සී.අයි.ඒ ඩ්‍රෝන යානා වලට ඇෆ්ඝනිස්ථානයේ හා පාකිස්ථානයේ අල් ඛයිඩා ඉලක්ක පෙන්නවන අධෝරක්ත සංවේදක


ඉහත පෙනෙන ඉලෙක්ට්‍රොනික පරිපථය අඟල් එකහමාරක් පමණ වන අතර කුඩා වොල්ට් නවයේ බැටරියකින් ක්‍රියාත්මක වේ. සංකීර්ණ බලශක්ති කළමණාකරන උපක්‍රම වලින් සමන්විත මෙම ඉලෙක්ට්‍රොනික පරිපථයට බැටරි බලයෙන් පැය 100ක පමණ කාලයක් ක්‍රියාත්මක විය හැකි අතර එය ප්‍රභල අධෝරක්ත සංඥාවක් නිකුත් කරයි. සැතපුම් 5ක් පමණ ඉහල අහසේ සිට නිරීක්ශණය කල හැකි මෙම අධෝරක්ත කදම්භය පාකිස්ථානයේ හා ඇෆ්ඝ්නිස්ථානයේ දුශ්කර ප්‍රදේශ වල ඇති අල් ඛයිඩා ත්‍රස්ත මධ්‍යස්ථාන පවත්වාගෙන යන නිවාස හා ගොඩනැගිලිවල අමුණන්නේ සී.අයි.එ සංවිධානය මගින් ගෙවීම් කරන පශ්ඨාන් නම් ගෝත්‍රික කණ්ඩායමක් මගිනි.

සී.අයි.ඒ ඔත්තු කරුවන් ලෙස ක්‍රියාත්මක වන පශ්ඨාන් ගෝත්‍රිකයින් අල් ඛයිඩා කඳවුරු හා අල් ඛයිඩා නායකයින්, මෙහෙයුම් කරුවන් සැඟවී සිටින නිවාස පිලිබඳව සෙවිල්ලෙන් සිට හොර රහසේ මෙම කුඩා ඉලෙක්ට්‍රොනික පරිපථ එම නිවාසය අවට අටවා සී.අයි.ඒ මෙහෙයුම් කරුවන් හට දැනුම් දෙයි. අහසේ සිට මෙම අධෝරක්ත කදම්බ හඳුනාගැනීමට ඩ්‍රෝන යානාවල අධෝරක්ත කැමරා සමත්වන අතර දින ගනනාවක් අහසේ සැඟවී සිටිමින් මෙම නිවාස පිලිබඳව සෙවිල්ලෙන් සිටිනා ඩ්‍රෝන යානා සැක කටයුතු පුද්ගලයන් හෝ වාහන මෙම නිවෙස් කරා පැමිණි පසු සිය හෙල්ෆයර් මිසයිල දියත් කොට එම නිවාස අල් ඛයිඩා ත්‍රස්තයින් සමගම පුපුරවා හරියි.

මීට අමතරව අල් ඛයිඩා සාමාජිකයින් ලෙස සැක කෙරෙනවුන්ගේ ජංගම දුරකථනවලට කුඩා චිපයන් ඇතුලුකොට එම දුරකථන සංඥා අහසේ ඇති ඇමරිකන් ඩ්‍රෝන යානාවල සංවේදක වලට හසුකර ගැනීමේ තාක්ශණයක්ද ඇත. අල් ඛයිඩා සාමාජිකයින්ගේ ජංගම දුරකථනවලට මෙම සී.අයි.ඒ චිපයන් හොර රහසේ ඇතුලුකරන්නේද සී.අයි.ඒ සංවිධානයට සේවය කරන ඇෆ්ඝන් හා පාකිස්ථානු ජාතිකයින් විසින් බව පැවසේ.

ඇෆ්ඝනිස්ථානයේ ගෝත්‍රික ජනතාව සමග සම්මිශ්‍රව ගමන්ගන්නා ඇමරිකානු සී.අයි.ඒ හෝ විශේෂ මෙහෙයුම් ක්‍රියාකාරියෙකු..
මීට අමතරව ඇෆ්ඝන් ඔත්තුකරුවන්ගේ සහයෙන් සී.අයි.ඒ හා අමෙරිකානු ඒකබද්ධ විශේෂ මෙහෙයුම් මධ්‍යස්ථානයේ කොමාන්ඩෝ ඒකකද ඇෆ්ඝනිස්ථානය හා පාකිස්ථානයේ ඇෆ්ඝනිස්ථානය යාබද ප්‍රදේශවල සිවිල් ඇඳුමින් නිරන්තරව ගැවසෙමින් ඩ්‍රෝන ප්‍රහාර සඳහා බුද්ධි තොරතුරු එකතු කරමින් සිටින බව ඇෆ්ඝනිස්ථානයෙන් හා පාකිස්ථානයෙන් ලැබෙන නවතම වාර්තාවල සඳහන් වෙයි.

එමෙන්ම තවමත් එලිනොදැක්වුනු පොතක් වන "Obama's Wars" උපුටාගැනීමක් දක්වන වොශිංටන් පෝස්ට් පුවත්පත සී.අයි.ඒ සංවිධානයට හොඳින් පුහුණුකොට සන්නද්ධ කරන ලද 3000ක පමණ ඇෆ්ඝන් සටන් කණ්ඩායමක්ද සිටී. "Counterterrorist Pursuit Teams" ලෙස හඳුන්වන මෙම කණ්ඩායම් පාකිස්ථානයේ හා ඇෆ්ඝනිස්ථානයේ දුශ්කර ප්‍රදේශවල පිහිටි අල් ඛයිඩා කඳුවුරු වලට කඩා වැදී ඒවා විනාශ කිරීම සඳහා විශේෂයෙන් පුහුණුව ලබා ඇති බව පවසයි.

