්නේ නෑ.........මේක ලීක්වෙන්න දෙන්න බෑ..............”
"අලුතින් ලීක් වෙන්න දෙයක් නෑනෙ ජනක, ඕක පුපුරවලා දාපු චීන්නු එහෙම කරන්න ඇත්තේ ඔයාලගෙ ප්ලෑන් දැනගෙනනෙ?"
"එහෙම කියන්න බෑ සර්.......මම හිතන්නේ හදිසිය වුනු දෙයක්.........උන් සූදානමින් ඉඳලා තියෙනවා, ඒත් අපේ ටීම් එක එනවා කියලා උන් දන්නේ නෑ. දන්නවානම් අපේ ටීම් එක එන්න ඉස්සෙල්ලා ඔතන ඩෙමොලිෂ් කරලා පැන ගන්න තිබුණා.........”
“ඒත් අපි යනකොටත් රේල් ගන් එක ඔතනින් ගෙනියලා........ජිතුයි රංගයි එතන සර්ච් කරද්දි අපි දෙමළ කතාකරන ටීම් එකක් ඉරණමඩු වැව වටේ තියෙන ගම්මාන වලට යැවුවා එයාලා මොනවද දන්නේ කියලා බලන්න..... ඒ මිනිස්සුන්ගෙන් ලැබුණු තොරතුරු විධියට මීට සති දෙකකට කලින්, ඒ කියන්නේ දසුන් වීරකෝන්ව අපි අල්ලගෙන දවස් දෙකතුනකට පස්සේ ලොකු කන්ටේනර් දෙකක් ඉරණමඩු කැලේ ඇතුලේ ඉඳන් එලියට එනවා දැකපු අය ඉන්නවා.”
“ඒ කන්ටේනර් ට්‍රක්වල “යු.හ” නම්බර් ප්ලේට් තිබිලා තියෙනවා. ඉරණමඩු කැලේ නිතරම හමුදාව ඉන්න නිසා ඒ මිනිස්සු සැකයක් හිතලා නෑ. ඒ කියන්නේ දසුන් අතුරුදහන් වුනු ගමන් ඩේසි වූ / නිමා යැංග් ගෲප් එක රේල් ගන් එක වෙන තැනකට යැවුවා. ට්‍රක් දෙක කොහෙද ගියේ කියලා හොයන්න ඉරණමඩු පැත්තේ හැම පාරක්ම අහුවෙන්න හයිකරලා තියෙන සිකියුරිටි කැමරා චෙක් කරන්න අපි පටන් ගත්තා……”
“"ජනක! අපි මේ විධියට ඇත්ත වසං කරලා කරන්නේ අපේම බෙලි කැපෙන සෙල්ලමක්........"
"මම දන්නවා සර්………...ඒත් අපි දසුන් වීරකෝන් ගැන කරපු නිගමනය හරිගියා.........Y12 ප්ලේන් එක පිපිරුවේ කොහොමද කියන එක අපි හරියටම හොයා ගත්තා.........හයිටෙන්ෂන් ඉලෙක්ට්‍රික් ලයින් වලින් කරන්ට් අරගෙන චාර්ජ් කරන රේල් ගන් එකක් තියෙන බවයි, ඒක තිබුණ තැනයි අපි හොයා ගත්තා.....චීනයේ ජාතික බුද්ධි සේවය (MSS) ඇතුලේ වෙනම අභිරහස් ගෲප් එකක් තියෙන බව, නිමා යැංග් ඒ ගෲප් එකේ රහස් අරමුණු වෙනුවෙන් සල්ලි පොම්ප කරන බව, අපේ නැෂනල් සෙකියුරිටි ඇඩ්වයිසර්ගේ ඥාති පුත්‍රයා, ඒ ගෲප් එකේ ඇතුලු කවයේ ඔත්තුකාරියකගේ අනියම් සැමියා බවත් අපි හොයා ගත්තා.....කාක දූපතේ තියෙන ඩේටා සෙන්ටර් එක ඩේසි වූ / නිමා යැංග් MSS ගෲප් එකේ රහස් වැඩවලට යොදාගන්න එකක් කියලා අපි හොයාගත්තා.........මේ වෙනකොටත් ඒක හැක් කරන්න පුලුවන් සර්කිට් බෝඩ් එකක් අපි හොරෙන් ඒකේ සර්වර් එකකට හයිකරලා ඉවරයි......දැන් අපි මොනිටර් කරගෙන යනවා.....පුලුවන් තරම් ඉක්මණට ඩේසි වූ ලංකාවට ඇවිලා දසුන්ට දීපු සූට් කේස් එකේ තිබුනේ මොනවද කියන එකයි, රේල් ගන් එක ගෙනිච්චේ කොහෙටද, මොකක්ද ඊලඟ ඉලක්කෙ කියලයි හොයාගන්න ඕනෑ.....එතකම් මේ තොරතුරු හෙලිවෙන එක නවත්වන්න ඕනෑ සර්....."
සිය උපැස් යුවල පිස දමමින් මදවේලාවක් නිහඬව කල්පණාකරමින් සිටි මේජර් ජෙනරල් ලියනගේ;
“ඕකේ ජනක........ඔයා දන්නවා මම ඔයාගේ නිගමනයන් ගැන තියලා තියෙන විශ්වාසය......ඒවගේම ඔයා ගොඩනගලා තියෙන ඔපරේෂනල් ටීම්වල හැකියාවන් ගැනත් මට ලොකු විශ්වාසයක් තියෙනවා......අර මැරිච්ච කොල්ලෝ දොලොස් දෙනාට සාධාරණයක් කරන්න නම් මුන්ව කොහොම හරි අල්ලන්න ඕනෑ........මම ඩිෆෙන්ස් සෙකට්‍රිට කතාකරලා, එයත් එක්ක ප්‍රසිඩන්ට් හමුබුවෙන්න යන්නම්.......ඔයාටයි ඔයගෙ ටීම් එකටයි මේ ඔපෙරේෂන් එක ඉවරවෙනකන් ඕනෑ හැම දෙයක්ම කරගන්න ස්පෙෂල් ප්‍රසිඩෙන්ෂල් ඔඩර් එකක් විධියට බ්ලැන්කට් කවර් එකක් අරන් දෙන්නම්..........හැබැයි පුතෝ, මේ ඔප් එක ක්‍රෑෂ් වුනොත්, අපි දෙන්නගේම ඔලුගෙඩි රෝල් වෙයි........මට කමාන්ඩ් එක නැතිවෙලා කලින් පැන්ෂන් අරගෙන ගෙදර යන්නවෙයි.........ඔයාටයි ඔයාගෙ ඔෆිසර්ලටයි හිරේ යන්න වෙන්නත් ඉඩ තියෙනවා........පැහැදිලියි නේද?"
“ඔව් සර්..........මේ ඔප් එකේ රිස්ක් එක මම හොඳට දන්නවා.........තැන්ක් යූ සර්....."
ඒ රැස්වීමෙන් පසු මේජර් ජෙනරාල් පිටව ගිය පසු තවත් පැයක් පමණ Surveillance, Analysis & Research (SAR) අංශය තුල සාකච්ඡාවේ නිරතව සිටි බ්‍රිගේඩියර් ජනක, ජිත්, අෂාන් හා රංග සමග එකතුවන්නට සන්දීප් හා කෝලිතත් පැමිණ සිටියා.
“දසුන් දීපු ලොකු බ්‍රීෆ් කේස් එක අරගත්ත චීනා එතනට ආපු සිල්වර් කලර් අව්ඩි A3 එකක නැගලා ගියා. DPL නම්බර් ප්ලේට් තිබුණේ. චයිනීස් ඇම්බසියේ වාහනයක් බව තහවුරු වුනා. ඒත් කවුද ඒකේ හිටියේ, කොහාටද ගෙනිච්චේ කියලා හෝඩුවාවක් තාම නෑ…”
“ඒ කියන්නේ චයිනීස් ඇම්බසිය ඇතුලේ නිමා යැංග් / ඩේසි වූ ගෲප් එකේ කට්ටියට හොඳ බලයක් තියෙනවා කියන එකනෙ....."
“හ්ම්ම්.......මේක කොහෙන් කෙලවර වෙයිද දන්නේ නෑ.........ඉරණමඩු වලින් පිටවෙච්ච රේල්ගන් එක ගැන හෝඩුවාවක් නෑ නේද?"
"නෑ සර්..." ජිත් හිස සලමින් පැවසුවා.
CHAPTER 10100
10.35PM, කොල්ලුපිටිය වටරවුම අසල, ගාළු පාර
ඉරණමඩුවේ විනාශය පිලිබඳව තොරතුරු ලැබුණු මොහොතේ සිටම විශාල පීඩනයකින් වැඩ කරන්නට සිදුවූ නිසා ජිත්ට දැඩි වෙහෙසක් දැනුනා. ආරක්ෂක අමාත්‍යාංශයෙන් පිටවූ ඔහු සිය පික්-අප් රථය ගාළුපාරෙන් පදවාගෙන ගියේ බඩගින්න නිවාගන්න චීස් කොත්තුවක් කන්න හිතාගෙන. චීස් කොත්තු මතක් වෙනකොට ඔහුට කවීෂා මතක්වුනා. "එයා තාම ඇහැරිලාද දන්නේ නෑ……….ඇහැරිලානම් කොත්තුවක් කන්න ආසද කියලා අහන්න ඕනෑ...නිදිමතේ හරි එයි...කොත්තු කැප්ටන්නෙ...." ජිත්ගේ මුවගට සිනහවක් නැගුනා.
සිතෙහි ඇතිවී ඇති වියවුල ඇය හා කතාබස් කිරීමෙන් මදක් හෝ සැහැල්ලු කරගත හැකිය යන හැඟීමද ජිත් වෙත තිබුණා. ඇය කෙරෙහි තිබූ දැඩි විශ්වාසය නිසාම ජිත් බොහෝ දෑ ඇයට පවසා තිබුණා. එවැනි රහස් රැකීමේ අධිෂ්ඨානය හා අවංකත්වය ඇයතුල තිබුණා.එමෙන්ම ඇය තමන් කෙරෙහි විශේෂ ලැදියාවකින් සිටින බවද ඔහු දැනසිටියා. කවීෂා ඔහු වෙනුවෙන් ඕනෑම දෙයක් කිරීමට සූදානමින් සිටින බව ජිත්ට වැටහී තිබුණා. ඇයගේ සයිකොලොජිකල් ප්‍රොෆයිලයේත් ඇයගේ විශ්වාසය දිනාගන්නට සමත් වන්නන් කෙරෙහි ඇතිවන දැඩි බැඳීම පිලිබඳ අනාවැකියක් සටහන් කොට තිබූ බව ඔහු සිහිපත්කලා. කවී ගැන ජිත්ට ඇති එකම බිය වූයේ යම් බරපතල ගැටලුකාරී අවස්ථාවකදී ඇය ඔහු වෙනුවෙන් අනවශ්‍ය අවදානමක් ගැනීමට හෝ වෙනත් ආවේගශීලී ක්‍රියාවක් සඳහා යොමුවේදැයි යන්න පමණයි.
