Related Posts Plugin for WordPress, Blogger...

Wednesday, 31 December 2014

Mysterious Chinese blogger predicted AirAsia jet crash | එයා-ඒෂියා යානය කඩාවැටීමට දින දහතුනකට පෙර එයා ඒෂියා යානයක් කඩාවැටෙන බවට අණතුරු ඇඟවූ අත්භූත චීන බ්ලොග්කරුවා කවුරුන්ද???


පසුගිය දෙසැම්බර් 15 වැනිදා චීන බසින් පලවන බ්ලොගයකට පෝස්ටුවක් දැමූ නාදුන චීන බ්ලොග් කරුවෙක්, "බ්ලැක් හෑන්ඩ්" හෙවත් කළු හස්තය නැමති සංවිධානයක් මැලේසියාවේ දෙවන විශාලතම ගුවන් සේවය වන එයා ඒෂියා ගුවන්සේවයේ යානයකට ප්‍රහාරයක් එල්ල කරන බවට අණතුරු ඇඟවීමක් පලකලේය. ඉන් නොනැවතුනු ඔහු අතුරුදහන්වූ, තවමත් කිසිදු තොරතුරක් නැති මැලේසියානු MH370 යානයේ අතුරුදහන්වීමට මෙන්ම යුක්‍රේන අහසේදී මිසයිල ප්‍රහාරයකින් කඩාවැටුනායයි සැක කෙරෙන MH17 යානයේ විනාශයටද මෙම සංවිධානය වගකිව යුතු බවත්, යම් හේතුවක් නිසා ඔවුන් මැලේසියානු ගුවන්සේවා කර්මාන්තය විනාශකිරීමට සැරසෙන බවත්  චීන බසින් ලියවුනු සිය බ්ලොග් සටහනේ ප්‍රකාශකොට සිටියා.

මේ අත්භූත බ්ලොග්කරුවා කවුරුන්දැන් කිසිවෙකුත් නොදැන සිටි අතර චීන බ්ලොග් අවකාශයේ බොහෝ දෙනෙකු කුමණ්ත්‍රණමතධාරී (conspiracy theorist) පිස්සෙකු ලෙස අවඥාවට බඳුන්කොට කොමෙන්ටු තබා තිබුණා. එසේවුවත් මෙම බ්ලොග් කරුවා තමන් පවසන දෙය පිලිබඳව දැඩි විශ්වාසයකින් සිටි අයෙකු බව පෙනුනේ නැවත නැවතත් විවිධ චීන බ්ලොග් අඩවි හා අන්තර්ජාන සාකච්ඡා මණ්ඩප වල (internet discussion forums) සිය අණතුරු ඇඟවීම සටහන් කිරීමෙනුයි. මැලේසියානු යානාවල ගමන් කිරීමෙන් වලකින ලෙස ඔහු සිය චීන සහෘදයින්ගෙන් ඉල්ලා සිටියා.

ඒයා ඒෂියා යානය කඩාවැටුනු දෙසැම්බර් 28 උදාවනවිට ඔහුගේ විවිධ චීන අඩවිවල මෙම අණතුරු ඇඟවීමේ පෝස්ටු හා කොමෙන්ටු 39ක් සටහන්වී තිබුණා.ඔහුගේ චීන බසින් ලියූ පෝස්ටු ඉංග්‍රීසියට පරිවර්තනය කල සමහරුන් "බ්ලැක් හෑන්ඩ්" හෙවත් කළු හස්තය ලෙස ඔහු හඳුන්වන්නේ නිශ්චිත සංවිධානයක් නොවන බවට තර්ක කරනවා. ඔවුන් පවසන්නේ කළු හස්තයක් ලෙස චීන බසින් හඳුන්වන්නේ රහසේ ක්‍රියාත්මක වන යම් ආකාරයක සාපරාධී සංවිධානයක්.

ඔහුගේ අවසන් පෝස්ටු කිහිපයේ මෙසේ සටහන් කොට තිබුණා "කළු හස්තය ඉතා බලසම්පන්නයි.... එබැවින් එයා ඒෂියා යානාවල ගමන් ගැනීමෙන් වලකින්න.... නැතිනම් ඔබටත් MH370 ගමන් ගත්තවුන් මෙන් අතුරුදහන් වන්නට සිදුවේවි..."

ඔහුගේ පෝස්ටුවකට කොමෙන්ටුවක් දැමූ එක් චීන බ්ලොග්කරුවෙකු තමන් මෙසේ අනාවැකි කියන්නේ කෙසේදැයි විමසා සිටියා. එයට පිලිතුරු දෙනවා වෙනුවට ඔහු මෙසේ ලියාතබා තිබුණා " You can still hide, all those that see the post can still save themselves."


ඔහුගේ පෝස්ටු චීන බ්ලොග් අවකාශයේ සැරිසරන 650,000 දෙනා කියවා තිබුණත්, දෙසැම්බර් 28 එයා ඒෂියා යානය අතුරුදහන්වූ බව රූපවාහිනී තිරවල දිග හැරෙනතෙක් බොහෝ දෙනෙකු ඒ පිලිබඳව තැකීමක් කලේ නෑ. දෙසැම්බර් 15-16-17 දිනවල දිගින් දිගටම විවිධ ස්ථානවල පෝස්ටු හා කොමෙන්ටු 39ක් දැමූ ඔහු දෙසැම්බර් 17වැනි දිනෙන් පසු බ්ලොග් අවකාශයෙන් අතුරුදහන් වූවා.

මේ අත්භූත බ්ලොග්කරුවා කවුද? ඔහු/ඇය එයා ඒෂියා යානය කඩාවැටීමට දින 13කට පෙර ඒබව දැනගත්තේ කෙසේද?

 මේ පිලිබඳව දැවැන්ත විවාදයක් චීන අන්තර්ජාලයේ මේවන විට ඇතිවී ඇති අතර සමහරු මොහු මෙම යානා විනාශවීම වගකිව යුතු යම් බලසම්පන්න, අතිශය රහසිගත සංවිධානයක පරිගණක ජාලයට ඇතුලුවී සොරාගත් තොරතුරු, ජීවිත හැකි ප්‍රමාණයක් බේරා ගැනීම සඳහා අන්තර්ජාලයට මුදාහරින්නට ඇති බවට මත පලකරනවා.

තවත් සමහරුන් පවසන්නේ මොහු චීන ඔත්තුසේවාවක නිළධාරියෙකු බවත්, ඔහුට්/ඇයට ලැබුණු අතිශය රහසිගත තොරතුරක් ජීවිත බේරාගැනීමේ චේතනාවෙන් අන්තර්ජාලයට මුදාහරින්නට ඇති බවත්ය.





Tuesday, 30 December 2014

යුධ තාක්ශණයේ අලුත්ම පෙරලිය: ස්ටෙල්ත් ඩ්‍රෝන හමුදාව

බ්‍රිතාන්‍යයේ BAE සමාගම නිශ්පාදනය කරන "ටැරැනිස්" ස්ටෙල්ත් ඩ්‍රෝනය
2011 මැයි 2දින හිමිදිරි උදෑසන පාකිස්තානයේ ඇබොටාබාද් නගරයට ඉහලින් පියාසර කරමින් තිබූ ස්ටෙල්ත් ඩ්‍රෝන යානයක් එහි කැමරා මගින් ලබාගන්නා සජීවී වීඩියෝ දර්ශණ ධවල මන්දිරයේ මෙහෙයුම් කාර්යාලයේ වීඩියෝ තිරමතට එවමින් සිටියා. කාර්යාලයේ අසුන්ගෙන සිටි ජනාධිපති බැරක් ඔබාමා හා ඔහුගේ ආරක්ශක කවුන්සිලය ඒ වනවිටත් ක්‍රියාත්මක වෙමින් තිබූ ඔසාමා දඩයම් කරගැනීමේ මෙහෙයුම සජිවීව නරඹමින් සිටියේ එම ස්ටෙල්ත් ඩ්‍රෝන යානයේ උදව්වෙන්.

ජනාධිපති ඔබාමා ඇතුලු පිරිසට මෙම දර්ශණ ලබාදුන්නේ Lockheed Martin RQ-170 අමෙරිකානු ස්ටෙල්ත් ඩ්‍රෝන යානයකි. ඔසාමා නොදැන සිටියත් මාස ගණනාවක සිටිම CIA ඔත්තු සේවාව මෙහෙයවූ මෙවන් ස්ටෙල්ත් ඩ්‍රෝන යානා ඔසාමාගේ නිවස දෙස පැය විසිහතර පුරාම ඇසගසාගෙන සිටියා. මෙම යානා මාසග ණනාවක් පුරාම පාකිස්තානු රේඩාර්වලින් සැඟවී සිටිමින් ඇබොටාබාද් ඉහල අහසේ පියාසර කිරීමම මෙම යානාවල ස්ටෙල්ත් හැකියාවන් මොනවට පිළිබිඹු කරනවා. ඇබොටාබාද් නගරය පාකිස්ථානයේ ඉහලම මිලිටරි ඇකඩමිය මෙන්ම න්‍යශ්ඨික අවි නිශ්පාදන හා ගබඩා සංකීර්ණ අසලින්ම තිබූ, සූක්ශ්ම රේඩාර් දැළකින් ආවරණය වූ නගරයක් වුනා. ඔසාමා මෙම නගරය සිය වාසස්ථානය ලෙස තෝරාගන්නට ඇත්තේද ඒවන විටත් වසර ගණනාවක් තමා දඩයම් කරගැනීමට වෙහෙසුනු අමෙරිකානු ඔත්තු සේවාවලින් ආරක්ශාවීමටයි. පාකිස්ථානයේ ඉහලම ආරක්ශාව ඇති නගරයකට අමෙරිකානුවන්හට රිසිසේ ඔත්තු බලමින් ප්‍රහාරයක් එල්ල කිරීමට හැකිවෙනු ඇතැයි ඔසාමා සිහිනෙකින්වත් සිතන්නට නැතුව ඇති.

R-170 යානා මගින් හිමිදිරි උදයේ මිදුලේ ඇවිදිමින් ව්‍යායාම කරන ඔසාමාගේ ඡායාරුප ගෙන, එම ඡායාරූප වලින් ඔහුගේ උස තහවුරු කරගෙන සිටියා. රහස් ඔත්තු විශේෂඥයින්ට අනුව මිනිසෙකු කොතරම් වෙස්වලාගත්තද, ප්ලාස්ටික් සැත්කම් වලින් මුහුණ වෙනස් කරගත්තද සැඟවිය නොහැකි එක් දේහ ලක්ශණයක් වන්නේ ඔහුගේ/ඇයගේ උස ප්‍රමාණයයි. ස්ටෙල්ත් ඩ්‍රෝන මගින් විවිධ කෝණවලින් ගත් ඡායාරූප ආධාරයෙන් මිදුලේ ඇවිදින්නාගේ උස මැනගත් සී.අයි.ඒ රහස් ඔත්තු විශ්ලේෂකයින් (intelligence analysts) එම පුද්ගලයාගේ උස, ඔසාමා බින් ලාඩෙන් ගේ උසට සමාන බව තහවුරු කරගත්තා.

දශක ගණනාවක් පුරාම දුරස්ථව ක්‍රියාත්මක කල හැකි ඩ්‍රෝන තාක්ශණය නිර්මාණය වී තිබුණත් එම තාක්ශණයේ වැදගත් කම අමෙරිකානු යුධ සැළසුම් කරුවන්ට අවබෝධ වුනේ 2001 සැප්තැම්බර් 11 ප්‍රහාරයෙන් පසු අල් ඛයිඩාවට විරුද්ධව සොමාලියාව, යේමනය, ඇෆ්ඝනිස්තානය හා පාකිස්ථානයේ දුශ්කර ප්‍රදේශවල රහසිගත මෙහෙයුම් ක්‍රියාත්මක කරන්නට පටන් ගත් අවධියේයි. අමෙරිකාවට අතිශයින්ම සතුරු රජයන් හෝ සංවිධාන බලවත් වුනු මෙම ප්‍රදේශවල තොරතුරු ලබාගැනීමට, සෙබලුන් හෝ කෝටිගණන් වටිනා ප්‍රහාරක යානා නොයවා ප්‍රහාර එල්ලකිරීමේ අවශ්‍යතාවය මත අමෙරිකානු හමුදා සියලු ආකාරයේ ඩ්‍රෝණ තාක්ශණයන් දියුණු කිරීම සඳහා අත දිගහැර බිලියන ගණනින් මුදල් වියදම් කලා.

අනාගත ඩ්‍රෝන යානා ජයගත යුතු අභියෝග

දැනට ඩ්‍රෝන යානා සිය මෙහෙයුම් දියත් කරන්නේ ප්‍රතිප්‍රහාර එල්ලකොට එම යානා බිමදැමීම සඳහා සූක්ශ්ම රේඩාර්, මිසයිල පද්ධති හා ඩ්‍රෝන යානාවෙත ඉලෙක්ට්‍රොනික ප්‍රහාර එල්ල කොට ඒවා අඩපණ කල හැකි තාක්ශණයන් නොමැති, ලොව දුප්පත් ප්‍රදේශ වලයි. එහෙත් අනාගත අභියෝග අතිදුශ්කර ප්‍රදේශවල සැඟවී සටන් කරනා මුස්ලිම් අන්තවාදීන් වෙතින් පමණක් නොවන බව අමෙරිකානුවන් දන්නවා.අනාගතෙයේදී රුසියාව, චීනය වැනි අධිතාක්ශණික ප්‍රහාරක හැකියාවන් ඇති සතුරන්ගේ ප්‍රහාරක හැකියාවන් හා ආරක්ශක උපක්‍රමවලට මුහුණ දිය හැකි ඩ්‍රෝන යානා දැන් නිපදවෙමින් තිබෙනවා. Northrop-Grumman RQ-180 එවැනි යානාවක්. අතිශය රහසිගත ලෙස වැඩිදියුණු වන මෙම යානාව අමෙරිකාවේ සුප්‍රකට Nevada Area-51 ප්‍රදේශයේ රහස් පර්යේෂණාගාරවල අවසන් පරික්ෂණවල නිරත කෙරෙන බව වාර්තාවනවා.