2 comments:

ඇපල් iOS 6 Maps සිතියම් වැඩසටහන අසම්පූර්ණයි! වැරදි සහිතයි! - ඇපල් ප්‍රධාන විධායක ටිම් කුක් විවෘත ලිපියකින් පිලිගනී


ඇපල් සමාගම අයිෆෝන් 5 ජංගම දුරකථනය සමග හඳුන්වාදුන් iOS 6 මෙහෙයුම් පද්ධතියට අනුබද්ධ කොට සම්පාදනය කරන ලද iOS Maps සිතියම් වැඩසටහන දෝශ සහිත මෙන්ම අසම්පූර්ණ වැඩසටහනක් බව ඇපල් සමාගමේ ප්‍රධාන විධායක ටිම් කුක් මහතා ඇපල් සමාගමේ මිලියන ගණනක් වන පාරිභෝගිකයින් වෙත ඉදිරිපත් කරන ලද විවෘත ලිපියක් මගින් පිලිගෙන තිබේ.

iOS Maps වැඩසටහන, ඇපල් සමාගම කාලාන්තරයක් මුළුල්ලේම පවත්වාගෙන ගිය අතිශයින්ම ඉහල තත්ව පාලන පරාමිතියන්ට (quality parameters) නොගැලපෙන තරමේ පහල මට්ටමක පවතින බව විවෘතව පිලිගන්නා බවත් ඒ පිලිබඳව සිය සමාගම පිලිබඳව දැඩි විශ්වාසයකින් සිටිනා,  තම සමාගමට අතිශය ලෙන්ගතුව සිටින පාරිභෝගිකයින් ගෙන සමාව ඉල්ලා සිටින බවත් ටිම් කුක් මහතා සඳහන් කොට තිබේ.

අතිශයින්ම ජනප්‍රියත්වයට පත්ව තිබෙන ගූගල් මැප්ස් වැඩසටහනට ආදේශකයක් ලෙස නිර්මාණය කල ඇපල් මැප්ස් වැඩසටහන ගූගල් මැප්ස් වැඩසටහනට වඩා හැම අතින්ම ඉදිරියෙන් තිබෙනු ඇති බවට බොහෝ දෙනා විශ්වාසකල නමුත් අයිෆෝන් 5 සමග ඉදිරිපත් වුනු එම වැඩසටහන මහජනතාව අතට පත්වී දින කිහිපයකින්ම එය ගූගල් මැප්ස් වලට වඩා ඉතා අඩු හැකියාවන් ගෙන් යුතු, වැරදි රාශියක් ඇති වැඩසටහනක් බව තාක්ශණික වෙබ් අඩවි වාර්තාකරන්නට විය.

ඇපල් මැප්ස් වැඩසටහනේ හාස්‍ය උපදවන දෝෂ


ජර්මනියේ අගනුවර වන බර්ලින් නගරය ඇන්ටාක්ටිකාවට ගෙන ගිය ඇපල් මැප්ස්


නිව්යෝර්ක් නගරයේ සුප්‍රකට විලියම්ස්බර්ග් පාලම ඇපල් මැප්ස්වල කඩාවැටුනු ස්වභාවයකින් පින්වන ආකාරය


නිව්යෝර්ක් නගරයේ මෑන්හැට්න් පාළම ඇපල් මැප්ස්වල ගිලා බැස ඇති ආකාරය


සැන් ෆ්‍රැන්සිස්කෝ නගරයේ සුප්‍රකට සංචාරක සළකුණක් වුනු ලින්කන් ඩිජිටල් කළාගාරය ලෙස ඇපල් මැප්ස් පෙන්වන්නේ සම්පූර්ණයෙන්ම වැරදි ස්ථානයකි


ඇපල් මැප්ස් පෙන්වන ආකාරයට චීලී රටේ නගරයක මංමාවත් මුහුද උඩින් දිවෙන ආකාරය


කැරිබියන් සාගරයේ කේමන් දූපත ඇපල් මැප්ස් වල පෙන්වන ආකාරය හා ගූගල් මැප්ස් වල පෙන්වන ආකාරය


රැළි වැටී ඇති කැනඩාවේ ටොරොන්ටෝ ගුවන් තොටුපොළ


ලන්ඩන් නගරයේ නිළ Apple Store අලෙවිසැළ ඇති ස්ථානය පවා වැරදියට පෙන්වන ඇපල් මැප්ස්






2 comments:

MARS UPDATE: කිව්රියෝසිටි රෝවරය අඟහරු මත ගලා යන දිය පාරවල් තිබුණු බවට සළකුණු සොයාගනී.


අඟහරුවා මත ගොඩ බැස දින 50 ඉක්ම යද්දී කිව්රියෝසිටි අඟහරු විද්‍යාගාරය සිය විද්‍යා ගවේශණ චාරිකාවේ ප්‍රථම වැදගත් සොයාගැනීම වාර්තාකොට ඇත.

ඒ, යානය ගොඩබැස සිටින ගේල් ආවාටය අවට ප්‍රදේශයේ ගලා ගිය ප්‍රමාණයෙන් විශාල දොළ පහරක සාධක සොයා ගැනීමෙනි. රෝවරයේ ප්‍රධාන කැමරාවලින් ගන්නා ලද ඡායාරූප වලට අනුව එම ස්ථානය අඟහරුවා මත ගලා ගිය ඉපැරණි දොළ පහරක පතුලක් බවට සනාත කෙරෙන, දීර්ඝ කාළයක් ජලය ගලා යාමෙන් පමණක් ඇතිවන්නා රවුම්, සුමට ගල් කැබිළිති අඩංගු ප්‍රදේශයක් බව තහවුරු වී ඇත. මෙවැනි සුමට, රවුම් ගල් කැබලි ඇතිවන්නේ දීර්ඝ කාළයක්, එනම් අඩුම ගණනේ වසර දහස් ගණනක්වත් ගලා ගිය ජලප්‍රවාහයකින් බව විද්‍යාඥයින් පවසයි.



පහත ඡායාරූපය, අඟහරු විද්‍යාගාරය මගින් ගන්නා ලද, අඟහරුවාගේ වියලීගිය ජල පහරක පතුලේ පාශාණ හා සැළකිය හැකි ප්‍රදේශය හා පෘථිවියේ එවැනි වසර දහස් ගණනක් ගලාගොස් වියලීගිය දොළ පහරක පතුලේ ඡායාරූප හා කෙරෙන සැසඳීමකි. ඔබට පෙනෙන අන්දමට අඟහරුවාගේත්, පෘථිවියේත් මෙම ඡායාරූප දෙකෙහි දැකිය හැකි සැළකිය යුතු වෙනස වන්නේ අඟහරුවාගේ ඡායාරූපය, එයට ආවේනික මලකඩ රතු පැහැයෙන් තිබීම පමණකි.