වාහනය මාර්ගයේ අයිනකට කල ජිත් ඇයට ඇමතුමක් ගැනීමට ජංගම දුරකථනය අතට ගත්තා. එය අන්ලොක් කල ඔහුට, මගහැරී ගිය ඇමතුම් විශාල ප්‍රමාණයක් පිලිබඳ මිස්ඩ් කෝල් ඇලර්ට් පණිවුඩ රැසක් දකින්නට ලැබුනා. මුළු දවසම ඉරණමඩුවේත්, ගුවනේත් ඉන්පසු ජංගම දුරකථන සංඥා අවහිරකල බුද්ධි අංශ සාකච්ඡා කාමර තුලත් ගතකල නිසා ඇමතුම් රැසක් මගහැරී තිබුණා.
උප ලුතිනන් ගයාන් හේමන්තගෙන් ඇමතුම් 21ක් ලැබී තිබූ බව දුටු ඔහු විස්මයට පත්වුනා. "ගයාන්ගෙන් මිස් කෝල් විසි එකක්?? මොකක්ද දන්නෙ නෑ කේස් එක?"
"හලෝ? ගයාන්? මිස් කෝල් මහ ගොඩක්, මොකද?"
"හම්මේ යන්තන් ඇති සර්......මම දැන් පැය ගාණක ඉඳලා සර්ව ගන්න ට්‍රයි කරනවා..........කවී මිස් කෝල් කරාද?"
"නෑ ඇයි?........"
"සර් කවී මිස්ට කෝල් කරාද ඉරණමඩුවේ ඉඳන්?"
"නෑ බං! දවසම හිටියේ සිග්නල් නැති තැන්වල, මොකක්ද වෙලා තියෙන්නේ…?"
"සර්...දොලහට විතර කවී මිස් කෝල් කරලා කිව්වා සර් එයාට වැඩක් පැවරුවා, ඒකට යන්න එලියට බහිනවා කියලා...මිස්ගේ නිසාන් ලීෆ් එකේ බැටරි චාර්ජ් හොඳටම අඩුයි කියපු නිසා මම කාරෙක අරගෙන කොල්ලුපිටියේ චාජින් සෙන්ටර් එකට යන ගමන් හිටියේ. සෙන්ට් මයිකල්ස් එකේ චාර්ජ් මැෂින් එක කැඩිලා....මම මිස්ට කිව්වා පැය බාගයක් ඉන්න මම කාරෙක චාර්ජ් එකට දාලා කැබ් එකක් අරගෙන එන්නම් ඒකෙම යමු කියලා.......එයා බෑ කිව්ව......රහස් තොරතුරක් ගැන හොයන්න කියලා සර් කිව්වා, හම්බුවෙන්න යන කෙනා මාත් එක්ක ගියොත් මග අරී කියලා, තනියම යන්න කිව්වලු....කියපු දේවල් සැකයි වගේ නිසා මම අනෙක් පැත්තට සර්ට ගත්තා, වැදුනෙ නෑ........ඒ නිසා මම චාර්ජ් කිරිල්ල පැත්තක තියලා වාහනේ හරවගෙන සෙන්ට් මයිකල්ස් එකට ආවා. ස්කූල් ට්‍රැෆික් නිසා ටිකක් වෙලා ගියා. එතකොටත් මිස් ගිහිල්ලා. මම එපාට්මන්ට් සෙකියුරි කැමරා බැලුවා. මිස් අළුපාට කාර් එකක නගිනවා පෙනුනා. හරියට දොර වහගන්නත් ඉස්සෙල්ලා කාර් එක ඇද්දුවා. වීදුරුත් කළු කරලා තිබුණේ.....මම හිතන්නේ අව්ඩි A3 එකක්…පාට මෙටැලික් සිල්වර්...නොම්බරේනම් පැහැදිලි නෑ....ඒත් බොනට් එකේ කොඩි කණුවක් තිබුනා. "
ගයාන්ගේ විස්තරය අවසන්වනවිට ජිත්ගේ සියොලඟ සලිතවී දහදියෙන් තෙත්ව සිටියා.
නිමා යැංගේ කල්ලිය, දසුන් පැහැරගනීමට එකට එක කිරීමට හා ඉදිරි ක්‍රියාමාර්ග නතරකර ගැනීමට කවීෂාව පැහැර ගන්නට ඇති බවයි ඔහුට සිතුනේ. අනුන්ගේ කටහඬින් දුරකථන ඇමතුම් දීමේ තාක්ෂණය ඔවුන් කලිනුත් යොදාගෙන තිබූ නිසා, එලෙසින්ම ඇයවද රවටා ගන්නට ඇති බව ඔහුට පැහැදිලි වුනා. ඔහු දිගුවේලාවක් නිහඬව සිටි නිසාදෝ දැඩි ලෙස පස්චාත්තාපයට පත්ව සිටි ගයාන් දුරකථනය විසන්ධිවුනා යයි සිතමින්;
"හ...හලෝ? සර්???"
"තමුසෙට මම කිව්වනෙ අයිසේ ඔය කෙල්ලව බලාගන්ඩ, එලියට බහින හැම මොහොතකම වෙපන් එකත් අරගෙන එයා එක්ක යන්න කියලා...!!!"
"ඔව් සර් මම කිව්වා.......මිස්ගෙ ජීවිතේට අණතුරක් වෙන්න පුලුවන් කියලා ඉන්ටෙලිජන්ස් රිපෝට් තියෙනවා, බඩුවක් ගන්න ලඟ කඩේ කටවත් තනියම යන්න එපා කියලා......පහුගිය දවස් ටිකේම එහෙමයි වුනේ සර්…මිස්ට වැඩට එන්න වෙන්නේ නෑ, අසනීපයි කියලා ගත්ත මෙඩිකල් එකත් මිනිස්ට්‍රියට ගිහින් දුන්නේ මම.….මිස් මට එන්න නොකියා එපාට්මන්ට් එකෙන් එලියට බැස්සේ නෑ.....අද උදේ මිස් ජිම් එකට යනකොටත් මට කෝල් කරලා මාත් එක්ක ගියේ....මේ වැඩේටත් එලියට බහින්න ඉස්සෙල්ලා මට කෝල් කලේ ඒක වෙන්න ඇති....ඒත් සර් තනියම යන්ඩ කියලා ඕඩර් කලා කියපු නිසා මමත් බල කරේ නෑ........කෝකටත් කියලයි මම අනෙක් පැත්තට සර්ට කියන්න ගත්තේ........සර් කෝල් කරේ නැතිනම් කව්ද සර් කෝල් කරේ?? මිස් බොරුවක් කලාවත්ද?"
"හරි හරි........කළබල වෙන්න එපා.....ගයාන් දැන් කොහෙද ඉන්නේ?"
"මම සෙන්ට් මයිකල්ස් එපාට්මන්ස් ලඟ ඉන්නේ........කීයට හරි සර් එනකම් මෙතන ඉන්න කියලා මගෙ සී.ඕ කිව්වා..."
ආරක්ෂාව සඳහා කවීෂාව ඇයගේ මාලබේ නිවසෙන්, කොළඹ බ්‍රිතාන්‍ය කවුන්සිලය අසල සෙන්ට් මයිකල්ස් මහල් නිවාස සංකීර්ණයේ තාවකාලිකව නැවැත්වීමට තීරණය වුනේ දසුන්ව රඳවා ගැනීමේ ක්‍රියාන්විතයටත් පෙරයි. දසුන් අතුරුදහන් වීමත් සමග සතුරා දැඩිලෙස කළබලවන බව ඔවුන් දැන සිටියා. ඊට දින කිහිපයකට පසු ඉරණමඩුවේ රහස් කඳවුර හඳුනාගෙන එයට පහරදීමට තීරණය කිරීමෙන් පසු කවී හා සන්දීප් යන සිවිල් වැසියන් දෙදෙනා රැකගැනීමේ අවශ්‍යතාවය තවත් දැඩිවුනා. සන්දීප්ට කොළඹ නාවික හමුදා නිළධාරී නිවස්නයේ ඉඩක් ලබාගත හැකිවූ අතර කවීෂාට කාන්තා නිළධාරී නිවස්නයක ඉඩ ලබාගැනීම ප්‍රමාදවන නිසා එතෙක් ඇයව, සන්නද්ධ බුද්ධි බලකාය සතු තවත් රක්ෂක නිවාසයක් තිබූ සෙන්ට් මයිකල් මහල් නිවාස සංකීර්ණයේ රඳවන්නට තීරණය කෙරුනා. ඇයගේ පෞද්ගලික ආරක්ෂකයා ලෙස, VIP පුද්ගල ආරක්ෂාව පිලිබඳව විශේෂ පුහුණුවක් ලබාසිටි උප ලුතිනන් ගයාන්ව පත්කලේ බ්‍රිගේඩියර් ජනක විසින්මයි.
CHAPTER 10101
කවීෂා අතුරුදහන්වී දිනකට පසු; පාන්දර 03.15, ආරක්ෂක අමාත්‍යාංශ නිවාස සංකීර්ණය, ස්කෙල්ටන් පාර, කොළඹ 05
කිසිදු හෝඩුවාවක් නොමැතිව කවීෂා අතුරුදහන්වී දැන් දිනක් ගතවෙලා. එදා මුළු රාත්‍රියේම නිදිවර්ජිතව කවීෂා පැහරගත් අව්ඩි A3 වාහනය සොයන්නට වෙහෙසවූ නමුත් එය සාර්ථකවුනේ නෑ. චීන ඇම්බසිය වෙත ලියාපදිංචිවූ වාහන පිලිබඳව මෝටර් රථ කොමසාරිස් දෙපාර්තමේන්තුව සතු ලියකියවිලි වල අව්ඩි A3 රථයක් තිබුණේ නෑ. ඒ නිසා එම වාහනය ව්‍යාජ තානාපති සේවා නොම්බර තහඩු සවිකරගෙන ක්‍රියාත්මක වෙන බවයි තිරණය වුනේ. කවීෂා පැහැර ගත්තේත්, දසුන් ලබාදුන් සූට්කේසය ලබාගෙන පිටව ගියේත් එකම අව්ඩි රථයක් බව එම වීඩියෝ පරීක්ෂාවෙන් තවුරු වුනා. එම වාහනය දුටුතැන අත්ඩංගුවට ගන්නා ලෙස දිවයිනේ සියලුම පොලිස් රථවාහන අංශවලට නියෝග නිකුත්කොට තිබුණා.