Northrop-Grumman RQ-180
සුපිරි ස්ටෙල්ත් තාක්ශණයන් කැටිකොට නිර්මාණය කොට ඇති RQ-180 යානය ඔත්තු බැලීම හා සතුරු ඉලක්ක වෙත ඉලෙක්ට්‍රොණික ප්‍රහාර එල්ලකිරීම සඳහා යොදාගත හැකි බව එවියේෂන්-වීක් ගගන තාක්ශණ සඟරාව පවසනවා.නවීන රේඩාර් පද්ධති හා ගුවන් ආරක්ශක මිසයිල පද්ධති වලින් ආරක්ශිත ගුවන් කලාපවලට රහසේ ඇතුලුවී ඔත්තු බැලීමේ හැකියාව RQ-180 සතුබව පැවසෙනවා.

අමෙරිකානු ගුවන් හමුදාව RQ-180 අවසන් පරීක්ශණ පියාසැරි සිදුකරද්දී අමෙරිකානු නාවික හමුදාව, ගුවන්යානා ගෙනයන නෞකාවක් මතට ස්වයංක්‍රීයව ගොඩබැසිය හැකි ඩ්‍රෝනයානාවක අවසන් පරීකශණ පියාසැරි සිදුකරමින් පවතිනවා. X4-7B ලෙස නම් කොට ඇති මෙම යානය දැනටමත් සාගරය මැද යාත්‍රා කරමින් සිටින ගුවන්යානා ගෙනයන නෞකා වෙතට පියාසර කොට ස්වයංක්‍රීයව ගොඩබැස්සවීමේ පියාසැරි ගණනාවක් සාර්ථකව අවසන් කොට තිබෙනවා.

Northrop Grumman X-47B Unmanned Combat Aerial Vehicle (UCAV) ලෙස හැඳින්වෙන මෙම යානය නිර්මාණය කොට ඇත්තේ ගුවන් යානාගෙන යන නෞකාවකින් ගුවන්ගතවී ස්වයංක්‍රීයවම සතුරු ඉලක්කයකට ප්‍රහාර එල්ලකොට මිනිස් ආධාරයකින් තොරව නැවත එම නෞකාවට ගොඩබැස්සවීමට හැකිවන ආකාරයෙන්.නෝත්‍රොප්-ගෘම්මාන් සමාගම නිර්මාණය කරන මෙම යානය සතුව ඉතා සංකීර්ණ කෘත්‍රිම බුද්ධියකින් යුතු රොබෝ නියමුවෙකු හා පියාසර පද්ධති අඩංගු කොට තිබෙනවා. ඊට අමතරව මෙම යානයද ඉතා ඉහල ස්ටෙල්ත් හැකියාවකින් යුතු බව පැවසෙනවා.

2013 ජූලි මාසයේදී අත්ලාන්තික් සාගරයේ යාත්‍රාකරමින් තිබූ ගුවන්යානා ගෙනයන USS George H.W. Bush නෞකාව මතට ස්වයංක්‍රීයව ගොඩබස්වන ලද X-47B යානය
මහ මුහුදේ යාත්‍රාකරන කුඩා ධාවන පථයකින් යුතු නෞකාවක් මතට සාර්ථකව යානයක් ගොඩබැස්වීම මිනිස් නියමුවෙකුට පවා ඉතා අපහසු කාර්යයක්. X-47B යානාව එම සංකීර්ණ ක්‍රියාවලියම සවයංක්‍රීයවට සිදුකල හැකි බවට පරීක්ශණ පියාසැරි ගණනාවකදී තහවුරු කොට තිබෙනවා.





Sunday, 28 December 2014

AirAsia Flight QZ8501 අතුරුදහන්වේ... අලුත්ම තත්වය

අතුරුදහන්වූ එයා-ඒෂියා යානය පෙර පියාසැරියකදී...
ඉන්දුනීසියාවේ සුරබායා ගුවන්තොටුපොලෙන් සිංගපූරුව බලා පියාසරකරමින් තිබූ එයා-ඒෂියා පියාසැරි අංක QZ8501 යානය පාලන මධස්ථානය සමග තිබූ සබඳතා ඇණහිටියේ අද පෙරවරු 6.24ට (ඉන්දුනීසියානු වේලාවෙන්) පමණය. ඒවන විට යානය ජාවා මුහුද ඉහලින් පියාසර කරමින් තිබුණි. Airbus A320-200 වර්ගයේ යානයක් වූ මෙහි මගීන් 155ක් හා කාර්යමණ්ඩලයේ 7දෙනෙකු ගමන් කරමින් සිටියහ.


කෝටිපති මැලේසියානු ව්‍යාපාරිකයෙකුවූ ටෝනි ෆර්නැන්ඩස් මහතාට අයත් එයා-ඒෂියා ගුවන් සමාගම ආසියාවේ අඩු මිල ගුවන්සේවා (low-cost air carrier) වෙළඳපොලේ වැඩිම ප්‍රතිශතයක් හිමිකරගෙන සිටින, ආරක්ශාව පිලිබඳ හොඳ නමක්දිනාගෙන සිටින සමාගමකි. අතරුදහන්වූ යානය "එයා-ඒෂියා ඉන්දුනීසියා" ලෙස හඳුන්වන මැලේසියානු එයා ඒෂියා මවු සමගමට අයත් අනුබන්ධ ගුවන් සමාගමකට අයත් යානයකි. මීට පෙර එම යානයේ කිසිදු කාර්මික දෝෂයක් නොතිබූ බව මාධ්‍ය වෙත ප්‍රකාශයක් නිකුත්කල ටෝනි ෆර්නැන්ඩස් පවසා සිටියේය. යානයේ නියමුවා පියාසර පැය 6100ක පමණ පලපුරුද්දක් ඇති, එයා ඒෂියා සමගමේ යානාවල පැය 2275ක් පමණ පියාසර කොට ඇති ඉතා පලපුරුදු නියමුවෙකු බව ෆර්නැන්ඩස් මහතා වැඩිදුරටත් පවසා සිටියේය.


යානය ඉන්දුනීසියානු වේලාවෙන් පැය 5.35ට සුරබායා තොටුපොලෙන් පිටත්ව ගිය අතර ගමනේ අතරමගදී ඉන්දුනීසියානු වේලාවෙන් 6.13ට නියමුවා අයහපත් කාළගුණය හා ඝණ වැසිවලාකුළු නිසා යානයේ පියාසර මාර්ගය වෙනස් කිරීමට අවසර දෙනමෙන් ඉල්ලා සිටි බැව් වාර්තාවේ.

යානය අතුරුදහන්වූ බව වාර්තාවූ වහාම ඉන්දුනීසියානු හා සිංගප්පූරු රජයන් යානය සෙවීම සඳහා ගුවන්යානා පිටත්කල හැරිය නමුත් රාත්‍රී අඳුර වැටෙන විටත් යානය පිලිබඳව කිසිදු හෝඩුවාවක් වාර්තාවී නොතුබුණි.






Thursday, 25 December 2014

ස්ටීව් ජෝබ්ස් ගෙන් ජීවිතයට ඔවදන්....



මෙය; පිස්සන් යයි අනෙක් අය සිතන්නන්, නොගැලපෙන්නන්, කැරලි ගසන්නන්, කරදර කාරයින්, සතරැස් කොටුවල සිරවුනු වටකුරු හැඩැත්තන් හා වෙනස් ලෙසින් සිතන්නන් වෙනුවෙනි... ඔවුන් නීති රෙකුලාසි වලට අකමැතිය.... ඔබට ඔවුන් උපුටා දැක්විය හැකිය, පාරට්ටුකල හැකිය, ගැරහිය හැකිය, එහෙත් ඔබට කිසි විටෙකත් ඔවුන් නොතකා සිටිය නොහැකිය.... 

ඒ ඔවුන් වෙනස් කරන්නන් බැවිනි.... ඔවුන් මිනිස් වර්ගයා ඉදිරියට තල්ලු කරයි... සමහරුන්ට ඔවුන් පෙනෙන්නේ උමතු වූවන් ලෙසිනි, එහෙත් අපටනම් පෙනෙන්නේ ඔවුන් ප්‍රතිභාවන්තයින් ලෙසිනි.  ඒ මක්නිසාද යත්, ලෝකය වෙනස් කරන්නේ තමන්ට එසේ කල හැකියයි සිතන, උමතු යයි අනෙක් අය සිතන ප්‍රතිභාවන්තයින් විසින් බව අප දන්නා නිසාය.......





කනත්තේ මිහිදන්වී සිටින ධනවත්ම පුද්ගලයා වීමට මට අවශ්‍ය නැත. රාත්‍රී නින්දට යනවිට, අප විශිෂ්ඨ යමක් සිදුකලා යන සිතුවිල්ලෙන් සැනසීම මට ඊට වඩා වැදගත්ය...




"නිර්මාණයකිරීම" අමුතුම වචනයකි. බොහෝදෙනා සිතන්නේ නිර්මාණය යනු, යමක් ඇසට පෙනෙන ආකාරය කියායි. එහෙත් ගැඹුරින් බැලූකල නිර්මාණය යනු පෙනුම නොව, යමක් ක්‍රියාත්මකවන ආකාරයයි...




ජීවතය අකාරුණිකය, සමහර අවස්ථාවලදී ඔබට දැඩි පසුබෑම්, අසාධාරණකම් සිදුවිය හැකිය. විශ්වාසය අත් නොහරින්න..




ඔබට ජීවිතයේ වැඩිකොටසක් ඔබගේ ජීවිකාව වෙනුවෙන් ගතකරන්නට සිදුවේ.. එබැවින් තෘප්තිය ලබගත හැකි එකම මාර්ගය හොඳින් වැඩ කිරීමයි. හොඳින් වැඩ කිරීමට නම්, ඔබ ඔබගේ වෘත්තියට කැපවී, එය ආදරයෙන් සිදුකලය යුතුය. 

ඔබට ආදරයෙන්, කැපවීමෙන් කලහැකි දෙයක් තවමත් නොලැබුණි නම්, අතෘප්තිමත් වෘත්තියක හෝ රැකියාවක නතර නොවන්න, ඔබට තෘප්තිය ලැබිය හැකි වෘත්තියක්, ජීවිකාවක් සොයා යන්න. හදවත හා බැඳී ඇති සියළුදේ මෙන්ම, ඔබට සතුටෙන් කලහැකි යමක් ලැබුණුවිට ඒ බව ඔබ හදවතට දැනෙනු ඇත...



නිර්මාණශීලීත්වය යනු අන් අයට නොපෙනන සංදර්භයන් දැකීමට ඇති හැකියාවයි. ඔබ නිර්මාණශීලී නවෝත්පාදකයෙකුගෙන්, ඔහු සිය නිර්මාණය කෙසේ කලේදැයි ඇසුවහොත්, ඔහුට යම් වරදකාරී හැඟීමක් ඇතිවේ. එසේ වන්නේ සැබැවිම ඔහු එය සිතාමතා සැළසුම් කොට කල නිර්මාණයක් නොවන බැවිනි. අන් අයට නොපෙනෙන යමක් ඔහු දැක ඇත, ඔහු නව නිර්මාණයේ පාදම එයයි.


Wednesday, 24 December 2014

ඉන්දියාව, දේශීයව නිර්මාණය කරන ලද ටොන් 8ක් උඩුගුවනට ගෙනයා හැකි දැවැන්ත රොකට්ටුවක් සාර්ථකව අත්හදා බලයි!

GSLV Mark III [Made in India]

තාක්ශණික තොරතුරු

විශාලත්වය: උසින් මීටර් 43, විශ්කම්භය මීටර් 4

පියාසර අදියර: 3කි

එන්ජින් වර්ග: 
ප්‍රථම අදියර - S-200 ඝණ ඉන්ධන බූස්ටර් එන්ජින් 2කි (ඉන්දියාවේ නිර්මාණය කරනලදී). මේ බූස්ටර් තත්පර 130ක් ක්‍රියාත්මකවේ. එක් බූස්ටරයක් මීටර් 25ක් දිගින් යුතු අතර ටොන් 200ක ඝණ ඉන්ධන පුරවා ඇත.

දෙවන අදියර - ඉන්දියාවේ නිර්මිත "L-110 විකාස්" මාදිලියේ ද්‍රව එන්ජින් පද්ධතිය. ටොන් 110ක ද්‍රව ඉන්ධන ගෙනයා හැකිය. පද්ධතිය එන්ජින් 2කින් යුක්තය. ප්‍රථම අදියරේ බූස්ටර් එන්ජින් දල්වා තත්පර 113කින් දෙවන අදියර ක්‍රියාත්මකවීම අරඹයි.