මේ අනුව කලින් අනුමාන කල ආකාරයට වඩා ඉතා දීර්ඝ කාළයක් අඟහරුවා මත ගලායන ද්‍රව ජලය තිබූ බව තහවුරු වන බවත්, ඒ අනුව අඟහරුවා මත ජීවය හට ගැනීමට ඇති ඉඩකඩ වඩාත් වැඩි වන බවත් නාසා විද්‍යාඥයින් පවසනවා.

මෙම ප්‍රදේශය තව දුරටත් අධ්‍යයනය කෙරෙමින් පවතින අතර දැනට නාසා විද්‍යාඥයින් කර ඇති ඇස්තමේන්තු අනුව මෙම ජල පහර තත්පරයකට අඩි 3ක පමණ වේගයෙන් ගලා යන්නට ඇතැයි අනුමාන කෙරෙන අතර මිනිසෙකුගේ ඉන දක්වා, එනම් අඩි 3-4ක් පමණ ගැඹුරු වන්නට ඇතැයිද පැවසේ.

නාසා විද්‍යාඥයින්ගේ ඊලඟ අරමුණ මෙම ප්‍රදේශය තුල ජීවයේ සාධක වන ජීව කාබනික ද්‍රව්‍ය (organic carbon) තිබුණේදැයි සොයා බැලීමයි.

2 comments:

Smartphone War: ඇපල් සැමසුන්ග් හබය වෙළඳ දැන්වීම වලිනුත්....




ඇපල් සමාගමේ බුද්ධිමය දේපොල අයුතුලෙස පරිහරණය කරන ලද බවට අධිකරණයෙන් විනිශ්චය ලැබී, ඩොලර් බිලියනක වන්දියක් ගෙවන්නට නියමවී දැන් සති කිහිපයකි. මෙම විනිශ්චය පිලිබඳ සැම්සුන්ග් සමාගමේ නිළ ස්ථාවරය (එනම් තීන්දුවට එරෙහිව අභියාචනයක් ඉදිරිපත් කරන බව ) එලිදැක්වී ඇතත් තවමත් සැම්සුන්ග් සමාගම එවැනි පියවරක් ගෙන නැත.

එහෙත්, ඇපල් සමාගම පිලිබඳව තමන්ගේ ඇති ජුගුප්සාව  සැම්සුන්ග් සමාගම මේ ඉරිදා (සැප් 16) අමෙරිකානු පුවත්පත්වල පලකල දැන්වීමක් මගින් එලිදක්වී ඇත.

කෙලින්ම ඇපල් අයිෆෝන් 5 ඉලක්ක කරගනිමින් පලවී ඇති, "It doesn't take a genius" නම්වූ මෙම දැන්වීම තුලින් සැම්සුන්ග් සමාගම සිය ගැලැක්සි SIII දුරකථනය හා ඇපල් අයිෆෝන් 5 සංසන්දනය කරමින්, ඇපල් අයිෆෝන් 5ට වඩා අධි-තාක්ශණික උපාංග රැසක් තමන්ගේ ගැලැක්සි SIII ෆෝනයේ අඩංගු බව පෙන්වාදෙයි. "It doesn't take a genius" හෙඩිම පවා ඇපල් සමාගමේ නිළ අළෙවි සැල්වල අංගයක් වන, පාරිභෝගිකයින්ගේ ගැටලු විසඳාදෙන පුහුණු ඇපල් තාක්ශණික ශිල්පීන්ගේ සේවය ලබාගත හැකි "Genius Bar" නම් නවතම පාරිභෝගික සේවාව අවඥාවට බඳුන්කරයි.



ඇපල් සමාගම ඩොලර් බිලියනයක වන්දියක් දිනාගත්තාට අමතරව, සිය ජනප්‍රියම ජංගම දුරකථන හා ටැබ්ලට් පරිගණක මාදිලි ඇමරිකාවේ තහනම් කරන්නට යයි උසාවි නියෝග ඉල්ලමින් තමන්ගේ ව්‍යාපාරය විනාශකිරීමට ගන්නා උත්සහය, විශේෂයෙන්ම ඇන්ඩ්‍රොයිඩ් මෙහෙයුම් පද්ධතිය පිලිබඳව ගූගල් සමාගම සමග ඇති කෝන්තරය තමන්ව විනාශ කරමින් පිරිමසාගන්නට ඇපල් සමාගම උත්සහ කිරීම, සැම්සුන්ග් සමාගම දැඩි ලෙස කළකිරවීමට සමත්වී ඇතැයි විචාරකයින් පවසනවා.

ඇපල් අයිෆෝන්, අයිපෑඩ් තුල වැඩියෙන්ම තිබෙන්නේ සැම්සුන්ග් සමාගමේ නිශ්පාදන!

ඇපල් අයිෆෝන් හා අයිපෑඩ් පරිගණක වල සාර්ථකත්වයේ යම් ගෞරවයක් සැම්සුන්ග් සමාගමටද ලැබිය යුතුවන්නේ ඇපල් ඇයිෆෝන් හා අයිපෑඩ් වල වැදගත් උපාංග ගණනාවක් ඇපල් සමාගම මිළදීගන්නේ සැම්සුන්ග් සමාගමෙන් වීමයි.

මෙය බොහෝ දෙනා නොදන්නා කරණයක්. ඇපල් සමාගම සැම්සුන්ග් සමාගමෙන් සිය නිශ්පාදන සඳහා ප්‍රොසෙසර් (ප්‍රධාන ප්‍රොසෙසරය නොවේ) DRAM හා NAND Flash මතක පරිපථ මිළදීගනියි. සැම්සුන්ග් සමාගමද ඇපල් සමාගමට උපරිම සේවයක් ලබාදීම සඳහා ඇමරිකාවේ ටෙක්සාස් ප්‍රාන්තයේ, ඇපල් සමාගම වෙනුවෙන්ම විශාල සංගෘහිත පරිපථ කර්මාණ්තශාලවක්ද පිහිටුවා ඇත. ඇපල් සමාගමේ නිශ්පාදන ජනප්‍රිය කරමීමට මෙතරම් නිහඬ සේවයක් කරද්දීත් ඇපල් සමාගම, තමන් දැඩි උත්සහයකින් ගොඩනගාගත් ජංගම දුරකථන ව්‍යාපාරයට පහර පිට පහර එල්ලකිරීම සැම්සුන්ග් සමාගමේ ඉවසීමේ සීමා රතු ඉර කරා තල්ලුකිරීමට සමත්වෙමින් ඇතැයි තතුදත් ආරංචිමාර්ග පවසයි.

