2026 වසර උදාවීමට පෙර හැකි උපරිම ස්මාර්ට් දුරකථන සහ ටැබ්ලට් පරිගණක ප්රමාණයකට තම නවතම HyperOS 3 යාවත්කාලීනය ලබාදීමට Xiaomi සමාගම මේ වන විට දැඩි වෙහෙසක් ගනිමින් සිටින බව වාර්තා වෙනවා.
Android 16 පද්ධතිය පදනම් කරගනිමින් නිර්මාණය වූ HyperOS 3 මෙහෙයුම් පද්ධතිය, 2025 දෙසැම්බර් මස අවසන් දින කිහිපය වන විට ගෝලීය වෙළෙඳපොළේ පවතින උපාංග විසි හතරකට අධික ප්රමාණයකට නිකුත් කර තිබෙනවා.
Xiaomi සිය නිල Community Forum හරහා නිවේදනය කළේ Redmi K60 මාදිලියේ ස්මාර්ට් දුරකථන මෙන්ම, Redmi Note 13, Note 14 සහ Note 15 කාණ්ඩයේ දුරකථන සඳහා මේ වන විට ස්ථාවර HyperOS 3 යාවත්කාලීනයන් නිකුත් කර ඇති බවයි. මීට අමතරව Poco M6 Pro සහ Xiaomi Pad 6 Pro යන උපාංග සඳහා ද චීනය තුළ මෙම යාවත්කාලීනය ලබා දී තිබෙනවා.
එමෙන්ම Redmi Note 13 Pro 4G සහ Poco M6 Pro මාදිලිවල ගෝලීය වෙළෙඳපොළ සංස්කරණයන්ට (Global variants) ද මෙම යාවත්කාලීනය ලැබීම දැන් ආරම්භ වී තිබෙනවා.
යුරෝපීය පරිශීලකයෙකු වාර්තා කරන පරිදි මෙම නව යාවත්කාලීනය ගොනු ප්රමාණයෙන් (File size) GB 5.3ක් පමණ වන බව සඳහන් වෙනවා.
පසුගිය ඔක්තෝබර් මාසයේදී Xiaomi 15 මාදිලියෙන් ආරම්භ වූ මෙම යාවත්කාලීන කිරීම් මාලාව, අදියර කිහිපයක් යටතේ 2026 මාර්තු මාසය දක්වා ක්රියාත්මක කිරීමට සැලසුම් කර තිබෙනවා.
ඒ අනුව Xiaomi 14 Ultra සහ 14T Pro ඇතුළත් Xiaomi 14 මාදිලියේ උපාංග සඳහා දෙසැම්බර් සහ ජනවාරි මාසවලදී මෙම යාවත්කාලීනය හිමිවනු ඇත.
මීට අමතරව Xiaomi 13 සහ 12 වැනි පැරණි ප්රමුඛ පෙළේ (Flagship) දුරකථන සඳහා 2025 දෙසැම්බර් සිට 2026 මාර්තු දක්වා කාලය තුළ HyperOS 3 පද්ධතිය ලබාදීමට නියමිතව තිබෙනවා.
Comments
Post a Comment