තෙවන අදියර - ඉන්දියාවේ නිර්මිත C-25 ද්‍රව හයිඩ්‍රජන් හා ඔක්සිජන් දහනය කරන එන්ජිම. ටොන් 25ක ද්‍රව ඉන්ධන ගෙනයා හැකිය.

උඩුගුවනට ගෙනයා හැකි බර: 
පහල පෘථිවි කක්ශයට (කිලෝමීටර් 160ක් ඉහල කක්ශය) මෙට්‍රික් ටොන් 8ක බරක් ඔසවාගෙන යා හැකිය.

භූකේන්ද්‍රීය ස්ථායි කක්ශයට (කිලෝමීටර් 35,000-46,000ක් ඉහල කක්ශය) මෙට්‍රික් ටොන් 4ක් ගෙනයා හැකිය.

මෙම සාර්ථක අත්හදා බැලීමත් සමග භූ කේන්ද්‍රීය ස්ථායි කක්ශයකට (Geosynchronous Transfer Orbit) චන්ද්‍රිකාවක් ගෙනයා හැකි බලසම්පන්න රොකට්ටු ඇති රටවල් කිහිපය (අමෙරිකාව, රුසියාව, යුරෝපා සංගමය හා චීනය) අතරට ඉන්දියාවත් එකතුවන අතර ඩොලර් බිලියන 300ක් පමණ වටිනාකමකින් යුතු, ලෝක චන්ද්‍රිකා ගුවන්ගත කිරීමේ කර්මාන්තයේ තරඟකරුවෙකු වීමට ඉන්දියාව මගපාදාගෙන තිබෙනවා. Geosynchronous Satellite Launch Vehicle (GSLV) Mark III ලෙස නම්කොට ඇති මෙම රොකට්ටුව අන්ද්‍රා ප්‍රදේශයේ පිහිටුවා ඇති ස්තිශ් ධවාන් අභ්‍යවකාශ මධ්‍යස්ථානයෙන් ගුවන්ගත කොට තිබෙනවා. ඉන්දියාවේ අභ්‍යවකාශ වැඩසටහනට ප්‍රභල දායකත්වයක් සැපයිමට ඉන්දීය අග්‍රාමාත්‍ය නරේද්‍ර මෝදි මහතා පියවරගෙන ඇති අතර එහි වාර්ශික මූල්‍ය සැපයුම ඩොලර් බිලියනක් දක්වා ඉහල දමා තිබෙනවා.

චන්ද්‍රිකා උඩුගුවනට ගෙනයාමට අමතරව දැනට සැළසුම් අවස්ථාවේ තිබෙන, ඉන්දීය අභ්‍යවකාශගාමියෙකු උඩුගුවනට යැවීමේ ව්‍යාපෘතියේ වැදගත් දායකත්වයක් මෙම රොකට්ටුවට තිබෙනවා. ඉන්දීය අභ්‍යවකාශගාමීන් රැගත් කැප්සූලය අභ්‍යවකාශය වෙත රැගෙන යනු ඇත්තේ මෙම රොකට්ටුව මගිනුයි. මෙම අත්හදාබැලීමේ පියාසැරියේදී GSLV Mark III රොකට්ටුව අභ්‍යවකාශගාමීන් තිදෙනෙකු අභ්‍යවකාශයට රැගෙනයා හැකි කැප්සූලයක්ද පරියේශණ කටයුතු සඳහා උඩුගුවනට ගෙනගොස් තිබෙනවා.





Tuesday, 23 December 2014

බ්‍රිතාන්‍යය සලිත කළ අත්භූත පිපිරුම් හඬ අභිරහස් අධිවේගී ස්ටෙල්ත් යානයකින් නිකුත් වූවක්ද?

මීට සති දෙකකට පමණ පෙර, පසුගිය නොවැම්බර් 29 සෙනසුරාදා දින රාත්‍රියේ ට්විටර් සමාජ ජාලය හදිසියේම පිරී ඉතිරී ගියේ තමන්ට අභිරහස් පිපිරුම් හඬ කිහිපයක් අසන්නට ලැබුණු බව පවසමින් එන්ගලන්ත වැසියන් විසින් #loudbangs, #omgwereallgoingtodie වැනි හෑෂ්ටැග්ස් සමග පළකරන ලද ට්වීට් සටහන් වලිනි. ලන්ඩනයේ සිට ග්ලාස්ගෝ, බටහිර සසෙක්ස්, බෙඩ්ෆෝර්ඩ්ෂයර්, උතුරු ඩෙවොන් වැනි ප්‍රදේශ දක්වා වූ විශාල වපසරියකට ශ්‍රවණය වූ මේ පිපිරුම් හඬ හේතුවෙන් සමහර ස්ථානයන්හි වීදුරු ජනේල, දොරවල් දෙදරා ගිය බවද, සුරතල් සුනඛයින් භීතියෙන් වියරු වැටුණු බවද වාර්තා විය.

රාත්‍රී 10 - 10.30 පමණ වද්දී මෙම සිදුවීම් පෙළ වාර්තා වුණි. සති දෙකක් ඉක්ම ගොස් තිබේ. සැබැවින්ම සිදුවූයේ කුමක්ද? ස්වභාවික සංසිද්ධියක්ද? රජයේ රහස් මෙහෙයුමක්ද? එසේත් නැතිනම් සමහරුන් කියනා ආකාරයට බ්‍රිතාන්‍ය ජනයා එලෙස අත්දුටුවේ  මක් 10ක පමණ වේගයෙන් පියාසර කල හැකි බවට මත පලවෙන අභිරහස් අධිවේගී ස්ටෙල්ත් යානයකින් නිකුත්වූවක්ද?

මෙම ශබ්ද විවිධ පුද්ගලයින් විසින් පටිගත කරගෙන තිබෙන අතර. මෙම පටිගත කිරීම් වලට සවන්දුන් බ්‍රිතාන්‍ය ජෙට් එන්ජින් විශේෂඥයෙකු පවසා සිටියේ මෙම ශබ්ද "pulse detonation engine" නම් පර්යේෂණ මට්ටමේ තිබෙන අධිවේගී ජෙට් එන්ජිමක් ක්‍රියාත්මක වීමේදී නිකුත්වෙන ශබ්දයට සමානය. එහෙත් බ්‍රිතාන්‍යයේ ආරක්ශක අමාත්‍යාංශය ප්‍රකාශ කොට සිටින්නේ යුධගුවන්යානා කිසිවන් මෙම පිපිරුම් ශබ්ද ඇසෙන අවස්ථාවලදී බ්‍රිතාන්‍ය අහසේ නොතිබූ බවයි.



Monday, 22 December 2014

මහා රාවණා කොරල් පරයෙන් හමු වූ අබිරහස් නැව

jjjjjjj

මහා රාවණා කොරල් පරයෙන් හමු වූ අබිරහස් නැව (Originally published in සිවුමංසල කොලූගැටයා, Ravaya.  Unicode edition from Open Minds!, Nalaka Gunawardene)

වසර 52ක් තිස්සේ (1956 – 2008) ශ‍්‍රී ලංකාවේ පදිංචිව සිටි, මෙරටට මහත් සේ ඇලූම් කළ ආතර් සී. ක්ලාක් ශ‍්‍රී ලංකාව ගැන දේශාටන පොත් කිහිපයක් රචනා කළා. මේ පොත්වල අන්තර්ගතය වූයේ දුපත් තුළත්, එය අවට මුහුදේත් ක්ලාක් හා ඔහුගේ මිතුරන් කළ ගවේෂණ ගැන අත්දැකීම් හා ඡුායාරූපයි. ඉන්දියානු සාගරයේ පුරෝගාමී කිමිදුම්කරුවකු වූ ක්ලාක් ලියූ මේ පොත් ගැන මෙරට ඉංග‍්‍රීසි පාඨකයන් පවා එතරම් දැනුවත් නැහැ. මෑතක් වන තුරු මේ පොත් සිංහලට පෙරළී තිබුණේ ද නැහැ.

කල් ගත වී හෝ මේ හිදැස පුරවන්නට මනෝ ප‍්‍රනාන්දු ලේඛකයා ඉදිරිපත් වී සිටිනවා. ක්ලාක් ශ‍්‍රී ලංකාව ගැන ලියූ මුල් ම චාරිකා ග‍්‍රන්ථය වූ The Reefs of Taprobane (1957) ඔහු 2011දී ‘ලක්දිව සාගර පත්ල’ නමින් පරිවර්තනය කළා. එයට ලැබුණු පාඨක ප‍්‍රතිචාර යහපත් වූ බැවින් 1964දී ක්ලාක් ලියූ The Treasure of the Great Reef නම් වූ පොත ‘‘මහා ගල්වැටි පරයේ මුහුදුබත් නිධානය’’ නමින් දැන් ඔහු සිංහලට පෙරළා තිබෙනවා. මේ දෙකම සූරිය ප‍්‍රකාශනයි.

බි‍්‍රතාන්‍ය ජාතික ආතර් ක්ලාක් හා ඔහුගේ කිමිදුම් සගයා වූ මයික් විල්සන් යන දෙදෙනාම 1956දී මාස කිහිහිපයක් මෙරට අවට මුහුද ගවේෂණය කරන්නට පැමිණ පසුව මෙහි පදිංචි වූවා. ඔවුන්ගේ මුල් ම ලාංකික මිතුරන් වූයේත් කිමිදීමට හා මුහුදට ඇලූම් කළ කිහිප දෙනෙක්. ඒ අය අතර සත්ත්‍ව විද්‍යාඥ රොඞ්නි ජොන්ක්ලස් හා බොක්සිං ක‍්‍රීඩක හෙක්ටර් ඒකනායක මුල් තැන ගත්තා.

මයිකල් විල්සන් කිමිදීමට, දිය යට ඡායාරූප ගැනීමට හා දිය යට චිත‍්‍රපට රූපගත කිරීමට හැකියාව තිබූ බෙහෙවින් නිර්මාණශීලී කෙනෙක්. ඇත්තට ම ක්ලාක්ට කිමිදීමේ වටිනාකම පෙන්වා දී එයට යොමු කළේත් මයික්. මේ දෙදෙනා ලංකාවට එන්නට කලින් ඕස්ටේ‍්‍රලියාවේ මහා බාධක පරයේ (Great Barrier Reef) මාස කිහිපයක් කිමිදෙමින් ගවේෂණය කර තිබුණා.

ලංකාව අවට මුහුදු බොහොමයක් 1950 දශකය මැද වන විටත් කිසිවකු ගවේෂණය කර තිබුණේ නැහැ. දිය යට කිමිදීමේ තාක්‍ෂණය (aqua-lung) නිපදවනු ලැබුවේ 1946දී බැවින් එය බොහෝ පිහිනුම් දක්‍ෂයන්ට පවා තවමත් අළුත් හා ආගන්තුක වුණා. ඒ දක්වා දිය යට විනාඩි කිහිපයකට වඩා හුස්ම අල්ලාගෙන ගත කළ නොහැකි වූ බැවින් දිය යට ගවේෂණය කර තිබුණේ ඉතා සීමිතව වෙරළාසන්න නොගැඹුරු මුහුදුවල පමණයි. (මන්නාරමේ සාම්ප‍්‍රදායික මුතු කිමිදෙන්නෝ කළේ හුස්ම අල්ලා ගෙන දිය යට යාමයි.)

ලංකා මුහුදු වෙරළෙන් ඔබ්බෙහි විවිධ තැන්වල මේ මිතුරන් කිමිදුනත් ඔවුන් වැඩිපුරම අවධානය යොමු කළ දෙතැනක් තිබුණා. එකක් ත‍්‍රිකූණාමලය කලපුව. දෙවැන්න දකුණු දිග වෙරළේ කිරින්දෙන් කිලෝමීටර් 10ක් පමණ මුහුද දෙසට වන්නට පිහිටි මහා රාවණා කොටුව (Great Basses Reef) නම් මුහුදු ගල් පර්වතය හා එයට ආසන්න කොරල් (හිරිගල්) පරයයි.

කිමිදුම්කරුවන් කොරල්පර ගවේෂණයට කැමතියි. නොගැඹුරු මුහුදේ වැඩෙන කොරල්පර අතර විචිත‍්‍ර මසුන් හා වෙනත් සමුද්‍ර ජීවීන් රැසක් හමු වනවා. ජෛව විවිධත්වයෙන් ඉහළ නිසා කොරල්පර මහ මුහුදේ වර්ෂා වනාන්තර ලෙස ද හඳුන් වනවා.
Clarke & Mike Wilson

ක්ලාක් සහ මිතුරන් මුල් වරට මහා රාවණා කොටුව අවට කොරල්පරයට ගියේ 1958දී. මහා රාවණා කොටුවේත්, එයට කි.මි කිහිපයක් නැගෙනහිරින් පිහිටි කුඩා රාවණා කොටුවේත් (Little Basses Reef) බි‍්‍රතාන්‍ය පාලන කාලයේ ගොඩනැංවූ ප‍්‍රදීපාගාර දෙකක් තිබෙනවා. මේ අසලින් දිවෙන ප‍්‍රධාන නැව් මාර්ගයක් තිබෙන නිසාත්, ගල් පර්වත සහිත මේ මුහුදු තීරයේ ඉතිහාසය මුළුල්ලේ නැව් මුහුදුබත් වී ඇති නිසාත් මේ ප‍්‍රදීපාගාර නැව් ගමනාගමනයට තීරණාත්මක මෙහෙවරක් ඉටු කරනවා.