මේ අතර ඇපල් සමාගමද සැම්සුන්ග් සමාගම මත යැපීම අවම කිරීමට පියවර ගෙන ඇති බව වෝල් ස්ට්‍රීට් ජර්නල් (Wall Street Journal) ව්‍යාපාරික පුවත්පත වාර්තාකොට සිටිනවා. සැම්සුන්ග් සමාගම වෙනුවට, තවත් දැවැන්ත දකුණු කොරියානු සංගෘහිත පරිපථ නිශ්පාදකයෙකු වන හයිනික්ස් (Hynix) සමාගමට වැඩියෙන් ඇනවුම් ලබාදීමට ඇපල් සමාගම පෙළබී ඇති බව වෝල් ස්ට්‍රීට් ජර්නල් සඳහන් කරනවා.

සැම්සුන්ග් දැන්වීමට විවේචන

මෙම දැන්වීම සම්බන්ධයෙන් සැම්සුන්ග් සමාගමට එල්ලවන ප්‍රධාන විවේචනය නම් ඔවුන් හිතාමතාම ඇපල් අයිෆෝන් වල ඇති ඉතා ජනප්‍රිය හා ප්‍රයෝජනවත් සේවාවන් වන FaceTime, iCloud, iTunes අයිෆෝන් උපාංග ලයිස්තුවෙන් ඉවත් කොට ඇති බවයි. මෙවැනි දැන්වීම් ඉදිරිපත් කිරීම එතරම් ඥාණාන්විත ක්‍රියාවක් නොවන බව මධ්‍යස්ථ විචාරකයින්ගේ මතයයි.

iPhone 5 නඩු දාන්න සැම්සුන්ග් දින ගනියි!

ඇපල් අයිෆෝන් 5 සැම්සුන්ග් ජන්ම භූමිය වන දකුණු කොරියාවේ වෙළඳපොලට නිකුත් කරන දිනයේම එයට එරෙහිව පේටන්ට් නඩුවක් දැමීමට සැම්සුන්ග් සමාගම බලාපොරොත්තුවෙන බව කොරියා ටයිම්ස් පුවත්පත වාර්තාකර සිටිනවා. ජංගම දුරකථනවල දත්ත සම්ප්‍රේශණ තාක්ශණයන්ට අදාල පේටන්ට් විශාල සංඛ්‍යාවකට හිමිකම් කියන සැම්සුන්ග් සමාගම පවසන ආකරයට යම් ජංගම දුරකථනයක් දත්ත සම්ප්‍රේශණ හැකියාව ලැබ තිබෙනවා නම් අනිවාර්යයෙන්ම තමන්ගේ පේටන්ට් බලපත්‍රවලින් ආවරණය වන තාක්ශණයන් එහි අඩංගුවී ඇති බව  කොරියා ටයිම්ස් පුවත්පතට පවසා තිබෙනවා. ඒ අනුව 4G LTE තාක්ශණය අඩංගු අයිෆෝන් 5 තමන්ගේ දත්ත සම්ප්‍රේශණ තාක්ශණ පේටන්ට් අනවසරයෙන් භාවිතයට ගෙන ඇතැයි චෝදනා කරමින් කොරියානු අධිකරණයක නඩු පැවරීමට සැම්සුන්ග් සමාගම මේදිනවල සූදනම් වෙමින් පවතින බව පැවසෙනවා.

සතපහේ කාසිවලින් වන්දිය ගෙවන්නට සූදානම් වන සැම්සුන්ග්


මේ අතර ඇපල් සැම්සුන්ග් සටන ප්‍රහසනයක් ලෙස දකින සමහර වෙබ් අඩවි, සැම්සුන්ග් සමාගම ඇපල් සමාගමට ගෙවිය යුතු ඩොලර් බිලියනයේ වන්දිය "නිකල්" ලෙස හැඳින්වෙන අමෙරිකානු සතපහේ කාසි වලින් ගෙවන්නට සූදානම් වන බවට බවට කතාවක් පතුරවමින් සිටිනවා. ඇපල් සමාගම උපහාසයට ලක් කරෙමින් සිදුකරන මේ ලිඳලඟ කතාවට අනුව මේ දිනවලසැම්සුන්ග් සමාගම ට්‍රක් රථ 30ක් සත පහේ කාසිවලින් පුරවමින් සිටින බවත්, නුදුරු දිනකදී මෙම ට්‍රක් රථ කැලිෆෝනියාවේ කියුපර්ටිනෝහි පිහිටි ඇපල් මූලස්ථානය ඉදිරිපිට මෙම සත පහේ කඳු ගොඩ බා යනු ඇති බවටත් කියවෙනවා.




6 comments:

හිතපු තරම් වැඩ කිඩ නැති iPhone 5 (හෙවත් කන්දක් විළිලා මී පැටියෙකු වැදීම? )



අයිෆෝන් 5 ගැන කියූ කතා බොහොමයකි. 

"දන්නවද අලුත් අයිෆෝන් එකේ අරවා තියෙනවා, මෙව්වා තියෙනවා....." පසුගිය වසර පුරාවටම ඇපල් සමාගමේ අයිෆෝනයේ තිබෙනවා යැයි කියන, අලුත් අලුත් ඇස් උලූප්පන තාක්ශණයන් ගැන අන්තර්ජාල තාක්ශණ ගොසිප් අඩවි (අපේ ගොසිප් ඒවා නොවේ) පලකල පුවත් බොහෝය....

NFC හෙවත් Near Field Communication තාක්ශණය, Wireless charging හෙවත් වයර රහිත බැටරි ආරෝපණ උපක්‍රමය, "Assistant" voice control system, laser projection keyboard, projection screen, changeable camera lens, Nano SIM technology, Bio-metric security system....

අයිෆෝන් 5 අඩංගු වනවා යයි කියූ මෙවැනි තාක්ශණයන් ගැන අපූරු වාර්තා විදුලිවේගයෙන් අන්තර්ජාලය පුරා පැතිරී ගියේය. අයිෆෝන් 5 මාදිලියේ යයි සැක කෙරුණු චායාරූපද අන්තර් ජාලයේ හුවමාරු වුනු අතර අයිෆෝන් 5 ගැන කතාකිරීම බටහිර ගොසිප් වෙබ් අඩවි වලට "හිට්" මවන මැජික් එකක් විය.