කවීෂාගේ අතුරුදහන්වීමෙන් ඇතිවූ දැඩි පස්චාත්තාපයත් ඇය පිලිබඳව හෝඩුවාවක් සොයාගැනීමටත් නිදි වර්ජිතව වෙහසවීමත් නිසා ජිත්ට රාජකාරිවලින් ඉවත්ව විවේක ගන්නා ලෙස පෞද්ගලිකවම නියෝග කරන්නට බ්‍රිගේඩියර් ජනක දසනායකට සිදුවුනා.
සවස පහට පමණ සිය නිළනිවසට පැමිණි ජිත් හැඳසිටි ඇඳුම් පිටින්ම ඇඳට වැටුනේ කෙසේ හෝ පැය කිහිපයක්වත් නිදාගැනීමටයි. නිදිවර්ජිතව සිටින්නට උත්සහකිරීමෙන් හෝ, අනවශ්‍ය ලෙස පසුතැවිලිවීමෙන් පලක් නොවන බව ඔහු දැන සිටියා.
"කවී නුවණක්කාරි.......කොහොමහරි ජීවිතේ බේරගනියි....." ඔහුගේ යටිසිත කිව්වා. අඳුර වැටෙනවිට ඔහු ගැඹුරු නින්දට පිවිස සිටියා.
නොකඩවා හැඬවෙන දුරකථනය ඔහුව අපහසුවෙන් අවදිකලා.
"හලෝ??"
"කැප්ටන් ජිත්!.......අෂාන්.......ඉක්මණට පැලවත්තෙ සේෆ් හවුස් එකට එන්න.......අපි ඩේසි වූ අල්ලගත්තා......"
"ඩේසි වූ??..... ගෑණි ආයෙ ලංකාවට ආවද?"
"ඔව්.......සිංගප්පූරුවෙන් එන එමිරේට්ස් ෆ්ලයිට් එකේ පැසෙන්ජර් මැනිෆෙස්ට් එකේ (මගී නාමලේඛණය) ගෑණි ඉස්සෙල්ලම ලංකාවට ආපු වෙලාවේ පාවිච්චි කරපු ජැස්මීන් ටෑන් කියන නම තිබුණා..ඒ නමින් එයා සිංගප්පූරුවේ පර්මනන්ට් රෙසිඩන්සි බළපත්‍රයකුත් අරගෙන තියෙනවා..ෆ්ලයිට් එක එහෙන් පිටත් වෙනකොටම මැනිෆෙස්ට් එක කටුනායක ඉමිග්‍රේෂන් එකට එනවනෙ......ඒවෙලාවෙ ඩියුටි හිටපු ඉමිග්‍රේෂන් ඔෆිසර් අපිට තොරතුර දුන්නා.......ප්ලේන් එක ලෑන්ඩ් කරපු ගමන්, ගේට් එකට ගන්න ඉස්සෙල්ලා අපේ ටීම් එකක් ප්ලේන් එක ඇතුලෙදිම ගෑණිව අල්ලගත්තා........දැන් පැලවත්තට ගෙනල්ලා...... බ්‍රිගේඩියර් කිව්වා ඔයා එනකන් ක්වෙෂ්චන් කරන්න එපා කියලා...."
"නියමයි!......මම දැන්ම එනවා......." බලාපොරොත්තු සුන්කරගනිමින් සිටි ජිත්ට නව පණක් ලැබුණා.
CHAPTER 10110
රාත්‍රී 8.45, සන්නද්ධ බුද්ධි අංශ රක්ෂක නිවාසය හා ක්ශේස්ත්‍ර මෙහෙයුම් කාර්යාලය, පැලවත්ත
Look mister….I told so many times to so many of your officers……...I don’t know where Miss Kaveesha is…
[මහත්මයා...මම මගෙන් ප්‍රශ්ණ කරපු හැම ඔෆිසර් කෙනෙකුටම කිව්වා මම මිස් කවීෂා ඉන්න තැනක් දන්නේ නෑ කියලා...]
I am Captain Jith…you will address me as captain…….How is that possible Miss Daisy Woo?? or shall I call you Jasmine Tan?? or is Sew Eng Khoo better for you?? Your group is behind this……..Do you have any idea what will happen to you if we handed you over to chinese authorities…...you will probably be hanged for treason…..? China is famous for hanging bad people.
[මම කැප්ටන් ජිත්…ඔබ මට කැප්ටන් කියා ඇමතීම හොඳයි...... කොහොමද එහෙම වෙන්නේ මිස් ඩේසි වූ? නැතිනම් මම ඔයාට ජැස්මීන් ටෑන් කියන්නද? සිව් එන්ග් කූ කියලා කිව්වොත් වඩා හොඳද? මේ ගෲප් එක ඔයාලගෙ.....ඔයාට නිකන් හිතනවද අපි ලඟ දැන් තියෙන තොරතුරු එක්ක ඔයාව චීන බළධාරීන්ට බාර දුන්නොත් ඔයාට මොකද වෙන්නේ කියලා? ඔයාට රාජ්‍ය විරෝධී වැඩකලා කියලා එල්ලුම් ගස් යන්න වෙනවා.....ලෝකේ වැඩියෙන්ම මිනිස්සු එල්ලලා මරන රට චීනෙ නේද?]
“කැප්ටන් ජිත්…….ඒ කණ්ඩායම දැන් කැඩිලා ගිහින්....ඇතුලේ බළඅරගලයක් වෙලා...මාස්ටර් යැන්ග් මැරුණට පස්සේ නිමා යැන්ග් හරිම භයානක තීන්දු ගන්න පටන් අරගෙන....දැන් ගෲප් එකේ සමහර බලවතුන් ඈත්වෙලා ඉන්නේ.......නිමා යැන්ග් හා එයාගේ හිතවතුන් ටිකදෙනෙක් යථාර්ථයෙන් ගිලිහිලා, හීන ලෝකයක් ජීවත් වෙනවා...ඔවුන්ට ඕනෑ චීනයයි තායිවානයයි අතර යුද්ධයක් ඇති කරන්න......ඒක ලෝක යුද්ධයක් විධියට ඇමරිකාවත් ඈඳෙන එකක් වෙයි කියලා එයාලා හිතන්නේ නෑ.....”
මේ ගැන මාස්ටර් යැන්ග් දැනගෙන හිටියටද?
ඔව් මම කිව්වා! එයා මට උපදෙස් දුන්නා කණ්ඩායම ඇතුලේම ඉඳගෙන වෙන දේවල් එයාට වාර්තාකරන්න කියලා
ඔයා ඇයි මාස්ටර් යැන්ග්ට හිතවත්? ඔයා හිතවත් වෙන්න ඕනෑ නිමා යැන්ග්ට නෙමෙයිද? එයා නේද ඔයාගේ වියදම් දරන්නේ?
මේ පැනය ඇසූ විගස ඇය නිහඬවුනා. ජිත් බාදා නොකර ඇයට කල් දුන්නා. විනාඩි කිහිපයක් නිහඬව සිටි ඇය ඔහු දෙස බලා.
ටෙරී යැන්ග්; මම මාස්ටර් යැන්ග් කියලා අමතන කෙනා මගේ තාත්තා නිසා
මොනවා?
ටෙරී යැන්ග් කියන්නේ මගේම තාත්තා. නිමා දන්නේ නෑ. මගේ අම්මා හොං කොං වල. ඒකාලේ හොං කොං අයිති චීනෙට නෙමෙයි, මහා බ්‍රිතාන්‍යයට. අවුරුදු 17දී අම්මා මැන්චෙස්ටර් නුවරට ගියා රංග කළාව ඉගෙන ගන්න. එයාට ඕනෑ වෙලා තියෙන්නේ ඔපෙරා ශිලිපිණියක් වෙන්න. මාස්ටර් යැන්ග් ඒකාලේ - ඒ කියන්නේ 1988 අවුරුද්දෙ - මැන්චෙස්ටර් විශ්වවිද්‍යාලයේ ශිෂ්‍යයෙක්. අම්මා ඒකාලේ වියදම් හොයාගන්න කැෆේ එකක වැඩකරලා තියෙනවා. මාස්ටර් යැංග්ට මගේ අම්මා හමුවෙන්නේ ඒ විධියට. ඒ සම්බන්දෙන් පස්සේ අම්මා ගැබිණියක් වුනා. මාව හම්බුවෙලා මාස කීපයකින්, මාස්ටර් යැංග් ඒ කියන්නේ මගේ ජීව ජීවවිද්‍යාත්මක තාත්තා අධ්‍යාපනය අතහැරලා ආයෙ චීනෙට ගියා, අම්මවයි මාවයි ගෙන්න ගන්න කටයුතු ලෑස්ති කරන්න. ඒත් අපිව ගන්න ඉස්සෙල්ලා අම්මා ඇක්සිඩන්ට් එකකින් මැරුණා. මට මාසය හයක් වත් නෑ. බළධාරීන් මාව අනාත නිවාසෙකට බාර දීලා. මම චීන දරුවෙක් නිසා මාව හදාගන්න බාර ගන්න කවුරුත් කැමතිවෙලා නෑ. මම හැදුනේ අනාත නිවාසවල. තාත්තට මාව හොයාගෙන එන්න පුලුවන් කමක් තිබිලා නෑ. ඒ අතරේ එයාගෙ දෙමව්පියන්ගේ බලපැමට එයා චීන කොමියුනිස්ට් පක්ෂයේ බලසම්පන්න නිළධාරියෙක්ගේ දුවෙක්ව කසාද බැඳලා. නිමා යැංග් ඒ විවාහයේ දරුවා.