මහා රාවණා ප‍්‍රදීපාගාරය 1867දී බි‍්‍රතාන්‍යයේ ස්කොට්ලන්තයේ සැළසුම් කර කළුගලින් කොටස් වශයෙන් තනනු ලැබුවා. ඉනික්බිති මේ කොටස් නැව් මගින් කිමී දහස් ගණනක් දුර ගෙවා ගෙන ආවා. මේ ගමනේදී හානි වූයේ කොටස් දහස් ගණනක් අතරින් එකම එකක් පමණයි.

ගාල්ලට නැවෙන් ගෙනා ප‍්‍රදීපාගාර කොටස් කුඩා බෝට්ටු මගින් ගෙන ගොස් මහා රාවණා කොටුවේ අටවනු ලැබුවා. ප‍්‍රදීපාර ආලෝකය සැළසුම් කළේ එම සියවසේ විසූ ශ්‍රේෂ්ඨතම බි‍්‍රතාන්‍ය විද්‍යාඥයකු වූ මයිකල් ෆැරඬේ විසින්. විදුලිබලය පිළිබඳ ඔහු කළ සොයා ගැනීම් මානව ශිෂ්ටාචාරය වෙනස් කළා.

මහා විද්‍යාඥ මයිකල් ෆැරඩේ නිර්මාණය කල විදුලි පහණකින් දැල්වුන ශ්‍රී ලංකාවේ මහා රාවණ ප්‍රදීපාගාරය!

මහා රාවණා ප‍්‍රදීපාගාරය 1873 මාර්තු 10 වනදා විවෘත කළා. එදා පටන් දිගටම සේවයේ නියුතු මෙය ලෝකයේ ප‍්‍රකට (වඩාත්) ප‍්‍ර‍්‍රදීපාගාර අතරින් එකක්.

මේ ප‍්‍රදීපාගාරයට හා අසල ඇති කොරළ් පරයට ලඟා විය හැක්කේ වසරේ සීමිත සති කිහිපයක් තුළ පමණයි. නිරිතදිග මෝසම් සුළං හා ඊසාන දිග මෝසම් සුළං යන දෙකෙහිම බලපෑමට හසු වන මේ ස්ථානයට වසරේ වැඩි දින ගණනක් සැඩ සුළං හා රළු මුහුද නිසා ගමන් කිරීම අන්තරාදායකයි. දිය යට කිමිදීමට හැක්කේ මාර්තු – අපේ‍්‍රල් මාසවල පමණයි.

ලංකා ගොඩබිමෙන් දුරස්තව ඉන්දියානු සාගරයෙන් වට වී ඇති මහා රාවණා (සහ කුඩා රාවණා) ප‍්‍රදීපාගාර සේවකයන් හුදකලා වූ ලෙස කල් ගත කරනවා. ඔවුන්ට අවශ්‍ය දේ රැගත් බෝට්ටුවක් විටින් විට එහි ළඟා වනවා. ක්ලාක් සහ මිතුරන් ද මුලින් එහි ගියේ මේ ප‍්‍රදීපාගාර බෝට්ටුවේ, ඔවුන්ගේ අනුදැනුම හා හොඳහිත ඇතිවයි. ඉඳහිට හෝ යමකු එහි පැමිණීම ප‍්‍රදීපාගාර කාර්යමණ්ඩලයේ කාන්සිය තරමක් අඩු කරන්නට ඇති.

මහා රාවණා ප‍්‍රදීපාගාරය තම තාවකාලික නවාතැන කර ගෙන අවට කොරල්පරයේ හා මුහුදේ කිමිදුණු ක්ලාක් හා මිතුරෝ දිය යට විසිතුරු ඡායාරූප ගත කළා. මින් පෙර කිසිවකු දැක නොතිබූ තරම් මනරම් කොරල් පරයත් එහි විවිධාකාර ලොකු කුඩා ජීවීනුත් ඔවුන් මවිතයට පත් කළා.

ඔස්ටේ‍්‍රලියාවේ මහා බාධක පරය මීට වඩා බෙහෙවින් විශාල බව ඇත්තයි. ඒත් එනිසාම එහි විසිතුරු විහිද පැතිර තිබෙනවා. එහෙත් මහා රාවණා පරයේ සමීප මුහුදු පතුලක බොහෝ දේ හමු වන බව ක්ලාක් ලියා තැබුවා.

ඔවුන්ගේ 1958-59 ගවේෂණය පදනම් කරගෙන Indian Ocean Adventure (ඉන්දියානු සාගර වික‍්‍රමය) නම් ඡායාරූප රැසක් සහිත පොතක් ක්ලාක් -විල්සන් දෙදෙනා 1961දී පළ කළා.

කිසිදා මිනිසුන් දැක නොසිටි ඒ ප‍්‍රදේශයේ මසුන් කිමිදුම්කරුවන්ට බිය නොවී කුතුහලයෙන් විමසිලිමත් වූ සැටිත්, සමහර මසුන් තමන් සමග මිතුරු වූ සැටිත් ක්ලාක් විස්තර කරනවා. ලක්දිව දකුණු මුහුදේ තමන්ට හමු වූ මෝරුන් පවා ආක‍්‍රමණශීලි නොවී දුරක සිට තමන් ගැන බලා සිටි බවත් ඔහු කියනවා. (මීට වසර 55කට පෙර තිබූ තත්ත්වය අද වන විට බෙහෙවින් වෙනස් වී ඇති බව වඩා මෑතදී ඒ ප‍්‍රදේශවල කිමිදුණු අය වාර්තා කරනවා.)

1958-59 මහා රාවණා කොරල් පරයේත්, වෙනත් ස්ථානවලත් මුහුද යට රූපගත කළ දර්ශන සංකලනය කොට 1958දී මයික් විල්සන් වාර්තා චිත‍්‍රපටයක් නිපදවූවා. Beneath the Seas of Ceylon (ලක් මුහුද යට) නම් වූ එය විනාඩි 25ක ධාවන කාලයකින් යුක්තයි.

මිලිමීටර් 16 චිත‍්‍රපටයක් වූ එහි කැමරාකරණය, පිටපත හා අධ්‍යක්‍ෂණය මයික් විල්සන්ගෙයි. ලංකා තේ ප‍්‍රචාරක මණ්ඩලයේ අනුග‍්‍රහය ලද මේ චිත‍්‍රපටය වසර ගණනාවක් පුරා මෙරට සංචාරක ප‍්‍රවර්ධනයන් සඳහා යොදා ගනු ලැබුවා. අද මෙහි පිටපතක් කොතැනක ඉතිරිවී ඇත්දැයි මා දන්නේ නැහැ. එය නරඹා ඇති චිත‍්‍රපට ඉතිහාසඥ (මයික් විල්සන්ගේ මිතුරකු වූ) රිචඞ් බොයිල් කියන්නේ මෙය ශ‍්‍රී ලංකාවේ නිපදවන ලද මුල්ම දිය යට සිනමා නිර්මාණය බවයි.

මේ චිත‍්‍රපටයට ලැබුණු හොඳ ප‍්‍රතිචාරවලින් උද්දාමයට පත් මයික් විල්සන් තව දුරටත් චිත‍්‍රපට කැමරාකරණයට හා අධ්‍යක්‍ෂණයට යොමු වුණා. ඔහුගේ මුල්ම වෘතාන්ත චිත‍්‍රපටය චිත‍්‍රපටය වූයේ රන්මුතුදුව. 1962 අගෝස්තු 10 වනදා සිනමා රසිකයන් හමුවට ආ “රන්මුතුදුව” කෙටි කලෙකින් අතිශයින් ජනප‍්‍රිය වූවා. (මයික්ගෙන් ලංකා සිනමාවට ලැබුණු දායකත්වය හරිහැටි ඇගයීමට ලක්ව නැති බව මගේ අදහසයි. ඔහු 1958 තැනූ පුරෝගාමී දිය යට වාර්තා චිත‍්‍රපටය ගැන පවා දන්නේ ලාංකිකයන් ටික දෙනයි.)

1961 මාර්තුවේ මයික් නැවතත් මහා රාවණා කොරල්පරයට ගියා. මෙවර රොඞ්නි ජෝන්ක්ලාස් මාලදිවයිනේ කිමිදෙමින් සිටි අතර ක්ලාක් ලේඛන කටයුතුවල නියැලෙමින් කොළඹ නතර වුණා. එනිසා මයික් සමග ගියේ බොබී ක‍්‍රීගල් (14) හා මාක් ස්මිත් (13) නම් වූ පිරිමි ළමුන් දෙදෙනෙක්. ඔවුන් මෙරට අනුයුක්තව සිටි අමෙරිකානු තානාපති කාර්යාල සේවකයන්ගේ දරුවන්.

මයික්ගේ සැලසුම වූයේ පිහිනීමේ හා කිමිදීමේ දක්‍ෂ වූ මේ දරුවන් ‘‘චරිත’’ ලෙස යොදාගෙන මහාරාවණා කොරල්පරයේ තවත් චිත‍්‍රපටයක් රූපගත කිරීමයි. මේ සඳහා අවශ්‍ය කිමිදුම් හා කැමරා ආම්පන්න තොගයක් ඔවුන් ගෙන ගියා.

1961 මාර්තු 12-21 දිනවල ඔවුන් ප‍්‍රදිපාගාරයේ රැඳී සිටිමින් අවට නොගැඹුරු මුහුදේ කිමිදෙමින් ගවේෂණය හා රූපගත කිරීම් කළා. මාර්තු 22 වනදා මුහුද නිසල වුවත් යම් හේතුවකින් දිය යට මඩ සහිත වී පැහැදිලි නැතිව ගියා. මේ නිසා කැමරා ආම්පන්න නැතිව ඔවුන් තිදෙනා කිමිදුම් කට්ටල පමණක් හැඳගෙන කොරල්පරයේ කිමිදෙන්නට ගියා.

නොගැඹුරු මුහුදු පත්ලෙහි දිලිසෙන යමක් අහම්බෙන් මයික්ගේ නෙත ගැටුණේ එවිටයි. එය කුමක්දැයි සෝදිසි කළ විට එය පිත්තල සිලින්ඩරයක් බව පෙනී ගියා. නාවුකයකු හැටියට කටයුතු කර තිබූ, නාවුක ඉතිහාසය දත් මයික් එක්වරම දැන ගත්තා එය පැරණි කාලතුවක්කුවක් බව.

එහි අරුත නම් මේ අවට මුහුදුබත් වූ පැරණි නැවක් තිබිය හැකි බවත් මයික් සැනෙකින් වටහා ගත්තා. කාලතුවක්කුව අඩි දෙකහමාරක් පමණ දිගයි. තනි කෙනකුට ඔසවන්නට බැරි තරම් බරයි.

ක්ලාක් පසුව ලියා ඇති පරිදි ‘‘මුහුදුබත් වූ පැරණි නැව් වල ලීවලින් තැනූ බඳ වසර ගණනකට පසු දිරාපත්ව හඳුනා ගත නොහැකි වනවා. බොහෝ විට නැවක් ගිලූණු බව මුහුදු පත්ලේ සොයා ගත හැක්කේ ලෝහමය දෑ නැතහොත් වීදුරු බෝතල් ආදිය නිසායි. මෙතැනදී නොගැඹුරු මුහුදේ දියවැල් හා රළ කැළඹීම් නිසා කාලතුවක්කු වැලි සමග නිරතුරු ගැටෙමින් දිලිසෙමින් තිබුණා. කිමිදුම්කරුවන්ගේ ඇසට මුලින්ම හසු වූයේ මේ දීප්තියයි.’’

ඉනික්බිති එළැඹුණු දින දෙක තුන තිස්සේ මයික් හා මිතුරෝ ඒ අවට මුහුදුපත්ල සමීපව ගවේෂණය කළා. ගිලූණු නැවක සුන්බුන් ඔවුන් සොයා ගත්තා. ඒ අතර රිදී කාසි තොගයක් ද තිබුණා.

නැව ගිලූණු තැන අවට මුහුදුපත්ලේ විසිරි එකම ආකාරයේ රිදී කාසි දහස් ගණණක් හමු වුණා. සමහරක් තනි තනිව තිබූ අතර අනෙක්වා කොරල් බැඳීමෙන් එක ගොඩට එක්වි තිබුණා. එවිට බැලූ බැල්මට පෙනුනේ ගල් කැබලි වගෙයි. කිහිප වතාවක් කිමිදෙමින්, වෙහෙස වී වැඩ කරමින් කිලෝග‍්‍රෑම් 50ක් පමණ බරැති රිදී කාසිත්, කාලතුවක්කු දෙකකුත්, තඹවලින් තැනූ පොලූ හා වෙනත් කුඩා නාවුක ද්‍රව්‍ය කිහිපයකුත් ඔවුන් සොයා ගත්තා.

ඔවුන් ප‍්‍රවේශමින් මේ තොගය කොළඹට ගෙන ආවා. ක්ලාක් හා රොඞ්නි එය දුටුවේ කොළඹදීයි.

මේ කාසි තොගය රැගත් නැව ආවේ කොහි සිටද? එය කොතරම් පැරණිද? මුහුදුබත් නොවුවා නම් එහි ගමනාන්තය වූයේ කුමක්ද? මේ රිදී කාසිවල ලෝහමය වටිනාකමට වැඩි කෞතුක වටිනාකමක් ඇත්ද?