දැන් ගොසිප් වලට තිත වැටී තිබේ. පසුගිය සැප්තැම්බර් 12වැනිදා ඇපල් සමාගම නිළවශයෙන් අයිෆෝන් 5 මාදිලිය ලොවට හඳුන්වාදුන්නේය. ඇපල් ලෝකයේ ජේසුස් ක්‍රිස්තූන් වූ ස්ටීව් ජෝබ්ස් නොමැතිව මෑත ඉතිහාසයේ ඇපල් සමාගම එලිදැක්වූ පලමුවන වැදගත් වෙළඳ භාණ්ඩය වන මෙය ඇපල් සමාගමයේ අලුත් සාන්තුවරයා වන ටිම් කුක්ගේ ඉරණම හා තදින් බැඳී ඇත්තේ අයිෆෝන් 5 අසාර්ථකවුව හොත් ටිම් කුක්ගේ නායකත්වය පිලිබඳව සැක මතුවීමට එය ප්‍රභල හේතුවක් වන නිසාමය.

** (iPhone 4S ජෝබ්ස්ගේ වියෝවෙන් පසුව එලි දැක්වුනත්, එහි සියලු ගෞරවය ජෝබ්ස් වෙත පිරිනැමුනේ ඔහු නික්ම යනවිට 4S ෆෝනයේ සියලු නිර්මාණ කටයුතු අවසන්ව තිබුණු නිසයි)

අලුත් පාටකින් ආ පරණ ඇපල්?

බැලූ බැල්මට අයිෆෝන් 5 පෙනෙන වෙනස නම් එය කලු පැහැයෙන් නිමවා තිබීමයි. වෙනදා අයිෆෝන් වල රිදී හා සුදු පැහැයන්ට වඩා මෙය යම්ලෙසකින් ආකාර්ශණීය බව මට හැඟේ. ඊට අමතරව ඇති ලොකුම වෙනස නම් මෙහි තිරය 4S තිරයට වඩා අඟල් භාගයකින් (3.5 සිට අඟල් 4දක්වා) දිගින් වැඩි වීමයි. (පලල එසේමය). iP5 ඝණ කමින්ද අඩුය. (iP5 -0.30 inch ,  4S 0.37 inch).

4S හා සසඳන විට තිරයේ විබේධනයේ වෙනසක් නැතත් තිරය දිගින් වැඩිවීම නිසා දැන් එය LED රූපවාහිණී තිර ක්‍රියාත්මකවන 16:9 අනුපාතයට ක්‍රියාත්මකවේ. ෆෝනයේ බර අනුවද 4Sට වඩා 20% කින් අඩු බව පැවසේ. 

මීට අමතරව වැදගත්ම තාක්ශණික වැඩි දියුණුව නම් අධිවේගී දත්ත සේවා ප්‍රමිතියක් වන 4G LTE තාක්ශණය මෙහි අඩංගු කොට තිබීමයි. 4G LTE තාක්ශණයේ දත්ත සම්ප්‍රේශණ වේගය 3G ට වඩා 10ගුණයකින් පමණ වේගවත් බව පැවසේ. එමෙන්ම iP5 නවතම අධිවේගී ක්වඩ් කෝර් A6 ප්‍රොසෙසරයෙන් බලගැන්වෙන අතර මෙය 4S හි A5 ප්‍රොසෙසරයට වඩා දෙගුණයකින් වේගවත්ය. iP5 ප්‍රධාන කැමරාවද 4S කැමරාව ක්‍රියාත්මක වූ මෙගාපික්සල් 8ක විබේධනයකින් ක්‍රියාත්මක වන අතර මද ආලෝක තත්වයන් යටතේ හොඳ ඡායාරූප ගැනීමේ හැකියාව වර්ධනය කිරීම සඳහා විවිධ තාක්ශණික උපක්‍රම අඩංගු කොට ඇත.

එහෙත් මේ කිසිවක් ඇපල් සමාගමට සුපුරුදු මහා තාක්ශණික විප්ලව නොව, ක්‍රමික වැඩිදියුණු කිරීම් වන අතර මේ තාක්ශණයන් සියල්ලම දැනට වෙලඳපොලේ ඇති සැම්සුන්ග් හා HTC මාදිලිවල දකින්නට ලැබේ. 4G තාක්ශණය පවා දැනටමත් යුරෝපයේ, ඔස්ට්‍රේලියාවේ හා දකුණු කොරියාවේ ක්‍රියාත්මක වන අතර 4G තාක්ශණය අඩංගු ජංගම දුරකථන මාදිලි කිහිපයක් සැම්සුන්ග්, HTC සමාගම් ඉදිරිපත් කොට ඇත. ඒ අනුව ඇපල් අයිෆෝන්5 බොහෝ දෙනා බලාපොරොත්තුවුනු ආකාරයේ දැවැන්ත තාක්ශණික පිම්මක් නොවන බව ඔබටම වැටහෙනවා ඇත.

මෙයින් කියන්නට අදහස් කරන්නේ අයිෆෝන් 5 නරක බව නොවේ, හිතුවාට වඩා බොහෝ පහලින් තිබෙන, සැම්සුන්ග්, HTC පමණක් නොව නොකියා සමාගම පවා දැනටමත් ලඟාවී ඇති/ලෙහෙසියන්  පසුකල හැකි ඉලක්ක සපයන සාමාන්‍ය දුරකථනයක් බවය. ඔරිජිනල් අයිෆෝනයේ තිබූ රැඩිකල් බව iPhone 5වැනි සංස්කරණය තුල නැත.

එපමණක් නොව කලක් ජංගම දුරකථන ලෝකයේ පතාක යෝධයෙකු වුනු නොකියා සමාගම පවා අයිෆෝනයට වඩා රැඩිකල් තාක්ශණයන් ගෙන යුතු දුරකථන නිර්මාණය ක්‍රමින් සිය නැතිවීගිය බලපරාක්‍රමය රැක ගැනීමට උත්සහ කරමින් සිටී. වින්ඩෝස් 8 මෙහෙයුම් පද්ධතිය ඇසුරින් ක්‍රියාත්මක වන Nokia Lumia 920 දුරකථනය මෙයට උදාහරණයකි. ඇපල් අයිෆෝන් 5 තිබේ යයි බලාපොරොත්තු වුනු wireless charging තාක්ශණය නොකියා සමාගම දැනටමත් මෙම දුරකථනයට ලබාදී ඇත. එපමණක් නොව මෑතක් වනතුරු ආයෝජකයින් හා තාක්ශණ විශ්ලේෂකයින් කඩාවැටීමට ආසන්න ආයතනයක් ලෙස පැත්තකට දමා තිබූ Blackberry සමාගම පවා දැන නැවතත් සිය ආයුධ මුවහත් කරමින් සටනට එන්නට අර අඳින බවක් පෙනේ...