මාමාගේ සම්බන්ධකම් උඩ මාස්ටර් යැන්ග් ව්‍යාපාරිකයෙක් වෙනවා. බොහොම දක්ෂ නිසා ප්‍රකෝටිපතියෙක් වෙනවා. එයා එන්ගලන්තෙට ආපු හැම සැරේම මාව හොයලා තියෙනවා. කොහොම හරි මට අවුරුදු 15 වෙනකොට එයා මාව හොයාගත්තා. එයා එයාගේ ජීවිතේ ගැන හැම දේම කිව්වා. අඬ අඬා මගෙන් සමාව ඉල්ලලා එයත් එක්ක චීනෙට එන්න කිව්වා. මට එන්ගලන්තෙ ජීවිතෙයි, සුද්දන්ගේ ජාතිවාදී කෙනෙහිලියි එපා වෙලා හිටියේ. මම කැමතිවුනා. චීනෙට ගියාට පස්සේ මම හමුදවට බැඳෙන්න ඉල්ලුම්කලා. ඒත් මම මුලු ජීවිතේම වගේ එන්ගලන්තෙ හිටපු නිසා ඔවුන් කැමතිවුනේ නෑ. පස්සේ මගේ තාත්තා, මාස්ටර් යැන්ග් එයා දන්න උසස් MSS නිළධාරියෙකුට මාව හඳුන්වල දුන්නා. එයා කැමතිවුනා මාව MSS එකට බඳව ගන්න.
නිමා යැන්ග් සමාගමට බැඳිලා චීන හමුදාවට ආයුධ නිර්මාණයට අතගහනකොට මාස්ටර් යැංග් මට එයාට උදව්කරන්න කිව්වා. නිමා මම මාස්ටර් යැංගේ දුව බව නොදැන සිටියත් මාව විශ්වාස කරන්න කියලා උපදෙස් දීලා තිබුණ නිසා නිමා මට හිතවත් වුනා. ඒවගේම මට MSS එක ඇතුලේ තැනක් තිබුණ නිසාත්, නිමා යැන්ග්ව ඔවුන්ගේ සැලසුම් වලට අත්‍යාවශ්‍ය නිසාත්, නිමාගේ විශ්වාසවන්ත MSS ඒජන්තවරිය වුනු මාවත් ඇතුලේ බිහිවුනු රහස් කණ්ඩායමට ඇතුලත් කරගෙන තිබුණා. නිමා ඒ කණ්ඩායමේ අරමුණු වෙනුවෙන් ව්‍යාපාරික කටයුතු මෙහෙයවන්න ගත්තා.
ඒ කණ්ඩායම නියෝජනය කරන ව්‍යාපාරිකයින් ලංකාවේ විශාල ආයෝජන වලට සම්බන්ධයි. ඔවුන් මෙහෙයුම් සැලසුම් කරන්න ලංකාව තෝරගත්තේ චිනෙට බොහොම හිතවත්, චීන ආයෝජන මත යැපෙන දුර්වල රටක් නිසා. මම දසුන් වීරකෝන්ව මගේ දැලට අහුකරගත්තේ ඔවුන්ගේ උවමනාවට. මගේ සැළසුම නිසා ලංකාවේ රජයේ ඉහලම, රහස්‍යම තොරතුරු මේ කණ්ඩායමට යන්න පටන් ගත්තා.
ඔයාලගෙ ගෲප් එක මොකටද රේල් ගන් එකක් ලංකාවේ හැදුවේ?
ප්ලේන් එකක් බිම දාන්න. සාමාන්‍ය ප්ලේන් එකක් නෙමෙයි, තායිවානේ ජනාධිපති යන ප්ලේන් එක.
මොනවා?? ඔයාලා ලංකාවේ ගුවන්සීමාව ඇතුලේ තායිවාන් ජනාධිපති මරන්නද සැලසුම් කරන්නේ?
නෑ නෑ ලංකාව උඩින් යන කොට නෙමෙයි. අන්තර්ජාතික මුහුදු සීමා උඩින් යනකොට. ලංකාවෙ හැදුවේ චීන බලධාරීන්ගෙන් බේරිලා හදලා ටෙස්ට් කරන්න ඕනෑ නිසා. ටෙස්ටිං එක සාර්ථකව කෙරුනා. Y12 බිම දැම්මේ ඒකෙන් වෙඩිතියලා. ඒක ඔයාලා දැනටමත් දන්නවෙනෙ. ටෙස්ටින් එකෙන් පස්සේ අවස්ථාව උදාවුන ගමන් චීන පාලනේ යටතේ තියන හම්බන්තොට වරායෙන් පිටකරන්න සැලසුම් කරා. සැලැස්ම වුනේ නැවක ඉඳන් වෙඩි තියන්න. අපිට තායිවාන් ජනාධිපති ගමන් කරන යානාවේ ගමන් මාර්ගවල රහස් තොරතුරු තායිවානේ අපේ හිතවතුන්ගෙන් එනවා. ඒ නිසා ප්ලේන් එක උඩින් යන තැනකට අපේ නැව ස්ථානගත කරන්න පුලුවන්. අපේ තාක්ශණවේදීන් රේල් ගන් එක හදලා සීරුමාරු කිරීම් සියල්ලම නිවැරදිව කරලා තිබුනේ.
ඒත් අපි හිතුවේ නෑ, ලංකාවේ බුද්ධි අංශ මේවා හොයාගනී කියලා. මෙහෙම කියනවට තරහා වෙන්න එපා. ලංකාවේ බුද්ධි අංශ ගැන MSS එකට තිබුනේ බොහොම අඩු තක්සේරුවක්.......ඒත් අපි වැරදියි......ඔයාලා ඇත්තටම දක්ශයි. ඔයාලා දසුන්ව වගේම, මාව කොටුකර ගත්තා. මම එදා මත්තලට ආපු එකත්, දසුන්ට දුන්න බ්‍රීෆ්කේස් එක ගැනත් ඔයලා දන්නවා. ඒවගේම අපි කවදාක්වත් හිතුවේ නෑ ඔයලාට ඉරණමඩු මහ කැලේ මැද්දේ තිබුණ අපේ රේල්ගන් සයිට් එක හොයාගන්න පුලුවන් වෙයි කියලා. MSS එකට මින් ඉදිරියට ලංකාවේ බුද්ධි අංශ ගැන අලුතින්ම හිතන්න වෙනවා.
ඇයි Y12 ෆ්ලයිට් එකම තෝර ගත්තේ? විශේෂ හේතුවක් තියෙනවද? නැතිනම් අහඹුලෙස තෝරා ගත්තද?
ඔයාලගෙ ඩීට්‍රා ටීම් එක අපූරු තාක්ෂණයන් වගයක් දියුණු කරනවා කියලා MSS එකට ඉව වැටිලා තිබුණේ. සෙන්ටාරිස් එක ඊටත් වඩා උනන්දුවුනා ඒ තාක්ෂණය ගැන දැනගන්න. ඒ නිසා MSS එකට කලින් ඒ තාක්ෂණය සෙන්ටාරිස් එකට ගන්නයි අපි Y12 වට්ටන්න තීරණය කලේ. සෙන්ටාරිස් එකට ඕනෑ වුනේ ඩීට්‍රා ටීම් එක හදපු තාක්ෂණය සොරාගෙන ඊට පස්සේ ටීම් එකම විනාශකරලා දාලා ප්‍රොජෙක්ට් එක නවත්වන්න. Y12 කඩා වැටිලා ටීම් එකම මැරිච්ච වෙලාවේ තිබුණු කළබැගෑනිය අස්සේ සෙන්ටාරිස් හැකර් ටීම් එකක්, ඩීට්‍රා ප්‍රොජෙක්ට් එකේ කොම්පියුටර් හැක් කරලා එයාලා හදලා තිබ්බ AI මෘදුකාංග, තාක්ෂණික දත්ත, පරීක්ෂණ ප්‍රතිපල, මේ ඔක්කොම හොරා ගත්තා. බිහිසුණු වුනත් ඒ අතින් නිමා යැංග් හරිම දක්ෂයි. ගලෙන් කුරුල්ලෝ දෙන්නයි. රේල් ගන් එක නිවැරදිව ක්‍රියාත්මක වෙනවා කියලා තහවුරු කරගත්තා. ඒවගේම ඩොලර් මිලියන ගාණක් වියදම් කරලා, අවුරුදු ගාණක් මහන්සිවෙලා උපදවාගන්න ඕනෑ තාක්ෂණය සෙන්ටාරිස් එකට නිකන්ම වගේ ලැබුණා.
තමුසෙලා මහ නරුම මිනිස්සු. මිනිස් ජීවිත ගැන තුට්ටුවකටවත් සලකනවද තමුසෙලා?
අපි විතරද? සී.අයි.ඒ එක, එම්.අයි 6 එක, මොසෑඩ් එක මිනීමරන්නේ නැද්ද? තාක්ෂණය හොරකම් කරන්නේ නැද්ද? එයාලා දියුණු රටවල් වුනේ අපේ රටවල් කොල්ල කාලා තමයි. අපි කෙරුවොත් වැරදියි, එයාලා කෙරුවොත් හරි…චීනෙ වට්ටන්න බටහිර රටවල් නොකරන්නේ මොනවද?....
කෝ දැන් රේල් ගන් එක?
හම්බන්තොටින් එලියට ගියා. ඒ නැව තියන තැන ජී.පී.එස් දත්ත තියෙන්නේ නිමා යැංග් ලඟ.
මට කවීෂා ඉන්න තැන කියන්න....එයා තවම ට්‍රේනී කෙනෙක්. මාස හයක් නෑ මිලිටරි ඉන්ටෙලිජන්ස් එකට වැඩකරන්න පටන් අරගෙන....
“කැප්ටන්....., ඔයා, මම, කවීෂා...අපි ඔක්කොම අපේ රටවල් වෙනුවෙන් බිහිසුණු දේවල්, නීතිවිරෝධී දේවල් කරනවා, ඒත් අපි අතරත් ආචාරධර්ම තියෙනවානේද?......MSS එක කවදාක්වත් අපේ රටට කෙලින්ම ද්‍රෝහී නොවුනු, නැතිනම් බරපතල අපරාධයක් නොකරපු වෙනත් බුද්ධි අංශ සාමාජිකයින් මරලා දාන්නේ නෑ. එයලා කරන වැඩ අපි කඩාකප්පල් කරනවා, ඒක අපේ රාජකාරිය......ඒත් නිකරුනේ වෙන බුද්ධි අංශෙක නිළධාරියෙක්ගේ ජීවිතය නැතිවෙන වැඩ අපි කරන්නේ නෑ....මම බලකිරීමක් නැතුවම මෙච්චර දේවල් කිව්වා......ඔය ගෑණු ළමයා ඉන්න තැන දන්නව නම් මම කියනවා.........මම කවීෂා ගැන දන්නේ නෑ...මේ ඇත්ත”
“හම්ම්.....මම හිතන්නේ අපි ලොකු වටයක් ගිහිල්ලා හරි තැනට ආවා. මට කියන්න මේ හැම දෙයක්ම මේ විදියට කියලා දාන්නේ ඇයි කියලා. කිසිම කේවල් කිරීමක් නෑ, කිසිම කොන්දේසියක් නෑ, කිසි ඉල්ලීමක් නෑ....ටැප් එක ඇරියා වගේ කියාගෙන කියාගෙන යනවා? ඇයි මේ? අපිව නොමග යවන ප්ලෑන් එකක් නේද? “
“මදක් නිහඬව සිටි ඩේසි වූ ජිත් දෙස බැලුවා....ඇයගේ දෑස් තෙත් වී ඇති සැටි ඔහු දුටුවා.........කැප්ටන් ජිත්, මම මේ ඔක්කොම කිව්වේ, මගේ තාත්තා මට අන්තිමට දීපු උපදෙස ඒක නිසා. එයා මැරෙන්න ඉස්සෙල්ලා මට කිව්වේ නිමා යැන්ගේ වියරු සැළැස්ම කොහොම හරි නවත්වන්න නැතිනම් ලක්ෂ ගාණක් මිනිස්සු මැරෙන්න පුලුවන් කියලා.......මට මේවා MSS එකේ ඉහල තැන්වලට කියන්න බෑ....මාව අත් අඩංගුවට අරගෙන හිරේ දායි. පැය විසිහතරක් යන්න ඉස්සෙල්ලා නිමාගේ මිනිස්සු මාව හිර කූඩුවෙම මරලා දායි.........”