මෙබඳු ප‍්‍රශ්න රැසක් මයික් විල්සන්, ආතර් ක්ලාක් හා ඔවුන්ගේ කිමිඳුම් සමඟයන්ට මතු වුණා. ඔවුන් මෙරට පුරාවිද්‍යාඥයන්, සාගර විද්‍යාඥයන් (එතෙර හා මෙතෙර) හා කාසි එකතු කරන්නන්ගේ ද සහාය ඇතිව මේ ප‍්‍රශ්න වලට පිළිතුරු ගවේෂණය කළා.

නැව ගිලූණු තැන අවට මුහුදුපත්ලේ විසිරි රිදී කාසි දහස් ගණණක් හමු වුණා. මේ කාසි තොගය රැගත් නැව ආවේ කොහි සිටද? එහි ගමනාන්තය වූයේ කුමක්ද? මේ රිදී කාසිවල ලෝහමය වටිනාකමට වැඩි කෞතුක වටිනාකමක් ඇත්ද?

මෙබඳු ප‍්‍රශ්න රැසක් විල්සන්, ක්ලාක් හා කිමිදුම් සමඟයන්ට මතු වුණා. ඔවුන් මෙරට පුරාවිද්‍යාඥයන්, සාගර විද්‍යාඥයන් (එතෙර හා මෙතෙර) හා කාසි එකතු කරන්නන්ගේ ද සහාය ඇතිව මේ ප‍්‍රශ්න වලට පිළිතුරු ගවේෂණය කළා.

මුහුදුබත් වූ නැවක් කාලයාගේ ඇවෑමෙන් හඳුනාගත නොහැකි තත්ත්වයට පත්වනවා. කඩදාසි, රෙදි හා ලෝහවලින් තැනූ දේ දිරාපත්ව යනවා. මේ නිසා එබන්දක නිශ්චිත අනන්‍යතාවය නිර්ණය කිරීම අසීරු කාරියක්. කාසි සමීපව නිරික්සීමේදී පෙනී ගියේ ඒවා එකම අච්චුවේ බවයි. හැම එකකම සළකුණු හතරක් තිබුණා.

පසුව හඳුනාගනු ලැබුවේ ඒවා අරාබි ඉලක්කම් වලින් 1113 සංකේතවත් කරන බවයි. මේ කාසි නිපද වූ වර්ෂයද? අරාබි කැලැන්ඩරයේ වසර ගණන් කිරීම ඇරඹෙන්නේ ක‍්‍රි. ව. 622න්. එසේම අරාබි වර්ෂ හා සම්මත වර්ෂ අතර යම් වෙනසක් ද තිබෙනවා. මේ සියළු සාධක සැළකිල්ලට ගෙන ගණන් බැලූ විට 1113 යනු සම්මත (කි‍්‍රස්තු) වර්ෂ 1702 බව පෙනී ගියා.

කාසි ඉතිහාසඥයන් කීවේ මෙබඳු කාසි තැනීම කෙරුණේ 1658-1707 වකවානුවේ ඉන්දියාවේ සුරත් නගරයේදී බවයි. ඒ භාරතයේ වැඩි ප‍්‍රදේශයක පාලකයා වූ ඔරංසෙබ් (Aurangzeb) නම් මෝගල් අධිරාජයාගේ කාලයේ.

ඔරංසෙබ් අධිරාජයා වසර 49ක් සිහසුනේ සිටියා. ඔහු මෝගල් රාජ වංශිකයන් අතර නමක් ගත් අවසාන අධිරාජයායි. ඔහුගේ පියා ෂා ජහාන් ඉතිහාසගත වූයේ අඩු වයසින් මියය ගිය මුම්ටාස් මහාල් දේවිය වෙනුවෙන් ටාජ් මහලය ඉදිකිරීම නිසායි. මුම්ටාස් මහාල් ඔරංසෙබ්ගේ මවයි.

දැඩි ඉස්ලාමීය පාලනයක් සමස්ත භාරත ජනයා මත බලෙන් පැටවූ ඔරංසෙබ්ගේ මරණයෙන් පසු ජන විරෝධයන් මතු වී මෝගල් අධිරාජ්‍යය ඉක්මනින් බිඳ වැටුණා. කුඩා ප‍්‍රාන්ත රාජ්‍ය ලෙස බෙදී ඇණ කොටා ගත් භාරතය ආක‍්‍රමණය කොට අන්තිමේදී යටත් කර ගැනීමට බටහිර ජාතීන්ට වඩාත් පහසු වුණා.

ඔරංසෙබ්ගේ පාලන කාලයේ නැගෙනහිර ඉන්දීය සමාගම යටතේ බි‍්‍රතාන්‍ය වෙළඳුන් ඉන්දියාවේ ගනුදෙනු කරමින් සිටියා. භාරතය හා යුරෝපීය රාජ්‍ය අතර ජාත්‍යන්තර වෙළඳාම කලෙක සිට කෙරුණු අතර ඒ වන විට ඉන්දියානු සාගරයේ ආධිපත්‍යයට ලන්දේසි හා ඉංග‍්‍රීසි ජාතිකයෝ තරග කරමින් සිටියා.

1702 වන විට ලංකාවේ වෙරළබඩ ප‍්‍රදේශ පාලනය කළේ ලන්දේසින්. ඔවුන්ට සම්බන්ධ වූ ඕලන්ද ඉන්දියා සමාගමක් ද තිබුණා. ඉන්දියාව හා ලංකාව අතර මේ කාලය වන විට නාවුක සබඳතා පැවතියේ ලන්දේසින් හරහායි.

මහා රාවණා කොරල්පරයේ මුහුදුබත් වූ නැව, ලංකාවට ආ ගිය නැවක් ද? නැතහොත් දුපත වටා යාත‍්‍රා කරමින් ඉන්දියාවේ සිට පැමිණි හෝ නික්ම ගිය නැවක්ද? මේ ප‍්‍රශ්නය අපේ සාගර ගවේෂකයෝ මතු කළා.

තමන් මුහුදුපත්ලෙන් සොයා ගත් වස්තුන්ගේ ඉතිහාසය ගවේෂණය කරන අතර රටේ නීතියට අනුකූල වන්නට ද ඔවුන් වග බලා ගත්තා. ලංකා රේගු දෙපාර්තමේන්තුවේ උසස් නිලධාරියකුට කාසි හා අන් වස්තූන් පෙන්වූ විට ඔහු කීවේ මේවා මුහුදෙන් රට තුළට ගෙන ඒම හරහා කිසිදු නීතියක් හෝ රෙකුලාසියක් කඩ වී නැති බවයි.

ඊලඟට ක්ලාක් හා මිතුරෝ එවකට සිටි පුරාවිද්‍යා කොමාරිස් ආචාර්ය චාල්ස් ගොඩකුඹුරට සියළු දේ ඉදිරිපත් කළා. මේවා සොයා ගත් මුහුදුපත්ලේ ප‍්‍රදේශය තව දුරටත් ගවේෂණයට අවශ්‍ය අවසරය කොමාරිස්වරයා ඔවුන්ට ලිඛිත බලපත‍්‍රයක් ලෙස ලබා දුන්නා. ‘‘හැම දෙයක්ම පොතේ හැටියට කිරීමටත්, බලධාරින් දැනුවත් කර තිබීමටත් අපට අවශ්‍ය වුණා’’ යයි ක්ලාක් තම පොත්වල පැහැදිලිව ලියා තිබෙනවා.

වඩාත් සංවිධානාත්මක කිමිදුම් ගවේෂණයකට මහා රාවණා කොරල්පරයට ආපසු යන්නට මේ මිතුරු පිරිසට තමන්ගේම බෝට්ටුවක ඕනෑකම තදින් දැනුණා. (මේ දක්වා ඔවුන් කළේ කුලියට ගත් කුඩා බෝට්ටුවක හෝ ප‍්‍රදීපාගාරයක බෝට්ටුවේ ගමන් කිරීමයි.) ඒ සඳහා ගැලපෙන බෝට්ටුවකට අඩු තරමින් අමෙරිකානු ඩොලර් දස දහසක් (10,000)වත් අවශ්‍ය වුණා. මේ මුදල හම්බකර ගැනීමේ අරමුණින් සිංහල වෘතාන්ත චිත‍්‍රපටයක් නිපදවීමට මයිකල් විල්සන් යෝජනා කළා.

දිය යට දර්ශන රැගත් මුල්ම ලාංකික වෘතාන්ත චිත‍්‍රපටය වූත්, වර්ණයෙන් මුළුමනින්ම තැනුනු පළමුවන සිංහල චිත‍්‍රපටය වූත් ‘‘රන්මුතුදුව’’ චිත‍්‍රපටය 1961-62 වකවානුවේ නිපදවනු ලැබුවේ ඒ අනුවයි. එහි කථා රචකයා, කැමරාකරුවා හා අධ්‍යක්‍ෂවරයා වූයේ මයික් විල්සන්. එයට වැය වූ වියදමෙන් කොටසක් දුන්නේ ක්ලාක්.

1962 අගෝස්තුවේ මුල් වරට මහජන ප‍්‍රදර්ශනය ඇරඹුණු රන්මුතුදුව බෙහෙවින් ජනප‍්‍රිය වුණා. එහි ආදායම් වාර්තාව වසර ගණනාවක් යන තුරු කිසිදු චිත‍්‍රපටයක් මගින් සම කෙරුණේ නැහැ. මේ ආයෝජනයෙන් ලැබුණු ලාබය නිසා තමන්ට ඕනෑ වූ බෝට්ටුව මිලට ගන්නත්, 1963දී මහා රාවණා කොරල්පරයට ආපසු යන්නත් මිතුරන්ට හැකි වුණා.


























Wednesday, 17 December 2014

සංචාරක කුරුලු සමය ඇරඹේ

කාගේත් අවධානය ගනිමින් සෑම වසරකම මෙම කාලයේදී රත්නපුරයේ විදුලි කම්බි වල රාත්‍රිය ගතකරන දහස් ගණනක් වූ අටුවැහිළිහිණියන් ඔබත් දැක තිබේද? වසරක් පාසා ලංකාවට සංචාරය කරනා අටුවැහිළිහිණියා නම් වූ මේ කුරුල්ලන් (Barn Swallow) ගොම්මන් අඳුරත් සමග රත්නපුරයේ විදුලි කම්බිවල දහස් ගණනින් ලැගුම් ගැනීම සිරිතකි. මේ වසරේ මුල්ම අටුවැහිළිහිණියන් රංචුව සැප්තැම්ර් 8 වැනි දින නිරීක්ෂණය කළ බව කොළඹ විශ්වවිද්‍යාලයේ ක්ෂේත්‍ර පක්ෂි අධ්‍යයන කවය පවසයි. ඉදිරි සති කිහිපයේදී තවත් බොහෝ කුරුල්ලන් ලංකාවට පැමිණෙනු ඇත. සෑම වසරකම මේ කාලයේදී ශ්‍රී ලංකාව බලා සංචරණය කරන කුරුල්ලෝ සමූහය වඩාත් නිවැරදිව නිහැරියන් ලෙස හඳුන්වයි.

අටු වැහිළිහිණියා
මේ සංචාරක කුරුල්ලන් සමහරෙක් අපේ ගෙවත්තේ පවා දැකගත හැකිය. අවිච්චියා, සුදු රැහැන්මාරා, නිල්පෙද බිඟුහරයා වැනි පොදු කුරුල්ලන් වසරක් පාසා ශ්‍රී ලංකාවට එන අටුවැහිළිහිණියන් මෙන්ම අපේ ගෙවත්තේ පවා දැකගත හැකි අපේ නිහැරි නෑදෑයෝ වෙති. ශ්‍රී ලංකාවේ දක්නට ලැබෙන පක්ශිවර්ග 492න් 169ක් සංචාරකයින් හෙවත් නිහැරියන්වේ. මොවුන් අගෝස්තු මස මැද භාගයේ සිට ශ්‍රී ලංකාවට පැමිණෙන අතර අප්‍රේල් මස දක්වා රැඳී සිට ආපසු යයි.

කුමණ හා බූන්දල ලංකාවේ ප්‍රධාන කුරුළු අභයභූමි වන අතර ඊට අමතරව කුරුල්ලන් දැක බලාගැනීම සඳහා සංචාරය කල හැකි ප්‍රදේශ මෙසේ සඳහන් කල හැකිය. කොළඹට ආසන්නයේ ඇති බෙල්ලන්විල-අත්තිඩිය වගුරු ප්‍රදේශය, තලංගම වැව ප්‍රදේශය මෙන්ම දියවන්නා ඔය අසබඩ දියත උයන ප්‍රදේශය ප්‍රධානය. කොළඹින් පිට සිංහරාජය, කන්නෙලිය, වීරවිල, දෙබරවැව (තිස්සමහාරාමය ), යාල හා විල්පත්තු අභයභූමි විශේෂය. මීට අමතරව හෝර්ටන් තැන්න, ශ්‍රී පාද ජාතික වනාන්තරය (Peak Wilderness Sanctuary), නුවර එළියේ ගැල්වේස් ජාතික වනෝද්‍යානය, කිතුල්ගල, නකල්ස් කඳුවැටියද කුරුල්ලන් දැකබලා ගැනීම සඳහා සංචාරයට සුදුසුය.

ලංකාවට පැමිණෙන දර්ශණීය සංචාරක කුරුල්ලන් කිහිපදෙනෙකු..