අනේ ඇපල්, මොකද මේ වෙන්නේ??  

කන්දක් විළිලා මී පැටියෙකු වැදුවා වත්ද?




4 comments:

රුසියාව මක් 5ක වේගයෙන් යන හයිපර්සොනික් බෝම්බ ප්‍රහාරක යානාවක් නිපදවයි?


PAK - DA ව්‍යාපෘතිය
කල්පිත PAK-DA නිර්මාණ ගණනාවෙන් එකක්  [One of many PAK-DA concepts]
PAK-DA (Perspektivnyi Aviatsionnyi Kompleks Dalney Aviatsyi)  හෙවත් දිගුදුර ගුවන් තරණය සඳහා තාක්ශණික ව්‍යාපෘතිය රුසියානු ගුවන් හමුදාව වෙනුවෙන් මක් 5-6 වේගයෙන් යුතු දිගුදුර බෝම්බ ප්‍රහාරක යානාවක් නිපැදවීමේ නිළ ව්‍යාපෘතියයි.  

PAK-FA යනුවෙන් හැඳින්වෙන තවත් මෙවැනිම ව්‍යාපෘතියක් රුසියානු ගුවන් හමුදාව වෙනුවෙන් F-22 සමකල හැකි ස්ටෙල්ත් ප්‍රහාරක යානයක් (PAK-FA T50) නිමැවීමේ වගකීම භාරව සිටින බව විද්‍යා ගවේශණ මීට පෙර වාර්තකල බව ඔබට මතක ඇති. PAK - FA : Sukhoi T50 ගැන මෙතනින් කියවන්න

PAK-DA යානය 2020 වනවිට සක්‍රිය සේවයට දායක කරගත යුතු බවත්, අධිවේගී දිගුදුර බෝම්බ ප්‍රහාරක යානාවක් රුසියානු ජාතික ආරක්ශාව අත්‍යාවශ්‍ය බවත්, නොබෝදා රූපවාහිණී සාකච්ඡාවකට එක්වුනු රුසියානු නියෝජ්‍ය අගමැති දිමිත්‍රි රොගොසින් මහතා පවසා සිටියේය. 
රුසියාවට තර්ජනය කරන ඕනෑම සතුරෙකුගේ ගුවන් ආරක්ශක පද්ධති පරාජය කරමින් ප්‍රහාරයක් එල්ල කිරීමේ හැකියාව රුසියාව සතු විය යුතුයි. අපට විසදාගැනීමට ඇත්තේ අපි අමෙරිකානුවන් මෙන් මන්දගාමී, එහෙත් ස්ටෙල්ත් හැකියාව ඇති B-2 වැනි බෝම්බ ප්‍රහරක යානයක් නිපදවනවාද, එහෙමත් නැතිනම් තාක්ශණයේ නිම් වළලු පුළුල්කරමින් හයිපර්සොනික් යානයක් නිපදවනවාද කියන එකයි. මම සිතන්නේ අපට හයිපර්සොනික් තාක්ශණය දියුණු කිරීමේදී ඇති දැවැන්ත අභියෝග එතරම් අපහසුවකින් තොරව ජයගත හැකියි.
හයිපර්සොනික් ගුවන්යානා නිපදවීමේ අභියෝග


හයිපර්සොනික් යානාවක් නිපදවීමේදී ජයගත යුතු තාක්ශණික අභියෝග රැසකි. පලමුවැන්න නම්, මක් 5කට වැඩි වේගයකින් යානයක් ත්වරණය කල හැකි ජවයක් ජනනය කල හැකි ජෙට් එන්ජින් නිපදවීමයි. දැනට ස්ක්‍රැම් ජෙට් නමින් හැඳින්වෙන ජෙට් එන්ජින් තාක්ශණයක් ඇති නමුත්, එවැනි ජෙට් එන්ජිමක් විනාඩි කිහිපයකට වඩා ක්‍රියාත්මක කොට තබාගැනීමට බටහිර විද්‍යාඥයින් හට හැකිවී නෑ. එමෙන්ම රුසියානුවන්ගේ හෝ චීනුන්ගේ ස්ක්‍රැම් ජෙට් පර්යේශණ පිලිබඳ වාර්තා ඇත්තේද අල්ප වශයෙන්.

ස්ක්‍රැම් ජෙට් යනු සුපර් සොනික් කම්බස්චන් රැම් ජෙට් (scram jet - supersonic combustion ramjet) යන්නට කෙටි යෙදුමකි. මෙම එන්ජින්වල ඇති තවත් ගැටලුවක් නම්, එම එන්ජින් ක්‍රියාත්මක වීම සඳහා එය සවිකල යානය ශබ්දයේ වේගය පසුකරමින් ගමන්කල යුතුවීමයි. මෙම එන්ජින් ක්‍රියාත්මක වන්නේ එවිට පමණකි. එනම් නිසලව ඇති යානයක් ගුවන් ගත කිරීමට ස්ක්‍රැම් ජෙට් වලට නොහැකියි. දැනට පර්යේශණවලදී සිදුකරන්නේ මෙවැනි එන්ජින් සවිකල කුඩා පර්යේශණ යානා ශබ්දයේ වේගයන් යාහැකි විශාල ගුවන් යානයක බඳහි රඳවා ගුවනට යැවීමයි. ගුවනේදි, මව් යානය ශබ්දයේ වේගයෙන් යනවිට ස්ක්‍රැම් ජෙට් එන්ජිම සහිත උප යානය නිදහස් කරන අතර එවිට එහි ඇති ස්ක්‍රැම් ජෙට් එන්ජිම දල්වාගත හැකි වනවා.

ප්‍රායෝගිකව ස්ක්‍රැම් ජෙට් එන්ජින් ඇති යානාවක් නිපදවීමේ ප්‍රධාන ගැටලුව වන්නේ මෙයයි. යානයට ශබ්දයේ වේගය තෙක්  ජවය ලබාදිය හැකි සාමාන්‍ය ජෙට් එන්ජින් දෙකක්ද සවිකීරීම එක් විසඳුමක් වන නමුත් එවිට යානයේ බර අධිකවී, විශාල ඉන්ධන ප්‍රමාණයක්ද ගෙනයා යුතු වීමෙන්, යානයේ යුධමය හැකියාවන් අවම වනවා.