ඇය කඳුලු පිස දමද්දී ජිත් ඇයට ටිෂූ කොළයක් දිගුකලා.
“මම මගේ රටට ගොඩක් ආදරෙයි.....මම කවදාක්වත් වෙයි කියලා හිතපු නැති දෙයක් කියන්නද?.......ඒ තමයි මහා සාගරයක් වගේ ලොකු චීනයේ අනාගතය බේර ගන්න එක පුංචි ලංකාවේ මිලිටරි ඉන්ටෙලිජන්ස් එකට කරන්න වෙයි කියන එක..........මම කියන දේවල් වලින් කරන්න පුලුවන් දේ කරන්න........ඒක ඉෂ්ඨවුනාට පස්සේ මාව චීනෙට බාර දෙන්න......මම මැරෙන්න කැමති මගේම රටේදී...”
“දසුන්ට දීපු බ්‍රීෆ් කේස් එකේ මොනවද තියෙන්නේ?”
"මම හිතන්නේ නෑ ඔයා විශ්වාස කරයි කියලා......."
"ඔයා මට කියනවා, ඔයාලා තායිවානේ ජනාධිපති මරන්න සැලසුම් කරනවා කියන එක විශ්වාස කරන්න කියලා.........මේකත් කියලා බලමුද ඩේසි?"
"මගේ තාත්තාගේ විඥාණය......එයාගේ මතකයන්.......එයා දන්න සියලුම දේ.......කොටින්ම එයාගේ මුලු ජීවිතයම.......එයා මැරෙන්න ඉස්සෙල්ලා අපි ඒවා ඩිජිටල් ක්‍රමයට ග්‍රහණය කරගත්තා.........ඒ තාක්ෂණය නිමා යැන්ගේ තවත් අපූර්ව නිර්මාණයක්.........කල්පිතයක් විධියට තිබුණු දෙයක් ඇත්තටම හදන්න එයාට පුලුවන් වුනා.......ඒත් එයා ඒක හැදුවේ අපේ තාත්තාට නෙමෙයි.....එයාට සදාකාලිකව ජීවත්වෙන්න ක්‍රමයක් විධියට.....මට ඒ තාක්ෂණය ගැන විස්තර කරන්න තේරෙන්නේ නෑ......ඒත් මගේ තාත්තාව ඒ විධියට පරිවර්තනය කරන්න උපකාරීවුනු තාත්තාගේ හිතවත්ම පරිගණක විද්‍යාඥයා මට කියලා දීපු විධියට මොළයේ බිලියන ගණනක් නියුරෝනවල රැඳී තිබුණු මතකයන්, හැඟීම් හා සිතුවිලි, ඩිජිටල් ක්‍රමයට ස්කෑන් කරලා, ඒ පිටපත කෘත්‍රිම බුද්ධි මෙහෙයුම් පද්ධතියක් ඇතුලේ යලිත් ක්‍රියාත්මක වෙන්න පුලුවන් විධියට නිර්මාණය කරපු මහ අපූර්ව තාක්ෂණයක්…..ඒ බ්‍රීෆ් කේස් එක ඇතුලේ ඒ මතකයන් වගේම කෘත්‍රිම බුද්ධි මෙහෙයුම් පද්ධතිය ගබඩා කරලා තිබුණා. හැබැයි, ඒ මතකයන් හා විඥාණය හරිම අස්ථාවරයි...වැඩිකල් ගබඩාකරලා තිබුණම ඒවා වියැකෙනවා කියලයි කිව්වේ.....ඒ නිසා ඒවා යලිත් මිනිස් මොළයකට ඇතුලු කරන්න ඕනෑ.....මම දන්නේ එච්චරයි....."
"ඇයි ඉතින් ඕක ලංකාවට ගෙනාවේ?"
"නිමා කැමතිවුනේ නෑ තාත්තාගේ මනස ඒ විධියට සුරක්ෂිත වෙනවට.......එයා බලාපොරොත්තුවුනේ තාත්තාගේ ඉක්මණ් මරණය.....ව්‍යාපාරවල සම්පූර්ණ බලය එයාට අයිතිවෙන්නේ එතකොට......ඒත් අපි තාත්තාගේ මරණයට ඉස්සෙල්ලා නිමාට හොරෙන් ඔහුගේ මනසේ ඩිජිටල් පිටපතක් ගත්තා.......ඒක ආරංචිවුන ගමන් නිමා ටීම් එකක් එව්වා ලැබ් එක විනාශ කරන්න......අපි බේරුණේ අනූනවයෙන්....තාත්තාට ඕනෑ වුනේ ඔහුගේ මතකයන් මට ලබාදෙන්න, ඒත් නිමා ලැබ් එක විනාශකරපු නිසා ඒක කරගන්න ලැබුණේ නෑ.......ඊට පස්සේ මම කෙලින්ම තාත්තාගේ හිතවත්ම බොඩිගාර්ඩ් එක්ක ප්ලේන් එකක් කුලියට අරගෙන ලංකාවට ආවා.... තාත්තා මට කියලා තිබුන විධියට මම කෙනෙකුව සම්බන්ධ කරගත්තා...එයා තමයි බ්‍රීෆ්කේස් එක ගේන්න ඕනෑ තැන මට කිව්වේ....එයා කව්ද කියලා මම දන්නේ නෑ.......තාත්තාගේ පැරණි හිතවතෙක් හා විශ්වාසවන්තයෙක් කියලා විතරයි දන්නේ....."
CHAPTER 10111
ඩේසි වූගේ පාපෝච්චාරණයෙන් පැය 18කට පසු; ජනාධිපති මන්දිරය, කොළඹ 01
චීන තානාපතිවරයා ජනාධිපති මන්දිරයට කැඳවා, සන්නද්ධ බුද්ධි අංශය සොයාගෙන තිබූ සියලුම තොරතුරු ඔහුවෙත හෙලිකලේ ජනාධිපතිවරයා හා මේජර් ජනරාල් ලියනගේ ඉදිරියේ බ්‍රිගේඩියර් ජනක දසනායකයි. ජිත්, අෂාන්, සන්දීප් හා විදූෂ වෙනත් කාමරයක සිටි අතර, මාංචු දැමූ ඩේසි වූ හමුදා ආරක්ෂාව සහිතව තවත් කාමරයක රඳවා සිටියා. තොරතුරු හෙලිකිරීමෙන් පසු බලවත් ලෙස වික්ෂිප්තවූ චීන තානාපතිවරයා ඩේසි වූ හා කතා කිරීමට අවශ්‍ය බව කිවූ අතර ඒ කතා බහ තමන් ඉදිරියේ සිදුවිය යුතු බවත්, චීන පරිවතකයෙකු තමන්ට ඒ කතා බහ පරිවර්තනය කල යුතු බවත් ජනධිපති වරය දන්වා සිටියා. එයට එකඟවූ නිසා චීන තානාපතිවරයා, ජනාධිපති වරයා හා ඔහුගේ චීන භාශා පරිවර්තකයා ඩේසි වූ ගෙන් ප්‍රශ්ණ කිරීමේ සැසියට සහභාගීවුනා. බ්‍රිගේඩියර් දසනායක හා මේජර් ජෙනරාල් වෙනත් කාර්යාලයක සිට විඩියෝ හරහා ඒ කටයුත්ත දැකබලා ගත්තා.
පැය තුනකට අධික කාළයක් ගතවූ අතර ජිත් ඇතුලු පිරිස සිටි කාමරයේ දොර විවර කරගෙන චීන තානාපතිවරයා ඇතුලුවුනා. සියලු දෙනාටම අතට අතදී ආචාර කල ඔහු;
"අපේ රාජ්‍ය නායක ගරු සී ජින් පිංග් මැතිතුමා, එතුමාගේ පෞද්ගලික ස්තූතියත්, චීන රජයේ ගෞරවණීය ස්තූතියත් ඔබලාට ලබාදෙන්න කියලා මට නියෝගකලා. ඔබලා මේ කල මහඟු සේවය චීන රජය හා ජනතාව කිසිම ලෙසකින් අමතක කරන්නේ නෑ. අප ඔබට ණය ගැතියි...."
සියල්ලන්ටම අතට අතදී ආචාරකල චීන තානාපතිවරයා, ඈතින් බලාසිටි බ්‍රිගේඩියර් ජනක දසනායකටද යලිත් ආචාර කොට පිටව ගියා.
"ප්‍රසිඩන්ට් ඔයාලව මුණගැහෙන්න බලාගෙන ඉන්නවා....මේජර් ජෙනරල් ලියනගේ එතුමා එක්ක ඉන්නවා....යමු..." කියමින් සියලුදෙනාම කැටුව ජනාධිපති නිළ කාර්යාලයට ගියා.
"සර්, ඩේසි වූ??"
"ඇම්බැසඩර්ට, ඩේසි වූ එක්ක වහාම බීජිං වලට එන්න කියලා එහෙන් නියෝග ඇවිල්ලා. දැන් මෙහෙන් පිටවුනේ කෙලින්ම එයාපෝට් යන්න.
"අපි තාම කවී ඉන්න තැන දන්නේ නෑ......එයාව හොයාගන්නේ කොහොමද....??"
බ්‍රිගේඩියර් ජනක මුනිවත රැක්කා.