Asian paradise flycatcher (සිවුරු හොරා)

දඹුල්ල (Wikimedia)

Blue Tailed Bee Eater (නිල්පෙඳ බිඟුහරයා)



Booted Eagle (කැසරූප රාජාලියා)















Indian Pitta (අවිච්චියා)


කුරුල්ලන් නැරඹීම ප්‍රචලිත කිරීමටත්, නිහැරියන් පිළිබඳ දත්ත සටහන් කරගැනීමේ අවශ්‍යතාවය ඉස්මතු කිරීමේ අරමුණින් ශ්‍රී ලංකා ක්ෂේත්‍ර පක්ෂි අධ්‍යයන කවය නිහැරි නිකසුම  (Migrant Watch) නමින් වැඩසටහනක් සංවිධානය කර ඇත. මෙයට කුරුල්ලන් අධ්‍යයනයට උනන්දුවක් දක්වන නවකයන්ටද සහභාගී විය හැකි අතර, ඔවුන් දැනුවත් කිරීමේ වැඩපිළිවෙළක්ද ශ්‍රී ලංකා කේෂ්ත්‍ර පක්ෂි අධ්‍යයන කවය විසින් සංවිධානය කර ඇත.

පහත දැක්වෙන්නේ පක්ෂි අධ්‍යයන කවය විසින් සකස් කොට ඇති නිහාරික නිරීක්ශණ සටහනකි. මෙය බාගත කරගෙන ඔබටත් නිහාරික අධ්‍යයනය සිදුකල හැකිය.

Friday, 12 December 2014

ගූගල් ස්ට්‍රීට් වීව් ශ්‍රී ලංකාවේ මහා මාර්ගවලට පැමිණෙයි


ශ්‍රී ලංකා රජයේ සහයෝගය ඇතිව තම 'ස්ට්‍රීට් වීව්' (Street View) වැඩසටහන සඳහා මෙරට මහා මාර්ගවල සිට ඡායාරූප ගැනීම 12දා සිට ආරම්භ කරන බව ගූගල් සමාගම පවසයි. ශ්‍රී ලංකා සංචාරක ප්‍රවර්ධන අධිකාරියේ අධ්‍යක්ශක ජෙනරාල් ඩී.එස් ජයවර්ධන මහතා පවසන ආකාරයට ශ්‍රී ලංකාවේ සුන්දර ස්ථාන මෙම ගූගල් ව්‍යාපෘතිය යටතේ අන්තර්ජාලයට එකතුවන අතර ඒ අනුව විදෙස් සංචාරකයින් හට ශ්‍රී ලංකාව වඩාත් ආකර්ශණීය වනු ඇති අතර ශ්‍රී ලාංකිකයින් හටද අපරටේ සුන්දර ස්ථාන පිලිබඳව සවිස්තර තොරතුරු දැනගත හැකිවනු ඇත.

මේ පිළිබඳව දැනුම්වත් කරමින් දෙසැම්බර් 11 කොළඹදී පැවති මාධ්‍ය හමුවකදී ගූගල් ආසියා පැසිෆික් හි ගිනිකොණදිග ආසියාව සහ චීනය සඳහා මහජන කටයුතු අධ්‍යක්ෂිකා ඈන් ලැවින් මහත්මිය මෙය නිවේදනය කළාය. ඇය පවසන ආකාරයට සුප්‍රකට පෞරාණිකග්‍රීක  නගරයක් වන පොම්පෙයි නුවර ගූගල් ස්ට්‍රීට් විව් වලට ඇතුලත්වූ පසු සංචාරකයින් පැමිණීමේ 25% වර්ධනයක් පෙන්වා ඇත.


ඒ අනුව, අද පටන් විශේෂ කැමරා සවිකළ ගූගල් කාර් රථ මගින් දිවයිනේ විවිධ මාර්ගවල අංශක 360ක ඡායාරූප ගැනීම සිදුකිරීමට නියමිතය. ගූගල් ස්ට්‍රීට්-විව් සඳහා ඡායාරූප ගන්නා මෝටර් රථවල සවිකොට ඇති කැමරා මගින් ලබාගන්නා අංශක 360ක පරිදර්ශක ඡායාරූප [360 panoramic images] මගින් ස්ට්‍රීට් විව් පරිහරණය කරන්නාට තමන් එම මාර්ගයේ හෝ එම ස්ථානයේ සිටිනා විට පෙනෙන ආකාරයට හාත්පස දර්ශණය කල හැක.

ගූගල් ස්ට්‍රීට් විව් සඳහා අවශ්‍ය ඡායාරූප ලබාගැනීමට කැමරා සවිකල මෝටර් රථ, හිම පතනය ඇති ස්ථානවල හිමේ යා හැකි ස්නෝ මොබයිල් වාහන මෙන්ම පයින් පමනක් යාහැකි ස්ථානව වලදී ගූගල් ස්ට්‍රීට්විව් කැමරා පිටේ බැඳගත් ගූගල් සේවකයින්ද යොදවා මෙම සේවාව සකස් කොට ඇත.

මුහුදු වෙරළක් ගූගල් ස්ට්‍රීට් විව් වලට හසුකර ගන්නා ගූගල් ස්ට්‍රීට් විව් සේවකයෙකු
 යාපනය, මාතර සහ ආරුගම්බේ යන ප්‍රදේශවලින් ආරම්භ වන මෙය දිගුකාලීන ආයෝජනයක මුල් පියවර වන බවත්, ස්ට්‍රීට් වීව් වැඩසටහන යටතේ ඉදිරි වසර කිහිපය තුළ සමස්ත දිවයිනම ඡායාරූප ගැනීමට කටයුතු කරනු ඇති බවත් එහිදී සඳහන් විය. ගූගල් ස්ට්‍රීට් විව් සේවාවට ඇතුලත්වන 65වන රට ශ්‍රී ලංකාවයි.

Image Credits : ada.lk and dailymirror.lk


Sunday, 23 November 2014

Knightscope K5 සිලිකන් නිම්නයේ රොබෝ කොප්


කොප් හෙවත් පොලිස් කාරයා ලෙස හැඳින්වූවාට, මෙම රොබෝවාට මිනිස් පෙනුමක් ඇත්තේම නැත. පෙනුමින් ස්ටාර් වෝස්  චිත්‍රපට මාලාවේ R2D2ට සමානය. නයිට්ස්කෝප් K5 ස්වයංක‍්‍රීය යන්ත‍්‍ර ලෙස හැඳින්වෙන මෙම රොබෝ ආරක්‍ෂකයන් කැලිෆෝනියාවේ මවුන්ටන් විව්හි පිහිටා ඇති නයිට්ස්කෝප් රොබෝ තාක්‍ෂණ සමාගමේ නිර්මාණයකි.

අත්හදා බැලීමේ ව්‍යාපෘතියක් ලෙස මෙම රොබෝවන් 5දෙනෙකු මයික්‍රෝසොෆ්ට් සමාගමේ කැලිෆෝනියාවේ පිහිටි ආයතන පරිශ්‍රයේ සේවයේ යොදවා ඇත. අඩි 5ක් උස රාත්තල් 300ක් බර K5 රොබෝවාට පැය 24ක් එකදිගට බැටරි බලයෙන් ක්‍රියාකල හැකි අතර බැටරි බැසයනවිට ආරෝපණ මධ්‍යස්ථානයක් වෙත ස්වයංක්‍රීයව ගමන් කරයි.

මේවා මයික‍්‍රෆෝන, ස්පීකර්, කැමරා, ලේසර් ස්කෑනර් සහ සංවේදක වලින් සමන්විත බව පැවසේ.
අසාමාන්‍ය හැසිරීම් නිරීක්‍ෂණය කර පාලන මධ්‍යස්ථානයට දැනුම්දීම සඳහා මෙම රොබෝ ආරක්‍ෂකයින් ක‍්‍රමලේඛනය කර ඇති අතර ගන්ධ සහ තාප සංවේදකද එහි අඩංගු වේ. එහි ඇති කැමරා භාවිතයෙන් මිනිත්තුවකට රථ වාහන අංක තහඩු 300ක් මතකයේ ගබඩා කර ගත හැකිවීම මෙහි ඇති තවත් විශේෂත්වයකි.

මීට අමතරව අංශක 360ම ආවරණය වල පරිදි HD වීඩියෝ පටිගතකිරීම සඳහා කැමරා ඇති අතර, තාපසංවේදක කැමරා රාත්‍රීකාළයේදී අනවසරයෙන් ගැවසෙන්නන් පහසුවෙන් හඳුනාගනු ඇත. යන්ත්‍රය අවට ප්‍රදේශයේ සැරිසරන වාහන, පුද්ගලයින් හා වෙනත් වස්තු සඳහා ඇති දුර, ඒවාගේ වේගයන් හා අවට පරිසරයේ සියලුම දෑ පිලිබඳව දත්ත එකතුකිරීම සඳහා Ultrasonic scanner, Lidar, Radar යන තාක්ශණයන් අඩංගු සංවේදක රාශියක් මෙහි ඇතුලත් කොට ඇත.

රොබෝවේ ඉදිරියට යමෙකු පියනැගූ විට එය එම පුද්ගලයා නිරීක්‍ෂණය කළ හැකි පිහිටීමකට ගමන් කරන අතර ඔහු සොරෙකු නම් පුද්ගලයා කැමරා මගින් නිරීක්‍ෂණය කෙරෙන අතරවාරයේදී වීදුරු බිඳෙන හඬ, වෙඩි හඬ, මිනිසුන් හඬන, කෑගසන හෝ උදව් ඉල්ලන හෝ වෙනත් ශබ්දයක්ද ග‍්‍රහණය කරගනු ඇති අතර ඒවා ක්ෂණයකින් සිය කෘත්‍රිම බුද්ධිය හරහා විශ්ලේෂණය කොට අවශ්‍ය නම් ආරක්ශක අංශ හෝ පොලීසිය කැඳවීමේ හැකියාව මෙයට ඇත.

මෙම ව්‍යාපෘතියේ සම නිර්මාතෘ ස්ටේසි ස්ටීවන්ස් පවසා ඇත්තේ මෙම සිදුවීම වන ස්ථානයේ පිහිටුම, වාහනයේ ඡයාරූප, අංක තහඩුවේ ඡයාරූප ආදී සියල්ල මෙම රොබෝ ආරක්‍ෂකයා විසින් ලබාදෙනු ඇති බවයි. රාත්‍රී ජාමයේ පාලු ආයතන භූමිභාග, රථගාල්, ගොඩනැගිලි පරිශ්‍ර සොරුන්ගෙන් ආරක්ශාකිරීමේ අණතුරුදායක මෙන්ම පාළුව හා කාන්සිය රජයන රාත්‍රී මුරපල්ලන්ගේ රැකියාව R5 ඉතා කාර්යක්ශමව ඉටුකොට දෙනු ඇතැයි සමාගම පවසයි.

මෙම යන්ත‍්‍ර ඉන්ධන පිරවුම්හල්, කාර්යාල, නිවාස සංකීර්ණ, විශ්වවිද්‍යාල භූමිභාග ආදී ස්ථානයන්හි පා මුර සංචාර සඳහා අලෙවිකිරීමට සමාගම බලාපොරොත්තුවේ. 


Saturday, 22 November 2014

Toyota Mirai - 2014 දෙසැම්බරයේදී වෙළඳපොලට එන ටොයොටා හයිඩ්‍රජන් කාරය

ටොයෝටා සමාගම විසින් පුළුල් වෙළඳපොළ වෙත නිකුත් කෙරෙන ලොව පළමු හයිඩ‍්‍රජන් ඉන්ධන මෝටර් රථය එළිදක්වා ඇතැයි වාර්තා වේ. දොර හතරේ මෝටර් රථයක් වන මෙය ජපන් බසින් අනාගතය යන අරුත දෙන මිරායි ලෙස නම් කර තිබේ. 2013 වසරේ ටෝකියෝ මෝටර් රථ ප්‍රදර්ශණයේදී මෙහි concept model එලි දැක්වුනු අතර 2015 දී එය අමෙරිකාවේ කැලිෆෝනියා ප්‍රාන්තයේ විකිණීම ආරම්භ වනු ඇති.

ඩොලර් 57000ක් වැනි ඉහළ මිලකට වෙළඳපොළට නිකුත් කෙරෙනු ඇති මිරායි 400ක් ලබන වසරේදී අලෙවි කිරීම ටොයෝටා සමාගමේ ඉලක්කයයි. 2017 වන විට මේවා 3000ක් ඇමරිකාව තුළ අලෙවි කිරීමටත් වසරකට මෝටර් රථ 100ක් යුරෝපය තුළ අලෙවි කිරීමටත් සමාගම සූදානමින් සිටී.

එක් වරක් ඉන්ධන පිරවීමෙන් පසු කිලෝමීටර් 480ක් අඛණ්ඩව ධාවනය කළ හැකිවීම මෙහි ඇති විශේෂත්වයකි. හයිඩ්‍රජන් ෆියුල් සෙල් තාක්ශණය (hydrogen fuel cell) මගින් මෙහි බලය නිපැදවේ. ඉන්ධන ටැංකියේ ඇති හයිඩ්‍රජන්, වාතයේ ඇති ඔක්සිජන් හා සම්බන්ධ කරමින් විද්‍යුත් ගාමක බලයක් නිර්මාණය කිරීම, එනම් බැටරියක් මෙන් ක්‍රියාකරීම ෆියුල් සෙල් එකක් මගින් සිදුවේ. එයින් නිපැදවෙන විදුලි බලයෙන් කාරයේ විදුලි මෝටරය ක්‍රියාත්මක වේ.