තවත් එක් විසඳමක් නම් හයිබ්‍රිඩ් වර්ගයේ ද්විත්ව ක්‍රියාකාරී එන්ජිමක් නිර්මාණය කිරීමයි. එනම් අඩු වේගවලදී සාමාන්‍ය ජෙට් එන්ජිමක් මෙන් ක්‍රියාත්මකවී පසුව ස්ක්‍රැම් ජෙට් එන්ජිමක් ලෙස පරිවර්තනය විය හැකි එන්ජිමක් නිපැදවීමෙයි. මෙවැනි එන්ජිමක් ප්‍රායෝගික වන නමුදු අතිශයින්ම සංකීර්ණ නිර්මාණයක් වන බැවින් ප්‍රායෝගිකව යුධ ගුවන්යානයක භාවිතයට ගැනීමට තවත් වසර ගණනාවක් වැඩි දියුණු කලයුතු වනවා.

හයිපර්සොනික් තාක්ශණයේ අමෙරිකානු පරාජයන්

DARPA’s HTV Falcon - ඩාර්පා ආතනය ගුවන්ගත කල හයිපර්සොනික් ෆෝල්කන් යානය, එහි පාළණය කරගත නොහැකිවූ අධික වේගය නිසා යානය ආරක්ශා කරන තාප භාදකය ගැළවී අණතුරට පත්වුනා. පසුගිය මැයි මාසයේ සිදුවුනු මේ අණතුර පිලිබඳව විද්‍යා ගවේශණ තැබූ සටහන මෙතනින් කියවන්න.


DARPA / NASA / Boeing X-51 WaveRider - ස්ක්‍රැම් ජෙට් එන්ජිමක් ආධාරයෙන් මක් 6ක වේගයෙන් පියාසර කිරීමට නිර්මාණය කල, නියමු රහිත රොබෝ යානයක් වූ X-51 ඩාර්පා, නාසා ආයතන හා බෝයිං ගුවන්යානා සමාගමේ හවුල් ව්‍යාපෘතියක්. පසුගිය අගෝස්තු 14වැනිදා පරීකශණ පියාසැරියකදී X-51 යානයේ පාළණ පෘශ්ඨයක සිදුවුනු ක්‍රියාවිරහිතවීමක් නිසා පාළණයෙන් මිදී මුහුදට කඩා වැටුනා.

PAK-DA කල්පිත නිමැවුම්

PAK-DA ව්‍යාපෘතිය ඉලක්ක සපුරාගනිමින් වේගයෙන් ඉදිරියට යන බවත් 2020දී සේවයට අනුයුක්ත කල හැකි හයිපර්සොනික් දිගුදුර බෝම්බ හෙලන යානාවක් නිර්මාණය කෙරෙමින් පවතින බවටත් සිදුකල ප්‍රකාශ හැරුනුකොට මෙම යානය කෙසේ නිර්මාණය වන්නේද? එය දැනට පවතින දුගු දුර බෝම්බ හෙලන යානයක අනුවර්තනයක්ද? නැතහොත් අලුත්ම රැඩිකල් නිර්මාණයක්ද යන්න පිලිබඳව රුසියානු ගුවන් හමුදාව හෝ දැවැන්ත බෝම්බ හෙළන යානා නිර්මාණය කරණ ටුපොලෙෆ්, ඉල්යුශින්, ඇන්ටනෝෆ් වැනි රුසියානු සමාගම් හෝ කිසිදු ඉඟියක් පලකොට නෑ.

රුසියානු හයිපර්සොනික් බෝම්බ හෙළන යානය දැනට රුසියානු හමුදාව සතු ප්‍රභලම දිගුදුර බෝම්බ හෙළන යානය වන ටුපොලෙෆ් Tu-160 යානය අනුසාරයෙන් නිපදවෙනු ඇතැයි අදහසක් පවතිනවා. නේටෝ සංවිධානය "බ්ලැක්-ජැක්" යන කේතයෙන් හඳුන්වන ටුපොලෙෆ් Tu-160 යානය දැනට ලොව ඇති වේගවත්ම මෙන්ම බලසම්පන්නම බෝම්බ හෙළන යානයයි. මක් 2.0ක උපරිම වේගයකුත්, මක් 0.9 සාමාන්‍ය වේගයකුත් ඇති යානයට ටොන් 40ක බෝම්බ හෝ ගුවනේ සිටි විදිය හැකි කෲස් මිසයිල රැගෙන යා හැකි අතර නොනවත්වා සැතපුම් 12,000ක් පියාසර කල හැකි වනවා.

යානාවේ හැඩරුව පිලිබඳව මෙතෙක් ඉදිරිපත්වී ඇති බෝහෝ කල්පිත නිර්මාණ, එය Tupolev Tu-160 යානය අනුසාරයෙන් නිර්මාණය වනු ඇතැයි යන උපකළ්පණයෙන් ඉදිරිපත් කල ඒවා වනවා. 







2 comments:

ලොව ප්‍රථම bionic ඇස අන්ධ කාන්තාවකට පෙනීම ලබාදෙයි

BIONIC

Bionic යනු ස්වභාවධර්මයේ නිර්මාණ අනුකරණය කරමින් විවිධ ඉන්ජිනේරු නිර්මාණ කිරීමයි. බයොනික් යන යෙදුම ලොව හඳුන්වාදුන්නේ ජැක් ස්ටීල් නම් වෛද්‍යවරයායි. අමරිකානු ගුවන්හමුදාව වෙනුවෙන් පර්යේෂණ වල යෙදුනු ඔහු, 1958දී සිය පර්යේෂණ විස්තර කිරීම සඳහා බයොනික් යන නාමය භාවිතා කල අතර 1960දී එය නිළවශයෙන් විද්‍යා ශබ්දකෝශයට එකතුවිය. 