ජනාධිපතිවරයාගේ ආරාධනයෙන් සියලු දෙනා නොනිල භෝජන සංග්‍රහයකට සහභාගී වන්නට එකඟ වුනත්, දැඩි සිත් වේදනාවෙන් සිටි ජිත් එය කාරුණිකව ප්‍රතික්ෂේප කලා. බ්‍රිගේඩියර් දසනායක විසින් ජනාධිපතිවරයාට කල පැහැදිලි කිරීමෙන් පසු ඔහු ජිත්ට අතට අතදී සුබ පතා "බය වෙන්න එපා පුතා....... ඒ ළමයව හම්බුවෙයි...!" යනුවෙන් පවසා පිටව යන්නට අවසර දුන්නා.
ජිත් ඔහුගේ පික්අප් රථයට නැගී ගාලු මුවදොර පාරේ පදවාගෙන යන්නට වුනා. යන්නේ කොහාටදැයි ඔහුට හැඟීමක් තිබුණේ නෑ. මේ වනවිට කවීෂා ජීවතුන් අතර සිටීම අවිනිෂ්චිත බව ඔහුට වැටහී තිබුණා. අතුරුදහන්වූ පුද්ගලයෙකුගෙන් පැය 72කට පසුවත් තොරතුරක් නැතිනම් ඔහු/ඇය දැඩි අවදානම් තත්වයක සිටින බවට සළකන්නට පොලිස් රහස් පරීක්ෂකයින් තීරණය කරනවා. කවීෂා කිසිදු තොරතුරක් නැතිව අතුරුදහන්වී දැන් පැය 72ක් පසුවෙලා. නිමා යැංගේ රහස් කල්ලිය මර්ධනය කිරීමේ ක්‍රියාන්විත චීන ආරක්ෂක අංශ විසින් ඉක්මණින් අරඹනු ඇතැයි ජිත් බලාපොරොත්තු වුනා.
හෙලිවූ තොරතුරුවලින් දැඩි කම්පණයට පත් චීන තානාපති වරයා කෙලින්ම චීන ආරක්ෂක ඇමති හා ජනාධිපති ඇමතීමෙන් පසුව ගතයුතු සියලුම පියවර ගැනීමට නියෝග ලැබුණු බව ජනාධිපති වරයා පවසා සිටියා. මේ සියලු තොරතුරු අතිශය සංවේදී රහස්‍ය තොරතුරු ලෙස සළකන බවට ප්‍රතිඥාවක් අත්සන් කිරීමට ඔවුන් සියල්ලටම සිදුවුනා. මේ තොරතුරු හෙලිදරව්වුව හොත් චීනයට දැඩි රාජ්‍ය තාන්ත්‍රික ගැටලුවලට මුහුණ දීමට සිදුවෙනවා නිසැකයි. එමගින් චීනයේ ජාත්‍යන්තර ප්‍රතිරූපයට සිදුවිය හැක්කේ මකා නොදැමිය හැකි හානියක්. චීනයේ ජාතික බුද්ධි සේවය තුල, තායිවාන ජනාධිපතිවරයා මරා දැමීමට කුමණ්ත්‍රණයක් සිදුවීම චීනයේ අභ්‍යන්තර ආරක්ෂාවට මෙන්ම, චීනයේ බුද්ධි අංශ හා හමුදා අංශ පාලනයෙන් ගිලිහී ඇති බවට සැක පහලවෙන්නට පුලුවන්.
එමෙන්ම සෙන්ටාරිස් වැනි දැවැන්ත චීන සමාගම් මේ කුමණ්ත්‍රණවලට කෙලින්ම පැටලීම, චීන සමාගම්වලට සිය ප්‍රධාන වෙළඳපොලවල් වන බටහිර රටවල දොරටු වැසීයාමට හේතුවන්නට පුලුවන්. දැනටමත් හුවාවී, ලිනෝවෝ, ZTE වැනි චීන සමාගම් වලින් කිසිදු උපකරණයක් මිළදී නොගැනීමට ඇමරිකානු රාජ්‍ය අංශ තීරණය කර තිබෙනවා. මේ කුමණ්ත්‍රණ තොරතුරු හෙලිවුනහොත්, යුරෝපීය රජයන් පමණක් නොව ආසියාවේ දියුණු රටවල් පවා ඇමරිකන් රජය ගත් පියවරම ගන්නට ඉඩ තිබෙනවා. එය චීන ආර්ථිකයට මරු පහරක් වෙනවා නිසැකයි.
රථය සිනමන් ග්‍රෑන්ඩ් හි ක්‍රෙස්කැට් සාප්පු සංකීර්ණය වෙත පැදවූ ජිත් එහි රථගාලේ වාහනය නවත්වා, පහල බේස්මන්ට් මහලේ පිහිටි කීල්ස් සුපර් සුපිරි වෙළඳ සැළවෙත ගියේ ඉන්ටර්නෙට් බිල ගෙවාදැමීමේ අදහසින්. බිල ගෙවන අතරේ සාක්කුවේ තිබූ දුරකථනයට වට්ස්-ඇප් පණිවුඩයක් ලැබුණු බවට සංඥාවීම නිසා එය ගෙන පරීක්ෂාකල ඔහුට නාඳුනන විදෙස් දුරකථන අංකයකින් එවූ පණිවුඩයක් දකින්නට ලැබුණා. එහි;
“Congrats Jith!!!....... You guys did it!!!…. xkyaxtye https://bit.ly/2knkMnvg
අත්සන ලෙස යොදා තිබුණු xkyaxtye දෙස මොහොතක් බලාසිටි ජිත්ට එහි x y අකුරු අතරින් kate පැහැදිලි වුනා.
"ම්ම්ම්..... MI6 එකේ කේට් සුබ පතනවා..එයාලට මෙච්චර ඉක්මණට ආරංචි වෙලාද?..මොකක්ද දන්නේ නෑ ලින්ක් එක?..." දක්වා තිබූ ලින්ක් එක මත ක්ලික් කලවිට, චීන සින්හුවා ප්‍රවෘත්ති සේවය මගින් නිකුත් කල ට්විටර් පණිවුඩයක් දිස්වූවා.
"හහ්........දූෂණ විමර්ෂණයක්..........MSS එකේ කුමණ්ත්‍රණකාරයෝ අත් අඩංගුවට ගන්නේ දූෂණ චෝදනා කියලා.........මෙහෙ වගේම තමයි එහෙනම් චීනෙත්..." සිතූ ජිත් දුරකථනය යලිත් සාක්කුවේ දාගත්තා.
"මේ සතුට බෙදාගන්න කවී හිටියනම් කොච්චර හොඳද....?"
බිල ගෙවාදැමූ ජිත් අරමුණක් නොමැතිව ක්‍රෙස් කැට් සාප්පු සංකීර්ණයේ ඔහේ ඇවිද ගියා. අතරමග කැමරා හා උපාංග වෙළඳසැළක් දැක නැවතුනු ඔහු, එහි ප්‍රදර්ශණයට තබා තිබූ කැමරා මාදිලි පරීක්ෂාකලා. පාසැල් යන කාළයේ ඡායාරූපකරණය ඔහුගේ ප්‍රියතම විනෝදාංශය වුනා. ඔහුගේ බලාපොරොත්තුව වුනේ පාසැල් ගමන අවසන්වූ පසු වනජීවී ඡායාරූප ශිල්පියෙකු වීමයි. වනජීවී ඡායරූපකරණය ආදායමක් නැති, වියදම් අධික විනෝදාංශයක් නිසා ඡායාරූප ශාලාවක් පටන්ගෙන, මංගල උත්සව ආවරණය කිරීමෙන් වියදම් පියවාගැනීමට ඔහු සැලසුම් කොට තිබුණා.
ඒ සියල්ල වෙනස් වුනේ 2006දී සතරවන ඊළාම් යුද්ධය දරුණුව ආරම්භවීමත් සමගයි. උසස්පෙල විභාගයේ අවසන් ප්‍රශ්ණ පත්‍රය ට පිලිතුරු ලියා ඉවරවුනු සැනින්ම ඔහුට සිය බාප්පාගේ අවමංගල්‍යයට සහභාගී වන්නට සිදුවුනා. යුධ හමුදා කොමාන්ඩෝ නිළධාරියෙකුව සිටි ඔහු ක්‍රියාන්විත රාජාකාරියේදී මියගොස් තිබුණා. මාස කිහිපයක් යන්නට පෙර තවත් පවුලේ ඥාතීන් කිහිපදෙනෙකු හා ඔහුගේ පාසැලේ යහලුවන් කිහිපදෙනෙකුගේම හමුදා පියවරුන් යුද්ධයට බිලිවූ අතර, ඡායාරූපකරණ සිහිනය පසක තැබූ ඔහු, සිය දෙමව්පියන්ගේ විරෝධයද නොතකා ජෝන් කොතලාවල ආරක්ෂක විද්‍යාපීඨයට බැඳුනා.
සිතිවිලි සයුරේ ගිළීසිටි ඔහුට සිය දුරකථනයේ නාදය ඇසෙන්නට මදක් පමාවුනා.
"කැප්ටන් ජිත් මේ කෝලිත.....ඔයා කොහෙද ඉන්නේ? අනෙක් අයගෙ ෆෝන් ඕෆ් කරලා......."
"එයාලා තාම ප්‍රසිඩෙන්ට්ස් හවුස් එකේ ඩිනර් එකක, මම බෑ කියලා ආවා.....ඇයි කෝලිත?"
"කවීගේ ෆෝන් එක දැන් විනාඩි 10කට කලින් ඇක්ටිව් වුනා.....අපි එයා නැතිවෙච්ච දවසෙ ඉඳලම ඒකෙ සිග්නල් එකට ස්කෑන් කරකරයි හිටියේ......හදිස්සියේම ඇක්ටිව් වුනේ......"
"ඇත්තද..? එයාගේ ෆෝන් එක කොහෙද කියලා ට්‍රේස් කරන්න පුලුවන්ද?"
"ටිකක් වෙලා යනවා........ඔයා ඔයාගේ ෆෝන් එක අතේම තියාගෙන ඉන්න..."
"හරි හරි....ඉක්මණට හොයන්න...." කියූ ජිත් ඉක්මණ් ගමනින් රථගාල වෙත පිය නගන්න වුනා...."
වාහනය ක්‍රෙස්කැට් පරිශ්‍රයෙන් ගාලු පාරට දමන විටම කෝලිතගෙන් යලිත් ඇමතුමක් ආවා.
"ජිත් ට්‍රේස් කරා........ෆෝන් එකේ ලොකේෂන් එක විධියට පෙන්නන්නේ මැරයින් ඩ්‍රයිව් එකේ වැල්ලවත්ත KFC එක ලඟ....ඔයා ඉන්නේ කොහෙද?..."