මෙය සාම්ප‍්‍රදායික ඉලෙක්ටි‍්‍රක් මෝටර් රථයක පරාසය මෙන් තුන්ගුණයක්වන අතර පෙට‍්‍රල්, ඞීසල් ඉන්ධන හා සමාන ලෙසින් මිනිත්තු කිහිපයකින් යළි ඉන්ධන පිරවිය හැකි වීම ඉලෙක්ටි‍්‍රක් මෝටර් රථයට සාපේක්‍ෂ තවත් වාසියක් ලෙස සැලකේ. හයිඩ‍්‍රජන් ඉන්ධන නිෂ්පාදනය සහ සම්පීඩනය කිරීම සඳහා ෆොසිල ඉන්ධන භාවිතා කෙරුණද මෝටර් රථය තුළ දහනය මගින් වායුගෝලයට නිකුත් කෙරෙන්නේ ජල වාෂ්ප පමණක් වීම පරිසර හිතකාමී පියවරක්ද වනු ඇත.


ටොයෝටා සමාගමේ උප සභාපති මිට්සුෂිසා කාටෝ පවසා ඇත්තේ මිරායි මගින් ගෝලීය පරිසර හා බලශක්ති අභියෝග සඳහා සාර්ථක විසඳුමක් මෙන්ම හයිඩ‍්‍රජන් පදනම් කරගත් සමාජයක් සඳහා මුල් පියවරක් තැබීම ටොයෝටාහි ජයග‍්‍රහණයක් බවයි.


Friday, 21 November 2014

Virgin Galactic සංචාරකයින් ගෙනයන අභ්‍යවකාශ යානය කඩාවැටුනේ ඇයි?

Virgin Galactic සමාගමේ Space Ship 2 අභ්‍යවකාශ යානය සිය තුන්වන රොකට්-බල [rocket powered] පරීක්ෂණ පියාසැරියේ යෙදෙමින්..
දිනය : 2014 ඔක්තෝම්බර් 31 සිකුරාදා

වේලාව : එක්සත් ජනපද පැසිෆික් සම්මත වෙලාවෙන් පැය 10:09 

ස්ථානය : කැලිෆෝනියාවේ මොහාවි කාන්තාරයේ සැතපුම් 8ක් ඉහල අහසේ


වර්ජින් ගැලැක්ටික් සමාගම, බ්‍රිතාන්‍යයේ ප්‍රකෝටිපති ව්‍යාපාරික රිචර්ඩ් බ්‍රැන්සන් ගේ මහේච්ඡ (ambitious) ව්‍යාපෘතියකි. එම ව්‍යාපෘතියේ අරමුණ ඉතා ඉක්මණින් අභ්‍යවකාශයේ අද්දර වෙත සංචාරකයින් ගෙනයා හැකි පිරිවැය අඩු අභ්‍යවකාශ යානයක් නිර්මාණය කිරීමයි. 

මේ අරමුණ පෙරදැරි කරගෙන අමෙරිකාවේ නම්දැරූ අභ්‍යවකාශ හා ගගන විද්‍යා ඉන්ජිනේරුවෙකු වන බර්ට් රූටන්ගේ ස්කේල්ඩ් කොම්පොසයිට් සමාගම හා අත්වැල් බැඳගත් වර්ජින් ගැලැක්ටික් සමාගම නිර්මාණය කල SpaceShipTwo යානාවේ සතරවැනි රොකට්බල පරීක්ශණ පියාසැරිය (rocket powered test flight)සඳහා සියලු කටයුතු සූදානම් වෙමින් තිබුණි.


මෙම පරීක්ශණ පියාසැරියේ අරමුණ වූයේ ස්පේස් ෂිප් 2 අභ්‍යවකාශ යානයේ රොකට් එන්ජිම බලගැන්විය හැකි අලුත්ම ඉන්ධන වර්ගයක් අත්හදා බැලීමයි. මීට පෙර පරීක්ශණ පියාසැරි තුනක් පවත්වන ලද අතර එම පරික්ශණ පියාසැරි වලදී තහවුරුවූ එක් කරුණක් නම්, එන්ජිමට යොදන රොකට් ඉන්ධන වර්ගය මගින් යානය අභ්‍යවකාශයේ අද්දර, එනම් පොලොවේ සිට කිලෝමීටර් 110ක් පමණ ඉහලට ගෙනයාමට ලබාගත යුතු වේගය වන පැයට කිලෝමීටර් 4200ක වේගයෙන් (ශබ්දයේ වේගය මෙන් 3.5ක්) යානය ගෙනයාමට අවශ්‍ය ජවය ලබාදීමට අසමත් බවයි. ඒ අනුව ඉන්ධන වර්ගය වෙනස් කොට දහණයේදී වැඩි තෙරපුමක් ලබාදෙන ඉන්ධන වර්ගයක් ආදේශ කෙරුණු අතර එම ඉන්ධන වර්ගය යොදාගෙන සිදු කරන ප්‍රථම පරීක්ශණ පියාසැරිය ආරම්භවීමට ඇත්තේ විනාඩියකටත් අඩු කාලයකි.

White Knight Two මව් යානය හා සම්බන්ධවී ගුවන්ගත වන Space Ship Two උප යානය
මේ අවස්ථාව වන විට ස්පේස් ෂිප් 2 යානය, සිය මව්යානය වන WhiteKnightTwo ආධාරක ගුවන්යානයේ රඳවා තිබූ අතර වයිට්නයිට් 2 යානය,  ස්පේස් ෂිප් 2  උප යානයද සමග මොහාවී කාන්තාරයේ සැතපුම් 8ක් ඉහල අහසේ පියාසර කරමින් තිබුණි.  SpaceShip 2  නියමුකුටියේ පලපුරුදු පරීක්ශණ පියාසැරි නියමුවන් (test pilots) දෙදෙනෙකු වන පීටර් සීබෝල්ඩ් හා මයිකල් ඇල්ස්බරි,  මව් යානයෙන් නිදහස්වී රොකට් එන්ජිම දැල්වීම සඳහා සූදානම් වෙමින් සිටියහ.පීටර් සීබෝල්ඩ් හා මයිකල් අල්ස්බරි යන දෙදෙනාම කැලිෆෝනියා පොලිටෙක්නික් විශ්වවිද්‍යයාලයේ ගගන විද්‍යා ඉන්ජිනේරු ශිල්පය පිලිබඳ උපාධි ලබාගත් ගගනවිද්‍යා ඉන්ජිනේරුවන් විය. පීටර් සීබෝල්ඩ් හට විවිධ ගුවන්යානා වල පියාසර පැය 2000කට වැඩි කාලයක් අත්දැකීම් තිබූ අතර මයිකල් ඇල්ස්බරිහට පියාසර පැය 1900ක අත්දැකීම් තිබුණි.


ස්පේස් ෂිප් 2 යානයේ තුන්වන රොකට්බල පරීක්ශණ පියාසැරිය 2014 ජනවාරියේ සිදුවූ අතර රොකට් එන්ජිම තත්පර 20 දැල්වීම මගින් යානය පොලොවේ සිට කිලෝමීටර් 22ක් ඉහල නැගීමට සමත්වූ අතර ශබ්දයේ වේගය මෙන් 1.4ක වේගයකින් ගමන්කලේය. ඊට අමතරව යානය රොකට් එන්ජිම රහිතව ග්ලයිඩරයක් ආකාරයෙන් ගොඩබැස්සවීමේ පරීක්ශණ පියාසැරි 54ක් සාර්තකව අවසන් කොට තිබුණි. ස්පේස්ෂිප්2 යානයේ තාක්ශණික දත්ත වලට අනුව එහි රොකට් එන්ජිම දල්වා තත්පර 8කින් ශබදයේ වේගය ඉක්මවා යන අතර කිලෝමීටර් 110ක උසකට ගමන් කිරීම සඳහා තත්පර 70ක් එන්ජිම ක්‍රියාත්මක විය යුතුය. මෙතෙක් සිදුකෙරුණු පරීක්ශණ පියාසැරිවලදී රොකට් එන්ජිම තත්පර 70ක් දක්වා ක්‍රියාත්මක නොකල අතර යානයේ සංකීර්ණ පද්ධති නිසි පරිදි කියාත්මක වන්නේදැයි සොයා බැලීම සඳහා තත්පර 20ක් වැනි කෙටි වේලාවක් එන්ජිම දල්වමින්, ක්‍රමාණුකූලව පියාසැරියේ කාලය දිගුකරමින් අත්හදාබැලීම් ඉදිරියට ගෙනයාමට වර්ජින් ගැලැක්ටික් සමාගමත්, යානය නිර්මාණය කල ස්කේල්ඩ් කොම්පොසයිට් සමාගමත් සැළසුම් කොට තිබුණි.

ස්පේස් ෂිප් 2 යානයේ පියාසර සැලැස්මට අනුව එහි රොකට් මෝටරය නිවාදැමීමෙන් පසුව තවදුරටත් යානය ඉහලට යාමට සලස්වන අතර පියාසැරියේ උපරිම උස වන කිලෝමීටර් 110ක උසට ලඟාවන්නේ මෙහිදීය. මේ අවස්ථාවේදී යානයේ ගමන්කරන මගීන් සයදෙනාට අභ්‍යවකාශගාමීන් හට අත්දැකීමට ලැබෙන අපූර්ව ස්ංසිද්ධියක් වන ශුන්‍ය ගුරුත්වය (zero gravity) අත්දැකීමට ලැබේ. එම ශුන්‍ය ගුරුත්ව අවස්ථාව විනාඩි 5ක් පමණ පවතී.

උපරිම උසට ලඟාවූ පසු යානයේ නියමුවන් එහි අත්තටු වල සවිකොට ඇති කුඩා ත්‍රස්ටර් රොකට්ටු ආධාරයෙන් එය ආපසු හරවන අතර එහි විශාල අත්තටු ඉහලට එසවී පවතින ලෙස සකස් කරනු ලැබේ. මෙසේ අත්තටු ඉහලට එසවීම feathering  ලෙස හඳුන්වන අතර යානය නිර්මාණය කල ඉන්ජිනේරුවන් මෙම  උපක්‍රමය නිර්මාණය කලේ ඉතා අඩු වායු ඝණත්වයක් ඇති කිලෝමීටර් 110ක් ඉහල අහසේදී යානයේ ස්ථායිතාවය රඳවා ගැනීමේ ගැටලුවට විසඳුමක් ලෙසයි. ශුන්‍ය ගුරුත්වය ඇතිවන ඉහල වායුගෝලයේ ක්‍රියාත්මක වන අභ්‍යවකාශ යානාවලට ගුවන් අත්තටුවලින් හා ඒවායේ ඇති පාලණ පෘශ්ඨ (control surfaces) මගින් යානය හසුරුවාගත නොහැකි වන්නේ ඉතා අඩු වායු ඝණත්වයක් ඇති නිසාය. මේ අවස්ථාවේදී අභ්‍යවකාශ යානය හැරවීම වැනි හැසිරවීම් සඳහා රියැක්ශන් ත්‍රස්ටර් (reaction thrusters) ලෙස හැඳින්වෙන කුඩා රොකට්ටු භාවිතා කරයි.

Feathering ආකාරයට අත්තටු සකසා ගැනීමෙන් පසු කිලෝ මීටර් 110ක් ඉහල අහසේ සිට යානය නැවතත් පෘථිවිය වෙත වැටෙන්නට පටන් ගනී. මෙලෙස පොලොවේ සිට කිලෝමීටර් 22ක් ඉහල අහස දක්වාම යානය වැටෙන්නට ඉඩ හරින අතර කිලෝමීටර් 22 පසු කරත්ම වායුගෝලයේ ඝණත්වය වැඩිවී ඇති බැවින් නැවතත් යානයේ අත්තටු තිරස් ආකාරයට සකස් කොට (de-feathering) ගන්නා අතර ඒ මොහොතේ සිට යානය ග්ලයිඩරයක් ලෙස පාවෙමින් ධාවන පථයට ලඟාවේ.

පහත ඇති infographic රූපසටහන් මෙම ක්‍රියාකාරිත්වය හොඳින් පෙන්වාදෙයි.

SpaceShipTwo will carry six passengers up past 328,000 feet altitude (100 kilometers), the point where astronaut wings are awarded.

ගොඩ බැස්සවීමට මොහොතකට පෙර ග්ලයිඩරයක් ලෙස පියාසර කරන ස්පේස් ෂිප් 2 යානය - මෙහි රොකට් එන්ජිම වසා ඇති බව පෙනෙන්නේ මෙම පියාසැරිය එන්ජින් නොදල්වා සිදුකල un-powered test flight පියාසැරියක් බැවිනි.



පැසිෆික් සම්මත වෙලාවෙන් පැය 10:10  - මොහාවී කාන්තරය ඉහල අහස

ස්කේල්ඩ් කොම්පොසයිට් සමාගම හා වර්ජින් සමාගම එක්ව මෙම ව්‍යාපෘතිය සඳහාම "Mojave  Spaceport" ලෙසින් හැඳින්වෙන අභ්‍යවකාශ තොටුපොලක් නිර්මාණය කොට ඇත. සියලුම අත්හදාබැලීම්, ගුවන්ගත කිරීම් හා පර්යේෂණ කටයුතු මෙම ස්ථානයේ සිදුකෙරෙන අතර සියළුම පරීක්ශණ පියාසැරි මෙහෙයවන පාලන මැදිරිය පිහිටා ඇත්තේද මෙහිය.

