Related Posts Plugin for WordPress, Blogger...

Thursday, 15 August 2013

නූතන මානවයා ආයුධ තනන්නට උගත්තේ නියැන්ඩර්තාල් මානවයින්ගෙන්ද?


ඔවුන් වසර 40,000ක් තරම් මෑත අතීතය වනතෙක්ම නූතන මානවයින් සමග සමකාලීනව ජීවත්වී ඉක්මණින්  අතුරුදහන්වී මිනිස් ඉතිහාසයෙන් සමුගෙන ගියෝය. යුරෝපයේ සිට මැදපෙරදිග ඇතුලුව ඈත බටහිර ආසියාව දක්වාම පැතිර සිටි මොවුන් ඉතා ඉක්මණින් වඳවීයාම නූතන මිනිසා අප්‍රිකා මහද්වීපයෙන් ඔබ්බට පැතිරීයාමත් සමගම එනම් මීට වසර 40,000කට පෙර ආරම්භවූ බැවින් නියැන්ඩර්තාලුන්ගේ වඳවීයාමට නූතන මිනිසා ආහාර පිණිස දඩයම් සඳහා දුන් තරඟය හේතුවන්නට ඇතැයි මතවාදයක් බොහෝකල් පැවතිනි. 

නූතන මිනිසා නියැන්ඩර්තාලුන්ට වඩා ඥාණවන්තවීම, වඩා හොඳ ආයුධ නිපදවා ගැනීම, වඩා සමාජශීලීව, සාමූහිකව දඩයම් කිරීම වැනි කරුණු නිසා නූතන මිනිසා අප්‍රිකාවෙන් පිටත් වී පැමිණි සෑම තැනකින්ම නියැන්ඩර්තාලුන් අභාවයට ගිය බව විශ්වාස කෙරුනි.

බොහෝකලක් මානව විද්‍යාඥයින් අතර පිලිගැනීමට බඳුන්වී තිබූ මේ මතවාදය බිඳහෙලීමට යෙදෙන කරුණු දැන් අනාවරණය කරගනිමින් පවතී. නූතන ජාන තාක්ශණය මගින් මිනිස් ජාන සම්පූර්ණයෙන්ම විශ්ලේෂණයට බඳුන්කොට විද්‍යාත්මකව අධ්‍යයනය කොට ඇති නිසා මේ අලුත් තොරතුරු කරලියට එමින් පවතී.

මින් එක් තොරතුරක් නම් නූතන මිනිස් ජාන වලින් 4%ක පමණ ප්‍රමාණයක නියැන්ඩර්තාල් ජාන අඩංගු බවත්, එම ජාන නිසැකයෙන්ම නියැන්ඩර්තාලුන් හා නූතන මානවයින් අතර සිදුවූ අන්තර්-ගෝත්‍ර ලිංගික සබඳතා නිසා බිහිවුනු දාරකයින් එම නියැන්ඩර්/නූතන මානව දෙවර්ගයේම ජාන ඇතිව බිහිවීම නිසා බවත් තහවුරුවී තිබේ.

ඒ අනුව, නූතන මිනිසා නියැන්ඩර්තාලුන්ගේ හතුරන් වූවට වඩා අන්‍යෝන්‍ය සබඳතා මේ මානව ගෝත්‍ර දෙක අතර තිබී ඇත. නූතන මිනිසාගේ ව්‍යාප්තියත් සමග නියැන්ඩර්වරුන් හෙමිහිට අභාවයට යන්නේ කෙසේද යන්න මෙම අලුත් දත්ත වලින් පැහැදිලි නොවූවත්, නියැන්ඩර්වරුන්ගේ විනාශය ගෙනවේ නූතන මානවයාය යන අපවාදයෙන් ගැලවීමට මෙම ජාන දත්ත ප්‍රමාණවත්ය.


එමෙන්ම නියැන්ඩර් වරුන්ගේ ආයුධ හා නූතන මානව ආයුධ පිලිබඳව පර්යේෂණ කරන විද්‍යාඥයින් තවත් අපූරු සොයාගැනීමක් සිදුකොට තිබේ. එනම් නියැන්ඩර් වරුන් පදිංචිව සිටි ප්‍රදේශයකින් සොයාගත් ආයුධ වලට හැම අතින්ම සමාන ආයුධ එම ප්‍රදේශයේම පදිංචියට ආ නූතන මානවයින්ද නිමවා තිබීමයි. එම ප්‍රදේශයේ නියැන්ඩර්වරුන්ට පෙර නූතන මානවයින් නොසිටි නිසාත්, මානවයින් පැමිනියේ එම ප්‍රදේශයේ නියැන්ඩර්වරුන් ස්ථාවර ජනාවාස පිහිටුවාගෙන වසර දහස්ගණනකට පසුව බැවිනුත්, නියැන්ඩර් වරුන්, මානවයින්ගෙන් මෙම ආයුධ ලබාගත්තා හෝ තනන්නට ඉගනගත්ත යන තර්කය වලංගු නොවේ. දැනට විද්‍යාඥයින් විශ්වාස කරන ආකාරයට මෙලෙස නියැන්ඩර් වරුන්ගෙන පසුව ආ මානවයින්ද නියැන්ඩර් වරුන් තැනූ ආයුධ වලට සමාන ඒවා තනනට ඇත්තේ නියැන්ඩර්වරුන් ගෙන් එම ආයුධ තනන ආකාරය ඉගෙන ගත්  බැවිනි. එනම් නූතන මානවයාගේ ගුරුවරුන් ලෙස මෙන්ම සහකරු/සහකාරියන් ලෙසත් නි‍යැන්ඩර්වරු කටයුතුකොට තිබේ..
Related Posts Plugin for WordPress, Blogger...