"මම ගාලු පාරේ ක්‍රෙස් කැට් එක ලඟ.....විනාඩි පහෙන් ගිහෑකි......"
"අපි ෆෝන් එකට කෝල් කරා ආන්සර් කරන්නේ නෑ...."
විදුලි වේගයෙන් රථය පැදවූ ඔහු කොල්ලුපිටිය මංසන්ධියෙ ආලෝක සංඥා මායිම් නොකොට එක් අතකට දිවෙන මාවතේ වැරදි පැත්තෙන් දකුණට හරවා කෙලින්ම ස්ටේෂන් පාරට දැම්මා. ඒ අසල රාජාකාරියේ නිරතව සිටි රථවාහන පොලීසියේ රාළහාමිලා ගේ විසිල් හඬ ඇසෙන්නට වූ අතර ඒ කිසිවක් නොතැකූ ඔහු අධික වේගයෙන් ගමන්කලා.
"ෆෝන් එක විසිකරලා ගියාද දන්නේ නෑ........ඒත් ඔන් කරේ ඇයි?......."
වැල්ලවත්ත OZO හෝටලය පසුකරන විටම දුරකථනය නාද වුනා.....එහි අමතන්නා ලෙස "Kaveesha" දිස්වී තිබුණා.
"හලෝ!! කවී??..."
"ජිත්!! ………….ඔයා කොහෙද?......." ඇයගේ කටහඬ බොහෝ දුර්වල බවයි දැනුනේ
"මම මේ ලඟ ඉන්නේ ....විනාඩි දෙකයි......ඔයා කොතනද???"
" KFC එකක් පේනවා...කොහෙ එකද දන්නේ නෑ.......මම ඉන්නේ කාර් එකක..අව්ඩි එකක්...බහින්න බෑ ඇඟට පණනෑ...."
"ඔහොම ඉන්න කවී......මට කාර් එක පේනවා.....ඔයාට මගේ පිකප් එක පේනවාද?"
"ම්ම්ම්.......ඔව්....ඔව්.....ඉක්මණට එන්න ජිත්....මගේ ඔළුව කැරකෙනවා..."
CHAPTER 11000
තෙමසකට පමණ පසු......අළුයම 2.35, ගුවන් තොටුපොල ධාවන පථයේ ඊසානදිග අන්තය, ශ්‍රී ලංකා ගුවන් හමුදා අධි ආරක්ෂිත කලාපය, කටුණායක.
තද කළු පැහැති සටන් ඇඳුමකින් සැරසුනු කපිතාන් ජිත් ගුණවර්ධන සීරුවෙන් පය තැබුවා. ඊලාම් යුධ සමයේ ගුවන් හමුදා යානා නඩත්තු සිදුකල හැඟර් ගොඩනැගිල්ලක් වූ මෙය, යුද්ධයෙන් පසු අතහැර දමා තිබුණා. පිටතට සුවිසල් ගබඩාවක් මෙන් පෙනෙන මෙය තුල දකුණු ආසියාවේ අතිවිශාලතම පරිගණක මධ්‍යස්ථානයක් ක්‍රියාත්මක වන බව දන්නා ශ්‍රී ලාංකිකයින් ගණන අතැඟිලි ගණනටත් වඩා අඩුයි.
ඇය ඔහුට පිටුපා විශාල පරිගණක තිරයක් ඉදිරිපිට අසුන්ගෙන සිටියා. එය මධ්‍යස්ථානයේ ප්‍රධාන පාලක ටර්මිනලය බව ජිත්ට වැටහුනා. ඇයගේ අතැඟිලි කීබෝඩය මත විදුලි වේගයෙන් ඒ මේ අත යන ආකාරය පැත්තකින් ඇයවෙත ලඟාවෙමින් සිටි ඔහු දුටුවා. කඳ කෙළින් තබාගෙන ඇහි පිහ නොහෙලා තිරය දෙස බලාගෙන සිටි ඇය රොබෝවෙකු මෙන් දිස්වුනා.
හැකිතාක් ලංව ඇයව වික්ෂිප්ත කිරීමේ අරමුණින් සීරුවෙන් ඉදිරියට ගිය ඔහුගේ බූට් සපත්තුවට හසුවූ යමක් "කරස්!!" හඬින් කැඩුණා.
"ෂිහ්..." දත්කූරු කමින් සිය කරුමය ගැන සිතන ජිත්ට ඇය ක්ෂණයෙකින් ගල් ගැසෙන ආකාරය පෙණුනා.
"හෙල්ලෙන්ඩ එපා........ඔලුවටම තියෙනවා........" ඉඳි පිලිමයක් මෙන් ගල්ගැසී තිරය දෙසම බලාසිටින ඇයට තර්ජනය කලා. හෙල්ලෙන්ඩ එපා යයි අණලැබුනත් එය වගකට නොගත් ඇය ක්ෂණයකින් නැගීසිට ඔහු වෙත හැරුනා. කෝපාවිෂ්ඨව සිටි ඇයගේ දෑස්, පිය නොගැහීම ඔහු වෙත එල්ලව තිබුණා. පරිගණක තිරයේ එලියෙන් ආලෝකමත්ව තිබූ ඇයගේ ගෙළෙහි මස්පිඩු තදවන ආකාරයත්, ඒ සමගම ඇයගේ දෑත් මිටමෙළවෙන ආකාරයත් ඔහු දුටුවා. තම මොහොතකින් ඇය තමන් වෙත කඩාපණින බව ඔහුට හැඟුනා.
"හෙල්ලෙන්ඩ එපා කිව්වා නේද?" ඔහු බුරාහැලුනා. ඇය තමන්ට වඩා දසගුණයක්වත් වේගවත් බවට ඔහු අනුමාන කලා. ඇයගේ හදවත පසාරුවන ලෙස වෙඩි තැබිය හැකිවුවත් එය සැබැවින්ම කල යුතුදැයි ඔහු තුලම දැඩි විරසකයක් තිබුණා. ආතතියෙන් යුතු දෙගිඩියාව ඔහුව පමාකලා. පමාව ඔහුගේ ගතම දහදියෙන් තෙත් කලා. ඇය තමා කවුදැයි හඳුනා නොගත් බව ඔහුට වැටහී තිබුණා.
හිස දෙපසට සෙමෙන් වැනූ ඇය "මට සමාවෙන්න..." කියද්දීම ඔහු සිය සාක්කුවක තිබූ කුඩා විදුලි පන්දම දල්වා ඔහුගේම මුහුණට එල්ලකර ගත්තා.
"කවී!!!......මේ මම....ජිත්!!" ඔහු කියද්දී කඩා පණින්නට සූදානම්වූ ඇය හිටිවනම නැවතුනා. කෝපාවිෂ්ඨ වියරු පෙනුමක් තිබූ ඇයගේ මුහුණ ක්ෂණයකින්ම සැහැල්ලුවූ බවක් පෙනුනා.
“ජිත්!! ඇයි මට තුවක්කුක් දික් කරගෙන?......... මම කවද ඉඳන්ද ඔයාගේ හතුරෙක් වුනේ…? ……...ඔයා මගේ ට්‍රේනින් ඔෆිසර්......මම සන්නද්ධ බුද්ධි අංශයට ආවේ ඔයා නිසානෙ ජිත්....?” ඇය සැහැල්ලු ස්වරයෙන් කියා සිටියා.
"හම්ම්.. ඔවු ඇත්ත...." කියූ ඔහු මද වේලාවක් ඇය දෙස බලා සිට, සිය පිස්තෝලයේ ෆයර් සිලෙක්ටරය යලිත් සේෆ්ටි සැකසුමට කරකවා එය ඉණේ රුවා ගත්තා..."
"කවීෂා.....කියන්න බලන්න ඔයා මේ මහ රෑ මොනවද මේ අධි ආරක්ෂිත පරිගණක මධ්‍යස්ථානයේ කරන්නේ කියලා? මේක ලංකාවට අයිති තැනක් නොවෙයි කියලා දන්නවද?" දෑත් ඉණේ තබාගත් ඔහු ඇය දෙස බලමින් ඇසුවා.
"ඔවු.....මං දන්නවා.........නෛතිකව නම් අපි ඉන්නේ මහා බ්‍රිතාන්‍යයේ ස්වෙරී භූමිභාගයක.... බ්‍රිතාන්‍ය GCHQ හා ඇමරිකන් NSA එක හවුලේ ගෙනියන අධිවේගී දත්ත සම්ප්‍රේෂණ ජාලයේ දකුණු ආසියානු මධ්‍යස්ථානයේ..."
"මොනවද උන් ඔයාට කලේ කවී? ඔයා දැන් මනුෂ්‍ය ගැහැණියක් නෙමෙයි නේද?"
"ඔයාට පිස්සුද? ඇයි එහෙම කියන්නේ? මම හිටපු කෙනාමයි..."
“නෑ නෑ.........ඔයා කරන දේවල් මනුස්සයින්ට කරන්න බෑ..."
“ඇයි ඒ?......... ඔයා කියන්නේ මනුස්සයින් තහනම් තැන් වලට ඇතුලු වෙන්නේවත්............ පරිගණක ජාලයක් හැක් කරන්නේ වත් නෑ කියලද? ………..මම කලේ ඒවානෙ?"
"ඔයා හැකර් කෙනෙක් වුනේ කවදා ඉඳලද?"
"මම ඔයාට වඩා කොම්පියුටර් ගැන දන්න බව ඔයාට අමතකද?"
"මම ඔයා ගැන පහුගිය තුන් මාසෙම ඇහැ ගහගෙනයි හිටියේ........දෙසැම්බර් 07 වැනිදායින් පස්සේ ඔයා සම්පූණයෙන්ම වෙනස් වුනා......."
“ජිත්?......ඔයා මං ගැන ඔත්තු බැලුවා එහෙනම්?..........ඒ කියන්නේ ඔයා මාව විශ්වාස කලේ නෑ කියන එකද? ……………...මම ඔයාව විශ්වාස කලා......ඔයා කියපු හැම දෙයක්ම කලා.....තවමත් එහෙමයි...."
“ඔයා මේ කරන්නෙත් මං කියපුවද?..............දෙසැම්බර් 07වැනිදාට කලින් දැනගෙන හිටපු කවීෂව මම විශ්වාස කලා……. එයාට මගේ ජීවිතය බාර දෙන්න වුනත් මම දෙපාරක් හිතන්නේ නෑ.........ඒත් දැන් ඉන්නේ ඒ කවීෂා නෙමෙයි.........."
"මම එයාම තමයි......"
