1950 දී ඩෙන්මාර්කයේ ඕහූස් හි උපත ලැබූ බියාර්න් ස්ට්රෝස්ට්රප් C++ ක්රමලේඛන භාෂාවේ (programming language) නිර්මාපකයා සහ එහි මුල්ම ක්රියාත්මක කරන්නා (implementer) ලෙස ප්රසිද්ධියට පත් ඩෙන්මාර්ක ජාතික පරිගණක විද්යාඥයෙකි.
C++ හි නිර්මාණය (1979–1985): AT&T බෙල් පරීක්ෂණාගාරයේ (AT&T Bell Laboratories) සේවය කරන අතරතුර, ස්ට්රෝස්ට්රප් සිමියුලා (Simula) භාෂාවේ පැවති ඉහළ මට්ටමේ object-oriented සංකල්ප, C භාෂාවේ පැවති පහළ මට්ටමේ කාර්යක්ෂමතාව සහ පද්ධති පාලන හැකියාවන් සමඟ ඒකාබද්ධ කිරීමට කටයුතු කළේය. මුලින් "ක්ලාසස් සහිත C" ("C with Classes") ලෙස හැඳින්වුණු මෙම භාෂාව, 1983 දී "C++" ලෙස නැවත නම් කරන ලද අතර 1985 දී වාණිජමය වශයෙන් ඉදිරිපත් කර තිබෙනවා.
ස්ට්රෝස්ට්රප් මහතා ටෙක්සාස් A&M විශ්වවිද්යාලයේ මහාචාර්යවරයෙකු සහ පරිගණක විද්යා අධ්යයනාංශයේ සභාපතිවරයා ලෙසත්, මෝගන් ස්ටැන්ලි (Morgan Stanley) ආයතනයේ තාක්ෂණික අංශයේ කළමනාකාර අධ්යක්ෂවරයෙකු ලෙසත්, කොලොම්බියා විශ්වවිද්යාලයේ මහාචාර්යවරයෙකු ලෙසත් සේවය කර ඇත.
එසේම ඇමරිකා එක්සත් ජනපදයේ ජාතික ඉංජිනේරු පීඨයේ (US National Academy of Engineering) සාමාජිකයෙකු වන අතර ACM සහ IEEE යන ආයතනයන්හි සම්මානනීය සාමාජිකයෙකු (Fellow) ද වේ.
ආරක්ෂාව සහ කාර්යක්ෂමතාව අතිශය තීරණාත්මක වන කේත ල ලිවීමට කෘතිම බුද්ධිය (AI) සුදුසු නෑ - බියාර්න් ස්ට්රෝස්ට්රප්
C++ ක්රමලේඛන භාෂාව නිර්මාණය කරමින්, zero-overhead abstraction මූළධර්මය මගින් පද්ධති ක්රමලේඛන (systems programming) ක්ෂේත්රයේ විප්ලවීය වෙනසක් සිදුකළ ඩෙන්මාර්ක ජාතික පරිගණක විද්යාඥ බියාර්න් ස්ට්රෝස්ට්රප්, කෘතිම බුද්ධිය (AI) මගින් මෘදුකාංග ඉංජිනේරු විද්යාව මෙහෙයවනු ලබන වත්මන් දිශානතිය පිළිබඳව සැක පහළ කරනවා.
සංකීර්ණ පද්ධති සඳහා යොදාගැනීමේදී AI මගින් ජනනය කරන කේත (generated code) සාර්ථකත්වයක් අත්කර ගැනීමට අපොහොසත් වන බව පවසන ස්ට්රෝස්ට්රප්, ව්යුහගත ක්රමලේඛන භාෂා වෙනුවට ස්වාභාවික මානව භාෂාව (natural language) ආදේශ කරනු ඇතැයි යන මතය මූලික වශයෙන්ම දෝෂ සහිත එකක් ලෙස බැහැර කරයි.
ස්වාභාවික භාෂාව සතු සහජ අවිනිශ්චිත ස්වභාවය නිසා, පද්ධතියක නිවැරදි හැසිරීම අර්ථ දක්වා ගැනීමට මිනිසාට සෑම විටම විධිමත් වියුක්තකරණයන් (formal abstractions) සහ නිවැරදි කේතයන් අවශ්ය වන බව ඔහු තදින්ම විශ්වාස කරනවා.
ඔහුගේ දෘෂ්ටිකෝණයට අනුව, AI ආකෘති මගින් නිතරම අනවශ්ය ලෙස සංකීර්ණ වූ ද, මන්දගාමී වූ ද, සූක්ෂ්ම දෝෂ හා ආරක්ෂක දුර්වලතාවලින් පිරි කේතයන් ලබාදෙන අතර, එමගින් පද්ධති තහවුරු කිරීමේ (validation) ක්රියාවලිය දැඩි බාධාවකට ලක් කරනවා.
පරිශීලක විධානයන්හි (prompts) සිදුවන සුළු වෙනස්වීම් හමුවේ පවා අනපේක්ෂිත ලෙස වෙනස් වන, ස්ථිර නිශ්චිත භාවයකින් තොර කේතයන් පරීක්ෂා කිරීමට සිදුවීම නිසා ජ්යෙෂ්ඨ ඉංජිනේරුවරුන් දැඩි අපහසුතාවයට පත්වන අතර, එම කාලය වැය කිරීමට අකමැති වීමෙන් ඔවුන් විශ්රාම ගැනීමට හෝ එම කාර්යයන්ගෙන් ඉවත් වීමට පෙළඹිය හැකි බවට ඔහු අණතුරු අඟවනවා.
ආරක්ෂාව සහ කාර්යක්ෂමතාව අතිශය තීරණාත්මක වන පද්ධති සඳහා වර්තමාන AI මෙවලම් යෝග්ය නොවන බව ස්ට්රෝස්ට්රප් මෙසේ කියනවා;
"දැන් අපි හිතමු ලෝකයේ තියෙන කේතවලින් 70% ක් හෝ 80% ක් ඔය රටාවට අයිති වෙන්නේ නැහැ කියලා, නමුත් මගේ වැඩි අවධානයක් තියෙන්නේ අර ඉතිරි 10% හෝ 20% කේත ගැනයි."
ඔහුගේ මෙම විවේචනය සෘජුවම ගොඩනැගී ඇත්තේ පරිගණක විද්යාව පිළිබඳ ඔහුගේ මූලික දර්ශනය පදනම් කරගෙන ය: එනම්, මෙහෙයුම් පද්ධති (operating systems), කාවැද්දූ දෘඩාංග (embedded hardware), විදුලි සංදේශ සහ අධි-සංඛ්යාත එන්ජින් ක්රියාත්මක වන යටිතල පහසුකම් මට්ටමේ මෘදුකාංග (infrastructure-level software) සඳහා පූර්ණ නිවැරදිභාවය, නිශ්චිත සම්පත් කළමනාකරණය සහ ශූන්ය ධාවන පිරිවැයක් (zero runtime overhead) අත්යවශ්ය වන අතර, සංඛ්යානමය ආකෘති (statistical models) මගින් එවැනි ගුණාංග කිසිසේත්ම සහතික කළ නොහැක.
Comments
Post a Comment