ස්පේස් ෂිප් 2 යානයේ නියමු පීටර් සීබෝල්ඩ්, මව් යානයෙන් නිදහස්වීමට සියල්ල සූදානම් බවත් යානාවේ සියලුම පද්ධති නිවැරදිව ක්‍රියාත්මක වෙන බවත් පාලන මැදිරියට දැනුම් දෙන ලද අතර ඒ අනුව පාළන මැදිරිය මහින් වයිට් නයිට් 2 මව් යානයට, උප යානය නිදහස් කරන ලෙස දැනුම් දෙන ලදී. තත්පර කිහිපයකින් මව් යානය හා උප යානය සාර්ථකව වෙන් වෙන අතර, මොහොතකින් ස්පේස් ෂිප් 2 යානයේ නියමුවන් යානය මව් යානයේ ගමන් මාර්ගයෙන් මදක් වෙනස් ගමන් මාර්ගයකට යොමුකොට රොකට් එන්ජිම දල්වන ලදී. මේ සියල්ලම ඉතා සාර්ථකව සිදුවූ බව යානයෙන් පාළණ මැදිරිය වෙත ස්වයංක්‍රීයව එවන ලද telemetry දත්ත පැහැදිලිව පෙන්නුම් කරයි.

පාලන මධ්‍යස්ථානයේ ඇති අධිබල දුරේක්ශ මගින්ද මේ සියල්ල නිරීක්ශණය කෙරෙමින් හා ඡායාරූප ගතකරමින් පැවති අතර තත්පර කිහිපයක් ඇතුලට ස්පේස් ෂිප් 2 යානය රොකට් එන්ජිම දල්වාගෙන මව් යානය පසුකරමින් වේගයෙන් ඉදිරියට යන ආකාරය සටහන් වී තිබුණි. මේ වනවිට රොකට් එන්ජිම දල්වා තත්පර 8ක් ගෙවීගොස් තිබුණු අතර,සියලුම පද්ධති නිවැරදිව ක්‍රියාත්මක වන බව පෙනෙන්නට තිබුණි. ඒ වනවිට යානය ශබ්දයේ වේගය ඉක්මවූවා පමණකි.


එහෙත් නිමේෂයකින් සියල්ල වෙනස් විය. අවසන් ඡායාරූපයේ ස්පේස් ෂිප් 2 යානය අහසේදීම කැබලිවලට කුඩුවී යන ආකාරය සටහන්වී තිබුණි. ගිණිබෝලයක්ද සටහන්වී තිබූ බැවින් බොහෝ නිරීක්ශකයින් මෙන්ම අණතුර පිලිබඳ විමර්ශණය සිදුකරන අමෙරිකානු රජයට අයත් National Transportation Safety Board (NTSB) ඒජන්සියේ විමර්ශකයින්ගේද සැකය වී තිබුණේ අලුත් ඉන්ධන වර්ගයක් යොදමින් ක්‍රියාත්මක වූ රොකට් එන්ජිම පුපුරාගොස් මෙම ව්‍යසනය සිදුවන්නට ඇති බවයි. රේඩාර් දත්තවලට අනුව යානය පොලොවට අඩි 50,000ක් ඉහල අහසේදී විනාශවී ගියේය.

රොකට් මෝටරය හා ඉන්ධන ටැංකිය සොයා ගැනේ - පිපුරමක් සිදුවූ බවට කිසිදු සළකුණක් නැතැයි විමර්ශකයින් පවසති!



යානයේ ඉන්ධන ටැංකියේ හා රොකට් මෝටරයේ කොටස් ඉහත ඡායාරූපවල දැක්වේ.
යානයේ විනාශවීම පිලිබඳව විමර්ශණය ආරම්භකල NTSB විමර්ශකයින්, යානයේ සුන්බුන් අතර එහි රොකට් එන්ජිමේ දහනය සීග්‍ර කරන ද්‍රව ඔක්සිඩයිසර් ටැංකිය, ඝණ ඉන්ධන ටැංකිය හා රොකට් මෝටරය සොයාගත් අතර ඒවා සියුම්ව නිරීක්ශණයට බඳුන්කල ඔවුන් ඉන්ධන ටැංකි හා රොකට් මෝටරයේ දහන කුටීරිය කිසිශු ආකාරයක පිපුරුමකට හෝ වෙනයම් ආකාරයක අණතුරකට බඳුන්වී නැතිබව තහවුරු කරගන්නා ලදී. ඒ අනුව අලුත් ඉන්ධන වර්ගය නිසා එන්ජිම පුපුරා ගිය බවට වූ තර්කය මුලුමනින්ම බැහැර කිරීම සිදුවිය. 

එසේ නම් සිදුවූයේ කුමක්ද?


සහයක නියමු මයිකල් ඇල්ස්බරි අතින් සිදුවූ බරපතල අත්වැරැද්දක් හෙලිවෙයි!

යානයෙන් ලැබුනු ටෙලිමෙට්‍රි දත්ත, යානයේ නියමු කුටියේ පටිගතවූ වීඩියෝ දර්ශණ හා අධිබල දුරේක්ශ මගින් යානයේ අවසන් තත්පර කිහිපය ඇතුලත් වීඩියෝ පට නැවත නැවතත් විශ්ලේෂණය කල NTSB විමර්ශණ කණ්ඩායම, යානයේ උප නියමු මයිකල් ඇල්ස්බරි අතින් සිදුවූ බරපතල අත්වැරැද්දක් හෙලි කර ගත්තා. 

එම අත්වැරැද්ද නම් ඔහු, යානයේ පිටුපස වලිග කොටස, සැළසුම් කල වෙලාවට කලින් සිරස් අතට, එනම් feathering ආකාරයට ස්ථානගත කිරීම සඳහා ක්‍රියාත්මක කලයුතු ලීවර දෙකෙන් එකක් ක්‍රියාත්මක කිරීමයි. යානයේ පියාසර සැළස්මට අනුව එය ක්‍රියාත්මක කල යුතුව තිබුනේ එහි වේගය ශබ්දයේ වේගය මෙන් 1.4ක් ඉක්මවා අඩි 65,000ක් ඉහල නැගීමෙන් පසුවයි. එහෙත් ඇල්ස්බරි යම් කිසි හේතුවක් නිසා යානය ශබ්දයේ වේගය ඉක්මවා යන මොහොතේ, අඩි 50,000ක් ඉහල ඝණ වායුගෝලයේ යමින් සිටියදී ලීවරය ක්‍රියාත්මක කරනවා. ඇලිස්බරි මෙම ලීවරය ක්‍රියාත්මක කල බව තමන් නොදත් බව අණතුරෙන් දිවිගලවාගත් යානයේ නියමු පීටර් සීබෝල්ඩ් පවසනවා.

Feathering ආකාරයට යානයේ වලිගයේ අත්තටු සකස්කල විට දිස්වෙන අයුරු...
Feathering ආකාරයට වලිගය ස්ථානගත කිරීමේ උපක්‍රමය ක්‍රියාත්මක කල යුත්තේ වායුගෝලීය ඝණත්වය ඉතා අඩු අවස්ථාවලදීයි. ඝණත්වය වැඩි වායුගෝලයේදී එය ක්‍රියාත්මක කලහොත් එය මත යෙදෙන අධික පීඩනය හා ආතතිය (stress) නිසා එය කැඩී යන්නට පුලුවන්. විමර්ශකයින් දැන් අනුමාන කරන්නේ සහයක නියමුවා මෙම ලීවරය ක්‍රියාත්මක කිරීමෙන් ඝණ වායුගෝලයේ අධික වේගයෙන් ගමන්කරන අවස්ථාවේ වලිග කොටස සිරස්වීම නිසා ඇතිවුනු වායුගතික පීඩනය  (aerodynamic pressure) හේතුකොට ගෙන යානය කැඩී බිඳී විනාශවූ බවයි.
අණතුරින් පුදුමාකාර ලෙස දිවි ගලවාගත් නියමු පීටර් සීබෝල්ඩ් [වම් පස] හා අණතුරින් මියගිය සහයක නියමු මයික් ඇල්ස්බරි [ දකුණු පස]

මයිකල් ඇලිස්බරි වැනි ඉතා පලපුරුදු පරීක්ශණ ගුවන් නියමුවෙකු මෙවැනි ප්‍රාථමික ගණයේ අත්වැරැද්දක් සිදුකලේ ඇයි?

NTSB විමර්ශකයින් හට මෙන්ම වර්ජින් ගැලැක්ටික් හා ස්කේල්ඩ් කොම්පොසයිට් සමාගම් වලටද දැන් විසඳීමට ඇති ප්‍රධාන ගැටලුව මෙයයි. ස්පෙස් ෂිප් 2 යානයේ පරීක්ශණ පියාසැරි වල නිරතවූ නියමුවන් සතර දෙනෙකු සිටින අතර ඔවුන් විමර්ශකයින්ට ලබාදී ඇති තොරතුරු වලට අනුව යානයේ රොකට් එන්ජින් ක්‍රියාත්මක කොට පියාසර කිරීමේදී ඉතා අධික කම්පණයන්ට හා ස්පන්ධනයන්ට මුලු යානයම බඳුන්වනවා. ඔවුන් පවසන අන්දමට මෙම ස්පන්ධනයන් කොතරම් තීව්‍රද යත්, යානයේ වීඩියෝ තිර හා මීටර් වලින් ලබාදෙන කියවීම් හා තොරතුරු පැහැදිලිව දැක ගැනීම ඉතා අපහසුයි. මයිකල් ඇලිස්බරි නියමිත කාලයට පෙර ලීවරය ක්‍රියාත්මක කලේ ඔහුට යානයෙන් ලබාදුන් දත්ත නිසි පරිදි දැකගත නොහැකිවීමෙන්ද?

NSTB විමර්ශකයින් පවසන අන්දමට නිශ්චිත නිගමනයකට එළඹීමට ඔවුන් හට වසරක කාලයක් පමණ ගතවනි ඇති...

ගැලැක්ටික් සිහිනය...

Friday, 14 November 2014

අඟහරු ලෝකයට ගිය ඉන්දියාවේ අරපිරිමැස්ම



මාසයකට පමණ ඉහතදී ඉන්දියාව අඟහරු ලෝකයට ‘‘මංගල්යාන්’ නැමැති අභ්‍යාවකාශ යානාවක් සාර්ථකව ගොඩබැස්සුවේය. එය වසර ගණනක් තිස්සේ එරට විද්‍යාඥයන් දැරූ යෝධ පරිශ‍්‍රමයක සාර්ථක ප‍්‍රතිඵලයකි. අප ජීවත් වන පෘථුවියේ සිට අඟහරු ලෝකය දක්වා ගිය එම ගමනට ඉන්දියාව වැය කළ මුදල, කිලෝ මීටරයකට ඉන්දියානු රුපියල් 14 ක් යැයි ගණන් බලා තිබේ. සාපේක්ෂ වශයෙන් සළකන විට එය, එරටේ මහ පාරක ත‍්‍රී වීලරයකියන් කිලෝ මීටරයක් යෑමට වැය වන මුදලට වැඩි වෙනසක් නැති වියදමකි.


පෘථුවිය සහ අඟහරු ලෝකය අතර පවතින දුර ස්ථායී නැත. පෘථුවිය මෙන්ම අඟහරු ග‍්‍රහයා ද සූර්යා වටේ කැරකෙන්නේ සරළ වෘත්තාකාරව නොවන නිසා, මේ වස්තූන් දෙක අතර එක මොහොතක පවතින දුර, තව මොහොතක පවතින දුරින් වෙනස් විය හැකිය. එබැවින් අභ්‍යාවකාශ ගමන ඉන්දියාව සැලසුම් කෙළේ, පෘථුවිය සහ අඟහරු ලෝකය අතර අවම දුරක් පවතින අවස්ථාවකයි. මේ ග‍්‍රහ ලෝක දෙක ආසන්නම දුරකින් පිහිටන අවස්ථාවකදී පවා ඒ ලෝක දෙක අතර දුර කිලෝ මීටර් මිලියන 50 කටත් වැඩියි.

පෘථුවියේ මහ පාරක් හැදීමට වැය වන මුදල සහ අභ්‍යාවකාශ ගමන් පථයක යාමට වැය වන මුදල අතර සෘජු සංසන්දනයක් කිරීම තාර්කික නැති බව ඇත්ත. එසේම ගුවනේ ගමන් කිරීම සහ පොළොවේ ගමන් කිරීම සඳහා දැරිය යුතු වියදම අතරත් වෙනසක් තිබේ. උදාහරණයක් වශයෙන්, කොළඹ සිට පැරිසිය අතර ගුවනින් යාමට/ඒමට වැය වන මුදල කිලෝ මීටරයකට රුපියල් 4.41 කි. එහෙත් බස් රියකින් ලංකාවේ  ඕනෑම තැනක කිලෝ මීටරයක් යාමට රුපියල් 9 ක් වැය වෙයි. ඒ අනුව ලංකාවේ බස් එකක ගියාට වඩා අඩු මුදලකින් ඉන්දියානු රොකට් එකකින් අඟහරු ලොවට යා හැකිය.
Related Posts Plugin for WordPress, Blogger...