“නැහැ!! ඔයා යන්ත්‍රයක්.......රොබෝ කෙනෙක්ද ඇන්ඩ්‍රොයිඩ් කෙනෙක්ද කියන්න මම දන්නේ නෑ.........ඒත් ඔයා දැන් මැෂින් එකක් බව මට හොඳට තේරෙනවා......"
"මැෂින් එකක්??.............Jith…..you should listen to yourself……. ඔයාට පිස්සු…!!!"
"දෙසැම්බර් 7 වැනිදා සිදුවීමෙන් පස්සේ, දෙසැම්බර් 9 වැනිදා තිබුණු සමාලෝචන රැස්වීම මතකද? ඒ රැස්වීමට ඉස්සෙල්ලා මම ඔයාට ලොකු ෆෝල්ඩර් එකක් දුන්නා මතකද? ඒකේ පිටු 1966ක් තිබුණා කියලා මතකයි නේද?"
"ඔව් ජිත්, හොඳට මතකයි.........ඔයා මට ඒක සම්පූර්ණයෙන්ම කියවලා ආරක්ෂක අමාත්‍යාංශයට බොරු වාර්තාවක් ලියන්න කියලා කිව්වා.......දෙසැම්බර් 7 වැනිදයි ඊට කලින් මාස ගාණක් තිස්සේ අපි මහන්සිවුනු "Operation Terminal Code" බුද්ධි මෙහෙයුමේදී සිදුවුනු බොහෝම දේවල්වල ඇත්ත කතාව ආරක්ෂක අමාත්‍යාංශයටවත් නිළවශයෙන් කියන්න බැරි තරම් රහසිගත නිසා හැමෝටම කියවලා පැත්තක දාන්න පුලුවන් ඇල් මැරුණු රිපෝට් එකක් ලියන්න කියලා ඔයා උපදෙස් දුන්නා...........ඒ උපදෙස මම අකුරටම ක්‍රියාත්මක කලා...මගේ රිපෝට් එක ආමි කමාන්ඩර් කියවලා අනුමත කලා, ජොයින්ට් චීෆ්ලාටත් ගියා, ඩිෆෙන්ස් සෙකට්‍රිටත් ගියා ...ඒ හැමෝම අපි රැවැට්ටුවා.....නැද්ද ජිත්?"
"ඔව්, අපේ කමාන්ඩින් ඔෆිසරුයි, සේනාධිනායකයා වෙන ජනාධිපතියි හැරෙන්නට අනෙක් හැමෝම අපි බොරුවෙන් රැවැට්ටුවා....ජාතික ආරක්ෂාව වෙනුවෙන් එහෙම කලා...."
"මම කියන්න හදන්නේ ඒක නෙමෙයි.........මම ඔයාට පිටු 1966ක තඩි ෆයිල් එක දීලා හරියටම පැයකින් ඔපරේෂන් ටර්මිනල් කෝඩ් එකේ අන්තිම සමාලෝචන රැස්වීම තිබුණා. ඒ රැස්වීමේ ඔයත් හිටියා.....මමත් හිටියා.......ඒ රැස්වීම යන අතරතුරේ ඔයා කියපු දේවල් බැලුවම අනෙක් අයට නොතේරුනත්, මට හොඳටම තේරුණු දෙයක් තිබුණා.......ඒක තමයි, ඒ ෆයිල් එකේ තිබ්බ හැම දෙයක්ම ඔයා කියවලා මතක තියාගෙන තිබුණ බව..........”
“මට කියන්න පිටු 1966ක ෆයිල් එකක් පැයක් ඇතුලත කියවලා හැම දෙයක්ම මතක තියාගන්න පුලුවන් මනුස්සයෝ කී දෙනෙක් ඔයා දන්නවද කියලා??"
"ඔයා Riemann Matrix එක ගැන අහලා තියෙනවද?"
"ආ??"
"රයිමාන් මේට්‍රික්ස්.........ඒක හරියට ඩිස්ක් ඩ්‍රයිව් එකක් වගේ....හැබැයි මැග්නෙටික් අංශු වෙනුවට දත්ත ගබඩා කරලා තියෙන්නේ ත්‍රිමාණ ලේසර් ආලෝක මේට්‍රික්ස් එකක.....ලොකු සූට් කේස් එකක ප්‍රමණයේ එකකට ටෙරාබයිට් 5000ක් විතර ගබඩාකරන්න පුලුවන් ........"
“මම IT ඉගෙන ගන්න නෙමෙයි මෙතනට ආවේ……..”
“IT නෙමෙයි AI....කෘත්‍රිම බුද්ධිය……..Cognitive Impression Modeling කියලා තාක්ෂණයක් තියෙනවා.........තවම පර්යේෂණ මට්ටමේ..........මනුස්සයෙකුගේ මොළයේ තියෙන සියලුම නියුරෝන සබඳතා ස්කෑන් කරලා ඩිජිටර් අනුරූපයක් හදාගන්න පුලුවන් තාක්ෂණයක් ඒක......."
“ඉතින්? "
‘අපි හැමෝම ඔය කතාව දන්නවානේ.......ඩේසි වූ දසුන්ට දීපු ලොකු බ්‍රීෆ් කේස් එකේ තිබුණේ ඔය රයිමාන් මේට්‍රික්ස්ද මොකක්ද කියන එකේ ගබඩාකරපු ටෙරී යැන්ග්ගේ විඥානය හා ජීවන මතකයන්………”
"දැන් ඒ මතකයන් තියෙන්නේ මගේ ලඟ ජිත්..."
"මොනවා!!!....."
"මාව අරගෙන ගිය චීන මනුස්සයා........එයා පරිගණක විද්‍යාඥයෙක්.........ඒ මතකයන් මගේ මොළයට කාවැද්දුවා.........හැබැයි මතකයන් විතරයි..........ටෙරී යැංගේ විඥානය තවමත් රයිමාන් මේට්‍රික්ස් එකේ.....හැබැයි වැඩිකල් එහෙම තියා ගන්න බෑ........ඒක වියැකෙනවා......."
"මට තේරෙන්නේ නෑ...කවී…………..ඒ මිනිහා ඔයාගේ මනසේ ජීවත් වෙනවාද?"
"නෑ නෑ ජිත්.........එයාගෙ මතකයන් විතරයි.......එයාට මතක, එයා දන්න හැම දෙයක්ම මම දන්නවා....ඒත් එයාගේ විඥානය මට ඇතුලත් කරලා නෑ.......එහෙම කරන්න බෑ.........."
"ඉතින්! දැන් ඔයා මෙතන මොකද කරන්නේ?"
"ටෙරී යැංග්ගේ මනස ආයෙත් ජීවත් කරනවන්න ඕනෑ.........එයා හොඳ මනුස්සයෙක්......එයා හැම මතකයක්ම මගේ ලඟ තියෙන නිසා මම ඒක හොඳටම දන්නවා......."
"මොන කෙහෙල්මලකටද?" ජිත් කෝපයෙන් ඇසුවා.
"එහෙම නැතිනම් මට කවදාක්වත් ඒ මතකයන් නැති කරගන්න බෑ........රයිමාන් මේට්‍රික්ස් එකේ තියෙන විඥානය නැවත අවදිකරන්න පුලුවන් බලසම්පන්න සුපිරි පරිගණකයක් හදන්න ඕනෑ.......ඒතකොට ඒ පරිගණකය ඇතුලේ ටෙරී යැංග් යලිත් ජීවත් වෙන්න පුලුවන්.....එහෙම වුනොත් මට කාවැදිලා තියෙන ඔහුගේ මතකයන් මකා ගන්න එයා උදව් කරයි....මම ඒක දන්නවා........"
“කොහොමද කවී අපි සුපර් කොම්පියුටර් හදන්නේ? ඕවට කෝටි ගණන් සල්ලි ඕනෑ.......ඔයා මේක අස්සට රිංගලා මේක ඇතුලේ ඔය වැඩේ කරන්න හිතන්න එපා......සදහටම හිරේ යන වැඩක්....දැන් යමු...ප්ලීස්...."
"සල්ලි ප්‍රශ්නයක් නෑ......ටෙරී යැන්ගේ රහස් ස්විස් බැංකු ගිණුම්වල අංක ඔක්කොම මම දන්නවා. ඒවාවල තියෙන සල්ලි ගන්න අංකෙ විතරයි ඕනෑ......." කවී සෙමින් ජිත් වෙත පැමිණියා.
"මට උදව් කරන්න........."
"ඔයා මගෙන් උදව් ඉල්ලන්නේ මට හොරෙන් මේ හැම දෙයක්ම හංගගෙන ඉඳලා නේද?"
"මට වුනේ මොකක්ද කියලා තේරුම් ගන්න මාසෙකට වැඩිය ගියා.......ටෙරීගේ මතකයන් අවදි වෙනකොට මම හිතුවේ මට පිස්සු හැදෙන්න එනවා කියලා....මේ ආගන්තුක මතකයන් මගේ ඔලුවට ආවාට පස්සේ මට හිතාගන්න බැරිවිධියට තරහා යනවා........මතකයන් දෙක එකට ගැටෙනකොට මට ඉවසගන්න බෑ........තරහා වැඩිවුනාම මට කිසිකෙනෙක් රුස්සන්නේ නෑ.....ඇඟ වෙවුලන්න ගන්නවා.....කවුරුහරි වචනයක් කිව්වත් කෑගහලා බණින්න හිතෙනවා......මම ඔයාගෙන් ඈත් වෙලා හිටියේ මම පාලනයක් නැතුව කියන කරන මොකකින් හරි ඔයාගේ හිත රිදෙයි කියලා..."
"මට සමාවෙන්න ජිත්.......ඒකයි මම ඔයාගෙන ඈත් වෙලා හිටියේ.......මම රොබෝවෙක් නෙමෙයි......මට කේන්තිය වැඩිවුනාම දරුණු ආවේග එනවා....ඇඟට අමුතු ශක්තියක් එනවා.....මට හරි බයයි මම කාට හරි අණතුරක් කරයි කියලා....මට මාවම පාලනය කරගන්න බෑ වගේ දැනෙනවා........ඔයා වෙඩි තිබ්බා නම් මම මැරෙනවා.......Help me Jith….please……..මට මේ මනුස්සයාව මගේ ඔලුවෙන් අයින් කර ගන්න ඕනෑ......නැත්තම් මට ඇත්තටම පිස්සු වැටෙයි.........."
VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi . AUTHOR/OWNER/ADMINISTRATOR . CONTACT : terence.arachchi@gmail.com . GOOGLE + : About Me . FACEBOOK : www.facebook.com/terence.arachchi . __________________________________________________________________________