BIONIC IN FICTION

බයොනික් වදන ලොව ජනප්‍රිය වූයේ 1974වසරේදී එලිදැක්වුනු "Six Million Dollar Man" නම් රූපවාහිනී විද්‍යා ප්‍රබන්ධ කථාමාලාව මගිනි. ඇමරිකාවේ ABC නාලිකාව මගින් විකාශය කරන ලද මෙය, 1980-1982 කාලය තුලදී, එකල TV Sri Lanka ලෙස හැඳින්වුනු (දැන් ITN) රූපවාහිනී චැනලය මගින් ශ්‍රී ලංකාවේ විකාශණය කරන ලදී. 

සික්ස් මිලියන් ඩොලර් මෑන් කාතාමාලාවේ කතා නායකයා ස්ටීව් ඔස්ටින් නම් අමෙරිකානු ගුවන් හමුදාවේ ගගනගාමියෙකි. පර්යේශණ මට්ටමේ පැවති කුඩා ශටල් යානයකින් අභ්‍යවකාශයට යන ඔහු නැවත පෘථිවිය බලා පැමිනෙද්දි යානය අණතුරට පත්වීමෙන් දැඩිලෙස තුවාල ලබයි. මරණාසන්නව සිටින ස්ටීව් හට අමෙරිකානු රහස් ඔත්තු සේවයක් වන Office of Scientific Intelligence මගින් ඔහුගේ විනාශවී ගිය සිරුරු කොටස් වලට බයොනික් කොටස් බද්ධකොට ඔහුගේ ජීවිතය රැක ගන්නා අතර ස්ටීව් එම රහස් ඔත්තුසේවයේ ඒජන්තයෙකු බවට පත්වේ. කථානායක ස්ටීව් හට Six Million Dollar Man යන නම පට බැඳුනේ ඔහුට බයොනික් අවයව ලබාදීමේ මුලුවියදම අමෙරිකානු ඩොලර් මිලියන 6ක් වූ බැවිනි (අද ඩොලර් වටිනාකමින් මිලියන 31ක් පමණ )

දකුණු අත, පාද යුගල හා වම් ඇස වෙනුවට බයොනික් අංගෝපාංග බද්ධ කරන ලද අතර මෙම උපාංග මගින් ඔහුට සුපිරි ශක්තියක් ලබාදේ. බයොනික් පාද නිසා පැයට කිලෝමීටර් 100ක වේගයෙන් දිව යාමේ හැකියාව ලැබෙන අතර, බයොනික් දකුණතහි ශක්තිය බුල්ඩෝසරයක ශක්තියට සමානවේ. වම් බයොනික් ඇස 20:1 zoom බලයක් ඇති ඩිජිටල් කැමරාවකින් සමන්විතය. එමනිසා බොහෝ දුර සිදුවෙනදේ බලාගැනීමේ හැකියාව ඔහුට ඇත.

අතිශයින්ම ජනප්‍රියවුනු මෙය කථාංග 99ක් දක්වා විහිදුනු අතර රූපවාහිනී චිත්‍රපට (made for TV movies) 6ක්ද ඒ අනුසාරයෙනු නිපදැවුනු අතර ඊට අනුබද්ධ The Bionic Woman නම් වැඩසටහන් මාලාවක්ද නිමැවිනි. එයද ඉතා ජනප්‍රිය වූ බැවින්  Bionic Woman, Six Million Dollar Man චරිත දෙකම එක් කල රූපවාහිනී චිත්‍රපට කිහිපයක්ද බිහිවිය.

Bionic eye from Bionics Institute


ඔස්ට්‍රේලියාවේ බයොනික්ස් ඉන්ස්ටිටියුට් නම් පර්යේෂණායතනයේ විද්‍යාඥයින් විසින් බයොනික් ඇසක් සාර්ථකව බද්ධ කොට ඇත. සම්පූර්ණයෙන්ම අන්ධව සිටි කාන්තාවකට, මේ බයෝනික් ඇස නිසා දැන් යම් තරමකට ආලෝකය පිලිබඳව සංවේදනය දැනෙන අතර යම් තරමකට හැඩයන් හඳුනාගැනීමේ හැකියාව ලැබී ඇත. බයොනික් ඇස බද්ධ කිරීමේ ශළ්‍යකර්මයෙන් අනතුරුව මාධ්‍යට අදහස් දැක්වූ ඇය...

"කුමක් අපේක්ශා කරන්නදැයි මට සිතාගන්නවත් හැකියාවක් තිබුනේ නෑ, ඒත් දෑස් විවර කර මඳවේලාවකින් මට දිස්නයක් මෙන් යමක් පෙනුනා....ඒක හිතාගන්නටත් බැරි තරමේ අපූර්ව අත්දැකීමක්....."

බයොනික් ඇස ක්‍රියාකරන්නේ මෙහෙමයි


ඇස් කුහරයට බද්ධකල අක්ශිගෝලය තුල ඇති කැමරාව, දර්ශනයේ ඩිජිටල් අනුරුවක් මයික්‍රෝප්‍රොසෙසරයට යවන අතර, එය මගින් එම ඩිජිටල් අනුරුව දෘෂ්ටිවිතානයට සංවේදී විද්‍යුත් සංඥා බවට හරවයි. එම සංඥා සියුම් වයරයක් මගින් දෘශ්ඨිවිතානය වෙත ගෙනයයි. මෙම රෝගියාගේ දෘශ්ඨිවිතානය ආවේනික රෝගී තත්වයක් නිසා විනාශව ගොස් ඇති අතර දෘශ්ඨිවිතානය වෙනුවට බද්ධකොට ඇති උපාංගය මගින් මයික්‍රෝප්‍රොසෙසරයෙන් ලැබෙන සංඥා ලබාගෙන ප්‍රකාශ ස්නායුව (optical nerve) උත්තේජනය කරන අතර, ප්‍රකාශ ස්නායුවෙන් ලැබෙන සංඥා මගින් රූපය හඳුනාගනී.

දැනට බද්ධකොට ඇති කැමරාව මෙන්ම ප්‍රකාශ ස්නායුව උත්තේජනය කරන ඉලෙක්ට්‍රොනික උපාංගයද ඉතා සීමිත දත්ත ප්‍රමාණයක් ගෙනයාහැකි ඒවා වන අතර, අනාගතයේදී වඩා ප්‍රභල කැමරා, හා වඩා වැඩි ධාරිතාවයකින් යුතු කෘත්‍රිම දෘශ්ඨිවිතාන මගින් වඩා පැහැදිලි පෙනුමක් ලබාදීමට හැකිවනු ඇතැයි බලාපොරොත්තුවේ.

2 comments: